শাণ্ডিল্য ০৩

সর্বং তরতি পাপ্মানং তস্য জন্ম শতার্জিতম্ .
তারসংযমাত্সকলবিষযজ্ঞানং ভবতি .
নাসাগ্রে চিত্তসংযমাদিন্দ্রলোকজ্ঞানম্ .
তদধশ্চিত্তসংযমাদগ্নিলোকজ্ঞানম্ .
চক্ষুষি চিত্তসংযমাত্সর্বলোকজ্ঞানম্ .
শ্রোত্রে চিত্তস্য সংযমাদ্যমলোকজ্ঞানম্ .
তত্পার্শ্বে সংযমান্নিরৃতিলোকজ্ঞানম্ .
পৃষ্ঠভাগে সংযমাদ্বরুণলোকজ্ঞানম্ .
বামকর্ণে সংযমাদ্বাযুলোকজ্ঞানম্ .
কণ্ঠে সংযমাত্সোমলোকজ্ঞানম্ .
বামচক্ষুষি সংযমাচ্ছিবলোকজ্ঞানম্ .
মূর্ধ্নি সংযমাদ্ব্রহ্মলোকজ্ঞানম্ .
পাদাদোভাগে সংযমাদতললোকজ্ঞানম্ .
পাদে সংযমাদ্বিতললোকজ্ঞানম্ .
পাদসন্ধৌ সংযমান্নিতললোকজ্ঞানম্ .
জঙ্ঘে সংযমাত্সুতললোকজ্ঞানম্ .
জানৌ সংযমান্মহাতললোকজ্ঞানম্ .
ঊরৌ চিত্তসংযমাদ্রসাতললোকজ্ঞানম্ .
কটৌ চিত্তসংযমাত্তলাতললোকজ্ঞানম্ .
নাভৌ চিত্তসংযমাদ্ভূলোকজ্ঞানম্ .
কুক্ষৌ সংযমাদ্ভুবর্লোকজ্ঞানম্ .
হৃদি চিত্তস্য সংযমাত্স্বর্লোকজ্ঞানম্ .
হৃদযোর্ধ্বভাগে চিত্তসংযমান্মহর্লোকজ্ঞানম্ .
কণ্ঠে চিত্তসংযমাজ্জনোলোকজ্ঞানম্ .
ভ্রূমধ্যে চিত্তসংযমাত্তপোলোকজ্ঞানম্ .
মূর্ধ্নি চিত্তসংযমাত্সত্যলোকজ্ঞানম্ .
ধর্মাধর্মসংযমাদতীতানাগতজ্ঞানম্ .
তত্তজ্জন্তুধ্বনৌ চিত্তসংযমাত্সর্বজন্তুরুতজ্ঞানম্ .
সংচিতকর্মণি চিত্তসংযমাত্পূর্বজাতিজ্ঞানম্ .
পরচিত্তে চিত্তসংযমাত্পরচিত্তজ্ঞানম্ .
কাযরূপে চিত্তসংযমাদন্যাদৃশ্যরূপম্ .
বলে চিত্তসংযমাদ্ধনুমদাদিবলম্ .
সূর্যে চিত্তসংযমাদ্ভুবনজ্ঞানম্ .
চন্দ্রে চিত্তসংযমাত্তারাব্যূহজ্ঞানম্ .
ধ্রুবে তদ্গতিদর্শনম্ . স্বার্থসংযমাত্পুরুষজ্ঞানম্ .
নাভিচক্রে কাযব্যূহজ্ঞানম্ . কণ্ঠকূপে ক্ষুত্পিপাসা নিবৃত্তিঃ .
কূর্মনাড্যাং স্থৈর্যম্ . তারে সিদ্ধদর্শনম্ .
কাযাকাশসংযমাদাকাশগমনম্ .
তত্তত্স্থানে সংযমাত্তত্তত্সিদ্ধযো ভবন্তি .. ৭..
অথ প্রত্যাহারঃ . স পঞ্চবিধঃ বিষযেষু বিচরতামিন্দ্রিযাণাং
বলাদাহরণং প্রত্যাহরঃ . যদ্যত্পশ্যতি তত্সর্বমামেতি প্রত্যাহারঃ .
নিত্যবিহিতকর্মফলত্যাগঃ প্রত্যাহারঃ .
সর্ববিষযপরাঙ্মুখত্বং প্রত্যাহারঃ .
অষ্টাদশসু মর্মস্থানেষু ক্রমাদ্ধারণং প্রত্যাহারঃ .
পাদাঙ্গুষ্ঠগুল্ফজঙ্ঘাজানূরুপাযুমেঢ্রনাভিহৃদয-
কণ্ঠকূপতালুনাসাক্ষিভ্রূমধ্যললাটমূর্ধ্নি স্থানানি .
তেষু ক্রমাদারোহাবরোহক্রমেণ প্রত্যাহরেত্ .. ৮..
অথ ধারণা . সা ত্রিবিধা . আত্মনি মনোধারণং দহরাকাশে
বাহ্যাকাশধারণং পৃথিব্যপ্তেজোবায্বাকাশেষু
পঞ্চমূর্তিধারণং চেতি .. ৯..
অথ ধ্যানম্ . তদ্দ্বিবিধং সগুণং নির্গুণং চেতি .
সগুণং মূর্তিধ্যানম্ . নির্গুণমাত্মযাথাত্ম্যম্ .. ১০..
অথ সমাধিঃ . জীবাত্মপরমাত্মৈক্যাবস্থাত্রিপুটীরহিতা
পরমানন্দস্বরূপা শুদ্ধচৈতন্যাত্মিকা ভবতি .. ১১..
ইতি প্রথমোঽধ্যাযঃ .. ১..
অথ হ শাণ্ডিল্যো হ বৈ ব্রহ্মঋষিশ্চতুর্ষু বেদেষু
ব্রহ্মবিদ্যামলভমানঃ কিং নামেত্যথর্বাণং
ভগবন্তমুপসন্নঃ পপ্রচ্ছাধীহি ভগবন্ ব্রহ্মবিদ্যাং
যেন শ্রেযোঽবাপ্স্যামীতি . স হোবাচাথর্বা শাণ্ডিল্য সত্যং
বিজ্ঞানমনন্তং ব্রহ্ম যস্মিন্নিদমোতং চ প্রোতং চ .
যস্মিন্নিদং সং চ বিচৈতি সর্বং যস্মিন্বিজ্ঞাতে সর্বমিদং
বিজ্ঞাতং ভবতি . তদপাণিপাদমচক্ষুঃশ্রোত্রমজিহ্বমশরীর-
মগ্রাহ্যমনির্দেশ্যম্ . যতো বাচো নিবর্তন্তে . অপ্রাপ্য মনসা
সহ . যত্কেবলং জ্ঞানগম্যম্ . প্রজ্ঞা চ যস্মাত্প্রসৃতা
পুরাণী . যদেকমদ্বিতীযম্ . আকাশবত্সর্বগতং সুসূক্ষ্মং
নিরঞ্জনং নিষ্ক্রিযং সন্মাত্রং চিদানন্দৈকরসং শিবং
প্রশান্তমমৃতং তত্পরং চ ব্রহ্ম . তত্ত্বমসি . তজ্জ্ঞানেন হি
বিজানীহি য একো দেব আত্মশক্তিপ্রধানঃ সর্বজ্ঞঃ সর্বেশ্বরঃ
সর্বভূতান্তরাত্মা সর্বভূতাধিবাসঃ সর্বভূতনিগূঢো
ভূতযোনির্যোগৈকগম্যঃ . যশ্চ বিশ্বং সৃজতি বিশ্বং বিভর্তি
বিশ্বং ভুঙ্ক্তে স আত্মা . আত্মনি তং তং লোকং বিজানীহি . মা
শোচীরাত্মবিজ্ঞানী শোকস্যান্তং গমিষ্যতি ..
ইতি দ্বিতীযোঽধ্যাযঃ .. ২..
অথৈনং শাণ্ডিল্যোঽথর্বাণং পপ্রচ্ছ যদেকমক্ষরং
নিষ্ক্রিযং শিবং সন্মাত্রং পরংব্রহ্ম . তস্মাত্কথমিদং
বিশ্বং জাযতে কথং স্থীযতে কথমস্মিংল্লীযতে . তন্মে সংশযং
ছেত্তুমর্হসীতি . স হোবাচাথর্বা সত্যং শাণ্ডিল্য পরংব্রহ্ম
নিষ্ক্রিযমক্ষরমিতি . অথাপ্যস্যারূপস্য ব্রহ্মণস্ত্রীণি
রূপাণি ভবন্তি সকলং নিষ্কলং সকলনিষ্কলং চেতি .
যত্সত্যং বিজ্ঞানমানন্দং নিষ্ক্রিযং নিরঞ্জনং সর্বগতং
সুসূক্ষ্মং সর্বতোমুখমনির্দেশ্যমমৃতমস্তি তদিদং নিষ্কলং
রূপম্ . অথাস্য যা সহজাস্ত্যবিদ্যা মূলপ্রকৃতির্মাযা
লোহিতশুক্লকৃষ্ণা . তযা সহাযবান্ দেবঃ কৃষ্ণপিঙ্গলো
মমেশ্বর ঈষ্টে . তদিদমস্য সকলনিষ্কলং রূপম্ .. অথৈষ
জ্ঞানমযেন তপসা চীযমানোঽকামযত বহু স্যাং প্রজাযেযেতি .
অথৈতস্মাত্তপ্যমানাত্সত্যকামাত্ত্রীণ্যক্ষরাণ্যজাযন্ত . তিস্রো
ব্যাহৃতযস্ত্রিপদা গাযত্রী ত্রযো বেদাস্ত্রযো দেবাস্ত্রযো বর্ণাস্ত্রযোঽগ্নযশ্চ
জাযন্তে . যোঽসৌ দেবো ভগবান্সর্বৈশ্বর্যসংপন্নঃ সর্বব্যাপী
সর্বভূতানাং হৃদযে সংনিবিষ্টো মাযাবী মাযযা ক্রীডতি স ব্রহ্মা
স বিষ্ণুঃ স রুদ্রঃ স ইন্দ্রঃ স সর্বে দেবাঃ সর্বাণি ভূতানি স এব
পুরস্তাত্স এব পশ্চাত্স এবোত্তরতঃ স এব দক্ষিণতঃ স এবাধস্তাত্স
এবোপরিষ্টাত্স এব সর্বম্ . অথাস্য দেবস্যাত্মশক্তেরাত্মক্রীডস্য
ভক্তানুকংপিনো দত্তাত্রেযরূপা সুরূপা তনূরবাসা ইন্দীবরদলপ্রখ্যা
চতুর্বাহুরঘোরাপাপকশিনী . তদিদমস্য সকলং রূপম্ .. ১..
অথ হৈনমথর্বাণং শাণ্ডিল্যঃ পপ্রচ্ছ ভগবন্সন্মাত্রং
চিদানন্দৈকরসং কস্মাদুচ্যতে পরং ব্রহ্মেতি . স হোবাচাথর্বা
যস্মাচ্চ বৃহতি বৃংহযতি চ সর্বং তস্মাদুচ্যতে পরংব্রহ্মেতি .
অথ কস্মাদুচ্যতে আত্মেতি . যস্মাত্সর্বমাপ্নোতি সর্বমাদত্তে সর্বমত্তি
চ তস্মাদুচ্যতে আত্মেতি . অথ কস্মাদুচ্যতে মহেশ্বর ইতি . যস্মান্মহত
ঈশঃ শব্দধ্বন্যা চাত্মশক্ত্যা চ মহত ঈশতে তস্মাদুচ্যতে
মহেশ্বর ইতি . অথ কস্মাদুচ্যতে দত্তাত্রেয ইতি . যস্মাত্সুদুশ্চরং
তপস্তপ্যমানাযাত্রযে পুত্রকামাযাতিতরাং তুষ্টেন ভগবতা
জ্যোতির্মযেনাত্মৈব দত্তো যস্মাচ্চানসূযাযামত্রেস্তনযোঽভব-
ত্তস্মাদুচ্যতে দত্তাত্রেয ইতি . অথ যোঽস্য নিরুক্তানি বেদ স সর্বং বেদ .
অথ যো হ বৈ বিদ্যযৈনং পরমুপাস্তে সোঽহমিতি স ব্রহ্মবিদ্ভবতি ..
অত্রৈতে শ্লোকা ভবন্তি ..
দত্তাত্রেযং শিবং শান্তমিন্দ্রনীলনিভং প্রভুম্ .
আত্মমাযারতং দেবমবধূতং দিগম্বরম্ .. ১..
ভস্মোদ্ধূলিতসর্বাঙ্গং জটাজূটধরং বিভুম্ .
চতুর্বাহুমুদারাঙ্গং প্রফুল্লকমলেক্ষণম্ ..২..
জ্ঞানযোগনিধিং বিশ্বগুরুং যোগিজনপ্রিযম্ .
ভক্তানুকংপিনং সর্বসাক্ষিণং সিদ্ধসেবিতম্ .. ৩..
এবং যঃ সততং ধ্যাযেদ্দেবদেবং সনাতনম্ .
স মুক্তঃ সর্বপাপেভ্যো নিঃশ্রেযসমবাপ্নুযাত্ .. ৪..
ইত্যোং সত্যমিত্যুপনিষত্ ..
ইতি তৃতীযোঽধ্যাযঃ .. ৩..
ॐ ভদ্রং কর্ণেভিঃ শ্রুণুযাম দেবা ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
ইতি শাণ্ডিল্যোপনিষত্সমাপ্তা ..