রঘুবংশং সর্গ ০৬

 || কালিদাসকৃতং রঘুবংশম্ সর্গ ৬ ||

স তত্র মঞ্চেষু মনোজ্ঞবেষান্সিংহাসনস্থানুপচারবৎসু |
বৈমানিকানাং মরুতামপশ্যদাকৃষ্টলীলান্নরলোকপালান্ || ৬-১||
রতের্গৃহীতানুনয়েন কামং প্রত্যর্পিতস্বাঙ্গমিবেশ্বরেণ |
কাকুৎস্থমালোকয়তাং নৃপাণাং মনো বভূবেন্দুমতীনিরাশম্ || ৬-২||
বৈদর্ভনির্দিষ্টমসৌ কুমারঃ কৢপ্তেন সোপানপথেন মঞ্চম্ |
শিলাবিভঙ্গৈর্মৃগরাজশাবস্তুঙ্গং নগোৎসঙ্গমিবারুরোহ || ৬-৩||
পরার্ধ্যবর্ণাস্তরণোপপন্নমাসেদিবান্রত্নবদাসনং সঃ |
ভূয়িষ্ঠমাসীদুপমেয়কান্তির্ময়ূরপৃষ্ঠাশ্রয়িণা গুহেন || ৬-৪||
তাসু শ্রিয়া রাজপরংপরাসু প্রভাবিশেষোদয়দুর্নিরীক্ষ্যঃ |
সহস্রধাত্মা ব্যরুচদ্বিভক্তঃ পয়োমুচাং পঙ্ক্তিষু বিদ্যুতেব || ৬-৫||
তেষাং মহার্হাসনসংস্থিতানামুদারনেপথ্যভৃতাং স মধ্যে |
ররাজ ধাম্না রঘুসূনুরেব কল্পদ্রুমাণামিব পারিজাতঃ || ৬-৬||
নেত্রব্রজাঃ পৌরজনস্য তস্মিন্বিহায় সর্বান্নৃপতীন্নিপেতুঃ |
মদোৎকটে রেচিতপুষ্পবৃক্ষা গন্ধদ্বিপে বন্য ইব দ্বিরেফাঃ || ৬-৭||
অথ স্তুতে বন্দিভিরন্বয়জ্ঞৈঃ সোমার্কবংশ্যে নরদেবলোকে |
সংচারিতে চাগুরুসারয়োনৌ ধূপে সমুৎসর্পতি বৈজয়ন্তীঃ || ৬-৮||
পুরোপকণ্টোপবনাশ্রয়াণাং কলাপিনামুদ্ধতনৃত্তহেতৌ |
প্রধ্মাতশঙ্খে পরিতো দিগন্তাংস্তূর্যস্বনে মূর্চ্ছতি মঙ্গলার্থে || ৬-৯||
মনুষ্যবাহ্যং চতুরন্তয়ানমধ্যাস্য কন্যা পরিবারশোভি |
বিবেশ মঞ্চান্তররাজমার্গং পতিংবরা কৢপ্তবিবাহবেষা || ৬-১০||
তস্মিন্বিধানাতিশয়ে বিধাতুঃ কন্যাময়ে নেত্রশতৈকলক্ষ্যে |
নিপেতুরন্তঃকরণৈর্নরেন্দ্রা দেহৈঃ স্থিতাঃ কেবলমাসনেষু || ৬-১১||
তাং প্রত্যভিব্যক্তমনোরথানাং? মহীপতীনাং প্রণয়াগ্রদূত্যঃ |
প্রবালশোভা ইব পাদপানাং? শৃঙ্গারচেষ্টা বিবিধা বভূবুঃ || ৬-১২||
কশ্চিৎকরাভ্যামুপগূঢনালমালোলপত্রাভিহতদ্বিরেফম্ |
রজোভিরন্তঃ পরিবেষবন্ধি লীলারবিন্দং ভ্রময়াংচকার || ৬-১৩||
বিস্রস্তমংসাদপরো বিলাসী রত্নানুবিদ্ধাঙ্গদকোটিলগ্নম্ |
প্রালম্বমুৎকৃষ্য যথাবকাশং নিনায় সাচীকৃতচারুবক্ত্রঃ || ৬-১৪||
আকুঞ্চিতাগ্রাঙ্গুলিনা ততোঽন্যঃ কিঞ্চিৎসমাবর্জিতনেত্রশোভঃ |
তির্যগ্বিসংসর্পিনখপ্রভেণ পাদেন হৈমং বিলিলেখ পীঠম্ || ৬-১৫||
নিবেশ্য বামং ভুজমাসনার্ধে তৎসংনিবেশাৎ অধিকোন্নতাংসঃ |
কশ্চিদ্বিবৃত্তত্রিকভিন্নহারঃ সুহৃৎসমাভাষণতৎপরোঽভূৎ || ৬-১৬||
বিলাসিনীবিভ্রমদন্তপত্রমপাণ্ডুরং কেতকবর্হমন্যঃ |
প্রিয়ানিতম্বোচিতসংনিবেশৈর্বিপাটয়ামাস যুবা নখাগ্রৈঃ || ৬-১৭||
কুশেশয়াতাম্রতলেন কশ্চিৎকরেণ রেখাধ্বজলাঞ্ছনেন |
রত্নাঙ্গুলীয়প্রভয়ানুবিদ্ধানুদীরয়ামাস সলীলমক্ষান্ || ৬-১৮||
কশ্চিদ্যথাভাগমবস্থিতেঽপি স্বসংনিবেশাদ্ব্যতিলঙ্ঘিনীব |
বজ্রাংশুগর্ভাঙ্গুলিরন্ধ্রমেকং ব্যাপারয়ামাস করং কিরীটে || ৬-১৯||
ততো নৃপাণাং শ্রুতবৃত্তবংশা পুংবৎপ্রগল্ভা প্রতিহাররক্ষী |
প্রাক্সংনিকর্ষং মগধেশ্বরস্য নীৎবা কুমারীমবদৎসুনন্দা || ৬-২০||
অসৌ শরণ্যঃ শরণোন্মুখানামগাধসত্ত্বো মগধপ্রতিষ্ঠঃ |
রাজা প্রজারঞ্জনলব্ধবর্ণঃ পরংতপো নাম যথার্থনামা || ৬-২১||
কামং নৃপাঃ সন্তু সহস্রশোঽন্যে রাজন্বতীমাহুরনেন ভূমিম্ |
নক্ষত্রতারাগ্রহসংকুলাপি জ্যোতিষ্মতী চন্দ্রমসৈব রাত্রিঃ || ৬-২২||
ক্রিয়াপ্রবন্ধাদয়মধ্বরাণামজস্রমাহূতসহস্রনেত্রঃ |
শচ্যাশ্চিরং পাণ্ডুকপোললম্বান্মন্দারশূন্যানলকাংশ্চকার || ৬-২৩||
অনেন চেদিচ্ছসি গৃহ্যমাণং পাণিং বরেণ্যেন কুরু প্রবেশে |
প্রাসাদবাতায়নসংস্থিতানাং নেত্রোৎসবং পুষ্পপুরাঙ্গনানাম্ || ৬-২৪||
এবং তয়োক্তে তমবেক্ষ্য কিংচিদ্বিস্রংসিদূর্বাঙ্কমধূকমালা |
ঋজুপ্রণামক্রিয়য়ৈব তন্বী প্রত্যাদিদেশৈনমভাষমাণা || ৬-২৫||
তাং সৈব বেত্রগ্রহণে নিয়ুক্তা রাজান্তরং রাজসুতাং নিনায় |
সমীরণোত্থেব তরংগরেখা পদ্মান্তরং মানসরাজহংসীম্ || ৬-২৬||
জগাদ চৈনাময়মঙ্গনাথঃ সুরাঙ্গনাপ্রার্থিতয়ৌবনশ্রীঃ |
বিনীতনাগঃ কিল সূত্রকারৈরৈন্দ্রং পদং ভূমিগতোঽপি ভুঙ্ক্তে || ৬-২৭||
অনেন পর্যাসয়তাশ্রুবিন্দূন্মুক্তাফলস্থূলতমান্স্তনেষু |
প্রত্যর্পিতাঃ শত্রুবিলাসিনীনামুন্মুচ্য সূত্রেণ বিনৈব হারাঃ || ৬-২৮||
নিসর্গভিন্নাস্পদমেকসংস্থমস্মিন্দ্বয়ং শ্রীশ্চ সরস্বতী চ |
কান্ত্যা গিরা সূনৃতয়া চ যোগ্যা ৎবমেব কল্যাণি তয়োস্তৃতীয়া || ৬-২৯||
অথাঙ্গরাজদবতার্য চক্ষুর্যাহীতি জন্যামবদৎকুমারী |
নাসৌ ন কাম্যো ন চ বেদ সম্যগ্দ্রষ্টুং ন সা ভিন্নরুচির্হি লোকঃ || ৬-৩০||
ততঃ পরং দুঃপ্রসহং দ্বিষদ্ভির্নৃপং নিয়ুক্তা প্রতিহারভূমৌ |
নিদর্শয়ামাস বিশেষদৃশ্যমিন্দুং নবোত্থানমিবেন্দুমত্যৈ || ৬-৩১||
অবন্তিনাথোঽযমুগ্রবাহুর্বিশালবক্ষাস্তনুবৃত্তমধ্যঃ |
আরোপ্য চক্রভ্রমমুষ্ণতেজাস্ত্বষ্ট্রেব যত্নোল্লিখিতো বিভাতি || ৬-৩২||
অস্য প্রয়াণেষু সমগ্রশক্তেরগ্রেসরৈর্বাজিভিরুত্থিতানি |
কুর্বন্তি সামন্তশিখামণীনাং প্রভাপ্ররোহাস্তময়ং রজাংসি || ৬-৩৩||
অসৌ মহাকালনিকেতনস্য বসন্নদূরে কিল চন্দ্রমৌলেঃ |
তমিস্রপক্ষেঽপি সহপ্রিয়াভির্জ্যোৎস্নাবতো নির্বিশতি প্রদোষান্ || ৬-৩৪||
অনেন যূনা সহ পার্থিবেন রম্ভোরু কচ্চিন্মনসো রুচিস্তে |
সিপ্রাতরংগানিলকম্পিতাসু বিহর্তুমুদ্যানপরংপরাসু || ৬-৩৫||
তস্মিন্নভিদ্যোতিতবন্ধুপদ্মে প্রতাপসংশোষিতশত্রুপঙ্কে |
ববন্ধ সা নোত্তমসৌকুমার্যা কুমুদ্বতী ভানুমতীব ভাবম্ || ৬-৩৬||
তামগ্রতস্তামরসান্তরাভামনূপরাজস্য গুণৈরনূনাম্ |
বিধায় সৃষ্টিং ললিতাং বিধাতুর্জগাদ ভূয়ঃ সুদতীং সুনন্দা || ৬-৩৭||
সঙ্গ্রামনির্বিষ্টসহস্রবাহুরষ্টাদশদ্বীপনিখাতয়ূপঃ |
অনন্যসাধারণরাজশব্দো বভূব যোগী কিল কার্তবীর্যঃ || ৬-৩৮||
অকার্যচিন্তা সমকালমেব প্রাদুর্ভবংশ্চাপধরঃ পুরস্তাৎ |
অন্তঃশরীরেষ্বপি যঃ প্রজানাং প্রত্যাদিদেশাবিনয়ং বিনেতা || ৬-৩৯||
জ্যাবন্ধনিষ্পন্দভুজেন যস্য বিনিঃশ্বসদ্বক্ত্রপরংপরেণ |
কারাগৃহে নির্জিতবাসবেন লঙ্কেশ্বরেণোষিতমা প্রসাদাৎ || ৬-৪০||
তস্যান্বয়ে ভূপতিরেষ জাতঃ প্রতীপ ইত্যাগমবৃদ্ধসেবী |
যেনঃ শ্রিয়ঃ সংশ্রয়দোষরূঢং স্বভাবলোলেত্যয়শং প্রমৃষ্টম্ || ৬-৪১||
আয়োধনে কৃষ্ণগতিং সহায়মবাপ্য যঃ ক্ষত্রিয়কালরাত্রিম্ |
ধারাং শিতাং রামপরশ্বধস্য সংভাবয়ত্যুৎপলপত্রসারাম্ || ৬-৪২||
অস্যাঙ্কলক্ষ্মীর্ভব দীর্ঘবাহোর্মাহিষ্মতীবপ্রনিতম্বকাঞ্চীম্ |
প্রাসাদজালৈর্জলবেণিরম্যাং রেবাং যদি প্রেক্ষিতুমস্তি কামঃ || ৬-৪৩||
তস্যাঃ প্রকামং প্রিয়দর্শনোঽপি ন স ক্ষিতীশো রুচয়ে বভূব |
শরৎপ্রমৃষ্টাম্বুধরোপরোধঃ শশীব পর্যাপ্তকলো নলিন্যাঃ || ৬-৪৪||
সা শূরসেনাধিপতিং সুষেণমুদ্দিশ্য লোকান্তরগীতকীর্তিম্ |
আচারশুদ্ধোভয়বংশদীপং শুদ্ধান্তরক্ষ্যা জগদে কুমারী || ৬-৪৫||
নীপান্বয়ঃ পার্থিব এষ যজ্বা গুণৈর্যমাশ্রিত্য পরস্পরেণ |
সিদ্ধাশ্রমং শান্তমিবেত্য সত্ত্বৈর্নৈসর্গিকোঽপ্যুৎসসৃজে বিরোধঃ || ৬-৪৬||
যস্যাত্মগেহে নয়নাভিরামা কান্তির্হিমাংশোরিব সংনিবিষ্টা |
হর্ম্যাগ্রসংরূঢতৃণাঙ্কুরেষু তেজোঽবিষহ্যং রিপুমন্দিরেষু || ৬-৪৭||
যস্যাবরোধস্তনচন্দনানাং প্রক্ষালনাদ্বারিবিহারকালে |
কলিন্দকন্যা মথুরাং গতাপি গঙ্গোর্মিসংসক্তজলেব ভাতি || ৬-৪৮||
ত্রস্তেন তার্ক্ষ্যাৎকিল কালিয়েন মণিং বিসৃষ্টং যমুনৌকসা যঃ |
বক্ষঃস্থলব্যাপিরুচং দধানঃ সকৌস্তুভং হ্রেপয়তীব কৃষ্ণম্ || ৬-৪৯||
সংভাব্য ভর্তারমমুং যুবানং মৃদুপ্রবালোত্তরপুষ্পশয়্যে |
বৃন্দাবনে চৈত্ররথাদনূনে নির্বিশ্যতাং সুন্দরি যৌবনশ্রীঃ || ৬-৫০||
অধ্যাস্য চাম্ভঃপৃষতোক্ষিতানি শৈলেয়গন্ধীনি শিলাতলানি |
কলাপিনাং প্রাবৃষি পশ্য নৃত্যং কান্তাসু গোবর্ধনকন্দরাসু || ৬-৫১||
নৃপং তমাবর্তমনোজ্ঞনাভিঃ সা ব্যত্যগাদন্যবধূর্ভবিত্রী |
মহীধরং মার্গবশাদুপেতং স্রোতোবহা সাগরগামিনীব || ৬-৫২||
অথাঙ্গদালিষ্টভুজং ভুজিষ্যা হেমাঙ্গদং নাম কলিঙ্গনাথম্ |
আসেদুষীং সাদিতশত্রুপক্ষং বালামবালেন্দুমুখীং বভাষে || ৬-৫৩||
অসৌ মহেন্দ্রাদিসমানসারঃ পতির্মহেন্দ্রস্য মহোদধেশ্চ |
যস্য ক্ষরৎসৈন্যগজচ্ছলেন যাত্রাসু যাতীব পুরো মহেন্দ্রঃ || ৬-৫৪||
জ্যাঘাতরেখে সুভুজো ভুজাভ্যাং বিভর্তি যশ্চাপভৃতাং পুরোগঃ |
রিপুশ্রিয়াং সাঞ্জনবাষ্পসেকে বন্দীকৃতানামিব পদ্ধতী দ্বে || ৬-৫৫||
যমাত্মনঃ সদ্মনি সংনিকৃষ্টো মন্দ্রধ্বনিত্যাজিতয়ামতূর্যঃ |
প্রাসাদবাতায়নদৃশ্যবীচিঃ প্রবোধয়ত্যর্ণব এব সুপ্তম্ || ৬-৫৬||
অনেন সার্ধং বিহরাম্বুরাশেস্তীরেষু তালীবনমর্মরেষু |
দ্বীপান্তরানীতলবঙ্গপুষ্পৈরপাকৃতস্বেদলবা মরুদ্ভিঃ || ৬-৫৭||
প্রলোভিতাপ্যাকৃতিলোভনীয়া বিদর্ভরাজাবরজা তয়ৈবম্ |
তস্মাদপাবর্তত দূরকৃষ্টা নীত্যেব লক্ষ্মীঃ প্রতিকূলদৈবাৎ || ৬-৫৮||
অথোরগাখ্যস্য পুরস্য নাথং দৌবারিকী দেবসরূপমেত্য |
ইতশ্চকোরাক্ষি বিলোকয়েতি পূর্বানুশিষ্টাং নিজগাদ ভোজ্যাম্ || ৬-৫৯||
পাণ্ড্যোঽযমংসার্পিতলম্বহারঃ কৢপ্তাঙ্গরাগো হরিচন্দনেন |
আভাতি বালাতপরক্তসানুঃ সনির্ঝরোদ্গার ইবাদ্রিরাজঃ || ৬-৬০||
বিন্ধ্যস্য সংস্তম্ভয়িতা মহাদ্রের্নিঃশেষপীতোজ্ঝিতসিন্ধুরাজঃ |
প্রীত্যাশ্বমেধাবভৃথার্দ্রমূর্তেঃ সৌস্নাতিকো যস্য ভবত্যগস্ত্যঃ || ৬-৬১||
অস্ত্রং হরাদাপ্তবতা দুরাপং যেনেন্দ্রলোকাবজয়ায় দৃপ্তঃ |
পুরা জনস্থানবিমর্দশঙ্কী সংধায় লঙ্কাধিপতিঃ প্রতস্থে || ৬-৬২||
অনেন পাণৌ বিধিবদ্গৃহীতে মহাকুলীনেন মহীব গুর্বী |
রত্নানুবিদ্ধার্ণবমেখলায়া দিশঃ সপত্নী ভব দক্ষিণস্যাঃ || ৬-৬৩||
তাম্বূলবল্লীপরিণদ্ধপূগাস্বেলালতালিঙ্গিতচন্দনাসু |
তমালপত্রাস্তরণাসু রন্তুং প্রসীদ শশ্বন্মলয়স্থলীষু || ৬-৬৪||
ইন্দীবরশ্যামতনুর্নৃপোঽসৌ ৎবং রোচনাগৌরশরীরয়ষ্টিঃ |
অন্যোন্যশোভাপরিবৃদ্ধয়ে বাং যোগস্তডিত্তোয়দয়োরিবাস্তু || ৬-৬৫||
স্বসুর্বিদর্ভাধিপতেস্তদীয়ো লেভেঽন্তরং চেতসি নোপদেশঃ |
দিবাকরাদর্শনবদ্ধকোশে নক্ষত্রনাথাংশুরিবারবিন্দে || ৬-৬৬||
সংচারিণী দীপশিখেব রাত্রৌ যং যং ব্যতীয়ায় পতিংবরা সা |
নরেন্দ্রমার্গাট্ট ইব প্রপেদে বিবর্ণভাবং স স ভূমিপালঃ || ৬-৬৭||
তস্যাং রঘোঃ সূনুরুপস্থিতায়াং বৃণীত মাং নেতি সমাকুলোঽভূৎ |
বামেতরঃ সংশয়মস্য বাহুঃ কেয়ূরবন্ধোচ্ছ্বসিতৈর্নুনোদ || ৬-৬৮||
তং প্রাপ্য সর্বাবয়বানবদ্যং ব্যাবর্ততান্যোপগমাৎকুমারী |
ন হি প্রফুল্লং সহকারমেত্য বৃক্ষান্তরং কাঙ্ক্ষতি ষট্পদালী || ৬-৬৯||
তস্মিন্সমাবেশিতচিত্তবৃত্তিমিন্দুপ্রভামিন্দুমতীমবেক্ষ্য |
প্রচক্রমে বক্তুমনুক্রমজ্ঞা সবিস্তরং বাক্যমিদং সুনন্দা || ৬-৭০||
ইক্ষ্বাকুবংশ্যঃ ককুদং নৃপাণাং ককুৎস্থ ইত্যাহিতলক্ষণোঽভূৎ |
কাকুৎস্থশব্দং যত উন্নতেচ্ছাঃ শ্লাঘ্যং দধত্যুত্তরকোসলেন্দ্রাঃ || ৬-৭১||
মহেন্দ্রমাস্থায় মহোক্ষরূপং যঃ সংযতি প্রাপ্তপিনাকিলীলঃ |
চকার বাণৈরসুরাঙ্গনানাং গণ্ডস্থলীঃ প্রোষিতপত্রলেখাঃ || ৬-৭২||
ঐরাবতস্ফালনবিশ্লথং যঃ সংঘট্টয়ন্নঙ্গদমঙ্গদেন |
উপেয়ুষঃ স্বামপি মূর্তিমগ্র্যামর্ধাসনং গোত্রভিদোঽধিতষ্ঠৌ || ৬-৭৩||
জাতঃ কুলে তস্য কিলোরুকীর্তিঃ কুলপ্রদীপো নৃপতির্দিলীপঃ |
অতিষ্ঠদেকোনশতক্রতুৎবে শক্রাভ্যসূয়াবিনিবৃত্তয়ে যঃ || ৬-৭৪||
যস্মিন্মহীং শাসতি বাণিনীনাং নিদ্রাং বিহারার্ধপথে গতানাম্ |
বাতোঽপি নাস্রংসয়দংশুকানি কো লম্বয়েদাহরণায় হস্তম্ || ৬-৭৫||
পুত্রো রঘুস্তস্য পদং প্রশাস্তি মহাক্রতোর্বিশ্বজিতঃ প্রয়োক্তা |
চতুর্দিগাবর্জিতসংভৃতাং যো মৃৎপাত্রশেষামকরোদ্বিভূতিম্ || ৬-৭৬||
আরূঢমদ্রীনুদধীন্বিতীর্ণং ভুজংগমানাং বসতিং প্রবিষ্টম্ |
ঊর্ধ্বং গতং যস্য ন চানুবন্ধি যশঃ পরিচ্ছেত্তুমিয়ত্তয়ালম্ || ৬-৭৭||
অসৌ কুমারস্তমজোঽনুজাতস্ত্রিবিষ্টপস্যেব পতিং জয়ন্তঃ |
গুর্বীং ধুরং যো জগতস্য পিত্রা ধুর্যেণ দম্যঃ সদৃশং বিভর্তি || ৬-৭৮||
কুলেন কান্ত্যা বয়সা নবেন গুণৈশ্চ তৈস্তৈর্বিনয়প্রধানৈঃ |
ৎবমাত্মনস্তুল্যমমুং বৃণীষ্ব রত্নং সমাগচ্ছতু কাঞ্চনেন || ৬-৭৯||
ততঃ সুনন্দাবচনাবসানে লজ্জাং তনূকৃত্য নরেন্দ্রকন্যা |
দৃষ্ট্যা প্রসাদামলয়া কুমারং প্রত্যগ্রহীৎসংবরণস্রজেব || ৬-৮০||
সা যূনি তস্মিন্নভিলাষবন্ধং শশাক শালীনতয়া ন বক্তুম্ |
রোমাঞ্চলক্ষ্যেণ স গাত্রয়ষ্টিং ভিত্ত্বা নিরাক্রামদরালকেশ্যাঃ || ৬-৮১||
তথাগতায়াং পরিহাসপূর্বং সখ্যাং সখী বেত্রভৃদাবভাষে |
আর্যে ব্রজামোঽন্যত ইত্যথৈনাং বধূরসূয়াকুটিলং দদর্শ || ৬-৮২||
সা চূর্ণগৌরং রঘুনন্দনস্য ধাত্রীকরাভ্যাং করভোপমোরূঃ |
আসঞ্জয়ামাস যথাপ্রদেশং কণ্ঠে গুণং মূর্তমিবানুরাগম্ || ৬-৮৩||
তয়া স্রজা মঙ্গলপুষ্পময়্যা বিশালবক্ষঃস্থললম্বয়া সঃ |
অমংস্ত কণ্ঠার্পিতবাহুপাশাং বিদর্ভরাজাবরজাং বরেণ্যঃ || ৬-৮৪||
শশিনমুপগতেয়ং কৌমুদী মেঘমুক্তং
জলনিধিমনুরূপং জহ্নুকন্যাবতীর্ণা |
ইতি সমগুণয়োগপ্রীতয়স্তত্র পৌরাঃ
শ্রবণকটু নৃপাণামেকবাক্যং বিবব্রুঃ || ৬-৮৫||
প্রমুদিতবরপক্ষমেকতস্তৎক্ষিতিপতিমণ্ডলমন্যতো বিতানম্ |
উষসি সর ইব প্রফুল্লপদ্মং কুমুদবনপ্রতিপন্ননিদ্রমাসীৎ || ৬-৮৬||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
স্বয়ংবরবর্ণনো নাম ষষ্ঠঃ সর্গঃ ||