বেদান্তসারনাম ০৩

৩
ইদানীং প্রত্যগাত্মনীদমিদমযমযমারোপযতীতি বিশেষত উচ্যতে .. ১২২..
অতিপ্রাকৃতস্তু “আত্মা বৈ জাযতে পুত্রঃ “ইত্যাদিশ্রুতেঃ স্বস্মিন্নিব
পুত্রেঽপি প্রেমদর্শনাত্পুত্রে পুষ্টে নষ্টে চাহমেব পুষ্টো নষ্টশ্চেত্যাদ্যনুভবাচ্চ
পুত্র আত্মেতি বদতি .. ১২৩..
চার্বাকস্তু “স বা এষ পুরুষোঽন্নরসমযঃ “(তৈ উ ২ . ১ . ১ “)ইত্যাদিশ্রুতেঃ
প্রদীপ্তগৃহাত্স্বপুত্রং পরিত্যজ্যাপি স্বস্য নির্গমদর্শনাত্স্থূলোঽহং
কৃশোঽহমিত্যাদ্যনুভবাচ্চ স্থূলশরীরমাত্মেতি বদতি .. ১২৪..
অপরশ্চার্বাকঃ “তে হ প্রাণাঃ প্রজাপতিং পিতরমেত্যোচুঃ “(ছা উ ৫ . ১ . ৭ )
ইত্যাদিশ্রুতেরিন্দ্রিযাণামভাবে শরীরচলনাভাবাত্কাণোঽহং
বধিরোঽহমিত্যাদ্যনুভবাচ্চেন্দ্রিযাণ্যাত্মেতি বদতি .. ১২৫..
অপরশ্চার্বাকঃ “অন্যোঽন্তর আত্মা প্রাণমযঃ “(তৈ উ ২ . ২ . ১ )
ইত্যাদিশ্রুতেঃ প্রাণাভাব ইন্দ্রিযাদিচলনাযোগাদহমশনাযাবানহং
পিপাসাবানিত্যাদি অনুভবাচ্চ প্রাণ আত্মেতি বদতি .. ১২৬..
অন্যস্তু চার্বাকঃ “অন্যোঽন্তর আত্মা মনোমযঃ “(তৈ উ ২ . ৩ . ১ )
ইত্যাদিশ্রুতের্মনসি সুপ্তে প্রাণাদেরভাবাদহং সঙ্কল্পবানহং
বিকল্পবানিত্যাদ্যনুভবাচ্চ মন আত্মেতি বদতি .. ১২৭..
বৌদ্ধস্তু “অন্যোঽন্তর আত্মা বিজ্ঞানমযঃ “(তৈ উ ২ . ৪ . ১ )
ইত্যাদিশ্রুতেঃ কর্তুরভাবে করণস্য শক্ত্যভাবাদহং কর্তাহং ভোক্তেত্যাদ্যনুভবাচ্চ
বুদ্ধিরাত্মেতি বদতি .. ১২৮..
প্রাভাকরতার্কিকৌ তু “অন্যোঽন্তর আত্মানন্দমযঃ “(তৈ উ ২ . ৫ . ১ )
ইত্যাদিশ্রুতের্বুদ্ধ্যাদীনামজ্ঞানে লযদর্শনাদহমজ্ঞোঽহমজ্ঞানীত্যাদ্যনুভবাচ্চাজ্ঞানমাত্মেতি বদতঃ .. ১২৯..
ভাটস্তু “প্রজ্ঞানঘন এবানন্দমযঃ “(মাণ্ডূ উ ৫ )ইত্যাদিশ্রুতেঃ সুষুপ্তৌ
প্রকাশাপ্রকাশসদ্ভাবান্মামহং ন জানামীত্যাদ্যনুভবাচ্চাজ্ঞানোপহিতং
চৈতন্যমাত্মেতি বদতি .. ১৩০..
অপরো বৌদ্ধঃ “অসদেবেদমগ্র আসীত্ “(ছা উ ৬ . ২ . ১ )
ইত্যাদিশ্রুতেঃ সুষুপ্তৌ সর্বাভাবাদহং সুষুপ্তৌ নাসমিত্যুত্থিতস্য
স্বাভাবপরামর্শবিষযানুভবাচ্চ শূন্যমাত্মেতি বদতি .. ১৩১..
এতেষাং পুত্রাদীনামনাত্মত্বমুচ্যতে .. ১৩২..
এতৈরতিপ্রাকৃতাদিবাদিভিরুক্তেষু শ্রুতিযুক্ত্যনুভবাভাসেষু
পূর্বপূর্বোক্তশ্রুতিযুক্ত্যনুভবাভাসানামুত্তরোত্ততরশ্রুতিযুক্ত্যনুভবাভাসৈ-
রাত্মত্ববাধদর্শনাত্পুত্রাদীনামনাত্মত্বং স্পষ্টমেব .. ১৩৩..
কিঞ্চ প্রত্যগস্থূলোঽচক্ষুরপ্রাণোঽমনা অকর্তা চৈতন্যং চিন্মাত্রং
সদিত্যাদিপ্রবলশ্রুতিবিরোধাদস্য পুত্রাদিশূন্যপর্যন্তস্য জডস্য
চৈতন্যভাস্যত্বেন ঘটাদিবদনিত্যত্বাদহং ব্রহ্মেতি
বিদ্বদনুভবপ্রাবল্যাচ্চ তত্তচ্ছ্রুতিযুক্ত্যনুভবভাসানাং
বাধিতত্বাদপি পুত্রাদিশূন্যপর্যন্তমখিলমনাত্মৈব .. ১৩৪..
অতস্তত্তদ্ভাসকং নিত্যশুদ্ধবুদ্ধমুক্তসত্যস্বভাবং
প্রত্যক্চৈতন্যমেবাত্মবস্ত্বিতি বেদান্তবিদ্বদনুভবঃ .. ১৩৫..
এবমধ্যারোপঃ .. ১৩৬..