রঘুবংশং সর্গ ০৭

 || কালিদাসকৃতং রঘুবংশম্ সর্গ ৭ ||

অথোপয়ন্ত্রা সদৃশেণ যুক্তাং স্কন্দেন সাক্ষাদিব দেবসেনাম্ |
স্বসারমাদায় বিদর্ভনাথঃ পুরপ্রবেশাভিমুখো বভূব || ৭-১||
সেনানিবেশান্পৃথিবীক্ষিতোঽপি জগ্মুর্বিভাতগ্রহমন্দভাসঃ |
ভোজ্যাং প্রতি ব্যর্থমনোরথৎবাদ্রূপেষু বেশেষু চ সাভ্যসূয়া || ৭-২||
সাংনিধ্যয়োগাৎকিল তত্র শচ্যাঃ স্বয়ংবরক্ষোভকৃতামভাবঃ |
কাকুৎস্থমুদ্দিশ্য সমৎসরোঽপি শশাম তেন ক্ষিতিপাললোকঃ || ৭-৩||
তাবৎপ্রকীর্ণাভিনবোপচারমিন্দ্রায়ুধদ্যোতিততোরণাঙ্কম্ |
বরঃ সবধ্বা সহ রাজমার্গং প্রাপ ধ্বজচ্ছায়নিবারিতোষ্ণম্ || ৭-৪||
ততস্তদালোকনতৎপরাণাং সৌধেষু চামীকরজালবৎসু |
বভূবুরিত্থং পুরসুন্দরীণাং ত্যক্তান্যকার্যাণি বিচেষ্টিতানি || ৭-৫||
আলোকমার্গং সহসা ব্রজন্ত্যা কয়াচিদুদ্বেষ্টনবান্তমাল্যঃ |
বদ্ধুং ন সংভাবিত এব তাবৎকরেণ রুদ্ধোঽপি চ কেশপাশঃ || ৭-৬||
প্রসাধিকালম্বিতমগ্রপাদমাক্ষিপ্য কাচিদ্দ্রবরাগমেব |
উৎসৃষ্টলীলাগতিরাগবাক্ষাদলক্তকাঙ্কাং পদবীং ততান || ৭-৭||
বিলোচনং দক্ষিণমঞ্জনেন সংভাব্য তদ্বঞ্চিতবামনেত্রা|
তথৈব বাতায়নসংনিকর্ষং যয়ৌ শলাকামপরা বহন্তী || ৭-৮||
জালান্তরপ্রেষিতদৃষ্টিরন্যা প্রস্থানভিন্নাং ন ববন্ধ নীবীম্ |
নাভিপ্রবিষ্টাভরণপ্রভেন হস্তেন তস্থাববলম্ব্য বাসঃ || ৭-৯||
অর্ধাঞ্চিতা সৎবরমুত্থিতায়াঃ পদে পদে দুর্নিমিতে গলন্তী |
কস্যাশ্চিদাসীদ্রশনা তদানীমঙ্গুষ্ঠমূলার্পিতসূত্রশেষা || ৭-১০||
তাসাং মুখৈরাসবগন্ধগর্ভৈর্ব্যাপ্তান্তরাঃ সান্দ্রকুতূহলানাম্ |
বিলোলনেত্রভ্রমরৈর্গবাক্ষাঃ সহস্রপত্রাভরণা ইবাসন্ || ৭-১১||
তা রাঘবং দৃষ্টিভিরাপিবন্ত্যো নার্যো ন জগ্মুর্বিষয়ান্তরাণি |
তথা হি শেষেন্দ্রিয়বৃত্তিরাসাং সর্বাত্মনা চক্ষুরিব প্রবিষ্টা || ৭-১২||
স্থানে বৃতা ভূপতিভিঃ পরোক্ষৈঃ স্বয়ংবরং সাধুমমংস্ত ভোজ্যা |
পদ্মেব নারায়ণমন্যথাসৌ লভেত কান্তং কথমাত্মতুল্যম্ || ৭-১৩||
পরস্পরেণ স্পৃহণীয়শোভং ন চেদিদং দ্বন্দ্বময়োজয়িষ্যৎ |
অস্মিন্দ্বয়ে রূপবিধানয়ত্নঃ পত্যুঃ প্রজানাং বিতথোঽভবিষ্যৎ || ৭-১৪||
রতিস্মরৌ নূনমিমাবভূতাং রাজ্ঞাং সহস্রেষু তথা হি বালা |
গতেয়মাত্মপ্রতিরূপমেব মনো হি জন্মান্তরসংগতিজ্ঞম্ || ৭-১৫||
ইত্যুদ্গতাঃ পৌরবধূমুখেভ্যঃ শৃণ্বন্কথাঃ শ্রোত্রসুখাঃ কুমারঃ |
উদ্ভাসিতং মঙ্গলসংবিধাভিঃ সংবন্ধিনঃ সদ্ম সমাসসাদ || ৭-১৬||
ততোঽবতীর্যাশু করেণুকায়াঃ স কামরূপেশ্বরদত্তহস্তঃ |
বৈদর্ভনির্দিষ্টমথো বিবেশ নারীমনাংসীব চতুষ্কমন্তঃ || ৭-১৭||
মহার্হসিংহাসনসংস্থিতোঽসৌ সরত্নমর্ঘ্যং মধুপর্কমিশ্রম্ |
ভোজোপনীতং চ দুকূলয়ুগ্মং জগ্রাহ সার্ধং বনিতাকটাক্ষৈঃ || ৭-১৮||
দুকূলবাসাঃ স বধূসমীপং নিন্যে বিনীতৈরবরোধরক্ষৈঃ |
বেলাসকাশং স্ফুটফেনরাশির্নবৈরুদন্বানিব চন্দ্রপাদৈঃ || ৭-১৯||
তত্রার্চিতো ভোজপতেঃ পুরোধা হুৎবাগ্নিমাজ্যাদিভিরগ্নিকল্পঃ |
তমেব চাধায় বিবাহসাক্ষ্যে বধূবরৌ সংগময়াংচকার || ৭-২০||
হস্তেন হস্তং পরিগৃহ্য বধ্বাঃ স রাজসূনুঃ সুতরাং চকাসে |
অনন্তরাশোকলতাপ্রবালং প্রাপ্যেব চূতঃ প্রতিপল্লবেন || ৭-২১||
আসীদ্বরঃ কণ্টকিতপ্রকোষ্ঠঃ স্বিন্নাঙ্গুলিঃ সংববৃতে কুমারী |
তস্মিন্দ্বয়ে তৎক্ষণমাত্মবৃত্তিঃ সমং বিভক্তেব মনোভবেন || ৭-২২||
তয়োরপাঙ্গপ্রতিসারিতানি ক্রিয়াসমাপত্তিনিবর্তিতানি |
হ্রীয়ন্ত্রণামানশিরে মনোজ্ঞামন্যোন্যলোলানি বিলোচনানি || ৭-২৩||
প্রদক্ষিণপ্রক্রমণাৎকৃশানোরুদর্চিষস্তন্মিথুনং চকাসে |
মেরোরুপান্তেষ্বিব বর্তমানমন্যোন্যসংসক্তমহস্ত্রিয়ামম্ || ৭-২৪||
নিতম্বগুর্বী গুরুণা প্রয়ুক্তা বধূর্বিধাতৃপ্রতিমেন তেন |
চকার সা মত্তচকোরনেত্রা লজ্জাবতী লাজবিসর্গমগ্নৌ || ৭-২৫||
হবিঃশমীপল্লবলাজগন্ধী পুণ্যঃ কৃশানোরুদিয়ায় ধূমঃ |
কপোলসংসর্পিশিখঃ স তস্যা মুহূর্তকর্ণোৎপলতাং প্রপেদে || ৭-২৬||
তদঞ্জনক্লেদসমাকুলাক্ষং প্রম্লানবীজাঙ্কুরকর্ণপূরম্ |
বধূমুখং পাটলগন্ধলেখমাচারধূমগ্রহণাদ্বভূব || ৭-২৭||
তৌ স্নাতকৈর্বন্ধুমতা চ রাজ্ঞা পুরংধ্রিভিশ্চ ক্রমশঃ প্রয়ুক্তম্ |
কন্যাকুমারৌ কনকাসনস্থাবার্দ্রাক্ষতারোপণমন্বভূতাম্ || ৭-২৮||
ইতি স্বসুর্ভোজকুলপ্রদীপঃ সংপাদ্য পাণিগ্রহণং স রাজা |
মহীপতীনাং পৃথগর্হণার্থং সমাদিদেশাধিকৃতানধিশ্রীঃ || ৭-২৯||
লিঙ্গৈর্মুদঃ সংবৃতবিক্রিয়াস্তে হ্রদাঃ প্রসন্না ইব গূঢনক্রাঃ |
বৈদর্ভমামন্ত্র্য যয়ুস্তদীয়াং প্রত্যর্প্য পূজামুপদাছলেন || ৭-৩০||
স রাজলোকঃ কৃতপূর্বসংবিদারম্ভসিদ্ধৌ সময়োপলভ্যম্ |
আদাস্যমানঃ প্রমদামিষং তদাবৃত্য পন্থানমজস্য তস্থৌ || ৭-৩১||
ভর্তাপি তাবৎক্রথকৈশিকানামনুষ্ঠিতানন্তরজাবিবাহঃ |
সত্ত্বানুরূপাহরণীকৃতশ্রীঃ প্রাস্থাপয়দ্রাঘবমন্বগাচ্চ || ৭-৩২||
তিস্রস্ত্রিলোকপ্রথিতেন সার্ধমজেন মার্গে বসতীরুষিৎবা |
তস্মাদপাবর্তত কুণ্ডিনেশঃ পর্বাত্যয়ে সোম ইবোষ্ণরশ্মেঃ || ৭-৩৩||
প্রমন্যবঃ প্রাগপি কোসলেন্দ্রে প্রত্যেকমাত্তস্বতয়া বভূবুঃ |
অতো নৃপশ্চক্ষমিরে সমেতাঃ স্ত্রীরত্নলাভং ন তদাজত্মস্য || ৭-৩৪||
তমুদ্বহন্তং পথি ভোজকন্যাং রুরোধ রাজন্যগণ স দৃপ্তঃ |
বলিপ্রদিষ্টাং শ্রিয়মাদদানং ত্রৈবিক্রমং পাদমিবেন্দ্রশত্রুঃ || ৭-৩৫||
তস্যাঃ স রক্ষার্থমনল্পয়োধমাদিশ্য পিত্র্যং সচিবং কুমারঃ |
প্রত্যগ্রহীৎপার্থিববাহিনীং তাং ভাগীরথীং শোণ ইবোত্তরঙ্গঃ || ৭-৩৬||
পত্তিঃ পদাতিং রথিনং রথেশস্তুরংগসাদী তুরগাধিরূঢম্ |
যন্তা গজস্যাভ্যপতদ্গজস্থং তুল্যপ্রতিদ্বন্দ্বি বভূব যুদ্ধম্ || ৭-৩৭||
নদৎসু তূর্যেষ্ববিভাব্যবাচো নোদীরয়ন্তি স্ম কুলোপদেশান্ |
বাণাক্ষরৈরেব পরস্পরস্য নামোর্জিতং চাপভৃতঃ শশংসুঃ || ৭-৩৮||
উত্থাপিতঃ সংযতি রেণুরশ্বৈঃ সান্দ্রীকৃতঃ স্যন্দনবংশচক্রৈঃ |
বিস্তারিতঃ কুঞ্জরকর্ণতালৈর্নেত্রক্রমেণোপরুরোধ সূর্যম্ || ৭-৩৯||
মৎস্যধ্বজা বায়ুবশাদ্বিদীর্ণৈর্মুখৈঃ প্রবৃদ্ধধ্বজিনীরজাংসি |
বভুঃ পিবন্তঃ পরমার্থমৎস্যাঃ পর্যাবিলানীব নবোদকানি || ৭-৪০||
রথো রথাঙ্গধ্বনিনা বিজজ্ঞে বিলোলঘণ্টাক্বণিতেন নাগঃ |
স্বভর্তুনামগ্রহণাদ্বভূব সান্দ্রে রজস্যাত্মপরাববোধঃ || ৭-৪১||
আবৃণ্বতো লোচনমার্গমাজৌ রজোন্ধকারস্য বিজৃম্ভিতস্য |
শস্ত্রক্ষতাশ্বদ্বীপবীরজন্মা বালারুণোঽভূদ্রুধিরপ্রবাহঃ || ৭-৪২||
স চ্ছিন্নমূলঃ ক্ষতজেন রেণুস্তস্যোপরিষ্টাৎপবনাপধূতঃ |
অঙ্গারশেষস্য হুতাশনস্য পূর্বোত্থিতো ধূম ইবাবভাসে || ৭-৪৩||
প্রহারমূর্চ্ছাপগমে রথস্থা যন্ত্ৠনুপালভ্য নিবর্তিতাশ্বান্ |
যৈঃ সাদিতা লক্ষিতপূর্বকেতূংস্তানেব সামর্ষতয়া নিজঘ্নুঃ || ৭-৪৪||
অপ্যর্ধমার্গে পরবাণলূনা ধনুর্ভৃতাং হস্তবতাং পৃষৎকাঃ |
সংপ্রাপুরেবাত্মজবানুবৃত্ত্যা পূর্বার্ধভাগৈঃ ফলিভিঃ শরব্যম্ || ৭-৪৫||
আধোরণানাং গজসংনিপাতে শিরাংসি চক্রৈর্নিশিতৈঃ ক্ষুরাগ্রৈঃ |
হতান্যপি শ্যেননখাগ্রকোটিব্যাসক্তকেশানি চিরেণ পেতুঃ || ৭-৪৬||
পূর্বং প্রহর্তা ন জঘান ভূয়ঃ প্রতিপ্রহারাক্ষমমশ্বসাদী |
তুরংগমস্কন্ধনিষণ্ণদেহং প্রত্যাশ্বসন্তং রিপুমাচকাঙ্ক্ষ || ৭-৪৭||
তনুত্যজাং বর্মভৃতাং বিকোশৈবৃহৎসু দন্তেষ্বসিভিঃ পতদ্ভিঃ |
উদ্যন্তমগ্নিং শময়াংবভূবুর্গজা বিবিগ্নাঃ করশীকরেণ || ৭-৪৮||
শিলীমুখোৎকৃত্তশিরঃফলাঢ্যা চ্যুতৈঃ শিরস্ত্রৈশ্চষকোত্তরেব |
রণক্ষিতিঃ শোণিতমদ্যকুল্যা ররাজ মৃত্যোরিব পানভূমিঃ || ৭-৪৯||
উপান্তয়োর্নিষ্কুষিতং বিহংগৈরাক্ষিপ্য তেভ্যঃ পিশিতপ্রিয়াপি |
কেয়ূরকোটিক্ষততালুদেশা শিবা ভুজচ্ছেদমপাচকার || ৭-৫০||
কশ্চিদ্বিষৎখড্গহৃতোত্তমাঙ্গঃ সদ্যো বিমানপ্রভুতামুপেত্য |
বামাঙ্গসংসক্তসুরাঙ্গনঃ স্বং নৃত্যৎকবন্ধং সমরে দদর্শ || ৭-৫১||
অন্যোন্যসূতোন্মথনাদভূতাং তাবেব সূতৌ রথিনৌ চ কৌচিৎ |
ব্যশ্বৌ গদাব্যায়তসংপ্রহারৌ ভগ্নায়ুধৌ বাহুবিমর্দনিষ্ঠৌ || ৭-৫২||
পরস্পরেণ ক্ষতয়োঃ প্রহর্ত্রোরুৎক্রান্তবায়্বোঃ সমকালমেব |
অমর্ত্যভাবেঽপি কয়োশ্চিদাসীদেকাপ্সরঃপ্রার্থিতয়োর্বিবাদঃ || ৭-৫৩||
ব্যূহাবুভৌ তাবিতরেতরস্মাদ্ভঙ্গং জয়ং চাপতুরব্যবস্থম্ |
পশ্চাৎপুরোমারুতয়োঃ প্রবৃদ্ধৌ পর্যায়বৃত্যেব মহার্ণবোর্মী || ৭-৫৪||
পরেণ ভগ্নেঽপি বলে মহৌজা যয়াবজঃ প্রত্যরিসৈন্যমেব |
ধূমো নিবর্ত্যেত সমীরণেন যতস্তু কক্ষস্তত এব বহ্নিঃ || ৭-৫৫||
রথী নিষঙ্গী কবচী ধনুষ্মান্দৃপ্তঃ স রাজন্যকমেকবীরঃ |
নিবারয়ামাস মহাবরাহঃ কল্পক্ষয়োদ্বৃত্তমিবার্ণবাম্ভঃ || ৭-৫৬||
স দক্ষিণং তূণমুখেন বামং ব্যাপারয়ন্হস্তমলক্ষ্যতাজৌ |
আকর্ণকৃষ্টা সকৃদস্য যোদ্ধুর্মৌর্বীব বাণান্সুষুবে রিপুঘ্নান্ || ৭-৫৭||
স রোষদষ্টাধিকলোহিতোষ্ঠৈর্ব্যক্তোর্ধ্বরেখা ভৃকুটীর্বহদ্ভিঃ |
তস্তার গাং ভল্লনিকৃত্তকণ্ঠৈর্হূংকারগর্ভৈর্দ্বিষতাং শিরোভিঃ || ৭-৫৮||
সর্বৈর্বলাঙ্গৈর্দ্বিরদপ্রধানৈঃ সর্বায়ুধৈঃ কঙ্কটভেদিভিশ্চ |
সর্বপ্রয়ত্নেন চ ভূমিপালাস্তস্মিন্প্রজহ্রুর্যুধি সর্ব এব || ৭-৫৯||
সোঽস্ত্রব্রজৈশ্ছন্নরথঃ পরেষাং ধ্বজাগ্রমাত্রেণ বভূব লক্ষ্যঃ |
নীহারমগ্নো দিনপূর্বভাগঃ কিংচিৎপ্রকাশেন বিবস্বতেব || ৭-৬০||
প্রিয়ংবদাৎপ্রাপ্তমসৌ কুমারঃ প্রায়ুঙ্ক্ত রাজস্বধিরাজসূনুঃ |
গান্ধর্বমস্ত্রং কুসুমাস্ত্রকান্তঃ প্রস্বাপনং স্বপ্ননিবৃত্তলৌল্যঃ || ৭-৬১||
ততো ধনুষ্কর্ষণমূঢহস্তমেকাংসপর্যস্তশিরস্ত্রজালম্ |
তস্থৌ ধ্বজস্তম্ভনিষণ্ণদেহং নিদ্রাবিধেয়ং নরদেবসৈন্যম্ || ৭-৬২||
ততঃ প্রিয়োপাত্তরসেঽধরোষ্ঠে নিবেশ্য দধ্মৌ জলজং কুমারঃ |
তেন স্বহস্তার্জিতমেকবীরঃ পিবন্যশো মূর্তমিবাবভাসে || ৭-৬৩||
শঙ্খস্বনাভিজ্ঞতয়া নিবৃত্তাস্তং সন্নশত্রুং দদৃশুঃ স্বয়োধাঃ |
নিমীলিতানামিব পঙ্কজানাং মধ্যে স্ফুরন্ত.ম্ প্রতিমাশশাঙ্কম্ || ৭-৬৪||
সশোণিতৈস্তেন শিলীমুখাগ্রৈর্নিক্ষেপিতাঃ কেতুষু পার্থিবানাম্ |
যশো হৃতং সংপ্রতি রাঘবেণ ন জীবিতং বঃ কৃপয়েতি বর্ণাঃ || ৭-৬৫||
স চাপকোটীনিহিতৈকবাহুঃ শিরস্ত্রনিষ্কর্ষণভিন্নমৌলিঃ |
ললাটবদ্ধশ্রমবারিবিন্দুর্ভীতাং প্রিয়ামেত্য বচো বভাষে || ৭-৬৬||
ইতঃ পরানর্ভকহার্যশস্ত্রান্বৈদর্ভি পশ্যানুমতা ময়াসি |
এবংবিধেনাহবচেষ্টিতেন ৎবং প্রার্থ্যসে হস্তগতা মমৈভিঃ || ৭-৬৭||
তস্যাঃ প্রতিদ্বন্দ্বিভবাদ্বিষাদাৎসদ্যো বিমুক্তং মুখমাবভাসে |
নিঃশ্বাসবাষ্পাপগমাৎপ্রপন্নঃ প্রসাদমাত্মীয়মিবাত্মদর্শঃ || ৭-৬৮||
হৃষ্টাপি সা হ্রীবিজিতা ন সাক্ষাদ্বাগ্ভিঃ সখীনাং প্রিয়মভ্যনন্দৎ |
স্থলী নবাম্ভঃপৃষতাভিবৃষ্টা ময়ূরকেকাভিরিবাভ্রবৃন্দম্ || ৭-৬৯||
ইতি শিরসি স বামং পাদমাধায় রাজ্ঞা-
মুদবহদনবদ্যাং তামবদ্যাদপেতঃ |
রথতুরগরজোভিস্তস্য রূক্ষালকাগ্রা
সমরবিজয়লক্ষ্মীঃ সৈব মূর্তা বভূব || ৭-৭০||
প্রথমপরিগতার্থস্তং রঘুঃ সংনিবৃত্তং
বিজয়িনমভিনন্দ্য শ্লাঘ্যজায়াসমেতম্ |
তদুপহিতকুটুম্বঃ শান্তিমার্গোৎসুকোঽভূ-
ন্ন হি সতি কুলধুর্যে সূর্যবংশ্যা গৃহায় || ৭-৭১||

ইতি শ্রীরঘুবংশে মহাকাব্যে কবিশ্রীকালিদাস-
কৃতাবজস্বয়ংবরাভিগমনো নাম সপ্তমঃ সর্গঃ ||