রঘুবংশং সর্গ ০৫

 || কালিদাসকৃতং রঘুবংশম্ সর্গ ৫ ||

তমধ্বরে বিশ্বজিতি ক্ষিতীশং নিঃশেষবিশ্রাণিতকোশজাতম্ |
উৎপাতবিদ্যো গুরুদক্ষিণার্থী কৌৎসঃ প্রপেদে বরতন্তুশিষ্যঃ || ৫-১||
স মৃণ্ময়ে বীতহিরণ্ময়ৎবাৎপাত্রে নিধায়ার্ঘ্যমনর্ঘশীলঃ |
শ্রুতপ্রকাশং যশসা প্রকাশঃ প্রত্যুজ্জগামাতিথিমাতিথেয়ঃ || ৫-২||
তমর্চয়িৎবা বিধিবদ্বিধিজ্ঞস্তপোধনং মানধনাগ্রয়ায়ী |
বিশাংপতির্বিষ্টরভাজমারাৎকৃতাঞ্জলিঃ কৃত্যবিদিত্যুবাচ || ৫-৩||
অপ্যগ্রণীর্মন্ত্রকৃতামৃষীণাং কুশাগ্রবুদ্ধে কুশলী গুরুস্তে |
যতস্ত্বয়া জ্ঞানমশেষমাপ্তং লোকেন চৈতন্যমিবোষ্ণরশ্মেঃ || ৫-৪||
কায়েন বাচা মনসাওই শশ্বদ্যৎসংভৃতং বাসবধৈর্যলোপি |
আপাদ্যতে ন ব্যয়মন্তরায়ৈঃ কচ্চিন্মহর্ষেস্ত্রিবিধং তপস্তৎ || ৫-৫||
আধারবন্ধপ্রমুখৈঃ প্রয়ত্নৈঃ সংবর্ধিতানাং সুতনির্বিশেষম্ |
কচ্চিন্ন বায়্বাদিরুপপ্লবো বঃ শ্রমচ্ছিদামাশ্রমপাদপানাম্ || ৫-৬||
ক্রিয়ানিমিত্তেশ্বপি বৎসলৎবাদভগ্নকামা মুনিভিঃ কুশেষু |
তদঙ্কশয়্যাচ্যুতনাভিনালা কচ্চিন্মৃগীণামনঘা প্রসূতিঃ || ৫-৭||
নির্বত্যতে যৈর্নিয়মাভিষেকো যেভ্যো নিবাপাঞ্জলয়ঃ পিৎৠণাম্ |
তান্যুঞ্ছষষ্ঠাঙ্কিতসৈকতানি শিবানি বস্তীর্থজলানি কচ্চিৎ || ৫-৮||
নীবারপাকাদি কডংগরীয়ৈরামৃশ্যতে জানপদৈর্ন কচ্চিৎ |
কালোপপন্নাতিথিকল্প্যভাগং বন্যং শরীরস্থিতিসাধনং বঃ || ৫-৯||
অপি প্রসন্নেন মহর্ষিণা ৎবং সম্যগ্বিনীয়ানুমতো গৃহায় |
কালো হ্যয়ং সংক্রমিতুং দ্বিতীয়ং সর্বোপকারক্ষমমাশ্রমং তে || ৫-১০||
তবার্হতো নাভিগমেন তৃপ্তং মনো নিয়োগক্রিয়য়োৎসুকং মে |
অপ্যাজ্ঞয়া শাসিতুরাত্মনা বা প্রাপ্তোঽসি সংভাবয়িতুং বনান্মাম্ || ৫-১১||
ইত্যর্ঘ্যপাত্রানুমিতব্যয়স্য রঘোরুদারামপি গাং নিশম্য |
স্বার্থোপপত্তিং প্রতি দুর্বলাশস্তমিত্যবোচদ্বরতন্তুশিষ্যঃ || ৫-১২||
সর্বত্র নো বার্তমবেহি রাজন্নাথে কুতস্ত্বয়্যশুভং প্রজানাম্ |
সূর্যে তপত্যাবরণায় দৃষ্টেঃ কল্পেত লোকস্য কথং তমিস্রা || ৫-১৩||
ভক্তিঃ প্রতীক্ষ্যেষু কুলোচিতা তে পূর্বান্মহাভাগ তয়াতিশেষে |
ব্যতীতকালস্ত্বহমভ্যুপেতস্ত্বামর্থিভাবাদিতি মে বিষাদঃ || ৫-১৪||
শরীরমাত্রেণ নরেন্দ্র তিষ্ঠন্নাভাসি তীর্থপ্রতিপাদিতর্দ্ধিঃ |
আরণ্যকোপাত্তফলপ্রসূতিঃ স্তম্বেন নীবার ইবাবশিষ্টঃ || ৫-১৫||
স্থানে ভবানেকনরাধিপঃ সন্নকিংচনৎবং মখজং ব্যনক্তি |
পর্যায়পীতস্য সুরৈর্হিমাংশোঃ কলাক্ষয়ঃ শ্লাঘ্যতরো হি বৃদ্ধেঃ || ৫-১৬||
তদন্যতস্তাবদনন্যকার্যো গুর্বর্থমাহর্তুমহং যতিষ্যে |
স্বস্ত্যস্তু তে নির্গলিতাম্বুগর্ভং শরদ্ঘনং নার্দতি চাতকোঽপি || ৫-১৭||
এতাবদুক্ত্বা প্রতিয়াতুকামং শিষ্যং মহর্ষের্নৃপতির্নিষিধ্য |
কিং বস্তু বিদ্বন্গুরবে প্রদেয়ং ৎবয়া কিয়দ্বেতি তমন্বয়ুঙ্ক্ত || ৫-১৮||
ততো যথাবদ্বিহিতাধ্বরায় তস্মৈ স্ময়াবেশবিবর্জিতায় |
বর্ণাশ্রমাণাং গুরবে স বর্ণী বিচক্ষণঃ প্রস্তুতমাচচক্ষে || ৫-১৯||
সমাপ্তবিদ্যেন ময়া মহর্ষির্বিজ্ঞাপিতোঽভূদ্গুরুদক্ষিণায়ৈ |
স মে চিরায়াস্খলিতোপচারাং তাং ভক্তিমেবাগণয়ৎপুরস্তাৎ || ৫-২০||
নির্বন্ধসংজাতরুষার্থকার্শ্যমচিন্তয়িৎবা গুরুণাহমুক্তঃ |
বিত্তস্য বিদ্যাপরিসংখ্যয়া মে কোটীশ্চতস্রো দশ চাহরেতি || ৫-২১||
সোঽহং সপর্যাবিধিভাজনেন মৎবা ভবন্তং প্রভুশব্দশেষম্ |
অভ্যুৎসহে সংপ্রতি নোপরোদ্ধুমল্পেতরৎবাচ্ছ্রুতনিষ্ক্রয়স্য || ৫-২২||
ইত্থং দ্বিজেন দ্বিজরাজকান্তিরাবেদিতো বেদবিদাং বরেণ |
এনোনিবৃত্তেন্দ্রিয়বৃত্তিরেনং জগাদ ভূয়ো জগদেকনাথঃ || ৫-২৩||
গুর্বর্থমর্থী শ্রুতপারদৃশ্বা রঘোঃ সকাশাদনবাপ্য কামম্ |
গতো বদান্যান্তরমিত্যয়ং মে মা ভূৎপরীবাদনবাবতারঃ || ৫-২৪||
স ৎবং প্রশস্তে মহিতে মদীয়ে বসংশ্চতুর্থোঽগ্নিরিবাগ্নিগারে |
দ্বিত্রাণ্যহান্যর্হসি সোঢুমর্হন্ যাবদ্যতে সাধয়িতুং ৎবদর্থম্ || ৫-২৫||
তথেতি তস্যাবিতথং প্রতীতঃ প্রত্যগ্রহীৎসংগরমগ্রজন্মা |
গামাত্তসারাং রঘুরপ্যবেক্ষ্য নিষ্ক্রষ্টুমর্থং চকমে কুবেরাৎ || ৫-২৬||
বসিষ্ঠমন্ত্রোক্ষণজাৎপ্রভাবাদুদন্বদাকাশমহীধরেষু |
মরুৎসখস্যেব বলাহকস্য গতির্বিজঘ্নে ন হি তদ্রথস্য || ৫-২৭||
অথাধিশিশ্যে প্রয়তঃ প্রদোষে রথং রঘুঃ কল্পিতশস্ত্রগর্ভম্ |
সামন্তসংভাবনয়ৈব ধীরঃ কৈলাসনাথং তরসা জিগীষুঃ || ৫-২৮||
প্রাতঃ প্রয়াণাভিমুখায় তস্মৈ সবিস্ময়াঃ কোষগৃহে নিয়ুক্তাঃ |
হিরণ্ময়ীং কোষগৃহস্য মধ্যে বৃষ্টিং শশংসুঃ পতিতাং নভস্তঃ || ৫-২৯||
স ভূপতির্ভাসুরহেমরাশিং লব্ধং কুবেরাদভিয়াস্যমানাৎ |
দিদেশ কৌৎসায় সমস্তমেব পাদং সুমেরোরিব বজ্রভিন্নম্ || ৫-৩০||
জনস্য সাকেতনিবাসিনস্তৌ দ্বাবপ্যভূতানভিনন্দ্যসত্ত্বৌ |
গুরুপ্রদেয়াধিকনিঃস্পৃহোঽর্থী নৃপোঽর্থিকামাদধিকপ্রদশ্চ || ৫-৩১||
অথোষ্ট্রবামীশতবাহিতার্থং প্রজেশ্বরং প্রীতমনা মহর্ষিঃ |
স্পৃশন্করেণানতপূর্বকায়ং সংপ্রস্থিতো বাচমুবাচ কৌৎসঃ || ৫-৩২||
কিমত্র চিত্রং যদি কামসূর্ভূর্বৃত্তে স্থিতস্যাধিপতেঃ প্রজানাম্ |
অচিন্তনীয়স্তু তব প্রভাবো মনীষিতং দ্যৌরপি যেন দুগ্ধা || ৫-৩৩||
আশাস্যমন্যৎপুনরুক্তভূতং শ্রেয়াংসি সর্বাণ্যধিজগ্মুষস্তে |
পুত্রং লভস্বাত্মগুণানুরূপং ভবন্তমীড্যং ভবতঃ পিতেব || ৫-৩৪||
ইত্থং প্রয়ুজ্যাশিষমগ্রজন্মা রাজ্ঞে প্রতীয়ায় গুরোঃ সকাশম্ |
রাজাপি লেভে সুতমাশু তস্মাদালোকমর্কাদিব জীবলোকঃ || ৫-৩৫||
ব্রাহ্মে মুহূর্তে কিল তস্য দেবী কুমারকল্পং সুষুবে কুমারম্ |
অতঃ পিতা ব্রহ্মণ এব নাম্না তমাত্মজন্মানমজং চকার || ৫-৩৬||
রূপং তদোজস্বি তদেব বীর্যং তদেব নৈসর্গিকমুন্নতৎবম্ |
ন কারণাৎস্বাদ্বিভিদে কুমারঃ প্রবর্তিতো দীপ ইব প্রদীপাৎ || ৫-৩৭||
উৎপাতবিদ্যং বিধিবদ্গুরুভ্যস্তং যৌবনোদ্ভেদবিশেষকান্তম্ |
শ্রীঃ সাভিলাষাপি গুরোরনুজ্ঞাং ধীরেব কন্যা পিতুরাচকাঙ্ক্ষ || ৫-৩৮||
অথেশ্বরেণ ক্রথকৈশিকানাং স্বয়ংবরার্থং স্বসুরিন্দুমত্যাঃ |
আপ্তঃ কুমারানয়নোৎসুকেন ভোজেন দূতো রঘবে বিসৃষ্টঃ || ৫-৩৯||
তং শ্লাঘ্যসংবন্ধমসৌ বিচিন্ত্য দারক্রিয়ায়োগ্যদশশ্চ পুত্রম্ |
প্রস্থাপয়ামাস সসৈন্যমেনমৃদ্ধাং বিদর্ভাধিপরাজধানীম্ || ৫-৪০||
তস্যোপকার্যারচিতোপচারা বন্যেতরা জানপদোপদাভিঃ |
মার্গে নিবাসা মনুজেন্দ্রসূনোর্বভূবুরুদ্যানবিহারকল্পাঃ || ৫-৪১||
স নর্মদারোধসি সীকরার্দ্রৈর্মরুদ্ভিরানর্তিতনক্তমালে |
নিবেশয়ামাস বিলঙ্ঘিতাধ্বা ক্লান্তং রজোধূসরকেতু সৈন্যম্ || ৫-৪২||
অথোপরিষ্টাদ্ভ্রমরৈর্ভ্রমদ্ভিঃ প্রাক্সূচিতান্তঃসলিলপ্রবেশঃ |
নির্ধৌতদানামলগণ্ডভিত্তির্বন্যঃ সরিত্তো গজ উন্মমজ্জ || ৫-৪৩||
নিঃশেষবিক্ষালিতধাতুনাপি বপ্রক্রিয়ামৃক্ষবতস্তটেষু |
নীলোর্ধ্বরেখাশবলেন শংসন্দন্তদ্বয়েনাশ্মবিকুণ্ঠিতেন || ৫-৪৪||
সংহারবিক্ষেপলঘুক্রিয়েণ হস্তেন তীরাভিমুখঃ সশব্দম্ |
বভৌ স ভিন্দন্বৃহতস্তরংগান্বার্যর্গলাভঙ্গ ইব প্রবৃত্তঃ || ৫-৪৫||
শৈলোপমঃ শৈবলমঞ্জরীণাং জালানি কর্ষন্নুরসা স পশ্চাৎ |
পূর্বং তদুৎপীডিতবারিরাশিঃ সরিৎপ্রবাহস্তটমুৎসসর্প || ৫-৪৬||
তস্যৈকনাগস্য কপোলভিত্ত্যোর্জলাবগাহক্ষণমেকশান্তা |
বন্যেতরানেকপদর্শনেন পুনর্দিদীপে মদদুর্দিনশ্রীঃ || ৫-৪৭||
সপ্তচ্ছদক্ষীরকটুপ্রবাহমসহ্যমাঘ্রায় মদং তদীয়ম্ |
বিলঙ্ঘিতাধোরণতীব্রয়ত্নাঃ সেনাগজেন্দ্রা বিমুখা বভূবুঃ || ৫-৪৮||
স চ্ছিন্নবন্ধদ্রুতয়ুগ্যশূন্যং ভগ্নক্ষপর্যস্তরথং ক্ষণেন |
রামাপরিত্রাণবিহস্তয়োধং সেননিবেশং তুমুলং চকার || ৫-৪৯||
তমাপতন্তং নৃপতেরবধ্যো বন্যঃ করীতি শ্রুতবান্কুমারঃ |
নির্বর্তয়িষ্যন্বিশিখেন কুম্ভে জঘান নাত্যায়তকৃষ্টশার্ঙ্গঃ || ৫-৫০||
স বিদ্ধমাত্রঃ কিল নাগরূপমুৎসৃজ্য তদ্বিস্মিতসৈন্যদৃষ্টঃ |
স্ফুরৎপ্রভামণ্ডলমধ্যবর্তি কান্তং বপুর্ব্যোমচরঃ প্রপেদে || ৫-৫১||
অথ প্রভাবোপনতৈঃ কুমারং কল্পদ্রুমোত্থৈরবকীর্য পুষ্পৈঃ |
উবাচ বাগ্মী দশনপ্রভাভিঃ সংবর্ধিতোরঃস্থলতারহারঃ || ৫-৫২||
মতঙ্গশাপাদবলেপমূলাদবাপ্তবানস্মি মতঙ্গজৎবম্ |
অবেহি গন্ধর্বপতেস্তনূজং প্রিয়ংবদং মাং প্রিয়দর্শনস্য || ৫-৫৩||
স চানুনীতঃ প্রণতেন পশ্চান্ময়া মহর্ষির্মৃদুতামগচ্ছৎ |
উষ্ণৎবমগ্ন্যাতপসংপ্রয়োগাচ্ছৈত্যং হি যৎসা প্রকৃতির্জলস্য || ৫-৫৪||
ইক্ষ্বাকুবংশপ্রভবো যদা তে ভেৎস্যত্যজঃ কুম্ভময়োমুখেন |
সংযোক্ষ্যসে স্বেন বপুর্মহিম্না তদেত্যবোচৎস তপোনিধির্মাম্ || ৫-৫৫||
সংমোচিতঃ সত্ত্ববতা ৎবয়াহং শাপাচ্চিরপ্রার্থিতদর্শনেন |
প্রতিপ্রিয়ং চেদ্ভবতো ন কুর্যাং বৃথা হি মে স্যাৎস্বপদোপলব্ধিঃ || ৫-৫৬||
সংমোহনং নাম সখে মমাস্ত্রং প্রয়োগসংহারবিভক্তমন্ত্রম্ |
গান্ধর্বমাদৎস্ব যতঃ প্রয়োক্তুর্ন চারিহিংসা বিজয়শ্চ হস্তে || ৫-৫৭||
অলং হ্রিয়া মাং প্রতি যন্মুহূর্তং দয়াপরোঽভূঃ প্রহরন্নপি ৎবম্ |
তস্মাদুপচ্ছন্দয়তি প্রয়োজ্যং ময়ি ৎবয়া ন প্রতিষেধরৌক্ষ্যম্ || ৫-৫৮||
তথেত্যুপস্পৃশ্য পয়ঃ পবিত্রং সোমোদ্ভবায়াঃ সরিতো নৃসোমঃ |
উদঙ্মুখঃ সোঽস্ত্রবিদস্ত্রমন্ত্রং জগ্রাহ তস্মান্নিগৃহীতশাপাৎ || ৫-৫৯||
এবং তয়োরধ্বনি দৈবয়োগাদাসেদুষোঃ সখ্যমচিন্ত্যহেতু |
একো যয়ৌ চৈত্ররথপ্রদেশান্সৌরাজ্যরম্যানপরো বিদর্ভান্ || ৫-৬০||
তং তস্থিবাংসং নগরোপকণ্ঠে তদাগমারূঢগুরুপ্রহর্ষঃ |
প্রত্যুজ্জগাম ক্রথকৈশিকেন্দ্রশ্চন্দ্রং প্রবৃদ্ধোর্মিরিবোর্মিমালী || ৫-৬১||
প্রবেশ্য চৈনং পুনরগ্রয়ায়ী নীচৈস্তথোপাচরদর্পিতশ্রীঃ |
মেনে যথা তত্র জনঃ সমেতো বৈদর্ভমাগন্তুমজং গৃহেশম্ || ৫-৬২||
তস্যাধিকারপুরুষৈঃ প্রণতৈঃ প্রদিষ্টাং
প্রাগ্দ্বারবেদিবিনিবেশিতপূর্ণকুম্ভাম্|
রম্যাং রঘুপ্রতিনিধিঃ স নবোপকার্যাং
বাল্যাৎপরামিব দশাং মদনোঽধ্যুবাস || ৫-৬৩||
তত্র স্বয়ংবরসমাহৃতরাজলোকং
কন্যাললাম কমনীয়মজস্য লিপ্সোঃ|
ভাবাববোধকলুষা দয়িতেব রাত্রৌ
নিদ্রা চিরেণ নয়নাভিমুখী বভূব || ৫-৬৪||
তং কর্ণভূষণনিপীডিতপীবরাংসং
শয়্যোত্তরচ্ছদবিমর্দকৃশাঙ্গরাগম্ |
সূতাত্মজাঃ সবয়সঃ প্রথিতপ্রবোধং
প্রাবোধয়ন্নুষসি বাগ্ভিরুদারবাচঃ || ৫-৬৫||
রাত্রির্গতা মতিমতাং বর মুঞ্চ শয়্যাং
ধাত্রা দ্বিধৈব ননু ধূর্জগতো বিভক্তা |
তামেকতস্তব বিভর্তি গুরুর্বিনিদ্র-
স্তস্যা ভবানপরধুর্যপদাবলম্বী || ৫-৬৬||
নিদ্রাবশেন ভবতাপ্যনবেক্ষমাণা
পর্যুৎসুকৎবমবলা নিশি খণ্ডিতেব |
লক্ষ্মীর্বিনোদয়তি যেন দিগন্তলম্বী
সোঽপি ৎবদাননরুচিং বিজহাতি চন্দ্রঃ || ৫-৬৭||
তদ্বল্গুনা যুগপদুন্মিষিতেন তাবৎ-
সদ্যঃ পরস্পরতুলামধিরোহতাং দ্বে |
প্রস্পন্দমানপরুষেতরতারমন্ত-
শ্চক্ষুস্তব প্রচলিতভ্রমরং চ পদ্মম্ || ৫-৬৮||
বৃন্তাচ্ছ্লথং হরতি পুষ্পমনোকহানাং
সংসৃজ্যতে সরসিজৈররুণাংশুভিন্নৈঃ |
স্বাভাবিকং পরগুণেন বিভাতবায়ুঃ
সৌরভ্যমীপ্সুরিব তে মুখমারুতস্য || ৫-৬৯||
তাম্রোদরেষু পতিতং তরুপল্লবেষু
নির্ধৌতহারগুলিকাবিশদং হিমাম্ভঃ
আভাতি লব্ধপরভাগতয়াধরোষ্ঠে
লীলাস্মিতং সদশনার্চিরিব ৎবদীয়ম্ || ৫-৭০||
যাবৎপ্রতাপনিধিরাক্রমতে ন ভানু-
রহ্নায় তাবদরুণেন তমো নিরস্তম্ |
আয়োধনাগ্রসরতাং ৎবয়ি বীর যাতে
কিং বা রিপূংস্তব গুরুঃ স্বয়মুচ্ছিনত্তি || ৫-৭১||
শয়্যাং জহত্যুভয়পক্ষবিনীতনিদ্রাঃ
স্তম্বেরমা মুখরশৃঙ্খলকর্ষিণস্তে |
যেষাং বিভাতি তরুণারুণরাগয়োগা-
দ্ভিন্নাদ্রিগৈরিকতটা ইব দন্তকোশাঃ || ৫-৭২||
দীর্ঘেষ্বমী নিয়মিতাঃ পটমণ্ডপেষু
নিদ্রাং বিহায় বনজাক্ষ বনায়ুদেশ্যাঃ |
বক্ত্রোষ্মণা মলিনয়ন্তি পুরোগতানি
লেহ্যানি সৈন্ধবশিলাশকলানি বাহাঃ || ৫-৭৩||
ভবতি বিরলভক্তির্ম্লানপুষ্পোপহারঃ
স্বকিরণপরিবেষোদ্ভেদশূন্যাঃ প্রদীপাঃ |
অয়মপি চ গিরং নস্ত্বৎপ্রবোধপ্রয়ুক্তা-
মনুবদতি শুকস্তে মঞ্জুবাক্পঞ্জরস্থঃ || ৫-৭৪||
ইতি বিরচিতবাগ্ভির্বন্দিপুত্রৈঃ কুমারঃ
সপদি বিগতনিদ্রস্তল্পমুজ্ঝাংচকার |
মদপটুনিনদদ্ভির্বোধিতো রাজহংসৈঃ
সুরগজ ইব গাঙ্গং সৈকতং সুপ্রতীকঃ || ৫-৭৫||
অথ বিধিমবসায়্য শাস্ত্রদৃষ্টং
দিবসমুখোচিতমঞ্চিতাক্ষিপক্ষ্মা |
কুশলবিরচিতানুকূলবেশঃ
ক্ষিতিপসমাজমগাৎস্বয়ংবরস্থম্ || ৫-৭৬||

ইতি শ্রীকালিদাসকৃতে রঘুবংশে মহাকাব্যে পঞ্চমঃ সর্গঃ ||