রঘুবংশং সর্গ ০৪

 || কালিদাসকৃতং রঘুবংশম্ সর্গ ৪ ||

স রাজ্যং গুরুণা দত্তং প্রতিপদ্যাধিকং বভৌ |
দিনান্তে নিহিতং তেজঃ সবিত্রেব হুতাশনঃ || ৪-১||
দিলীপানন্তরং রাজ্যে তং নিশম্য প্রতিষ্ঠিতম্ |
পূর্বং প্রধূমিতো রাজ্ঞাং হৃদয়েঽগ্নিরিবোত্থিতঃ || ৪-২||
পুরুহূতধ্বজস্যেব তস্যোওন্নয়নপঙ্ক্তয়ঃ |
নবাভ্যুত্থানদর্শিন্যো ননন্দুঃ সপ্রজাঃ প্রজাঃ || ৪-৩||
সমমেব সমাক্রান্তং দ্বয়ং দ্বিরদগামিনা |
তেন সিংহাসনং পিত্র্যমখিলং চারিমণ্ডলম্ || ৪-৪||
ছায়ামণ্ডললক্ষ্যেণ তমদৃশ্যা কিল স্বয়ম্ |
পদ্মা পদ্মাতপত্রেণ ভেজে সাম্রাজ্যদীক্ষিতম্ || ৪-৫||
পরিকল্পিতসাংনিধ্যা কালে কালে চ বন্দিষু |
স্তুত্যং স্তুতিভিরর্থ্যাভিরুপতস্থে সরস্বতী || ৪-৬||
মনুপ্রভুতির্মান্যৈর্ভুক্তা যদ্যপি রাজভিঃ |
তথাপ্যনন্যপূর্বেব তস্মিন্নাসীদ্বসুংধরা || ৪-৭||
স হি সর্বস্য লোকস্য যুক্তদণ্ডতয়া মনঃ |
আদদে নাতিশীতোষ্ণো নভস্বানিব দক্ষিণঃ || ৪-৮||
মন্দোৎকণ্ঠাঃ কৃতাস্তেন গুণাধিকতয়া গুরৌ |
ফলেন সহকারস্য পুষ্পোদ্গম ইব প্রজাঃ || ৪-৯||
নয়বিদ্ভির্নবে রাজ্ঞি সদসচ্চোপদর্শিতম্ |
পূর্ব এবাভবৎপক্ষস্তস্মিন্নাভবদুত্তরঃ || ৪-১০||
পঞ্চানামপি ভূতানামুৎকর্ষং পুপুষুর্গুণাঃ |
নবে তস্মিন্মহীপালে সর্বং নবমিবাভবৎ || ৪-১১||
যথা প্রহ্লাদনাচ্চন্দ্রঃ প্রতাপাত্তপনো যথা |
তথৈব সোঽভূদন্বর্থো রাজা প্রকৃতিরঞ্জনাৎ || ৪-১২||
কামং কর্ণান্তবিশ্রান্তে বিশালে তস্য লোচনে |
চক্ষুষ্মত্তা তু শাস্ত্রেণ সূক্ষ্মকার্যার্থদর্শিনা || ৪-১৩||
লব্ধপ্রশমনস্বস্থমথৈনং সমুপস্থিতা |
পার্থিবশ্রীর্দ্বিতীয়েব শরৎপঙ্কজলক্ষণা || ৪-১৪||
নির্বৃষ্টলঘুভির্মেঘৈর্মুক্তবর্ত্মা সুদুঃসহঃ |
প্রতাপস্তস্য ভানোশ্চ যুগপদ্ব্যানশে দিশঃ || ৪-১৫||
বার্ষিকং সংজহারেন্দ্রো ধনুর্জৈত্রং রঘুর্দধৌ |
প্রজার্থসাধনে তৌ হি পর্যায়োদ্যতকার্মুকৌ || ৪-১৬||
পুণ্ডরীকাতপত্রস্তং বিকসৎকাশচামরঃ |
ঋতুর্বিডম্বয়ামাস ন পুনঃ প্রাপ তচ্ছ্রিয়ম্ || ৪-১৭||
প্রসাদসুমুখে তস্মিংশ্চন্দ্রে চ বিশদপ্রভে |
তদা চক্ষুষ্মতাং প্রীতিরাসীৎসমরসা দ্বয়োঃ || ৪-১৮||
হংসশ্রেণীষু তারাসু কুমুদ্বৎসু চ বারিষু |
বিভূতয়স্তদীয়ানাং পর্যস্তা যশসামিব || ৪-১৯||
ইক্ষুচ্ছায়নিষাদিন্যস্তস্য গোপ্তুর্গুণোদয়ম্ |
আকুমারকথোদ্ধাতং শালিগোপ্যো জগুর্যশঃ || ৪-২০||
প্রসসাদোদয়াদম্ভঃ কুম্ভয়োনের্মহৌজসঃ |
রঘোরভিভবাশঙ্কি চুক্ষুভে দ্বিষতাং মনঃ|| ৪-২১||
মদোদগ্রাঃ ককুদ্মন্তঃ সরিতাং কূলমুদ্রুজাঃ |
লীলাখেলমনুপ্রাপুর্মহোক্ষাস্তস্য বিক্রমম্|| ৪-২২||
প্রসবৈঃ সপ্তপর্ণানাং মদগন্ধিভিরাহতাঃ |
অসূয়য়েব তন্নাগাঃ সপ্তধৈব প্রসুস্রুবুঃ|| ৪-২৩||
সরিতঃ কুর্বতী গাধাঃ পথশ্চাশ্যানকর্দমান্ |
যাত্রায়ৈ চোদয়ামাস তং শক্তেঃ প্রথমং শরৎ|| ৪-২৪||
তস্মৈ সম্যগ্ঘুতো বহ্নির্বাজিনীরাজনাবিধৌ |
প্রদক্ষিণার্চির্ব্যাজেন হস্তেনেব জয়ং দদৌ|| ৪-২৫||
স গুপ্তমূলপ্রত্যন্তঃ শুদ্ধপার্ষ্ণিরয়ান্বিতঃ |
ষড্বিধং বলমাদায় প্রতস্থে দিগ্জিগীষয়া|| ৪-২৬||
অবাকিরন্বয়োবৃদ্ধাস্তং লাজৈঃ পৌরয়োষিতঃ |
পৃষতৈর্মন্দরোদ্ধূতৈঃ ক্ষীরোর্ময় ইবাচ্যুতম্|| ৪-২৭||
স যয়ৌ প্রথমং প্রাচীং তুল্যঃ প্রাচীনবর্হিষা |
অহিতাননিলোদ্ধূতৈস্তর্জয়ন্নিব কেতুভিঃ|| ৪-২৮||
রজোভিঃ স্যন্দনোদ্ধূতৈর্গজৈশ্চ ঘনসংনিভৈঃ |
ভুবস্তলমিব ব্যোম কুর্বন্ব্যোমেব ভূতলম্|| ৪-২৯||
প্রতাপোঽগ্রে ততঃ শব্দঃ পরাগস্তদনন্তরম্ |
যয়ৌ পশ্চাদ্রথাদীতি চতুঃস্কন্ধেব সা চমূঃ|| ৪-৩০||
মরুপৃষ্ঠান্যুদম্ভাংসি নাব্যাঃ সুপ্রতরা নদীঃ |
বিপিনানি প্রকাশানি শক্তিমত্ত্বাচ্চকার সঃ|| ৪-৩১||
স সেনাং মহতীং কর্ষন্পূর্বসাগরগামিনীম্ |
বভৌ হরজটাভ্রষ্টাং গঙ্গামিব ভগীরথঃ|| ৪-৩২||
ত্যাজিতৈঃ ফলমুৎখাতৈর্ভগ্নৈশ্চ বহুধা নৃপৈঃ |
তস্যাসীদুল্বণো মার্গঃ পাদপৈরিব দন্তিনঃ|| ৪-৩৩||
পৌরস্ত্যানেবমাক্রামংস্তাংস্তাঞ্জনপদাঞ্জয়ী |
প্রাপ তালীবনশ্যামমুপকণ্ঠং মহোদধেঃ|| ৪-৩৪||
অনম্রাণাং সমুদ্ধর্তুস্তস্মাৎসিন্ধুরয়াদিব |
আত্মা সংরক্ষিতঃ সুহ্মৈর্বৃত্তিমাশ্রিত্য বৈতসীম্|| ৪-৩৫||
বঙ্গানুৎখায় তরসা নেতা নৌসাধনোদ্যতান্ |
নিচখান জয়স্তম্ভান্গঙ্গাস্রোতোন্তরেষু সঃ|| ৪-৩৬||
আপাদপদ্মপ্রণতাঃ কলমা ইব তে রঘুম্ |
ফলৈঃ সংবর্ধয়ামাসুরুৎখাতপ্রতিরোপিতাঃ|| ৪-৩৭||
স তীর্ত্বা কপিশাং সৈন্যৈর্বদ্ধদ্বিরদসেতুভিঃ |
উৎকলাদর্শিতপথঃ কলিঙ্গাভিমুখো যয়ৌ|| ৪-৩৮||
স প্রতাপং মহেন্দ্রস্য মূর্ধ্নি তীক্ষ্ণং ন্যবেশয়ৎ |
অঙ্কুশং দ্বিরদস্যেব যন্তা গম্ভীরবেদিনঃ|| ৪-৩৯||
প্রতিজগ্রাহ কালিঙ্গস্তমস্ত্রৈর্গজসাধনঃ |
পক্ষচ্ছেদোদ্যতং শক্রং শিলাবর্ষীব পর্বতঃ|| ৪-৪০||
দ্বিষাং বিষহ্য কাকুৎস্থস্তত্র নারাচদুর্দিনম্ |
সন্মঙ্গলস্নাত ইব প্রতিপেদে জয়শ্রিয়ম্ || ৪-৪১||
তাম্বূলীনাং দলৈস্তত্র রচিতাপানভূময়ঃ |
নারিকেলাসবং যোধাঃ শাত্রবং চ পপুর্যশঃ || ৪-৪২||
গৃহীতপ্রতিমুক্তস্য স ধর্মবিজয়ী নৃপঃ |
শ্রিয়ং মহেন্দ্রনাথস্য জহার ন তু মেদিনীম্ || ৪-৪৩||
ততো বেলাতটেনৈব ফলবৎপূগমালিনা |
অগস্ত্যাচরিতামাশামনাশাস্যজয়ো যয়ৌ || ৪-৪৪||
স সৈন্যপরিভোগেণ গজদানসুগন্ধিনা |
কাবেরীং সরিতাং পত্যুঃ শঙ্কনীয়ামিবাকরোৎ || ৪-৪৫||
বলৈরধ্যুষিতাস্তস্য বিজিগীষোর্গতধ্বনঃ |
মারীচোদ্ভ্রান্তহারীতা মলয়াদ্রেরুপত্যকাঃ || ৪-৪৬||
সসঞ্জুরশ্বক্ষুণ্ণানমেলানামুৎপতিষ্ণবঃ |
তুল্যগন্ধিষু মত্তেভকটেষু ফলরেণবঃ || ৪-৪৭||
ভোগিবেষ্টনমার্গেষু চন্দনানাং সমর্পিতম্ |
নাস্রসৎকরিণাং গ্রৈবং ত্রিপদীচ্ছেদিনামপি || ৪-৪৮||
দিশি মন্দায়তে তেজো দক্ষিণস্যাং রবেরপি |
তস্যামেব রঘোঃ পাণ্ড্যাঃ প্রতাপং ন বিষেহিরে || ৪-৪৯||
তাম্রপর্ণীসমেতস্য মুক্তাসারং মহোদধেঃ |
তে নিপত্য দদুস্তস্মৈ যশঃ স্বমিব সংচিতম্ || ৪-৫০||
স নির্বিশ্য যথাকামং তটেষ্বালীনচন্দনৌ |
স্তনাবিব দিশস্তস্যাঃ শৈলৌ মলয়দর্দুরৌ || ৪-৫১||
অসহ্যবিক্রমঃ সহ্যং দূরান্মুক্তমুদন্বতা |
নিতম্বমিব মেদিন্যাঃ স্রস্তাংশুকমলঙ্ঘয়ৎ || ৪-৫২||
তস্যানীকৈর্বিসর্পদ্ভিরপরান্তজয়োদ্যতৈঃ |
রামাস্ত্রোৎসারিতোঽপ্যাসীৎসহ্যলগ্ন ইবার্ণবঃ || ৪-৫৩||
ভয়োৎসৃষ্টবিভূষাণাং তেন কেরলয়োষিতাম্ |
অলকেষু চমূরেণুশ্চূর্ণপ্রতিনিধীকৃতঃ || ৪-৫৪||
মুরলামারুতোদ্ধূতমগমৎকৈতকং রজঃ |
তদ্যোধবারবাণানাময়ত্নপটবাসতাম্ || ৪-৫৫||
অভ্যভূয়ত বাহানাং চরতাং গাত্রশিঞ্জিতৈঃ |
বর্মভিঃ পবনোদ্ধূতরাজতালীবনধ্বনিঃ || ৪-৫৬||
খর্জূরীস্কন্ধনদ্ধানাং মদোদ্গারসুগন্ধিষু |
কটেষু করিণাং পেতুঃ পুংনাগেভ্যঃ শিলীমুখাঃ || ৪-৫৭||
অবকাশং কিলোদন্বান্ রামায়াভ্যর্থিতো দদৌ |
অপরান্তমহীপালব্যাজেন রঘবে করম্ || ৪-৫৮||
মত্তেভরদনোৎকীর্ণব্যক্তবিক্রমলক্ষণম্ |
ত্রিকূটমেব তত্রোচ্চৈর্জয়স্তম্ভং চকার সঃ || ৪-৫৯||
পারসীকাংস্ততো জেতুং প্রতস্থে স্থলবর্ত্মনা |
ইন্দ্রিয়াখ্যানিব রিপূংস্তত্ত্বজ্ঞানেন সংযমী || ৪-৬০||
যবনীমুখপদ্মানাং সেহে মধুমদং ন সঃ |
বালাতপমিবাব্জানামকালজলদোদয়ঃ || ৪-৬১||
সঙ্গ্রামস্তুমুলস্তস্য পাশ্চাত্যৈরশ্বসাধনৈঃ |
শার্ঙ্গকূজিতবিজ্ঞেয়প্রতিয়োধে রজস্যভূৎ || ৪-৬২||
ভল্লাপবর্জিতৈস্তেষাং শিরোভিঃ শ্মশ্রুলৈর্মহীম্ |
তস্তার সরঘাব্যাপ্তৈঃ স ক্ষৌদ্রপটলৈরিব || ৪-৬৩||
অপনীতশিরস্ত্রাণাঃ শেষাস্তং শরণং যয়ুঃ |
প্রণিপাতপ্রতীকারঃ সংরম্ভো হি মহাত্মনাম্ || ৪-৬৪||
বিনয়ন্তে স্ম তদ্যোধা মধুভির্বিজয়শ্রমম্ |
আস্তীর্ণাজিনরত্নাসু দ্রাক্ষাবলয়ভূমিষু || ৪-৬৫||
ততঃ প্রতস্থে কৌবেরীং ভাস্বানিব রঘুর্দিশম্ |
শরৈরুস্রৈরিবোদীচ্যানুদ্ধরিষ্যন্ রসানিব || ৪-৬৬||
বিনীতাধ্বশ্রমাস্তস্য সিন্ধুতীরবিচেষ্টনৈঃ |
দুধুবুর্বাজিনঃ স্কন্ধাঁল্লগ্নকুঙ্কুমকেসরান্ || ৪-৬৭||
তত্র হূণাবরোধানাং ভর্তৃষু ব্যক্তবিক্রমম্ |
কপোলপাটলাদেশি বভূব রঘুচেষ্টিতম্ || ৪-৬৮||
কাম্বোজাঃ সমরে সোঢুং তস্য বীর্যমনীশ্বরাঃ |
গজালানপরিক্লিষ্টৈরক্ষোটৈঃ সার্ধমানতাঃ || ৪-৬৯||
তেষাং সদশ্বভূয়িষ্ঠাস্তুঙ্গা দ্রবিণরাশয়ঃ |
উপদা বিবিশুঃ শশ্বন্নোৎসেকাঃ কোসলেশ্বরম্ || ৪-৭০||
ততো গৌরীগুরুং শৈলমারুরোহাশ্বসাধনঃ |
বর্ধয়ন্নিব তৎকূটানুদ্ধূতৈর্ধাতুরেণুভিঃ || ৪-৭১||
শশংস তুল্যসত্ত্বানাং সৈন্যঘোষেঽপ্যসংভ্রমম্ |
গুহাশয়ানাং সিংহানাং পরিবৃত্যাবলোকিতম্ || ৪-৭২||
ভূর্জেষু মর্মরীভূতাঃ কীচকধ্বনিহেতবঃ |
গঙ্গাশীকরিণো মার্গে মরুতস্তং সিষেবিরে || ৪-৭৩||
বিশশ্রমুর্নমেরূণাং ছায়াস্বধ্যাস্য সৈনিকাঃ |
দৃষদো বাসিতোৎসঙ্গা নিষণ্ণমৃগনাভিভিঃ || ৪-৭৪||
সরলাসক্তমাতঙ্গগ্রৈবেয়স্ফুরিতৎবিষঃ |
আসন্নোষধয়ো নেতুর্নক্তমস্নেহদীপিকাঃ || ৪-৭৫||
তস্যোৎসৃষ্টনিবাসেষু কণ্ঠরজ্জুক্ষতৎবচঃ |
গজবর্ষ্ম কিরাতেভ্যঃ শশংসুর্দেবদারবঃ || ৪-৭৬||
তত্র জন্যং রঘোর্ঘোরং পর্বতীয়ৈর্গণৈরভূৎ |
নারাচক্ষেপণীয়াশ্মনিষ্পেষোৎপতিতানলম্ || ৪-৭৭||
শরৈরুৎসবসংকেতান্স কৃৎবা বিরতোৎসবান্ |
জয়োদাহরণং বাহ্বোর্গাপয়ামাস কিংনরান্ || ৪-৭৮||
পরস্পরেণ বিজ্ঞাতস্তেষূপায়নপাণিষু |
রাজ্ঞা হিমবতঃ সারো রাজ্ঞঃ সারো হিমাদ্রিণা || ৪-৭৯||
তত্রাক্ষোভ্যং যশোরাশিং নিবেশ্যাবরুরোহ সঃ |
পৌলস্ত্যতুলিতস্যাদ্রেরাদধান ইব হ্রিয়ম্ || ৪-৮০||
চকম্পে তীর্ণলৌহিত্যে তস্মিন্প্রাগ্জ্যোতিষেশ্বরঃ |
তদ্গজালানতাং প্রাপ্তৈঃ সহ কালাগুরুদ্রুমৈঃ || ৪-৮১||
ন প্রসেহে স রুদ্ধার্কমধারাবর্ষদুর্দিনম্ |
রথবর্ত্মরজোঽপ্যস্য কুত এব পতাকিনীম্ || ৪-৮২||
তমীশঃ কামরূপাণামত্যাখণ্ডলবিক্রমম্ |
ভেজে ভিন্নকটৈর্নাগৈরন্যানুপরুরোধ যৈঃ || ৪-৮৩||
কামরূপেশ্বরস্তস্য হেমপীঠাধিদেবতাম্ |
রত্নপুষ্পোপহারেণ ছায়মানর্চ পাদয়োঃ || ৪-৮৪||
ইতি জিৎবা দিশো জিষ্ণুর্ন্যবর্তত রথোদ্ধতম্ |
রজো বিশ্রাময়ন্রাজ্ঞাং ছত্রশূন্যেষু মৌলিষু || ৪-৮৫||
স বিশ্বজিতমাজহ্রে যজ্ঞং সর্বস্বদক্ষিণম্ |
আদানং হি বিসর্গায় সতাং বারিমুচামিব || ৪-৮৬||
সত্রান্তে সচিবসখঃ পুরস্ক্রিয়াভি-
র্গুর্বীভিঃ শমিতপরাজয়ব্যলীকান্ |
কাকুৎস্থশ্চিরবিরহোৎসুকাবরোধান্
রাজন্যান্স্বপুরনিবৃত্তয়েঽনুমেনে || ৪-৮৭||
তে রেখাকুলিশাতপত্রচিহ্নং
সম্রাজশ্চরণয়ুগং প্রসাদলভ্যম্ |
প্রস্থানপ্রণতিভিরঙ্গুলীষু চক্রু-
র্মৌলিস্রক্চ্যুতমকরন্দরেণুগৌরম্ || ৪-৮৮||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
রঘুদিগ্বিজয়ো নাম চতুর্থঃ সর্গঃ ||