নাট্যশাস্ত্রম্ অধ্যায় ৩৫ ভূমিকাবিকল্পাধ্যায়ঃ

.. নাট্যশাস্ত্রম্ অধ্যায় ৩৫ ভূমিকাবিকল্পাধ্যায়ঃ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ পঞ্চত্রিংশোঽধ্যায়ঃ .
বিন্যাসং ভূমিকানাং চ সম্প্রবক্ষ্যামি নাটকে .
যাদৃশো যস্য কর্তব্যো বিন্যাসো ভূমিকাস্বথ .. ১ ..
গতিবাগঙ্গচেষ্টাভিঃ সত্ত্বশীলস্বভাবতঃ .
পরীক্ষ্য পাত্রং তজ্জ্ঞস্তু যুঞ্জ্যাদ্ ভূমিনিবেশনে .. ২ ..
তস্মিন্নন্বিষ্য হি গুণবান্ কার্যা পাত্রসমাশ্রয়া .
ন খেদজননং বুদ্ধেরাচার্যস্য ভবিষ্যতি .. ৩ ..
আচার্যঃ পাত্রজাংশ্চৈব গুণাঞ্জ্ঞাৎবা স্বভাবজান্ .
ততঃ কুর্যাদ্ যথায়োগং নৃণাং ভূমিনিবেশনম্ .. ৪ ..
অঙ্গপ্রত্যঙ্গসংযুক্তমহীনাঙ্গং বয়োন্বিতম্ .
ন স্থূলং ন কৃশং চৈব ন দীর্ঘং ন চ মন্থরম্ .. ৫ ..
শ্লিষ্টাঙ্গং দ্যুতিমন্তং চ সুস্বরং প্রিয়দর্শনম্ .
এতৈর্গুণৈশ্চ সংযুক্তং দেবভূমিষু যোজয়েৎ .. ৬ ..
স্থূলং প্রাংশুং বৃহদ্দেহং মেঘগম্ভীরনিস্বনম্ .
রৌদ্রস্বভাবনেত্রং চ স্বভাবভ্রুকুটীমুখম্ .. ৭ ..
রক্ষোদানবদৈত্যানাং ভূমিকাসু প্রয়োজয়েৎ .
পুরুষাণাং প্রয়োগস্তু তথাঙ্গক্রিয়য়ান্বিতঃ .. ৮ ..
সুনেত্রসুভ্রুবঃ স্বঙ্গাঃ সুললাটাঃ সুনাসিকাঃ .
স্বোষ্ঠাঃ সুগণ্ডাঃ সুমুখাঃ সুকণ্ঠাঃ সুশিরোধরাঃ .. ৯ ..
স্বঙ্গপ্রত্যঙ্গসংযুক্তা ন দীর্ঘা ন চ মন্থরাঃ .
ন স্থূলা ন কৃশাশ্চৈব স্বভাবেন ব্যবস্থিতাঃ .. ১০ ..
সুশীলা জ্ঞানবন্তশ্চ তথা চ প্রিয়দর্শনাঅঃ .
কুমাররাজভূমৌ তু সংযোজ্যাশ্চ নরোত্তমাঃ .. ১১ ..
অঙ্গৈরবিকলৈর্ধীরং স্ফুটং বসনকর্মণি .
ন দীর্ঘং নৈব চ স্থূলমূহাপোহবিচক্ষণম্ .. ১২ ..
অদীনং চ প্রগল্ভং চ প্রত্যুৎপন্নবিনিশ্চয়ম্ .
সেনাপতেরমাত্যানাং ভূমিকাসু প্রয়োজয়েৎ .. ১৩ ..
পিঙ্গাক্ষং ঘোণনাসং চ নেত্রমুচ্চমথাপি বা .
কঞ্চুকিশ্রোত্রিয়াদীনাং ভূমিকাসু নিয়োজয়েৎ .. ১৪ ..
এবমন্যেষ্বপি তথা নাট্যধর্মবিভাগতঃ .
দেশবেষানুরূপেণ পাত্রং যোজ্যং স্বভূমিষু .. ১৫ ..
মন্থরং বামনং কুব্জং বিকৃতং বিকৃতাননম্ .
বিষ্টব্ধনেত্রং কাণাক্ষং স্থূলং চিপিটনাসিকম্ .. ১৬ ..
দুর্জনং দুস্বভাবং চ বিকৃতাচারমেব চ .
দাসভূমৌ প্রয়ুঞ্জীত বুধো দাসাঙ্গসম্ভবম্ .. ১৭ ..
প্রকৃত্যাঽতিকৃশং ক্ষামং তপঃশ্রান্তেষু যোজয়েৎ .
তথা চ পুরুষং স্থূলমুপরোধেষু যোজয়েৎ .. ১৮ ..
যদি বা নেদৃশাঃ সন্তি প্রকৃত্যা পুরুষা দ্বিজাঃ .
আচার্যবুদ্ধ্যা যোজ্যাস্তু ভাবচেষ্টাস্বভাবতঃ .. ১৯ ..
যা যস্য সদৃশী চেষ্টা হ্যুত্তমাধমমধ্যমা .
স তথাঽঽচার্যয়োগেন নিয়ম্যা ভাবভাবিনী .. ২০ ..
অতঃ পরং প্রবক্ষ্যামি ভরতানাং বিকল্পনম্ .
ভরতাশ্রয়াশ্চ ভরতো বিদূষকঃ সৌরিকস্তথা নান্দী .
নন্দী সসূত্রধারো নাট্যরসো নায়কশ্চৈব .. ২১ ..
মুকুটাভরণবিকল্পৌ বিজ্ঞেয়ো মাল্যবস্তুবিবিধৈশ্চ .
কারককুশীলবাদ্যা বিজ্ঞেয়া নামতশ্চৈব .. ২২ ..
ধুর্যবদেকো যস্মাদুদ্ধারোঽনেকভূমিকায়ুক্তঃ .
ভাণ্ডগ্রহোপকরণৈনাট্যং ভরতো ভবেৎ তস্মাৎ .. ২৩ ..
লোকাহৃদাশ্রয়কৃতা সর্বপ্রকৃতিপ্রচারসংযুক্তা .
নানাশ্রয়াং প্রকুরুতে তথা চ নারী তু সর্বত্র .. ২৪ ..
প্রত্যুৎপন্নপ্রতিভো নর্মকৃতো নর্মগর্ভনির্ভেদঃ .
ছেদবিদূষিতবচনো বিদূষকো নাম বিজ্ঞেয়ঃ .. ২৫ ..
তূর্যতিস্তু নরঃ সর্বাতোদ্যপ্রবাদনে কুশলঃ .
তূরপরিগ্রহয়ুক্তো বিজ্ঞেয়স্তৌরিকো নাম .. ২৬ ..
নটনৃতি ধাৎবর্থোঽযং ভূতং নাটয়তি লোকবৃত্তান্তম্ .
রসভাবসৎবয়ুক্তং যস্মাৎ তস্মান্নটো ভবতি .. ২৭ ..
স্তুত্যভিবাদনকৃতৈর্মধুরৈর্বাক্যৈঃ সুমঙ্গলাচারৈঃ .
সর্ব স্তৌতি হি লোকং যস্মাৎ তস্মাদ্ভবেদ্বাদী .. ২৮ ..
ভাবেভ্যো বহুধাঽস্মিন্ রসা বদতি নাট্যয়োগেষু .
প্রাকৃতসংস্কৃতপাঠ্যো নন্দী নামেতি স জ্ঞেয়ঃ .. ২৯ ..
গীতস্য চ বাদ্যস্য চ পাঠ্যস্য চ নৈকভাববিহিতস্য .
শিষ্টোপদেশয়োগাৎ সূত্রজ্ঞঃ সূত্রধারস্তু .. ৩০ ..
যস্মাৎ যথোপদিষ্টান্ রসাংশ্চ ভাবাংশ্চ
সৎবসংযুক্তান্ .
ভূমিবিকল্পৈর্নয়তি চ নাট্যকরঃ কীর্তিতস্তস্মাৎ .. ৩১ ..
চতুরাতোদ্যবিধানং সর্বস্য তু শাস্ত্রখে দবিহিতস্য .
নাট্যস্যান্তং গচ্ছতি তস্মাদ্বৈ নায়কোঽভিহিতঃ .. ৩২ ..
নানাপ্রকৃতিসমুত্থং করোতি যঃ শীর্ষকং মুকুটয়োগে .
বিবিধৈর্বেষবিশেষৈঃ স চ কুটকারস্তু বিজ্ঞেয়ঃ .. ৩৩ ..
ভাণ্ডকবাদ্যজ্ঞা যা লয়তালজ্ঞা রসানুবিদ্ধা চ .
সর্বাঙ্গসুন্দরী বৈ কর্তব্যা নাটকীয়া তু .. ৩৪ ..
যস্ত্বাভরণং কুর্যাদ্ বহুবিধবিহিতং স চাভরণঃ .
যশ্চোপকরণয়োগাৎ স তেন নাম্নাঽভিধাতব্যঃ .. ৩৫ ..
যো বৈ মাল্যং কুরুতে পঙ্চবিধং মাল্যাকৃৎ স বিজ্ঞেয়ঃ .
যশ্চাপি বেষয়োগং কুরুতে স চ বেষকারী তু .. ৩৬ ..
চিত্রজ্ঞশ্চিত্রকরো বস্ত্রস্য রঞ্জানাত্তথা রজকঃ .
জৎবশ্মলোহকাষ্ঠৈর্দ্রব্যকরৈঃ কারুকশ্চৈব .. ৩৭ ..
নানাতোদ্যবিধানে প্রয়োগয়ুক্তঃ প্রবাদনে কুশলঃ .
অতোদ্যেঽপ্যতিকুশলো যস্মাৎ স কুশলবো জ্ঞেয়ঃ .. ৩৮ ..
যদ্যৎ সমাশ্রয়ন্তে শিল্পং বা কর্ম বা প্রয়োগং বা .
তনৈবোপগতগুণা বিজ্ঞেয়া নামতঃ পুরুষাঃ .. ৩৯ ..
এবং তু নাটকবিধৌ জাতির্নটসংশ্রয়া বুধৈর্জ্ঞেয়া .
নাট্যোপকরণয়ুক্তা নানাশিল্পপ্রসক্তা চ .. ৪০ ..
উক্তোঽত্র ভূমিকান্যাসঃ প্রয়োক্তারশ্চ যোগতঃ .
আদিষ্টং নাট্যশাস্ত্রং চ মুনয়ঃ কিমিহোচ্যতাম্ ..৪১ ..
ইতি ভরতীয়ে নাট্যশাস্ত্রে ভূমিকাবিকল্পাধ্যায়ঃ পঞ্চত্রিংশঃ .. ৩৫ ..