শাণ্ডিল্য ০২

সূর্যাচন্দ্রমসোরনেন বিধিনাঽভ্যাসং সদা তন্বতাং
শুদ্ধা নাডিগণা ভবন্তি যমিনাং মাসত্রযাদূর্ধ্বতঃ .. ১..
প্রাতর্মধ্যন্দিনে সাযমর্ধরাত্রে তু কুম্ভকান্ .
শনৈরশীতিপর্যন্তং চতুর্বারং সমভ্যসেত্ .. ২..
কনীযসি ভবেত্স্বেদঃ কংপো ভবতি মধ্যমে .
উত্তিষ্ঠত্ত্যুত্তমে প্রাণরোধে পদ্মাসনং মহত্ .. ৩..
জলেন শ্রমজাতেন গাত্রমর্দনমাচরেত্ .
দৃঢতা লঘুতা চাপি তস্য গাত্রস্য জাযতে .. ৪..
অভ্যাসকালে প্রথমং শস্তং ক্ষীরাজ্যভোজনম্ .
ততোঽভ্যাসে স্থিরীভূতে ন তাবন্নিযমগ্রহঃ .. ৫..
যথা সিংহো গজো ব্যাঘ্রো ভবেদ্বশ্যঃ শনৈঃ শনৈঃ .
তথৈব সেবিতো বাযুরন্যথা হন্তি সাধকম্ .. ৬..
যুক্তং যুক্তং ত্যজেদ্বাযুং যুক্তং যুক্তং চ পূরযেত্ .
যুক্তং যুক্তং চ বধ্নীযাদেবং সিদ্ধিমবাপ্নুযাত্ .. ৭..
যথেষ্টধারণাদ্বাযোরনলস্য প্রদীপনম্ .
নাদাভিব্যক্তিরারোগ্যং জাযতে নাডিশোধনাত্ .. ৮..
বিধিবত্প্রাণসংযামৈর্নাডীচক্রে বিশোধিতে .
সুষুম্নাবদনং ভিত্ত্বা সুখাদ্বিশতি মারুতঃ .. ৯..
মারুতে মধ্যসংচারে মনঃস্থৈর্যং প্রজাযতে .
যো মনঃসুস্থিরো ভাবঃ সৈবাবস্থা মনোন্মনী .. ১০..
পূরকান্তে তু কর্তব্যো বন্ধো জালন্ধরাভিধঃ .
কুম্ভকান্তে রেচকাদৌ কর্তব্যস্তূড্ডিযাণকঃ .. ১১..
অধস্তাত্কুঞ্চনেমাশু কণ্ঠসঙ্কোচনে কৃতে .
মধ্যে পশ্চিমতানেন স্যাত্প্রাণো ব্রহ্মনাডিগঃ .. ১২..
অপানমূর্ধ্বমুত্থাপ্য প্রাণং কণ্ঠাদধো নযন্ .
যোগী জরাবিনির্মুক্তঃ ষোডশো বযসা ভবেত্ ..১৩..
সুখাসনস্থো দক্ষনাড্যা বহিস্থং পবনং
সমাকৃষ্যাকেশমানখাগ্রং কুম্ভযিত্বা সব্যনাড্যা
রেচযেত্ . তেন কপালশোধনং বাতনাডীগতসর্বরোগ-
সর্ববিনাশনং ভবতি . হৃদযাদিকণ্ঠপর্যন্তং সস্বনং
নাসাভ্যাং শনৈঃ পবনমাকৃষ্য যথাশক্তি
কুম্ভযিত্বা ইডযা বিরেচ্য গচ্ছংস্তিষ্ঠন্কুর্যাত্ .
তেন শ্লেষ্মহরং জঠরাগ্নিবর্ধনং ভবতি . বক্ত্রেণ
সীত্কারপূর্বকং বাযুং গৃহীত্বা যথাশক্তি কুম্ভযিত্বা
নাসাভ্যাং রেচযেত্ . তেন ক্ষুত্তৃষ্ণালস্যনিদ্রা ন জাযতে .
জিহ্বযা বাযুং গৃহীত্বা যথাশক্তি কুম্ভযিত্বা নাসাভ্যাং
রেচযেত্ . তেন গুল্মপ্লীহজ্বরপিত্তক্ষুধাদীনি নশ্যন্তি ..
অথ কুম্ভকঃ . স দ্বিবিধঃ সহিতঃ কেবলশ্চেতি . রেচকপূরকযুক্তঃ
সহিতঃ তদ্বিবর্জিতঃ কেবলঃ . কেবলসিদ্ধিপর্যন্তং সহিতমভ্যসেত্ .
কেবলকুম্ভকে সিদ্ধে ত্রিষু লোকেষু ন তস্য দুর্লভং ভবতি .
কেবলকুম্ভকাত্কুণ্ডলিনীবোধো জাযতে . ততঃ কৃশবপুঃ
প্রসন্নবদনো নির্মললোচনোঽভিব্যক্তনাদো নির্মুক্তরোগজালো
জিতবিন্দুঃ পট্বগ্নির্ভবতি .
অন্তর্লক্ষ্যং বহির্দৃষ্টির্নিমেষোন্মেষবর্জিতা .
এষা সা বৈষ্ণবী মুদ্রা সর্বতন্ত্রেষু গোপিতা .. ১৪..
অন্তর্লক্ষ্যবিলীনচিত্তপবনো যোগী সদা বর্ততে
দৃষ্ট্যা নিশ্চলতারযা বহিরধঃ পশ্যন্নপশ্যন্নপি .
মুদ্রেযং খলু খেচরী ভবতি সা লক্ষ্যৈকতানা শিবা
শূন্যাশূন্যবিবর্জিতং স্ফুরতি সা তত্ত্বং পদং বৈষ্ণবী .. ১৫..
অর্ধোন্মীলিতলোচনঃ স্থিরমনা নাসাগ্রদত্তেক্ষণ-
শ্চন্দ্রার্কাবপি লীনতামুপনযন্নিষ্পন্দভাবোত্তরম্ .
জ্যোতীরূপমশেএষবাহ্যরহিতং দেদীপ্যমানং পরং
তত্ত্বং তত্পরমস্তি বস্তুবিষযং শাণ্ডিল্য বিদ্ধীহ তত্ .. ১৬..
তারং জ্যোতিষি সংযোজ্য কিঞ্চিদুন্নমযন্ভ্রুবৌ .
পূর্বাভ্যাসস্য মার্গোঽযমুন্মনীকারকঃ ক্ষণাত্ .. ১৭..
তস্মাত্খেচরীমুদ্রামভ্যসেত্ . তত উন্মনী ভবতি .
ততো যোগনিদ্রা ভবতি . লব্ধযোগনিদ্রস্য যোগিনঃ কালো নাস্তি .
শক্তিমধ্যে মনঃ কৃত্বা শক্তিং মানসমধ্যগাম্ .
মনসা মন আলোক্য শাণ্ডিল্য ত্বং সুখী ভব .. ১৮..
খমধ্যে কুরু চাত্মানমাত্মমধ্যে চ খং কুরু .
সর্বং চ খমযং কৃত্বা ন কিঞ্চিদপি চিন্তয .. ১৯..
বাহ্যচিন্তা ন কর্তব্যা তথৈবান্তরচিন্তিকা .
সর্বচিন্তাং পরিত্যজ্য চিন্মাত্রপরমো ভব .. ২০..
কর্পূরমনলে যদ্বত্সৈন্ধবং সলিলে যথা .
তথা চ লীযমানং চ মনস্তত্ত্বে বিলীযতে .. ২১..
জ্ঞেযং সর্বপ্রতীতং চ তজ্জ্ঞানং মন উচ্যতে .
জ্ঞানং জ্ঞেযং সমং নষ্টং নান্যঃ পন্থা দ্বিতীযকঃ .. ২২.
জ্ঞেযবস্তুপরিত্যাগাদ্বিলযং যাতি মানসম্ .
মানসে বিলযং যাতে কৈবল্যমবশিষ্যতে .. ২৩..
দ্বৌ ক্রমৌ চিত্তনাশস্য যোগো জ্ঞানং মুনীশ্বর .
যোগস্তদ্বৃত্তিরোধো হি জ্ঞানং সম্যগবেক্ষণম্ .. ২৪..
তস্মিন্নিরোধিতে নূনমুপশান্তং মনো ভবেত্ .
মনঃস্পন্দোপশান্তাযং সংসারঃ প্রবিলীযতে .. ২৫..
সূর্যালোকপরিস্পন্দশান্তৌ ব্যবহৃতির্যথা .
শাস্ত্রসজ্জনসংপর্কবৈরাগ্যাভ্যাসযোগতঃ .. ২৬..
অনাস্থাযাং কৃতাস্থাযাং পূর্বং সংসারবৃত্তিষু .
যথাভিবাঞ্ছিতধ্যানাচ্চিরমেকতযোহিতাত্ .. ২৭..
একতত্ত্বদৃঢাভ্যাসাত্প্রাণস্পন্দো নিরুধ্যতে .
পূরকাদ্যনিলাযামাদৃঢাভ্যাসদখেদজাত্ .. ২৮..
একান্তধ্যানযোগাচ্চ মনঃস্পন্দো নিরুধ্যতে .
ওঙ্কারোচ্চারণপ্রান্তশব্দতত্ত্বানুভাবনাত্ .
সুষুপ্তে সংবিদা জ্ঞাতে প্রাণস্পন্দো নিরুধ্যতে .. ২৯..
তালুমূলগতাং যত্নাজ্জিহ্বযাক্রম্য ঘণ্টিকাম্ .
ঊর্ধ্বরন্ধ্রং গতে প্রাণে প্রাণস্পন্দো নিরুধ্যতে .. ৩০..
প্রাণে গলিতসংবিত্তৌ তালূর্ধ্বং দ্বাদশান্তগে .
অভ্যাসাদূর্ধ্বরন্ধ্রেণ প্রাণস্পন্দো নিরুধ্যতে .. ৩১..
দ্বাদশাঙ্গুলপর্যন্তে নাসাগ্রে বিমলেঽম্বরে .
সংবিদ্দৃশি প্রশাম্যন্ত্যাং প্রাণস্পন্দো নিরুধ্যতে .. ৩২..
ভ্রূমধ্যে তারকালোকশান্তাবন্তমুপাগতে .
চেতনৈকতনে বদ্ধে প্রাণস্পন্দো নিরুধ্যতে .. ৩৩..
ওমিত্যেব যদুদ্ভূতং জ্ঞানং জ্ঞেযাত্মকং শিবম্ .
অসংস্পৃষ্টবিকল্পাংশং প্রাণস্পন্দো নিরুধ্যতে .. ৩৪..
চিরকালং হৃদেকান্তব্যোমসংবেদনান্মুনে .
অবাসনমনোধ্যানাত্প্রাণস্পন্দো নিরুধ্যতে .. ৩৫..
এভিঃ ক্রমৈস্তথান্যৈশ্চ নানাসংকল্পকল্পিতৈঃ .
নানাদেশিকবক্ত্রস্থৈঃ প্রাণস্পন্দো নিরুধ্যতে .. ৩৬..
আকুঞ্চনেন কুণ্ডলিন্যাঃ কবাটমুদ্ঘাট্য মোক্ষদ্বারং বিভেদযেত্ .
যেন মার্গেণ গন্তব্যং তদ্দ্বারং মুখেনাচ্ছাদ্য প্রসুপ্তা
কুণ্ডলিনী কুটিলাকারা সর্পবদ্বেষ্টিতা ভবতি . সা শক্তির্যেন
চালিতা স্যাত্স তু মুক্তো ভবতি . সা কুণ্ডলিনী কণ্ঠোর্ধ্বভাগে
সুপ্তা চেদ্যোগিনাং মুক্তযে ভবতি . বন্ধনাযাধো মূঢানাম্ .
ইডাদিমার্গদ্বযং বিহায সুষুম্নামার্গেণাগচ্ছেত্তদ্বিষ্ণোঃ
পরমং পদম্ .
মরুদভ্যসনং সর্বং মনোযুক্তং সমভ্যসেত্
ইতরত্র ন কর্তব্যা মনোবৃত্তির্মনীষিণা .. ৩৭..
দিবা ন পূজযেদ্বিষ্ণুং রাত্রৌ নৈব প্রপূজযেত্ .
সততং পূজযেদ্বিষ্ণুং দিবারাত্রং ন পূজযেত্ .. ৩৮..
সুষিরো জ্ঞানজনকঃ পঞ্চস্রোতঃসমন্বিতঃ .
তিষ্ঠতে খেচরী মুদ্রা তস্মিন্স্থানে ন সংশযঃ .. ৩৯..
সব্যদক্ষিণনাডীস্থো মধ্যে চরতি মারুতঃ .
তিষ্ঠতঃ খেচরী মুদ্রা তস্মিন্স্থানে ন সংশযঃ .. ৪০..
ইডাপিঙ্গলযোর্মধ্যে শূন্যং চৈবানিলং গ্রসেত্ .
তিষ্ঠন্তী খেচরী মুদ্রা তত্র সত্যং প্রতিষ্ঠিতম্ .. ৪১..
সোমসূর্যদ্বযোর্মধ্যে নিরালম্বতলে পুনঃ .
সংস্থিতা ব্যোমচক্রে সা মুদ্রা নাম্না চ খেচরী .. ৪২..
ছেদনচালনদাহৈঃ ফলাং পরাং জিহ্বাং কৃত্বা
দৃষ্টিং ভ্রূমধ্যে স্থাপ্য কপালকুহরে জিহ্বা বিপরীতগা
যদা ভবতি তদা খেচরী মুদ্রা জাযতে . জিহ্বা চিত্তং চ
খে চরতি তেনোর্ধ্বজিহ্বঃ পুমানমৃতো ভবতি . বামপাদমূলেন
যোনিং সংপীড্য দক্ষিণপাদং প্রসার্য তং করাভ্যাং ধৃত্বা
নাসাভ্যাং বাযুমাপূর্য কণ্ঠবন্ধং সমারোপ্যোর্ধ্বতো
বাযুং ধারযেত্ . তেন সর্বক্লেশহানিঃ . ততঃ পীযূষমিব
বিষং জীর্যতে . ক্ষযগুল্মগুদাবর্তজীর্ণত্বগাদিদোষা নশ্যন্তি .
এষ প্রাণজযোপাযঃ সর্বমৃত্যূপঘাতকঃ . বামপাদপার্ষ্ণিং
যোনিস্থানে নিযোজ্য দক্ষিণচরণং বামোরূপরি সংস্থাপ্য
বাযুমাপূর্য হৃদযে চুবুকং নিধায যোনিমাকুঞ্চ্য মনোমধ্যে
যথাশক্তি ধারযিত্বা স্বাত্মানং ভাবযেত্ . তেনাপরোক্ষসিদ্ধিঃ .
বাহ্যাত্প্রাণং সমাকৃষ্য পূরযিত্বোদরে স্থিতম্ .
নাভিমধ্যে চ নাসাগ্রে পদাঙ্গুষ্ঠে চ যত্নতঃ .. ৪৩..
ধারযেন্মনসা প্রাণং সন্ধ্যাকালেষু বা সদা .
সর্বরোগবিনির্মুক্তো ভবেদ্যোগী গতক্লমঃ .. ৪৪..
নাসাগ্রে বাযুবিজযং ভবতি . নাভিমধ্যে সর্বরোগবিনাশঃ .
পাদাঙ্গুষ্ঠদারণাচ্ছরীরলঘুতা ভবতি .
রসনাদ্বাযুমাকৃষ্য যঃ পিবেত্সতততং নরঃ .
শ্রমদাহৌ তু ন স্যাতাং নশ্যন্তি ব্যাধযস্তথা .. ৪৫..
সন্ধ্যযোর্ব্রাহ্মণঃ কালে বাযুমাকৃষ্য যঃ পিবেত্ .
ত্রিমাসাত্তস্য কল্যাণী জাযতে বাক্ সরস্বতী .. ৪৬..
এবং ষণ্মাসাভ্যাসাত্সর্বরোগনিবৃত্তিঃ .
জিহ্বযা বাযুমানীয জিহ্বামূলে নিরোধযেত্ .
যঃ পিবেদমৃতং বিদ্বান্সকলং ভদ্রমশ্নুতে .. ৪৭..
আত্মন্যাত্মানমিডযা ধারযিত্বা ভ্রুবোন্তরে .
বিভেদ্য ত্রিদশাহারং ব্যাধিস্থোঽপি বিমুচ্যতে .. ৪৮..
নাডীভ্যাং বাযুমারোপ্য নাভৌ তুন্দস্য পার্শ্বযোঃ .
ঘটিকৈকাং বহেদ্যস্তু ব্যাধিভিঃ স বিমুচ্যতে .. ৪৯..
মাসমেকং ত্রিসন্ধ্যং তু জিহ্বযারোপ্য মারুতম্ .
বিভেদ্য ত্রিদশাহারং ধারযেত্তুন্দমধ্যমে .. ৫০..
জ্বরাঃ সর্বেঽপি নশ্যন্তি বিষাণি বিবিধানি চ .
মুহূর্তমপি যো নিত্যং নাসাগ্রে মনসা সহ .. ৫১..