বেদান্তসারনাম ০১

.. বেদান্তসার .. ..

অখণ্ডং সচ্চিদানন্দমবাঙ্মনসগোচরম্ .
আত্মানমখিলাধারমাশ্রযেঽভীষ্টসিদ্ধযে .. ১..
অর্থতোঽপ্যদ্বযানন্দানতীতদ্বৈতভানতঃ .
গুরূনারাধ্য বেদান্তসারং বক্ষ্যে যথামতি .. ২..
বেদান্তো নামোপনিষত্প্রমাণং তদুপকারীণি
শারীরকসূত্রাদীনি চ .. ৩..
অস্য বেদান্তপ্রকরণত্বাত্ তদীযৈঃ এব অনুবন্ধৈঃ
তদ্বত্তাসিদ্ধেঃ ন তে পৃথগালোচনীযাঃ .. ৪..
তত্র অনুবন্ধো নাম অধিকারিবিষযসম্বন্ধপ্রযোজনানি .. ৫..
অধিকারী তু বিধিবদধীতবেদবেদাঙ্গত্বেনাপাততোঽধিগতাখিল-
বেদার্থোঽস্মিন্ জন্মনি জন্মান্তরে বা কাম্যনিষিদ্ধবর্জনপুরঃসরং
নিত্যনৈমিত্তিকপ্রাযশ্চিত্তোপাসনানুষ্ঠানেন নির্গতনিখিলকল্মষতযা
নিতান্তনির্মলস্বান্তঃ সাধনচতুষ্টযসম্পন্নঃ প্রমাতা .. ৬..
কাম্যানি – স্বর্গাদীষ্টসাধনানি জ্যোতিষ্টোমাদীনি .. ৭..
নিষিদ্ধানি – নরকাদ্যনিষ্টসাধনানি ব্রাহ্মণহননাদীনি .. ৮..
নিত্যানি – অকরণে প্রত্যবাযসাধনানি সন্ধ্যাবন্দনাদীনি .. ৯..
নৈমিত্তিকানি – পুত্রজন্মাদ্যনুবন্ধীনি জাতেষ্ট্যাদীনি .. ১০..
প্রাযশ্চিত্তানি – পাপক্ষযসাধনানি চান্দ্রাযণাদীনি .. ১১..
উপাসনানি – সগুণব্রহ্মবিষযমানসব্যাপাররূপাণি
শাণ্ডিল্যবিদ্যাদীনি .. ১২..
এতেষাং নিত্যাদীনাং বুদ্ধিশুদ্ধিঃ পরং প্রযোজনমুপাসনানাং
তু চিত্তৈকাগ্র্যং “তমেতমাত্মানং বেদানুবচনেন ব্রাহ্মণা
বিবিদিষন্তি যজ্ঞেন”[বৃ উ ৪ . ৪ . ২২]ইত্যাদি শ্রুতেঃ
“তপসা কল্মষং হন্তি”[মনু ১২ – ১০৪]
ইত্যাদি স্মৃতেশ্চ .. ১৩..
নিত্যনৈমিত্তিকযোঃ উপাসনানাং ত্ববান্তরফলং
পিতৃলোকসত্যলোকপ্রাপ্তিঃ
“কর্মণা পিতৃলোকঃ বিদ্যযা দেবলোকঃ”[বৃ উ ১- ৫- ১৬]
ইত্যাদিশ্রুতেঃ .. ১৪..
সাধনানি – নিত্যানিত্যবস্তুবিবেকেহামুত্রার্থফলভোগবিরাগ-
শমাদিষট্কসম্পত্তিমুমুক্ষুত্বানি .. ১৫..
নিত্যানিত্যবস্তুবিবেকস্তাবদ্ ব্রহ্মৈব নিত্যং বস্তু
ততোঽন্যদখিলমনিত্যমিতি বিবেচনম্ .. ১৬..
ঐহিকানাং স্রক্চন্দনবনিতাদিবিষযভোগানাং
কর্মজন্যতযানিত্যত্ববদামুষ্মিকাণামপ্যমৃতাদি-
বিষযভোগানামনিত্যতযা তেভ্যো নিতরাং বিরতিঃ –
ইহামুত্রার্থফলভোগবিরাগঃ .. ১৭..
শমাদযস্তু – শমদমোপরতিতিতিক্ষাসমাধানশ্রদ্ধাখ্যাঃ .. ১৮..
শমস্তাবত্ – শ্রবণাদিব্যতিরিক্তবিষযেভ্যো মনসো নিগ্রহঃ .. ১৯..
দমঃ – বাহ্যেন্দ্রিযাণাং তদ্ব্যতিরিক্তবিষযেভ্যো নিবর্তনম্ .. ২০..
নিবর্তিতানামেতেষাং তদ্ব্যতিরিক্তবিষযেভ্য উপরমণমুপরতিরথবা
বিহিতানাং কর্মণাং বিধিনা পরিত্যাগঃ .. ২১..
তিতিক্ষা – শীতোষ্ণাদিদ্বন্দ্বসহিষ্ণুতা .. ২২..
নিগৃহীতস্য মনসঃ শ্রবণাদৌ তদনুগুণবিষযে চ
সমাধিঃ – সমাধানম্ .. ২৩..
গুরূপদিষ্টবেদান্তবাক্যেষু বিশ্বাসঃ – শ্রদ্ধা .. ২৪..
মুমুক্ষুত্বম্ – মোক্ষেচ্ছা .. ২৫..
এবম্ভূতঃ প্রমাতাধিকারী “শান্তো দান্তঃ”
[বৃ উ ৪. ৪. ২৩ ]ইত্যাদিশ্রুতেঃ . উক্তঞ্চ –
“প্রশান্তচিত্তায জিতেন্দ্রিযায চ
প্রহীণদোষায যথোক্তকারিণে .
গুণান্বিতাযানুগতায সর্বদা
প্রদেযমেতত্ সততং মুমুক্ষবে .. ২৬.. ”
(উপদেশসাহস্রী ৩২৪ . ১৬ . ৭২ )
বিষযঃ – জীবব্রহ্মৈল্যং শুদ্ধচৈতন্যং প্রমেযং
তত্র এব বেদান্তানাং তাত্পর্যাত্ .. ২৭..
সম্বন্ধস্তু – তদৈক্যপ্রমেযস্য তত্প্রতিপাদকোপনিষত্প্রমাণস্য
চ বোধ্যবোধকভাবঃ .. ২৮..
প্রযোজনং তু – তদৈক্যপ্রমেযগতাজ্ঞাননিবৃত্তিঃ
স্বস্বরূপানন্দাবাপ্তিশ্চ “তরতি শোকম্ আত্মবিত্
(ছাং উ ৭ . ১ . ৩ )
ইত্যাদিশ্রুতেঃ “ব্রহ্মবিদ্ ব্রহ্মৈব ভবতি ”
(মুণ্ড উ ৩ . ২ . ৯ )
ইত্যাদিশ্রুতেশ্চ .. ২৯..
অযমধিকারী জননমরণাদিসংসারানলসন্তপ্তো দীপ্তশিরা
জলরাশিমিবোপহারপাণিঃ শ্রোত্রিযং ব্রহ্মনিষ্ঠং গুরুমুপসৃত্য
তমনুসরতি “তদ্বিজ্ঞানার্থং স গুরুমেবাভিগচ্ছেত্ সমিত্পাণিঃ
শ্রোত্রিযং ব্রহ্মনিষ্ঠম্ “(মুণ্ড উ ১ . ২ . ১২ )
ইত্যাদিশ্রুতেঃ .. ৩০..
স গুরুঃ পরমকৃপযাধ্যারোপাপবাদন্যাযেনৈনমুপদিশতি
“তস্মৈ স বিদ্বানুপসন্নযা সম্যক্
প্রশান্তচিত্তায শমান্বিতায .
যেনাক্ষরং পুরুষং বেদ সত্যং
প্রোবাচ তাং তত্ত্বতো ব্রহ্মবিদ্যাম্ .. ”
(মুণ্ড উ ১ . ২ . ১৩ )
ইত্যাদিশ্রুতেঃ .. ৩১..