নাট্যশাস্ত্রম্ অধ্যায় ০৫



.. নাট্যশাস্ত্রম্ অধ্যায় ৫ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ পূর্বরঙ্গবিধানো নাম পঞ্চমোঽধ্যায়ঃ .

ভরতস্য বচঃ শ্রুৎবা নাট্যসন্তানকারণম্ .
পুনরেবাব্রুবন্বাক্যমৃষয়ো হৃষ্টমানসাঃ .. ১..
যথা নাট্যস্য জন্মেদং জর্জরস্য চ সম্ভবঃ .
বিঘ্নানাং শমনং চৈব দৈবতানাং চ পূজনম্ .. ২..
তদস্মাভিঃ শ্রুতং সর্বং গৃহীৎবা চাবধারিতম্ .
নিখিলেন যথাতত্ত্বমিচ্ছামো বেদিতুং পুনঃ .. ৩..
পূর্বরঙ্গং মহাতেজঃ সর্বলক্ষণসংযুতম্ .
যথা বুদ্ধ্যামহে ব্রহ্মংস্তথা ব্যাখ্যাতুমর্হসি .. ৪..
তেষাং তু বচনং শ্রুৎবা মুনীনাং ভরতো মুনিঃ .
প্রত্যুবাচ পুনর্বাক্যং পূর্বরঙ্গবিধিং প্রতি .. ৫..
পূর্বরঙ্গং মহাভাগা গদতো মে নিবোধত .
পাদভাগাঃ কলাশ্চৈব পরিবর্তাস্তথৈব চ .. ৬..
যস্মাদ্রঙ্গে প্রয়োগোঽযং পূর্বমেব প্রয়ুজ্যতে .
তস্মাদয়ং পূর্বরঙ্গো বিজ্ঞেয়ো দ্বিজসত্তমাঃ .. ৭..
অস্যাঙ্গানি তু কার্যাণি যথাবদনুপূর্বশঃ .
তন্ত্রীভাণ্ডসমায়োঅগৈঃ পাঠ্যয়োগকৃতৈস্তথা .. ৮..
প্রত্যাহারোঽবতরণং তথা হ্যারম্ভ এব চ .
আশ্রাবণা বক্ত্রপাণিস্তথা চ পরিঘট্টনা .. ৯..
সঙ্ঘোটনা ততঃ কার্যা মার্গাসারিতমেব চ .
জ্যেষ্ঠমধ্যকনিষ্ঠানি তথৈবাসারতানি চ .. ১০..
এতাঅনি তু বহির্গীতান্যন্তর্যবনিকাগতৈঃ .
প্রয়োক্তৃভিঃ প্রয়োজ্যানি তন্ত্রীভাণ্ডকৃতানি চ ..১১..
ততঃ সর্বৈস্তু কুতপৈঃ সংযুক্তানীহ কারয়েৎ .
বিঘট্য বৈ যবনিকাং নৃত্তপাঠ্যকৃতানি তু .. ১২..
গীতানাং মদ্রকাদীনাং যোজ্যমেকং তু গীতকম্ .
বর্ধমানমথাপীহ তাণ্ডবং যত্র যুজ্যতে .. ১৩..
ততশ্চোত্থাপনং কার্যং পরিবর্তনমেব চ .
নান্দী শুষ্কাবকৃষ্টা চ রঙ্গদ্বারং তথৈব চ .. ১৪..
চারি চৈব ততঃ কার্যা মহাচারী তথৈব চ .
ত্রিকং প্ররোচনাং চাপি পূর্বরঙ্গে ভবন্তি হি .. ১৫..
এতান্যঙ্গানি কার্যাণি পূর্বরঙ্গবিধৌ দ্বিজাঃ .
এতেষাং লক্ষণমহং ব্যাখ্যাস্যাম্যনুপূর্বশঃ .. ১৬..
কুতপস্য তু বিন্যাসঃ প্রত্যাহার ইতি স্মৃতঃ .
তথাবতরণং প্রোক্তং গায়িকানাং নিবেশনম্ .. ১৭..
পরিগীতক্রিয়ারম্ভ আরম্ভ ইতি কীর্তিতঃ .
আতোদ্যরঞ্জনার্থং তু ভবেদাশ্রাবণাবিধিঃ .. ১৮..
বাদ্যবৃত্তিবিভাগার্থং বক্ত্রপাণির্বিধীয়তে .
তন্ত্র্যোজঃকরণার্থং তু ভবেচ্চ পরিঘট্টনা .. ১৯..
তথা পাণিবিভাগার্থং ভবেৎসংঘোটনাবিধিঃ .
তন্ত্রীভাণ্ডসমায়োগান্মার্গাসারিতমিষ্যতে .. ২০..
কলাপাতবিভাগার্থং ভবেদাসারিতক্রিয়া .
কীর্তনাদ্দেবতানাং চ জ্ঞেয়ো গীতবিধিস্তথা .. ২১..
[অতঃ পরং প্রবক্ষ্যমি হ্যুত্থাপনবিধিক্রিয়াম্ .]
যস্মাদুত্থাপয়ন্ত্যত্র প্রয়োগং নান্দিপাঠকাঃ .
পূর্বমেব তু রঙ্গেঽস্মিংস্তস্মাদুত্থাপনং স্মৃতম্ .. ২২..
যস্মাচ্চ লোকপালানাং পরিবৃত্য চতুর্দিশম্ .
বন্দনানি প্রকুর্বন্তি তস্মাচ্চ পরিবর্তনম্ .. ২৩..
আশীর্বচনসংযুক্তা নিত্যং যস্মাৎপ্রয়ুজ্যতে .
দেবদ্বিজনৃপাদীনাং তস্মান্নান্দীতি সংজ্ঞিতা .. ২৪..
অত্র শুষ্কাক্ষরৈরেব হ্যবকৃষ্টা ধ্রুবা যতঃ .
তস্মাচ্ছুষ্কাবকৃষ্টেয়ং জর্জরশ্লোকদর্শিতা .. ২৫..
যস্মাদভিনয়স্ত্বত্র প্রথমং হ্যবতার্যতে .
রঙ্গদ্বারমতো জ্ঞেয়ং বাগঙ্গাভিনয়াত্মকম্ .. ২৬..
শৃঙ্গারস্য প্রচরণাচ্চারী সম্পরিকীর্তিতা .
রৌদ্রপ্রচরণাচ্চাপি মহাচারীতি কীর্তিতা .. ২৭..
বিদূষকঃ সূত্রধারস্তথা বৈ পারিপার্শ্বকঃ .
যত্র কুর্বন্তি সঞ্জল্পং তচ্চাপি ত্রিগতং মতম্ .. ২৮..
উপক্ষেপেণ কাব্যস্য হেতুয়ুক্তিসমাশ্রয়া .
সিদ্ধেনামন্ত্রণা যা তু বিজ্ঞেয়া স প্ররোচনা .. ২৯..
অতঃ পরং প্রবক্ষ্যামি হ্যাশ্রাবণবিধিক্রিয়াম্ .
বহির্গীতবিধৌ সম্যগুৎপত্তিং কারণং তথা .. ৩০..
চিত্রদক্ষিণবৃতৌ তু সপ্তরূপে প্রবর্তিতে .
সোপোহনে সনির্গীতে দেবস্তুত্যভিনন্দিতে .. ৩১..
নারদাদ্যৈস্তু গন্ধর্বৈঃ সভায়াং দেবদানবাঃ .
নির্গীতং শ্রাবিতাঃ সম্যগ্লয়তালসমন্বিতম্ .. ৩২..
তচ্ছ্রুৎবা তু সুখং গানং দেবস্তুত্যভিনন্দিতম্
অভবন্ক্ষুভিতাঃ সর্বে মাৎসর্যাদ্দৈত্যরাক্ষসাঃ .. ৩৩..
সম্প্রধার্য চ তেঽন্যোন্যমিত্যবোচন্নবস্থিতাঃ .
নির্গীতং তু সবাদিত্রমিদং গৃহ্ণীমহে বয়ম্ ..৩৪..
সপ্তরূপেণ সন্তুষ্টা দেবাঃ কর্মানুকীর্তনাৎ .
বয়ং গৃহ্ণীম নির্গীতং তুষ্যামোঽত্রৈব সর্বদা .. ৩৫..
তে তত্র তুষ্টা দৈত্যাস্তু সাধয়ন্তি পুনঃ পুনঃ .
রুষ্টাশ্চাপি ততো দেবাঃ প্রত্যভাষন্ত নারদম্ .. ৩৬..
এতে তুষ্যন্তি নির্গীতে দানবা সহ রাক্ষসৈঃ .
প্রণশ্যতু প্রয়োগোঽযং কথং বা মন্যতে ভবান্ .. ৩৭..
দেবানাং বচনং শ্রুৎবা নারদো বাক্যমব্রবীৎ .
ধাতুবাদ্যাশ্রয়কৃতং নির্গীতং মা প্রণশ্যতু .. ৩৮..
কিন্তূপোহনসংযুক্তং ধাতুবাদ্যবিভূষিতম্ .
ভবিষ্যতীদং নির্গীতং সপ্তরূপবিধানতঃ .. ৩৯..
নির্গীতেনাববদ্ধাশ্চ দৈত্যদানবরাক্ষসাঃ .
ন ক্ষোভং ন বিঘাতং চ করিষ্যন্তীহ তোষিতাঃ .. ৪০..
এবং নির্গীতমেতত্তু দৈত্যানাং স্পর্ধয়া দ্বিজাঃ .
দেবানাং বহুমানেন বহির্গীতমিতি স্মৃতম্ .. ৪১..
ধাতুভিশ্চিত্রবীণায়াং গুরুলঘ্বক্ষরান্বিতম্ .
বর্ণালঙ্কারসংযুক্তং প্রয়োক্তব্যং বুধৈরথ.. ৪২..
নির্গীতং গেয়তে যস্মাদপদং বর্ণয়োজনাৎ .
অসূয়য়া চ দেবানাং বহির্গীতমিদং স্মৃতম্ ..৪৩..
নির্গীতং যন্ময়া প্রোক্তং সপ্তরূপসমন্বিতম্ .
উত্থাপনাদিকং যচ্চ তস্য কারণমুচ্যতে .. ৪৪..
আশ্রাবণায়াং যুক্তায়াং দৈত্যাস্তুষ্যন্তি নিত্যশঃ .
বক্ত্রপাণৌ কৃতে চৈব নিত্যং তুষ্যন্তি দানবাঃ .. ৪৫..
পরিঘট্টনয়া তুষ্টা যুক্তায়াং রাক্ষসাং গণাঃ .
সঙ্ঘোটনক্রিয়ায়াং চ তুষ্যন্ত্যপি চ গুহ্যকাঃ .. ৪৬..
মার্গাসারিতমাসাদ্য তুষ্টা যক্ষা ভবন্তি হি .
গীতকেষু প্রয়ুক্তেষু দেবাস্তুষ্যন্তি নিত্যশঃ ..৪৭..
বর্ধমানে প্রয়ুক্তে তু রুদ্রস্তুষ্যতি সানুগঃ .
তথা চোত্থাপনে যুক্তে ব্রহ্মা তুষ্টো ভবেদিহ .. ৪৮..
তুষ্যন্তি লোকপালাশ্চ প্রয়ুক্তে পরিবর্তনে .
নান্দীপ্রয়োগেঽথ কৃতে প্রীতো ভবতি চন্দ্রমাঃ .. ৪৯..
যুক্তায়ামবকৃষ্টায়াং প্রীতা নাগা ভবন্তি হি .
তথা শুষ্কাবকৃষ্টায়াং প্রীতঃ পিতৃগণো ভবেৎ ..৫০..
রঙ্গদ্বারে প্রয়ুক্তে তু বিষ্ণুঃ প্রীতো ভবেদিহ .
জর্জরস্য প্রয়োগে তু তুষ্টা বিঘ্নবিনায়কাঃ .. ৫১..
তথা চার্যা প্রয়ুক্তায়ামুমা তুষ্টা ভবেদিহ .
মহাচার্যা প্রয়ুক্তায়াং তুষ্টো ভূতগণো ভবেৎ .. ৫২..
আশ্রাবণাদিচার্যন্তমেতদ্দৈবতপূজনম্ .
পূর্বরঙ্গে ময়া খ্যাতং তথা চাঙ্গবিকল্পনম্ .. ৫৩..
দেবস্তুষ্যন্তি যো যেন যস্য যন্মনসঃ প্রিয়ম্ .
তত্তথা পূর্বরঙ্গে তু ময়া প্রোকং দ্বিজোত্তমাঃ .. ৫৪..
সর্বদৈবতপূজার্হং সর্বদৈবতপূজনম্ .
ধন্যং যশস্যমায়ুষ্যং পূর্বরঙ্গপ্রবর্তনম্ ..৫৫..
দৈত্যদানবতুষ্ট্যর্থং সর্বেষাং চ দিবৌকসাম্ .
নির্গীতানি সগীতানি পূর্বরঙ্গকৃতানি তু .. ৫৬..
[যা বিদ্যা যানি শিল্পানি যা গতির্যশ্চ চেষ্টিতম্ .
লোকালোকস্য জগতস্তদস্মিন্নাটকাশ্রয়ে .. ]
নির্গীতানাং সগীতানাং বর্ধমানস্য চৈব হি .
ধ্রুবাবিধানে বক্ষ্যামি লক্ষণং কর্ম চৈব হি .. ৫৭..
প্রয়ুজ্য গীতকবিধিং বর্ধমানমথাপি চ .
গীতকান্তে ততশ্চাপি কার্যা হ্যুত্থাপনী ধ্রুবা .. ৫৮..
অদৌ দ্বে চ চতুর্থং চাপ্যষ্টমৈকাদশে তথা .
গুর্বক্ষরাণি জানীয়ৎপাদে হ্যেকাদশে তথা .. ৫৯..
চতুষ্পদা ভবেৎসা তু চতুরশ্রা তথৈব চ .
চতুর্ভিস্সন্নিপাতৈশ্চ ত্রিলয়া ত্রিয়তিস্তথা .. ৬০..
পরিবর্তাশ্চ চৎবারঃ পাণয়স্ত্রয় এব চ .
জাত্যা চৈব হি বিশ্লোকা তাং চ তালেন যোজয়েৎ .. ৬১..
শম্যা তু দ্বিকলা কার্যা তলো দ্বিকল এব চ .
পুনশ্চৈককলা শম্যা সন্নিপাতঃ কলাত্রয়ম্ .. ৬২..
এবমষ্টকলঃ কার্যঃ সন্নিপাতো বিঅচক্ষণৈঃ .
চৎবারঃ সন্নিপাতাশ্চ পরিবর্তঃ স উচ্যতে .. ৬৩..
পূর্বং স্থিতলয়ঃ কার্যঃ পরিবর্তো বিচক্ষণৈঃ .
তৃতীয়ে সন্নিপাতে তু তস্যা ভাণ্ডগ্রহো ভবেৎ .. ৬৪..
একস্মিন্পরিবর্তে তু গতে প্রাপ্তে দ্বিতীয়কে .
কার্যং মধ্যলয়ে তজ্জ্ঞৈঃ সূত্রধারপ্রবেশনম্ .. ৬৫..
পুষ্পাঞ্জলিং সমাদায় রক্ষামঙ্গলসংস্কৃতাঃ .
শুদ্ধবস্ত্রাঃ সুমনসস্তথা চাদ্ভুতদৃষ্টয়ঃ .. ৬৬..
স্থানন্তু বৈষ্ণবং কৃৎবা সৌষ্ঠবাঙ্গপুরস্কৃতম্ .
দীক্ষিতাঃ শুচয়শ্চৈব প্রবিশেয়ুঃ সমং ত্রয়ঃ .. ৬৭..
ভৃঙ্গারজর্জরধরৌ ভবেতাং পারিপার্শ্বিকৌ .
মধ্যে তু সূত্রভৃত্তাভ্যাং বৃত্তঃ পঞ্চপদীং ব্রজেৎ .. ৬৮..
পদানি পঞ্চ গচ্ছেয়ুর্ব্রহ্মণো যজনেচ্ছয়া .
পদানাঞ্চাপি বিক্ষেপং ব্যাখ্যাস্যাম্যনুপূর্বশঃ .. ৬৯..
ত্রিতালান্তরবিষ্কম্ভমুৎক্ষিপেচ্চরণং শনৈঃ
পার্শ্বোত্থানোত্থিতং চৈব তন্মধ্যে পাতয়েৎপুনঃ .. ৭০..
এবং পঞ্চপদীং গৎবা সূত্রধারঃ সহেতরঃ .
সূচীং বামপদে দদ্যাদ্বিক্ষেপং দক্ষিণেন চ .. ৭১..
পুষ্পাঞ্জল্যপবর্গশ্চ কার্যো ব্রাহ্মেঽথ মণ্ডলে .
রঙ্গপীঠস্য মধ্যে তু স্বয়ং ব্রহ্মা প্রতিষ্ঠিতঃ .. ৭২..
ততঃ সললিতৈর্হস্তৈরভিবন্দ্য পিতামহম্ .
অভিবাদানি কার্যাণি ত্রীণি হস্তেন ভূতলে .. ৭৩..
কালপ্রকর্ষহেতোশ্চ পাদানাং প্রবিভাগতঃ .
সূত্রধারপ্রবেশাদ্যো বন্দনাভিনয়ান্তকঃ .. ৭৪..
দ্বিতীয়ঃ পরিবর্তস্তু কার্যো মধ্যলয়াশ্রিতঃ .
ততঃ পরং তৃতীয়ে তু মণ্ডলস্য প্রদক্ষিণম্ ..৭৫..
ভবেদাচমনং চৈব জর্জরগ্রহণং তথা .
উত্থায় মণ্ডলাত্তূর্ণং দক্ষিণং পাদমুদ্ধরেৎ ..৭৬..
বেধং তেনৈব কুর্বীত বিক্ষেপং বামকেন চ .
পুনশ্চ দক্ষিণং পাদং পার্শ্বসংস্থং সমুদ্ধরেৎ .. ৭৭..
ততশ্চ বামবেধস্তু বিক্ষেপো দক্ষিণস্য চ .
ইত্যনেন বিধানেন সম্যক্কৃৎবা প্রদিক্ষণম্ .. ৭৮..
ভৃঙ্গারভৃতমাহূয় শৌচং চাপি সমাচরেৎ .
যথান্যায়ং তু কর্তব্যা তেন হ্যাচমনক্রিয়া .. ৭৯..
আত্মপ্রোক্ষণমেবাদ্ভিঃ কর্তব্যং তু যথাক্রমম্ .
প্রয়ত্নকৃতশৌচেন সূত্রধারেণ যত্নতঃ .. ৮০..
সন্নিপাতসমং গ্রাহ্যো জর্জরো বিঘ্নজর্জরঃ .
প্রদক্ষিণাদ্যো বিজ্ঞেয়ো জর্জরগ্রহণান্তকঃ ..৮১..
তৃতীয়ঃ পরিবর্তস্তু বিজ্ঞেয়ো বৈ দ্রুতে লয়ে .
গৃহীৎবা জর্জরং ৎবষ্টৌ কলা জপ্যং প্রয়োজয়েৎ .. ৮২..
বামবেধং ততঃ কুর্যাদ্বিক্ষেপং দক্ষিণস্য চ .
ততঃ পঞ্চপদীং চৈব গচ্ছেত্তু কুতপোন্মুখঃ .. ৮৩..
বামবেধস্তু তত্রাপি বিক্ষেপো দক্ষিণস্য তু .
জর্জরগ্রহণাদ্যোঽযং কুতপাভিমুখান্তকঃ .. ৮৪..
চতুর্থঃ পরিবর্তস্তু কার্যো দ্রুতলয়ে পুনঃ .
করপাদনিপাতাস্তু ভব্ন্ত্যত্র তু ষোডশ .. ৮৫..
ত্র্যশ্রে দ্বাদশ পাতাস্তু ভবন্তি করপাদয়োঃ .
বন্দনান্যথ কার্যাণি ত্রীণি হস্তেন ভূতলে .. ৮৬..
আত্মপ্রোক্ষণমদ্ভিশ্চ ত্র্যশ্রে নৈব বিধীয়তে .
এবমুত্থাপনং কার্যং ততস্তু পরিবর্তনম্ .. ৮৭..
চতুরশ্রং লয়ে মধ্যে সন্নিপাতৈরথাষ্টভিঃ .
যস্যা লঘূনি সর্বাণি কেবলং নৈধনং গুরু .. ৮৮..
ভবেদতিজগত্যান্তু সা ধ্রুবা পরিবর্তনী .
বার্তিকেন তু মার্গেণ বাদ্যেনানুগতেন চ .. ৮৯..
ললিতৈঃ পাদবিন্যাসৈর্বন্দ্যা দেবা যথাদিশম্ .
দ্বিকলং পাঅদপতনং পাদচার্যা গতং ভবেৎ . ৯০..
বামপাদেন বেধস্তু কর্তব্যো নৃত্তয়োক্তৃভিঃ .
দ্বিতালান্তরবিষ্কম্ভো বিক্ষেপো দক্ষিণস্য চ .. ৯১..
ততঃ পঞ্চপদীং গচ্ছেদতিক্রান্তৈঃ পদরথ .
ততোঽভিবাদনং কুর্যাদ্দেবতানাং যথাদিশম্ ..৯২..
বন্দেত প্রথমং পূর্বাং দিশং শক্রাধিদৈবতাম্ .
দ্বিতীয়াং দক্ষিণামাশাং বন্দেত যমদেবতাম্ .. ৯৩..
বন্দেত পশ্চিমামাশাং ততো বরুণদৈবতাম্ .
চতুর্থীমুত্তরামাশাং বন্দেত ধনদাশ্রয়াম্ .. ৯৪..
দিশাং তু বন্দনং কৃৎবা বামবেধং প্রয়োজয়েৎ .
দক্ষিণেন চ কর্তব্যং বিক্ষেপপরিবর্তনম্ ..৯৫..
প্রাঙ্গ্মুখস্তু ততঃ কুর্যাৎপুরুষস্ত্রীনপুংসকৈঃ .
ত্রিপদ্যা সূত্রভৃদ্রুদ্রব্রহ্মোপেন্দ্রাভিবাদনম্ .. ৯৬..
দক্ষিণং তু পদং পুংসো বামং স্ত্রীণাং প্রকীর্তিতম্ .
পুনর্দক্ষিণমেব স্যান্নাত্যুৎক্ষিপ্তং নপুংসকম্ .. ৯৭..
বন্দেত পৌরুষেণেশং স্ত্রীপদেন জনার্দনম্ .
নপুংসক্পদেনাপি তথৈবাম্বুজসম্ভবম্ .. ৯৮..
পরিবর্তনমেবং স্যাত্তস্যান্তে প্রবিশেত্ততঃ .
চতুর্থকারঃ পুষ্পাণি প্রগৃহ্য বিধিপূর্বকম্ .. ৯৯..
যথাবত্তেন কর্তব্যং পূজনং জর্জরস্য তু .
কুতপস্য চ সর্বস্য সূত্রধারস্য চৈব হি .. ১০০..
তস্য ভাণ্ডসমঃ কার্যস্তজ্জ্ঞৈর্গতিপরিক্রমঃ .
ন তত্র গানং কর্তব্যং তত্র স্তোভক্রিয়া ভবেৎ .. ১০১..
চতুর্থকারঃ পূজাং তু স কৃৎবান্তর্হিতো ভবেৎ .
ততো গেয়াবকৃষ্টা তু চতুরশ্রা স্থিতা ধ্রুবা .. ১০২..
গুরুপ্রায়া তু সা কার্যা তথা চৈবাবপাণিকা .
স্থায়িবর্ণাশ্রয়োপেতা কলাষ্টকবিনির্মিতা .. ১০৩..
[চতুর্থং পঞ্চমং চৈব সপ্তমং চাষ্টমং তথা .
লঘূনি পাদে পঙ্ক্ত্যান্তু সাবকৃষ্টা ধ্রুবা স্মৃতা .. ]
সূত্রধারঃ পঠেত্তত্র মধ্যমং স্বরমাশ্রিতঃ .
নান্দীং পদৈর্দ্বাদশভিরষ্টভির্বাঽপ্যলঙ্কৃতাম্ .. ১০৪..
নমোঽস্তু সর্বদেবেভ্যো দ্বিজাতিভ্যঃ শুভং তথা .
জিতং সোমেন বৈ রাজ্ঞা শিবং গোব্রাহ্মণায় চ .. ১০৫..
ব্রহ্মোত্তরং তথৈবাস্তু হতা ব্রহ্মদ্বিষস্তথা .
প্রশাস্ত্বিমাং মহারাজঃ পৃথিবীং চ সসাগরাম্ .. ১০৬..
রাষ্ট্রং প্রবর্ধতাং চৈব রঙ্গস্যাশা সমৃদ্ধ্যতু .
প্রেক্ষাকর্তুর্মহান্ধর্মো ভবতু ব্রহ্মভাষিতঃ .. ১০৭..
কাব্যকর্তুর্যশশ্চাস্তু ধর্মশ্চাপি প্রবর্ধতাম্ .
ইজ্যয়া চানয়া নিত্যং প্রীয়ন্তাং দেবতা ইতি .. ১০৮..
নান্দীপদান্তরেষ্বেষু হ্যেবমার্যেতি নিত্যশঃ .
বদেতাং সম্যগুক্তাভির্বাগ্ভিস্তৌ পারিপার্শ্বিকৌ .. ১০৯..
এবং নান্দী বিধাতব্যা যথাবল্লক্ষণান্বিতা .
ততশ্শুষ্কাবকৃষ্টা স্যাজ্জর্জরশ্লোকদর্শিকা .. ১১০..
নবং গুর্বাক্ষরাণ্যাদৌ ষড্লঘূনি গুরুত্রয়ম্ .
শুষ্কাবকৃষ্টা তু ভবেৎকলা হ্যষ্টৌ প্রমাণতঃ .. ১১১..
যথা –
দিগ্লে দিগ্লে দিগ্লে দিগ্লে জম্বুকপলিতকতে তেচাম্ .
কৃৎবা শুষ্কাবকৃষ্টাং তু যথাবদ্দ্বিজসত্তমাঃ .. ১১২..
ততঃ শ্লোকং পঠেদেকং গম্ভীরস্বরসংযুতম্ .
দেবস্তোত্রং পুরস্কৃত্য যস্য পূজা প্রবর্ততে .. ১১৩..
রাজ্ঞো বা যত্র ভক্তিঃ স্যাদথ বা ব্রহ্মণস্স্তবম্ .
গদিৎবা জর্জরশ্লোকং রঙ্গদ্বারে চ যৎস্মৃতম্ .. ১১৪..
পঠেদন্যং পুনঃ শ্লোকং জর্জরস্য বিনাশনম্ .
জর্জরং নময়িৎবা তু ততশ্চারীং প্রয়োজয়েৎ .. ১১৫..
পারিপার্শ্বিকয়োশ্চ স্যাৎপশ্চিমেনাপসর্পণম্ .
অঙ্কিতা চাত্র কর্তব্যা ধ্রুবা মধ্যলয়ান্বিতা .. ১১৬..
চতুর্ভিঃ সন্নিপাতৈশ্চ চতুরশ্রা প্রমাণতঃ .
আদ্যমন্ত্যং চতুর্থং চ পঞ্চমং চ তথা গুরু .. ১১৭..
যস্যাং হ্রস্বানি শেষাণি সা জ্ঞেয়া ৎবঙ্কিতা বুধৈঃ .
অস্যাঃ প্রয়োগং বক্ষ্যামি যথা পূর্বং মহেশ্বরঃ .. ১১৮..
সহোময়া ক্রীডিতবান্নানাভাববিচেষ্টতৈঃ .
কৃৎবাঽবহিত্থং স্থানং তু বামং চাধোমুখং ভুজম্ .. ১১৯..
চতুরশ্রমুরঃ কার্যমঞ্চিতশ্চাপি মস্তকঃ .
নাভিপ্রদেশে বিন্যস্য জর্জরং চ তুলাধৃতম্ .. ১২০..
বামপল্লবহস্তেন পাদৈস্তালান্তরোত্থিতৈঃ .
গচ্ছেৎপঞ্চপদীং চৈব সবিলাসাঙ্গচেষ্টিতৈঃ .. ১২১..
বামবেধস্তু কর্তব্যো বিক্ষেপো দক্ষিণস্য চ .
শৃঙ্গাররসসংযুক্তাং পঠেদার্যাং বিচক্ষণঃ .. ১২২..
চারীশ্লোকং গদিৎবা তু কৃৎবা চ পরিবর্তনম্ .
তৈরেব চ পদঃ কার্যং পশ্চিমেনাপসর্পণম্ .. ১২৩..
পারিপার্শ্বিকহস্তে তু ন্যস্য জর্জরমুত্তমম্ .
মহাচারীং ততশ্চৈব প্রয়ুঞ্জীত যথাবিধি .. ১২৪..
চতুরশ্রা ধ্রুবা তত্র তথা দ্রুতলয়ান্বিতা .
চতুর্ভিস্সন্নিপাতৈশ্চ কলা হ্যষ্টৌ প্রমাণতঃ .. ১২৫..
আদ্যং চতুর্থমন্ত্যং চ সপ্তমং দশমং গুরু .
লঘু শেষং ধ্রুবাপাদে চতুর্বিংশতিকে ভবেৎ .. ১২৬..
(যথা-)
পাদতলাহতিপাতিতশৈলং
ক্ষোভিতভূতসমগ্রসমুদ্রম্ .
তাণ্ডবনৃত্যমিদং প্রলয়ান্তে
পাতু জগৎসুখদায়ি হরস্য .. ১২৭..
ভাণ্ডোন্মুখেন কর্তব্যং পাদবিক্ষেপণং ততঃ .
সূচীং কৃৎবা পুনঃ কুর্যাদ্বিক্ষেপপরিবর্তনম্ .. ১২৮..
অতিক্রান্তৈঃ সললিতৈঃ পাদৈর্দ্রুতলয়ান্বিতৈঃ .
ত্রিতালান্তরমুৎক্ষেপৈর্গচ্ছেৎপঞ্চপদীং ততঃ .. ১২৯..
তত্রাপি বামবেধস্তু বিক্ষেপো দক্ষিণস্য চ .
তৈরেব চ পদৈঃ কার্যং প্রাঙ্মুখেনাপসর্পণম্ .. ১৩০..
পুনঃ পদানি ত্রীণ্যেব গচ্ছেৎপ্রাঙ্মুখ এব তু .
ততশ্চ বামবেধঃ স্যাদ্বিক্ষেপো দক্ষিণস্য চ .. ১৩১..
ততো রৌদ্ররসং শ্লোকং পাদসংহরণং পঠেৎ .
তস্যান্তে তু ত্রিপদ্যাথ ব্যাহরেৎপারিপার্শ্বিকৌ .. ১৩২..
তয়োরাগমনে কার্যং গানং নর্কুটকং বুধৈঃ .
তথা চ ভারতীভেদে ত্রিগতং সম্প্রয়োজয়েৎ .. ১৩৩..
বিদূষকস্ত্বেকপদাং সুত্রধারস্মিতাবহাম্ .
অসম্বদ্ধকথাপ্রায়াং কুর্যাৎকথনিকা ততঃ .. ১৩৪..
(বিতণ্ডাং গণ্ডসংযুক্তাং তালিকাঞ্চ প্রয়োজয়েৎ .
কস্তিষ্ঠতি জিতং কেনেত্যাদিকাব্যপ্ররূপিণীম্ ..
পারিপার্শ্বকসঞ্জল্পো বিদূষকবিরূপিতঃ .
স্থাপিতঃ সূত্রধারেণ ত্রিগতং সম্প্রয়ুজ্যতে ..)
প্ররোচনা চ কর্তব্যা সিদ্ধেনোপনিমত্রণম্ .
রঙ্গসিদ্ধৌ পুনঃ কার্যং কাব্যবস্তুনিরূপণম্ .. ১৩৫..
সর্বমেব বিধিং কৃৎবা সূচীবেধকৃতৈরথ .
পাদৈরনাবিদ্ধগতৈর্নিষ্ক্রামেয়ুঃ সমং ত্রয়ঃ .. ১৩৬..
এবমেষ প্রয়োক্তব্যঃ পূর্বরঙ্গো যথাবিধি .
চতুরশ্রো দ্বিজশ্রেষ্ঠাস্ত্র্যশ্রং চাপি নিবোধত .. ১৩৭..
অয়মেব প্রয়োগঃ স্যাদঙ্গান্যেতানি চৈব হি .
তালপ্রমাণং সংক্ষিপ্তং কেবলং তু বিশেষকৃৎ .. ১৩৮..
শম্যা তু দ্বিকলা কার্যা তালো হ্যেককলস্তথা .
পুনশ্চৈককলা শম্যা সন্নিপাতঃ কলাদ্বয়ম্ .. ১৩৯..
অনেন হি প্রমাণেন কলাতাললয়ান্বিতঃ .
কর্তব্যঃ পূর্বরঙ্গস্তু ত্র্যশ্রোঽপ্যুত্থাপনাদিকঃ .. ১৪০..
আদ্যং চতুর্থং দশমমষ্টমং নৈধনং গুরু .
যস্যাস্তু জাগতে পাদে সা ত্র্যশ্রোত্থাপিনী ধ্রুবা .. ১৪১..
বাদ্যং গতিপ্রচারশ্চ ধ্রুবা তালস্তথৈব চ .
সংক্ষিপ্তান্যেব কার্যাণি ত্র্যশ্রে নৃত্তপ্রবেদিভিঃ .. ১৪২..
বাদ্যগীতপ্রমাণেন কুর্যাদঙ্গবিচেষ্টিতম্ .
বিস্তীর্ণমথ সংক্ষিপ্তং দ্বিপ্রমাণবিনির্মিতম্ .. ১৪৩..
হস্তপাদপ্রচারস্তু দ্বিকলঃ পরিকীর্তিতঃ .
চতুরশ্রে পরিক্রান্তে পাতাঃ স্যুঃ ষোডশৈব তু .. ১৪৪..
ত্র্যশ্রে দ্বাদশ পাতাস্তু ভবন্তি করপাদয়োঃ .
এতৎপ্রমাণং বিজ্ঞেয়মুভয়োঃ পূর্বরঙ্গয়োঃ .. ১৪৫..
কেবলং পরিবর্তে তু গমনে ত্রিপদী ভবেৎ .
দিগ্বন্দনে পঞ্চপদী চতুরশ্রে বিধীয়তে .. ১৪৬..
আচার্যবুদ্ধ্যা কর্তব্যস্ত্র্যশ্রস্তালপ্রমাণতঃ .
তস্মান্ন লক্ষণং প্রোক্তং পুনরুক্তং ভবেদ্যতঃ .. ১৪৭..
এবমেষ প্রয়োক্তব্যঃ পূর্বরঙ্গো দ্বিজোত্তমাঃ .
ত্র্যশ্রশ্চ চতুরশ্রশ্চ শুদ্ধো ভারত্যুপাশ্রয়ঃ .. ১৪৮..
এবং তাবদয়ং শুদ্ধঃ পূর্বরঙ্গো ময়োদিতঃ .
চিত্রৎবমস্য বক্ষ্যামি যথাকার্যং প্রয়োক্তৃভিঃ .. ১৪৯..
বৃত্তে হ্যুত্থাপনে বিপ্রাঃ কৃতে চ পরিবর্তনে .
চতুর্থকারদত্তাভিঃ সুমনোভিরলঙ্কৃতে .. ১৫০..
উদাত্তৈর্গানৈর্গন্ধর্বৈঃ পরিগীতে প্রমাণতঃ .
দেবদুন্দুভয়শ্চৈব নিনদৈয়ুর্ভৃশং যতঃ .. ১৫১..
সিদ্ধাঃ কুসুমমালাভির্বিকিরেয়ুঃ সমন্ততঃ .
অঙ্গহারৈশ্চ দেব্যস্তা উপনৃত্যেয়ুরগ্রতঃ .. ১৫২..
যস্তাণ্ডববিধিঃ প্রোক্তো নৃতে পিণ্ডীসমন্বিতঃ .
রেচকৈরঙ্গহারৈশ্চ ন্যাসোপন্যাসসংযুতঃ .. ১৫৩..
নান্দীপদানাং মধ্যে তু একৈকস্মিন্পৃথক্পৃথক্ .
প্রয়োক্তব্যো বুধৈঃ সম্যক্চিত্রভাবমভীপ্সুভিঃ .. ১৫৪..
এবং কৃৎবা যথান্যায়ং শুদ্ধং চিত্রং প্রয়ত্নতঃ .
ততঃপরং প্রয়ুঞ্জীত নাটকং লক্ষণান্বিতম্ .. ১৫৫..
ততস্ত্বন্তর্হিতাঃ সর্বা ভবেয়ুর্দিব্যয়োষিতঃ .
নিষ্ক্রান্তাসু চ সর্বাসু নর্তকীষু ততঃ পরম্ .. ১৫৬..
পূর্বরঙ্গে প্রয়োক্তব্যমঙ্গজাতমতঃপরম্ .
এবং শুদ্ধো ভবেচ্চিত্রঃ পূর্বরঙ্গো বিধানতঃ .. ১৫৭..
কার্যো নাতিপ্রসঙ্গোঽত্র নৃতাগীতবিধিং প্রতি .
গীতে বাদ্যে চ নৃত্তে চ প্রবৃত্তেঽতিপ্রসঙ্গতঃ .. ১৫৮..
খেদো ভবেৎপ্রয়োক্ত্ৠণাং প্রেক্ষকাণাং তথৈব চ .
খিন্নানাং রসভাবেষু স্পষ্টতা নোপজায়তে .. ১৫৯..
ততঃ শেষপ্রয়োগস্তু ন রাগজনকো ভবেৎ .
(লক্ষনেন বিনা বাহ্যলক্ষণাদ্বিস্তৃতং ভবেৎ ..
লোকশাস্ত্রানুসারেণ তস্মান্নাট্যং প্রবর্ততে .. )
ত্র্যশ্রং বা চতুরশ্রং বা শুদ্ধং চিত্রমথাপি বা .. ১৬০..
প্রয়ুজ্য রঙ্গান্নিষ্ক্রামেৎসূত্রধারঃ সহানুগঃ .
(দেবপার্থিবরঙ্গানামাশীর্বচনসংযুতাম্ ..
কবের্নামগুণোপেতাং বস্তূপক্ষেপরূপিকাম্ .
লঘুবর্ণপদোপেতাং বৃত্তৈশ্চিত্রৈরলঙ্কৃতাম্ ..
অন্তর্যবনিকাসংস্থঃ কুর্যাদাশ্রাবণাং ততঃ .
আশ্রাবনাবসানে চ নান্দীং কৃৎবা স সূত্রধৃৎ ..
পুনঃ প্রবিশ্য রঙ্গং তু কুর্যাৎপ্রস্তাবনাং ততঃ .)
প্রয়ুজ্য বিধিনৈবং তু পূর্বরঁগং প্রয়োগতঃ .. ১৬১..
স্থাপকঃ প্রবিশেত্তত্র সূত্রধারগুণাকৃতিঃ .
স্থানং তু বৈষ্ণবং কৃৎবা সৌষ্ঠবাঞ্গপুরস্কৃতম্ .. ১৬২..
প্রবিশ্য রঙ্গং তৈরেব সূত্রধারপদৈর্ব্রজেৎ .
শ্থাপক্স্য প্রবেশে তু কর্তব্যঽর্থানুগা ধ্রুবা .. ১৬৩..
ত্র্যশ্রা বা চতুরশ্রা বা তজ্জ্ঞৈর্মধ্যলয়ান্বিতা .
কুর্যাদনন্তরং চারীং দেবরহ্মণশংসিনীম্ .. ১৬৪..
সুবাক্যমধুরৈঃ শ্লোকের্নানাভসবরসান্বিতৈঃ .
প্রসাদ্য রঙ্গং বিধিবৎকবের্নাম চ কীর্তয়েৎ .. ১৬৫..
প্রস্তবাঅ. ততঃ কুর্যাৎকাব্যপ্রখ্যাপনাশ্রয়াম্ .
উদ্ধাত্যকাদি কর্তব্যং কাব্যোপক্ষেপণাশ্র্যম্ ..১৬৬..
দিব্যে দিব্যাশ্রয়ো ভূৎবা মানুষে মানুষাশ্রয়ঃ .
দিব্যমানুষসংযোগে দিব্যো বা মানুষোঽপি বা .. ১৬৭..
মুখবীজানুসদৄশং নানামার্গসমাশ্রয়ম্ .
আআবিধৈরুপক্ষেপৈঃ কাব্যোপক্ষেপণং ভবেৎ ..১৬৮..
প্রস্তাব্যৈবং তু নিষ্ক্রামেৎকাব্যপ্রস্তাবকস্ততঃ .
এবমেষ প্রয়োক্তব্যঃ পূর্বরঙ্গো যথাবিধি .. ১৬৯..
য ইমং পূর্বরঙ্গং তু বিধিনৈব প্রয়োজয়েৎ .
নাশুভং প্রাপ্নুয়াৎকিঞ্চিৎস্বর্গলোকং চ গচ্ছতি .. ১৭০..
যশ্চাপি বিধিমুৎসৃজ্য যথেষ্টং সম্প্রয়োজয়েৎ .
প্রাপ্নোত্যপচয়ং ঘোরং তির্যগ্গ্যোনিং চ গচ্ছতি .. ১৭১..
ন তথাঽগ্নিঃ প্রদহতি প্রভঞ্জনসমীরতঃ .
যথা হ্যপ্রয়োগস্তু প্রয়ুক্তো দহতি ক্ষণাৎ .. ১৭২..
ইত্যেবাবন্তিপাঞ্চালদাক্ষিণাত্যৌঢ্রমাগধৈঃ .
কর্তব্য পূর্বরঙ্গস্তু দ্বিপ্রমাণবিনির্মিতঃ .. ১৭৩..
এষ বঃ কথিতো বিপ্রাঃ পূর্বরঙ্গাশ্রিতো বিধিঃ .
ভূয়ঃ কিং কথ্যতাং সম্যঙ্নাট্যবেদবিধিং প্রতি .. ১৭৪..

ইতি ভারতীয়ে নাট্যশাস্ত্রে পূর্বরঙ্গপ্রয়োগো নাম পঞ্চমোঽধ্যায়ঃ .