রঘুবংশং সর্গ ০৩

 || কালিদাসকৃতং রঘুবংশম্ সর্গ ৩ ||

অথেপ্সিতং ভর্তুরুপস্থিতোদয়ং সখীজনোদ্বীক্ষণকৌমুদীমুখম্ |
নিদানমিক্ষ্বাকুকুলস্য সংততেঃ সুদক্ষিণা দৌহৃদলক্ষণং দধৌ || ৩-১||
শরীরসাদাদসমগ্রভূষণা মুখেন সালক্ষ্যত লোধ্রপাণ্ডুনা |
তনুপ্রকাশেন বিচেয়তারকা প্রভাতকল্পা শশিনেব শর্বরী || ৩-২||
তদাননং মৃৎসুরভি ক্ষিতীশ্বরো রহস্যুপাঘ্রায় ন তৃপ্তিমায়য়ৌ |
করীব সিক্তং পৃষতৈঃ পয়োমুচাং শুচিব্যপায়ে বনরাজিপল্বলম্ || ৩-৩||
দিবং মরুৎবানিব ভোক্ষ্যতে ভুবং দিগন্তবিশ্রান্তরথো হি তৎসুতঃ |
অতোঽভিলাষে প্রথমং তথাবিধে মনো ববন্ধান্যরসান্বিলঙ্ঘ্য সা || ৩-৪||
ন মে হ্রিয়া শংসতি কিংচিদীপ্সিতং স্পৃহাবতী বস্তুষু কেষু মাগধী |
ইতি স্ম পৃচ্ছত্যনুবেলমাদৃতঃ প্রিয়াসখীরুত্তরকোসলেশ্বরঃ || ৩-৫||
উপেত্য সা দোহদদুঃখশীলতাং যদেব বব্রে তদপশ্যদাহৃতম্ |
ন হীষ্টমস্য ত্রিদিবেঽপি ভূপতেরভূদনাসাদ্যমধিজ্যধন্বনঃ || ৩-৬||
ক্রমেণ নিস্তীর্য চ দোহদব্যথাং প্রচীয়মানাবয়বা ররাজ সা |
পুরাণপত্রাপগমাদনন্তরং লতেব সংনদ্ধমনোজ্ঞপল্লবা || ৩-৭||
দিনেষু গচ্ছৎসু নিতান্তপীবরং তদীয়মানীলমুখং স্তনদ্বয়ম্ |
তিরশ্চকার ভ্রমরাভিনীলয়োঃ সুজাতয়োঃ পঙ্কজকোশয়োঃ শ্রিয়ম্ || ৩-৮||
নিধানগর্ভামিব সাগরাম্বরাং শমীমিবাভ্যন্তরলীনপাবকাম্ |
নদীমিবান্তঃসলিলাং সরস্বতীং নৃপঃ সসত্ত্বাং মহিষীমমন্যত || ৩-৯||
প্রিয়ানুরাগস্য মনঃ সমুন্নতের্ভুজার্জিতানাং চ দিগন্তসংপদাম্ |
যথাক্রমং পুংসবনাদিকাঃ ক্রিয়া ধৃতেশ্চ ধীরঃ সদৃশীর্ব্যধত্ত সঃ || ৩-১০||
সুরেন্দ্রমাত্রাশ্রিতগর্ভগৌরবাৎপ্রয়ত্নমুক্তাসনয়া গৃহাগতঃ |
তয়োপচারাঞ্জলিখিন্নহস্তয়া ননন্দ পারিপ্লবনেত্রয়া নৃপঃ || ৩-১১||
কুমারভৃত্যাকুশলৈরনুষ্ঠিতে ভিষগ্ভিরাপ্তৈরথ গর্ভভর্মণি |
পতিঃ প্রতীতঃ প্রসবোন্মুখীং প্রিয়াং দদর্শ কালে দিবমভ্রিতামিব || ৩-১২||
গ্রহৈস্ততঃ পঞ্চভিরুচ্চসংস্থিতৈরসূর্যগৈঃ সূচিতভাগ্যসংপদম্ |
অসূত পুত্রং সময়ে শচীসমা ত্রিসাধনা শক্তিরিবার্থমক্ষয়ম্ || ৩-১৩||
দিশঃ প্রসেদুর্মরুতো ববুঃ সুখাঃ প্রদক্ষিণার্চির্হবিরগ্নিরাদদে |
বভূব সর্বং শুভশংসি তৎক্ষণং ভবো হি লোকাভ্যুদয়ায় তাদৃশাম্ || ৩-১৪||
অরিষ্টশয়্যাং পরিতো বিসারিণা সুজন্মনস্তস্য নিজেন তেজসা |
নিশীথদীপাঃ সহসা হতৎবিষো বভূবুরালেখ্যসমর্পিতা ইব || ৩-১৫||
জনায় শুদ্ধান্তচরায় শংসতে কুমারজন্মামৃতসংমিতাক্ষরম্ |
আদেয়মাসীত্ত্রয়মেব ভূপতেঃ শশিপ্রভং ছত্রমুভে চ চামরে || ৩-১৬||
নিবাতপদ্মস্তিমিতেন চক্ষুষা নৃপস্য কান্তং পিবতঃ সুতাননম্ |
মহোদধেঃ পূর ইবেন্দুদর্শনাদ্গুরুঃ প্রহর্ষঃ প্রবভূব নাত্মনি || ৩-১৭||
স জাতকর্মণ্যখিলে তপস্বিনা তপোবনাদেত্য পুরোধসা কৃতে |
দিলীপসূনুর্মণিরাকরোদ্ভবঃ প্রয়ুক্তসংস্কার ইবাধিকং বভৌ || ৩-১৮||
সুখশ্রবা মঙ্গলতূর্যনিস্বনাঃ প্রমোদনৃত্যৈঃ সহ বারয়োষিতাম্|
ন কেবলং সদ্মনি মাগধীপতেঃ পথি ব্যজৃম্ভন্ত দিবৌকসামপি || ৩-১৯||
ন সংযতস্তস্য বভূব রক্ষিতুর্বিসর্জয়েদ্যং সুতজন্মহর্ষিতঃ |
ঋণাভিধানাৎস্বয়মেব কেবলং তদা পিৎৠণাং মুমুচে স বন্ধনাৎ || ৩-২০||
শ্রুতস্য যায়াদয়মন্তমর্ভকঃ তথা পরেষাং যুধি চেতি পার্থিবঃ |
অবেক্ষ্য ধাতোর্গমনার্থমর্থবিচ্চকার নাম্না রঘুমাত্মসম্ভবম্ || ৩-২১||
পিতুঃ প্রয়ত্নাৎস সমগ্রসংপদঃ শুভৈঃ শরীরাবয়বৈর্দিনে দিনে |
পুপোষ বৃদ্ধিং হরিদশ্বদীধিতেরনুপ্রবেশাদিব বালচন্দ্রমাঃ || ৩-২২||
উমাবৃষাঙ্কৌ শরজন্মনা যথা যথা জয়ন্তেন শচীপুরন্দরৌ |
তথা নৃপঃ সা চ সুতেন মাগধী ননন্দতুস্তৎসদৃশেন তৎসমৌ || ৩-২৩||
রথাঙ্কনাম্নোরিব ভাববন্ধনং বভূব যৎপ্রেম পরস্পরাশ্রয়ম্ |
বিভক্তমপ্যেকসুতেন তত্তয়োঃ পরস্পরস্যোপরি পর্যচীয়ত || ৩-২৪||
উবাচ ধাত্র্যা প্রথমোদিতং বচো যয়ৌ তদীয়ামবলম্ব্য চাঙ্গুলিম্ |
অভূচ্চ নম্রঃ প্রণিপাতশিক্ষয়া পিতুর্মুদং তেন ততান সোঽর্ভকঃ || ৩-২৫||
তমঙ্কমারোপ্য শরীরয়োগজৈঃ সুখৈর্নিষিঞ্চন্তমিবামৃতং ৎবচি |
উপান্তসংমীলিতলোচনো নৃপশ্চিরাৎসুতস্পর্শরসজ্ঞতাং যয়ৌ || ৩-২৬||
অমংস্ত চানেন পরার্ধ্যজন্মনা স্থিতেরভেত্তা স্থিতিমন্তমন্বয়ম্ |
স্বমূর্তিভেদেন গুণাগ্র্যবর্তিনা পতিঃ প্রজানামিব সর্গমাত্মনঃ || ৩-২৭||
স বৃত্তচূলশ্চলকাকপক্ষকৈরমাত্যপুত্রৈঃ সবয়োভিরন্বিতঃ |
লিপের্যথাবদ্গ্রহণেন বাঙ্ময়ং নদীমুখেনেব সমুদ্রমাবিশৎ || ৩-২৮||
অথোপনীতং বিধিবদ্বিপশ্চিতো বিনিন্যুরেনং গুরবো গুরুপ্রিয়ম্ |
অবন্ধ্যয়ত্নাশ্চ বভূবুরত্র তে ক্রিয়া হি বস্তূপহিতা প্রসীদতি || ৩-২৯||
ধিয়ঃ সমগ্রৈঃ স গুণৈরুদারধীঃ ক্রমাচ্চতস্রশ্চতুরর্ণবোপমাঃ |
ততার বিদ্যাঃ পবনাতিপাতিভির্দিশো হরিদ্ভির্হরিতামিবেশ্বরঃ || ৩-৩০||
ৎবচং চ মেধ্যাং পরিধায় রৌরবীমশিক্ষতাস্ত্রং পিতুরেব মন্ত্রবৎ |
ন কেবলং তদ্গুরুরেকপার্থিবঃ ক্ষিতাবভূদেকধনুর্ধরোঽপি সঃ || ৩-৩১||
মহোক্ষতাং বৎসতরঃ স্পৃশন্নিব দ্বিপেন্দ্রভাবং কলভঃ শ্রয়ন্নিব |
রঘুঃ ক্রমাদ্যৌবনভিন্নশৈশবঃ পুপোষ গাম্ভীর্যমনোহরং বপুঃ || ৩-৩২||
অথাস্য গোদানবিধেরনন্তরং বিবাহদীক্ষাং নিরবর্তয়দ্গুরুঃ |
নরেন্দ্রকন্যাস্তমবাপ্য সৎপতিং তমোনুদং দক্ষসুতা ইবাবভুঃ || ৩-৩৩||
যুবা যুগব্যায়তবাহুরংসলঃ কবাটবক্ষাঃ পরিণদ্ধকংধরঃ |
বপুঃপ্রকর্ষাদজয়দ্গুরুং রঘুস্তথাপি নীচৈর্বিনয়াদদৃশ্যত || ৩-৩৪||
ততঃ প্রজানাং চিরমাত্মনা ধৃতাং নিতান্তগুর্বীং লঘয়িষ্যতা ধুরম্ |
নিসর্গসংস্কারবিনীত ইত্যসৌ নৃপেণ চক্রে যুবরাজশব্দভাক্ || ৩-৩৫||
নরেন্দ্রমূলায়তনাদনন্তরং তদাস্পদং শ্রীর্যুবরাজসংজ্ঞিতম্ |
অগচ্ছদংশেন গুণাভিলাষিণী নবাবতারং কমলাদিবোৎপলম্ || ৩-৩৬||
বিভাবসুঃ সারথিনেব বায়ুনা ঘনব্যপায়েন গভস্থিমানিব |
বভূব তেনাতিতরাং সুদুঃসহঃ কটপ্রভেদেন করীব পার্থিবঃ || ৩-৩৭||
নিয়ুজ্য তং হোমতুরংগরক্ষণে ধনুর্ধরং রাজসুতৈরনুদ্রুতম্ |
অপূর্ণমেকেন শতক্রতূপমঃ শতং ক্রতূনামপবিঘ্নমাপ সঃ || ৩-৩৮||
ততঃ পরং তেন মখায় যজ্বনা তুরংগমুৎসৃষ্টমনর্গলং পুনঃ |
ধনুর্ভৃতামগ্রত এব রক্ষিণাং জহার শক্রঃ কিল গূঢবিগ্রহঃ || ৩-৩৯||
বিষাদলুপ্তপ্রতিপত্তি বিস্মিতং কুমারসৈন্যং সপদি স্থিতং চ তৎ |
বসিষ্ঠধেনুশ্চ যদৄচ্ছয়াগতা শ্রুতপ্রভাবা দদৃশেঽথ নন্দিনী || ৩-৪০||
তদঙ্কনিস্যন্দনজলেন লোচনে প্রমৃজ্য পুণ্যেন পুরস্কৃতঃ সতাম্ |
অতীন্দ্রিয়েষ্বপ্যুপপন্নদর্শনো বভূব ভাবেষু দিলীপনন্দনঃ || ৩-৪১||
স পূর্বতঃ পর্বতপক্ষশাতনং দদর্শ দেবং নরদেবসংভবঃ |
পুনঃ পুনঃ সূতনিষিদ্ধচাপলং হরন্তমশ্বং রথরশ্মিসংযুতম্ || ৩-৪২||
শতৈস্তমক্ষ্ণামনিমেষবৃত্তিভির্হরিং বিদিৎবা হরিভিশ্চ বাজিভিঃ |
অবোচদেনং গগনস্পৃশা রঘুঃ স্বরেণ ধীরেণ নিবর্তয়ন্নিব || ৩-৪৩||
মখাংশভাজাং প্রথমো মনীষিভিস্ত্বমেব দেবেন্দ্র সদা নিগদ্যসে |
অজস্রদীক্ষাপ্রয়তস্য মদ্গুরোঃ ক্রিয়াবিঘাতায় কথং প্রবর্তসে || ৩-৪৪||
ত্রিলোকনাথেন সদা মখদ্বিষস্ত্বয়া নিয়ম্যা ননু দিব্যচক্ষুষা |
স চেৎস্বয়ং কর্মসু ধর্মচারিণাং ৎবমন্তরায়ো ভবসি চ্যুতো বিধিঃ || ৩-৪৫||
তদঙ্কমগ্র্যং মঘবন্মহাক্রতোরমুং তুরংগং প্রতিমোক্তুমর্হসি |
পথঃ শ্রুতের্দর্শয়িতার ঈশ্বরা মলীমসামদদতে ন পদ্ধতিম্ || ৩-৪৬||
ইতি প্রগল্ভং রঘুণা সমীরিতং বচো নিশম্যাধিপতির্দিবৌকসাম্ |
নিবর্তয়ামাস রথং সবিস্ময়ঃ প্রচক্রমে চ প্রতিবক্তুমুত্তরম্ || ৩-৪৭||
যদাত্থ রাজন্যকুমার তত্তথা যশস্তু রক্ষ্যং পরতো যশোধনৈঃ |
জগৎপ্রকাশং তদশেষমিজ্যয়া ভবদ্গুরুর্লঙ্ঘয়িতুং মমোদ্যতঃ || ৩-৪৮||
হরির্যথৈকঃ পুরুষোত্তমঃ স্মৃতো মহেশ্বরস্ত্র্যম্বক এব নাপরঃ |
তথা বিদুর্মাং মুনয়ঃ শতক্রতুং দ্বিতীয়গামী ন হি শব্দ এষ নঃ || ৩-৪৯||
অতোঽযমশ্বঃ কপিলানুকারিণা পিতুস্ত্বদীয়স্য ময়াপহারিতঃ |
অলং প্রয়ত্নেন তবাত্র মা নিধাঃ পদং পদব্যাং সগরস্য সংততেঃ || ৩-৫০||
ততঃ প্রহাস্যাপভয়ঃ পুরন্দরং পুনর্বভাষে তুরগস্য রক্ষিতা |
গৃহাণ শস্ত্রং যদি সর্গ এষ তে ন খল্বনির্জিত্য রঘুং কৃতী ভবান্ || ৩-৫১||
স এবমুক্ত্বা মঘবন্তমুন্মুখঃ করিষ্যমাণঃ সশরং শরাসনম্ |
অতিষ্ঠদালীঢবিশেষশোভিনা বপুঃপ্রকর্ষেণ বিডম্বিতেশ্বরঃ || ৩-৫২||
রঘোরবষ্টম্ভময়েন পত্রিণা হৃদি ক্ষতো গোত্রভিদপ্যমর্ষণঃ |
নবাম্বুদানীকমুহূর্তলাঞ্ছনে ধনুষ্যমোঘং সমধত্ত সায়কম্ || ৩-৫৩||
দিলীপসূনোঃ স বৃহদ্ভুজান্তরং প্রবিশ্য ভীমাসুরশোণিতোচিতঃ |
পপাবনাস্বাদিতপূর্বমাশুগঃ কুতূহলেনেব মনুষ্যশোণিতম্ || ৩-৫৪||
হরেঃ কুমারোঽপি কুমারবিক্রমঃ সুরদ্বিপাস্ফালনকর্কশাঙ্গুলৌ |
ভুজে শচীপত্রবিশেষকাঙ্কিতে স্বনামচিহ্নং নিচখান সায়কম্ || ৩-৫৫||
জহার চান্যেন ময়ূরপত্রিণা শরেণ শক্রস্য মহাশনিধ্বজম্ |
চুকোপ তস্মৈ স ভৃশং সুরশ্রিয়ঃ প্রসহ্য কেশব্যপরোপণাদিব || ৩-৫৬||
তয়োরুপান্তস্থিতসিদ্ধসৈনিকং গরুত্মদাশীবিষভীমদর্শনৈঃ |
বভূব যুদ্ধং তুমুলং জয়ৈষিণোরধোমুখৈরূর্ধ্বমুখৈশ্চ পত্রিভিঃ || ৩-৫৭||
অতিপ্রবন্ধপ্রহিতাস্ত্রবৃষ্টিভিস্তমাশ্রয়ং দুষ্প্রসহস্য তেজসঃ |
শশাক নির্বাপয়িতুং ন বাসবঃ স্বতশ্চ্যুতং বহ্নিমিবাদ্ভিরম্বুদঃ || ৩-৫৮||
ততঃ প্রকোষ্ঠে হরিচন্দনাঙ্কিতে প্রমথ্যমানার্ণবধীরনাদিনীম্ |
রঘুঃ শশাঙ্কার্ধমুখেন পত্রিণা শরাসনজ্যামলুনাদ্বিডৌজসঃ || ৩-৫৯||
স চাপমুৎসৃজ্য বিবৃদ্ধমৎসরঃ প্রণাশনায় প্রবলস্য বিদ্বিষঃ |
মহীধ্রপক্ষব্যপরোপণোচিতং স্ফুরৎপ্রভামণ্ডলমস্ত্রমাদদে || ৩-৬০||
রঘুর্ভৃশং বক্ষসি তেন তাডিতঃ পপাত ভূমৌ সহ সৈনিকাশ্রুভিঃ |
নিমেষমাত্রাদবধূয় চ ব্যথাং সহোত্থিতঃ সৈনিকহর্ষনিস্বনৈঃ || ৩-৬১||
তথাপি শস্ত্রব্যবহারনিষ্ঠুরে বিপক্ষভাবে চিরমস্য তস্থুষঃ |
তুতোষ বীর্যাতিশয়েন বৃত্রহা পদং হি সর্বত্র গুণৈর্নিধীয়তে || ৩-৬২||
অসঙ্গমদ্রিষ্বপি সারবত্তয়া ন মে ৎবদন্যেন বিসোঢমায়ুধম্ |
অবেহি মাং প্রীতমৃতে তুরঙ্গমাৎকিমিচ্ছসীতি স্ফুটমাহ বাসবঃ || ৩-৬৩||
ততো নিষঙ্গাদসমগ্রমুধৃতং সুবর্ণপুঙ্খদ্যুতিরঞ্জিতাঙ্গুলিম্ |
নরেন্দ্রসূনুঃ প্রতিসংহরন্নিষুং প্রিয়ংবদঃ প্রত্যবদৎসুরেশ্বরম্ || ৩-৬৪||
অমোচ্যমশ্বং যদি মন্যসে প্রভো ততঃ সমাপ্তে বিধিনৈব কর্মণি |
অজস্রদীক্ষাপ্রয়তঃ স মদ্গুরুঃ ক্রতোরশেষেণ ফলেন যুজ্যতাম্ || ৩-৬৫||
যথা স বৃত্তান্তমিমং সদোগতস্ত্রিলোচনৈকাংশতয়া দুরাসদঃ |
তবৈব সংদেশহরাদ্বিশাংপতিঃ শৃণোতি লোকেশ তথা বিধীয়তাম্ || ৩-৬৬||
তথেতি কামং প্রতিশুশ্রুবান্রঘোর্যথাগতং মাতলিসারথির্যয়ৌ |
নৃপস্য নাতিপ্রমনাঃ সদোগৃহং সুদক্ষিণাসূনুরপি ন্যবর্তত || ৩-৬৭||
তমভ্যনন্দৎপ্রথমং প্রবোধিতঃ প্রজেশ্বরঃ শাসনহারিণা হরেঃ |
পরামৃশন্হর্ষজডেন পাণিনা তদীয়মঙ্গং কুলিশব্রণাঙ্কিতম্ || ৩-৬৮||
ইতি ক্ষিতীশো নবতিং নবাধিকাং মহাক্রতূনাং মহনীয়শাসনঃ |
সমারুরুক্ষুর্দিবমায়ুষঃ ক্ষয়ে ততান সোপানপরম্পরামিব || ৩-৬৯||
অথ স বিষয়ব্যাবৃত্তাত্মা যথাবিধি সূনবে
নৃপতিককুদং দত্ত্বা যূনে সিতাতপবারণম্ |
মুনিবনতরুচ্ছায়াং দেব্যা তয়া সহ শিশ্রিয়ে
গলিতবয়সামিক্ষ্বাকূণামিদং হি কুলব্রতম্ || ৩-৭০||

|| ইতি শ্রীকালিদাসকৃতে রঘুবংশে মহাকাব্যে রাজ্যাভিষেকো নাম তৃতীয়ঃ সর্গঃ ||