বেদান্তসারনাম ০২

২
অসর্পভূতাযাং রজ্জৌ সর্পারোপবত্ বস্তুনি অবস্ত্বারোপঃ – অধ্যারোপঃ .. ৩২..
বস্তু – সচ্চিদানন্দমদ্বযং ব্রহ্ম অজ্ঞানাদিসকলজডসমূহোঽবস্তু .. ৩৩..
অজ্ঞানং তু – সদসদ্ভ্যামনির্বচনীযং ত্রিগুণাত্মকং জ্ঞানবিরোধি
ভাবরূপং যত্কিঞ্চিদিতি বদন্ত্যহমজ্ঞ ইত্যাদ্যনুভবাত্ “দেবাত্মশক্তিং
স্বগুণৈর্নিগূঢাম্ “(শ্বেত উ ১ . ৩ )ইত্যাদিশ্রুতেশ্চ .. ৩৪..
ইদমজ্ঞানং সমষ্টিব্যষ্ট্যভিপ্রাযেণৈকমনেকমিতি চ ব্যবহ্রিযতে .. ৩৫..
তথাহি যথা বৃক্ষাণাং সমষ্ট্যভিপ্রাযেণ বনমিত্যেকত্বব্যপদেশো
যথা বা জলানাং সমষ্ট্যভিপ্রাযেণ জলাশয ইতি তথা নানাত্বেন
প্রতিভাসমানানাং জীবগতাজ্ঞানানাং সমষ্ট্যভিপ্রাযেণ তদেকত্বব্যপদেশঃ
“অজামেকাং “(শ্বে উ ৪ | ৫ )ইত্যাদিশ্রুতেঃ .. ৩৬..
ইযং সমষ্টিরুত্কৃষ্টোপাধিতযা বিশুদ্ধসত্ত্বপ্রধানা .. ৩৭..
এতদুপহিতং চৈতন্যং সর্বজ্ঞসর্বেশ্বরত্বসর্বনিযন্তৃত্বাদিগুণকমব্যক্তমন্তর্যামী
জগত্কারণমীশ্বর ইতি চ ব্যপদিশ্যতে সকলাজ্ঞানাবভাসকত্বাত্ .
“যঃ সর্বজ্ঞঃ সর্ববিত্ “(মুণ্ড উ ১ | ১ | ৯ )ইতি শ্রুতেঃ .. ৩৮..
ঈশ্বরস্যেযং সমষ্টিরখিলকারণত্বাত্কারণশরীরমানন্দপ্রচুরত্বা-
ত্কোশবদাচ্ছাদকত্বাচ্চানন্দমযকোশঃ সর্বোপরমত্বা-
ত্সুষুপ্তিরত এব স্থূলসূক্ষ্মপ্রপঞ্চলযস্থানমিতি চ উচ্যতে .. ৩৯..
যথা বনস্য ব্যষ্ট্যভিপ্রাযেণ বৃক্ষা ইত্যনেকত্বব্যপদেশো যথা বা জলাশযস্য
ব্যষ্ট্যভিপ্রাযেণ জলানীতি তথাজ্ঞানস্য ব্যষ্ট্যভিপ্রাযেণ
তদনেকত্বব্যপদেশঃ “ইন্দ্রো মাযাভিঃ পুরুরূপ ঈযতে “(ঋগ্বেদ ৬ | ৪৭ | ১৮ )
ইত্যাদিশ্রুতেঃ .. ৪০..
অত্র ব্যস্তসমস্তব্যাপিত্বেন ব্যষ্টিসমষ্টিতাব্যপদেশঃ .. ৪১..
ইযং ব্যষ্টির্নিকৃষ্টোপাধিতযা মলিনসত্ত্বপ্রধানা .. ৪২..
এতদুপহিতং চৈতন্যমল্পজ্ঞত্বানীশ্বরত্বাদিগুণকং প্রাজ্ঞ
ইত্যুচ্যত একাজ্ঞানাবভাসকত্বাত্ .. ৪৩..
অস্য প্রাজ্ঞত্বমস্পষ্টোপাধিতযানতিপ্রকাশকত্বাত্ .. ৪৪..
অস্যাপীযমহঙ্কারাদিকারণত্বাত্কারণশরীরমানন্দ-
প্রচুরত্বাত্কোশবদাচ্ছাদকত্বাচ্চানন্দমযকোশঃ
সর্বোপরমত্বাত্সুষুপ্তিরত এব স্থূলসূক্ষ্মশরীরপ্রপঞ্চ-
লযস্থানমিতি চ উচ্যতে .. ৪৫..
তদানীমেতাবীশ্বরপ্রাজ্ঞৌ চৈতন্যপ্রদীপ্তাভিরতিসূক্ষ্মাভি-
রজ্ঞানবৃত্তিভিরানন্দমনুভবতঃ “আনন্দভুক্ চেতোমুখঃ
প্রাজ্ঞঃ “(মাণ্ডূ উ ৫ )ইতি শ্রুতেঃ সুখমহমবাপ্সম্
ন কিঞ্চিদবেদিষমিথ্যুত্থিতস্যপরামর্শোপপত্তেশ্চ .. ৪৬..
অনযোঃ সমষ্টিব্যষ্ট্যোর্বনবৃক্ষযোরিব জলাশয- জলযোরিব বাভেদঃ .. ৪৭..
এতদুপহিতযোরীশ্বরপ্রাজ্ঞযোরপি বনবৃক্ষাবচ্ছিন্নাকাশযোরিব
জলাশযজলগতপ্রতিবিম্বাকাশযোরিব বাভেদঃ “এষ সর্বেশ্বর
(এষ সর্বজ্ঞ এষোঽন্তর্যাম্যেষ যোনিঃ সর্বস্য প্রভবাপ্যযৌ হি
ভূতানাম্ )”(মাণ্ডূ উ ৬ )ইত্যাদি শ্রুতেঃ .. ৪৮..
বনবৃক্ষতদবচ্ছিন্নাকাশযোর্জলাশযজলতদ্গতপ্রতিবিম্বাকাশযো-
র্বাধারভূতানুপহিতাকাশবদনযোরজ্ঞানতদুপহিতচৈতন্যযো-
রাধারভূতং যদনুপহিতং চৈতন্যং তত্তুরীযমিত্যুচ্যতে
“শান্তং শিবমদ্বৈতং চতুর্থং মন্যন্তে (স আত্মা স বিজ্ঞেযঃ )”
(মাণ্ডূ উ ৭ )ইত্যাদিশ্রুতেঃ .. ৪৯..
ইদমেব তুরীযং শুদ্ধচৈতন্যমজ্ঞানাদিতদুপহিতচৈতন্যাভ্যাং তপ্তাযঃ
পিণ্ডবদবিবিক্তং সন্মহাবাক্যস্য বাচ্যং বিবিক্তং সল্লক্ষ্যমিতি চোচ্যতে .. ৫০..
অস্যাজ্ঞানস্যাবরণবিক্ষেপনামকমস্তি শক্তিদ্বযম্ .. ৫১..
আবরণশক্তিস্তাবদল্পোঽপি মেঘোঽনেকযোজনাযতমাদিত্য-
মণ্ডলমবলোকযিতৃনযনপথপিধাযকতযা যথাচ্ছাদযতীব
তথাজ্ঞানং পরিচ্ছিন্নমপ্যাত্মানমপরিচ্ছিন্নমসংসারিণ-
মবলোকযিতৃবুদ্ধিপিধাযকতযাচ্ছাদযতীব তাদৃশং সামর্থ্যম্ .
তদুক্তং – “ঘনচ্ছন্নদৃষ্টির্ঘনচ্ছন্নমর্কং যথা
মন্যতে নিষ্প্রভং চাতিমূঢঃ . তথা বদ্ধবদ্ভাতি যো মূঢদৃষ্টেঃ
স নিত্যোপলব্ধিস্বরূপোঽহমাত্মা .. ‘ইতি (হস্তামলকম্ ১০ | ).. ৫২..
অনযা আবৃত্তস্যাত্মনঃ কর্তৃত্বভোক্তৃত্বসুখিত্বদুঃখিত্বাদিসংসারসম্ভাবনাপি
ভবতি যথা স্বাজ্ঞানেনাবৃতাযাং রজ্জ্বাং সর্পত্বসম্ভাবনা .. ৫৩..
বিক্ষেপশক্তিস্তু যথা রজ্জ্বজ্ঞানং স্বাবৃত রজ্জৌ স্বশক্ত্যা
সর্পাদিকমুদ্ভাবযত্যেবমজ্ঞানমপি স্বাবৃতাত্মনি স্বশক্তাদিপ্রপঞ্চমুদ্ভাবযতি
তাদৃশং সামর্থ্যম্ . তদুক্তম্ – “বিক্ষেপশক্তির্লিঙ্গাদি ব্রহ্মাণ্ডান্তং
জগত্ সৃজেত্”ইতি . (বাক্যসুধা ১৩ ).. ৫৪..
শক্তিদ্বযবদজ্ঞানোপহিতং চৈতন্যং স্বপ্রধানতযা নিমিত্তং
স্বোপাধিপ্রধানতযোপাদনং চ ভবতি .. ৫৫..
যথা লূতা তন্তুকার্যং প্রতি স্বপ্রধানতযা নিমিত্তং
স্বশরীরপ্রধানতযোপাদানঞ্চ ভবতি .. ৫৬..
তমঃপ্রধানবিক্ষেএপশক্তিমদজ্ঞানোপহিতচৈতন্যাদাকাশ
আকাশাদ্বাযুর্বাযোরগ্নিরগ্গ্নেরাপোঽদ্ভ্যঃ পৃথিবী
চোত্পদ্যতে “এতস্মাদাত্মন আকাশঃ সম্ভূতঃ ”
(তৈ উ ২ . ১ . ১ )ইত্যাদিশ্রুতেঃ .. ৫৭..
তেষু জাড্যাধিক্যদর্শনাত্তমঃপ্রাধান্যং তত্কারণস্য .
তদানীং সত্ত্বরজস্তমাংসি কারণগুণপ্রক্রমেণ
তেষ্বাকাশাদিষুত্পদ্যন্তে .. ৫৮..
এতান্যেব সূক্ষ্মভূতানি তন্মাত্রাণ্যপঞ্চীকৃতানি চোচ্যন্তে .. ৫৯..
এতেভ্যঃ সূক্ষ্মশরীরাণি স্থূলভূতানি চোত্পদ্যন্তে .. ৬০..
সূক্ষ্মশরীরাণি সপ্তদশাবযবানি লিঙ্গশরীরাণি .. ৬১..
অবযবাস্তু জ্ঞানেন্দ্রিযপঞ্চকং বুদ্ধিমনসী কর্মেন্দ্রিযপঞ্চকং
বাযুপঞ্চকং চেতি .. ৬২..
জ্ঞানেন্দ্রিযাণি শ্রোত্রত্বক্চক্ষুর্জিহ্বাঘ্রাণাখ্যানি .. ৬৩..
এতান্যাকাশাদীনাং সাত্ত্বিকাংশেভ্যো ব্যস্তেভ্যঃ
পৃথক্ পৃথক্ ক্রমেণোত্পদ্যন্তে .. ৬৪..
বুদ্ধির্নাম নিশ্চযাত্মিকান্তঃকরণবৃত্তিঃ .. ৬৫..
মনো নাম সঙ্কল্পবিকল্পাত্মিকান্তঃকরণবৃত্তিঃ .. ৬৬..
অনযোরেব চিত্তাহঙ্কারযোরন্তর্ভাবঃ .. ৬৭..
অনুসন্ধানাত্মিকান্তঃকরণবৃত্তিঃ চিত্তম্ .. ৬৮..
অভিমানাত্মিকান্তঃকরণবৃত্তিঃ অহঙ্কারঃ .. ৬৯..
এতে পুনরাকাশাদিগতসাত্ত্বিকাংশেভ্যো মিলিতেভ্য উত্পদ্যন্তে .. ৭০..
এতেষাং প্রকাশাত্মকত্বাত্সাত্ত্বিকাংশকার্যত্বম্ .. ৭১..
ইযং বুদ্ধির্জ্ঞানেন্দ্রিযৈঃ সহিতা বিজ্ঞানমযকোশো ভবতি .. ৭২..
অযং কর্তৃত্বভোক্তৃত্বসুখিত্বদুঃখিত্বাদ্যভিমানত্বেনেহলোকপরলোকগামী
ব্যবহারিকো জীব ইত্যুচ্যতে .. ৭৩..
মনস্তু জ্ঞানেন্দ্রিযৈঃ সহিতং সন্মনোমযকোশো ভবতি .. ৭৪..
কর্মেন্দ্রিযাণি বাক্পাণিপাদপাযূপস্থাখ্যানি .. ৭৫..
এতানি পুনরাকাশাদীনাং রজোংশেভ্যো ব্যস্তেভ্যঃ পৃথক্ পৃথক্ ক্রমেণোত্পদ্যতে .. ৭৬..
বাযবঃ প্রাণাপানব্যানোদানসমানাঃ .. ৭৭..
প্রাণো নাম প্রাগ্গমনবান্নাসাগ্রস্থানবর্তী .. ৭৮..
অপানো নামাবাগ্গমনবান্পায্বাদিস্থানবর্তী .. ৭৯..
ব্যানো নাম বিষ্বগ্গমনবানখিলশরীরবর্তী .. ৮০..
উদানো নাম কণ্ঠস্থানীয ঊর্ধ্বগমনবানুত্ক্রমণবাযুঃ .. ৮১..
সমানো নাম শরীরমধ্যগতাশিতপীতান্নাদিসমীকরণকরঃ .. ৮২..
সমীকরণন্তু পরিপাককরণং রসরুধিরশুক্রপুরীষাদিকরণমিতি যাবত্ .. ৮৩..
কেচিত্তু নাগকূর্মকৃকলদেবদত্তধনঞ্জযাখ্যাঃ পঞ্চান্যে
বাযবঃ সন্তীতি বদন্তি .. ৮৪..
তত্র নাগ উদ্গিরণকরঃ . কূর্ম উন্মীলনকরঃ . কৃকলঃ ক্ষুত্করঃ .
দেবদত্তো জৃম্ভণকরঃ . ধনঞ্জযঃ পোষণকরঃ .. ৮৫..
এতেষাং প্রাণাদিষ্বন্তর্ভাবাত্প্রাণাদযঃ পঞ্চৈবেতি কেচিত্ .. ৮৬..
এতত্প্রাণাদিপঞ্চকমাকাশাদিগতরজোংশেভ্যোমিলিতেভ্য উত্পদ্যতে .. ৮৭..
ইদং প্রাণাদিপঞ্চকং কর্মেন্দ্রিযৈঃ সহিতং সত্প্রাণমযকোশো ভবতি .
অস্য ক্রিযামকত্বেন রজোংশকার্যত্বম্ .. ৮৮..
এতেষু কোশেষু মধ্যে বিজ্ঞানমযো জ্ঞানশক্তিমান্ কর্তৃরূপঃ .
মনোময ইচ্ছাশক্তিমান্ করণরূপঃ .
প্রাণমযঃ ক্রিযাশক্তিমান্ কার্যরূপঃ .
যোগ্যত্বাদেবমেতেষাং বিভাগ ইতি বর্ণযন্তি .
এতত্কোশত্রযং মিলিতং সত্সূক্ষ্মশরীরমিত্যুচ্যতে .. ৮৯..
অত্রাপ্যখিলসূক্ষ্মশরীরমেকবুদ্ধিবিষযতযা বনবজ্জলাশযবদ্বা
সমষ্টিরনেকবুদ্ধিবিষযতযা বৃক্ষবজ্জলবদ্বা ব্যষ্টিরপি ভবতি .. ৯০..
এতত্সমষ্ট্যুপহিতং চৈতন্যং সূত্রাত্মা হিরণ্যগর্ভঃ প্রাণশ্চেত্যুচ্যতে
সর্বত্রানুস্যূতত্বাজ্জ্ঞানেচ্ছাক্রিযাশক্তিমদুপহিতত্বাচ্চ .. ৯১..
অস্যৈষা সমষ্টিঃ স্থূলপ্রপঞ্চাপেক্ষযা সূক্ষ্মত্বাত্সূক্ষ্মশরীরং
বিজ্ঞানমযাদিকোশত্রযং জাগ্রদ্বাসনামযত্বাত্স্বপ্নোঽতএব
স্থূলপ্রপঞ্চলযস্থানমিতি চোচ্যতে .. ৯২..
এতদ্ব্যষ্ট্যুপহিতং চৈতন্যং তৈজসো ভবতি তেজোমযান্তঃকরণোপহিতত্বাত্ .. ৯৩..
অস্যাপীযং ব্যষ্টিঃ স্থূলশরীরাপেক্ষযা সূক্ষ্মত্বাদিতি হেতোরেব
সূক্ষ্মশরীরং বিজ্ঞানমযাদিকোশত্রযং জাগ্রদ্বাসনামযত্বাত্স্বপ্নোঽতএব
স্থূলশরীরলযস্থানমিতি চোচ্যতে .. ৯৪..
এতৌ সূত্রাত্মতৈজসৌ তদানীং মনোবৃত্তিভিঃ সূক্ষ্মবিষযাননুভবতঃ
“প্রবিবিক্তভুক্তেঐজসঃ “(মাণ্ডূ উ ৩)ইত্যদিশ্রুতেঃ .. ৯৫..
অত্রাপি সমষ্টিব্যষ্ট্যোস্তদুপহিতসূত্রাত্মতৈজসযোর্বনবৃক্ষবত্তদব-
চ্ছিন্নাকাশবচ্চ জলাশযজলবত্তদ্গতপ্রতিবিম্বাকাশবচ্চাভেদঃ .. ৯৬..
এবং সূক্ষ্মশরীরোত্পত্তিঃ .. ৯৭..
স্থূলভূতানি তু পঞ্চীকৃতানি .. ৯৮..
পঞ্চীকরণং ত্বাকাশাদিপঞ্চস্বেকৈকং দ্বিধা সমং বিভজ্য
তেষু দশসু ভাগেষু প্রাথমিকান্পঞ্চভাগান্প্রত্যেকং
চতুর্ধা সমং বিভজ্য তেষাং চতুর্ণাং ভাগানাং
স্বস্বদ্বিতীযার্ধভাগপরিত্যাগেন ভাগান্তরেষু যোজনম্ .. ৯৯..
তদুক্তম্ –
“দ্বিধা বিধায চৈকৈকং চতুর্ধা প্রথমং পুনঃ ..
স্বস্বেতরদ্বিতীযাংশৈর্যোজনাত্পঞ্চ পঞ্চতে ..”ইতি .. .. ১০০..
অস্যাপ্রামাণ্যং নাশঙ্কনীযং ত্রিবৃত্করণশ্রুতেঃ
পঞ্চীকরণস্যাপ্যুপলক্ষণত্বাত্ .. ১০১..
পঞ্চানাং পঞ্চাত্মকত্বে সমানেঽপি তেষু চ
“বৈশেষ্যাত্তু তদ্বাদস্তদ্বাদঃ “(ব্র সূ ২ . ৪ . ২২ )
ইতি ন্যাযেনাকাশাদিব্যপদেশঃ সম্ভবতি .. ১০২..
তদানীমাকাশে শব্দোঽভিব্যজ্যতে বাযৌ শব্দস্পর্শাবগ্নৌ
শব্দস্পর্শরূপাণ্যপ্সু শব্দস্পর্শরূপরসাঃ পৃথিব্যাং
শব্দস্পর্শরূপরসগন্ধাশ্চ .. ১০৩..
এতেভ্যঃ পঞ্চীকৃতেভ্যো ভূতেভ্যো ভূর্ভুবঃস্বর্মহর্জনস্তপঃসত্য-
মিত্যেতন্নামকানামুপর্যুপরিবিদ্যমানানামতলবিতলসুতলরসাতল-
তলাতলমহাতলপাতালনামকানামধোঽধোবিদ্যমানানাং
লোকানাং ব্রহ্মাণ্ডস্য তদন্তর্গতচতুর্বিধস্থূলশরীরাণাং
তদুচিতানামন্নপানাদীনাং চোত্পত্তির্ভবতি .. ১০৪..
চতুর্বিধশরীরাণি তু জরাযুজাণ্ডজস্বেদজোদ্ভিজ্জাখ্যানি .. ১০৫..
জরাযুজানি জরাযুভ্যো জাতানি মনুষ্যপশ্বাদীনি .. ১০৬..
অণ্ডজান্যণ্ডেভ্যো জাতানি পক্ষিপন্নগাদীনি .. ১০৭..
স্বেদজানি স্বেদেভ্যো জাতানি যূকমশকাদীনি .. ১০৮..
উদ্ভিজ্জানি ভূমিমুদ্ভিদ্য জাতানি লতাবৃক্ষাদীনি .. ১০৯..
অত্রাপি চতুর্বিধসকলস্থূলশরীরমেকানেকবুদ্ধিবিষযতযা
বনবজ্জলাশযবদ্বা সমষ্টির্বৃক্ষবজ্জলবদ্বা ব্যষ্টিরপি ভবতি .. ১১০..
এতত্সমষ্ট্যুপহিতং চৈতন্যং বৈশ্বানরো বিরাডিত্যুচ্যতে
সর্বনরাভিমানিত্বাদ্বিবিধং রাজমানত্বাচ্চ .. ১১১..
অস্যৈষা সমষ্টিঃ স্থূলশরীরমন্নবিকারত্বাদন্নমযকোশঃ
স্থূলভোগাযতনত্বাচ্চ স্থূলশরীরং জাগ্রদিতি চ ব্যপদিশ্যতে .. ১১২..
এতদ্ব্যষ্ট্যুপহিতং চৈতন্যং বিশ্ব ইত্যুচ্যতে সূক্ষ্মশরীরাভিমানমপরিত্যজ্য
স্থূলশরীরাদিপ্রবিষ্টত্বাত্ .. ১১৩..
অস্যাপ্যেষা ব্যষ্টিঃ স্থূলশরীরমন্নবিকারত্বাদেব
হেতোরন্নমযকোশো জাগ্রদিতি চোচ্যতে .. ১১৪..
তদানীমেতৌ বিশ্ববৈশ্বানরৌ দিগ্বাতার্কবরুণাশ্বিভিঃ
ক্রমান্নিযন্ত্রিতেন শ্রোত্রাদীন্দ্রিযপঞ্চকেন
ক্রমাচ্ছব্দস্পর্শরূপরসগন্ধানগ্নীন্দ্রোপেন্দ্রযমপ্রজাপতিভিঃ
ক্রমান্নিযন্ত্রিতেন বাগাদীন্দ্রিযপঞ্চকেন
ক্রমাদ্বচনাদানগমনবিসর্গানন্দাংশ্চন্দ্রচতুর্মুখশঙ্করাচ্যুতৈঃ
ক্রমান্নিযন্ত্রিতেন মনোবুদ্ধ্যহঙ্কারচিত্তাখ্যেনান্তরেন্দ্রিযচতুষ্কেণ
ক্রমাত্সঙ্কল্পনিশ্চযাহঙ্কার্যচৈত্তাংশ্চ সর্বানেতান্
স্থূলবিষযাননুভবতঃ “জাগরিতস্থানো বহিঃপ্রজ্ঞঃ “(মাণ্ডূ উ ৩)
ইত্যাদিশ্রুতেঃ .. ১১৫..
অত্রাপ্যনযোঃ স্থূলব্যষ্টিসমষ্ট্যোস্তদুপহিতবিশ্ববৈশ্বানরযোশ্চ
বনবৃক্ষবত্তদবচ্ছিন্নাকাশবচ্চ জলাশযজলবত্তগতপ্রতিবিম্বাকাশবচ্চ
পূর্ববদভেদঃ .. ১১৬..
এবং পঞ্চীকৃতপঞ্চভূতেভ্যঃ স্থূলপ্রপঞ্চোত্পত্তিঃ .. ১১৭..
এতেষাং স্থূলসূক্ষমকারণপ্রপঞ্চানামপি সমষ্টিরেকো
মহান্প্রপঞ্চো ভবতি যথাবান্তরবনানাং সমষ্টিরেকং মহদ্বনং ভবতি
যথা বাবান্তরজলাশযানাং সমষ্টিরেকো মহান্ জলাশযঃ .. ১১৮..
এতদুপহিতং বৈশ্বানরাদীশ্বরপর্যন্তং চৈতন্যপ্যবান্তরবনাবচ্ছিন্নাকাশবদবান্তর
জলাশযগতপ্রতিবিম্বাকাশবচ্চৈকমেব .. ১১৯..
আভ্যাং মহাপ্রপঞ্চদুপহিতচৈতন্যাভ্যাং তপ্তাযপিণ্ডবদবিবিক্তং
সদনুপহিতং চৈতন্যং “সর্বং খল্বিদং ব্রহ্ম “(ছান্দ উ ৩ . ১৪ . ১)
ইতি (মহা )বাক্যস্য বাচ্যং ভবতি বিবিক্তং সল্লক্ষ্যমপি ভবতি .. ১২০..
এবং বস্তুন্যবস্ত্বারোপোঽধ্যারোপঃ সামান্যেন প্রদর্শিতঃ .. ১২১..