বেদান্তসারনাম ০৬

৬
অথ জীবন্মুক্তলক্ষণমুচ্যতে .. ২১৬..
জীবন্মুক্তো নাম স্বস্বরূপাখণ্ডব্রহ্মজ্ঞানেন
তদজ্ঞানবাধনদ্বারা স্বস্বরূপাখণ্ডব্রহ্মণি
সাক্ষাত্কৃতেঽজ্ঞানতত্কার্যসঞ্চিতকর্মসংশযবিপর্যযাদীনামপি
বাধিতত্বাদখিলবন্ধরহিতো ব্রহ্মনিষ্ঠঃ .. ২১৭..
“ভিদ্যতে হৃদযগ্রন্থিশ্ছিদ্যন্তে সর্বসংশযাঃ .
ক্ষীযন্তে চাস্য কর্মাণি তস্মিন্দৃষ্টে পরাবরে .. ”
ইত্যাদিশ্রুতেঃ (মুণ্ড উ ২ | ২ | ৮ ).. ২১৮..
অযং তু ব্যুত্থানসমযে মাংসশোণিতমূত্রপুরীষাদিভাজনেন
শরীরেণান্ধ্যমান্দ্যাপটুত্বাদিভাজনেনেদ্রিযগ্রামেণাশনা-
পিপাসাশোকমোহাদিভাজনেনান্তঃকরণেন চ পূর্বপূর্ববাসনযা
ক্রিযামাণানি কর্মাণি ভুজ্যমানানি জ্ঞানাবিরুদ্ধারব্ধফলানি
চ পশ্যন্নপি বাধিতত্বাত্পরমার্থতো ন পশ্যতে . যথেন্দ্রজালমিতি
জ্ঞানবাংস্তদিন্দ্রজালং পশ্যন্নপি পরমার্থমিদমিতি ন পশ্যতি .. ২১৯..
“সচক্ষুরচক্ষুরিব সকর্ণোঽকর্ণ ইব “ইত্যাদিশ্রুতেঃ .. ২২০..
উক্তঞ্চ –
“সুষুপ্তবজ্জাগ্রতি যো ন পশ্যতি
দ্বযং চ পশ্যন্নপি চাদ্বযত্বতঃ ..
তথা চ কুর্বন্নপি নিষ্ক্রিযশ্চ যঃ
স আত্মবিন্নান্য ইতীহ নিশ্চযঃ .. “ইতি (উপদেশসাহস্রী ৫ ).. ২২১..
অথ জ্ঞানাত্পূর্বং বিদ্যমানানামেবাহারবিহারাদীনামনুবৃত্তিব-
চ্ছুভবাসনানামেবানুবৃত্তির্ভবতি শুভাশুভযোরৌদাসীন্যং বা .. ২২২..
তদুক্তম্ . –
“বুদ্ধাদ্বৈতসতত্ত্বস্য যথেষ্টাচরাণং যদি .
শুনাং তত্ত্বদৃশাঞ্চৈব কো ভেদোঽশুচিভক্ষণে .. “ইতি (নৈষ্কর্ম্যসিদ্ধিঃ ৪ | ৬২ ]
“ব্রহ্মবিত্তং তথা মুক্ত্বা স আত্মজ্ঞো ন চেতরঃ .. )”ইতি চ (উপদেশসাহস্রী ১১৫ ).. ২২৩..
তদানীমমানিত্বাদীনি জ্ঞানসাধনান্যদ্বেষ্ট্টত্বাদযঃ সদ্গুণাশ্চালঙ্কারবদনুবর্তন্তে .. ২২৪..
তদুক্তম্ –
“উত্পন্নাত্মাববোধস্য হ্যদ্বেষ্ট্টত্বাদযো গুণাঃ .
অযত্নতো ভবন্ত্যস্য ন তু সাধনরূপিণঃ .. “ইতি (নৈষ্কর্ম্যসিদ্ধিঃ ৪ | ৬৯ ).. ২২৫..
কিং বহুনাযং দেহযাত্রামাত্রার্থমিচ্ছানিচ্ছা-
পরেচ্ছাপ্রাপিতানি সুখদুঃখলক্ষণান্যারব্ধ-
ফলান্যনুভবন্নন্তঃকরণাভাসাদীনামবভাসকঃ
সংস্তদবসানে প্রত্যগানন্দপরব্রহ্মণি প্রাণে লীনে
সত্যজ্ঞানতত্কার্যসংকারাণামপি বিনাশাত্পরমকৈবল্য-
মানন্দৈকরসমখিলভেদপ্রতিভাসরহিতমখণ্ডব্রহ্মাবতিষ্ঠতে .. ২২৬..
“ন তস্য প্রাণা উত্ক্রামন্তি “(বৃ উ ৪ . ৪ . ৬ )
“অত্রৈব সমবনীযন্তে “(বৃ উ ৩ . ২ . ১১ )
“বিমুক্তশ্চ বিমুচ্যতে “(কঠ উ ৫ . ১ )ইত্যাদিশ্রুতেঃ .. ২২৭..
ইতি সদানন্দ যোগীন্দ্র বিরচিতো বেদান্তসারনাম গ্রন্থঃ সমাপ্তঃ .