বেদান্তসারনাম ০৫

৫
এবং ভূতস্বস্বরূপচৈতন্যসাক্ষাত্কারপর্যন্তং শ্রবণমনন-
নিদিধ্যাসনসমাধ্যনুষ্ঠানস্যাপেক্ষিতত্বাত্তেঽপি প্রদর্শ্যন্তে .. ১৮১..
শ্রবণং নাম ষড্বিধলিঙ্গৈরশেষবেদান্তানামদ্বিতীযবস্তুনি
তাত্পর্যাবধারণম্ .. ১৮২..
লিঙ্গানি তূপক্রমোপসংহারাভ্যাসাপূর্বতাফলার্থবাদোপপত্ত্যাখ্যানি .. ১৮৩..
তদুক্তম্ –
“উপক্রমোপসংহারাবভ্যাসোঽপূর্বতাফলম্ .
অর্থবাদোপপত্তী চ লিঙ্গং তাত্পর্যনির্ণযে .. “.. ১৮৪..
প্রকরণপ্রতিপাদ্যস্যার্থস্য তদাদ্যন্তযোরুপপাদনমুপক্রমোপসংহারৌ .
যথা ছান্দোগ্যে ষষ্ঠাধ্যাযে প্রকরণপ্রতিপাদ্যস্যাদ্বিতীযবস্তুন
“একমেবাদ্বিতীযম্ “(৬ . ২ . ১ )ইত্যাদৌ “ঐতদাত্ম্যমিদং সর্বম্ “(৬ . ৮ . ৭ )
ইত্যন্তে চ প্রতিপাদনম্ .. ১৮৫..
প্রকরণপ্রতিপাদ্যস্য বস্তুনস্তন্মধ্যে পৌনঃপুন্যেন
প্রতিপাদনমভ্যাসঃ . যথা তত্রৈবাদ্বিতীযবস্তুনি মধ্যে
তত্ত্বমসীতি নবকৃত্বঃ প্রতিপাদনম্ .. ১৮৬..
প্রকরণপ্রতিপাদ্যস্যাদ্বিতীযবস্তুনঃ প্রমাণান্তরা-
বিষযীকরণমপূর্বতা . যথা তত্রৈবাদ্বিতীযবস্তুনো
মানান্তরাবিষযীকরণম্ .. ১৮৭..
ফলং তু প্রকরণপ্রতিপাদ্যস্যাত্মজ্ঞানস্য তদনুষ্ঠানস্য
বা তত্র তত্র শ্রূযমাণং প্রযোজনম্ . যথা তত্র “আচার্যবান্পুরুষো
বেদ তস্য তাবদেব চিরং যাবন্ন বিমোক্ষ্যেথ সম্পত্স্যে “(৬ | ১৪ |২ )
ইত্যদ্বিতীযবস্তুজ্ঞানস্য তত্প্রাপ্তিঃ প্রযোজনং শ্রূযতে .. ১৮৮..
প্রকরণপ্রতিপাদ্যস্য তত্র তত্র প্রশংসনমর্থবাদঃ .
যথা তত্রৈব “উত তমাদেশমপ্রাক্ষ্যো যেনাশ্রুতং শ্রুতং ভবত্যমতং
মতমবিজ্ঞাতং বিজ্ঞাতম্ “(৬ | ১ | ৩ )ইত্যদ্বিতীযবস্তুপ্রশংসনম্ .. ১৮৯..
প্রকরণপ্রতিপাদ্যার্থসাধনে তত্র তত্র শ্রুযমাণা যুক্তিরুপপত্তিঃ . যথা
তত্র “যথা সৌম্যেক্যৈন মৃত্পিণ্ডেন সর্বং মৃন্মযং বিজ্ঞাতং
স্যাদ্বাচারম্ভণং বিকারো নামধেযং মৃত্তিকেত্যেব সত্যম্ “(৬| ১ | ৪ )
ইত্যাদাবদ্বিতীযবস্তুসাধনে বিকারস্য বাচারম্ভণমাত্রত্বে যুক্তিঃ শ্রূযতে .. ১৯০..
মননং তু শ্রুতস্যাদ্বিতীযবস্তুনো বেদান্তানুগুণযুক্তিভিরনবরতমনুচিন্তনম্ .. ১৯১..
বিজাতীযদেহাদিপ্রত্যযরহিতাদ্বিতীযবস্তুসজাতীযপ্রত্যযপ্রবাহো নিদিধ্যাসনম্ .. ১৯২..
সমাধির্দ্বিবিধঃ সবিকল্পকো নির্বিকল্পশ্চেতি .. ১৯৩..
তত্র সবিকল্পকো নাম জ্ঞাতৃজ্ঞানাদিবিকল্পলযানপেক্ষযাদ্বিতীযবস্তুনি
তদাকারাকারিতাযাশ্চিত্তবৃত্তেরবস্থানম্ .. ১৯৪..
তদা মৃণ্মযগজাদিভানেঽপি মৃদ্ভানবদ্দ্বৈতভানেঽপ্যদ্বৈতং বস্তু ভাসতে .. ১৯৫..
তদুক্তম্ –
“দৃশিস্বরূপং গগনোপমং পরম্
সকৃদ্বিভাতং ত্বজমেকমক্ষরম্ .
অলেপকং সর্বগতং যদদ্বযম্
তদেব চাহং সততং বিমুক্তমোম্ .. “ইতি
(উপদেশসাহস্রী ৭৩| ১০| ১ ).. ১৯৬..
নির্বিকল্পকস্তু জ্ঞাতৃজ্ঞানাদিবিকল্পলযাপেক্ষযাদ্বিতীযবস্তুনি
তদাকারাকারিতাযাশ্চিত্তবৃত্তেরতিতরামেকীভাবেনাবস্থানম্ .. ১৯৭..
তদা তু জলাকারাকারিতলবণানবভাসেন জলমাত্রাবভাসবদদ্বিতীয-
বস্ত্বাকারাকারিতচিত্তবৃত্ত্যনবভাসেনাদ্বিতীযবস্তুমাত্রমবভাসতে .. ১৯৮..
ততশ্চাস্য সুষুপ্তেশ্চাভেদশঙ্কা ন ভবতি . উভযত্র বৃত্ত্যভানে
সমানেঽপি তত্সদ্ভাবাসদ্ভাবমাত্রেণানযোর্ভেদোপপত্তেঃ .. ১৯৯..
অস্যাঙ্গানি যমনিযমাসনপ্রাণাযামপ্রত্যাহারধারণাধ্যানসমাধযঃ .. ২০০..
তত্র “অহিংসাসত্যাস্তেযব্রহ্মচর্যাপরিগ্রহা যমাঃ “.. ২০১..
“শৌচসন্তোষতপঃস্বাধ্যাযেশ্বরপ্রণিধানানি নিযমাঃ “..২০২..
করচরাণদিসংস্থানবিশেষলক্ষণানি পদ্মস্বস্তিকাদীন্যাসনানি .. ২০৩..
রেচকপূরককুম্ভকলক্ষণাঃ প্রাণনিগ্রহোপাযাঃ প্রাণাযামাঃ .. ২০৪..
ইন্দ্রিযাণাং স্বস্ববিষযেভ্যঃ প্রত্যাহরণং প্রত্যাহারঃ .. ২০৫..
অদ্বিতীযবস্তুন্যন্তরিন্দ্রিযধারণং ধারণা .. ২০৬ ..
তত্রাদ্বিতীযবস্তুনি বিচ্ছিদ্য বিচ্ছিদ্যান্তরিন্দ্রিযবৃত্তিপ্রবাহো ধ্যানম্ .. ২০৭..
সমাধিস্তূক্তঃ সবিকল্পক এব .. ২০৮..
এবমস্যাঙ্গিনো নির্বিকল্পকস্য লযবিক্ষেপকষাযরসাস্বাদলক্ষণাশ্চত্বারো
বিঘ্নাঃ সম্ভবন্তি .. ২০৯..
লযস্তাবদখণ্ডবস্তনবলম্বনেন চিত্তবৃত্তের্নিদ্রা .. ২১০..
অখণ্ডবস্ত্বনবলম্বনেন চিত্তবৃত্তেরন্যাবলম্বনং বিক্ষেপঃ .. ২১১..
লযবিক্ষেপাভাবেঽপি চিত্তবৃত্তের্রাগাদিবাসনযা
স্তব্ধীভাবাদখণ্ডবস্ত্বনবলম্বনং কষাযঃ .. ২১২..
অখণ্ডবস্ত্বনবলম্বনেনাপি চিত্তবৃত্তেঃ সবিকল্পকানন্দাস্বাদনং
রসাস্বাদঃ . সমাধ্যারম্ভসমযে সবিকল্পকানন্দাস্বাদনং বা .. ২১৩..
অনেন বিঘ্নচতুষ্টযেন বিরহিতং চিত্তং নির্বাতদীপবদচলং
সদখণ্ডচৈতন্যমাত্রমবতিষ্ঠতে যদা তদা নির্বিকল্পকঃ
সমাধিরিত্যুচ্যতে .. ২১৪..
যদুক্তম্ –
“লযে সম্বোধযেচ্চিতং বিক্ষিপ্তং শমযেত্পুনঃ .
সকষাযং বিজানীযাত্সমপ্রাপ্তং ন চালযেত্ ..
নাস্বাদযেদ্রসং তত্র নিঃসঙ্গঃ প্রজ্ঞযা ভবেত্ “ইতি চ
(গৌডপাদকারিকা ৩ | ৪৪- ৪৫ )
“যথা দীপো নিবাতস্থো নেঙ্গতে সোপমা স্মৃতা “ইতি চ
(গীতা ৬ – ১৯ ).. ২১৫..