নাট্যশাস্ত্রম্ অধ্যায় ১৩

 || নাট্যশাস্ত্রম্ অধ্যায় ১৩ ||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ ত্রয়োদশোঽধ্যায়ঃ
যে তু পূর্বং ময়া প্রোক্তাস্ত্রয়ো বৈ নাট্যমণ্ডপাঃ |
তেষাং বিভাগং বিজ্ঞায় ততঃ কক্ষ্যাং প্রয়োজয়েৎ || ১||
যে নেপথ্যগৃহদ্বারে ময়া পূর্বং প্রকীর্তিতে |
তয়োর্ভাণ্ডস্য বিন্যাসো মধ্যে কার্যঃ প্রয়োক্তৃভিঃ || ২||
কক্ষ্যাবিভাগো নির্দেশ্যো রঙ্গপীঠপরিক্রমাৎ |
পরিক্রমেণ রঙ্গস্য কক্ষ্যা হ্যন্যা বিধীয়তে || ৩||
কক্ষ্যাবিভাগে জ্ঞেয়ানি গৃহাণি নগরাণি চ |
উদ্যানারামসরিতস্ত্বাশ্রমা অটবী তথা || ৪||
পৃথিবী সাগরাশ্চৈব ত্রৈলোক্যং সচরাচরম্ |
বর্ষাণি সপ্তদ্বীপাশ্চ পর্বতা বিবিধাস্তথা || ৫||
অলোকশ্চৈব লোকশ্চ রসাতলমথাপি চ |
দৈত্যনাগালয়াশ্চৈব গৃহাণি ভবনানি চ || ৬||
নগরে বা বনে বাপি বর্ষে বা পর্বতেঽপি বা |
যত্র বার্তা প্রবর্তেত তত্র কক্ষ্যাং প্রবর্তয়েৎ || ৭||
বাহ্যং বা মধ্যমং বাপি তথৈবাভ্যন্তরং পুনঃ |
দূরং বা সন্নিকৃষ্টং বা দেশং তু পরিকল্পয়েৎ || ৮||
পূর্বপ্রবিষ্টা যে রঙ্গং জ্ঞেয়াস্তেঽভ্যন্তরা বুধৈঃ |
পশ্চাৎপ্রবিষ্টা বিজ্ঞেয়াঃ কক্ষ্যাভাগে তু বাহ্যতঃ || ৯||
তেষাং তু দর্শনেচ্ছুর্যঃ প্রবিশেদ্রঙ্গমণ্ডপম্ |
দক্ষিণাভিমুখঃ সোঽথ কুর্যাদাত্মনিবেদনম্ || ১০||
যতো মুখং ভবেদ্ভাণ্ডং দ্বারং নেপথ্যকস্য চ |
সা মন্তব্যা তু দিক্ পূর্বা নাট্যয়োগে ন নিত্যশঃ || ১১||
নিষ্ক্রামেদ্যশ্চ তস্মাদ্বৈ স তেনৈব তথা ব্রজেৎ |
যতস্তস্য কৃতং তেন পুরুষেণ নিবেদনম্ || ১২||
নিষ্ক্রান্তোঽর্থবশাচ্চাপি প্রবিশেদ্যদি তদ্গৃহম্ |
যতঃ প্রাপ্তঃ স পুরুষস্তেন মার্গেণ নিষ্ক্রমেৎ || ১৩||
অথবার্থবশাচ্চাপি তেনৈব সহ গচ্ছতি |
তথৈব প্রবিশেৎ গেহমেকাকী সহিতোঽপি বা || ১৪||
তয়োশ্চাপি প্রবিশতোঃ কক্ষ্যামন্যাং বিনির্দিশেৎ |
পরিক্রমেণ রঙ্গস্য ৎবন্যা কক্ষ্যা বিধীয়তে || ১৫||
সমৈশ্চ সহিতো গচ্ছেন্নীচৈশ্চ পরিবাহিতঃ |
অথ প্রেক্ষণিকাশ্চাপি বিজ্ঞেয়া হ্যগ্রতো গতৌ || ১৬||
সৈব ভূমিস্তু বহুভির্বিকৃষ্টা স্যাৎপরিক্রমৈঃ |
মধ্যা বা সন্নিকৃষ্টা বা তেষামেবং বিকল্পয়েৎ || ১৭||
নগরে বা বনে বাপি সাগরে পর্বতেঽপি বা |
দিব্যানাং গমনং কার্যং দ্বীপে বর্ষেষু বা পুনঃ || ১৮||
আকাশেন বিমানেন মায়য়াপ্যথ বা পুনঃ |
বিবিধাভিঃ ক্রিয়াভির্বা নানার্থাভিঃ প্রয়োগতঃ || ১৯||
নাটকে চ্ছন্নবেষাণাং দিব্যানাং ভূমিসঞ্চরঃ |
মানুষে কারণাদেষাং যথা ভবতি দর্শনম্ || ২০||
ভারতে ৎবথ হৈমে বা হরিবর্ষ ইলাবৃতে |
রম্যে কিম্পুরুষে বাপি কুরুষূত্তরকেষু বা || ২১||
দিব্যানাং ছন্দগমনং সর্ববর্ষেষু কীর্তিতম্ |
ভারতে মানুষাণাঞ্চ গমনং সংবিধীয়তে || ২২||
গচ্ছেদ্যদি বিকৃষ্টস্তু দেশকালবশান্নরঃ |
অঙ্কচ্ছেদে তমন্যস্মিন্ নির্দিশেদ্ধি প্রবেশকে || ২৩||
অহ্নঃ প্রমাণং গৎবা তু কার্যলাভং বিনির্দিশেদ্ |
তথালাভে তু কার্যস্য অঙ্কচ্ছেদো বিধীয়তে || ২৪||
ক্ষণো মুহূর্তো যানো বা দিবসো বাপি নাটকে |
একাঙ্কে স বিধাতব্যো বীজস্যার্থবশানুগঃ || ২৫||
অঙ্কচ্ছেদে তু নির্বৃত্তং মাসং বা বর্ষমেব বা |
নোর্ধ্বং বর্ষাৎপ্রকর্তব্যং কার্যমঙ্কসমাশ্রয়ম্ || ২৬||
এবং তু ভারতে বর্ষে কক্ষ্যা কার্যা প্রয়োগতঃ |
মানুষাণাং গতির্যা তু দিব্যানান্তু নিবোধত || ২৭||
হিমবৎপৃষ্ঠসংস্থে তু কৈলাসে পর্বতোত্তমে |
যক্ষাশ্চ গুহ্যকাশ্চৈব ধনদানুচরাশ্চ যে || ২৮||
রক্ষঃপিশাচভূতাশ্চ সর্বে হৈমবতাঃ স্মৃতাঃ |
হেমকূটে চ গন্ধর্বা বিজ্ঞেয়াঃ সাপ্সরোগণাঃ || ২৯||
সর্বে নাগাশ্চ নিষধে শেষবাসুকিতক্ষকাঃ |
মহামেরৌ ত্রয়স্ত্রিংশদ্ জ্ঞেয়া দেবগণা বুধৈঃ || ৩০||
নীলে তু বৈডূর্যময়ে সিদ্ধা ব্রহ্মর্ষয়স্তথা |
দৈত্যানাং দানবানাঞ্চ শ্বেতপর্বত ইষ্যতে || ৩১||
পিতরশ্চাপি বিজ্ঞেয়া শৃঙ্গবন্তং সমাশ্রিতাঃ |
ইত্যেতে পর্বতাঃ শ্রেষ্ঠা দিব্যাবাসাঃ প্রকীর্তিতাঃ || ৩২||
তেষাং কক্ষ্যাবিভাগশ্চ জম্বূদ্বীপে ভবেদয়ম্ |
তেষাং ন চেষ্টিতং কার্যং স্বৈঃ স্বৈঃ কর্মপরাক্রমৈঃ || ৩৩||
পরিচ্ছ(চ্ছে) দবিশেষস্তু তেষাং মানুষলোকবৎ |
সর্বে ভাবাশ্চ দিব্যানাং কার্যা মানুষসংশ্রয়াঃ || ৩৪||
তেষান্ত্বনিমিষৎবং যত্তন্ন কার্যং প্রয়োক্তৃভিঃ |
ইহ ভাবা রসাশ্চৈব দৃষ্টাবেব প্রতিষ্ঠিতাঃ || ৩৫||
দৃষ্ট্যা হি সূচিতো ভাবঃ পুনরঙ্গৈর্বিভাব্যতে |
এবং কক্ষ্যাবিভাগস্তু ময়া প্রোক্তো দ্বিজোত্তমাঃ || ৩৬||
পুনশ্চৈব প্রবক্ষ্যামি প্রবৃত্তীনান্তু লক্ষণম্ |
চতুর্বিধা প্রবৃত্তিশ্চ প্রোক্তা নাট্যপ্রয়োগতঃ |
আবন্তী দাক্ষিণাত্যা চ পাঞ্চালী চোঢ্রমাগধী || ৩৭||
অত্রাহ প্রবৃত্তিরিতি কস্মাৎ ? উচ্যতে পৃথিব্যাং
নানাদেশবেষভাষাচারবার্তাঃ প্রখ্যাপয়তীতি বৃত্তিঃ |
প্রবৃত্তিশ্চ নিবেদনে | অত্রাহ -যথা পৃথিব্যাং বহবো
দেশাঃ সন্তি , কথমাসাং চতুর্বিধৎবম্ উপপন্নং,
সমানলক্ষণশ্চাসাং প্রয়োগ উচ্যতে , সত্যমেতৎ |
সমানলক্ষণ আসাং প্রয়োগঃ | কিন্তু
নানাদেশবেষভাষাচারো লোক ইতি কৃৎবা লোকানুমতেন
বৃত্তিসংশ্রিতস্য নাট্যস্য বৃত্তীনাং ময়া
চতুর্বিধৎবমভিহিতং ভারতী সাত্ত্বতী কৈশিক্যারভটী
চেতি | বৃত্তিসংশ্রিতৈশ্চ প্রয়োগৈরভিহিতা দেশাঃ | যতঃ
প্রবৃত্তিচতুষ্টয়মভিনির্বৃত্তং প্রয়োগশ্চোৎপাদিতঃ | তত্র
দাক্ষিণাত্যাস্তাবৎ বহুনৃত্তগীতবাদ্যা কৈশিকীপ্রায়াঃ
চতুরমধুরললিতাঙ্গাভিনয়াশ্চ | তদ্যথা –
মহেন্দ্রো মলয়ঃ সহ্যো মেকলঃ পালমঞ্জরঃ |
এতেষু যে শ্রিতা দেশাঃ স জ্ঞেয়ো দক্ষিণাপথঃ || ৩৮||
কোসলাগ্গ্স্তোশলাশ্চৈব কলিঙ্গা যবনা খসাঃ |
দ্রবিডান্ধ্রমহারাষ্ট্রা বৈষ্ণা বৈ বানবাসজাঃ || ৩৯||
দক্ষিণস্য সমুদ্রস্য তথা বিন্ধ্যস্য চান্তরে |
যে দেশাস্তেষু যুঞ্জীত দাক্ষিণাত্যাং তু নিত্যশঃ || ৪০||
আবন্তিকা বৈদিশিকাঃ সৌরাষ্ট্রা মালবাস্তথা |
সৈন্ধবাস্ত্বথ সৌবীরা আবর্তাঃ সার্বুদেয়কাঃ || ৪১||
দাশার্ণাস্ত্রৈপুরাশ্চৈব তথা বৈ মার্তিকাবতাঃ |
কুর্বন্ত্যাবন্তিকীমেতে প্রবৃত্তিং নিত্যমেব তু || ৪২||
সাত্ত্বতীং কৈশিকীং চৈব বৃত্তিমেষাং সমাশ্রিতা |
ভবেৎ প্র্যোগো নাট্যেঽত্র স তু কার্যঃ প্রয়োক্তৃভিঃ || ৪৩||
অঙ্গা বঙ্গাঃ কলিঙ্গাশ্চ বৎসাশ্চৈবোঢ্রমাগধাঃ |
পৌণ্ড্রা নেপালকাশ্চৈব অন্তর্গিরিবহির্গিরাঃ || ৪৪||
তথা প্লবঙ্গমা জ্ঞেয়া মলদা মল্লবর্তকাঃ |
ব্রহ্মোত্তরপ্রভৃতয়ো ভার্গবা মার্গবাস্তথা || ৪৫||
প্রাজ্যোতিষাঃ পুলিন্দাশ্চ বৈদেহাস্তাম্রলিপ্তকাঃ |
প্রাঙ্গাঃ প্রাবৃতয়শ্চৈব যুঞ্জন্তীহোঢ্রমাগধীম্ || ৪৬||
অন্যেঽপি দেশাঃ প্রাচ্যাং যে পুরাণে সম্প্রকীর্তিতাঃ |
তেষু প্রয়ুজ্যতে হ্যেষা প্রবৃত্তিশ্চোঢ্রমাগধী || ৪৭||
পাঞ্চালা সৌরসেনাশ্চ কাশ্মীরা হস্তিনাপুরাঃ |
বাহ্লীকা শল্যকাশ্চৈব মদ্রকৌশীনরাস্তথা || ৪৮||
হিমবৎসংশ্রিতা যে তু গঙ্গায়াশ্চোত্তরাং দিশম্ |
যে শ্রিতা বৈ জনপদাস্তেষু পাঞ্চালমধ্যমাঃ || ৪৯||
পাঞ্চালমধ্যমায়াং তু সাত্ত্বত্যারভটী স্মৃতা |
প্রয়োগস্ত্বল্পগীতার্থ আবিদ্ধগতিবিক্রমঃ || ৫০||
দ্বিধা ক্রিয়া ভবত্যাসাং রঙ্গপীঠপরিক্রমে |
প্রদক্ষিণপ্রদেশা চ তথা চাপ্যপ্রদক্ষিণা || ৫১||
আবন্তী দাক্ষিণাত্যা চ প্রদক্ষিণপরিক্রমে |
অপসব্যপ্রদেশাস্তু পাঞ্চালী চোঢ্রমাগধী || ৫২||
আবন্ত্যাং দাক্ষিণাত্যায়াং পার্শ্বদ্বারমথোত্তরম্ |
পাঞ্চাল্যামোঢ্রমাগধ্যাং যোজ্যং দ্বারং তু দক্ষিণম্ || ৫৩||
একীভূতাঃ পুনশ্চৈতাঃ প্রয়োক্তব্যাঃ প্রয়োক্তৃভিঃ |
পার্ষদং দেশকালৌ বাপ্যর্থয়ুক্তিমবেক্ষ্য চ || ৫৪||
যেষু দেশেষু যা কার্যা প্রবৃত্তিঃ পরিকীর্তিতা |
তদ্বৃত্তিকানি রূপাণি তেষু তজ্জ্ঞঃ প্রয়োজয়েৎ || ৫৫||
একীভূতাঃ পুনস্ত্বেতা নাটকাদৌ ভবন্তি হি |
অবেক্ষ্য বৃত্তিবাহুল্যং তত্তৎকর্ম সমাচরেৎ || ৫৬||
সার্থে বাহুল্যমেকস্য শেষাণামথ বুদ্ধিমান্ |
যেষামন্যস্য বাহুল্যং প্রবৃত্তিং পূরয়েত্তদা || ৫৭||
প্রয়োগো দ্বিবিধশ্চৈব বিজ্ঞেয়ো নাটকাশ্রয়ঃ |
সুকুমারস্তথাবিদ্ধো নাট্যয়ুক্তিসমাশ্রয়ঃ || ৫৮||
যত্ত্বাবিদ্ধাঙ্গহারন্তু চ্ছেদ্যভেদ্যাহবাত্মকম্ |
মায়েন্দ্রজালবহুলং পুস্তনেপথ্যসংযুতম্ || ৫৯||
পুরুষৈর্বহুভির্যুক্তমল্পস্ত্রীকং তথৈব চ |
সাত্ত্বত্যারভটীয়ুক্তং নাট্যমাবিদ্ধসঞ্জ্ঞিতম্ || ৬০||
ডিমঃ সমবকারশ্চ ব্যায়োগেহামৃগৌ তথা |
এতান্যাবিদ্ধসঞ্জ্ঞানি বিজ্ঞেয়ানি প্রয়োক্তৃভিঃ || ৬১||
এষাং প্রয়োগঃ কর্তব্যো দৈত্যদানবরাক্ষসৈঃ |
উদ্ধতা যে চ পুরুষাঃ শৌর্যবীর্যবলান্বিতাঃ || ৬২||
নাটকং সপ্রকরণং ভাণো বীথ্যঙ্কনাটিকে |
সুকুমারপ্রয়োগাণি মানুষেষ্বাশ্রিতাস্তু যে || ৬৩||
অথ বাহ্যপ্রয়োগেষু প্রেক্ষাগৃহবিবর্জিতে |
বিদিক্ষ্বপি ভবেদ্রঙ্গঃ কদাচিদ্ ভর্তুরাজ্ঞয়া || ৬৪||
পৃষ্ঠ কুতপং নাট্যে যুক্তা যতো মুখং ভরতাঃ |
সা পূর্বা মন্তব্যা প্রয়োগকালে তু নাট্যজ্ঞৈঃ || ৬৫||
দ্বারাণি ষট্ চৈব ভবন্তি চাস্য
রঙ্গস্য দিগ্ভাগবিনিশ্চিতানি |
নাট্যপ্রয়োগেণ খলু প্রবেশে
প্রাচ্যাং প্রতীচ্যাং চ দিশি প্রবেশঃ || ৬৬||
বিধানমুৎক্রম্য যথা চ রঙ্গে
বিনা প্রমাণাদ্বিদিশঃ প্রয়োগে |
দ্বারন্তু যস্মাৎসমৃদঙ্গভাণ্ডং
প্রাচীং দিশং তাং মনসাঽধ্যবস্যেৎ || ৬৭||
বয়োঽনুরূপঃ প্রথমন্তু বেশো বেশোঽনুরূপশ্চ গতিপ্রচারঃ |
গতিপ্রচারানুগতশ্চ পাঠ্যং
পাঠ্যানুরূপাভিনয়শ্চ কার্যঃ || ৬৮||
ধর্মী যা দ্বিবিধা প্রোক্তা ময়া পূর্বং দ্বিজোত্তমাঃ |
লৌকিকী নাট্যধর্মী চ তয়োর্বক্ষ্যামি লক্ষণম্ || ৬৯||
স্বভাবভাবোপগতং শুদ্ধং ৎববিকৃতং তথা |
লোকবার্তাক্রিয়োপেতমঙ্গলীলাবিবর্জিতম্ || ৭০||
স্বভাবাভিনয়োপেতং নানাস্ত্রীপুরুষাশ্রয়ম্ |
যদীদৃশং ভবেন্নাট্যং লোকধর্মী তু সা স্মৃতা || ৭১||
অতিবাক্যক্রিয়োপেতমতিসত্ত্বাতিভাবকম্ |
লীলাঙ্গহারাভিনয়ং নাট্যলক্ষণলক্ষিতম্ || ৭২||
স্বরালঙ্কারসংযুক্তমস্বস্থপুরুষাশ্রয়ম্ |
যদীদৃশং ভবেন্নাট্যং নাট্যধর্মী তু সা স্মৃতা || ৭৩||
লোকপ্রসিদ্ধং দ্রব্যন্তু যদা নাট্যে প্রয়ুজ্যতে |
মূর্তিমৎ সাভিলাষঞ্চ নাট্যধর্মী তু সা স্মৃতা || ৭৪||
আসন্নোক্তন্তু যদ্বাক্যং ন শৃণ্বন্তি পরস্পরম্ |
অনুক্তং শ্রূয়তে বাক্যং নাট্যধর্মী তু সা স্মৃতা || ৭৫||
শৈলয়ানবিমানানি চর্মবর্মায়ুধধ্বজাঃ |
মূর্তিমন্তঃ প্রয়ুজ্যন্তে নাট্যধর্মী তু সা স্মৃতা || ৭৬||
য একাং ভূমিকাং কৃৎবা কুর্বীতৈকান্তরেঽপরাম্ |
কৌশল্যাদেককৎবাদ্বা নাট্যধর্মী তু সা স্মৃতা || ৭৭||
যা গম্যা প্রমদা ভূৎবা গম্যা ভূমিষু যুজ্যতে |
গম্যা ভূমিষ্বগম্যা চ নাট্যধর্মী তু সা স্মৃতা || ৭৮||
ললিতৈরঙ্গবিন্যাসৈস্তথোৎক্ষিপ্তপদক্রমৈঃ |
নৃত্যতে গম্যতে যচ্চ নাট্যধর্মী তু সা স্মৃতা || ৭৯||
যোঽযং স্বভাবো লোকস্য সুখদুঃখক্রিয়াত্মকঃ |
সোঽঙ্গাভিনয়সংযুক্তো নাট্যধর্মী তু সা স্মৃতা || ৮০||
যশ্চেতিহাসবেদার্থো ব্রহ্মণা সমুদাহৃতঃ |
দিব্যমানুষরত্যর্থং নাট্যধর্মী তু সা স্মৃতা || ৮১||
যশ্চ কক্ষ্যাবিভাগোঽযং নানাবিধিসমাশ্রিতঃ |
রঙ্গপীঠগতঃ প্রোক্তো নাট্যধর্মী তু সা ভবেৎ || ৮২||
নাট্যধর্মীপ্রবৃত্তং হি সদা নাট্যং প্রয়োজয়েৎ |
ন হ্যঙ্গাভিনয়াৎকিঞ্চিদৃতে রাগ প্রবর্ততে || ৮৩||
সর্বস্য সহজো ভাবঃ সর্বো হ্যভিনয়োঽর্থতঃ |
অঙ্গালঙ্কারচেষ্টাভির্নাট্যধর্মী প্রকীর্তিতা || ৮৪||
এবং কক্ষ্যাবিভাগস্তু ধর্মী যুক্তয় এব চ |
বিজ্ঞেয়া নাট্যতত্ত্বজ্ঞৈঃ প্রয়োক্তব্যাশ্চ তত্ত্বতঃ || ৮৫||
উক্তো ময়েহাভিনয়ো যথাবৎ শাখাকৃতো যশ্চ কৃতোঽঙ্গহারৈঃ |
পুনশ্চ বাক্যাভিনয়ং যথাবদ্বক্ষ্যে স্বরব্যঞ্জনবর্ণয়ুক্তম্ || ৮৬||
ইতি ভরতীয়ে নাট্যশাস্ত্রে করয়ুক্তিধর্মীব্যঞ্জকো নাম
ত্রয়োদশোঽধ্যায়ঃ |