নাট্যশাস্ত্রম্ অধ্যায় ১৭ কাকুস্বরব্যঞ্জনঃ

 || নাট্যশাস্ত্রম্ অধ্যায় ১৭ কাকুস্বরব্যঞ্জনঃ ||
|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ সপ্তদশোঽধ্যায়ঃ |
এবং তু সংস্কৃতং পাঠ্যং ময়া প্রোক্তং দ্বিজোত্তমাঃ |
প্রাকৃতস্যাপি পাঠ্যস্য সম্প্রবক্ষ্যামি লক্ষণম্ || ১||
এতদেব বিপর্যস্তং সংস্কারগুণবর্জিতম্ |
বিজ্ঞেয়ং প্রাকৃতং পাঠ্যং নানাবস্থান্তরাত্মকম্ || ২||
ত্রিবিধং তচ্চ বিজ্ঞেয়ং নাট্যয়োগে সমাসতঃ |
সমানশব্দং বিভ্রষ্টং দেশীগতমথাপি চ || ৩||
কমলামলরেণুতরঙ্গলোলসলিলাদিবাক্যসম্পন্নম্ |
প্রাকৃতবন্ধেষ্বেবং সংস্কৃতমপি যোগমুপয়াতি || ৪||
যে বর্ণাঃ সংযোগাৎ স্বরবর্ণান্যৎবং ন্যূনতাং চাপি |
গচ্ছন্তি পদন্যস্তাস্তে বিভ্রষ্টা ইতি জ্ঞেয়াঃ || ৫||
যে বর্ণা বর্ণগতা ব্যঞ্জনয়ুক্তাশ্চ যে স্বরা নিয়তাঃ |
তানপরস্পরবৃত্তে প্রাকৃতয়ুক্ত্যা প্রবক্ষ্যামি || ৬||
যথা –
এওআরপরাণিঅ অং আরপরং অ পাঅএ ণত্থি |
বসআরমজ্ঝিমাই অ কচ বগ্গতবাণিহণাইং || ৭||
বচ্চন্তি কগতদয়বা লোপং অত্থং চ সে বহন্তি সরা |
খধথধভা উণ হত্তং উর্বেতি অত্থং অ মুঞ্চন্তা || ৮||
উপ্পরহুত্তরআরো হেটাহুত্তো অ পাঅএ ণত্থি |
মোত্তূণ ভদ্রচোদ্রহ পদ্রহ্বদচন্দ্রজাঈ স || ৯||
খধথধভাণ হআরো মুহমেহকহাবহূপহ্বএসু |
কগতদয়বাণ ণিচ্চং বীয়ম্মি ঠিও সরো হোঈ || ১০||
ছ ইতি ষকারো নিত্যং বোদ্ধব্যঃ ষটপদাদিয়োগেষু |
কিল শব্দান্ত্যো রেফো ভবতি তথা খু ত্তি খলুশব্দঃ || ১১||
ড ইতি চ ভবতি টকারো ভটকটককুটীতটাদ্যেষু |
সৎবং চ ভবতি শষয়োঃ সর্বত্র তথা হি স স আদেশঃ || ১২||
অষ্টস্পশ্চ দকারো ভবত্যনাদৌ তকার ইতরাদ্যঃ |
বডবাতডাগতুল্যো ভবতি ডকারোঽপি চ ককারঃ || ১৩||
বর্ধনগতে চ ভাবে ধকারবর্ণোঽপি ঢৎবমুপয়াতি |
সর্বত্র চ প্রয়োগে ভবতি নকারোঽপি চ ণকারঃ || ১৪||
আপানম্ আবানং ভবতি পকারেন বৎবয়ুক্তেন |
অয়থাতথাদিকেষু তু ভকারবর্ণো ব্রজীত হৎবম্ || ১৫||
পরুষং ফরুসং বিদ্যাৎপকারবর্ণোঽপি ফৎবমুপয়াতি |
যস্তু মৃতঃ সোঽপি মও যশ্চ মৃগঃ সোঽপি হি তথৈব || ১৬||
ওকারৎবং গচ্ছেদৌকারশ্চৌষধাদিষু নিয়ুক্তঃ |
প্রচলাচিরাচলাদিষু ভবতি চকারোঽপি তু যকারঃ || ১৭||
অপরস্পরনিষ্পন্না হ্যেবং প্রাকৃতসমাশ্রয়া বর্ণাঃ |
সংযুক্তানাং তু পুনর্বক্ষ্যে পরিবৃত্তিসংযোগম্ || ১৮||
শ্চপ্সৎসধ্যাঃ ছ ইতি তথাভ্যহ্যধ্যা
ভবন্তি তু ঝকারাঃ |
ষ্টঃ ট্ঠঃ স্তঃ স্থঃ ষ্মৌ ম্হঃ
ক্ষ্ণো হ্ণঃ ষ্ণো ণ্হঃ ক্ষঃ খকাররূপোঽপি || ১৯||
আশ্চর্যং অচ্ছরিয়ং নিশ্চয়মিচ্ছন্তি ণিচ্ছয়ং চ যথা |
বৎসং বচ্ছং চ যথা অপ্সরসং তদ্বদচ্ছরঅম্ || ২০||
উৎসাহো উচ্ছাহো পথ্যং চ পচ্ছং বিজ্ঞেয়ম্ |
তুভ্যং তুজ্ঝং মহ্যং মজ্ঝং বিন্ধ্যশ্চ ভবতি বিঞ্জ্ঝোত্তি || ২১||
দষ্টো বট্ঠোত্তি তহা হস্তোঽপি চ ভবতি হত্থোত্তি |
গ্রীষ্মো গিম্হোত্তি তথা শ্লক্ষ্ণং সহ্ণং সদা তু বিজ্ঞেয়ম্ || ২২||
উষ্ণং উহ্ণং যক্ষো জক্খো পর্যঙ্কো ভবতি পল্লঙ্কু |
বিপরীতং হময়োগে ব্রহ্মাদৌ স্যাদ্ বৃহস্পতৌ ফৎবম্ || ২৩||
যজ্ঞো ভবতি ন জন্নো ভীষ্মো ভিম্হোত্তি বিজ্ঞেয়ঃ |
উপরিগতোঽধস্তাদ্বা ভবেৎককারাদিকস্তু যো বর্ণঃ || ২৪||
স হি সংযোগবিহীনঃ শুদ্ধঃ কার্যঃ প্রয়োগেঽস্মিন্ |
এবমেতত্তু বিজ্ঞেয়ং প্রাকৃতং সংস্কৃতং তথা || ২৫||
অত ঊর্ধ্বং প্রবক্ষ্যামি দেশভাষাবিকল্পনম্ |
ভাষা চতুর্বিধা জ্ঞেয়া দশরূপে প্রয়োগতঃ || ২৬||
সংস্কৃতং প্রাকৃতং চৈব যত্র পাঠ্যং প্রয়ুজ্যতে |
অতিভাষার্যভাষা চ জাতিভাষা তথৈব চ || ২৭||
তথা যোন্যন্তরী চৈব ভাষা নাট্যে প্রকীর্তিতা |
অতিভাষা তু দেবানামার্যভাষা তু ভূভুজাম্ || ২৮||
সংস্কারপাঠ্যসংযুক্তা সম্যঙ্ ন্যায়্যপ্রতিষ্ঠিতা |
বিবিধা জাতিভাষা চ প্রয়োগে সমুদাহৃতা || ২৯||
ম্লেচ্ছশব্দোপচারা চ ভারতং বর্ষমাশ্রিতা |
অথ যোন্যন্তরী ভাষা গ্রাম্যারণ্যপশূদ্ভবা || ৩০||
নানাবিহঙ্গজা চৈব নাট্যধর্মী প্রতিষ্ঠিতা || ৩১||
জাতিভাষাশ্রয়ং পাঠ্যং দ্বিবিধং সমুদাহৃতম্ |
প্রাকৃতং সংস্কৃতং চৈব চাতুর্বর্ণ্যসমাশ্রয়ম্ |
ধীরোদ্ধতে সললিতে ধীরোদাত্তে তথৈব চ || ৩২||
ধীরপ্রশান্তে চ তথা পাঠ্যং যোজ্যং তু সংস্কৃতম্ |
এষামেব তু সর্বেষাং নায়কানাং প্রয়োগতঃ || ৩৩||
কারণব্যপদেশেন প্রাকৃতং সম্প্রয়োজয়েৎ |
দারিদ্র্যাধ্যয়নাভাবয়দৃচ্ছাদিভিরেব চ || ৩৪||
ঐশ্বর্যেণ প্রমত্তানাং দারিদ্র্যেণ প্লুতাত্মনাম্ |
অনধীতোত্তমানাং চ সংস্কৃতং ন প্রয়োজয়েৎ || ৩৫||
ব্যাজলিঙ্গপ্রবিষ্টানাং শ্রমণানাং তপস্বিনাম্ |
ভিক্ষুচক্রচরাণাং চ প্রাকৃতং সম্প্রয়োজয়েৎ || ৩৬||
ভাগবততাপসোন্মত্তবালনীচগ্রহোপসৃষ্টেষু |
স্ত্রীনীচজাতিষু তথা নপুংসকে প্রাকৃতং যোজ্যম্ || ৩৭||
পরিব্রাণ্মুনিশাক্যেষু চোক্ষেষু শ্রোত্রিয়েষু চ |
শিষ্টা যে চৈব লিঙ্গস্থাঃ সংস্কৃতং তেষু যোজয়েৎ || ৩৮||
রাজ্ঞাশ্চ গণিকায়াশ্চ শিল্পকার্যাস্তথৈব চ |
কলাবস্থান্তরকৃতং যোজ্যং পাঠ্যং তু সংস্কৃতম্ || ৩৯||
সন্ধিবিগ্রহসম্বন্ধং তথা চ প্রাপ্তবাগ্গতিম্ |
গ্রহনক্ষত্রচরিতং খগানাং রুতমেব চ || ৪০||
সর্বমেতত্তু বিজ্ঞেয়ং কাব্যবন্ধে শুভাশুভম্ || ৪১||
ক্রীডার্থং সর্বলোকস্য প্রয়োগে চ সুখাশ্রয়ম্ |
কলাভ্যাসাশ্রয়ং চৈব পাঠ্যং বেশ্যাসু সংস্কৃতম্ || ৪২||
কলোপচারজ্ঞানার্থং ক্রীডার্থং পার্থিবস্য চ |
নির্দিষ্টং শিল্পকার্যাস্তু নাটকে সংস্কৃতং বচঃ || ৪৩||
আম্নায়সিদ্ধং সর্বাসাং শুভমপ্সরসাং বচঃ |
সংসর্গাদ্দেবতানাং চ তদ্ধি লোকোঽনুবর্ততে || ৪৪||
ছন্দতঃ প্রাকৃতং পাঠ্যং স্মৃতমপ্সরসাং ভুবি |
মানুষাণাং চ কর্তব্যং কারণার্থব্যপেক্ষয়া || ৪৫||
সর্বাস্বেহ হি শুদ্ধাসু জাতিষু দ্বিজসত্তমাঃ |
শৌরসেনীং সমাশ্রিত্য ভাষাং কাব্যেষু যোজয়েৎ || ৪৬||
অথবা ছন্দতঃ কার্যা দেশভাষা প্রয়োক্তৃভিঃ |
নানাদেশসমুত্থং হি কাব্যং ভবতি নাটকে || ৪৭||
মাগধ্যবন্তিজা প্রাচ্যা শৌরসেন্যর্ধমাগধী |
বাহ্লীকা দক্ষিণাত্যা চ সপ্ত ভাষাঃ প্রকীর্তিতাঃ || ৪৮||
শকারাভীরচণ্ডালশবরদ্রমিলোদ্রজাঃ |
হীনা বনেচরাণাং চ বিভাষা নাটকে স্মৃতা || ৪৯||
মাগধী তু নরেন্দ্রাণামন্তঃপুরসমাশ্রয়া |
চেটানাং রাজপুত্রাণাং শ্রেষ্ঠিনাং চার্ধমাগধী || ৫০||
প্রাচ্যা বিদূষকাদীনাং ধূর্তানামপ্যবন্তিজা |
নায়িকানাং সখীনাং চ শূরসেন্যবিরোধিনী || ৫১||
যৌধনাগরকাদীনাং দক্ষিণাত্যাথ দীব্যতাম্ |
বাহ্লীকভাষোদীচ্যানাং খসানাং চ স্বদেশজা || ৫২||
শকারঘোষকাদীনাং তৎস্বভাবশ্চ যো গণঃ |
শকারভাষা যোক্তব্যা চাণ্ডালী পুল্কসাদিষু || ৫৩||
অঙ্গারকারকব্যাধকাষ্ঠয়ন্ত্রোপজীবিনাম্ |
যোজ্যা শকারভাষা তু কিঞ্চিদ্বানৌকসী তথা || ৫৪||
গজাশ্বাজাবিকোষ্ট্রাদিঘোষস্থাননিবাসিনাম্ |
আভীরোক্তিঃ শাবরী বা দ্রামিডী বনচারিষু || ৫৫||
সুরঙ্গাখনকাদীনাং সন্ধিকারাশ্বরক্ষতাম্ |
ব্যসনে নায়কানাং চাপ্যাত্মরক্ষাসু মাগধী || ৫৬||
ন বর্বরকিরাতান্ধ্রদ্রমিলাদ্যাসু জাতিষু |
নাট্যপ্রয়োগে কর্তব্যং কাব্যং ভাষাসমাশ্রিতম্ || ৫৭||
গঙ্গাসাগরমধ্যে তু যে দেশাঃ সম্প্রকীর্তিতাঃ |
একারবহুলাং তেষু ভাষাং তজ্জ্ঞঃ প্রয়োজয়েৎ || ৫৮||
বিন্ধ্যসাগরমধ্যে তু যে দেশাঃ শ্রুতিমাগতাঃ |
নকারবহুলাং তেষু ভাষাং তজ্জ্ঞঃ প্রয়োজয়েৎ || ৫৯||
সুরাষ্ট্রাবন্তিদেষেষু বেত্রবত্যুত্তরেষু চ |
যে দেশাস্তেষু কুর্বীত চকারপ্রায়সংশ্রয়াম্ || ৬০||
হিমবৎসিন্ধুসৌবীরান্যে জনাঃ সমুপাশ্রিতাঃ |
উকারবহুলাং তজ্জ্ঞস্তেষু ভাষাং প্রয়োজয়েৎ || ৬১||
চর্মণ্বতীনদীতীরে যে চার্বুদসমাশ্রিতাঃ |
তকারবহুলাং নিত্যং তেষু ভাষাং প্রয়োজয়েৎ || ৬২||
এবং ভাষাবিধানং তু কর্তব্যং নাটকাশ্রয়ম্ |
অত্র নোক্তং ময়া যত্তু লোকাদ্ গ্রাহ্যং বুধৈস্তু তৎ || ৬৩||
এবং ভাষাবিধানং তু ময়া প্রোক্তং দ্বিজোত্তমাঃ |
পুনর্বাক্যবিধানং তু লৌকিকং সন্নিবোধত || ৬৪||
উত্তমৈর্মধ্যমৈর্নীচৈর্যে সম্ভাষ্যা যথা নরাঃ |
সমানোৎকৃষ্টহীনাশ্চ নাটকে তান্নিবোধত || ৬৫||
দেবানামপি যে দেবা মহাত্মানো মহর্ষয়ঃ |
ভগবন্নিতি তে বাচ্যা যাস্তেষাং যোষিতস্তথা || ৬৬||
দেবাশ্চ লিঙ্গিনশ্চৈব নানাশ্রুতধরাশ্চ যে |
ভগবন্নিতি যে বাচ্যাঃ পুরুষৈঃ স্ত্রীভিরেব চ || ৬৭||
আর্যেতি ব্রাহ্মণং ব্রূয়ান্মহারাজেতি পার্থিবম্ |
উপাধ্যায়েতি চাচার্যং বৃদ্ধং তাতেতি চৈব হি || ৬৮||
নাম্না রাজেতি বা বাচ্যা ব্রাহ্মণৈস্তু নরাধিপাঃ |
তৎক্ষাম্যং হি মহীপালৈর্যস্মাৎপূজ্যা দ্বিজাঃ স্মৃতাঃ || ৬৯||
ব্রাহ্মণৈঃ সচিবো বাচ্যো হ্যমাত্যঃ সচিবেতি বা |
শেষৈরন্যৈর্জনৈর্বাচ্যো হীনৈরার্যেতি নিত্যশঃ || ৭০||
সমৈঃ সম্ভাষণং কার্যং যেন নাম্না স সঞ্জ্ঞিতঃ |
হীনৈঃ সপরিবারং তু নাম্না সম্ভাষ্য উত্তমঃ || ৭১||
নিয়োগাধিকৃতাশ্চৈব পুরুষা যোষিতস্তথা |
কারুকাঃ শিল্পিনশ্চৈব সম্ভাষ্যাস্তে তথৈব হি || ৭২||
মার্ষো ভাবেতি বক্তব্যঃ কিঞ্চিদূনস্তু মার্ষকঃ |
সমানোঽথ বয়স্যেতি হং হ্বো হণ্ডেতি বাধমঃ || ৭৩||
আয়ুষ্মন্নিতি বাচ্যস্তু রথী সূতেন সর্বদা |
তপস্বীতি প্রশান্তস্তু সাধো ইতি চ শব্দ্যতে || ৭৪||
স্বামীতি যুবরাজস্তু কুমারো ভর্তৃদারকঃ |
সৌম্য ভদ্রমুখেত্যেবং হে পূর্বং চাধমং বদেৎ || ৭৫||
যদ্যস্য কর্ম শিল্পং বা বিদ্যা বা জাতিরেব বা |
স তেন নাম্না ভাষ্যো হি নাটকাদৌ প্রয়োক্তৃভিঃ || ৭৬||
বৎস পুত্রক তাতেতি নাম্না গোত্রেণ বা পুনঃ |
বাচ্যঃ শিষ্যঃ সুতো বাপি পিত্রা বা গুরুণাপি বা || ৭৭||
সম্ভাষ্যা শাক্যনির্গ্রন্থা ভদন্তেতি প্রয়োক্তৃভিঃ |
আমন্ত্রণৈস্তু পাষণ্ডাঃ শেষাঃ স্বসময়াশ্রিতৈঃ || ৭৮||
দেবেতি নৃপতির্বাচ্যো ভৃত্যৈঃ প্রকৃতিভিস্তথা |
ভট্টেতি সার্বভৌমস্তু নিত্যং পরিজনেন হি || ৭৯||
রাজন্নিত্যৃষিভির্বাচ্যো হ্যপত্যপ্রত্যয়েন বা |
বয়স্য রাজন্নিতি বা ভবেদ্বাচ্যো মহীপতিঃ || ৮০||
বিদূষকেণ রাজ্ঞী চ চেটী চ ভবতীত্যপি |
নাম্না বয়স্যেত্যপি বা রাজ্ঞা বাচ্যো বিদূষকঃ || ৮১||
সর্বস্ত্রীভিঃ পতির্বাচ্য আর্যপুত্রেতি যৌবনে |
অন্যদা পুনরার্যেতি মহারাজেতি ভূপতিঃ || ৮২||
আর্যেতি পূর্বজো ভ্রাতা বাচ্যঃ পুত্র ইবানুজঃ |
যোষিদ্ভিরথ কাম্যেতি রাজপুত্রেতি যোধনৈঃ || ৮৩||
পুরুষাভাষণং হ্যেব কার্যং নাট্যে প্রয়োক্তৃভিঃ |
পুনঃ স্ত্রীণাং প্রবক্ষ্যামি যথাভাষ্যাস্তু নাটকে || ৮৪||
তপস্বিন্যো দেবতাশ্চ বাচ্যা ভগবতীতি চ |
গুরুভার্যা তু বক্তব্যা স্থানীয়া ভবতীতি চ || ৮৫||
গম্যা ভদ্রেতি বাচ্যা বৈ বৃদ্ধাম্বেতি চ নাটকে |
রাজপত্ন্যস্তু সম্ভাষ্যাঃ সর্বাঃ পরিজনেন বৈ || ৮৬||
ভট্টিনী স্বামিনী দেবীত্যেবং বৈ নাটকে বুধৈঃ |
দেবীতি মহিষী বাচ্যা রাজ্ঞা পরিজনেন বা || ৮৭||
ভোগিন্যঃ পরিশিষ্টাস্তু স্বামিন্য ইতি বা পুনঃ |
কুমার্যশ্চৈব বক্তব্যাঃ প্রেষ্যাভির্ভর্তৃদারিকাঃ || ৮৮||
স্বসেতি ভগিনী বাচ্যা বৎসেতি চ যবীয়সী |
ব্রাহ্মণ্যার্যেতি বক্তব্যা লিঙ্গস্থা ব্রতিনী চ যা || ৮৯||
পত্নী চার্যেতি সম্ভাষ্যা পিতৃনাম্না সুতস্য সা |
সমানাভিস্তথা সখ্যো হলেতি স্যাৎপরস্পরম্ || ৯০||
প্রেষ্যা হজ্জেতি বক্তব্যা স্ত্রিয়ো যা তূত্তমা ভবেৎ |
অজ্জুকেতি চ বক্তব্যা বেশ্যা পরিজনেন চ || ৯১||
অত্তেতি গণিকা মাতা বাচ্যা পরিজনেন হি |
প্রিয়েতি ভার্যা শৃঙ্গারে বাচ্যা রাজ্ঞেতরেণ বা || ৯২||
পুরোধঃ সার্থবাহানাং ভার্যাস্ত্বার্যেতি সর্বদা |
তল্লিঙ্গার্থানি নামানি কার্যাণি কবিভিঃ সদা || ৯৩||
ঔৎপত্তিকানি যানি স্যুর্ন প্রখ্যাতানি নাটকে |
ব্রহ্মক্ষত্রস্য নামানি গোত্রকর্মানুরূপতঃ || ৯৪||
কাব্যে কার্যাণি কবিভিঃ শর্মবর্মকৃতানি হি |
দত্তপ্রায়াণি নামানি বণিজাং সম্প্রয়োজয়েৎ || ৯৫||
কাপালিকাস্তু ঘণ্টান্তনামানঃ সমুদাহৃতা |
শৌর্যোদাত্তানি নামানি তথা শূরেষু যোজয়েৎ || ৯৬||
বিজয়ার্থানি নামানি রাজস্ত্রীণাং তু নিত্যশঃ |
দত্তা মিত্রা সেনেতি বেশ্যানামানি যোজয়েৎ || ৯৭||
নানাকুসুমনামানঃ প্রেষ্যাঃ কার্যাস্তু নাটকে |
মঙ্গলার্থানি নামানি চেটানামপি যোজয়েৎ || ৯৮||
গম্ভীরার্থানি নামানি হ্যুত্তমানাং প্রয়োজয়েৎ |
যস্মান্নামানুসদৃশং কর্ম তেষাং ভবিষ্যতি || ৯৯||
জাতিচেষ্টানুরূপাণি শেষাণামপি কারয়েৎ |
নামানি পুরুষাণাং তু স্ত্রীণাং চোক্তানি তত্ত্বতঃ || ১০০||
এবং নামবিধানং তু কর্তব্যং কবিভিঃ সদা |
এবং ভাষাবিধানং তু জ্ঞাৎবা কর্মাণ্যশেষতঃ || ১০১||
পাঠ্যগুণানিদানীং বক্ষ্যামঃ | তদ্যথা সপ্তস্বরাঃ, ত্রীণি
স্থানানি, চৎবারো বর্ণাঃ, দ্বিবিধা কাকুঃ, ষডলঙ্কারাঃ,
ষডঙ্গানীতি | এষামিদানীং লক্ষণমভিব্যাখ্যাস্যামঃ |
তত্র সপ্তস্বরা নাম –
ষড্জর্ষভগান্ধারমধ্যমপঞ্চমধৈবতনিষাদাঃ ত এতে
রসেষূপপাদ্যাঃ || ১০২||
যথা –
ততঃ পাঠ্যং প্রয়ুঞ্জীত ষডলঙ্কারসংযুতম্ |
হাস্যশৃঙ্গারয়োঃ কার্যৌ স্বরৌ মধ্যমপঞ্চমৌ || ১০৩||
ষড্জর্ষভৌ তথা চৈব বীররৌদ্রাদ্ভুতেষ্বথ |
গান্ধারশ্চ নিষাদশ্চ কর্তব্যৌ করুণে রসে || ১০৪||
ধৈবতশ্চৈব কর্তব্যো বীভৎসে সভয়ানকে |
ত্রীণি স্থানানি -উরঃ কণ্ঠঃ শির ইতি | ভবত্যপি চ
শারীর্যামথ বীণায়াং ত্রিভ্যঃ স্থানিভ্য এব তু |
উরসঃ শিরসঃ কণ্ঠাৎস্বরঃ কাকুঃ প্রবর্ততে || ১০৫||
আভাষণং চ দূরস্থে শিরসা সম্প্রয়োজয়েৎ |
নাতিদূরে চ কণ্ঠেন হ্যুরসা চৈব পার্শ্বতঃ || ১০৬||
উরসোদাহৃতং বাক্যং শিরসা দীপয়েদ্ বুধঃ |
কণ্ঠেন শমনং কুর্যাৎপাঠ্যয়োগেষু সর্বদা || ১০৭||
উদাত্তশ্চানুদাত্তশ্চ স্বরিতঃ কম্পিতস্তথা |
বর্ণাশ্চৎবার এব স্যুঃ পাঠ্যয়োগে তপোধনাঃ || ১০৮||
তত্র হাস্যশৃঙ্গারয়োঃ স্বরিতোদাত্তৈর্বর্ণৈঃ পাঠ্যমুপপাদ্যং,
বীররৌদ্রাদ্ভুতেষূদাত্তকম্পিতৈঃ
করুণবীভৎসভয়ানকেষ্বনুদাত্তস্বরিতকম্পিতৈরিতি | দ্বিবিধা
কাকুঃ সাকাঙ্ক্ষা নিরাকাঙ্ক্ষা চেতি বাক্যস্য
সাকাঙ্ক্ষনিরাকাঙ্ক্ষকৎবাৎ || ১০৯||
অনিয়ুক্তার্থকং বাক্যং সাকাঙ্ক্ষমিতি সঞ্জ্ঞিতম্ |
নিয়ুক্তার্থং তু যদ্বাক্যং নিরাকাঙ্ক্ষং তদুচ্যতে || ১১০||
তত্র সাকাঙ্ক্ষং নাম
তারাদিমন্দ্রান্তমনিয়ুক্তার্থমনির্যাতিতবর্ণালঙ্কারং
কণ্ঠোরঃস্থানগতম্ | নিরাকাঙ্ক্ষং নাম নিয়ুক্তার্থং
নির্যাতিতবর্ণালঙ্কারং শিরঃস্থানগতং মান্দ্রাদিতারান্তমিতি |
অথ ষডলঙ্কারা নাম –
উচ্চো দীপ্তশ্চ মন্দ্রশ্চ নীচো দ্রুতবিলম্বিতৌ |
পাঠ্যস্যৈতে হ্যলঙ্কারা লক্ষণং চ নিবোধত || ১১২||
উচ্চো নাম শিরঃস্থানগতস্তারস্বরঃ, স চ
দূরস্থাভাষণবিস্ময়োত্তরোত্তরসঞ্জল্পদূরাহ্বানত্রাসনাবাধাদ্যেষু |
দীপ্তো নাম শিরঃস্থানগতস্তারতরঃ, স
চাক্ষেপকলহবিবাদামর্ষক্রুষ্টাধর্ষণক্রোধশৌর্যদর্পতী-
ক্ষ্ণরূক্ষাভিধাননির্ভর্ত্সনাক্রন্দিতাদিষু |
মন্দ্রো নাম উরঃস্থানগতো নির্বেদগ্লানিচিন্তৌৎসুক্যদৈন্যব্যাধিক্রীডা-
গাঢশস্ত্রক্ষতমূর্ছামদগুহ্যার্থবচনাদিষু |
নীচো নাম উরঃস্থানগতো মন্দ্রতরঃ, স চ
স্বভাবাভাষণব্যাধিশমশ্রমার্তত্রস্তপতিতমূর্ছিতাদিষু |
দ্রুতো নাম কণ্ঠগতঃ স চ ৎবরিতঃ,
লল্লনমন্মনভয়শীতজ্বরত্রাসাত্যস্তাত্যয়িককার্যাবেদনাদিষু |
বিলম্বিতো নাম কণ্ঠস্থানগতস্তনুমন্দ্রঃ, স চ
শৃঙ্গারকরুণবিতর্কিতবিচারামর্ষাসূয়িতাব্যক্তার্থপ্রবাদলজ্জা-
চিন্তাতর্জনবিস্ময়দোষানুকীর্তনদীর্ঘরোগনিপীডনাদিষু
অত্রানুবংশ্যা শ্লোকা ভবন্তি || ১১৩-১১৪||
উত্তরোত্তরসঞ্জল্পপরুষাক্ষেপণেষু চ |
তীক্ষ্ণরূক্ষাভিনয়নে আবেগে ক্রন্দিতে তথা || ১১৫||
পরোক্ষস্য সমাহ্বানে তর্জনে ত্রাসনে তথা |
দূরস্থাভাষণে চৈব তথা নির্ভর্ত্সনেষু চ || ১১৬||
ভাবেষ্বেতেষু নিত্যং হি নানারসসমাশ্রয়া |
উচ্চা দীপ্তা দ্রুতা চৈব কাকুঃ কার্যা প্রয়োক্তৃভিঃ || ১১৭||
ব্যাধিতে চ জ্বরার্তে চ ভয়ার্তে শীতবিপ্লুতে |
নিয়মস্থে বিতর্কে চ গাঢশস্ত্রক্ষতেষু চ || ১১৮||
গুহ্যার্থবচনে চৈব চিন্তায়াং তপসি স্থিতে |
মন্দ্রা নীচা চ কর্তব্যা কাকুর্নাট্যপ্রয়োক্তৃভিঃ || ১১৯||
লল্লে চ মন্মনে চৈব ভয়ার্তে শীতবিপ্লুতে |
মন্দ্রা দ্রুতা চ কর্তব্যা কাকুর্নাট্যপ্রয়োক্তৃভিঃ || ১২০||
দৃষ্টনষ্টানুসরণে ইষ্টানিষ্টশ্রুতে তথা |
ইষ্টার্থখ্যাপনে চৈব চিন্তাধ্যানে তথৈব চ || ১২১||
উন্মাদেঽসূয়িতে চৈব উপালম্ভে তথৈব হি |
অব্যক্তার্থপ্রবাদে চ কথায়োগে তথৈব চ || ১২২||
উত্তরোত্তরসঞ্জল্পে কার্যেঽতিশয়সংযুতে |
বিকৃতে ব্যাধিতে ক্রোধে দুঃখে শোকে তথৈব চ || ১২৩||
বিস্ময়ামর্ষয়োশ্চৈব প্রহর্ষে পরিদেবিতে |
বিলম্বিতা চ দীপ্তা চ কাকুর্মন্দ্রা চ বৈ ভবেৎ || ১২৪||
লঘ্বক্ষরপ্রায়কৃতে গুর্বক্ষরকৃতে তথা |
উচ্চা দীপ্তা চ কর্তব্যা কাকুস্তত্র প্রয়োক্তৃভিঃ || ১২৫||
যানি সৌম্যার্থয়ুক্তানি সুখভাবকৃতানি চ |
মন্দ্রা বিলম্বিতা চৈব তত্র কাকুর্বিধীয়তে || ১২৬||
যানি স্যুস্তীক্ষ্ণরূক্ষাণি দীপ্তা চোচ্চা চ তেষ্বপি |
এবং নানাশ্রয়োপেতং পাঠ্যং যোজ্যং প্রয়োক্তৃভিঃ || ১২৭||
হাস্যশৃঙ্গারকরুণেষ্বিষ্টা কাকুর্বিলম্বিতা |
বীররৌদ্রাদ্ভুতেষূচ্চা দীপ্তা বাপি প্রশস্যতে || ১২৮||
ভয়ানকে সবীভৎসে দ্রুতা নীচা চ কীর্তিতা |
এবং ভাবরসোপেতা কাকুঃ কার্যা প্রয়োক্তৃভিঃ || ১২৯||
অথাঙ্গানি ষট্ -বিচ্ছেদোঽর্পণ বিসর্গোঽনুবন্ধো দীপনং
প্রশমনমিতি | তত্র বিচ্ছেদো নাম বিরামকৃতঃ | অর্পণং নাম
লীলায়মানমধুরবল্গুনা স্বরেণ পূরয়তেব রঙ্গং যৎপঠ্যতে
তদর্পণম্ | বিসর্গো নাম বাক্যন্যাসঃ | অনুবন্ধো নাম
পদান্তরেষ্বপি বিচ্ছেদঃ, অনুচ্ছ্বসনং বা | দীপনং নাম
ত্রিস্থানশোভি বর্ধমানস্বরং চেতি | প্রশমনং নাম
তারগতানাং স্বরাণাং প্রশাম্যতামবৈস্বর্যেণাবতারণমিতি |
এষাং চ রসগতঃ প্রয়োগঃ -তত্র
হাস্যশৃঙ্গারয়োরাকাঙ্ক্ষায়ামর্পণবিচ্ছেদদীপনপ্রশমনয়ুক্তং
পাঠ্যং কার্যম্ | দীপনপ্রশমনয়ুক্তং করুণে |
বিচ্ছেদপ্রশমনদীপনানুবন্ধবহুলং বীররৌদ্রাদ্ভুতেষু
বিসর্গবিচ্ছেদয়ুক্তং বীভৎসভয়ানকয়োরিতি | সর্বেষামপ্যেষাং
মন্দ্রমধ্যতারকৃতঃ প্রয়োগস্ত্রিস্থানগতঃ | তত্র
দূরস্থাভাষণে তারং শিরসা, নাতিদূরে মধ্যং কণ্ঠেন,
পার্শ্বতো মন্দ্রমুরসা প্রয়োজয়েৎপাঠ্যমিতি | মন্দ্রাত্তারং ন
গচ্ছেৎ, তারাদ্বা মন্দ্রমিতি || ১৩০||
এষাং চ দ্রুতমধ্যবিলম্বিতাস্ত্রয়ো লয়া রসেষূপপাদ্যাঃ | তত্র
হাস্যশৃঙ্গারয়োর্মধ্যলয়ঃ, করুণে বিলম্বিতো,
বীররৌদ্রাদ্ভুতবীভৎসভয়ানকেষু দ্রুত ইতি |
অথ বিরামঃ অর্ধসমাপ্তো কার্যবশান্ন ছন্দোবশাৎ | কস্মাৎ,
দৃশ্যন্তে হ্যেকদ্বিত্রিচতুরক্ষরা বিরামাঃ | যথা –
কিং ! গচ্ছ, মা বিশ সুদুর্জন ! বারিতোঽঽসি
কার্যং ৎবয়া ন মম সর্বজনোপয়ুক্তম্ |
সূচাসু চাঙ্কুরগতে চ তথোপচারে –
ষ্বল্পাক্ষরাণি হি পদানি ভবন্তি কাব্যে || ১৩২||
এবং বিরামে প্রয়ত্নোঽনুষ্ঠেয়ঃ | কস্মাৎ, বিরামো হ্যর্থানুদর্শকঃ
সঃ |
অত্র শ্লোকৌ –
বিরামেষু প্রয়ত্নো হি নিত্যং কার্যঃ প্রয়োক্তৃভিঃ |
কস্মাদভিনয়ো হ্যস্মিন্নর্থাপেক্ষী যতঃ স্মৃতঃ || ১৩৩||
যত্র ব্যগ্রাবুভৌ হস্তৌ তত্র দৃষ্টিসমন্বিতঃ |
বাচিকাভিনয়ঃ কার্যো বিরামৈরর্থদর্শকৈঃ || ১৩৪||
প্রায়ো বীরে চ রৌদ্রে চ করৌ প্রহরণাকুলৌ |
বীভৎসে কুৎসিতৎবাচ্চ ভবতঃ কুঞ্চিতৌ করৌ || ১৩৫||
হাস্যে চোদ্দেশমাত্রেণ করুণে চ প্রলম্বিতৌ |
অদ্ভুতে বিস্ময়াৎস্তব্ধৌ ভয়াচ্চৈব ভয়ানকে || ১৩৬||
এবমাদিষু চান্যেষু প্রবিচারেঽপি হস্তয়োঃ |
অলঙ্কারবিরামাভ্যাং সাধ্যতে হ্যর্থনিশ্চয়ঃ || ১৩৭||
যে বিরামাঃ স্মৃতা বৃত্তে তেষ্বলঙ্কার ইষ্যতে |
সমাপ্তেঽর্থে পদে বাপি তথা প্রাণবশেন বা || ১৩৮||
পদবর্ণসমাসে চ দ্রুতে বহ্বর্থসঙ্কটে |
কার্যো বিরামঃ পাদান্তে তথা প্রাণবশেন বা || ১৩৯||
শেষমর্থবশেনৈব বিরামং সম্প্রয়োজয়েৎ |
অত্র চ ভাবগতানি চ কৃষ্যাক্ষরাণি বোদ্ধব্যানি, তদ্যথা –
আকারৈকারসংযুক্তমৈকারৌকারসংযুতম্ |
ব্যঞ্জনং যদ্ভবেদ্দীর্ঘং কৃষ্যং তত্তু বিধীয়তে || ১৪০||
বিষাদে চ বিতর্কে চ প্রশ্নেঽথামর্ষ এব চ |
কলাকালপ্রমাণেন পাঠ্যং কার্যং প্রয়োক্তৃভিঃ || ১৪১||
শেষাণামর্থয়োগেন বিরামে বিরমেদিহ |
একদ্বিত্রিচতুঃপঞ্চষট্কলং চ বিলম্বিতম্ || ১৪২||
বিলম্বিতে বিরামে হি সদা গুর্বক্ষরং ভবেৎ |
ষণ্ণাং কলানাং পরতো বিলম্বো চ বিধীয়তে || ১৪৩||
অথবা কারণোপেতং প্রয়োগং কার্যমেব চ |
সমীক্ষ্য বৃত্তে কর্তব্যো বিরামো রসভাবতঃ || ১৪৪||
যে বিরামাঃ স্মৃতাঃ পাঠ্যে বৃত্তপাদসমুদ্ভবাঃ |
উৎক্রম্যাপি ক্রমং তজ্জ্ঞৈঃ কার্যাস্তেঽর্থবশানুগাঃ || ১৪৫||
নাপশব্দং পঠেত্তজ্জ্ঞো ভিন্নবৃত্তং তথৈব হি |
বিশ্রমেন্নাবিরামেষু দৈন্যে কাকুং ন দীপয়েৎ || ১৪৬||
বর্জিতং কাব্যদোষৈস্তু লক্ষণাঢ্যং গুণান্বিতম্ |
স্বরালঙ্কারসংযুক্তং পঠেৎপাঠ্যং যথাবিধি || ১৪৭||
অলঙ্কারা বিরামাশ্চ যে পাঠ্যে সংস্কৃতে স্মৃতাঃ |
ত এব সর্বে কর্তব্যা স্ত্রীণাং পাঠ্যে ৎবসংস্কৃতে || ১৪৮||
এবমেতৎস্বরকৃতং কলাতাললয়ান্বিতম্ |
দশরূপবিধানে তু পাঠ্যং যোজ্যং প্রয়োক্তৃভিঃ || ১৪৯||
উক্তং কাকুবিধানং তু যথাবদনুপূর্বশঃ |
অত ঊর্ধ্বং প্রবক্ষ্যামি দশরূপবিকল্পনম্ || ১৫০||
|| ইতি ভরতীয়ে নাট্যশাস্ত্রে বাগভিনয়ে কাকুস্বরব্যঞ্জনো নাম
সপ্তদশোঽধ্যায়ঃ ||