নাট্যশাস্ত্রম্ অধ্যায় ২৪ পুংস্ত্র্যুপচারঃ

.. নাট্যশাস্ত্রম্ অধ্যায় ২৪ পুংস্ত্র্যুপচারঃ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
চতুর্বিংশোঽধ্যায়ঃ
সমাসতস্তু প্রকৃতিস্ত্রিবিধা পরিকীর্তিতা .
পুরুষাণামথ স্ত্রীণামুত্তমাধমমধ্যমা .. ১..
জিতেন্দ্রিয় জ্ঞানবতী নানাশিল্পবিচক্ষণা .
দক্ষিণাধমহালক্ষ্যা ভীতানাং পরিসান্ত্বনী ..২..
নানাশাস্ত্রার্থসংপন্না গাম্ভীর্যৌদার্যশালিনী .
স্থৈর্যত্যাগগুণোপেতা জ্ঞেয়া প্রকৃতিরুত্তমা .. ৩..
লোকোপচারচতুরা শিল্পশাস্ত্রবিশারদা .
বিজ্ঞানমাধুর্যয়ুতা মধ্যমা প্রকৃতিঃ স্মৃতা .. ৪..
রূক্ষবাচোঽথ দুঃশীলাঃ কুসত্ত্বাঃ স্থূলবুদ্ধয়ঃ .
ক্রোধনাঘাতকাশ্চৈব মিত্রঘ্নাশ্ছিদ্রমানিনঃ .. ৫..
পিশুনাস্তূদ্ধতৈর্বাক্যৈরকৃতজ্ঞাস্তথালসাঃ .
মান্যামান্যা বিশেষজ্ঞা স্ত্রীলোলাঃ কলহপ্রিয়াঃ .. ৬..
সূচকাঃ পাপকর্মাণঃ পরদ্রব্যাপহারিণঃ .
এভির্দোষৈস্তুসংপন্না ভবন্তীহাধমা নরাঃ .. ৭..
এবং তু শীলতো নৄণাং প্রকৃতিস্ত্রিবিধা স্মৃতা .
স্ত্রীণাং পুনশ্চ প্রকৃতিং ব্যাখ্যাস্যাম্যনুপূর্বশঃ .. ৮..
মৃদুভাবা চাচপলা স্মিতভাষিণ্যনিষ্ঠুরা .
গুরূণাং বচনে দক্ষা সলজ্জা বিনয়ান্বিতা .. ৯..
রূপাভিজনমাধুর্যৈর্গুণৈঃ স্বাভাবিকের্যুতা .
গাম্ভীর্যধৈর্যসম্পন্না বিজ্ঞেয়া প্রমদোত্তমা .. ১০..
নাত্যুৎকৃষ্টৈরনিখিলৈরেভিরেবান্বিতা গুণৈঃ .
অল্পদোষানুবিদ্ধা চ মধ্যমা প্রকৃতিঃ স্মৃতা .. ১১..
অধমা প্রকৃতির্যা তু পুরুষাণাং প্রকীর্তিতা .
বিজ্ঞেয়া সৈব নারীণামধমানাং সমাসতঃ .. ১২..
নপুংসকস্তু বিজ্ঞেয়ঃ সংকীর্ণোঽধম এব চ .
প্রেষ্যাদিরপি বিজ্ঞেয়া সংকীর্ণা প্রকৃতিদ্বিজাঃ .. ১৩..
শকারশ্চ বিটশ্চৈব যে চান্যেপ্যেবমাদয়ঃ .
সংকীর্ণাস্তেঽপি বিজ্ঞেয়া হ্যধমা নাটকে বুধৈঃ .. ১৪..
এতা জ্ঞেয়াঃ প্রকৃতয়ঃ পুরুষস্ত্রীনপুংসকৈঃ .
আসাং তু সংপ্রবক্ষ্যামি বিধানং শীলসংশ্রয়ম্ .. ১৫..
অত্র চৎবার এব স্যুর্নায়কাঃ পরিকীর্তিতাঃ .
মধ্যমোত্তমপ্রকৃতৌ নানালক্ষণলক্ষিতাঃ .. ১৬..
ধীরোদ্ধতা ধীরললিতা ধীরোদাত্তাস্তথৈব চ .
ধীরপ্রশান্তকাশ্চৈব নায়কাঃ পরিকীর্তিতাঃ .. ১৭..
দেবা ধীরোদ্ধতা জ্ঞেয়াঃ স্যুর্ধীরললিতা নৃপাঃ .
সেনাপতিরমাত্যশ্চ ধীরোদাত্তৌ প্রকীর্তিতৌ .. ১৮..
ধীরপ্রশান্তা বিজ্ঞেয়া ব্রাহ্মণা বাণিজস্তথা .
এতেষাং তু পুনর্জ্ঞেয়াশ্চৎবারস্তু বিদূষকঃ .. ১৯..
লিংগী দ্বিজো রাজজীবী শিষ্যশ্চেতি যথাক্রমম্ .
দেবক্ষিতিভৃতামাত্যব্রাহ্মণানাং প্রয়োজয়েৎ .. ২০..
বিপ্রলংভসুহৃদোমী সংকথালাপপেশলাঃ .
ব্যসনী প্রাপ্য দুঃখং বা যুজ্যতেঽভ্যুদয়েন যঃ .. ২১..
তথা পুরুষমাহুস্তং প্রধানং নায়কং বুধাঃ .
যত্রানেকস্য ভবতো ব্যসনাভ্যুদয়ৌ পুনঃ .. ২২..
সপুষ্টৌ যত্র তৌ স্যাতাং ন ভবেত্তত্র নায়কঃ .
দিব্যা চ নৃপপত্নী চ কুলস্ত্রী গণিকা তথা .. ২৩..
এতাস্তু নায়িকা জ্ঞেয় নানাপ্রকৃতিলক্ষণাঃ .
ধীরা চ ললিতা চ স্যাদুদাত্তা নিভৃতা তথা .. ২৪..
দিব্যা রাজাঙ্গনাশ্চৈব গুণৈর্যুক্তা ভবন্তি হি .
উদাত্তা নিভৃতা চৈব ভবেত্তু কুলজাঙ্গনা .. ২৫..
ললিতে চাভ্যুদাত্তে চ গণিকাশিল্পকারিকে .
[প্রকৃতীনাং তু সর্বাসামুপচারাদ্ দ্বিধা স্মৃতাঃ .. ২৬..
বাহ্যশ্চাভ্যন্তরশ্চৈব তয়োর্বক্ষ্যামি লক্ষণম্ .
তত্র রাজোপচারো যো ভবেদাভ্যন্তরো হি সঃ .. ২৭..
ততো বাক্যোপচারস্তু যস্য বাহ্যঃ স উচ্যতে .
অথ রাজোপচারে চ রাজ্ঞামন্তঃপুরাশ্রিতম্ .. ২৮..
স্ত্রীবিভাগং প্রবক্ষ্যামি বিভক্তমুপচারতঃ . ]
রাজোপচারং বক্ষ্যামি হ্যন্তঃপুরসমাশ্রয়ম্ .. ২৯..
মহাদেবী তথা দেব্যঃ স্বামিন্যঃ স্থাপিতা অপি .
ভোগিন্যঃ শিল্পকারিণ্যো নাটকীয়াঃ সনর্তকাঃ ..৩০..
অনুচারিকাশ্চ বিজ্ঞেয়াস্তথা চ পরিচারিকাঃ .
তথা সংচারিকাশ্চৈব তথা প্রেষণকারিকাঃ .. ৩১..
মহত্তর্যঃ প্রতীহার্যঃ কুমার্যঃ স্থবিরা অপি .
আয়ুক্তিকাশ্চ নৃপতেরয়মন্তঃপুরো জনঃ .. ৩২..
অত্র মূর্ধাভিষিক্তা যা কুলশীলসমন্বিতা .
গুণৈর্যুক্তা বয়স্স্থা চ মধ্যস্থা ক্রোধনা তথা .. ৩৩..
মুক্তের্ষ্যা নৃপশীলজ্ঞা সুখদুঃখসহা সমা .
শান্তিস্বস্ত্যয়নৈর্ভর্তুস্সততং মঙ্গলৈষিণী .. ৩৪..
শান্তা পতিব্রতা ধীরা অন্তঃপুরহিতে রতা .
এভির্গুণৈস্তু সংযুক্তা মহদেবীত্যুদাহৃতা .. ৩৫..
এভিরেব গুণৈর্যুক্তাস্তৎসংস্কারবিবর্জিতাঃ .
গর্বিতাশ্চাতিসৌভাগ্যাঃ পতিসংভোগতৎপরাঃ . ৩৬..
শুচিনিত্যোজ্বলাকারাঃ পতিপক্ষাভ্যসূয়কাঃ .
বয়োরূপগুণাঢ্যা যাস্তা দেব্য ইতি ভাষিতাঃ .. ৩৭..
সেনাপতেরমাত্যানাং ভৃত্যানামথবা পুনঃ .
ভবেয়ুস্তনয়া যাস্তু প্রতিসম্মানবর্জিতাঃ .. ৩৮..
শীলরূপগুণৈর্যাস্তু সংপন্না নৃপতের্হিতাঃ .
স্বগুণৈর্লব্ধসম্মানা স্বামিন্য ইতি তাঃ স্মৃতাঃ .. ৩৯..
রূপয়ৌবনশালিন্যঃ কর্কশা বিভ্রমান্বিতাঃ .
রতিসংভোগকুশলাঃ প্রতিপক্ষাভ্যসূয়কাঃ .. ৪০..
দক্ষা ভর্তুশ্চ চিত্তজ্ঞা গন্ধমাল্যোজ্বলাস্সদা .
নৃপতেশ্ছন্দবর্তিন্যো ন হীর্ষ্যামানগর্বিতাঃ .. ৪১..
উত্থিতাশ্চ প্রমত্তাশ্চ ত্যক্তালস্যা ন নিষ্ঠুরাঃ .
মান্যামান্যবিশেষজ্ঞাঃ স্থাপিতা ইতি তাঃ স্মৃতাঃ .. ৪২..
কুলশীললব্ধপূজামৃদবো নাতিচোদ্ভটাঃ .
মধ্যস্থা নিভৃতাঃ ক্ষান্তা ভোগিন্য ইতি তাঃ স্মৃতাঃ .. ৪৩..
নানাকলাবিশেষজ্ঞা নানাশিল্পবিচক্ষণাঃ .
গন্ধপুষ্পবিভাগজ্ঞা লেখ্যালেখ্যবিকল্পিকাঃ .. ৪৪..
শয়নাসনভাগজ্ঞাশ্চতুরা মধুরাস্তথা .
দক্ষাঃ সৌম্যাঃ স্ফুটাঃ শ্লিষ্ঠা নিভৃতাঃ শিল্পকারিকাঃ .. ৪৫..
গ্রহমোক্ষলয়জ্ঞা যা রসভাববিকল্পিকাঃ .
চতুরানাট্যকুশলাশ্চোহাপোহবিচক্ষণাঃ .. ৪৬..
রূপয়ৌবনসংপন্না নাটকীয়াস্তু তাঃ স্মৃতাঃ .
হেলাভাববিশেষাঢ্যা সৎবেনাভিনয়েন চ . ৪৭..
মাধুর্যেন চ সংপন্না হ্যাতোদ্যকুশলা তথা .
অঙ্গপ্রত্যঙ্গসংপন্না চতুষ্ষষ্ঠিকলান্বিতা .. ৪৮..
চতুরাঃ প্রশ্নয়োপেতাঃ স্ত্রীদোষৈশ্চ বিবর্জিতাঃ .
সদা প্রগল্ভা চ তথা ত্যক্তালস্যা জিতশ্রমা .. ৪৯..
নানাশিল্পপ্রয়োগজ্ঞা নৃত্তগীতবিচক্ষণা .
অথ রূপগুণৌদার্যধৈর্যসৌভাগ্যশীলসংপন্না .. ৫০..
পেশলমধুরস্নিগ্ধানুনাদিকলচিত্রকণ্ঠা চ .
সমাগতাসু নারীষু রূপয়ৌবনকন্তিভিঃ .. ৫১..
ন দৃশ্যতে গুণৈর্স্তুল্যা যস্যাঃ সা নর্তকী স্মৃতা .
সর্বাবস্থোপচারেষু যা ন মুঞ্চতি পর্থিবম্. .. ৫২..
বিজ্ঞেয়া দক্ষিণা দক্ষা নাট্যজ্ঞৈরনুচারিকা .
শয়্যাপালী ছত্রধারী তথা ব্যজনধারিণী .. ৫৩..
সংবাহিকা গন্ধয়োক্ত্রী তথা চৈব প্রসাধিকা .
তথাভরণয়োক্ত্রী চ মাল্যসংযোজিকা তথা .. ৫৪..
এবং বিধা ভবেয়ুর্যাঃ তা জ্ঞেয়াঃ পরিচারিকাঃ .
নানাকক্ষ্যা বিচারিণ্যঃ তথোঅপবনসংচরাঃ .. ৫৫..
দেবতায়তনক্রীডা প্রাসাদপরিচারিকাঃ .
যামকিন্যস্তথা চৈব যাশ্চৈবং লক্ষণাঃ স্ত্রিয়ঃ .. ৫৬..
সংচারিকাস্তু বিজ্ঞেয়া নাট্যজ্ঞৈঃ সমুদাহৃতাঃ .
প্রেষণেঽকামসংযুক্তে গুহ্যাগুহ্যসমুত্থিতে .. ৫৭..
নৃপৈর্যাস্তু নিয়ুজ্যন্তে তাঃ জ্ঞেয়াঃ পরিচারিকাঃ .
সর্বান্তঃপুররক্ষাসু স্তুতিস্বস্ত্যয়নেন চ .. ৫৮..
যা বৃদ্ধিমভিনন্দন্তি তা বিজ্ঞেয়া মহত্তরাঃ .
সন্ধিবিগ্রহসংবদ্ধনানাচারসমুত্থিতম্ .. ৫৯..
নিবেদয়ন্তি যাঃ কার্যং প্রতিহার্যস্তু তাঃ স্মৃতাঃ .
অপ্রাপ্তরসসংভোগা ন সংভ্রান্তা ন চোদ্ভটাঃ .. ৬০..
নিভৃতাশ্চ সলজ্জাশ্চ কুমার্যো বালিকাঃ স্মৃতাঃ .
পুর্বরাজনয়জ্ঞা যাঃ পুর্বরাজাভিপূজিতাঃ .. ৬১..
পুর্বরাজানুচরিতাস্তা বৃদ্ধা ইতি সুজ্ঞিতাঃ .
ভাণ্ডাগারেষ্বধিকৃতাশ্চায়ুধাধিকৃতাস্তথা .. ৬২..
ফলমূলৌষধীনাং চ তথা চৈবান্ববেক্ষকী .
গন্ধাভরণবস্ত্রাণাং মাল্যানাং চৈব চিন্তিকা .. ৬৩..
বহ্বাশ্রয়ে তথা যুক্তা জ্ঞেয়া হ্যায়ুক্তিকাস্তু তাঃ .
ইত্যন্তঃপুরচারিণ্যঃ স্ত্রিয়ঃ প্রোক্তা সমাসতঃ .. ৬৪..
বিশেষণবিশেষেণ তাসাং বক্ষ্যামি বৈ দ্বিজাঃ .
অনুরক্তাশ্চ ভক্তাশ্চ নানাপার্শ্বসমুত্থিতাঃ .. ৬৫..
যা নিয়ুক্তা নিয়োগেষু কার্যেষু বিবিধেষু চ .
ন চোদ্ভটা অসংভ্রান্তা ন লুব্ধা নাপি নিষ্ঠুরাঃ .. ৬৬..
দান্তাঃ ক্ষান্তাঃ প্রসন্নাশ্চ জিতক্রোধা জিতেন্দ্রিয়াঃ .
অকামা লোভডীনাশ্চ স্ত্রীদোষৈশ্চ বিবর্জিতাঃ .. ৬৭..
সা ৎবন্তঃপুরসংচারে যোজ্যা পার্থিববেশ্মনি .
কারুকাঃ কঞ্চুকীয়াশ্চ তথা বর্ষবরাঃ পুনঃ .. ৬৮..
ঔপস্থায়িকনির্মুণ্ডা স্ত্রীণা প্রেষণকর্মণি .
রক্ষণং চ কুমারীণাং বালিকানাং প্রয়োজয়েৎ .. ৬৯..
অন্তঃপুরাধিকারেষু রাজচর্যানুবর্ত্তিনাম্ .
সর্ববৃত্তান্তসংবাহাঃ পত্যাগারে নিয়োজয়েৎ .. ৭০..
বিনীতাঃ স্বল্পসত্ত্বা যে ক্লীবা বৈ স্ত্রীস্বভাবিকাঃ .
জাত্যা ন দোষিণশ্চৈব তে বৈ বর্ষবরাঃ স্মৃতাঃ ৭১..
ব্রহ্মাণাঃ কুশলা বৃদ্ধাঃ কামদোষবিবর্জিতাঃ .
প্রয়োজনেষু দেবীনাং প্রয়োক্তব্যা নৃপৈঃ সদা .. ৭২..
এতদষ্টাদশবিধং প্রোক্তমন্তঃপুরং ময়া .
অতঃ পরং প্রবক্ষ্যামি বাহ্যং পুরুষসংভবম্ .. ৭৩..
রাজা সেনাপতিশ্চৈব পুরোধা মন্ত্রিণস্তথা .
সচিবাঃ প্রাড্বিবাকাশ্চ কুমারাধিকৃতাস্তথা .. ৭৪..
একে চান্যে চ বহবো মান্যা জ্ঞেয়া নৃপস্য তু .
বেশেষমেষাং বক্ষ্যামি লক্ষণেন নিবোধত .. ৭৫..
বলবান্ বুদ্ধিসংপন্নঃ সত্যবাদী জিতেন্দ্রিয়ঃ .
দক্ষঃ প্রগল্ভো ধৃতিমান্ বিক্রান্তো মতিমাঞ্ছুচিঃ .. ৭৬..
দীর্ঘদর্শী মহোৎসাহঃ কৃতজ্ঞঃ প্রিয়বাঙ্মৃদুঃ .
লোকপালব্রতধরঃ কর্মমার্গবিশারদঃ .. ৭৭..
উত্থিতশ্চাপ্রমত্তশ্চ বৃদ্ধসেব্যর্থশাস্ত্রবিৎ .
পরভাবেঙ্গিতাভিজ্ঞঃ শূরো রক্ষাসমন্বিতঃ .. ৭৮..
ঊহাপোহবিচারী চ নানাশিল্পপ্রয়োজকঃ .
নীতিশাস্ত্রার্থকুশলস্তথা চৈবানুরাগবান্ .. ৭৯..
ধর্মজ্ঞোঽব্যসনী চৈব গুণৈরেতের্ভবেন্নৃপঃ .
কুলীনা বুদ্ধিসংপন্না নানাশাস্ত্রবিপশ্চিতাঃ .. ৮০..
স্নিগ্ধাঅ পরেরহার্যশ্চ ন প্রমত্তাশ্চ দেশজাঃ .
অলুব্ধাশ্চ বিনীতাশ্চ শুচয়ো ধার্মিকাস্তথা .. ৮১..
পুরোধো মন্ত্রিণস্ত্বেভির্গুণৈর্যুক্তা ভবন্তি হি .
বুদ্ধিমান্নীতিসংপন্নস্ত্যক্তালস্যঃ প্রিয়ংবদঃ .. ৮২..
পররন্ধ্রবিধিজ্ঞশ্চ যাত্রাকালবিশেষবিৎ .
অর্থশাস্ত্রার্থকুশলো হ্যনুরক্তঃ কুলোদ্ভবঃ .. ৮৩..
দেশবিৎকালবিচ্চৈব কর্তব্যঃ ক্ষিতিপৈঃ সদা .
ব্যবহারার্থতত্ত্বজ্ঞা বুদ্ধিমন্তো বহুশ্রুতাঃ .. ৮৪..
মধ্যস্থা ধার্মিকা ধীরাঃ কার্যাকার্যবিবেকিনঃ .
ক্ষান্তা দান্তা জিতক্রোধা সর্বত্র সমদর্শিনঃ .. ৮৫..
ঈদৃশঃ প্রাড্বিবাকাস্তু স্থাপ্যা ধর্মাসনে দ্বিজাঃ .
উত্থিতাশ্চ প্রমত্তাশ্চ ত্যক্তালস্যা জিতশ্রমাঃ .. ৮৬..
স্নিগ্ধা শান্তা বিনীতাশ্চ মধ্যস্থা নিপুণাস্তথা .
নয়জ্ঞা বিনয়জ্ঞাশ্চ ঊহাপোহবিচক্ষণাঃ .. ৮৭..
সর্বশাত্রার্থসংপন্নাঃ কুমারাধিকৃতাস্তথা .
বৃহস্পতিমতাদেষাং গুণাংশ্চাভিকাংক্ষয়েৎ .. ৮৮..
বিজ্ঞেয়ং চোপহার্যং চ সভ্যানাং চ বিকল্পনম্ .
ইত্যেষ বো ময়া প্রোক্তঃ প্রাড্বিবাকনির্ণয়ঃ .. ৮৯..
অত ঊর্ধ্বং প্রবক্ষ্যামি চিত্রাভিনয়নং পুনঃ ..
ইতি ভারতীয়ে নাট্যশাস্রে পুংস্ত্র্যুপচারো
নামাধ্যায়শ্চতুর্বিংশঃ ..