নাট্যশাস্ত্রম্ অধ্যায় ৩৭ গুহ্যতত্ত্বকথনাধ্যায়ঃ

.. নাট্যশাস্ত্রম্ অধ্যায় ৩৭ গুহ্যতত্ত্বকথনাধ্যায়ঃ..

.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ সপ্তত্রিংশোঽধ্যায়ঃ .
কস্যচিত্ত্বথ কালস্য নহুষো নাম পার্থিবঃ .
প্রাপ্তবান্ দেবরাজ্যং হি নয়বুদ্ধিপরাক্রমঃ .. ১ ..
প্রশশাস তদা রাজ্যং দেবৈর্ব্যুষ্টিমবাপ্নুবন্ .
গান্ধর্বং চৈঅ নাট্যং চ দৃষ্ট্বা চিন্তামুপাগমৎ .. ২ ..
স চিন্তয়িৎবা মনসা কথমেষ গৃহে মম .
নাট্যপ্রয়োগো হি ভবেদিতি সাদর এব সন্ .. ৩ ..
কৃতাঞ্জলিঃ প্রয়োগার্থং প্রোক্তবাংস্তু সুরান্ নৃপঃ .
অপ্সরোভিরিদং সার্ধং নাট্যং ভবতু মে গৃহে .. ৪ ..
প্রত্যুক্তশ্চ ততো দেবৈর্বৃহস্পতিপুরোগমৈঃ .
দিব্যাঙ্গনানাং নৈবেহ মানুষৈঃ সহ সঙ্গতিঃ .. ৫ ..
হিতং পথ্যং চ বক্তব্যো ভবান্ স্বর্গাধিপো হি যৎ .
আচার্যাস্তত্র গচ্ছন্তু গৎবা কুর্বন্তু তে প্রিয়ম্ .. ৬ ..
প্রোক্তবাংস্তু ততো মাং তু নৃপতিঃ স কৃতাঞ্জলিঃ .
ইদমিচ্ছামি ভগবন্ নাট্যমুর্ব্যাং প্রতিষ্ঠিতম্ .. ৭ ..
পূর্বমাচার্যকং চৈব ভবতাঽভিহিতং শ্রুতম্ .
ব্যক্তভাবাৎবিদং লব্ধং ৎবৎসকাশাদ্ দ্বিজোত্তম .. ৮ ..
পিতামহগৃহেঽস্মাকং তদন্তঃপুরে জনে .
পিতামহক্রিয়ায়ুক্ত মুর্বশ্যাং সম্প্রবর্তিতম্ .. ৯ ..
তস্যাঃ প্রণাশশোকেন উন্মাদোপরতে নৃপে .
বিপন্নেঽন্তঃপুরজনে পুনর্নাশমুপাগতম্ .. ১০ ..
প্রকাশমেতদিচ্ছামো ভূয়স্তৎ সংপ্রয়োজিতম্ .
তিথিয়জ্ঞক্রিয়াস্বেতদ্ যথা স্যান্ মঙ্গলৈঃ শুভৈঃ .. ১১ ..
তস্মিন্ মম গৃহে বদ্ধং নানাপ্রকৃতিসংশ্রয়ম্ .
স্ত্রীণাং ললিতবিন্যাসৈর্যতো নঃ প্রথয়িষ্যতি .. ১২ ..
তথাঽস্ত্বিতি ময়া প্রোক্তো নহুষঃ পার্থিবস্তদা .
সুতাশ্চাহূয় সম্প্রোক্তা সামপূর্বং সুরৈঃ সহ .. ১৩ ..
অয়ং হি নহুষো রাজা যাচতে নঃ কৃতাঞ্জলিঃ .
গম্যতাং সহিতৈর্ভূমিং প্রয়োক্তুং নাট্যমেব চ .. ১৪ ..
করিষ্যমশ্চ শাপান্তমস্মিন্ সম্যক্ প্রয়োজিতে .
ব্রাহ্মণানাং নৃপাণাং চ ভবিষ্যথ ন কুৎসিতাঃ .. ১৫ ..
তত্র গৎবা প্রয়ুজ্যন্তাং প্রয়োগান্ বসুধাতলে .
ন শক্যং চান্যথা কর্তুং বচনং পার্থিবস্য হি .. ১৬ ..
অস্মাকং চৈব সর্বেষাং নহুষস্য মহাত্মনঃ .
আত্মোপদেশসিদ্ধং হি নাট্যং প্রোক্তং স্বয়ংভুবা .. ১৭ ..
শেষমুত্তরতন্ত্রেণ কোহলস্তু করিষ্যতি .
প্রয়োগঃ কারিকাশ্চৈব নিরুক্তানি তথৈব চ .. ১৮ ..
অপ্সরোভিরিদং সার্ধং ক্রীডনীয়কহেতুকম্ .
অধিষ্ঠিতং ময়া স্বর্গে স্বাতিনা নারদেন চ .. ১৯ ..
ততশ্চ বসুধাং গৎবা নহুষস্য গৃহে দ্বিজাঃ .
স্ত্রীণাং প্রয়োগং বহুধা বদ্ধবন্তো যথাক্রমম্ .. ২০ ..
অত্রোপভোগতস্তে তু মানুষীষু মামাত্মজাঃ .
বদ্ধবন্তোঽধিকস্নেহং তাসু তদ্ দ্বিজসত্তমাঃ .. ২১ ..
পুত্রানুৎপাদ্য বধ্বা চ প্রয়োগং চ যথাক্রমম্ .
ব্রহ্মণা সমনুজ্ঞাতাঃ প্রাপ্তাঃ স্বর্গং পুনঃ সুতাঃ .. ২২ ..
এবমুর্বীতলে নাট্যং শিষ্যৈঃ সমবতারিতম্ .
ভরতানাং চ বংশোঽযং ভবিষ্যং চ প্রবর্তিতঃ .. ২৩ ..
কোহলাদিভিরেবং তু বৎসশাণ্ডিল্যধূর্তিতৈঃ .
মত্যধর্মক্রিয়ায়ুক্তৈঃ কশ্চিৎকালমবস্থিতৈঃ .. ২৪ ..
এতচ্ছাত্রং প্রণীতং হি নারাণাং বুদ্ধিবর্ধনম্ .
ত্রৈলোক্যস্য ক্রিয়োপেতং সর্বশাস্ত্রনিদর্শনম্ .
মঙ্গল্যং ললিতং চৈব ব্রহ্মণো বদনোদ্ভবম্ .. ২৫ ..
য ইদং শ্রুণুয়ান্ নিত্যং প্রোক্তং চেদং স্বয়ম্ভুবা .
কুর্যাৎ প্রয়োগং যশ্চৈবমথবাঽধীতবান্ নরঃ .. ২৬ ..
যা গতির্বেদবিদুষাং যা গতির্যজ্ঞকারিণাম্ .
যা গতির্দানশীলানাং তাং গতিং প্রাপ্নুয়াদ্ধি সঃ .. ২৭ ..
দানধর্মেষু সর্বেষু কীর্ত্যতে তু মহৎ ফলম্ .
প্রেক্ষণীয়প্রদানং হি সর্বদানেষু শস্যতে .. ২৮ ..
ন তথা গন্ধমাল্যেন দেবাস্তুষ্যন্তি পূজিতাঃ .
যথা নাট্যপ্রয়োগস্থৈর্নিত্যং তুষ্যন্তি মঙ্গলৈঃ .. ২৯ ..
গান্ধর্বং চেহ নাট্যং চ যঃ সম্যক্ পরিপালয়েৎ .
স ঈশ্বরগণেশানাং লভতে সদ্গতিং পরাম্ .. ৩০ ..
এবং নাট্যপ্রয়োগে বহুবিধিবিহিতং কর্মশাস্ত্রং প্রণীতম্ .
নোক্তং যচ্চাত্র লোকাদনুকৃতিকরণাৎ .
সংবিভাব্যং তু তজ্জ্ঞৈঃ ..
কিং চান্যৎ সম্প্রপূর্ণা ভবতু বসুমতী নষ্টদুর্ভিক্ষরোগা .
শান্তির্গোব্রাহ্মণানাং ভবতু নরপতিঃ পাতু পৃথ্বীং সমগ্রাম্ .. ৩১ ..
ইতি ভরতীয়ে নাট্যশাস্ত্রে গুহ্যতত্ত্বকথনাধ্যায়ঃ সপ্তত্রিংশঃ .. ৩৭..

.. নাট্যশাস্ত্রম্ সংপূর্ণম্ ..