বেদান্তসারনাম ০৪

৪
অপবাদো নাম রজ্জুবিবর্তস্য সর্পস্য রজ্জুমাত্রত্ববদ্বস্তুবিবর্তস্যাবস্তুনোঽজ্ঞানাদেঃ
প্রপঞ্চস্য বস্তুমাত্রত্বম্ .. ১৩৭..
তদুক্তম্ –
“সতত্ত্বতোঽন্যথাপ্রথা বিকার ইত্যুদীরিতঃ .
অতত্ত্বতোঽন্যথাপ্রথা বিবর্ত ইত্যুদীরিতঃ .. “ইতি .. ১৩৮..
তথাহি এতদ্ভোগাযতনং চতুর্বিধসকলস্থূলশরীরজাতং
ভোগ্যরূপান্নপানাদিকমেতদাযতনভূতভূরাদিচতুর্দশভুবনান্যেতদাযতনভূতং
ব্রহ্মাণ্ডং চৈতত্সর্বমেতেষাং কারণরূপং পঞ্চীকৃতভূতমাত্রং ভবতি .. ১৩৯..
এতানি শব্দাদিবিষযসহিতানি পঞ্চীকৃতানি ভূতানি সূক্ষ্মশরীরজাতং
চৈতত্সর্বমেতেষাং কারণরূপাপঞ্চীকৃতভূতমাত্রং ভবতি .. ১৪০..
এতানি সত্ত্বাদিগুণসহিতান্যপঞ্চীকৃতান্যুত্পত্তি-
ব্যুত্ক্রমেণৈতত্কারণভূতাজ্ঞানোপহিতচৈতন্যমাত্রং ভবতি .. ১৪১..
এতদজ্ঞানমজ্ঞানোপহিতং চৈতন্যং চেশ্বরাদিকমেতদাধার-
ভূতানুপহিতচৈতন্যরূপং তুরীযং ব্রহ্মমাত্রং ভবতি .. ১৪২..
আভ্যামধ্যারোপাপবাদাভ্যাং তত্ত্বম্পদার্থশোধনমপি
সিদ্ধং ভবতি .. ১৪৩..
তথাহি – অজ্ঞানাদিসমষ্টিরেতদুপহিতং সর্বজ্ঞত্বাদিবিশিষ্টং
চৈতন্যমেতদনুপহিতং চৈতত্ত্রযং তপ্তাযঃপিণ্ডবদেকত্বেনাবভাসমানং
তত্পদবাচ্যার্থো ভবতি .. ১৪৪..
এতদুপাধ্যুপহিতাধারভূতমনুপহিতং চৈতন্যং তত্পদলক্ষ্যার্থোভবতি .. ১৪৫..
অজ্ঞানাদিব্যষ্টিরেতদুপহিতাল্পজ্ঞত্বাদিবিশিষ্টচৈতন্যমেত-
দনুপহিতং চৈতত্ত্রযং তপ্তাযঃপিণ্ডবদেকত্বেনাবভাসমানং
ত্বম্পদবাচ্যার্থো ভবতি .. ১৪৬..
এতদুপাধ্যুপহিতাধারভূতমনুপহিতং প্রত্যগানন্দং
তুরীযং চৈতন্যং ত্বম্পদলক্ষ্যার্থো ভবতি .. ১৪৭..
অথ মহাবাক্যার্থো বর্ণ্যতে . ইদং তত্ত্বমসিবাক্যং
সম্বন্ধত্রযেণাখণ্ডার্থবোধকং ভবতি .. ১৪৮..
সম্বন্ধত্রযং নাম পদযোঃ সামানাধিকরণ্যং
পদার্থযোর্বিশেষণবিশেষ্যভাবঃ প্রত্যগাত্ম-
লক্ষণযোর্লক্ষ্যলক্ষণভাবশ্চেতি .. ১৪৯..
তদুক্তম্ –
“সামানাধিকরণ্যং চ বিশেষণবিশেষ্যতা .
লক্ষ্যলক্ষণসম্বন্ধঃ পদার্থপ্রত্যগাত্মনাম্ .. “ইতি .. ১৫০..
সামানাধিকরণ্যসম্বন্ধস্তাবদ্যথা সোঽযং দেবদত্ত ইত্যস্মিন্বাক্যে
তত্কালবিশিষ্টদেবদত্তবাচকসশব্দস্যৈতত্কালবিশিষ্টদেবদত্ত-
বাচকাযংশব্দস্য চৈকস্মিন্পিণ্ডে তাত্পর্যসম্বন্ধঃ . তথা চ
তত্ত্বমসীতি বাক্যেঽপি পরোক্ষত্বাদিবিশিষ্টচৈতন্যবাচকতত্পাদ-
স্যাপরোক্ষত্বাদি বিশিষ্টচৈতন্যবাচকত্বম্পদস্য চৈকস্মিংশ্চৈতন্যে
তাত্পর্যসম্বন্ধঃ .. ১৫১..
বিশেষণবিশেষ্যভাবসম্বন্ধস্তু যথা তত্রৈব বাক্যে
সশব্দার্থতত্কালবিশিষ্টদেবদত্তস্যাযংশব্দার্থেতত্কালবিশিষ্টদেবদত্তস্য
চান্যোন্যভেদব্যাবর্তকতযা বিশেষণবিশেষ্যভাবঃ . তথাত্রাপি বাক্যে
তত্পদার্থপরোক্ষত্বাদিবিশিষ্টচৈতন্যস্য ত্বম্পদার্থাপরোক্ষত্বাদিবিশিষ্টচৈতন্যস্য
চান্যোন্যভেদব্যাবর্তকতযা বিশেষণবিশেষ্যভাবঃ .. ১৫২..
লক্ষ্যলক্ষণসম্বন্ধস্তু যথা তত্রৈব সশব্দাযংশব্দযোস্তদর্থযোর্বা
বিরুদ্ধতত্কালৈতত্কালবিশিষ্টত্বপরিত্যাগেনাবিরুদ্ধদেবদত্তেন সহ লক্ষ্যলক্ষণভাবঃ .
তথাত্রাপি বাক্যে তত্ত্বম্পদযোস্তদর্থযোর্বা বিরুদ্ধপরোক্ষত্বাপরোক্ষত্বাদি-
বিশিষ্টত্বপরিত্যাগেনাবিরুদ্ধচৈতন্যেন সহ লক্ষ্যলক্ষণভাবঃ .. ১৫৩..
ইযমেব ভাগলক্ষণেত্যুচ্যতে .. ১৫৪..
অস্মিন্বাক্যে নীলমুত্পলমিতি বাক্যবদ্বাক্যার্থো ন সঙ্গচ্ছতে .. ১৫৫..
তত্র তু নীলপদার্থনীলগুণস্যোত্পলপদার্থোত্পলদ্রব্যস্য চ
শৌক্ল্যপটাদিভেদব্যাবর্তকতযান্যোন্যবিশেষণবিশেষ্য-
রূপসংসর্গস্যান্যতরবিশিষ্টস্যান্যতরস্য তদৈক্যস্য বা
বাক্যার্থত্বাঙ্গীকারে প্রমাণান্তরবিরোধাভাবাত্তদ্বাক্যার্থঃ
সঙ্গচ্ছতে .. ১৫৬..
অত্র তু তত্পদার্থপরোক্ষত্বাদিবিশিষ্টচৈতন্যস্য
ত্বংপদার্থাপরোক্ষত্বাদিবিশিষ্টচৈতন্যস্য চান্যোন্যভেদব্যাবর্তকতযা
বিশেষণবিশেষ্যভাবসংসর্গস্যান্যতরবিশিষ্টস্যান্যতরস্য
তদৈক্যস্য বা বাক্যার্থত্বাঙ্গীকারে প্রত্যক্ষাদিপ্রমাণবিরোধাদ্বাক্যার্থো
ন সঙ্গচ্ছতে .. ১৫৭..
তদুক্তম্ –
“সংসর্গো বা বিশিষ্টো বা বাক্যার্থো নাত্র সম্মতঃ .
অখণ্ডৈকরসত্বেন বাক্যার্থো বিদুষাং মতঃ .. “ইতি (পঞ্চদশী ৭|৭৫ ).. ১৫৮..
অত্র গঙ্গাযাং ঘোষঃ প্রতিবসতীতিবাক্যবজ্জহল্লক্ষণাপি ন সঙ্গচ্ছতে .. ১৫৯..
তত্র তু গঙ্গাঘোষযোরাধারাধেযভাবলক্ষণস্য বাক্যার্থস্যাশেষতো
বিরুদ্ধত্বাদ্বাক্যার্থমশেষতঃ পরিত্যজ্য তত্সম্বন্ধিতীরলক্ষণাযা
যুক্তত্বাজ্জহল্লক্ষণা সঙ্গচ্ছতে .. ১৬০..
অত্র তু পরোক্ষাপরোক্ষচৈতন্যৈকত্বলক্ষণস্য
বাক্যার্থস্য ভাগমাত্রে বিরোধাদ্ভাগান্তরমপি
পরিত্যজ্যান্যলক্ষণাযা অযুক্তত্বাজ্জহল্লক্ষণা
ন সঙ্গচ্ছতে .. ১৬১..
ন চ গঙ্গাপদং স্বার্থপরিত্যাগেন তীরপদার্থং
যথা লক্ষযতি তথা তত্পদং ত্বংপদং বা
স্বার্থপরিত্যাগেন ত্বংপদার্থং তত্পদার্থং বা
লক্ষযত্বতঃ কুতো জহল্লক্ষণা ন সঙ্গচ্ছত
ইতি বাচ্যম্ .. ১৬২..
তত্র তীরপদাশ্রবণেন তদর্থাপ্রতীতৌ লক্ষণযা
তত্প্রতীত্যপেক্ষাযামপি তত্ত্বংপদযোঃ শ্রূযমাণত্বেন
তদর্থপ্রতীতৌ লক্ষণযা পুনরন্যতরপদেনান্যতর-
পদার্থপ্রতীত্যপেক্ষাভাবাত্ .. ১৬৩..
অত্র শোণো ধাবতীতিবাক্যবদজহল্লক্ষণাপি ন সম্ভবতি .. ১৬৪..
তত্র সোণগুণগমনলক্ষ্ণস্য বাক্যার্থস্য
বিরুদ্ধত্বাত্তদপরিত্যাগেন তদাশ্রযাশ্বাদিলক্ষণযা
তদ্বিরোধপরিহারসম্ভবাদজহল্লক্ষণা সম্ভবতি .. ১৬৫..
অত্র তু পরোক্ষত্বাপরোক্ষত্বাদিবিশিষ্টচৈতন্যৈকত্বস্য
বাক্যার্থস্য বিরুদ্ধত্বাত্তদপরিত্যাগেন তত্সম্বন্ধিনো যস্য
কস্যচিদর্থস্য লক্ষিতত্বেঽপি তদ্বিরোধপরিহারাসম্ভবা-
দজহল্লক্ষণা ন সম্ভবত্যেব .. ১৬৬..
ন চ তত্পদং ত্বংপদং বা স্বার্থবিরুদ্ধাংশপরিত্যাগেনাং-
শান্তরসহিতং ত্বংপদার্থং তত্পদার্থং বা লক্ষযত্বতঃ
কথং প্রকারান্তরেণ ভাগলক্ষণাঙ্গীকরণমিতি বাচ্যম্ .. ১৬৭..
একেন পদেন স্বার্থাংশপদার্থান্তরোভযলক্ষণাযা
অসম্ভবাত্পদান্তরেণ তদর্থপ্রতীতৌ লক্ষণযা
পুনস্তত্প্রতীত্যপেক্ষাভাবাচ্চ .. ১৬৮..
তস্মাদ্যথা সোঽযং দেবদত্ত ইতি বাক্যং তদর্থো বা
তত্কালৈতত্কালবিশিষ্টদেবদত্তলক্ষণস্য বাক্যার্থস্যাংশে
বিরোধাদ্বিরুদ্ধতত্কালৈতত্কালবিশিষ্টাংশং পরিত্যজ্যাবিরুদ্ধং
দেবদত্তংশমাত্রং লক্ষযতি তথা তত্ত্বমসীতিবাক্যং তদর্থো বা
পরোক্ষত্বাপরোক্ষত্বাদিবিশিষ্টচৈতন্যৈকত্বলক্ষণস্য
বাক্যার্থস্যাংশে বিরোধাদ্বিরুদ্ধপরোক্ষত্বাপরোক্ষত্ববিশিষ্টাংশং
পরিত্যজ্যাবিরুদ্ধমখণ্ডচৈতন্যমাত্রং লক্ষযতীতি .. ১৬৯..
অথাধুনাহং ব্রহ্মাস্মি (বৃ উ ১ . ৪ . ১০ )
ইত্যনুভববাক্যার্থো বর্ণ্যতে .. ১৭০..
এবমাচার্যেণাধ্যারোপাপবাদপুরঃসরং তত্ত্বংপদার্থৌ
শোধযিত্বা বাক্যেনাখণ্ডার্থেঽববোধিতেঽধিকারিণোঽহং
নিত্যশুদ্ধবুদ্ধমুক্তসত্যস্বভাবপরমানন্দানন্তাদ্বযং
ব্রহ্মাস্মীত্যখণ্ডাকারাকারিতা চিত্তবৃত্তিরুদেতি .. ১৭১..
সা তু চিত্প্রতিবিম্বসহিতা সতী প্রত্যগভিন্নমজ্ঞাতং পরংব্রহ্ম
বিষযীকৃত্য তদ্গতাজ্ঞানমেব বাধতে তদা পটকারণতন্তুদাহে
পটদাহবদখিলকারণেঽজ্ঞানে বাধিতে সতি তত্কার্যস্যাখিলস্য
বাধিতত্বাত্তদন্তর্ভূতাখণ্ডাকারাকারিতা চিত্তবৃত্তিরপি বাধিতা ভবতি .. ১৭২..
তত্র প্রতিবিম্বিতং চৈতন্যমপি যথা দীপপ্রভাদিত্যপ্রভাবভাসনাসমর্থা
সতী তযাভিভূতা ভবতি তথা স্বযংপ্রকাশমানপ্রত্যগভিন্নপরব্রহ্মাবভাসনানর্হতযা
তেনাভিভূতং সত্ স্বোপাধিভূতাখণ্ডবৃত্তের্বাধিতত্বাদ্দর্পণাভাবে
মুখপ্রতিবিম্বস্য মুখমাত্রত্ববত্প্রত্যগভিন্নপরব্রহ্মমাত্রং ভবতি .. ১৭৩..
এবং চ সতি “মনসৈবানুদ্রষ্টব্যম্ “(বৃ উ ৪ . ৪ . ১৯ )”যন্মনসা ন মনুতে ”
(কে উ ১ . ৫ )ইত্যনযোঃ শ্রুত্যোরবিরোধো বৃত্তিব্যাপ্যত্বাঙ্গীকারেণ
ফলব্যাপ্যত্বপ্রতিষেধপ্রতিপাদনাত্ .. ১৭৪..
তদুক্তম্ –
“ফলব্যাপ্যত্বমেবাস্য শাস্ত্রকৃদ্ভির্নিবারিতম্ .
ব্রহ্মণ্যজ্ঞাননাশায বৃত্তিব্যাপ্তিরপেক্ষিতা .. “ইতি (পঞ্চদশী ৬ . ৯০ ).. ১৭৫..
“স্বযংপ্রকাশমানত্বান্নাভাস উপযুজ্যতে . “ইতি চ (পঞ্চদশী ৬ . ৯২ ).. ১৭৬..
জডপদার্থাকারাকারিতচিত্তবৃত্তের্বিশেষোঽস্তি .. ১৭৭..
তথাহি . অযং ঘট ইতি ঘটাকারাকারিতচিত্তবৃত্তিরজ্ঞাতং ঘটং
বিষযীকৃত্য তদ্গতাজ্ঞাননিরসনপুরঃসরং স্বগতচিদাভাসেন
জডং ঘটমপি ভাসযতি .. ১৭৮..
তদুক্তং –
“বুদ্ধিতস্থচিদাভাসৌ দ্বাবপি ব্যাপ্নুতো ঘটম্ .
তত্রাজ্ঞানং ধিযা নশ্যেদাভাসেন ঘটঃ স্ফুরেত্ .. “ইতি . (পঞ্চদশী ৭ . ৯১ ).. ১৭৯..
যথা দীপপ্রভামণ্ডলমন্দকারগতং ঘটপটাদিকং বিষযীকৃত্য
তদ্গতান্ধকারনিরসনপুরঃসরং স্বপ্রভযা তদপি ভাসযতীতি .. ১৮০..