পঞ্চদশী ০৪

অথ চতুর্থোঽধ্যাযঃ .
দ্বৈতবিবেকঃ .
ঈশ্বরেণাপি জীবেন সৃষ্টং দ্বৈতং প্রপঞ্চ্যতে .
বিবেকে সতি জীবেন হেযো বন্ধঃ স্ফুটী ভবেত্ .. ১..
মাযাং তু প্রকৃতিং বিদ্যান্ মাযিনং তু মহেশ্বরম্ .
স মাযী সৃজতীত্য্ আহুঃ শ্বেতাশ্বতর শাখিনঃ .. ২..
আত্মা বা ইদম্ অগ্রে ঽভূত্ স ঈক্ষত সৃজা ইতি .
সংকল্পেনাসৃজল্ লোকান্ স এতান্ ইতি বহ্বৃচাঃ .. ৩..
খং বায্ব্ অগ্নি জলোর্ব্যোষধ্য্ অন্ন দেহাঃ ক্রমাদ্ অমী .
সম্ভূতা ব্রহ্মণস্ তস্মাদ্ এতস্মাদ্ আত্মনো ঽখিলাঃ .. ৪..
বহু স্যাম্ অহম্ এবাতঃ প্রজাযেযেতি কামতঃ .
তপস্ তপ্ত্বা ঽসৃজত্ সর্বং জগদ্ ইত্য্ আহ তিত্তিরিঃ .. ৫..
ইদম্ অগ্রে সদ্ এবাসীদ্ বহুত্বায তদৈক্ষত .
তেজো ঽবন্নাণ্ডজাদীনি সসর্জেতি চ সামগাঃ .. ৬..
বিস্ফুলিঙ্গা যথা বহ্নের্ জাযন্তে ঽক্ষরতস্ তথা .
বিবিধাশ্ চিজ্ জডা ভাবা ইত্য্ আথর্বণিক শ্রুতিঃ .. ৭..
জগদ্ অব্যাকৃতং পূর্বম্ আসীদ্ ব্যাক্রিযতাধুনা .
দৃশ্যাভ্যাং নাম রূপাভ্যাং বিরাড্ আদিষু তে স্ফুটে .. ৮..
বিরাণ্ মনুর্ নরো গাবঃ খরাশ্বাজাবযস্ তথা .
পিপীলিকাবধি দ্বন্দ্বম্ ইতি বাজসনেযিনঃ .. ৯..
কৃত্বা রূপান্তরং জৈবং দেহে প্রাবিশদ্ ঈশ্বরঃ .
ইতি তাঃ শ্রুতযঃ প্রাহুর্ জীবত্বং প্রাণ ধারণাত্ .. ১০..
চৈতন্যং যদ্ অধিষ্ঠানং লিঙ্গদেহশ্ চ যঃ পুনঃ .
চিচ্ ছাযা লিঙ্গদেহস্থা তত্ সংঘো জীব উচ্যতে .. ১১..
মাহেশ্বরী তু মাযা যা তস্যা নির্মাণ শক্তিবত্ .
বিদ্যতে মোহশক্তিশ্ চ তং জীবং মোহযতি অসৌ .. ১২..
মোহাদ্ অনীশতাং প্রাপ্য মগ্নো বপুষি শোচতি .
ঈশ সৃষ্টম্ ইদং দ্বৈতং সর্বম্ উক্তং সমাসতঃ .. ১৩..
সপ্তান্ন ব্রাহ্মণে দ্বৈতং জীবসৃষ্টং প্রপঞ্চিতম্ .
অন্নানি সপ্তজ্ঞানেন কর্মণা ঽজনযত্ পিতা .. ১৪..
মর্ত্যানাম্ একং দেবান্নে দ্বে পশ্বান্নং চতুর্থকম্ .
অন্যত্ ত্রিতযম্ আত্মার্থম্ অন্নানাং বিনিযোজনম্ .. ১৫..
ব্রীহ্যাদিকং দর্শপূর্ণমাসৌ ক্ষীরং তথা মনঃ .
বাক্ প্রাণশ্ চেতি সপ্তত্বম্ অন্নানাম্ অবগম্যতাম্ .. ১৬..
ঈশেন যদ্যপ্য্ এতানি নির্মিতানি স্বরূপতঃ .
তথাপি জ্ঞানকর্মভ্যাং জীবো ঽকার্ষীত্ তদ্ অন্নতাম্ .. ১৭..
ঈশকার্যং জীবভোগ্যং জগদ্ দ্বাভ্যাং সমন্বিতম্ .
পিতৃজন্যা ভর্তৃভোগ্যা যথা যোষিত্ তথেষ্যতাম্ .. ১৮..
মাযাবৃত্ত্যাত্মকো হীশসংকল্পঃ সাধনং জনৌ .
মনো বৃত্ত্য্ আত্মকো জীব সংকল্পো ভোগ সাধনম্ .. ১৯..
ঈশ নির্মিত মণ্য্ আদৌ বস্তুন্য্ এক বিধে স্থিতে .
ভোক্তৃ ধী বৃত্তি নানাত্বাত্ তদ্ ভোগো বহুধেষ্যতে .. ২০..
হৃষ্যতি একো মণিং লব্ধ্বা ক্রুদ্ধ্যত্য্ অন্যো হ্য্ অলাভতঃ .
পশ্যতি এব বিরক্তো ঽত্র ন হৃষ্যতি ন কুপ্যতি .. ২১..
প্রিযো ঽপ্রিয উপেক্ষ্যশ্ চেত্য্ আকারা মণিগাস্ ত্রযঃ .
সৃষ্টা জীবৈর্ ঈশসৃষ্টং সাধারণং ত্রিষু .. ২২..
ভার্যা স্নুষা ননান্দা চ যাতা মাতেত্য্ অনেকধা .
প্রতিযোগিধিযা যোষিদ্ ভিদ্যতে ন স্বরূপতঃ .. ২৩..
ননু জ্ঞানানি ভিদ্যন্তাম্ আকারস্ তু ন ভিদ্যতে .
যোষিদ্ বপুষ্য্ অতিশযো ন দৃষ্টো জীবনির্মিতঃ .. ২৪..
মৈবং মাংসমযী যোষিত্ কাচিদ্ অন্যা মনোমযী .
মাংসময্যা অভেদে ঽপি ভিদ্যতে হি মনোমযী .. ২৫..
ভ্রান্তি স্বপ্ন মনোরাজ্য স্মৃতিষ্ব্ অস্তু মনোমযম্ .
জাগ্রন্ মানেন মেযস্য ন মনোমযতেতি চেত্ .. ২৬..
বাধং মানে তু মেযেন যোগাত্ স্যাদ্ বিষযাকৃতিঃ .
ভাষ্য বার্তিককারাভ্যাম্ অযম্ অর্থ উদীরিতঃ .. ২৭..
মূষাসিক্তং যথা তাম্রং তন্ নিভং জাযতে তথা .
রূপাদীন্ ব্যাপ্নুবচ্ চিত্তং তন্ নিভং দৃশ্যতে ধ্রুবম্ .. ২৮..
ব্যঞ্জকো বা যথা ঽঽলোকো ব্যঙ্গ্যস্যাকারতাম্ ইযাত্ .
সর্বার্থ ব্যঞ্জকত্বাদ্ ধীর্ অর্থাকারা প্রদৃশ্যতে .. ২৯..
মাতুর্ মানাভিনিষ্পত্তির্ নিষ্পন্নং মেযম্ এতি তত্ .
মেযাভিসংগতং তচ্ চ মেযাভত্বং প্রপদ্যতে .. ৩০..
সত্যেবং বিষযৌ দ্বৌ স্তো ঘটৌ মৃণ্ময ধীমযৌ .
মৃণ্মযো মানমেযঃ স্যাত্ সাক্ষিভাশ্যস্ তু ধীমযঃ .. ৩১..
অন্বয ব্যতিরেকাভ্যাং ধীমযো জীব বন্ধ কৃত্ .
সত্যস্মিন্ সুখ দুঃখে স্তস্ তস্মিন্ন্ অসতি ন দ্বযম্ .. ৩২..
অসত্য্ অপি চ বাহ্যার্থে স্বপ্নাদৌ বদ্ধ্যতে নরঃ .
সমাধি সুপ্তি মূর্চ্ছাসু সত্য্ অপ্য্ অস্মিন্ ন বদ্ধ্যতে .. ৩৩..
দূর দেশং গতে পুত্রে জীবত্য্ এবাত্র তত্ পিতা .
বিপ্রলম্ভক বাক্যেন মৃতং মত্বা প্ররোদিতি .. ৩৪..
মৃতে ঽপি তস্মিন্ বার্তাযাম্ অশ্রুতাযাং ন রোদিতি .
অতঃ সর্বস্য জীবস্য বন্ধ কৃন্ মানসং জগত্ .. ৩৫..
বিজ্ঞান বাদো বাহ্যার্থ বৈযর্থ্যাত্ স্যাদ্ ইহেতি চেত্ .
ন হৃদ্য্ আকারম্ আধাতুং বাহ্যস্যাপেক্ষিতত্বতঃ .. ৩৬..
বৈযার্থ্যম্ অস্তু বা বাহ্যং ন বারযিতুম্ ঈশ্মহে .
প্রযোজনম্ অপেক্ষন্তে ন মানানিতি হি স্থিতিঃ .. ৩৭..
বন্ধশ্ চেন্ মানসং দ্বৈতং তন্ নিরোধেন শাম্যতি .
অভ্যাসেদ্ যোগম্ এবাতো ব্রহ্মজ্ঞানেন কিং বদ .. ৩৮..
তাত্কালিক দ্বৈত শান্তাব্ অপ্য্ আগামী জনী ক্ষযঃ .
ব্রহ্মজ্ঞানং বিনা ন স্যাদ্ ইতি বেদান্ত ডিণ্ডিমঃ .. ৩৯..
অনিবৃত্তে ঽপীশ সৃষ্টে দ্বৈতে তস্য মৃষাত্মতাম্ .
বুদ্ধ্বা ব্রহ্মাদ্বযং বোদ্ধুং শক্যং বস্ত্ব্ ঐক্য বাদিনঃ .. ৪০..
প্রলযে তন্ নিবৃত্তৌ তু গুরু শাস্ত্রাদ্য্ অভাবতঃ .
বিরোধি দ্বৈতাভাবে ঽপি ন শক্যং বোদ্ধুম্ অদ্বযম্ .. ৪১..
অবাধকং সাধকং চ দ্বৈতম্ ঈশ্বর নির্মিতম্ .
অপনেতুম্ অশক্যং চেত্য্ আস্তাং তদ্ দ্বিষ্যতে কুতঃ .. ৪২..
জীব দ্বৈতং তু শাস্ত্রীযম্ অশাস্ত্রীযম্ ইতি দ্বিধা .
উপাদদীতা শাস্ত্রীযম্ আতত্ত্বস্যাববোধনাত্ .. ৪৩..
আত্ম ব্রহ্ম বিচারাখ্যং শাস্ত্রীযং মানসং জগত্ .
বুদ্ধে তত্ত্বে তচ্ চ হেযম্ ইতি শ্রুত্য্ অনুশাসনম্ .. ৪৪..
শাস্ত্রাণ্য্ অধীত্য মেধাবী অভ্যস্য চ পুনঃ পুনঃ .
পরমং ব্রহ্ম বিজ্ঞায উল্কাবত্ তন্য্ অথোত্সৃজেত্ .. ৪৫..
গ্রন্থম্ অভ্যস্য মেধাবী জ্ঞান বিজ্ঞান তত্পরঃ .
পলালম্ ইব ধান্যার্থী ত্যজেদ্ গ্রন্থম্ অশেষতঃ .. ৪৬..
তম্ এব ধীরো বিজ্ঞায প্রজ্ঞাং কুর্বীত ব্রাহ্মণঃ .
নানুধ্যাযাদ্ বাহূঞ্ ছব্দান্ বাচো বিগ্লাপনং হি তত্ .. ৪৭..
তম্ এবৈকং বিজানীথ হ্য্ অন্যা বাচো বিমুঞ্চথ .
যচ্চেদ্ বাঙ্মনসী প্রাজ্ঞ ইত্য্ আদ্যাঃ শ্রুতযঃ স্ফুটাঃ .. ৪৮..
অশাস্ত্রীযম্ অপি দ্বৈতং তীব্রং মন্দম্ ইতি দ্বিধা .
কাম ক্রোধাদিকং তীব্রং মনোরাজ্যং তথেতরত্ .. ৪৯..
উভযং তত্ত্ববোধাত্ প্রাঙ্ নিবার্যং বোধ সিদ্ধযে .
শমঃ সমাহিতত্বং চ সাধনেষু শ্রুতং যতঃ .. ৫০..
বোধাদ্ ঊর্ধ্বং চ তদ্দ্ হেযং জীবন্মুক্তি প্রসিদ্ধযে .
কামাদি ক্লেশ বন্ধেন যুক্তস্য ন হি মুক্ততা .. ৫১..
জীবন্মুক্তির্ ইযং মা ভুজ্ জন্মাভাবে ত্ব্ অহং কৃতী .
তর্হি জন্মাপি তে ঽস্ত্ব্ এব স্বর্গ মাত্রাত্ কৃতী ভবান্ .. ৫২..
ক্ষযাতিশয দোষেণ স্বর্গো হেযো যদা তদা .
স্বযং দোষতমাত্মাযং কামাদিঃ কিং ন হীযতে .. ৫৩..
তত্ত্বং বুদ্ধ্বাপি কামাদীন্ নিঃশেষং ন জহাসি চেত্ .
যথেষ্টাচরণং তে স্যাত্ কর্মশাস্ত্রাতিলঙ্ঘিনঃ .. ৫৪..
বুদ্ধাদ্বৈত সতত্ত্বস্য যথেষ্টাচরণং যদি .
শূনাং তত্ত্বদৃশাং চৈব কো ভেদো ঽশুচি ভক্ষণে .. ৫৫..
বোধাত্ পুরা মনোদোষমাত্রাত্ ক্লিশ্ণাস্য্ অথাধুনা .
অশেষলোকনিন্দা চেত্য্ অহো তে বোধ বৈভবম্ .. ৫৬..
বিদ্বরাহাদিতুল্যত্বং মা কাঙ্ক্ষীস্ তত্ত্ববিদ্ ভবান্ .
সর্ব ধী দোষ সংত্যাগাল্ লোকৈঃ পূজ্যস্ব দেববত্ .. ৫৭..
কাম্যাদি দোষ দৃষ্ট্যাদ্যাঃ কামাদি ত্যাগ হেতবঃ .
প্রসিদ্ধা মোক্ষশাস্ত্রেষু তান্ অন্বিষ্য সুখী ভব .. ৫৮..
ত্যজ্যতাম্ এষ কামাদির্ মনোরাজ্যে তু কা ক্ষতিঃ .
অশেষ দোষ বীজত্বাত্ ক্ষতির্ ভগবতেরিতা .. ৫৯..
ধ্যাযতে বিষযান্ পুংসঃ সঙ্গস্তেষূপজাযতে .
সঙ্গাত্ সংজাযতে কামঃ কামাত্ ক্রোধো ঽভিজাযতে .. ৬০..
শক্যং জেতুং মনোরাজ্যং নির্বিকল্প সমাধিতঃ .
সুসম্পাদঃ ক্রমাত্ সো ঽপি সবিকল্প সমাধিনা .. ৬১..
বুদ্ধতত্ত্বেন ধীদোষ শূন্যেনৈকান্ত বাসিনা .
দীর্ঘং প্রণবম্ উচ্চার্য মনোরাজ্যং বিজীযতে .. ৬২..
জিতে তস্মিন্ বৃত্তি শূন্যং মনস্ তিষ্ঠতি মূকবত্ .
এতত্ পদং বসিষ্ঠেন রামায বহুধেরিতম্ .. ৬৩..
দৃশ্যং নাস্তীতি বোধেন মনসো দৃশ্যমার্জনম্ .
সম্পন্নং চেত্ তদ্ উত্পন্না পরা নির্বাণ নির্বৃতিঃ .. ৬৪..
বিচারিতম্ অলং শাস্ত্রং চিরম্ উদ্গ্রাহিতং মিথঃ .
সংত্যক্ত বাসনান্ মৌনাদ্ ঋতে নাস্ত্য্ উত্তমং পদম্ .. ৬৫..
বিক্ষিপ্যতে কদাচিদ্ ধীঃ কর্মণা ভোগ দাযিনা .
পুনঃ সমাহিতা সা স্যাত্ তদৈবাভ্যাস পাটবাত্ .. ৬৬..
বিক্ষেপো যস্য নাস্ত্য্ অস্য ব্রহ্মবিত্ত্বং ন মন্যতে .
ব্রহ্মৈবাযম্ ইতি প্রাহুর্ মুনযঃ পারদর্শিনঃ .. ৬৭..
দর্শনাদর্শনে হিত্বা স্বযং কেবল রূপতঃ .
যস্ তিষ্ঠতি স তু ব্রহ্মন্ ব্রহ্ম ন ব্রহ্মবিত্ .. ৬৮..
জীবন্মুক্তেঃ পরা কাষ্ঠা জীব দ্বৈত বিবর্জনাত্ .
লভ্যতে ঽসাব্ অতো ঽত্রেদম্ ঈশ দ্বৈতাদ্ বিবেচিতম্ .. ৬৯..
ইতি চতুর্থোঽধ্যাযঃ .. ৪..