রঘুবংশং সর্গ ০২

 || কালিদাসকৃতং রঘুবংশম্ সর্গ ২ ||

অথ প্রজানামধিপঃ প্রভাতে জায়াপ্রতিগ্রাহিতগন্ধমাল্যাম্ |
বনায় পীতপ্রতিবদ্ধবৎসাং যশোধনো ধেনুমৃষের্মুমোচ || ২-১||
তস্যাঃ খুরন্যাসপবিত্রপাংসুমপাংসুলানাং ধুরি কীর্তনীয়া |
মার্গং মনুষ্যেশ্বরধর্মপত্নী শ্রুতেরিবার্থং স্মৃতিরন্বগচ্ছৎ || ২-২||
নিবর্ত্য রাজা দয়িতাং দয়ালুস্তাং সৌরভেয়ীং সুরভির্যশোভিঃ |
পয়োধরীভূতচতুঃসমুদ্রাং জুগোপ গোরূপধরামিবোর্বীম্ || ২-৩||
ব্রতায় তেনানুচরেণ ধেনোর্ন্যষেধি শেষোঽপ্যনুয়ায়িবর্গঃ |
ন চান্যতস্তস্য শরীররক্ষা স্ববীর্যগুপ্তা হি মনোঃ প্রসূতিঃ || ২-৪||
আস্বাদবদ্ভিঃ কবলৈস্তৃণানাং কন্ডূয়নৈর্দংশনিবারণৈঃশ্চ |
অব্যাহতৈঃ স্বৈরগতৈশ্চ তস্যাঃ সম্রাট্ সমারাধনতৎপরোঽভূৎ || ২-৫||
স্থিতঃ স্থিতামুচ্চলিতঃ প্রয়াতাং নিষেদুষীমাসনবন্ধধীরঃ |
জলাভিলাষী জলমাদদানাং ছায়েব তাং ভূপতিরন্বগচ্ছৎ || ২-৬||
স ন্যস্তচিহ্নামপি রাজলক্ষ্মীং তেজোবিশেষানুমিতাং দধান |
আসীদনাবিষ্কৃতদানরাজিরন্তর্মদাবস্থ ইব দ্বিপেন্দ্রঃ || ২-৭||
লতাপ্রতানোদ্গ্রথিতৈঃ স কেশৈরধিজ্যধন্বা বিচচার দাবম্ |
রক্ষাপদেশান্মুনিহোমধেনোর্বন্যান্বিনেষ্যন্নিব দুষ্টসত্ত্বান্ || ২-৮||
বিসৃষ্টপার্শ্বানুচরস্য তস্য পার্শ্বদ্রুমাঃ পাশভৃতা সমস্য |
উদীরয়ামাসুরিবোন্মদানামালোকশব্দং বয়সাং বিরাবৈঃ || ২-৯||
মরুৎপ্রয়ুক্তাশ্চ মরুৎসখাভং তমর্চ্যমারাদভিবর্তমানম্ |
অবাকিরন্বাললতাঃ প্রসূনৈরাচারলাজৈরিব পৌরকন্যাঃ || ২-১০||
ধনুর্ভৃতোঽপ্যস্য দয়ার্দ্রভাবমাখ্যাতমন্তঃকরণৈর্বিশঙ্কৈঃ |
বিলোকয়ন্ত্যো বপুরাপুরক্ষ্ণাং প্রকামবিস্তারফলং হরিণ্যঃ || ২-১১||
স কীচকৈর্মারুতপূর্ণরন্ধ্রৈঃ কূজদ্ভিরাপাদিতবংশকৃত্যম্ |
শুশ্রাব কুঞ্জেষু যশঃ স্বমুচ্চৈরুদ্গীয়মানং বনদেবতাভিঃ || ২-১২||
পৃক্তস্তুষারৈর্গিরিনির্ঝরাণমনোকহাকম্পিতপুষ্পগন্ধী |
তমাতপক্লান্তমনাতপত্রমাচারপূতং পবনো নিষেবে || ২-১৩||
শশাম বৃষ্ট্যাপি বিনা দবাগ্নিরাসীদ্বিশেষা ফলপুষ্পবৃদ্ধিঃ |
ঊনং ন সত্ত্বেষ্বধিকো ববাধে তস্মিন্বনং গোপ্তরি গাহমানে || ২-১৪||
সংচারপূতানি দিগন্তরাণি কৃৎবা দিনান্তে নিলয়ায় গন্তুম্ |
প্রচক্রমে পল্লবরাগতাম্রা প্রভা পতংগস্য মুনেশ্চ ধেনুঃ || ২-১৫||
তাং দেবতাপিত্রতিথিক্রিয়ার্থামন্বগ্যয়ৌ মধ্যমলোকপালঃ |
বভৌ চ সা তেন সতাং মতেন শ্রদ্ধেব সাক্ষাদ্বিধিনোপপন্না || ২-১৬||
স পল্বলোত্তীর্ণবরাহয়ূথান্যাবাসবৃক্ষোন্মুখবর্হিণানি |
যয়ৌ মৃগাধ্যাসিতশাদ্বলানি শ্যামায়মানানি বনানি পশ্যন্ || ২-১৭||
আপীনভারোদ্বহনপ্রয়ত্নাদ্গৃষ্টির্গুরুৎবাদ্বপুষো নরেন্দ্রঃ |
উভাবলংচক্রতুরঞ্চিতাভ্যাং তপোবনাবৃত্তিপথং গতাভ্যাম্ || ২-১৮|
বসিষ্ঠধেনোরনুয়ায়িনং তমাবর্তমানং বনিতা বনান্তাৎ |
পপৌ নিমেষালসপক্ষ্মপঙ্ক্তিরুপোষিতাভ্যামিব লোচনাভ্যাম্ || ২-১৯||
পুরস্কৃতা বর্ত্মনি পার্থিবেন প্রত্যুদ্গতা পার্থিবধর্মপত্ন্যা |
তদন্তরে সা বিররাজ ধেনুর্দিনক্ষপামধ্যগতেব সন্ধ্যা || ২-২০||
প্রদক্ষিণীকৃত্য পয়স্বিনীং তাং সুদক্ষিণা সাক্ষতপাত্রহস্তা |
প্রণম্য চানর্চ বিশালমস্যাঃ শৃঙ্গান্তরং দ্বারমিবার্থসিদ্ধেঃ || ২-২১||
বৎসোৎসুকাপি স্তিমিতা সপর্যাং প্রত্যগ্রহীৎসেতি ননদুতুস্তৌ |
ভক্ত্যোপপন্নেষু হি তদ্বিধানানাং প্রসাদচিহ্নানি পুরঃফলানি || ২-২২||
গুরোঃ সদারস্য নিপীড্য পাদৌ সমাপ্য সাংধ্যং চ বিধিং দিলীপঃ |
দোহাবসানে পুনরেব দোগ্ধ্রীং ভেজে ভুজোচ্ছিন্নরিপুর্নিষণ্ণাম্ || ২-২৩||
তামন্তিকন্যস্তবলিপ্রদীপামন্বাস্য গোপ্তা গৃহিণীসহায়ঃ |
ক্রমেণ সুপ্তামনু সংবিবেশ সুপ্তোত্থিতাং প্রাতরনূদতিষ্ঠৎ || ২-২৪||
ইত্থং ব্রতং ধারয়তঃ প্রজার্থং সমং মহিষ্যা মহনীয়কীর্তেঃ |
সপ্ত ব্যতীয়ুস্ত্রিগুণানি তস্য দিনানি দীনোদ্ধরণোচিতস্য || ২-২৫||
অন্যেদ্যুরাত্মানুচরস্য ভাবং জিজ্ঞাসমানা মুনিহোমধেনুঃ |
গঙ্গাপ্রপাতান্তবিরূঢশষ্পং গৌরীগুরোর্গহ্বরমাবিবেশ || ২-২৬||
সা দুষ্প্রধর্ষা মনসাপি হিংস্রৈরিত্যদ্রিশোভাপ্রহিতেক্ষণেন |
অলক্ষিতাভ্যুৎপতনো নৃপেণ প্রসহ্য সিংহঃ কিল তাং চকর্ষ || ২-২৭||
তদীয়মাক্রন্দিতমার্তসাধোর্গুহানিবদ্ধপ্রতিশব্দদীর্ঘম্ |
রশ্মিষ্বিবাদায় নগেন্দ্রসক্তাং নিবর্তয়ামাস নৃপস্য দৃষ্টিম্ || ২-২৮||
স পাটলায়াং গবি তস্থিবাংসং ধনুর্ধরঃ কেসরিণং দদর্শ |
অধিত্যকায়ামিব ধাতুময়্যাং লোধ্রদ্রুমং সানুমতঃ প্রফুল্লম্ || ২-২৯||
ততো মৃগেন্দ্রস্য মৃগেন্দ্রগামী বধায় বধ্যস্য শরং শরণ্যঃ |
জাতাভিষঙ্গো নৃপতির্নিষঙ্গাদুদ্ধর্তুমৈচ্ছৎপ্রসভোদ্ধৃতারিঃ || ২-৩০||
বামেতরস্তস্য করঃ প্রহর্তুর্নখপ্রভাভূষিতকঙ্কপত্রে |
সক্তাঙ্গুলিঃ সায়কপুঙ্খ এব চিত্রার্পিতারম্ভ ইবাবতস্থে || ২-৩১||
বাহুপ্রতিষ্টম্ভবিবৃদ্ধমন্যুরভ্যর্ণমাগস্কৃতমস্পৃশদ্ভিঃ |
রাজা স্বতেজোভিরদহ্যতান্তর্ভোগীব মন্ত্রৌষধিরুদ্ধবীর্যঃ || ২-৩২||
তমার্যগৃহ্যং নিগৃহীতধেনুর্মনুষ্যবাচা মনুবংশকেতুম্ |
বিস্মায়য়ন্বিস্মিতমাত্মবৃত্তৌ সিংহোরুসত্ত্বং নিজগাদ সিংহঃ || ২-৩৩||
অলং মহীপাল তব শ্রমেণ প্রয়ুক্তমপ্যস্ত্রমিতো বৃথা স্যাৎ |
স পাদপোন্মূলনশক্তি রংহঃ শিলোচ্চয়ে মূর্চ্ছতি মারুতস্য || ২-৩৪||
কৈলাসগৌরং বৃষমারুরক্ষোঃ পাদার্পণানুগ্রহপূতপৃষ্ঠম্ |
অবেহি মাং কিংকরমষ্টমূর্তেঃ কুম্ভোদরং নাম নিকুম্ভমিত্রম্ || ২-৩৫||
অমুং পুরঃ পশ্যসি দেবদারুং পুত্রীকৃতোঽসৌ বৃষভধ্বজেন |
যো হেমকুম্ভস্তননিঃসৃতানাং স্কন্দস্য মাতুঃ পয়সাং রসজ্ঞঃ || ২-৩৬||
কণ্ডূয়মানেন কটং কদাচিদ্বন্যদ্বিপেনোন্মথিতা ৎবগস্য |
অথৈনমদ্রেস্তনয়া শুশোচ সেনান্যমালীঢমিবাসুরাস্ত্রৈঃ || ২-৩৭||
তদাপ্রভৃত্যেব বনদ্বিপানাং ত্রাসার্থমস্মিন্নহমদ্রিকুক্ষৌ |
ব্যাপরিতঃ শূলভৃতা বিধায় সিংহৎবমঙ্কাগতসত্ত্ববৃত্তি || ২-৩৮||
তস্যালমেষা ক্ষুধিতস্য তৃপ্ত্যৈ প্রদিষ্টকালা পরমেশ্বরেণ |
উপস্থিতা শোণিতপারণা মে সুরদ্বিষশ্চান্দ্রমসী সুধেব || ২-৩৯||
স ৎবং নিবর্তস্ব বিহায় লজ্জাং গুরোর্ভবান্দর্শিতশিষ্যভক্তিঃ |
শস্ত্রেণ রক্ষ্যং যদশক্যরক্ষং ন তদ্যশঃ শস্ত্রভৃতাং ক্ষিণোতি || ২-৪০||
ইতি প্রগল্ভং পুরুষাধিরাজো মৃগাধিরাজস্য বচো নিশম্য |
প্রত্যাহতাস্ত্রো গিরিশপ্রভাবাদাত্মন্যবজ্ঞাং শিথিলীচকার || ২-৪১||
প্রত্যব্রবীচ্চৈনমিষুপ্রয়োগে তৎপূর্বভঙ্গে বিতথপ্রয়ত্নঃ |
জডীকৃতস্ত্র্যম্বকবীক্ষণেন বজ্রং মুমুক্ষন্নিব বজ্রপাণিঃ || ২-৪২||
সংরুদ্ধচেষ্টস্য মৃগেদ্র কামং হাস্যং বচস্তদ্যদহং বিবক্ষুঃ |
অন্তর্গতং প্রাণভৃতাং হি বেদ সর্বং ভবান্ভাবমতোঽভিধাস্যে || ২-৪৩||
মান্যঃ স মে স্থাবরজংগমানাং সর্গস্থিতিপ্রত্যবহারহেতুঃ |
গুরোরপীদং ধনমাহিতগ্নের্নশ্যৎপুরস্তাদনুপেক্ষণীয়ম্ || ২-৪৪||
স ৎবং মদীয়েন শরীরবৃত্তিং দেহেন নির্বর্তয়িতুং প্রসীদ |
দিনাবসানোৎসুকবালবৎসা বিসৃজ্য তাং ধেনুরিয়ং মহর্ষেঃ || ২-৪৫||
অথান্ধকারং গিরিগহ্বরাণাং দংষ্ট্রাময়ূখৈঃ শকলানি কুর্বন্ |
ভূয়ঃ স ভূতেশ্বরপার্শ্ববর্তী কিংচিদ্বিহস্যার্থপতিং বভাষে || ২-৪৬||
একাতপত্রং জগতঃ প্রভুৎবং নবং বয়ঃ কান্তমিদং বপুশ্চ |
অল্পস্য হেতোর্বহু হাতুমিচ্ছন্বিচারমূঢঃ প্রতিভাসি মে ৎবম্ || ২-৪৭||
ভূতানুকম্পা তব চেদিয়ং গৌরেকা ভবেৎস্বস্তিমতী ৎবদন্তে |
জীবন্পুনঃ শশ্বদুপপ্লবেভ্যঃ প্রজাঃ প্রজানাথ পিতেব পাসি || ২-৪৮||
অথৈকধেনোরপরাধচণ্ডাদ্গুরোঃ কৃশানুপ্রতিমাদ্বিভেষি |
শক্যোঽস্য মন্যুর্ভবতা বিনেতুং গাঃ কোটিশঃ স্পর্শয়তা ঘটোধ্নীঃ || ২-৪৯||
তদ্রক্ষ কল্যাণপরম্পরাণাং ভোক্তারমূর্জস্বলমাত্মদেহম্ |
মহীতলস্পর্শনমাত্রভিন্নমৃদ্ধং হি রাজ্যং পদমৈন্দ্রমাহুঃ || ২-৫০||
এতাবদুক্ত্বা বিরতে মৃগেন্দ্রে প্রতিস্বনেনাস্য গুহাগতেন |
শিলোচ্চয়োঽপি ক্ষিতিপালমুচ্চৈঃ প্রীত্যা তমেবার্থমভাষতেব || ২-৫১||
নিশম্য দেবানুচরস্য বাচং মনুষ্যদেবঃ পুনরপ্যুবাচ |
ধেন্বা তদধ্যাসিতকাতরাক্ষ্যা নিরীক্ষ্যমাণঃ সুতরাং দয়ালুঃ || ২-৫২||
ক্ষতাৎকিল ত্রায়ত ইত্যুদগ্রঃ ক্ষত্রস্য শব্দো ভুবনেষু রূঢঃ |
রাজ্যেন কিং তদ্বিপরীতবৃত্তেঃ প্রাণৈরুপক্রোশমলীমসৈর্বা || ২-৫৩||
কথং নু শক্যোঽনুনয়ো মহর্ষের্বিশ্রাণনাচ্চান্যপয়স্বিনাম্ |
ইমামনূনাং সুরভেরবেহি রুদ্রৌজসা তু প্রহৃতং ৎবয়াস্যাম্ || ২-৫৪||
সেয়ং স্বদেহার্পণনিষ্ক্রয়েণ ন্যায়্যা ময়া মোইচয়িতুং ভবত্তঃ |
ন পারণা স্যাদ্বিহতা তবৈবং ভবেদলুপ্তশ্চ মুনেঃ ক্রিয়ার্থঃ || ২-৫৫||
ভবানপীদং পরবানবৈতি মহান্হি যত্নস্তব দেবদারৌ |
স্থাতুং নিয়োক্তুর্ন হি শক্যমগ্রে বিনাশ্য রক্ষ্যং স্বয়মক্ষতেন || ২–৫৬||
কিমপ্যহিংস্যস্তব চেন্মতোঽহং যশঃশরীরে ভব মে দয়ালুঃ |
একান্তবিধ্বংসিষু মদ্বিধানং পিণ্ডেষ্বনাস্থা খলু ভৌতিকেষু || ২-৫৭||
সংবন্ধমাভাষণপূর্বমাহুর্বৃত্তঃ স নৌ সংগতয়োর্বনান্তে |
তদ্ভূতনাথানুগ নার্হসি ৎবং সংবন্ধিনো মে প্রণয়ং বিহন্তুম্ || ২-৫৮||
তথেইতি গামুক্তবতে দিলীপঃ সদ্যঃপ্রতিষ্টম্ভবিমুক্তবাহুঃ |
সন্ন্যস্তশস্ত্রো হরয়ে স্বদেহমুপানয়ৎপিণ্ডমিবামিষস্য || ২-৫৯||
তস্মিন্ক্ষণে পালয়িতুঃ প্রজানামুৎপশ্যতঃ সিংহনিপাতমুগ্রম্ |
অবাঙ্মুখস্যোপরি পুষ্পবৃষ্টিঃ পপাত বিদ্যাধরহস্তমুক্তা || ২-৬০||
উত্তিষ্ঠ বৎসেত্যমৃতায়মানং বচো নিশম্যোত্থিতমুত্থিতঃ সন্|
দদর্শ রাজা জননীমিব স্বাং গামগ্রতঃ প্রস্রবিণীং ন সিংহম্ || ২-৬১||
তং বিস্মিতং ধেনুরুবাচ সাধো মায়াং ময়োদ্ভাব্য পরীক্ষিতোঽসি |
ঋষিপ্রভাবান্ময়ি নান্তকোঽপি প্রভুঃ প্রহর্তুং কিমুতান্যহিংস্রাঃ || ২-৬২||
ভক্ত্যা গুরৌ ময়্যনুকম্পয়া চ প্রীতাস্মি তে পুত্র বরং বৃণীষ্ব |
ন কেবলানাং পয়সাং প্রসূতিমবেহি মাং কামদুঘাং প্রসন্নাম্ || ২-৬৩||
ততঃ সমানীয় স মানিতার্থী হস্তৌ স্বহস্তার্জিতবীরশব্দঃ |
বংশস্য কর্তারমনন্তকীর্তিং সুদক্ষিণায়াং তনয়ং যয়াচে || ২-৬৪||
সংতানকামায় তথেতি কামং রাজ্ঞে প্রতিশ্রুত্য পয়স্বিনী সা |
দুগ্ধ্বা পয়ঃ পত্রপুটে মদীয়ং পুত্রোপভুঙ্ক্ষ্বেতি তমদিদেশ || ২-৬৫
বৎসস্য হোমার্থবিধেশ্চ শেষং গুরোরনুজ্ঞামধিগম্য মাতঃ |
ঊধস্যমিচ্ছামি তবোপভোক্তুং ষষ্ঠাংশমুর্ব্যা ইব রক্ষিতায়াঃ || ২-৬৬||
ইত্থং ক্ষিতীশেন বসিষ্ঠধেনুর্বিজ্ঞাপিতা প্রীততরা বভূব |
তদন্বিতা হৈমবতাচ্চ কুক্ষেঃ প্রত্যায়য়াবাশ্রমমশ্রমেণ || ২-৬৭||
তস্যাঃ প্রসন্নেন্দুমুখপ্রসাদং গুরুর্নৃপাণাং গুরবে নিবেদ্য |
প্রহর্ষচিহ্নানুমিতং প্রিয়ায়ৈ শশংস বাচা পুনরুক্তমেব || ২-৬৮||
স নন্দিনীস্তন্যমনিন্দিতাত্মা সদ্বৎসলো বৎসহুতাবশেষম্ |
পপৌ বসিষ্ঠেন কৃতাভ্যনুজ্ঞঃ শুভ্রং যশোমূর্তমিবাতিতৃষ্ণঃ || ২-৬৯||
প্রাতর্যথোক্তব্রতপারণান্তে প্রাস্থানিকং স্বস্ত্যয়নং প্রয়ুজ্য |
তৌ দংপতী স্বাং প্রতি রাজধানীং প্রস্থাপয়ামাস বশী বসিষ্ঠঃ || ২-৭০||
প্রদক্ষিণীকৃত্য হুতং হুতাশমনন্তরং ভর্তুররুন্ধতীং চ |
ধেনুং সবৎসাং চ নৃপঃ প্রতস্থে সন্মঙ্গলোদগ্রতরপ্রভাবঃ || ২-৭১||
শ্রোত্রাভিরামধ্বনিনা রথেন স ধর্মপত্নীসহিতঃ সহিষ্ণুঃ |
যয়াবনুদ্ঘাতসুখেন মার্গং স্বেনেব পূর্ণেন মনোরথেন || ২-৭২||
তমাহিতৌৎসুক্যমদর্শনেন প্রজাঃ প্রজার্থব্রতকর্শিতাঙ্গম্ |
নেত্রৈঃ পপুস্তৃপ্তিমনাপ্নুবদ্ভির্নবোদয়ং নাথমিবৌষধীনাম্ || ২-৭৩||
পুরংদরশ্রীঃ পুরমুৎপতাকং প্রবিশ্য পৌরৈরভিনন্দ্যমানঃ |
ভুজে ভুজংগেন্দ্রসমানসারে ভূয়ঃ স ভূমের্ধুরমাসসঞ্জ || ২-৭৪||
অথ নয়নসমুত্থং জ্যোতিরত্রেরিব দ্যৌঃ
সুরসরিদিব তেজো বহ্নিনিষ্ঠ্যূতমৈশম্ |
নরপতিকুলভূত্যৈ গর্ভমাধত্ত রাজ্ঞী
গুরুভিরভিনিবিষ্টং লোকপালানুভাবৈঃ || ২-৭৫||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
নন্দিনীবরপ্রদানো নাম দ্বিতীয়ঃ সর্গঃ ||