রঘুবংশং সর্গ ১১

|| কালিদাসকৃতং রঘুবংশম্ সর্গ ১১ ||

কৌশিকেন স কিল ক্ষিতীশ্বরো রামমধ্বরবিঘাতশান্তয়ে |
কাকপক্ষধরমেত্য যাচিতস্তেজসাং হি ন বয়ঃ সমীক্ষ্যতে || ১১-১||
কৃচ্ছ্রলব্ধমপি লব্ধবর্ণভাক্তং দিদেশ মুনয়ে সলক্ষ্মণম্ |
অপ্যসুপ্রণয়িনাং রঘোঃ কুলে ন ব্যহন্যত কদাচিদর্থিতা || ১১-২||
যাবদাদিশতি পার্থিবস্তয়োর্নির্গমায় পুরমার্গসংস্ক্রিয়াম্ |
তাবদাশু বিদধে মরুৎসখৈঃ সা সপুষ্পজলবর্ষিভির্ঘনৈঃ || ১১-৩||
তৌ নিদেশকরণোদ্যতৌ পিতুর্ধন্বিনৌ চরণয়োর্নিপেততুঃ |
ভূপতেরপি তয়োঃ প্রবৎস্যতোর্নম্রয়োরুপরি বাষ্পবিন্দবঃ || ১১-৪||
তৌ পিতুর্নয়নজেন বারিণা কিংচিদুক্ষিতশিখণ্ডকাবুভৌ |
ধন্বিনৌ তমৃষিমন্বগচ্ছতাং পৌরদৃষ্টিকৃতমার্গতোরণৌ || ১১-৫||
লক্ষ্মণানুচরমেব রাঘবং নেতুমৈচ্ছদৃষিরিত্যসৌ নৃপঃ |
আশিষং প্রয়ুয়ুজে ন বাহিনীং সা হি রক্ষণবিধৌ তয়োঃ ক্ষমা || ১১-৬||
মাতৃবর্গচরণস্পৃশৌ মুনেস্তৌ প্রপদ্য পদবীং মহৌজসঃ |
রেচতুর্গতিবশাৎপ্রবর্তিনৌ ভাস্করস্য মধুমাধবাবিব || ১১-৭||
বীচিলোলভুজয়োস্তয়োর্গতং শৈশবাচ্চপলমপ্যশোভত |
তোওয়দাগম ইবোদ্ধ্যভিদ্যয়োর্নামধেয়সদৃশং বিচেষ্টিতম্ || ১১-৮||
তৌ বলাতিবলয়োঃ প্রভাবতো বিদ্যয়োঃ পথি মুনিপ্রদিষ্টয়োঃ |
মম্লতুর্ন মণিকুট্টিমোচিতৌ মাতৃপার্শ্বপরিবর্তিনাবিব || ১১-৯||
পূর্ববৃত্তকথিতৈঃ পুরাবিদঃ সানুজঃ পিতৃসখস্য রাঘবঃ |
উহ্যমান ইব বাহনোচিতঃ পাদচারমপি ন ব্যভাবয়ৎ || ১১-১০||
তৌ সরাংসি রসবদ্ভিরম্বুভিঃ কূজিতৈঃ শ্রুতিসুখৈঃ পতত্রিণঃ |
বায়বঃ সুরভিপুষ্পরেণুভিশ্ছায়য়া চ জলদাঃ সিষেবিরে || ১১-১১||
নাম্ভসাং কমলশোভিনাং তথা শাখিনাং চ ন পরিশ্রমচ্ছিদাম্ |
দর্শনেন লঘুনা যথা তয়োঃ প্রীতিমাপুরুভয়োস্তপস্বিনঃ || ১১-১২||
স্থাণুদগ্ধবপুষস্তপোবনং প্রাপ্য দাশরথিরাত্তকার্মুকঃ |
বিগ্রহেণ মদনস্য চারুণা সোঽভবৎপ্রতিনিধির্ন কর্মণা || ১১-১৩||
তৌ সুকেতুসুতয়া খিলীকৃতে কৌশিকাদ্বিদিতশাপয়া পথি |
নিন্যতুঃ স্থলনিবেশিতাটনী লীলয়ৈব ধনুষী অধিজ্যতাম্ || ১১-১৪||
জ্যানিনাদমথ গৃহ্ণতী তয়োঃ প্রাদুরাস বহুলক্ষপাছবিঃ |
তাডকা চলকপালকুণ্ডলা কালিকেব নিবিডা বলাকিনী || ১১-১৫||
তীব্রবেগধুতমার্গবৃক্ষয়া প্রেতচীবরবসা স্বনোগ্রয়া |
অভ্যভাবি ভরতাগ্রজস্তয়া বাত্যয়েব পিতৃকাননোত্থয়া || ১১-১৬||
উদ্যতৈকভুজয়ষ্টিমায়তীং শ্রোণিলম্বিপুরুষান্ত্রমেখলাম্ |
তাং বিলোক্য বনিতাবধে ঘৃণাং পত্রিণা সহ মুমোচ রাঘবঃ || ১১-১৭||
যচ্চকার বিবরং শিলাঘনে তাডকোরসি স রামসায়কঃ |
অপ্রবিষ্টবিষয়স্য রক্ষসাং দ্বারতামগমদন্তকস্য তৎ || ১১-১৮||
বাণভিন্নহৃদয়া নিপেতুষী সা স্বকাননভুবং ন কেবলাম্ |
বিষ্টপত্রয়পরাজয়স্থিরাং রাবণশ্রিয়মপি ব্যকম্পয়ৎ || ১১-১৯||
রামমন্মথশরেণ তাডিতা দুঃসহেন হৃদয়ে নিশাচরী |
গন্ধবদ্রুধিরচন্দনোক্ষিতা জীবিতেশবসতিং জগাম সা || ১১-২০||
নৈরৃতঘ্নমথ মন্ত্রবন্মুনেঃ প্রাপদস্ত্রমবদানতোষিতাৎ |
জ্যোতিরিন্ধননিপাতি ভাস্করাৎসূর্যকান্ত ইব তাডকান্তকঃ || ১১-২১||
বামনাশ্রমপদং ততঃ পরং পাবনং শ্রুতমৃষেরুপেয়িবান্ |
উন্মনাঃ প্রথমজন্মচেষ্টিতান্যস্মরন্নপি বভূব রাঘবঃ || ১১-২২||
আসসাদ মুনিরাত্মনস্ততঃ শিষ্যবর্গপরিকল্পিতার্হণম্ |
বদ্ধপল্লবপুটাঞ্জলিদ্রুমং দর্শনোন্মুখমৃগং তপোবনম্ || ১১-২৩||
তত্র দীক্ষিতমৃষিং ররক্ষতুর্বিঘ্নতো দশরথাত্মজৌ শরৈঃ |
লোকমন্ধতমসাৎক্রমোদিতৌ রশ্মিভিঃ শশিদিবাকরাবিব || ১১-২৪||
বীক্ষ্য বেদিমথ রক্তবিন্দুভির্বন্ধুজীবপৃথুভিঃ প্রদূষিতাম্ |
সংভ্রমোঽভবদপোঢকর্মণামৃৎবিজাং চ্যুতবিকঙ্কতস্রুচাম্ || ১১-২৫||
উন্মুখঃ সপদি লক্ষমণাগ্রজো বাণমাশ্রয়মুখাৎসমুদ্ধরন্ |
রক্ষসাং বলমপশ্যদম্বরে গৃধ্রপক্ষপবনেরিতধ্বজম্ || ১১-২৬||
তত্র যাবধিপতী মখদ্বিষাং তৌ শরব্যমকরোৎস নেতরান্ |
কিং মহোরগবিসর্পিবিক্রমো রাজিলেষু গরুডঃ প্রবর্ততে || ১১-২৭||
সোঽস্ত্রমুগ্রজবমস্ত্রকোবিদঃ সংদধে ধনুষি বায়ুদৈবতম্ |
তেন শৈলগুরুমপ্যপাতয়ৎপাণ্ডুপত্রমিব তাডকাসুতম্ || ১১-২৮||
যঃ সুবাহুরিতি রাক্ষসোঽপরস্তত্র তত্র বিসসর্প মায়য়া |
তং ক্ষুরপ্রশকলীকৃতং কৃতী পত্রিণাং ব্যভজদাশ্রমাদ্বহিঃ || ১১-২৯||
ইত্যপাস্তমখবিঘ্নয়োস্তয়োঃ সাংযুগীনমভিনন্দ্য বিক্রমম্ |
ঋৎবিজঃ কুলপতের্যথাক্রমং বাগ্যতস্য নিরবর্তয়ন্ক্রিয়াঃ || ১১-৩০||
তৌ প্রণামচলকাকপক্ষকৌ ভ্রাতরাববভৃথাপ্লুতো মুনিঃ |
আশিষামনুপদং সমস্পৃশদ্দর্ভপাটলতলেন পাণিনা || ১১-৩১||
তং ন্যমন্ত্রয়ত সংভৃতক্রতুর্মৈথিলঃ স মিথিলাং ব্রজন্বশী |
রাঘবাবপি নিনায় বিভ্রতৌ তদ্ধনুঃশ্রবণজং কুতূহলম্ || ১১-৩২||
তৈঃ শিবেষু বসতির্গতাধ্বভিঃ সায়মাশ্রমতনুষ্বগৃহ্যত |
যেষু দীর্ঘতপসঃ পরিগ্রহো বাসবক্ষণকলত্রতাং যয়ৌ || ১১-৩৩||
প্রত্যপদ্যত চিরায় যৎপুনশ্চারু গৌতমবধূঃ শিলাময়ী |
স্বং বপুঃ স কিল কিল্বিষচ্ছিদাং রামপাদরজসামনুগ্রহঃ || ১১-৩৪||
রাঘবান্বিতমুপস্থিতং মুনিং তং নিশম্য জনকো জনেশ্বরঃ |
অর্থকামসহিতং সপর্যয়া দেহবদ্ধমিব ধর্মমভ্যগাৎ || ১১-৩৫||
তৌ বিদেহনগরীনিবাসিনাং গাং গতাবিব দিবঃ পুনর্বসূ |
মন্যতে স্ম পিবতাং বিলোচনৈঃ পক্ষ্মপাতমপি বঞ্চনাং মনঃ || ১১-৩৬||
যূপবত্যবসিতে ক্রিয়াবিধৌ কালবিৎকুশিকবংশবর্ধনঃ |
রামমিষ্বসনদর্শনোৎসুকং মৈথিলায় কথয়াংবভূব সঃ || ১১-৩৭||
তস্য বীক্ষ্য ললিতং বপুঃ শিশোঃ পার্থিবঃ প্রথিতবংশজন্মনঃ |
স্বং বিচিন্ত্য চ ধনুর্দুরানমং পীডিতো দুহিতৃশুল্কসংস্থয়া || ১১-৩৮||
অব্রবীচ্চ ভগবন্মতঙ্গজৈর্যদ্বৃহদ্ভিরপি কর্ম দুষ্করম্ |
তত্র নাহমনুমন্তুমুৎসহে মোক্ষবৃত্তি কলভস্য চেষ্টিতম্ || ১১-৩৯||
হ্রেপিতা হি বহবো নরেশ্বরাস্তেন তাত ধনুষা ধনুর্ভৃতঃ |
জ্যানিঘাতকঠিনৎবচো ভুজান্স্বান্বিধূয় ধিগিতি প্রতস্থিরে || ১১-৪০||
প্রত্যুবাচ তমৃষির্নিশম্যতাং সারতোঽযমথবা গিরা কৃতম্ |
চাপ এব ভবতো ভবিষ্যতি ব্যক্তশক্তিরশনির্গিরাবিব || ১১-৪১||
এবমাপ্তবচনাৎস পৌরুষং কাকপক্ষকধরেঽপি রাঘবে |
শ্রদ্দধে ত্রিদশগোপমাত্রকে দাহশক্তিমিব কৃষ্ণবর্ত্মনি || ১১-৪২||
ব্যাদিদেশ গণশোঽথ পার্শ্বগান্কার্মুকাভিহরণায় মৈথিলঃ |
তৈজসস্য ধনুষঃ প্রবৃত্তয়ে তোয়দানিব সহস্রলোচনঃ || ১১-৪৩||
তৎপ্রসুপ্তভুজগেন্দ্রভীষণং বীক্ষ্য দাশরথিরাদদে ধনুঃ |
বিদ্রুতক্রতুমৃগানুসারিণং যেন বাণমসৃজৎবৃষধ্বজঃ || ১১-৪৪||
আততজ্যমকরোৎস সংসদা বিস্ময়স্তিমিতনেত্রমীক্ষিতঃ |
শৈলসারমপি নাতিয়ত্নতঃ পুষ্পচাপমিব পেশলং স্মরঃ || ১১-৪৫||
ভজ্যমানমতিমাত্রকর্ষণাত্তেন বজ্রপরুষস্বনং ধনুঃ |
ভার্গবায় দৃঢমন্যবে পুনঃ ক্ষত্রমুদ্যতমিব ন্যবেদয়ৎ || ১১-৪৬||
দৃষ্টসারমথ রুদ্রকার্মুকে বীর্যশুল্কমভিনন্দ্য মৈথিলঃ |
রাঘবায় তনয়াময়োনিজাং রূপিণীং শ্রিয়মিব ন্যবেদয়ৎ || ১১-৪৭||
মৈথিলঃ সপদি সত্যসংগরো রাঘবায় তনয়াময়োনিজাম্ |
সংনিধৌ দ্যুতিমতস্তপোনিধেরগ্নিসাক্ষিক ইবাতিসৃষ্টবান্ || ১১-৪৮||
প্রাহিণোচ্চ মহিতং মহাদ্যুতিঃ কোসলাধিপতয়ে পুরোধসম্ |
ভৃত্যভাবি দুহিতুঃ পরিগ্রহাদ্দিশ্যতাং কুলমিদং নিমেরিতি || ১১-৪৯||
অন্বিয়েষ সদৃশীং স চ স্নুষাং প্রাপ চৈনমনুকূলবাগ্দ্বিজঃ |
সদ্য এব সুকৃতাং হি পচ্যতে কল্পবৃক্ষফলধর্মি কাঙ্ক্ষিতম্ || ১১-৫০||
তস্য কল্পিতপুরস্ক্রিয়াবিধেঃ শুশ্রুবান্বচনমগ্রজন্মনঃ |
উচ্চচাল বলভিৎসখো বশী সৈন্যরেণুমুষিতার্কদীধিতিঃ || ১১-৫১||
আসসাদ মিথিলাং স বেষ্টয়ন্পীডিতোপবনপাদপাং বলৈঃ |
প্রীতিরোধমসহিষ্ট সা পুরী স্ত্রীব কান্তপরিভোগমায়তম্ || ১১-৫২||
তৌ সমেত্য সময়ে স্থিতাবুভৌ ভূপতী বরুণবাসবোপমৌ |
কন্যকাতনয়কৌতুকক্রিয়াং স্বপ্রভাবসদৃশীং বিতেনতুঃ || ১১-৫৩||
পার্থিবীমুদবহদ্রঘূদ্বহো লক্ষ্মণস্তদনুজামথোর্মিলাম্ |
যৌ তয়োরবরজৌ বরৌজসৌ তৌ কুশধ্বজসুতে সুমধ্যমে || ১১-৫৪||
তে চতুর্থসহিতাস্ত্রয়ো বভুঃ সূনবো নববধূপরিগ্রহাঃ |
সামদানবিধিভেদনিগ্রহাঃ সিদ্ধিমন্ত ইব তস্য ভূপতেঃ || ১১-৫৫||
তা নরাধিপসুতা নৃপাত্মজৈস্তে চ তাভিরগমন্কৃতার্থতাম্ |
সোঽভবদ্বরবধূসমাগমঃ প্রত্যয়প্রকৃতিয়োগসংনিভঃ || ১১-৫৬||
এবমাত্তরতিরাত্মসংভবাংস্তান্নিবেশ্য চতুরোঽপি তত্র সঃ |
অধ্বসু ত্রিষু বিসৃষ্টমৈথিলঃ স্বাং পুরীং দশরথো ন্যবর্তত || ১১-৫৭||
তস্য জাতু মরুতঃ প্রতীপগা বর্ত্মসু ধ্বজতরুপ্রমাথিনঃ |
চিক্লিশুর্ভৃশতয়া বরূথিনীমুত্তটা ইব নদীরয়াঃ স্থলীম্ || ১১-৫৮||
লক্ষ্যতে স্ম তদনন্তরং রবির্বদ্ধভীমপরিবেষমণ্ডলঃ |
বৈনতেয়শমিতস্য ভোগিনো ভোগবেষ্টিত ইব চ্যুতো মণিঃ || ১১-৫৯||
শ্যেনপক্ষপরিধূসরালকাঃ সাংধ্যমেঘরুধিরার্দ্রবাসসঃ |
অঙ্গনা ইব রজস্বলা দিশো নো বভূবুরবলোকনক্ষমাঃ || ১১-৬০||
ভাস্করশ্চ দিশমধ্যুবাস যাং তাং শ্রিতাঃ প্রতিভয়ং ববাসিরে |
ক্ষত্রশোণিতপিতৃক্রিয়োচিতং চোদয়ন্ত্য ইব ভার্গবং শিবাঃ || ১১-৬১||
তৎপ্রতীপপবনাদিবৈকৃতং প্রেক্ষ্য শান্তিমধিকৃত্য কৃত্যবিদ্ |
অন্বয়ুঙ্ক্ত গুরুমীশ্বরঃ ক্ষিতেঃ স্বন্তমিত্যলঘয়ৎস তদ্ব্যথাম্ || ১১-৬২||
তেজসঃ সপদি রাশিরুত্থিতঃ প্রাদুরাস কিল বাহিনীমুখে |
যঃ প্রমৃজ্য নয়নানি সৈনিকৈর্লক্ষণীয়পুরুষাকৃতিশ্চিরাৎ || ১১-৬৩||
পিত্র্যবংশমুপবীতলক্ষণং মাতৃকং চ ধনুরূর্জিতং দধৎ |
যঃ সসোম ইব ঘর্মদীধিতিঃ সদ্বিজিহ্ব ইব চন্দনদ্রুমঃ || ১১-৬৪||
যেন রোষপরুষাত্মনঃ পিতুঃ শাসনে স্থিতিভিদোঽপি তস্থুষা |
বেপমানজননীশিরশ্ছিদা প্রাগজীয়ত ঘৃণা ততো মহী || ১১-৬৫||
অক্ষবীজবলয়েন নির্বভৌ দক্ষিণশ্রবণসংস্থিতেন যঃ |
ক্ষত্রিয়ান্তকরণৈকবিংশতের্ব্যাজপূর্বগণনামিবোদ্বহন্ || ১১-৬৬||
তং পিতুর্বধভবেন মন্যুনা রাজবংশনিধনায় দীক্ষিতম্ |
বালসূনুরবলোক্য ভার্গবং স্বাং দশাং চ বিষসাদ পার্থিবঃ || ১১-৬৭||
নাম রাম ইতি তুল্যমাত্মজে বর্তমানমহিতে চ দারুণে |
হৃদ্যমস্য ভয়দায়ি চাভবদ্রত্নজাতমিব হারসর্পয়োঃ || ১১-৬৮||
অর্ঘ্যমর্ঘ্যমিতি বাদিনং নৃপং সোঽনবেক্ষ্য ভরতাগ্রজো যতঃ |
ক্ষত্রকোপদহনার্চিষং ততঃ সংদধে দৃশমুদগ্রতারকাম্ || ১১-৬৯||
তেন কার্মুকনিষক্তমুষ্টিনা রাঘবো বিগতভীঃ পুরোগতঃ |
অঙ্গুলীবিবরচারিণং শরং কুর্বতা নিজগদে যুয়ুৎসুনা || ১১-৭০||
ক্ষত্রজাতমপকারবৈরি মে তন্নিহত্য বহুশঃ শমং গতঃ |
সুপ্তসর্প ইব দণ্ডঘট্টনাদ্রোষিতোঽস্মি তব বিক্রমশ্রবাৎ || ১১-৭১||
মৈথিলস্য ধনুরন্যপার্থিবৈস্ত্বং কিলানমিতপূর্বমক্ষণোঃ |
তন্নিশম্য ভবতা সমর্থয়ে বীর্যশৃঙ্গমিব ভগ্নমাত্মনঃ || ১১-৭২||
অন্যদা জগতি রাম ইত্যয়ং শব্দ উচ্চরিত এব মামগাৎ |
ব্রীডমাবহতি মে স সংপ্রতি ব্যস্তবৃত্তিরুদয়োন্মুখে ৎবয়ি || ১১-৭৩||
বিভ্রতোঽস্ত্রমচলেঽপ্যকুণ্ঠিতং দ্বৌ রুপূ মম মতৌ সমাগসৌ |
ধেনুবৎসহরণাচ্চ হৈহয়স্ত্বং চ কীর্তিমপহর্তুমুদ্যতঃ || ১১-৭৪||
ক্ষত্রিয়ান্তকরণোঽপি বিক্রমস্তেন মামবতি নাজিতে ৎবয়ি |
পাবকস্য মহিমা স গণ্যতে কক্ষবজ্জলতি সাগরেঽপি যঃ || ১১-৭৫||
বিদ্ধি চাত্তবলমোজসা হরেরৈশ্বরং ধনুরভাজি যত্ত্বয়া |
খাতমূলমনিলো নদীরয়ৈঃ পাতয়ত্যপি মৃদুস্তটদ্রুমম্ || ১১-৭৬||
তন্মদীয়মিদমায়ুধং জ্যয়া সংগময়্য সশরং বিকৃষ্যতাম্ |
তিষ্ঠতু প্রধবমেবমপ্যহং তুল্যবাহুতরসা জিতস্ত্বয়া || ১১-৭৭||
কাতরোঽসি যদি বোদ্গতার্চিষা তর্জিতঃ পরশুধারয়া মম |
জ্যানিঘাতকঠিনাঙ্গুলির্বৃথা বধ্যতামভয়য়াচনাঞ্জলিঃ || ১১-৭৮||
এবমুক্তবতি ভীমদর্শনে ভার্গবে স্মিতবিকম্পিতাধরঃ |
তদ্ধনুর্গ্রহণমেব রাঘবঃ প্রত্যপদ্যত সমর্থমুত্তরম্ || ১১-৭৯||
পূর্বজন্মধনুষা সমাগতঃ সোঽতিমাত্রলঘুদর্শনোঽভবৎ |
কেবলোঽপি সুভগো নবাম্বুদঃ কিং পুনস্ত্রিদশচাপলাঞ্ছিতঃ || ১১-৮০||
তেন ভূমিনিহিতৈককোটি তৎকার্মুকং চ বলিনাধিরোপিতম্ |
নিষ্প্রভশ্চ রিপুরাস ভূভৃতাং ধূমশেষ ইব ধূমকেতনঃ || ১১-৮১||
তাবুভাবপি পরস্পরস্থিতৌ বর্ধমানপরিহীনতেজসৌ |
পশ্যতি স্ম জনতা দিনাত্যয়ে পার্বণৌ শশিদিবাকরাবিব || ১১-৮২||
তং কৃপামুদুরবেক্ষ্য ভার্গবং রাঘবঃ স্খলিতবীর্যমাত্মনি |
স্বং চ সংহিতমমোঘমাশুগং ব্যাজহার হরসূনুসংনিভঃ || ১১-৮৩||
ন প্রহর্তুমলমস্মি নির্দয়ং বিপ্র ইত্যভিভত্যপি ৎবয়ি |
শংস কিং গতিমনেন পত্রিণা হন্মি লোকমুত তে মখার্জিতম্ || ১১-৮৪||
প্রত্যুবাচ তমৃষির্ন তত্ত্বতস্ত্বাং ন বেদ্মি পুরুষং পুরাতনম্ |
গাং গতস্য তব ধাম বৈষ্ণবং কোপিতো হ্যসি ময়া দিদৃক্ষুণা || ১১-৮৫||
ভস্মসাৎকৃতবতঃ পিতৃদ্বিষঃ পাত্রসাচ্চ বসুধাং সসাগরাম্ |
আহিতো জয়বিপর্যয়োঽপি মে শ্লাঘ্য এব পরমেষ্ঠিনা ৎবয়া || ১১-৮৬||
তদ্গতিং মতিমতাং বরেপ্সিতাং পুণ্যতীর্থগমনায় রক্ষ মে |
পীডয়িষ্যতি ন মাং খিলীকৃতা স্বর্গপদ্ধতিরমোঘলোলুপম্ || ১১-৮৭||
প্রত্যপদ্যত তথেতি রাঘবঃ প্রাঙ্মুখশ্চ বিসসর্জ সায়কম্ |
ভার্গবস্য সুকৃতোঽপি সোঽভবৎস্বর্গমার্গপরিঘো দুরত্যয়ঃ || ১১-৮৮||
রাঘবোঽপি চরণৌ তপোনিধেঃ ক্ষম্যতামিতি বদন্সমস্পৃশৎ |
নির্জিতেষু তরসা তরস্বিনাং শত্রুষু প্রণতিরেব কীর্তয়ে || ১১-৮৯||
রাজসৎবমবধূয় মাতৃকং পিত্র্যমস্মি গমিতঃ শমং যদা |
নন্বনিন্দিতফলো মম ৎবয়া নিগ্রহোঽপ্যয়মনুগৃহীকৃতঃ || ১১-৯০||
সাধয়াম্যহমবিঘ্নমস্তু তে দেবকার্যমুপপাদয়িষ্যতঃ |
ঊচিবানিতি বচঃ সলক্ষ্মণং লক্ষ্মণাগ্রজমৃষিতিরোদধে || ১১-৯১||
তস্মিন্গতে বিজয়িনং পরিরভ্য রামং
স্নেহাদমন্যত পিতা পুনরেব জাতম্ |
তস্যাভবৎক্ষণশুচঃ পরিতোষলাভঃ
কক্ষাগ্নিলঙ্ঘিততরোরিব বৃষ্টিপাতঃ || ১১-৯২||
অথ পথি গময়িৎবা কৢপ্তরম্যোপকার্যে
কতিচিদবনিপালঃ শর্বরীঃ শর্বকল্পঃ |
পুরমবিশদয়োধ্যাং মৈথিলীদর্শনীনাং
কুবলয়িতগবাক্ষাং লোচনৈরঙ্গনানাম্ || ১১-৯৩||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
সীতবিবাহবর্ণনো নামৈকাদশঃ সর্গঃ ||