চাণক্যনীতি – অধ্যায় ১৩

চাণক্যনীতি – অধ্যায় ১৩

মুহূর্তমপি জীবেচ্চ নরঃ শুক্লেন কর্মণা |
ন কল্পমপি কষ্টেন লোকদ্বয়বিরোধিনা || ১৩-০১
গতে শোকো ন কর্তব্যো ভবিষ্যং নৈব চিন্তয়েৎ |
বর্তমানেন কালেন বর্তয়ন্তি বিচক্ষণাঃ || ১৩-০২
স্বভাবেন হি তুষ্যন্তি দেবাঃ সৎপুরুষাঃ পিতা |
জ্ঞাতয়ঃ স্নানপানাভ্যাং বাক্যদানেন পণ্ডিতাঃ || ১৩-০৩
আয়ুঃ কর্ম চ বিত্তং চ বিদ্যা নিধনমেব চ |
পঞ্চৈতানি হি সৃজ্যন্তে গর্ভস্থস্যৈব দেহিনঃ || ১৩-০৪ (4.1)
অহো বত বিচিত্রাণি চরিতানি মহাত্মনাম্ |
লক্ষ্মীং তৃণায় মন্যন্তে তদ্ভারেণ নমন্তি চ || ১৩-০৫
যস্য স্নেহো ভয়ং তস্য স্নেহো দুঃখস্য ভাজনম্ |
স্নেহমূলানি দুঃখানি তানি ত্যক্ত্বা বসেৎ সুখম্ || ১৩-০৬
অনাগতবিধাতা চ প্রত্যুৎপন্নমতিস্তথা |
দ্বাবেতৌ সুখমেধেতে যদ্ভবিষ্যো বিনশ্যতি || ১৩-০৭
রাজ্ঞি ধর্মিণি ধর্মিষ্ঠাঃ পাপে পাপাঃ সমে সমাঃ |
রাজানমনুবর্তন্তে যথা রাজা তথা প্রজাঃ || ১৩-০৮
জীবন্তং মৃতবন্মন্যে দেহিনং ধর্মবর্জিতম্ |
মৃতো ধর্মেণ সংযুক্তো দীর্ঘজীবী ন সংশয়ঃ || ১৩-০৯
ধর্মার্থকামমোক্ষাণাং যস্যৈকোঽপি ন বিদ্যতে |
অজাগলস্তনস্যেব তস্য জন্ম নিরর্থকম্ || ১৩-১০
বন্ধায় বিষয়াসঙ্গো মুক্ত্যৈ নির্বিষয়ং মনঃ |
মন এব মনুষ্যাণাং কারণং বন্ধমোক্ষয়োঃ || ১৩-১২
দেহাভিমানে গলিতং জ্ঞানেন পরমাত্মনি |
যত্র যত্র মনো যাতি তত্র তত্র সমাধয়ঃ || ১৩-১৩
ঈপ্সিতং মনসঃ সর্বং কস্য সম্পদ্যতে সুখম্ |
দৈবায়ত্তং যতঃ সর্বং তস্মাৎসন্তোষমাশ্রয়েৎ || ১৩-১৪
যথা ধেনুসহস্রেষু বৎসো গচ্ছতি মাতরম্ |
তথা যচ্চ কৃতং কর্ম কর্তারমনুগচ্ছতি || ১৩-১৫
অনবস্থিতকার্যস্য ন জনে ন বনে সুখম্ |
জনো দহতি সংসর্গাদ্বনং সংগবিবর্জনাৎ || ১৩-১৬
খনিৎবা হি খনিত্রেণ ভূতলে বারি বিন্দতি |
তথা গুরুগতাং বিদ্যাং শুশ্রূষুরধিগচ্ছতি || ১৩-১৭
কর্মায়ত্তং ফলং পুংসাং বুদ্ধিঃ কর্মানুসারিণী |
তথাপি সুধিয়শ্চার্যা সুবিচার্যৈব কুর্বতে || ১৩-১৮
সন্তোষস্ত্রিষু কর্তব্যঃ স্বদারে ভোজনে ধনে |
ত্রিষু চৈব ন কর্তব্যোঽধ্যয়নে জপদানয়োঃ || ১৩-১৯
একাক্ষরপ্রদাতারং যো গুরুং নাভিবন্দতে |
শ্বানয়োনিশতং গৎবা চাণ্ডালেষ্বভিজায়তে || ১৩-২০
যুগান্তে প্রচলেন্মেরুঃ কল্পান্তে সপ্ত সাগরাঃ |
সাধবঃ প্রতিপন্নার্থান্ন চলন্তি কদাচন || ১৩-২১