নাট্যশাস্ত্রম্ অধ্যায় ৩০ সুষিরাতোদ্যলক্ষণং

.. নাট্যশাস্ত্রম্ অধ্যায় ৩০ সুষিরাতোদ্যলক্ষণং..
.. শ্রীরস্তু ..
ভরতমুনিপ্রণীতং নাট্যশাস্ত্রম্
ত্রিংশোঽধ্যায়ঃ
অতোদ্যং সুষিরং নাম জ্ঞেয়ং বংশগতং বুধৈঃ .
বৈণ এব বিধিস্তত্র স্বরগ্রামসমাশ্রয়ঃ .. ১ ..
দ্বিকত্রিকচতুষ্কাস্তু জ্ঞেয়া বংশগতাঃ স্বরাঃ .
কম্প্যমানার্থমুক্তাশ্চ ব্যক্তমুক্তাস্তথৈব চ .. ২ ..
তত্রোপরি যথা হ্যেকঃ স্বরো বৈণস্বরান্তরে .
প্রাপ্নোত্যন্যৎবমেবেহ তথা বংশগতোঽপি হি .. ৩ ..
দ্বিকস্ত্রিকশ্চতুষ্কো বা শ্রুতিসঙ্খ্যো ভবেৎ স্বরঃ .
অনীরণাত্তু শেষাণাং স্বরাণামপি সম্ভবঃ .
অঙ্গুলীবাদনকৃতং তচ্চ মে সন্নিবোধত .. ৪ ..
ব্যক্তমুক্তাঙ্গুলিস্তত্র স্বরো জ্ঞেয়শ্চতুঃশ্রুতিঃ .
কম্প্যমানাঙ্গুলিশ্চৈব ত্রিশ্রুতিঃ পরিকীর্তিতঃ .
দ্বিকোঽর্ধাঙ্গুলিমুক্তঃ স্যাদিতি শ্রুত্যাশ্রিতাঃ স্বরাঃ .. ৫ ..
এতে স্যুর্মধ্যমগ্রামে ভূয়ঃ ষড্জাশ্রিতাঃ পুনঃ .
ব্যক্তমুক্তাঙ্গুলিকৃতাঃ ষড্জমধ্যমপঞ্চমাঃ .. ৬ ..
ঋষভো ধৈবতশ্চাপি কম্প্যমানাঙ্গুলীকৃতৌ .
অর্ধমুক্তাঙ্গুলিশ্চৈব গান্ধারোঽথ নিষাদবান্ .. ৭ ..
স্বরসাধারণশ্চাপি কাকল্যন্তরসংজ্ঞয়া .
নিষাদগান্ধারকৃতৌ ষড্জমধ্যময়োরপি .. ৮ ..
বিপর্যয়া সন্নিকর্ষে শ্রুতিলক্ষণসিদ্ধিতঃ .
বৈণকণ্ঠপ্রবেশেন সিদ্ধা একাশ্রিতাঃ স্বরাঃ .. ৯ ..
যং যং গাতা স্বরং গচ্ছেৎ তং তং বংশেন বাদয়েৎ .
শারীরবৈণবংশ্যানামেকীভাবঃ প্রশস্যতে .. ১০ ..
অবিচলিতমবিচ্ছিন্নং বর্ণালঙ্কারসংযুতং বিধিবৎ .
ললিতং মধুরং স্নিগ্ধং বেণোরেবং স্মৃতং বাদ্যম্ .. ১১ ..
এবমেতৎ স্বরগতং বিজ্ঞেয়ংগানয়োক্তৃভিঃ .
অতঃ পরং প্রবক্ষ্যামি ধনাতোদ্যবিকল্পনম্ .. ১২ ..
ইতি ভরতীয়ে নাট্যশাস্ত্রে সুষিরাতোদ্যলক্ষণং
নামাধ্যায়স্ত্রিংশঃ ..