নাট্যশাস্ত্রম্ অধ্যায় ২৬ বিকৃতিবিকল্পঃ

.. নাট্যশাস্ত্রম্ অধ্যায় ২৬ বিকৃতিবিকল্পঃ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
ষড্বিংশোঽধ্যায়ঃ
অনুরূপা বিরূপা চ তথা রূপানুরূপিণী .
ত্রিপ্রকারেহ পাত্রাণাং প্রকৃতিশ্চ বিভাবিতা .. ১..
নানাবস্থাক্রিয়োপেতা ভূমিকা প্রকৃতিস্তথা .
ভৃশমুদ্যোতয়েন্নাট্যং স্বভাবকরণাশ্রয়ম্ .. ২..
বহুবাহূবহুমুখাস্তথা চ বিকৃতাননাঃ .
পশুশ্বাপদবক্ত্রাশ্চ খরোষ্ট্রাশ্চ গজাননাঃ .. ৩..
এতে চান্যে চ বহবো নানারূপা ভবন্তি যে .
আচার্যেণ তু তে কার্যা মৃৎকাষ্ঠজতুচর্মভিঃ .. ৪..
স্বাভাবিকেন রূপেন প্রবিশেদ্রঙ্গমণ্ডলম্ .
আত্মরূপমবচ্ছাদ্য বর্ণকৈর্ভূষণৈরপি .. ৫..
যাদৃশং যস্য যদ্রূপং প্রকৃত্যা তত্র তাদৃশম্ ..
বয়োবেষানুরূপেণ প্রয়োজ্যং নাট্যকর্মণি .. ৬..
যথা জীবৎস্বভাবং হি পরিত্যজ্যান্যদেহিকম্ .
পরভাবং প্রকুরুতে পরভাবং সমাশ্রিতঃ .. ৭..
এবং বুধঃ পরংভাবং সোঽস্মীতি মনসা স্মরন্ .
যেষাং বাগঙ্গলীলাভিশ্চেষ্টাভিস্তু সমাচরেৎ .. ৮..
সুকুমারপ্রয়োগো যো রাজ্ঞামামোদসংভবঃ .
শৃঙ্গাররসমাসাদ্য তন্নারীষু প্রয়োজয়েৎ .. ৯..
যুদ্ধোদ্ধতাবিদ্ধকৃতা সংরংভারভটাশ্চ যে .
ন তে স্ত্রীভিঃ প্রয়োক্তব্যাঃ যোক্তব্যাঃ পুরুষেষু তে .. ১০..
অনুদ্ভটমসংভ্রান্তমনাবিদ্ধাঙ্গচেষ্টিতম্ .
লয়তালকলাপাতপ্রমাণনিয়তাক্ষরম্ .. ১১..
সুবিভক্তপদালাপমনিষ্ঠুরমকাহলম্ .
ঈদৃশং যদ্ভবেন্নাট্যং নারীভিশ্চ প্রয়োজয়েৎ .. ১২..
এবং কার্যং প্রয়োগজ্ঞৈর্ভূমিকাবিনিবেশনম্ .
স্ত্রিয়ো হি স্ত্রীগতো ভাবঃ পৌরুষঃ পুরুষস্যচ .. ১৩..
যথা বয়ো যথাবস্থমনুরূপেতি সা স্মৃতা .
পুরুষঃ স্ত্রীকৃতং ভাবং রূপাৎপ্রকুরুতে তু যঃ .. ১৪..
রূপানুরূপা সা জ্ঞেয়া প্রয়োগে প্রকৃতির্বুধঃ .
ছন্দতঃ পৌরুষীং ভূমিং স্ত্রী কুর্যাদনুরূপতঃ .. ১৫..
ন পরস্পরচেষ্টাসু কার্যৌ স্থবিরবালিশৌ .
পাঠ্যপ্রয়োগে পুরুষাঃ প্রয়োক্তব্যা হি সংস্কৃতে .. ১৬..
স্ত্রীণাং স্বভাবমধুরাঃ কণ্ঠাঃ পুংসাং তু বলবন্তঃ .
যদ্যপি পুরুষো বিদ্যাৎ গীতবিধানং চ লক্ষণোপেতম্ .. ১৭..
মাধুর্যগুণবিহীনং শোভাং জনয়েন্ন তদ্গীতম্ .
যত্র স্ত্রীণাং পাঠ্যাদ্গুণৈর্নরাণাং চ কণ্ঠমাধুর্যম্ .. ১৮..
প্রকৃতিবিপর্যয়জনিতৌ বিজ্ঞেয়ৌ তাবলঙ্কারৌ .
প্রায়েণ দেবপার্থিবসেনাপতিমুখ্যপুরুষভবনেষু .. ১৯..
স্ত্রীজনকৃতাঃ প্রয়োগা ভবন্তি পুরুষস্বভাবেন .
রম্ভোর্বশীপ্রভৃতিষু স্বর্গে নাট্যং প্রতিষ্ঠিতম্ .. ২০..
তথৈব মানুষে লোকে রাজ্ঞামন্তঃপুরেষ্বিহ .
উপদেষ্টব্যমাচার্যৈঃ প্রয়ত্নেনাঙ্গনাজনে .. ২১..
ন স্বয়ং ভূমিকাভ্যাসো বুধৈঃ কার্যস্তু নাটকে .
স্ত্রীষু যোজ্যঃ প্রয়ত্নেন প্রয়োগঃ পুরুষাশ্রয়ঃ .. ২২..
যস্মাৎস্বভাবোপগতো বিলাসঃ স্ত্রীষু বিদ্যতে .
তস্মাৎস্বভাবমধুরমঙ্গং সুলভসৌষ্ঠবম্ .. ২৩..
ললিতং সৌষ্ঠবং যচ্চ সোঽলঙ্কারঃ পরো মতঃ .
প্রয়োগো দ্বিবিধশ্চৈব বিজ্ঞেয়ো নাটকাশ্রয়ঃ .. ২৪..
সুকুমারস্তথাবিদ্ধো নানাভাবরসাশ্রয়ঃ .
নাটকং সপ্রকরণং ভাণো বীথ্যঙ্ক এব চ .. ২৫..
জ্ঞেয়ানি সুকুমারাণি মানুষৈরাশ্রিতানি তু .
সুকুমারপ্রয়োগোঽযং রাজ্ঞামামোদকারকঃ .. ২৬..
শৃঙ্গারসমাসাদ্য স্ত্রীণাং তত্তু প্রয়োজয়েৎ .
যুদ্ধোদ্ধতাবিদ্ধকৃতাসংরংভারভটাশ্চ যে .. ২৭..
ন তে স্ত্রীণাং প্রকর্তব্যাঃ কর্তব্যাঃ পুরুষৈর্হি তে .
যথাবিদ্ধাঙ্গহারং তু ভেদ্যভেদ্যাহবাত্মকম্ .. ২৮..
মায়েন্দ্রজালবহুলং পুস্তনৈপথ্যদীপিতম্ .
পুরুষপ্রায়সংচারমল্পস্ত্রীকমথোদ্ধতম্ .. ২৯..
সাৎবত্যারভটীইয়ুক্তং নাট্যমাবিদ্ধসংজ্ঞিতম্ .
ডিমঃ সমবকারশ্চ ব্যায়োগেহামৃগৌ তথা .. ৩০..
এতান্যাবিদ্ধসংজ্ঞানি বিজ্ঞেয়ানি প্রয়োক্তৃভিঃ .
এষাং প্রয়োগঃ কর্তব্যো দেবদানবরাক্ষসৈঃ .. ৩১..
উদ্ধতা যে চ পুরুষাঃ শৌর্যবীর্যসমন্বিতাঃ .
যোগ্যঃ স চ প্রয়ত্নঃ কর্তব্যঃ সততপ্রমাদেন .. ৩২..
ন হি যোগ্যয়া বিনা ভবতি চ ভাবরসসৌষ্ঠবং কিংচিৎ .
সংগীতপরিক্লেশো নিত্যং প্রমদাজনস্য গুণ এব .. ৩৩..
যন্মধুরকর্কশৎবং লভতে নাট্যপ্রয়োগেণ .
প্রমদাঃ নাট্যবিলাসৈর্লভতে যৎ কুসুমৈর্বিচিত্রলাবণ্যম্ .
কামোপচারকুশলা ভবন্তি চ কাম্যা বিশেষেণ ..৩৪..
গীতং বৃত্তং তথা বাদ্যং প্রস্তারগমনক্রিয়া .
শিষ্যনিষ্পাদনং চৈব ষডাচার্যগুণাঃ স্মৃতাঃ .. ৩৫..
এতানি পঞ্চ যো বেত্তি স আচার্যঃ প্রকীর্তিতঃ .
ঊহাপোহৌ মতিশ্চৈব স্মৃতির্মেধা তথৈব চ .. ৩৬..
মেধাস্মৃতির্গুণশ্লাঘারাগঃ সংঘর্ষ এব চ .
উৎসাহশ্চ ষডেবৈতান্ শিষ্যস্যাপি গুণান্ বিদুঃ .. ৩৭..
এবং কার্যং প্রয়োগজ্ঞৈর্নানাভূমিবিকল্পনম্ .
অত ঊর্ধ্বং প্রবক্ষ্যামি সিদ্ধীনামপি লক্ষণম্ .. ৩৮..
ইতি ভারতীয়ে নাট্যশাস্ত্রে বিকৃতিবিকল্পো
নাম ষড্বিংশোঽধ্যায়ঃ ..