নাট্যশাস্ত্রম্ অধ্যায় ৩৩ গুণদোষবিচারঃ

.. নাট্যশাস্ত্রম্ অধ্যায় ৩৩ গুণদোষবিচারঃ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ ত্রয়স্ত্রিংশোঽধ্যায়ঃ .
গুণাৎ প্রবর্ততে গানং দোষং চৈব নিরস্যতে .
তস্মাদ্যত্নেন বিজ্ঞেয়ৌ গুণদোষৌ সমাসতঃ .. ১ ..
গাতা প্রত্যগ্রবয়াঃ স্নিগ্ধো মধুরস্বরোপচিতকণ্ঠঃ .
লয়তালকলাপাতপ্রমাণয়োগেষু তত্ত্বজ্ঞঃ .. ২ ..
রূপগুণকান্তিয়ুক্তা মাধুর্যোপেতসৎবসম্পন্নাঃ .
পেশলমধুরস্নিগ্ধানুনাদিসমরক্ত গুরু (শুভ)কণ্ঠাঃ .. ৩
সুবিহিতগমকবিধায়িন্যোঽক্ষোভ্যো(ভ্যাস্)তাললয়কুশলাঃ .
আতোদ্যার্পিতকরণা বিজ্ঞেয়া গায়িকাঃ শ্যামাঃ .. ৪ ..
প্রায়েণ তু স্বভাবাৎ স্ত্রীণাং গানং নৃণাং চ পাঠ্যবিধিঃ .
স্ত্রীণাং স্বভাবমধুরঃ কণ্ঠো নৃণাং বলিৎবং চ .. ৫ ..
যত্র স্ত্রীণাং পাঠ্যাৎ(ঠ্যং)গুণৈর্নরাণাং চ গানমধুরৎবম্ .
জ্ঞেয়োঽলঙ্কারোঽসৌ ন হি স্বভাবো হ্যয়ং তেষাম্ .. ৬ ..
সুনিবিষ্টপাণিলয়য়তিয়োগজ্ঞৌসুমধুরলঘুহস্তৌ .
গাতৃগুণৈশ্চোপেতাববহিতমনসৌ সুসঙ্গীতৌ .. ৭ ..
স্ফুটরচিতচিত্রকরণৌ গীতশ্রবণাচলৌপ্রবীণৌ চ .
চিত্রাদিবাদ্যকুশলৌবীণাভ্যাং বাদকৌ ভবতঃ .. ৮ ..
বলবানবহিতবুদ্ধির্গীতলয়জ্ঞস্তথাসুসঙ্গীতঃ .
শ্রাবকমধুরস্নিগ্ধো দৃঢপাণির্বংশবাদকো জ্ঞেয়ঃ .. ৯ ..
অবিচলিতমবিচ্ছন্নং বর্ণালঙ্কারবোধকংমধুরম্ .
স্নিগ্ধং দোষবিহীনং বেণোরেবং স্মৃতং বাদ্যম্ .. ১০ ..
জ্ঞানবিজ্ঞানকরণবচনপ্রয়োগসিদ্ধিনিষ্পাদনানি
ষডাচার্যগুণা ইতি .
তত্র জ্ঞানং শাস্ত্রাববোধঃ . যথা চ
ক্রিয়াসম্পাদনং বিজ্ঞানম্ . কণ্ঠহস্তগৌণ্যং করণম্ .
জিতগ্রন্থতা বচনম্ . দেশাদিসম্পদারাধনং প্রয়োগসিদ্ধিঃ .
শিষ্যস্বভাবমবিশেষ্যোপাত্তয়
উপদেশাচ্ছিষ্যনিষ্পাদনমিতি .. ১১ ..
শ্রাবণোঽথ ঘনঃ স্নিগ্ধো মধুরোহ্যবধানবান্ .
ত্রিস্থানশোভীত্যেবং তু ষট্ কণ্ঠস্য গুণা মতাঃ .. ১২ ..
উদাত্তং শ্রূয়তে যস্মাত্তস্মাচ্ছ্রাবণ উচ্যতে .
শ্রাবণঃ সুস্বরো যস্মাদচ্ছিন্নঃ স ঘনো মতঃ .. ১৩ ..
অরূক্ষধ্বনিসংযুক্তঃ স্নিগ্ধস্তজ্জ্ঞৈঃ প্রকীর্তিতঃ .
মনঃপ্রহ্লাদনকরঃ স বৈ মধুর উচ্যতে .. ১৪ ..
স্বরেঽধিকে চ হীনে চ হ্যবিরক্তো বিধানবান্ .
শিরঃকণ্ঠেষ্বভিহিতংত্রিস্থানমধুরস্বরঃ .
ত্রিস্থানশোভীত্যেবং তু স হি তজ্জ্ঞৈরুদাহৃতঃ .. ১৫ ..
কপিলো হ্যবস্থিতশ্চৈব তথা সন্দষ্ট এব চ .
কাকী চ তুম্বকী চৈব পঞ্চ দোষা ভবন্তি হি .. ১৬ ..
বৈস্বর্যং চ ভবেদ্যত্র তথা স্যাদ্ ঘর্ঘরায়িতম্ .
কপিলঃ স তু বিজ্ঞেয়ঃ শ্লেষ্মকণ্ঠস্তথৈব চ .. ১৭ ..
ঊনতাঽধিকতা চাপি স্বরাণাং যত্র দৃশ্যতে .
রূক্ষদোষহতশ্চৈব জ্ঞেয়ঃ স ৎবব্যবস্থিতঃ .. ১৮ ..
দণ্ডপ্রয়োগাৎ সন্দষ্টস্ত্বাচার্যৈঃ পরিকীর্তিতঃ .
যো ন বিস্তরতি স্থানে স্বরমুচ্চারণাগতম্ .. ১৯ ..
নাসাগ্রগ্রস্তশব্দস্তুতুম্বকী সোঽভিধীয়তে .. ২০ ..
অন্যে তু
সমপ্রহরণে চৈব জবিনৌ বিশদৌ তথা .
জিতশ্রমৌ বিকৃষ্টৌ চ মধুরৌ স্বেদবর্জিতৌ .
তথা বৃয়ন্নখৌ চৈব জ্ঞেয়ৌ হস্তস্য বৈ গুণাঃ .. ২১ .. ইতি
এতে গুণাশ্চ দোষাশ্চ তত্ত্বতঃ কথিতো ময়া .
অত ঊর্ধ্বং প্রবক্ষ্যামি হ্যবনদ্ধবিধিং পুনঃ .. ২২ ..
পূর্বং যদুক্তং প্রপিতামহেন .
কুর্যাৎ য এবং তু নরঃ প্রয়োগে
সম্মানমগ্রয়ং লভতে স লোকে .. ২৩ ..
ইতি ভরতীয়ে নাট্যশাস্ত্রে গুণদোষবিচারো
নামাধ্যায়স্ত্রয়স্ত্রিংশঃ .. ৩৩ ..