চাণক্যনীতি – অধ্যায় ০৪

চাণক্যনীতি – অধ্যায় ০৪

আয়ুঃ কর্ম চ বিত্তং চ বিদ্যা নিধনমেব চ |
পঞ্চৈতানি হি সৃজ্যন্তে গর্ভস্থস্যৈব দেহিনঃ || ০৪-০১
সাধুভ্যস্তে নিবর্তন্তে পুত্রমিত্রাণি বান্ধবাঃ |
যে চ তৈঃ সহ গন্তারস্তদ্ধর্মাৎসুকৃতং কুলম্ || ০৪-০২
দর্শনধ্যানসংস্পর্শৈর্মৎসী কূর্মী চ পক্ষিণী |
শিশুং পালয়তে নিত্যং তথা সজ্জন-সংগতিঃ || ০৪-০৩
যাবৎস্বস্থো হ্যয়ং দেহো যাবন্মৃত্যুশ্চ দূরতঃ |
তাবদাত্মহিতং কুর্যাৎপ্রাণান্তে কিং করিষ্যতি || ০৪-০৪
কামধেনুগুণা বিদ্যা হ্যকালে ফলদায়িনী |
প্রবাসে মাতৃসদৃশী বিদ্যা গুপ্তং ধনং স্মৃতম্ || ০৪-০৫
একোঽপি গুণবান্পুত্রো নির্গুণেন শতেন কিম্ |
একশ্চন্দ্রস্তমো হন্তি ন চ তারাঃ সহস্রশঃ || ০৪-০৬
মূর্খশ্চিরায়ুর্জাতোঽপি তস্মাজ্জাতমৃতো বরঃ |
মৃতঃ স চাল্পদুঃখায় যাবজ্জীবং জডো দহেৎ || ০৪-০৭
কুগ্রামবাসঃ কুলহীনসেবা
কুভোজনং ক্রোধমুখী চ ভার্যা |
পুত্রশ্চ মূর্খো বিধবা চ কন্যা
বিনাগ্নিনা ষট্প্রদহন্তি কায়ম্ || ০৪-০৮
কিং তয়া ক্রিয়তে ধেন্বা যা ন দোগ্ধ্রী ন গর্ভিণী |
কোঽর্থঃ পুত্রেণ জাতেন যো ন বিদ্বান্ ন ভক্তিমান্ || ০৪-০৯
সংসারতাপদগ্ধানাং ত্রয়ো বিশ্রান্তিহেতবঃ |
অপত্যং চ কলত্রং চ সতাং সঙ্গতিরেব চ || ০৪-১০
সকৃজ্জল্পন্তি রাজানঃ সকৃজ্জল্পন্তি পণ্ডিতাঃ |
সকৃৎকন্যাঃ প্রদীয়ন্তে ত্রীণ্যেতানি সকৃৎসকৃৎ || ০৪-১১
একাকিনা তপো দ্বাভ্যাং পঠনং গায়নং ত্রিভিঃ |
চতুর্ভির্গমনং ক্ষেত্রং পঞ্চভির্বহুভী রণঃ || ০৪-১২
সা ভার্যা যা শুচির্দক্ষা সা ভার্যা যা পতিব্রতা |
সা ভার্যা যা পতিপ্রীতা সা ভার্যা সত্যবাদিনী || ০৪-১৩
অপুত্রস্য গৃহং শূন্যং দিশঃ শূন্যাস্ত্ববান্ধবাঃ |
মূর্খস্য হৃদয়ং শূন্যং সর্বশূন্যা দরিদ্রতা || ০৪-১৪
অনভ্যাসে বিষং শাস্ত্রমজীর্ণে ভোজনং বিষম্ |
দরিদ্রস্য বিষং গোষ্ঠী বৃদ্ধস্য তরুণী বিষম্ || ০৪-১৫
ত্যজেদ্ধর্মং দয়াহীনং বিদ্যাহীনং গুরুং ত্যজেৎ |
ত্যজেৎক্রোধমুখীং ভার্যাং নিঃস্নেহান্বান্ধবাংস্ত্যজেৎ || ০৪-১৬
অধ্বা জরা দেহবতাং পর্বতানাং জলং জরা |
অমৈথুনং জরা স্ত্রীণাং বস্ত্রাণামাতপো জরা || ০৪-১৭
ইন্দ্রিয়াণি চ সংযম্য বকবৎপণ্ডিতো নরঃ |
দেশকালবলং জ্ঞাৎবা সর্বকার্যাণি সাধয়েৎ Sharma || ০৪-১৭
কঃ কালঃ কানি মিত্রাণি কো দেশঃ কৌ ব্যয়াগমৌ |
কশ্চাহং কা চ মে শক্তিরিতি চিন্ত্যং মুহুর্মুহুঃ || ০৪-১৮
অগ্নির্দেবো দ্বিজাতীনাং মুনীনাং হৃদি দৈবতম্ |
প্রতিমা স্বল্পবুদ্ধীনাং সর্বত্র সমদর্শিনঃ || ০৪-১৯