নাট্যশাস্ত্রম্ অধ্যায় ১২ গতিপ্রচার

 || নাট্যশাস্ত্রম্ অধ্যায় ১২ গতিপ্রচার ||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ দ্বাদশোঽধ্যায়ঃ গতিপ্রচার

এবং ব্যায়ামসংযোগে কার্যং মণ্ডলকল্পনম্ |
অতঃ পরং প্রবক্ষ্যামি গতীস্তু প্রকৃতিস্থিতাঃ || ১||
তত্রোপবহনং কৃৎবা ভাণ্ডবাদ্যপুরস্কৃতম্ |
যথামার্গরসোপেতং প্রকৃতীনাং প্রবেশনে || ২||
ধ্রুবায়াং সম্প্রয়ুক্তায়াং পটে চৈবাপকর্ষিতে |
কার্যঃ প্রবেশঃ পাত্রাণাং নানার্থরসসম্ভবঃ || ৩||
স্থানং তু বৈষ্ণবং কৃৎবা হ্যুত্তমে মধ্যমে তথা |
সমুন্নতং সমং চৈব চতুরস্রমুরস্তথা || ৪||
বাহুশীর্ষে প্রসন্নে চ নাত্যুৎক্ষিপ্তে চ কারয়েৎ |
গ্রীবাপ্রদেশঃ কর্তব্যো ময়ূরাঞ্চিতমস্তকঃ || ৫||
কর্ণাদষ্টাঙ্গুলস্থে চ বাহুশীর্ষে প্রয়োজয়েৎ |
উরসশ্চাপি চিবুকং চতুরঙ্গুলসংস্থিতম্ || ৬||
হস্তৌ তথৈব কর্তব্যৌ কটীনাভিতটস্থিতৌ |
দক্ষিণো নাভিসংস্থস্তু বামঃ কটিতটস্থিতঃ || ৭||
পাদয়োরন্তরং কার্যং দ্বৌ তালাবর্ধমেব চ |
পাদোৎক্ষেপস্তু কর্তব্যঃ স্বপ্রমাণবিনির্মিতঃ || ৮||
চতুস্তালো দ্বিতালশ্চাপ্যেকতালস্তথৈব চ |
চতুস্তালস্তু দেবানাং পার্থিবানাং তথৈব চ || ৯||
দ্বিতালশ্চৈব মধ্যানাং তালঃ স্ত্রীনীচলিঙ্গিনাম্ |
চতুষ্কলোঽথ দ্বিকলস্তথা হ্যেককলঃ স্মৃতঃ || ১০||
চতুষ্কলো হ্যুত্তমানাং মধ্যানাং দ্বিকলো ভবেৎ |
তথা চৈককলঃ পাদো নীচানাং সম্প্রকীর্তিতঃ || ১১||
স্থিতং মধ্যং দ্রুতং চৈব সমবেক্ষ্য লয়ত্রয়ম্ |
যথাপ্রকৃতিনাট্যজ্ঞো গতিমেবং প্রয়োজয়েৎ || ১২||
ধৈর্যোপপন্না গতিরুত্তমানাং মধ্যা গতির্মধ্যমসম্মতানাম্ |
দ্রুতা গতিশ্চ প্রচুরাধমানাং লয়ত্রয়ং সত্ত্ববশেন যোজ্যম্ || ১৩||
এষ এব তু বিজ্ঞেয়ঃ কলাতাললয়ে বিধিঃ |
পুনর্গতিপ্রচারস্য প্রয়োগং শ্রুণুতানঘাঃ || ১৪||
স্বভাবাত্তূত্তমগতৌ কার্যং জানুকটীসমম্ |
যুদ্ধচারীপ্রয়োগেষু জানুস্তনসমং ন্যসেৎ || ১৫||
পার্শ্বক্রান্তৈঃ সললিতৈঃ পাদৈর্বাদ্যান্বিতৈরথ |
রঙ্গকোণোন্মুখং গচ্ছেৎ সম্যক্ পঞ্চপদানি চ || ১৬||
বামবেধং ততঃ কুর্যাদ্বিক্ষেপং দক্ষিণেন তু |
পরিবৃত্য দ্বিতীয়ং তু গচ্ছেৎ কোণং ততঃ পরম্ || ১৭||
তত্রাপি বামবেধস্তু বিক্ষেপো দক্ষিণেন চ |
ততো ভাণ্ডোন্মুখো গচ্ছেৎ তান্যেব তু পদানি চ || ১৮||
এবং গতাগতৈঃ কৃৎবা পদানামিহ বিংশতিম্ |
বামবেধং ততঃ কুর্যাৎ বিক্ষেপং দক্ষিণস্য চ || ১৯||
রঙ্গে বিকৃষ্টে ভরতেন কার্যো গতাগতৈঃ পাদগতিপ্রচারঃ |
ত্র্যশ্রস্ত্রিকোণে চতুরস্ররঙ্গে গতিপ্রচারশ্চতুরস্র এব || ২০||
যঃ সমৈঃ সংহিতো গচ্ছেত্তত্র কার্যো লয়াশ্রয়ঃ |
চতুষ্কলোঽথ দ্বিকলস্তথৈবৈককলঃ পুনঃ || ২১||
অথ মধ্যমনীচৈস্তু গচ্ছেদ্যঃ পরিবারিতঃ |
চতুষ্কলমথার্ধং চ তথা চৈককলং পুনঃ || ২২||
দৈত্যদানবয়ক্ষাণাং নৃপপন্নগরক্ষসাম্ |
চতুস্তালপ্রমাণেন কর্তব্যাথ গতির্বুধৈঃ || ২৩||
দিবৌকসাং তু সর্বেষাং মধ্যমা গতিরিষ্যতে |
তত্রাপি চোদ্ধতা যে তু তেষাং দেবৈঃ সমা গতিঃ || ২৪||
ঋষয় ঊচুঃ –
যদা মনুষ্যা রাজানস্তেষাং দেবগতিঃ কথম্ |
অত্রোচ্যতে কথং নৈষা গতী রাজ্ঞাং ভবিষ্যতি || ২৫||
ইহ প্রকৃতয়ো দিব্যা দিব্যমানুষ্য এব চ |
মানুষ্য ইতি বিজ্ঞেয়া নাট্যনৃত্তক্রিয়াং প্রতি || ২৬||
দেবানাং প্রকৃতির্দিব্যা রাজ্ঞাং বৈ দিব্যমানুষী |
যা ৎবন্যা লোকবিদিতা মানুষী সা প্রকীর্তিতা || ২৭||
দেবাংশজাস্তু রাজানো বেদাধ্যাত্মসু কীর্তিতাঃ |
এবং দেবানুকরণে দোষো হ্যত্র ন বিদ্যতে || ২৮||
অয়ং বিধিস্তু কর্তব্যঃ স্বচ্ছন্দগমনং প্রতি |
সম্ভ্রমোৎপাতরোষেষু প্রমাণং ন বিধীয়তে || ২৯||
সর্বাসাং প্রকৃতীনাং তু অবস্থান্তরসংশ্রয়া |
উত্তমাধমমধ্যানাং গতিঃ কার্যা প্রয়োক্তৃভিঃ || ৩০||
চতুরর্ধকলং বা স্যাৎ তদর্ধকলমেব চ |
অবস্থান্তরমাসাদ্য কুর্যাদ্ গতিবিচেষ্টিতম্ || ৩১||
জ্যেষ্ঠে চতুষ্কলং হ্যত্র মধ্যমে দ্বিকলং ভবেৎ |
দ্বিকলা চোত্তমে যত্র মধ্যে ৎবেককলা ভবেৎ || ৩২||
কলিকং মধ্যমে যত্র নীচেষ্বর্ধকলং ভবেৎ |
এবমর্ধার্ধহীনং তু জডানাং সম্প্রয়োজয়েৎ || ৩৩||
জ্বরার্তে চ ক্ষুধার্তে চ তপঃশ্রান্তে ভয়ান্বিতে |
বিস্মিতে চাবহিত্থে চ তথৌৎসুক্যসমন্বিতে || ৩৪||
শৃঙ্গারে চৈব শোকে চ স্বচ্ছন্দগমনে তথা |
গতিঃ স্থিতলয়া কার্যাধিকলান্তরপাতিতা || ৩৫||
পুনশ্চিন্তান্বিতে চৈব গতিঃ কার্যা চতুষ্কলা |
অস্বস্থকামিতে চৈব ভয়ে বিত্রাসিতে তথা || ৩৬||
আবেগে চৈব হর্ষে চ কার্যে যচ্চ ৎবরান্বিতম্ |
অনিষ্টশ্রবণে চৈব ক্ষেপে চাদ্ভুতদর্শনে || ৩৭||
অপি চাত্যায়িকে কার্যে দুঃখিতে শত্রুমার্গণে |
অপরাদ্ধানুসরণে শ্বাপদানুগতৌ তথা || ৩৮||
এতেষ্বেবং গতিং প্রাজ্ঞো বিকলাং সম্প্রয়োজয়েৎ |
উত্তমানাং গতির্যা তু ন তাং মধ্যেষু যোজয়েৎ || ৩৯||
যা গতির্মধ্যমানাং তু ন তাং নীচেষু যোজয়েৎ |
গতিঃ শৃঙ্গারিণী কার্যা স্বস্থকামিতসম্ভবা || ৪০||
দূতীদর্শিতমার্গস্তু প্রবিশেদ্রঙ্গমণ্ডলম্ |
সূচয়া চাপ্যভিনয়ং কুর্যাদর্থসমাশ্রয়ম্ || ৪১||
হৃদ্যৈর্গন্ধৈস্তথা বস্ত্রৈরলঙ্কারৈশ্চ ভূষিতঃ |
নানাপুষ্পসুগন্ধাভির্মালাভিঃ সমলঙ্কৃতঃ || ৪২||
গচ্ছেৎ সললিতৈঃ পাদৈরতিক্রান্তস্থিতৈস্তথা |
তথা সৌষ্ঠবসংযুক্তৈর্লয়তালবশানুগৈঃ || ৪৩||
পাদয়োরনুগৌ হস্তৌ নিত্যং কার্যৌ প্রয়োক্তৃভিঃ |
উৎক্ষিপ্য হস্তং পাতেন পাদয়োশ্চ বিপর্যয়াৎ || ৪৪||
প্রচ্ছন্নকামিতে চৈব গতিং ভূয়ো নিবোধত |
বিসর্জিতজনঃ স্রস্তস্তথা দূতীসহায়বান্ || ৪৫||
নির্বাণদীপো নাত্যর্থং ভূষণৈশ্চ বিভূষিতঃ |
বেলাসদৃশবস্ত্রশ্চ সহ দূত্যা শনৈস্তথা || ৪৬||
ব্রজেৎ প্রচ্ছন্নকামস্তু পাদৈর্নিশ্শব্দমন্দগৈঃ |
শব্দশঙ্ক্যুৎসুকশ্চ স্যাদবলোকনতৎপরঃ || ৪৭||
বেপমানশরীরশ্চ শঙ্কিতঃ প্রস্খলন্ মুহুঃ |
রসে রৌদ্রে তু বক্ষ্যামি দৈত্যরক্ষোগণান্ প্রতি || ৪৮||
এক এব রসস্তেষাং স্থায়ী রৌদ্রো দ্বিজোত্তমাঃ |
নেপথ্যরৌদ্রো বিজ্ঞেয়স্ত্বঙ্গরৌদ্রস্তথৈব চ || ৪৯||
তথা স্বভাবজশ্চৈব ত্রিধা রৌদ্রঃ প্রকল্পিতঃ |
রুধিরক্লিন্নদেহো যো রুধিরার্দ্রমুখস্তথা || ৫০||
তথা পিশিতহস্তশ্চ রৌদ্রো নেপথ্যজস্তু সঃ |
বহুবাহুর্বহুমুখো নানাপ্রহরণাকুলঃ || ৫১||
স্থূলকায়স্তথা প্রাংশুরঙ্গরৌদ্রঃ প্রকীর্তিতঃ |
রক্তাক্ষঃ পিঙ্গকেশশ্চ অসিতো বিকৃতস্বরঃ || ৫২||
রূক্ষো নির্ভর্ত্সনপরো রৌদ্রঃ সোঽযং স্বভাবজঃ |
চতুস্তালান্তরোৎক্ষিপ্তৈঃ পাদৈস্ত্বন্তরপাতিতৈঃ || ৫৩||
গতিরেবং প্রকর্তব্যা তেষাং যে চাপি তদ্বিধাঃ |
অহৃদ্যা তু মহী যত্র শ্মশানরণকশ্মলা || ৫৪||
গতিং তত্র প্রয়ুঞ্জীত বীভৎসাভিনয়ং প্রতি |
ক্বচিদাসন্নপতিতৈঃ বিকৃষ্টপতিতৈঃ ক্বচিৎ || ৫৫||
এলকাক্রীডিতৈঃ পাদৈরুপর্যুপরি পাতিতৈঃ |
তেষামেবানুগৈর্হস্তৈর্বীভৎসে গতিরিষ্যতে || ৫৬||
অথ বীরে চ কর্ত্তব্যা পাদবিক্ষেপসংযুতা |
দ্রুতপ্রচারাধিষ্ঠানা নানাচারীসমাকুলা || ৫৭||
পার্শ্বক্রান্তৈদ্রুতাবিদ্ধৈঃ সূচীবিদ্ধৈস্তথৈব চ |
কলাকালগতৈঃ পাদৈরাবেগে যোজয়েৎ গতিম্ || ৫৮||
উত্তমানাময়ং প্রায়ঃ প্রোক্তো গতিপরিক্রমঃ |
মধ্যানামধমানাং চ গতিং বক্ষ্যাম্যহং পুনঃ || ৫৯||
বিস্ময়ে চৈব হর্ষে চ বিক্ষিপ্তপদবিক্রমান্ |
আসাদ্য তু রসং হাস্যমেতচ্চান্যং চ যোজয়েৎ || ৬০||
পুনশ্চ করুণে কার্যা গতিঃ স্থিরপদৈরথ |
বাষ্পাম্বুরুদ্ধনয়নঃ সন্নগাত্রস্তথৈব চ || ৬১||
উৎক্ষিপ্তপাতিতকরস্তথা সস্বনরোদনঃ |
গচ্ছেত্তথাধ্যধিকয়া প্রত্যগ্রাপ্রিয়সংশ্রয়ে || ৬২||
এষা স্ত্রীণাং প্রয়োক্তব্যা নীচসত্ত্বে তথৈব চ |
উত্তমানাং তু কর্তব্যা সধৈর্যা বাষ্পসঙ্গতা || ৬৩||
নিঃশ্বাসৈরায়তোৎসৃষ্টৈস্তথৈবোর্ধ্বনিরীক্ষিতৈঃ |
ন তত্র সৌষ্ঠবং কার্যং ন প্রমাণং তথাবিধম্ || ৬৪||
মধ্যানামপি সত্ত্বজ্ঞা গতির্যোজ্যা বিধানতঃ |
উরঃপাতহতোৎসাহঃ শোকব্যাকুলচেতনঃ || ৬৫||
নাত্যুৎক্ষিপ্তৈঃ পদৈর্গচ্ছেৎ ইষ্টবন্ধুনিপাতনে |
গাঢপ্রহারে কার্যা চ শিথিলাঙ্গভুজাশ্রয়া || ৬৬||
বিঘূণিতশরীরা চ গতিশ্চূর্ণপদৈরথ |
শীতেন চাভিভূতস্য বর্ষেণাভিদ্রুতস্য চ || ৬৭||
গতিঃ প্রয়োক্তৃভিঃ কার্যা স্ত্রীনীচপ্রকৃতাবথ |
পিণ্ডীকৃত্য তু গাত্রাণি তেষাং চৈব প্রকম্পনম্ || ৬৮||
করৌ বক্ষসি নিক্ষিপ্য কুব্জীভূতস্তথৈব চ |
দন্তোষ্ঠস্ফুরণং চৈব চিবুকস্য প্রকম্পনম্ || ৬৯||
কার্যং শনৈশ্চ কর্তব্যং শীতাভিনয়নে গতৌ |
তথা ভয়ানকে চৈব গতিঃ কার্যা বিচক্ষণৈঃ || ৭০||
স্ত্রীণাং কাপুরুষাণাং চ যে চান্যে সত্ত্ববর্জিতাঃ |
বিস্ফারিতে চলে নেত্রে বিধুতং চ শিরস্তথা || ৭১||
ভয়সংযুক্তয়া দৃষ্ট্যা পার্শ্বয়োশ্চ বিলোকনৈঃ |
দ্রুতৈশ্চূর্ণপদৈশ্চৈব বদ্ধ্বা হস্তং কপোতকম্ || ৭২||
প্রবেপিতশরীরশ্চ শুষ্কোষ্ঠস্স্খলিতং ব্রজেৎ |
এষানুকরণে কার্যা তর্জনে ত্রাসনে তথা || ৭৩||
সত্ত্বং চ বিকৃতং দৃষ্ট্বা শ্রুৎবা চ বিকৃতং স্বরম্ |
এষা স্ত্রীণাং প্রকর্ত্তব্যা নৃণাং চাক্ষিপ্তবিক্রমা || ৭৪||
ক্বচিদাসন্নপতিতৈর্বিকৃষ্টপতিতৈঃ ক্বচিৎ |
এলকাক্রীডিতৈঃ পাদৈরুপর্যুপরি পাতিতৈঃ || ৭৫||
এষামেবানুগৈর্হস্তৈর্গতিং ভীতেষু যোজয়েৎ |
বণিজাং সচিবানাং চ গতিঃ কার্যা স্বভাবজা || ৭৬||
কৃৎবা নাভিতটে হস্তমুত্তানখটকামুখম্ |
আদ্যং চারালমুত্তানং কুর্যাৎপার্শ্বং স্তনান্তরে || ৭৭||
ন নিষণ্ণং ন চ স্তব্ধং ন চাপি পরিবাহিতম্ |
কৃৎবা গাত্রং তথা গচ্ছেত্তেন চৈব ক্রমেণ তু || ৭৮||
অতিক্রান্তৈর্পদৈর্বিপ্রা দ্বিতালান্তরগামিভিঃ |
যতীনাং শ্রমণানাং চ যে চান্যে তপসি স্থিতাঃ || ৭৯||
তেষাং কার্যা গতির্যে তু নৈষ্ঠিকং ব্রতমাশ্রিতাঃ |
আলোলচক্ষুশ্চ ভবেদ্যুগমাত্রনিরীক্ষণঃ || ৮০||
উপস্থিতস্মৃতিশ্চৈব গাত্রং সর্বং বিধায় চ |
অচঞ্চলমনাশ্চৈব যথাবল্লিঙ্গমাশ্রিতঃ || ৮১||
বিনীতবেষশ্চ ভবেৎ কষায়বসনস্তথা |
প্রথমং সমপাদেন স্থিৎবা স্থানেন বৈ বুধঃ || ৮২||
হস্তং চ চতুরং কৃৎবা তথা চৈকং প্রসারয়েৎ |
প্রসন্নং বদনং কৃৎবা প্রয়োগস্য বশানুগঃ || ৮৩||
অনিষণ্ণেন গাত্রেণ গতিং গচ্ছেদ্ ব্যতিক্রমাৎ |
উত্তমানাং ভবেদেষা লিঙ্গিনাং যে মহাব্রতাঃ || ৮৪||
এভিরেব বিপর্যস্তৈর্গুণৈরন্যেষু যোজয়েৎ |
তথা ব্রতানুগাবস্থা হ্যন্যেষাং লিঙ্গিনাং গতিঃ || ৮৫||
বিভ্রান্তা বাপ্যুদাত্তা বা বিভ্রান্তনিভৃতাপি বা |
শকটাস্যস্থিতৈঃ পাদৈরতিক্রান্তৈস্তথৈব চ || ৮৬||
কার্যা পাশুপতানাং চ গতিরুদ্ধতগামিনী |
অন্ধকারেঽথ যানে চ গতিঃ কার্যা প্রয়োক্তৃভিঃ || ৮৭||
ভূমৌ বিসর্পিতৈঃ পাদৈর্হস্তৈর্মার্গপ্রদর্শিভিঃ |
রথস্থস্যাপি কর্তব্যা গতিশ্চূর্ণপদৈরথ || ৮৮||
সমপাদং তথা স্থানং কৃৎবা রথগতিং ব্রজেৎ |
ধনুর্গৃহীৎবা চৈকেন তথা চৈকেন কূবরম্ || ৮৯||
সূতশ্চাস্য ভবেদেবং প্রতোদপ্রগ্রহাকুলঃ |
বাহনানি বিচিত্রাণি কর্তব্যানি বিভাগশঃ || ৯০||
দ্রুতৈশ্চূর্ণপদৈশ্চৈব গন্তব্যং রঙ্গমণ্ডলে |
বিমানস্থস্য কর্তব্যা হ্যেষৈব স্যন্দিনী গতিঃ || ৯১||
আরোঢুমুদ্বহেদ্ গাত্রং কিঞ্চিৎ স্যাদুন্মুখস্থিতম্ |
অস্যৈব বৈপরীত্যেন কুর্যাচ্চাপ্যবরোহণম্ || ৯২||
অধোঽবলোকনৈশ্চৈব মণ্ডলাবর্তনেন চ |
আকাশগমনে চৈব কর্তব্যা নাট্যয়োক্তৃভিঃ || ৯৩||
স্থানেন সমপাদেন তথা চূর্ণপদৈরপি |
ব্যোম্নশ্চাবতরেদ্যস্তু তস্যৈতাং কারয়েৎ গতিম্ || ৯৪||
ঋজ্বায়তোন্নতনতৈঃ কুটিলাবর্তিতৈরথ |
ভ্রশ্যতশ্চ তথাকাশাদপবিদ্ধভুজা গতিঃ || ৯৫||
বিকীর্ণবসনা চৈব তথা ভূগতলোচনা |
প্রাসাদদ্রুমশৈলেষু নদীনিম্নোন্নতেষু চ || ৯৬||
আরোহণাবতরণং চ কার্যমর্থবশাদ্বুধৈঃ |
প্রাসাদারোহণং কার্যং অতিক্রান্তৈঃ পদৈরথ || ৯৭||
উদ্বাহ্য গাত্রং পাদং চ সোপানে নিক্ষিপেন্নরঃ |
তথাবতরণং চৈব গাত্রমানম্য রেচয়েৎ || ৯৮||
প্রাসাদে যন্ময়া প্রোক্তঃ প্রতারঃ কেবলো ভবেৎ |
কিঞ্চিন্নতাগ্রকায়া তু প্রতারে গতিরিষ্যতে || ৯৯||
জলপ্রমাণাপেক্ষা তু জলমধ্যে গতির্ভবেৎ |
তোয়েঽল্পে বসনোৎকর্ষঃ প্রাজ্যে পাণিবিকর্ষণৈঃ || ১০০||
প্রসার্য বাহুমেকৈকং মুহুর্বারিবিকর্ষণৈঃ |
তির্যক্ প্রসারিতা চৈব হিয়মাণা চ বারিণা || ১০১||
অশেষাঙ্গাকুলাধূতবদনা গতিরিষ্যতে |
নৌস্থস্যাপি প্রয়োক্তব্যা দ্রুতৈশ্চূর্ণপদৈর্গতিঃ || ১০২||
অতিক্রান্তেন পাদেন দ্বিতীয়েনাঞ্চিতেন চ |
প্রাসাদারোহণে যত্তু তদেবাদ্রিষু কারয়েৎ || ১০৩||
কেবলমূর্ধ্বনিক্ষেপমদ্রিষ্বঙ্গং ভবেদথ |
দ্রুমে চারোহণং কার্যমতিক্রান্তৈঃ স্থিতৈঃ পদৈঃ || ১০৪||
সূচীবিদ্ধৈরপক্রান্তৈঃ পার্শ্বক্রান্তৈস্তথৈব চ |
এতদেবাবতরণং সরিৎস্বপি নিয়োজয়েৎ || ১০৫||
অনেনৈব বিধানেন কর্তব্যং গতিচেষ্টিতম্ |
সঞ্জ্ঞামাত্রেণ কর্তব্যান্যেতানি বিধিপূর্বকম্ || ১০৬||
কস্মান্মৃত ইতি প্রোক্তে কিং কর্তব্যং প্রয়োক্তৃভিঃ |
অঙ্কুশগ্রহণান্নাগং খলীনগ্রহণাদ্ধয়ম্ || ১০৭||
প্রগ্রহগ্রহণাদ্যানমেবমেবাপরেষ্বপি |
অশ্বয়ানে গতিঃ কার্যা বৈশাখস্থানকেন তু || ১০৮||
যথা চূর্ণপদৈশ্চিত্রৈরুপর্যুপরি পাতিতৈঃ |
পন্নগানাং গতিঃ কার্যা পাদৈঃ স্বস্তিকসঞ্জ্ঞিতৈঃ || ১০৯||
পার্শ্বক্রান্তং পদং কুর্যাৎ স্বস্তিকং রেচয়েদিহ |
বিটস্যাপি তু কর্তব্যা গতির্ললিতবিক্রমা || ১১০||
পাদৈরাকুঞ্চিতৈঃ কিঞ্চিৎ তালাভ্যন্তরপাতিতৈঃ |
স্বসৌষ্ঠবসমায়ুক্তৌ তথা হস্তৌ পদানুগৌ || ১১১||
খটকাবর্ধমানৌ তু কৃৎবা বিটগতিং ব্রজেৎ |
কঞ্চুকীয়স্য কর্তব্যা বয়োবস্থাবিশেষতঃ || ১১২||
অবৃদ্ধস্য প্রয়োগজ্ঞো গতিমেবং প্রয়োজয়েৎ |
অর্ধতালোত্থিতৈঃ পাদৈর্বিষ্কম্ভৈঃ ঋজুভিস্তথা || ১১৩||
সমুদ্বহন্নিবাঙ্গানি পঙ্কলগ্ন ইব ব্রজেৎ |
অথ বৃদ্ধস্য কর্তব্যা গতিঃ কম্পিতদেহিকা || ১১৪||
বিষ্কম্ভনকৃতপ্রাণা মন্দোৎক্ষিপ্তপদক্রমা |
কৃশস্যাপ্যভিনেয়া বৈ গতির্মন্দপরিক্রমা || ১১৫||
ব্যাধিগ্রস্তে জ্বরার্তে চ তপঃশ্রান্তে ক্ষুধান্বিতে |
বিষ্কম্ভনকৃতপ্রাণঃ কৃশঃ ক্ষামোদরস্তথা || ১১৬||
ক্ষামস্বরকপোলশ্চ দীননেত্রস্তথৈব চ |
শনৈরুৎক্ষেপণং চৈব কর্তব্যং হস্তপাদয়োঃ || ১১৭||
কম্পনং চৈব গাত্রাণাং ক্লেশনং চ তথৈব চ |
দূরাধ্বানং গতস্যাপি গতির্মন্দপদক্রমা || ১১৮||
বিকূণনং চ গাত্রস্য জানুনোশ্চ বিমর্দনম্ |
স্থূলস্যাপি তু কর্তব্যা গতির্দেহানুকর্ষিণী || ১১৯||
সমুদ্বহনভূয়িষ্ঠা মন্দোৎক্ষিপ্তপদক্রমা |
বিষ্কম্ভগামী চ ভবেন্নিঃশ্বাসবহুলস্তথা || ১২০||
শ্রমস্বেদাভিভূতশ্চ ব্রজেচ্চূর্ণপদৈস্তথা |
মত্তানাং তু গতিঃ কার্যা মদে তরুণমধ্যমে || ১২১||
বামদক্ষিণপাদাভ্যাং ঘূর্ণমানাপসর্পণৈঃ |
অবকৃষ্টে পদে চৈব হ্যনবস্থিতপাদিকা || ১২২||
বিঘূর্ণিতশরীরা চ করৈঃ প্রস্খলিতৈস্তথা |
উন্মত্তস্যাপি কর্তব্যা গতিস্ত্বনিয়তক্রমা || ১২৩||
বহুচারীসমায়ুক্তা লোকানুকরণাশ্রয়া |
রূক্ষস্ফুটিতকেশশ্চ রজোধ্বস্ততনুস্তথা || ১২৪||
অনিমিত্তপ্রকথনো বহুভাষী বিকারবান্ |
গায়ত্যকস্মাদ্ধসতি সঙ্গে চাপি ন সজ্জতে || ১২৫||
নৃত্যত্যপি চ সংহৃষ্টো বাদয়ত্যপি বা পুনঃ |
কদাচিদ্ধাবতি জবাৎ কদাচিদবতিষ্ঠতে || ১২৬||
কদাচিদুপবিষ্টস্তু শয়ানঃ স্যাৎ কদাচন |
নানাচীরধরশ্চৈব রথ্যাস্বনিয়তালয়ঃ || ১২৭||
উন্মত্তো ভবতি হ্যেবং তস্যৈতাং কারয়েদ্ গতিম্ |
স্থিৎবা নূপুরপাদেন দণ্ডপাদং প্রসারয়েৎ || ১২৮||
বদ্ধাং চারীং তথা চৈব কৃৎবা স্বস্তিকমেব চ |
অনেন চারীয়োগেন পরিভ্রাম্য তু মণ্ডলম্ || ১২৯||
বাহ্যভ্রমরকং চৈব রঙ্গকোণে প্রসারয়েৎ |
ত্রিকং সুললিতং কৃৎবা লতাখ্যং হস্তমেব চ || ১৩০||
বিপর্যয়গতৈর্হস্তৈঃ পদ্ভ্যাং সহ গতির্ভবেৎ |
ত্রিবিধা তু গতিঃ কার্যা খঞ্জপঙ্গুকবামনৈঃ || ১৩১||
বিকলাঙ্গপ্রয়োগেণ কুহকাভিনয়ং প্রতি |
একঃ খঞ্জগতৌ নিত্যং স্তব্ধো বৈ চরণো ভবেৎ || ১৩২||
তথা দ্বিতীয়ঃ কার্যস্তু পাদোঽগ্রতলসঞ্চরঃ |
স্তব্ধেনোত্থাপনং কার্যমঙ্গস্য চরণেন তু || ১৩৩||
গমনেন নিষণ্ণঃ স্যাদন্যেন চরণেন তু |
ইতরেণ নিষীদেচ্চ ক্রমেণানেন বৈ ব্রজেৎ || ১৩৪||
এষা খঞ্জগতিঃ কার্যা তলশল্যক্ষতেষু চ |
পাদেনাগ্রতলস্থেন হ্যঞ্চিতেন ব্রজেত্তথা || ১৩৫||
নিষণ্ণদেহা পঙ্গোস্তু নতজঙ্ঘা তথৈব চ |
সর্বসঙ্কুচিতাঙ্গা চ বামনে গতিরিষ্যতে || ১৩৬||
ন তস্য বিক্রমঃ কার্যো বিক্ষেপশ্চরণস্য চ |
সোদ্বাহিতা চূর্ণপদা সা কার্যা কুহনাত্মিকা || ১৩৭||
বিদূষকস্যাপি গতির্হাস্যত্রয়সমন্বিতা |
অঙ্গবাক্যকৃতং হাস্যং হাস্যং নেপথ্যজং স্মৃতম্ || ১৩৮||
দন্তুরঃ খলতিঃ কুব্জঃ খঞ্জশ্চ বিকৃতাননঃ |
য ঈদৃশঃ প্রবেশঃ স্যাদঙ্গহাস্যং তু তদ্ভবেৎ || ১৩৯||
যদা তু বকবদ্গচ্ছেদুল্লোকিতবিলোকিতৈঃ |
অন্যায়তপদৎবাচ্চ অঙ্গহাস্যো ভবেৎস তু || ১৪০||
কার্যহাস্যং তু বিজ্ঞেয়মসম্বদ্ধপ্রভাষণাৎ |
অনর্থকৈর্বিকারৈশ্চ তথা চাশ্লীলভাষিতৈঃ || ১৪১||
চীরচর্মমশীভস্মগৈরিকাদ্যৈস্তু মণ্ডিতঃ |
যস্তাদৃশো ভবেদ্বিপ্রা হাস্যো নেপথ্যজস্তু সঃ || ১৪২||
তস্মাত্তু প্রকৃতিং জ্ঞাৎবা ভাবঃ কার্যস্তু তত্ত্বতঃ |
গতিপ্রচারং বিভজেৎ নানাবস্থান্তরাত্মকম্ || ১৪৩||
স্বভাবজায়াং বিন্যস্য কুটিলং বামকে করে |
তদা দক্ষিণহস্তে চ কুর্যাচ্চতুরকং পুনঃ || ১৪৪||
পার্শ্বমেকং শিরশ্চৈব হস্তোঽথ চরণস্তথা |
পর্যায়শঃ সন্নময়েল্লয়তালবশানুগঃ || ১৪৫||
স্বভাবজা তু তস্যৈষা গতিরন্যা বিকারজা |
অলাভলাভাৎ মুক্তস্য স্তব্ধা তস্য গতির্ভবেৎ || ১৪৬||
কার্যা চৈব হি নীচানাং চেটাদীনাং পরিক্রমাৎ |
অধমা ইতি যে খ্যাতা নানাশীলাশ্চ তে পুনঃ || ১৪৭||
পার্শ্বসেকং শিরশ্চৈব করঃ সচরণস্তথা |
শকারস্যাপি কর্তব্যা গতিশ্চঞ্চলদেহিকা |
গতৌ নমেত চেটানাং দৃষ্টিশ্চার্ধবিচারিণী || ১৪৮||
বস্ত্রাভরণসংস্পর্শৈর্মুহুর্মুহুরবেক্ষিতৈঃ |
গাত্রৈর্বিকারবিক্ষিপ্তৈঃ লম্ববস্ত্রস্রজা তথা || ১৪৯||
সগর্বিতা চূর্ণপদা শকারস্য গতির্ভবেৎ |
জাত্যা নীচেষু যোক্তব্যা বিলোকনপরা গতিঃ || ১৫০||
অসংস্পর্শাচ্চ লোকস্য স্বাঙ্গানি বিনিগূহ্য চ |
ম্লেচ্ছানাং জাতয়ো যাস্তু পুলিন্দশবরাদয়ঃ || ১৫১||
তেষাং দেশানুসারেণ কার্যং গতিবিচেষ্টিতম্ |
পক্ষিণাং শ্বাপদানাং চ পশূনাং চ দ্বিজোত্তমাঃ || ১৫২||
স্বস্বজাতিসমুত্থেন স্বভাবেন গতির্ভবেৎ |
সিংহর্ক্ষবানরাণাং চ গতিঃ কার্যা প্রয়োক্তৃভিঃ || ১৫৩||
যা কৃতা নরসিংহেন বিষ্ণুনা প্রভবিষ্ণুনা |
আলীঢস্থানকং কৃৎবা গাত্রং তস্যৈব চানুগম্ || ১৫৪||
জানূপরি করং হ্যেকমপরং বক্ষসি স্থিতম্ |
অবলোক্য দিশঃ কৃৎবা চিবুকং বাহুমস্তকে || ১৫৫||
গন্তব্যং বিক্রমৈর্বিপ্রাঃ পঞ্চতালান্তরোত্থিতৈঃ |
নিয়ুদ্ধসময়ে চৈব রঙ্গাবতরণে তথা || ১৫৬||
সিংহাদীনাং প্রয়োক্তব্যা গতিরেষা প্রয়োক্তৃভিঃ |
শেষাণামর্থয়োগেন গতিং স্থানং চ যোজয়েৎ || ১৫৭||
বাহনার্থপ্রয়োগেষু রঙ্গাবতরণেষু চ |
এবমেতাঃ প্রয়োক্তব্যা নরাণাং গতয়ো বুধৈঃ || ১৫৮||
নোক্তা যা যা ময়া হ্যত্র গ্রাহ্যাস্তাস্তাশ্চ লোকতঃ |
অতঃ পরং প্রবক্ষ্যামি স্ত্রীণাং গতিবিচেষ্টিতম্ || ১৫৯||
স্ত্রীণাং স্থানানি কার্যাণি গতিষ্বাভরণেষু চ |
আয়তং চাবহিত্থং চ অশ্বক্রান্তমথাপি চ || ১৬০||
স্থানান্যেতানি নারীণামথ লক্ষণমুচ্যতে |
বামঃ স্বভাবতো যত্র পাদো বিরচিতঃ সমঃ || ১৬১||
তালমাত্রান্তরে ন্যস্তস্ত্র্যশ্রঃ পক্ষস্থিতোঽপরঃ |
প্রসন্নমাননমুরঃ সমং যত্র সমুন্নতম্ || ১৬২||
লতানিতম্বগৌ হস্তৌ স্থানং জ্ঞেয়ং তদায়তম্ |
দক্ষিণস্তু সমঃ পাদঃ ত্র্যশ্রঃ পক্ষস্থিতোঽপরঃ || ১৬৩||
বামঃ সমুন্নতকটিশ্চায়তে স্থানকে ভবেৎ |
আবাহনে বিসর্গে চ তথা নির্বর্ণনেষু চ || ১৬৪||
চিন্তায়াং চাবহিত্থে চ স্থানমেতৎ প্রয়োজয়েৎ |
রঙ্গাবতরণারম্ভঃ পুষ্পাঞ্জলিবিসর্জনম্ || ১৬৫||
মন্মথের্ষ্যোদ্ভবং কোপং তর্জন্যঙ্গুলিমোটনম্ |
নিষেধগর্বগাম্ভীর্যমৌনং মানাবলম্বনম্ || ১৬৬||
স্থানেঽস্মিন্ সংবিধাতব্যং দিগন্তরনিরূপণম্ |
সমো যত্র স্থিতো বামস্ত্র্যশ্রঃ পক্ষস্থিতোঽপরঃ || ১৬৭||
সমুন্নতকটির্বামস্ত্ববহিত্থং তু তদ্ভবেৎ |
পুরো বিচলিতস্ত্র্যশ্রস্তদন্যোপসৃতঃ সমঃ || ১৬৮||
পাদস্তালান্তরন্যস্তস্ত্রিকমীষৎসমুন্নতম্ |
পাণির্লতাখ্যো যত্রৈকস্তদন্যস্তু নিতম্বগঃ || ১৬৯||
অবহিত্থং সমাখ্যাতং স্থানমাগমভূষণৈঃ |
স্ত্রীণামেতৎ স্মৃতং স্থানং সংলাপে তু স্বভাবজে || ১৭০||
নিশ্চয়ে পরিতোষে চ বিতর্কে চিন্তনে তথা |
বিলাসলীলাবিব্বোকশৃঙ্গারাত্মনিরূপণে || ১৭১||
স্থানমেতৎপ্রয়োক্তব্যং ভর্তুর্মার্গবিলোকনে |
পাদঃ সমস্থিতশ্চৈক একশ্চাগ্রতলাঞ্চিতঃ || ১৭২||
সূচীবিদ্ধমবিদ্ধং বা তদশ্বক্রান্তমুচ্যতে |
স্খলিতং ঘূর্ণিতং চৈব গলিতাম্বরধারণম্ || ১৭৩||
কুসুমস্তবকাদানং পরিরক্ষণমেব চ |
বিত্রাসনং সললিতং তরুশাখাবলম্বনম্ || ১৭৪||
স্থানেঽস্মিন্ সংবিধানীয়ং স্ত্রীণামেতৎপ্রয়োক্তৃভিঃ |
শাখাবলম্বনে কার্যং স্তবকগ্রহণে তথা || ১৭৫||
বিশ্রামেষ্বথ দেবানাং নরাণাং চার্থয়োগতঃ |
স্থানকং তাবদেব স্যাদ্যাবচ্চেষ্টা প্রবর্ততে || ১৭৬||
ভগ্নং চ স্থানকং নৃত্তে চারী চেৎসমুপস্থিতা |
এবং স্থানবিধিঃ কার্যঃ স্ত্রীণাং নৃণামথাপি চ || ১৭৭||
পুনশ্চাসাং প্রবক্ষ্যামি গতিং প্রকৃতিসংস্থিতাম্ |
কৃৎবাবহিত্থং স্থানং তু বামং চাধোমুখং করম্ || ১৭৮||
নাভিপ্রদেশে বিন্যস্য সব্যং চ খটকামুখম্ |
ততঃ সললিতং পাদং তালমাত্রসমুত্থিতম্ || ১৭৯||
দক্ষিণং বামপাদস্য বাহ্যপার্শ্বে বিনিক্ষিপেৎ |
তেনৈব সমকালং চ লতাখ্যং বামকং ভুজম্ || ১৮০||
দক্ষিণং বিনমেৎপার্শ্বং ন্যসেন্নাভিতটে ততঃ |
নিতম্বে দক্ষিণং কৃৎবা হস্তং চোদ্বেষ্ট্য বামকম্ || ১৮১||
ততো বামপদং দদ্যাৎ লতাহস্তং চ দক্ষিণম্ |
লীলয়োদ্বাহিতেনাথ শিরসানুগতেন চ || ১৮২||
কিঞ্চিন্নতেন গাত্রেণ গচ্ছেৎপঞ্চপদীং ততঃ |
যো বিধিঃ পুরুষাণাং তু রঙ্গপীঠপরিক্রমে || ১৮৩||
স এব প্রমদানাং বৈ কর্তব্যো নাট্যয়োক্তৃভিঃ |
ষট্কলং তু ন কর্তব্যং তথাষ্টকলমেব চ || ১৮৪||
পাদস্য পতনং তজ্জ্ঞৈঃ খেদনং তদ্ভবেৎস্ত্রিয়াঃ |
সয়ৌবনানাং নারীণামেবং কার্যা গতির্বুধৈঃ || ১৮৫||
স্থবীয়সীনামেতাসাং সম্প্রবক্ষ্যাম্যহং গতিম্ |
কৃৎবাপবিদ্ধং স্থানন্তু বামং ন্যস্য কটীতটে || ১৮৬||
আদ্যং চারালমুত্তানং কুর্যান্নাভিস্তনান্তরে |
ন নিষণ্ণং ন চ স্তব্ধং ন চাপি পরিবাহিতম্ || ১৮৭||
কৃৎবা গাত্রং ততো গচ্ছেত্তেনৈবেহ ক্রমেণ তু |
প্রেষ্যাণামপি কর্তব্যা গতিরুদ্ভ্রান্তগামিনী || ১৮৮||
ক্বচিদুন্নমিতৈর্গাত্রৈঃ আবিদ্ধভুজবিক্রমা |
স্থানং কৃৎবাবহিত্থং চ বামং চাধোমুখং ভুজম্ || ১৮৯||
নাভিপ্রদেশে বিন্যস্য সব্যং চ খটকামুখম্ |
অর্ধনারীগতিঃ কার্যা স্ত্রীপুংসাভ্যাং বিমিশ্রিতা || ১৯০||
উদাত্তললিতৈর্গাত্রৈঃ পাদৈর্লীলাসমন্বিতৈঃ |
যা পূর্বমেবাভিহিতা হ্যুত্তমানাং গতির্ময়া || ১৯১||
স্ত্রীণাং কাপুরুষাণাং চ ততোঽর্ধার্ধং তু যোজয়েৎ |
মধ্যমোত্তমনীচানাং নৃণাং যদ্ গতিচেষ্টিতম্ || ১৯২||
স্ত্রীণাং তদেব কর্তব্যা ললিতৈঃ পদবিক্রমৈঃ |
বালানামপি কর্তব্যা স্বচ্ছন্দপদবিক্রমা || ১৯৩||
ন তস্যাঃ সৌষ্ঠবং কার্যং ন প্রমাণং প্রয়োক্তৃভিঃ |
তৃতীয়া প্রকৃতিঃ কার্যা নাম্না চৈব নপুংসকা || ১৯৪||
নরস্বভাবমুৎসৃজ্য স্ত্রীগতিং তত্র যোজয়েৎ |
বিপর্যয়ঃ প্রয়োক্তব্যঃ পুরুষস্ত্রীনপুংসকে || ১৯৫||
স্বভাবমাত্মনস্ত্যক্ত্বা তদ্ভাবগমনাদিহ |
ব্যাজেন ক্রীডয়া বাপি তথা ভূয়ং চ বঞ্চনাৎ || ১৯৬||
স্ত্রী পুংসঃ প্রকৃতিং কুর্যাৎ স্ত্রীভাবং পুরুষোঽপি চ |
ধৈর্যোদার্যেণ সত্ত্বেন বুদ্ধ্যা তদ্বচ্চ কর্মণা || ১৯৭||
স্ত্রী পুমাংসং ৎবভিনয়েৎ বেষবাক্যবিচেষ্টিতৈঃ |
স্ত্রীবেষভাষিতৈর্যুক্তং প্রেষিতাপ্রেষিতৈস্তথা || ১৯৮||
মৃদুসন্নগতিশ্চৈব পুমান্ স্ত্রীভাবমাচরেৎ |
জাতিহীনাশ্চ যা নার্যঃ পুলিন্দশবরাঙ্গনাঃ || ১৯৯||
যাশ্চাপি তাসাং কর্তব্যা তজ্জাতিসদৃশী গতিঃ |
ব্রতস্থানাং তপঃস্থানাং লিঙ্গস্থানাং তথৈব চ || ২০০||
খস্থানাং চৈব নারীণাং সমপাদং প্রয়োজয়েৎ |
উদ্ধতা যেঽঙ্গহারাঃ স্যুঃ যাশ্চার্যো মণ্ডলানি চ || ২০১||
তানি নাট্যপ্রয়োগজ্ঞৈর্ন কর্তব্যানি যোষিতাম্ |
তথাসনবিধিঃ কার্যো নৃণাং স্ত্রীণাং বিশেষতঃ || ২০২||
নানাভাবসমায়ুক্তস্তথা চ শয়নাশ্রয়ঃ |
বিষ্কম্ভিতাঞ্চিতৌ পাদৌ ত্রিকং কিঞ্চিৎসমুন্নতম্ || ২০৩||
হস্তৌ কট্যূরুবিন্যস্তৌ স্বস্থে স্যাদুপবেশনে |
পাদঃ প্রসারিতঃ কিঞ্চিদেকশ্চৈবাসনাশ্রয়ঃ || ২০৪||
শিরঃ পার্শ্বনতং চৈব সচিন্ত উপবেশনে |
চিবুকোপাশ্রিতৌ হস্তৌ বাহুশীর্ষাশ্রিতং শিরঃ || ২০৫||
সম্প্রণষ্টেন্দ্রিয়মনাঃ শোকৌৎসুক্যোপবেশনে |
প্রসার্য বাহূ শিথিলৌ তথা শ্রোপাশ্রয়াশ্রিতঃ || ২০৬||
মোহমূর্চ্ছামদগ্লানিবিষাদেষূপবেশয়েৎ |
সর্বপিণ্ডীকৃতাঙ্গস্তু সংযুক্তৈঃ পাদজানুভিঃ || ২০৭||
ব্যাধিব্রীডিতনিদ্রাসু ধ্যানে চোপবিশেন্নরঃ |
তথা চোৎকটিকং স্থানং স্ফিক্পার্ষ্ণীনাং সমাগমঃ || ২০৮||
পিত্র্যে নিবাপে জপ্যে চ সন্ধ্যাস্বাচমনেঽপি চ |
বিষ্কম্ভিতং পুনশ্চৈবং জানুং ভূমৌ নিপাতয়েৎ || ২০৯||
প্রিয়াপ্রসাদনে কার্যং হোমাদিকরণেষু চ |
মহীগতাভ্যাং জানুভ্যামধোমুখমবস্থিতম্ || ২১০||
দেবাভিগমনে চৈব রুষিতানাং প্রসাদনে |
শোকে চাক্রন্দনে তীব্রে মৃতানাং চৈব দর্শনে || ২১১||
ত্রাসনে চ কুসত্ত্বানাং নীচানাং চৈব যাচনে |
হোময়জ্ঞক্রিয়ায়াং চ প্রেষ্যাণাং চৈব কারয়েৎ || ২১২||
মুনীনাং নিয়মেষ্বেষ ভবেদাসনজো বিধিঃ |
তথাসনবিধিঃ কার্যো বিবিধো নাটকাশ্রয়ঃ || ২১৩||
স্ত্রীণাং চ পুরুষাণাং চ বাহ্যশ্চাভ্যন্তরস্তথা |
আভ্যন্তরস্তু নৃপতের্বাহ্যো বাহ্যগতস্য চ || ২১৪||
দেবানাং নৃপতীনাং চ দদ্যাৎ সিংহাসনং দ্বিজঃ |
পুরোধসামমাত্যানাং ভবেদ্বেত্রাসনং তথা || ২১৫||
মুণ্ডাসনং চ দাতব্যং সেনানীয়ুবরাজয়োঃ |
কাষ্ঠাসনং দ্বিজাতীনাং কুমারাণাং কুথাসনম্ || ২১৬||
এবং রাজসভাং প্রাপ্য কার্যস্ত্বাসনজো বিধিঃ |
স্ত্রীণাং চাপ্যাসনবিধিং সম্প্রবক্ষ্যাম্যহং পুনঃ || ২১৭||
সিংহাসনং তু রাজ্ঞীনাং দেবীনাং মুণ্ডমাসনম্ |
পুরোধোঽমাত্যপত্নীনাং দদ্যাদ্বেত্রাসনং তথা || ২১৮||
ভোগিনীনাং তথা চৈব বস্ত্রং চর্ম কুথোঽপি বা |
ব্রাহ্মণীতাপসীনাং চ পট্টাসনমথাপি চ || ২১৯||
বেশ্যানাং চ প্রদাতব্যমাসনং চ ময়ূরকম্ |
শেষাণাং প্রমদানাং তু ভবেদ্ ভূম্যাসনং দ্বিজাঃ || ২২০||
এবমাভ্যন্তরো জ্ঞেয়ো বাহ্যশ্চাসনজো বিধিঃ |
তথা স্বগৃহবার্তাসু চ্ছন্দেনাসনমিষ্যতে || ২২১||
নিয়মস্থমুনীনাং চ ভবেদাসনজো বিধিঃ |
লিঙ্গিনামাসনবিধিঃ কার্যো ব্রতসমাশ্রয়ঃ || ২২২||
ব্রুষীমুণ্ডাসনপ্রায়ং বেত্রাসনমথাপি চ |
হোমে যজ্ঞক্রিয়ায়াং চ পিত্র্যেঽর্থে চ প্রয়োজয়েৎ || ২২৩||
স্থানীয়া যে চ পুরুষাঃ কুলবিদ্যাসমন্বিতাঃ |
তেষামাসনসৎকারঃ কর্ত্তব্য ইহ পার্থিবৈঃ || ২২৪||
সমে সমাসনং দদ্যাৎ মধ্যে মধ্যমমাসনম্ |
অতিরিক্তেঽতিরিক্তং চ হীনে ভূম্যাসনং ভবেৎ || ২২৫||
উপাধ্যায়স্য নৃপতের্গুরূণামগ্রতো বুধৈঃ |
ভূম্যাসনং তথা কার্যমথবা কাষ্ঠমাসনম্ || ২২৬||
নৌনাগরথয়ানেষু ভূমিকাষ্ঠাসনেষু চ |
সহাসনং ন দুষ্যেত গুরূপাধ্যায়পার্থিবৈঃ || ২২৭||
আকুঞ্চিতং সমং চৈব প্রসারিতবিবর্তনে |
উদ্বাহিতং নতং চৈব শয়নে কর্ম কীর্ত্যতে || ২২৮||
সর্বৈরাকুঞ্চিতৈরঙ্গৈঃ শয়্যাবিদ্ধে তু জানুনী |
স্থানমাকুঞ্চিতং নাম শীতার্তানাং প্রয়োজয়েৎ || ২২৯||
উত্তানিতমুখং চৈব স্রস্তমুক্তকরং তথা |
সমং নাম প্রসুপ্তস্য স্থানকং সংবিধীয়তে || ২৩০||
একং ভুজমুপাধায় সম্প্রসারিতজানুকম্ |
স্থানং প্রসারিতং নাম সুখসুপ্তস্য কারয়েৎ || ২৩১||
অধোমুখস্থিতং চৈব বিবর্তিতমিতি স্মৃতম্ |
শস্ত্রক্ষতমৃতোৎক্ষিপ্তমত্তোন্মত্তেষু কারয়েৎ || ২৩২||
অংসোপরি শিরঃ কৃৎবা কর্পূরক্ষোভমেব চ |
উদ্বাহিতং তু বিজ্ঞেয়ং লীলয়া বেশনে প্রভোঃ || ২৩৩||
ঈষৎপ্রসারিতে জঙ্ঘে যত্র স্রস্তৌ করাবুভৌ |
আলস্যশ্রমখেদেষু নতং স্থানং বিধীয়তে || ২৩৪||
গতিপ্রাচারস্তু ময়োদিতোঽযং
নোক্তশ্চ যঃ সোঽর্থবশেন সাধ্যঃ |
অতঃ পরং রঙ্গপরিক্রমস্য
বক্ষ্যামি কক্ষ্যাং প্রবিভাগয়ুক্তাম্ || ২৩৫||

|| ইতি ভরতীয়ে নাট্যশাস্ত্রে গতিপ্রচারো নাম দ্বাদশোঽধ্যায়ঃ ||