নাট্যশাস্ত্রম্ অধ্যায় ১৮ দশরূপনিরূপণং

 || নাট্যশাস্ত্রম্ অধ্যায় ১৮ দশরূপনিরূপণং||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ অষ্টাদশোঽধ্যায়ঃ
বর্ত্তয়িষ্যাম্যহং বিপ্রা দশরূপবিকল্পনম্ |
নামতঃ কর্মতশ্চৈব তথা চৈব প্রয়োগতঃ || ১||
নাটকং সপ্রকরণমঙ্কো ব্যায়োগ এব চ |
ভাণঃ সমবকারশ্চ বীথী প্রহসনং ডিমঃ || ২||
ঈহামৃগশ্চ বিজ্ঞেয়া দশেমে নাট্যলক্ষণে |
এতেষাং লক্ষণমহং ব্যাখ্যাস্যাম্যনুপূর্বশঃ || ৩||
সর্বেষামেব কাব্যানাং মাতৃকা বৃত্তয়ঃ স্মৃতাঃ |
আভ্যো বিনিসৃতং হ্যেতদ্দশরূপং প্রয়োগতঃ || ৪||
জাতিভিঃ শ্রুতিভিশ্চৈব স্বরা গ্রামৎবমাগতাঃ |
যথা তথা বৃত্তিভেদৈঃ কাব্যবন্ধা ভবন্তি হি || ৫||
গ্রামৌ পূর্ণস্বরৌ দ্বৌ তু যথা বৈ ষড্জমধ্যমৌ |
সর্ববৃত্তিবিনিষ্পন্নৌ কাব্যবন্ধৌ তথা ৎবিমৌ || ৬||
জ্ঞেয়ং প্রকরণং চৈব তথা নাটকমেব চ |
সর্ববৃত্তিবিনিষ্পন্নং নানাবন্ধসমাশ্রয়ম্ || ৭||
বীথী সমবকারশ্চ তথেহামৃগ এব চ |
উৎসৃষ্টিকাঙ্কো ব্যায়োগো ভাণঃ প্রহসনং ডিমঃ || ৮||
কৈশিকীবৃত্তিহীনানি রূপাণ্যেতানি কারয়েৎ |
অত ঊর্ধ্বং প্রবক্ষ্যামি কাব্যবন্ধবিকল্পনম্ || ৯||
প্রখ্যাতবস্তুবিষয়ং প্রখ্যাতোদাত্তনায়কং চৈব |
রাজর্ষিবংশ্যচরিতং তথৈব দিব্যাশ্রয়োপেতম্ || ১০||
নানাবিভূতিভির্যুতমৃদ্ধিবিলাসাদিভির্গুণৈশ্চৈব |
অঙ্কপ্রবেশকাঢ্যং ভবতি হি তন্নাটকং নাম || ১১||
নৃপতীনাং যচ্চরিতং নানারসভাবচেষ্টিতং বহুধা |
সুখদুঃখোৎপত্তিকৃতং ভবতি হি তন্নাটকং নাম || ১২||
অস্যাবস্থোপেতং কার্যং প্রসমীক্ষ্য বিন্দুবিস্তারাৎ |
কর্তব্যোঽঙ্কঃ সোঽপি তু গুণান্বিতং নাট্যতত্ত্বজ্ঞৈঃ || ১৩||
অঙ্ক ইতি রূঢিশব্দো ভাবৈশ্চ রসৈশ্চ রোহয়ত্যর্থান্ |
নানাবিধানয়ুক্তো যস্মাত্তস্মাদ্ভবেদঙ্কঃ || ১৪||
অঙ্কসমাপ্তিঃ কার্যা কাব্যচ্ছেদেন বীজসংহারঃ |
বস্তুব্যাপী বিন্দুঃ কাব্যসমুত্থোঽত্র নিত্যং স্যাৎ || ১৫||
যত্রার্থস্য সমাপ্তির্যত্র চ বীজস্য ভবতি সংহারঃ |
কিঞ্চিদবলগ্নবিন্দুঃ সোঽঙ্ক ইতি সদাবগন্তব্যঃ || ১৬||
যে নায়কা নিগদিতাস্তেষাং প্রত্যক্ষচরিতসংযোগঃ |
নানাবস্থোপেতঃ কার্যস্ত্বঙ্কোঽবিপ্রকৃষ্টস্তু || ১৭||
নায়কদেবীগুরুজনপুরোহিতামাত্যসার্থবাহানাম্ |
নৈকরসান্তরবিহিতো হ্যঙ্ক ইতি স বেদিতব্যস্তু || ১৮||
পঞ্চাক্ষরা দশপরা হ্যঙ্কাঃ স্যুর্নাটকে প্রকরণে চ |
নিষ্ক্রামঃ সর্বেষাং যস্মিন্নঙ্কঃ স বিজ্ঞেয়ঃ || ১৯||
ক্রোধপ্রসাদশোকাঃ শাপোৎসর্গোঽথ বিদ্রবোদ্বাহৌ |
অদ্ভুতসম্ভবদর্শনমঙ্কে প্রত্যক্ষজানি স্যুঃ || ২০||
একদিবসপ্রবৃত্তঃ কার্যস্ত্বঙ্কোঽর্থবীজমধিকৃত্য |
আবশ্যককার্যাণামবিরোধেন প্রয়োগেষু || ২১||
একাঙ্কেন কদাচিদ্বহূনি কার্যাণি যোজয়েদ্ধীমান্ |
আবশ্যকাবিরোধেন তত্র কাব্যানি কার্যাণি || ২২||
রঙ্গং তু যে প্রবিষ্টাঃ সর্বেষাং ভবতি তত্র নিষ্ক্রামঃ |
বীজার্থয়ুক্তিয়ুক্তং কৃৎবা কাব্যং যথার্থরসম্ || ২৩||
ন বহূনীহ কার্যাণি ৎবেকাঙ্কে বিনিয়োজয়েৎ |
আবশ্যকানাং কার্যাণাং বিরোধো হি তথা ভবেৎ || ২৪||
জ্ঞাৎবা দিবসাবস্থাং ক্ষণয়ামমুহূর্তলক্ষণোপেতাম্ |
বিভজেৎসর্বমশেষং পৃথক্পৃথক্কাব্যমঙ্কেষু || ২৫||
দিবসাবসানকার্যং যদ্যঙ্কে নোপপদ্যতে সর্বম্ |
অঙ্কচ্ছেদং কৃৎবা প্রবেশকৈস্তদ্বিধাতব্যম্ || ২৬||
বিপ্রকৃষ্টং তু যো দেশং গচ্ছেৎকার্যবশানুগঃ |
অঙ্কচ্ছেদেঽথ সঙ্ক্ষেপান্নির্দিশেত্তং প্রবেশকৈঃ || ২৭||
সন্নিহিতনায়কোঽঙ্কঃ কর্তব্যো নাটকে প্রকরণে বা |
পরিজনকথানুবন্ধঃ প্রবেশকো নাম বিজ্ঞেয়ঃ || ২৮||
প্রকরণনাটকবিষয়ে পঞ্চাদ্যা দশপরা ভবন্ত্যঙ্কাঃ |
অঙ্কান্তরসন্ধিষু চ প্রবেশকাস্তেষু তাবন্তঃ || ২৯||
অনয়োরন্তরবিহিতঃ প্রবেশকোঽর্থক্রিয়াং সমভিবীক্ষ্য |
সঙ্ক্ষেপার্থঃ সন্ধিষ্বর্থানাং সংবিধাতব্যঃ || ৩০||
অঙ্কচ্ছেদং কৃৎবা মাসকৃতং বর্ষসঞ্চিতং বাপি |
তৎসর্বং কর্তব্যং বর্ষাদূর্ধ্বং ন তু কদাচিৎ || ৩১||
যঃ কশ্চিৎকার্যবশাদ্গচ্ছতি পুরুষঃ প্রকৃষ্টমধ্বানম্ |
তত্রাপ্যঙ্কচ্ছেদঃ কর্তব্যঃ পূর্ববত্তজ্ঞৈঃ || ৩২||
অঙ্কান্তরানুসারী সঙ্ক্ষেপার্থমধিকৃত্য বিন্দূনাম্ |
প্রকরণনাটকবিষয়ে প্রবেশকঃ সংবিধাতব্যঃ || ৩৩||
নোত্তমমধ্যমপুরুষৈরাচরিতো নাপ্যুদাত্তবচনকৃতঃ |
প্রাকৃতভাষাচারঃ প্রয়োগমাশ্রিত্য কর্তব্যঃ || ৩৪||
কালোত্থানগতিরসৌ ব্যাখ্যাসংরম্ভকার্যবিষয়াণাম্ |
অর্থাভিধানয়ুক্তঃ প্রবেশকঃ স্যাদনেকার্থঃ || ৩৫||
বহ্বাশ্রয়মপি কার্যং প্রবেশকৈঃ সঙ্ক্ষিপেচ্চ সন্ধিষু বা |
বহুচূর্ণপদৈর্যুক্তং জনয়তি খেদং প্রয়োগস্য || ৩৬||
যত্রার্থস্য সমাপ্তির্ন ভবত্যঙ্কে প্রয়োগবাহুল্যাৎ |
বৃত্তান্তস্বল্পকথৈঃ প্রবেশকৈঃ সোঽভিধাতব্যঃ || ৩৭||
যুদ্ধং রাজ্যভ্রংশো মরণং নগরোপরোধনং চৈব |
প্রত্যক্ষাণি তু নাঙ্কে প্রবেশকৈঃ সংবিধেয়ানি || ৩৮||
অঙ্কে প্রবেশকে চ প্রকরণমাশ্রিত্য নাটকে বাপি |
ন বধঃ কর্তব্যঃ স্যাদ্যোঽভ্যুদয়ী নায়কঃ খ্যাতঃ || ৩৯||
অপসরণমেব কার্যং গ্রহণং বা সন্ধিরেব বা যোজ্যঃ |
কাব্যশ্লেষৈর্বহুভির্যথারসং নাট্যতত্ত্বজ্ঞৈঃ || ৪০||
ন মহাজনপরিবারং কর্তব্যং নাটকং প্রকরণং বা |
যে তত্র কার্যপুরুষাশ্চৎবারঃ পঞ্চ বা তে স্যুঃ || ৪১||
কার্যং গোপুচ্ছাগ্রং কর্তব্যং কাব্যবন্ধমাসাদ্য |
যে চোদাত্তা ভাবাস্তে সর্বে পৃষ্ঠতঃ কার্যাঃ || ৪২||
সর্বেষাং কাব্যানাং নানারসভাবয়ুক্তিয়ুক্তানাম্ |
নির্বহণে কর্তব্যো নিত্যং হি রসোঽদ্ভুতস্তজ্জ্ঞৈঃ || ৪৩||
নাটকলক্ষণমেতন্ময়া সমাসেন কীর্তিতং বিধিবৎ |
প্রকরণমতঃ পরমহং লক্ষণয়ুক্ত্যা প্রবক্ষ্যামি || ৪৪||
যত্র কবিরাত্মশক্ত্যা বস্তু শরীরং চ নায়কং চৈব |
ঔৎপত্তিকং প্রকুরুতে প্রকরণমিতি তদ্বুধৈর্জ্ঞেয়ম্ || ৪৫||
যদনার্ষমথাহার্যং কাব্যং প্রকরোত্যভূতগুণয়ুক্তম্ |
উৎপন্নবীজবস্তু প্রকরণমিতি তদপি বিজ্ঞেয়ম্ || ৪৬||
যন্নাটকে ময়োক্তং বস্তু শরীরং চ বৃত্তিভেদাশ্চ |
তৎপ্রকরণেঽপি যোজ্যং সলক্ষণং সর্বসন্ধিষু তু || ৪৭||
বিপ্রবণিক্সচিবানাং পুরোহিতামাত্যসার্থবাহানাম্ |
চরিতং যন্নৈকবিধং জ্ঞেয়ং তৎপ্রকরণং নাম || ৪৮||
নোদাত্তনায়ককৃতং ন দিব্যচরিতং ন রাজসম্ভোগম্ |
বাহ্যজনসম্প্রয়ুক্তং তজ্জ্ঞেয়ং প্রকরণং তজ্জ্ঞৈঃ || ৪৯||
দাসবিটশ্রেষ্ঠিয়ুতং বেশস্ত্র্যুপচারকারণোপেতম্ |
মন্দকুলস্ত্রীচরিতং কাব্যং কার্যং প্রকরণে তু || ৫০||
সচিবশ্রেষ্ঠিব্রাহ্মণপুরোহিতামাত্যসার্থবাহানাম্ |
গৃহবার্তা যত্র ভবেন্ন তত্র বেশ্যাঙ্গনা কার্যা || ৫১||
যদি বেশয়ুবতিয়ুক্তং ন কুলস্ত্রী সঙ্গমোঽপি স্যাৎ |
অথ কুলজনপ্রয়ুক্তং ন বেশয়ুবতির্ভবেত্তত্র || ৫২||
যদি বা কারণয়ুক্ত্যা বেশকুলস্ত্রীকৃতোপচারঃ স্যাৎ |
অবিকৃতভাষাচারং তত্র তু পাঠ্যং প্রয়োক্তব্যম্ || ৫৩||
মধ্যমপুরুষৈর্নিত্যং যোজ্যো বিষ্কম্ভকোঽত্র তত্ত্বজ্জ্ঞৈঃ |
সংস্কৃতবচনানুগতঃ সঙ্ক্ষেপার্থঃ প্রবেশকবৎ || ৫৪||
শুদ্ধঃ সঙ্কীর্ণো বা দ্বিবিধো বিষ্কম্ভকোঽপি কর্তব্যঃ |
মধ্যমপাত্রঃ শুদ্ধঃ সঙ্কীর্ণো নীচমধ্যকৃতঃ || ৫৫||
অঙ্কান্তরালবিহিতঃ প্রবেশকোঽর্থক্রিয়াং সমভিবীক্ষ্য |
সঙ্ক্ষেপাৎসন্ধীনামর্থানাং চৈব কর্তব্যঃ || ৫৬||
অনয়োশ্চ বন্ধয়োগাদন্যো ভেদঃ প্রয়োক্তৃভিঃ কার্যঃ |
প্রখ্যাতস্ত্বিতরো বা নাটকয়োগে প্রকরণে বা || ৫৭||
প্রকরণনাটকভেদাদুৎপাদ্যং বস্তু নায়কং নৃপতিম্ |
অন্তঃপুরসঙ্গীতককন্যামধিকৃত্য কর্তব্যা || ৫৮||
স্ত্রীপ্রায়া চতুরঙ্কা ললিতাভিনয়াত্মিকা সুবিহিতাঙ্গী |
বহুনৃত্তগীতপাঠ্যা রতিসম্ভোগাত্মিকা চৈব || ৫৯||
রাজোপচারয়ুক্তা প্রসাদনক্রোধদম্ভসংযুক্তা |
নায়কদেবীদূতী সপরিজনা নাটিকা জ্ঞেয়া || ৬০||
অন্তর্ভাবগতা হ্যেষা ভাবয়োরুভয়োর্যতঃ |
অত এব দশৈতানি রূপাণীত্যুদিতানি বৈ || ৬১||
প্রকরণনাটকলক্ষণমুক্তং বিপ্রা ময়া সমাসেন |
বক্ষ্যাম্যতঃ পরমহং লক্ষণং যুক্ত্যা সমবকারম্ || ৬২||
দেবাসুরবীজকৃতঃ প্রখ্যাতোদাত্তনায়কশ্চৈব |
ত্র্যঙ্কস্তথা ত্রিকপটস্ত্রিবিদ্রবঃ স্যাত্ত্রিশৃঙ্গারঃ || ৬৩||
দ্বাদশনায়কবহুলো হ্যষ্টাদশনাডিকাপ্রমাণশ্চ |
বক্ষ্যাম্যস্যাঙ্কবিধিং যাবত্যো নাডিকা যত্র || ৬৪||
অঙ্কস্তু সপ্রহসনঃ সবিদ্রবঃ সকপটঃ সবীথীকঃ |
দ্বাদশনাডীবিহিতঃ প্রথমঃ কার্যঃ ক্রিয়োপেতঃ || ৬৫||
কার্যস্তথা দ্বিতীয়ঃ সমাশ্রিতো নাডিকাশ্চতস্রস্তু |
বস্তুসমাপনবিহিতো দ্বিনাডিকঃ স্যাত্তৃতীয়স্তু || ৬৬||
নাডীসঞ্জ্ঞা জ্ঞেয়া মানং কালস্য যন্মুহূর্তার্ধম্ |
তন্নাডিকাপ্রমাণং যথোক্তমঙ্কেষু সংযোজ্যম্ || ৬৭||
যা নাডিকেতি সঞ্জ্ঞা কালবিভাগে ক্রিয়াভিসম্পন্না |
কার্যা চ সা প্রয়ত্নাদ্যথা ক্রমেণৈব শাস্ত্রোক্তা || ৬৮||
অঙ্কোঽঙ্কস্ত্বন্যার্থঃ কর্তব্যঃ কাব্যবন্ধমাসাদ্য |
অর্থং হি সমবকারে হ্যপ্রতিসম্বন্ধমিচ্ছন্তি || ৬৯||
যুদ্ধজলসম্ভবো বা বায়্বগ্নিগজেন্দ্রসম্ভ্রমকৃতো বা |
নগরোপরোধজো বা বিজ্ঞেয়ো বিদ্রবস্ত্রিবিধঃ || ৭০||
বস্তুগতক্রমবিহিতো দেববশাদ্বা পরপ্রয়ুক্তো বা |
সুখদুঃখোৎপত্তিকৃতস্ত্রিবিধঃ কপটোঽত্র বিজ্ঞেয়ঃ || ৭১||
ত্রিবিধশ্চাত্র বিধিজ্ঞৈঃ পৃথক্পৃথক্কার্যবিহিতার্থঃ |
শৃঙ্গারঃ কর্তব্যো ধর্মে চার্থে চ কামে চ || ৭২||
যস্মিন্ ধর্মপ্রাপকমাত্মহিতং ভবতি সাধনং বহুধা |
ব্রতনিয়মতপোয়ুক্তো জ্ঞেয়োঽসৌ ধর্মশৃঙ্গারঃ || ৭৩||
অর্থস্যেচ্ছায়োগাদ্বহুধা চৈবার্থতোঽর্থশৃঙ্গারঃ |
স্ত্রীসম্প্রয়োগবিষয়েষ্বর্থার্থা বা রতির্যত্র || ৭৪||
কন্যাবিলোভনকৃতং প্রাপ্তৌ স্ত্রীপুংসয়োস্তু রম্যং বা |
নিভৃতং সাবেগং বা যস্য ভবেৎকামশৃঙ্গারঃ || ৭৫||
উষ্ণিগ্গায়ত্র্যাদীন্যন্যানি চ যানি বন্ধকুটিলানি |
বৃত্তানি সমবকারে কবিভিস্তানি প্রয়োজ্যানি || ৭৬||
এবং কার্যস্তজ্জ্ঞৈর্নানারসসংশ্রয়ঃ সমবকারঃ |
বক্ষ্যাম্যতঃ পরমহং লক্ষণমীহামৃগস্যাপি || ৭৭||
দিব্যাপুরুষাশ্রয়কৃতো দিব্যস্ত্রীকারণোপগতয়ুদ্ধঃ |
সুবিহিতবস্তুনিবদ্ধো বিপ্রত্যয়কারকশ্চৈব || ৭৮||
উদ্ধতপুরুষপ্রায়ঃ স্ত্রীরোষগ্রথিতকাব্যবন্ধশ্চ |
সঙ্ক্ষোভবিদ্রবকৃতঃ সম্ফেটকৃতস্তথা চৈব || ৭৯||
স্ত্রীভেদনাপহরণাবমর্দনপ্রাপ্তবস্তুশৃঙ্গারঃ |
ঈহামৃগস্তু কার্যঃ সুসমাহিতকাব্যবন্ধশ্চ || ৮০||
যদ্ব্যায়োগে কার্যং যে পুরুষা বৃত্তয়ো রসাশ্চৈব |
ঈহামৃগেঽপি তে স্যুঃ কেবলমমরস্ত্রিয়া যোগঃ || ৮১||
যত্র তু বধেপ্সিতানাং বধো হ্যুদগ্রো ভবেদ্ধি পুরুষাণাম্ |
কিঞ্চিদ্ব্যাজং কৃৎবা তেষাং যুদ্ধং শময়িতব্যম্ || ৮২||
ঈহামৃগস্য লক্ষণমুক্তং বিপ্রাঃ সমাসয়োগেন |
ডিমলক্ষণং তু ভূয়ো লক্ষণয়ুক্ত্যা প্রবক্ষ্যামি || ৮৩||
প্রখ্যাতবস্তুবিষয়ঃ প্রখ্যাতোদাত্তনায়কশ্চৈব |
ষড্রসলক্ষণয়ুক্তশ্চতুরঙ্কো বৈ ডিমঃ কার্যঃ || ৮৪||
শৃঙ্গারহাস্যবর্জং শেষৈঃ সর্বৈ রসৈঃ সমায়ুক্তঃ |
দীপ্তরসকাব্যয়োনির্নানাভাবোপসম্পন্নঃ || ৮৫||
নির্ঘাতোল্কাপাতৈরুপরাগেণেন্দুসূর্যয়োর্যুক্তঃ |
যুদ্ধনিয়ুদ্ধাধর্ষণসম্ফেটকৃতশ্চ কর্তব্যঃ || ৮৬||
মায়েন্দ্রজালবহুলো বহুপুস্তোত্থানয়োগয়ুক্তশ্চ |
দেবভুজগেন্দ্ররাক্ষসয়ক্ষপিশাচাবকীর্ণশ্চ || ৮৭||
ষোডশনায়কবহুলঃ সাৎবত্ত্যারভটীবৃত্তিসম্পন্নঃ |
কার্যো ডিমঃ প্রয়ত্নান্নানাশ্রয়ভাবসম্পন্নঃ || ৮৮||
ডিমলক্ষণমিত্যুক্তং ময়া সমাসেন লক্ষণানুগতম্ |
ব্যায়োগস্য তু লক্ষণমতঃ পরং সম্প্রবক্ষ্যামি || ৮৯||
ব্যায়োগস্তু বিধিজ্ঞৈঃ কার্যঃ প্রখ্যাতনায়কশরীরঃ |
অল্পস্ত্রীজনয়ুক্তস্ত্বেকাহকৃতস্তথা চৈব || ৯০||
বহবশ্চ তত্র পুরুষা ব্যায়চ্ছন্তে যথা সমবকারে |
ন চ দিব্যনায়কয়ুক্তঃ কার্যস্ত্বেকাঙ্ক এবায়ম্ || ৯১||
ন চ দিব্যনায়ককৃতঃ কার্যো রাজর্ষিনায়কনিবদ্ধঃ |
যুদ্ধনিয়ুদ্ধাঘর্ষণসঙ্ঘর্ষকৃতশ্চ কর্তব্যঃ || ৯২||
এবংবিধস্তু কার্যো ব্যায়োগো দীপ্তকাব্যরসয়োনিঃ |
বক্ষ্যাম্যতঃ পরমহং লক্ষণমুৎসৃষ্টাঙ্কস্য || ৯৩||
প্রখ্যাতবস্তুবিষয়স্ত্বপ্রখ্যাতঃ কদাচিদেব স্যাৎ |
দিব্যপুরুষৈর্বিয়ুক্তঃ শেষৈর্যুক্তো ভবেৎপুম্ভিঃ || ৯৪||
করুণরসপ্রায়কৃতো নিবৃত্তয়ুদ্ধোদ্যতপ্রহারশ্চ |
স্ত্রীপরিদেবিতবহুলো নির্বেদিতভাষিতশ্চৈব || ৯৫||
নানাব্যাকুলচেষ্টঃ সাৎবত্ত্যারভটিকৈশিকীহীনঃ |
কার্যঃ কাব্যবিধিজ্ঞৈঃ সততং হ্যুৎসৃষ্টিকাঙ্কস্তু || ৯৬||
যদ্দিব্যনায়ককৃতং কাব্যং সঙ্গ্রামবন্ধবধয়ুক্তম্ |
তদ্ভারতে তু বর্ষে কর্তব্যং কাব্যবন্ধেষু || ৯৭||
কস্মাদ্ভারতমিষ্টং বর্ষেষ্বন্যেষু দেববিহিতেষু |
হৃদ্যা সর্বা ভূমিঃ শুভগন্ধা কাঞ্চনী যস্মাৎ || ৯৮||
উপবনগমনক্রীডা বিহারনারীরতিপ্রমোদাঃ স্যুঃ |
তেষু হি বর্ষেষু সদা ন তত্র দুঃখং ন বা শোকঃ || ৯৯||
যে তেষামধিবাসাঃ পুরাণবাদেষু পর্বতাঃ প্রোক্তাঃ |
সম্ভোগস্তেষু ভবেৎকর্মারম্ভো ভবেদস্মিন্ || ১০০||
প্রহসনমপি বিজ্ঞেয়ং দ্বিবিধং শুদ্ধং তথা সঙ্কীর্ণম্ |
অঙ্কস্য লক্ষণমিদং ব্যাখ্যাতমশেষয়োগমাত্রগতম্ || ১০১||
প্রহসনমতঃ পরং সলক্ষণং সম্প্রবক্ষ্যামি |
বক্ষ্যামি তয়োর্যুক্ত্যা পৃথগ্পৃথগ্লক্ষণবিশেষম্ || ১০২||
ভগবত্তাপসবিপ্রৈরন্যৈরপি হাস্যবাদসম্বদ্ধম্ |
কাপুরুষসম্প্রয়ুক্তং পরিহাসাভাষণপ্রায়ম্ || ১০৩||
অবিকৃতভাষাচারং বিশেষভাবোপপন্নচরিতপদম্ |
নিয়তগতিবস্তুবিষয়ং শুদ্ধং জ্ঞেয়ং প্রহসনং তু || ১০৪||
বেশ্যাচেটনপুংসকবিটধূর্তা বন্ধকী চ যত্র স্যুঃ |
অনিভৃতবেষপরিচ্ছদচেষ্টিতকরণৈস্তু সঙ্কীর্ণম্ || ১০৫||
লোকোপচারয়ুক্তা যা বার্তা যশ্চ দম্ভসংযোগঃ |
স প্রহসনে প্রয়োজ্যো ধূর্তপ্রবিবাদসম্পন্নঃ || ১০৬||
বীথ্যঙ্গৈঃ সংযুক্তং কর্তব্যং প্রহসনং যথায়োগ্যম্ |
ভাণস্যাপি তু লক্ষণমতঃ পরং সম্প্রবক্ষ্যামি || ১০৭||
আত্মানুভূতশংসী পরসংশ্রয়বর্ণনাবিশেষস্তু |
বিবিধাশ্রয়ো হি ভাণো বিজ্ঞেয়স্ত্বেকহার্যশ্চ || ১০৮||
পরবচনমাত্মসংস্থং প্রতিবচনৈরুত্তমোত্তমগ্রথিতৈঃ |
আকাশপুরুষকথিতৈরঙ্গবিকারৈরভিনয়ৈশ্চৈব || ১০৯||
ধূর্তবিটসম্প্রয়োজ্যো নানাবস্থান্তরাত্মকশ্চৈব |
একাঙ্কো বহুচেষ্টঃ সততং কার্যো বুধৈর্ভাণঃ || ১১০||
ভাণস্যাপি হি নিখিলং লক্ষণমুক্তং তথাগমানুগতম্ |
বীথ্যাঃ সম্প্রতি নিখিলং কথয়ামি যথাক্রমং বিপ্রাঃ || ১১১||
সর্বরসলক্ষণাঢ্যা যুক্তা হ্যঙ্গৈস্ত্রয়োদশভিঃ |
বীথী স্যাদেকাঙ্কা তথৈকহার্যা দ্বিহার্যা বা || ১১২||
অধমোত্তমমধ্যাভির্যুক্তা স্যাৎপ্রকৃতিভিস্তিসৃভিঃ |
উদ্ধাত্যকাবলগিতাবস্পন্দিতনাল্যসৎপ্রলাপাশ্চ || ১১৩||
বাক্কেল্যথ প্রপঞ্চো মৃদবাধিবলে ছলং ত্রিগতম্ |
ব্যাহারো গণ্ডশ্চ ত্রয়োদশাঙ্গান্যুদাহৃতান্যস্যাঃ || ১১৪||
অথ বীথী সম্প্রোক্তা লক্ষণমেষাং প্রবক্ষ্যামি |
পদানি ৎবগতার্থানি যে নরাঃ পুনরাদরাৎ || ১১৫||
যোজয়ন্তি পদৈরন্যৈস্তদুদ্ধাত্যকমুচ্যতে |
যত্রান্যস্মিন্ সমাবেশ্য কার্যমন্যৎপ্রসাধ্যতে || ১১৬||
তচ্চাবলগিতং নাম বিজ্ঞেয়ং নাট্যয়োক্তৃভিঃ |
আক্ষিপ্তেঽর্থে তু কস্মিঁশ্চিচ্ছুভাশুভসমুত্থিতে || ১১৭||
কৌশলাদুচ্যতেঽন্যোঽর্থস্তদবস্পন্দিতং ভবেৎ |
হাস্যেনোপগতার্থপ্রহেলিকা নালিকেতি বিজ্ঞেয়া || ১১৮||
মূর্খজনসন্নিকর্ষে হিতমপি যত্র প্রভাষতে বিদ্বান্ |
ন চ গৃহ্যতেঽস্য বচনং বিজ্ঞেয়োঽসৎপ্রলাপোঽসৌ || ১১৯||
একদ্বিপ্রতিবচনা বাক্কেলী স্যাৎপ্রয়োগেঽস্মিন্ |
যদসদ্ভূতং বচনং সংস্তবয়ুক্তং দ্বয়োঃ পরস্পরং যত্তু || ১২০||
একস্য চার্থহেতোঃ স হাস্যজননঃ প্রপঞ্চঃ স্যাৎ |
যৎকারণাদ্ গুণানাং দোষীকরণং ভবেদ্বিবাদকৃতম্ || ১২১||
দোষগুণীকরণং বা তন্মৃদবং নাম বিজ্ঞেয়ম্ |
পরবচনমাত্মনশ্চোত্তরোত্তরসমুদ্ভবং দ্বয়োর্যত্র || ১২২||
অন্যোন্যার্থবিশেষকমধিবলমিতি তদ্ বুধৈর্জ্ঞেয়ম্ |
অন্যার্থমেব বাক্যং ছলমভিসন্ধানহাস্যরোষকরম্ || ১২৩||
শ্রুতিসারূপ্যাদ্যস্মিন্ বহবোঽর্থা যুক্তিভির্নিয়ুজ্যন্তে |
যদ্ধাস্যমহাস্যং বা তত্ত্রিগতং নাম বিজ্ঞেয়ম্ || ১২৪||
প্রত্যক্ষবৃত্তিরুক্তো ব্যাহারো হাস্যলেশার্থঃ |
সংরম্ভসম্ভ্রময়ুতং বিবাদয়ুক্তং তথাপবাদকৃতম্ || ১২৫||
বহুবচনাক্ষেপকৃতং গণ্ডং প্রবদন্তি তত্ত্বজ্ঞাঃ |
ইতি দশরূপবিধানং সর্বং প্রোক্তং ময়া হি লক্ষণতঃ |
পুনরস্য শরীরগতং সন্ধিবিধৌ লক্ষণং বক্ষ্যে || ১২৬||
ইতি ভরতীয়ে নাট্যশাস্ত্রে দশরূপনিরূপণং
নামাষ্টাদশোঽধ্যায়ঃ |