চাণক্যনীতি – অধ্যায় ১৪

চাণক্যনীতি – অধ্যায় ১৪

পৃথিব্যাং ত্রীণি রত্নানি জলমন্নং সুভাষিতম্ |
মূঢৈঃ পাষাণখণ্ডেষু রত্নসংজ্ঞা বিধীয়তে || ১৪-০১
আত্মাপরাধবৃক্ষস্য ফলান্যেতানি দেহিনাম্ |
দারিদ্র্যদুঃখরোগাণি বন্ধনব্যসনানি চ || ১৪-০২
পুনর্বিত্তং পুনর্মিত্রং পুনর্ভার্যা পুনর্মহী |
এতৎসর্বং পুনর্লভ্যং ন শরীরং পুনঃ পুনঃ || ১৪-০৩
বহূনাং চৈব সত্ত্বানাং সমবায়ো রিপুঞ্জয়ঃ |
বর্ষাধারাধরো মেঘস্তৃণৈরপি নিবার্যতে || ১৪-০৪
জলে তৈলং খলে গুহ্যং পাত্রে দানং মনাগপি |
প্রাজ্ঞে শাস্ত্রং স্বয়ং যাতি বিস্তারং বস্তুশক্তিতঃ || ১৪-০৫
ধর্মাখ্যানে শ্মশানে চ রোগিণাং যা মতির্ভবেৎ |
সা সর্বদৈব তিষ্ঠেচ্চেৎকো ন মুচ্যেত বন্ধনাৎ || ১৪-০৬
উৎপন্নপশ্চাত্তাপস্য বুদ্ধির্ভবতি যাদৃশী |
তাদৃশী যদি পূর্বং স্যাৎকস্য ন স্যান্মহোদয়ঃ || ১৪-০৭
দানে তপসি শৌর্যে বা বিজ্ঞানে বিনয়ে নয়ে |
বিস্ময়ো নহি কর্তব্যো বহুরত্না বসুন্ধরা || ১৪-০৮
দূরস্থোঽপি ন দূরস্থো যো যস্য মনসি স্থিতঃ |
যো যস্য হৃদয়ে নাস্তি সমীপস্থোঽপি দূরতঃ || ১৪-০৯
যস্মাচ্চ প্রিয়মিচ্ছেত্তু তস্য ব্রূয়াৎসদা প্রিয়ম্ |
ব্যাধো মৃগবধং কর্তুং গীতং গায়তি সুস্বরম্ || ১৪-১০
অত্যাসন্না বিনাশায় দূরস্থা ন ফলপ্রদা |
সেব্যতাং মধ্যভাবেন রাজা বহ্নির্গুরুঃ স্ত্রিয়ঃ || ১৪-১১
অগ্নিরাপঃ স্ত্রিয়ো মূর্খাঃ সর্পা রাজকুলানি চ |
নিত্যং যত্নেন সেব্যানি সদ্যঃ প্রাণহরাণি ষট্ || ১৪-১২
স জীবতি গুণা যস্য যস্য ধর্মঃ স জীবতি |
গুণধর্মবিহীনস্য জীবিতং নিষ্প্রয়োজনম্ || ১৪-১৩
যদীচ্ছসি বশীকর্তুং জগদেকেন কর্মণা |
পুরা পঞ্চদশাস্যেভ্যো গাং চরন্তী নিবারয় || ১৪-১৪
প্রস্তাবসদৃশং বাক্যং প্রভাবসদৃশং প্রিয়ম্ |
আত্মশক্তিসমং কোপং যো জানাতি স পণ্ডিতঃ || ১৪-১৫
এক এব পদার্থস্তু ত্রিধা ভবতি বীক্ষিতঃ |
কুণপং কামিনী মাংসং যোগিভিঃ কামিভিঃ শ্বভিঃ || ১৪-১৬
সুসিদ্ধমৌষধং ধর্মং গৃহচ্ছিদ্রং চ মৈথুনম্ |
কুভুক্তং কুশ্রুতং চৈব মতিমান্ন প্রকাশয়েৎ || ১৪-১৭
তাবন্মৌনেন নীয়ন্তে কোকিলৈশ্চৈব বাসরাঃ |
যাবৎসর্বজনানন্দদায়িনী বাক্প্রবর্ততে || ১৪-১৮
ধর্মং ধনং চ ধান্যং চ গুরোর্বচনমৌষধম্ |
সুগৃহীতং চ কর্তব্যমন্যথা তু ন জীবতি || ১৪-১৯
ত্যজ দুর্জনসংসর্গং ভজ সাধুসমাগমম্ |
কুরু পুণ্যমহোরাত্রং স্মর নিত্যমনিত্যতঃ || ১৪-২০