পঞ্চদশী ০২

অথ দ্বিতীযোঽধ্যাযঃ ..
পঞ্চমহাভূতবিবেকঃ .
সদ্ অদ্বৈতং শ্রুতং যত্ তত্ পঞ্চ ভূত বিবেকঃ .
বোদ্ধুং শক্যং ততো ভূত পঞ্চকং প্রবিবিচ্যতে .. ১..
শব্দ স্পর্শৌ রূপ রসৌ গন্ধো ভূত গুণা ইমে .
এক দ্বি ত্রি চতুঃ পঞ্চ গুণা ব্যোমাদিষু ক্রমাত্ .. ২..
প্রতিধ্বনির্ বিযচ্ ছব্দো বাযৌ বীসীতি শব্দনম্ .
অনুষ্ণাশীত সংস্পর্শো বহ্নৌ ভুগু ভুগু ধ্বনিঃ .. ৩..
উষ্ণঃ স্পর্শঃ প্রভা রূপং জলে বুলু বুলু ধ্বনিঃ .
শীতাঃ স্পর্শঃ শুক্ল রূপং রসো মাধুর্যম্ ঈরিতম্ .. ৪..
ভূমৌ কড কডা শব্দঃ কাঠিন্যং স্পর্শ ইষ্যতে .
নীলাদিকং চিত্র রূপং মধুরাম্লাদিকো রসঃ .. ৫..
সুরভীতর গন্ধৌ দ্বৌ গুণাঃ সম্যগ্ বিবেচিতাঃ .
শ্রোত্রং ত্বক্ চক্ষুষি জিহ্বা ঘ্রাণং চেন্দ্রিয পঞ্চকম্ .. ৬..
কর্ণাদি গোলকস্থং তচ্ ছব্দাদি গ্রাহকং ক্রমাত্ .
সৌক্ষ্ম্যাত্ কার্যানুমেযং তত্ প্রাযো ধাবেদ্ বহির্ মুখম্ .. ৭..
কদাচিত্ পিহিতে কর্ণে শ্রূযতে শব্দ আন্তরঃ .
প্রাণ বাযৌ জাঠরাগ্নৌ জল পানে ঽন্ন ভক্ষণে .. ৮..
ব্যাজ্যান্তে হ্য্ আন্তরাঃ স্পর্শা মীলনে চান্তরং তমঃ .
উদ্গারে রস গন্ধৌ চেত্য্ অক্ষাণা.ম্ আন্তর গ্রাহঃ .. ৯..
পঞ্চোক্ত্যাদান গমন বিসর্গানন্দকাঃ ক্রিযাঃ .
কৃষি বাণিজ্য সেবাদ্যাঃ পঞ্চস্ব্ অন্তর্ ভবন্তি হি .. ১০..
বাক্ পাণি পাদ পাযূপস্থৈর্ অক্ষৈস্ তত্ ক্রিযাজনিঃ .
মুখাদি গোলকেষ্ব্ আস্তে তত্ কর্মেন্দ্রিয পঞ্চকম্ .. ১১..
মনো দশেন্দ্রিযাধ্যক্ষং হৃত্পদ্ম গোলকে স্থিতম্ .
তচ্ চান্তঃকরণং বাহ্যেষ্ব্ অস্বাতন্ত্র্যাদ্ বিনেন্দ্রিযৈঃ .. ১২..
অক্ষেষ্ব্ অর্থার্পিতেষ্ব্ এতদ্ গুণ দোষ বিচারকম্ .
সত্ত্বং রজস্ তমশ্ চাস্য গুণা বিক্রিযতে হি তৈঃ .. ১৩..
বৈরাগ্যং ক্ষান্তির্ ঔদার্যম্ ইত্য্ আদ্যাঃ সত্ত্ব সম্ভবাঃ .
কাম ক্রোধৌ লোভ যত্নাব্ ইত্য্ আদ্যা রজসোত্থিতাঃ .. ১৪..
আলস্য ভ্রান্তি তন্দ্রাদ্যা বিকারাস্ তমসোত্থিতাঃ .
সাত্বিকৈঃ পুণ্য নিষ্পত্তিঃ পাপোপত্তিশ্ চ রাজসৈঃ .. ১৫..
তামসৈর্ নোভযং কিন্তু বৃথাযুঃ ক্ষপণং ভবেত্ .
অত্রাহং প্রত্যযী কর্তেত্য্ এবম্ লোক ব্যবস্থিতিঃ .. ১৬..
স্পষ্ট শব্দাদি যুক্তেষু ভৌতিকত্বম্ অতিস্ফুটম্ .
অক্ষাদাব্ অপি তচ্ ছাস্ত্র যুক্তিভ্যাম্ অবধার্যতাম্ .. ১৭..
একাদশেন্দ্রিযৈর্ যুক্ত্যা শাস্ত্রেণাপ্য্ অবগম্যতে .
যাবত্ কিংচিদ্ ভবেদ্ এতদ্ ইদং শব্দোদিতং জগত্ .. ১৮..
ইদং সর্বং পুরা সৃষ্টের্ একম্ এবদ্বিতীযকম্ .
সদ্ এবাসীন্ নাম রূপে নাস্তাম্ ইত্য্ আরুণের্ বচঃ .. ১৯..
বৃক্ষস্য স্বগতো ভেদঃ পত্র পুষ্প ফলাদিভিঃ .
বৃক্ষান্তরাত্ সজাতীযো বিজাতীযঃ শিলাদিতঃ .. ২০..
তথা সদ্বস্তুনো ভেদত্রযং প্রাপ্তং নিবার্যতে .
ঐক্যাবধারণ দ্বৈত প্রতিষেধৈস্ ত্রিভিঃ ক্রমাত্ .. ২১..
সতো নাবযবাঃ শংক্যাস্ তদ্ অংশস্যানিরূপণাত্ .
নামরূপে ন তস্য অংশৌ তযোর্ অদ্যাপ্য্ অনুদ্ভবাত্ .. ২২..
নামরূপ্ ওদ্ভবস্যৈব সৃষ্টিত্বাত্ সৃষ্টিতঃ পুরা .
ন তযোর্ উদ্ভবস্ তস্মান্ নিরংশং সদ্ যথা বিযত্ .. ২৩..
সদ্ অন্তরং সজাতীযং ন বৈলক্ষণ্য বর্জনাত্ .
নামরূপ্ ওপাধি ভেদং বিনা নৈব সতো ভিদা .. ২৪..
বিজাতীযম্ অসত্ তত্ তু ন খল্ব্ অস্তীতি গম্যতে .
নাস্যাতঃ প্রতিযোগিত্বং বিজাতীযাদ্ ভিদা কুতঃ .. ২৫..
একম্ এবাদ্বিতীযং সত্ সিদ্ধম্ অত্র তু কেচন .
বিহ্বলা অসদ্ এবেদং পুরাঽঽসীদ্ ইত্য্ অবর্ণযন্ .. ২৬..
মগ্নস্যাব্ধৌ যথাঽক্ষাণি বিহ্বলানি তথাঽস্য ধীঃ .
অখণ্ডৈকরসং শ্রুত্বা নিঃপ্রচারা বিভেত্য্ অতঃ .. ২৭..
গৌডাচার্যা নির্বিকল্পে সমাধাব্ অন্য যোগিনাম্ .
সাকার ব্রহ্ম নিষ্ঠানাম্ অত্যন্তং ভযম্ ঊচিরে .. ২৮..
অস্পর্শ যোগো নামৈষ দুর্দর্শঃ সর্ব যোগিভিঃ .
যোগিনো বিভ্যতি হ্য্ অস্মাদ্ অভযে ভযদর্শিনঃ .. ২৯..
ভগবত্ পূজ্য পাদাশ্ চ শুষ্ক তর্কপটূন্ অমূন্ .
আহুর্ মাধ্যমিকান্ ভ্রান্তান্ অচিন্ত্যে ঽস্মিন্ সদ্ আত্মনি .. ৩০..
অনাদৃত্য শ্রুতিং মৌর্খ্যাদ্ ইমে বৌদ্ধস্ তমস্বিনঃ .
আপেদিরে নিরামত্বম্ অনুমানৈক চক্ষুশঃ .. ৩১..
শূন্যম্ আসীদ্ ইতি ব্রূষে সদ্ যোগং বা সদাত্মতাম্ .
শূন্যস্য ন তু তদ্ যুক্তম্ উভযং ব্যাহতত্ত্বতঃ .. ৩২..
ন যুক্তস্ তমসা সূর্যো নাপি চাসৌ তমোমযঃ .
সচ্ ছূন্যযোর্ বিরোধিত্বাচ্ ছূন্যম্ আসীত্ কথং বদ .. ৩৩..
বিযদাদের্ নামরূপে মাযযা সুবিকল্পিতে .
শূন্যস্য নামরূপে চ তথা চেজ্ জীব্যতাং চিরম্ .. ৩৪..
সতো ঽপি নামরূপে দ্বে কল্পিতে চেত্ তদা বদ .
কুত্রেতি নিরধিষ্ঠানো ন ভ্রমঃ ক্বচিদ্ ঈক্ষ্যতে .. ৩৫..
সদ্ আসীদ্ ইতি শব্দার্থ ভেদে বৈগুণ্যম্ আপতেত্ .
অভেদে পুনর্ উক্তিঃ স্যান্ মৈবং লোকে তথেক্ষণাত্ .. ৩৬..
কর্তব্যং কুরুতে বাক্যং ব্রূতে ধার্যস্য ধারণম্ .
ইত্য্ আদি বাসনা ঽবিষ্টং প্রত্যাসীত্ সদ্ ইতীরণম্ .. ৩৭..
কালাভাবে পুরেত্য্ উক্তিঃ কাল বাসনযা যুতম্ .
শিষ্যং প্রত্য্ এব তেনাত্র দ্বিতীযং ন হি শংক্যতে .. ৩৮..
চোদ্যং বা পরিহারো বা ক্রিযতাং দ্বৈত ভাষযা .
অদ্বৈত ভাষযা চোদ্যং নাস্তি নাপি তদ্ উত্তরম্ .. ৩৯..
তদা স্তিমিত গম্ভীরং ন তেজো ন তমস্ ততম্ .
অনাখ্যম্ অনভিব্যক্তং সত্ কিংচিদ্ অবশিষ্যতে .. ৪০..
ননু ভূম্যাদিকং মা ভূত্ পরমাণ্বন্ত নাশতঃ .
কথং তে বিযতো ঽসত্বং বুদ্ধিম্ আরোহতীতি চেত্ .. ৪১..
অত্যন্তং নির্জগদ্ ব্যোম যথা তে বুদ্ধিম্ আশ্রিতম্ .
তথৈব সন্ নিরাকাশং কুতো নাশ্রযতে মতিম্ .. ৪২..
নির্জগদ্ ব্যোম দৃষ্টং চেত্ প্রকাশ তমসী বিনা .
ক্ব দৃষ্টং কিং চ তে পক্ষে ন প্রত্যক্ষং বিযত্ খলু .. ৪৩..
সদ্ বস্তু শুদ্ধং ত্ব্ অস্মাভির্ নিশ্চিতৈর্ অনুভূযতে .
তূষ্ণীং স্থিতৌ ন শূন্যত্বং শূন্য বুদ্ধেশ্ চ বর্জনাত্ .. ৪৪..
সদ্ বুদ্ধির্ অপি চেন্ নাস্তি মা ঽস্ত্ব্ অস্য স্বপ্রভত্বতঃ .
নির্মনস্কত্ব সাক্ষিত্বাত্ সন্মাত্রং সুগমং নৃণাম্ .. ৪৫..
মনো জৃম্ভণ রাহিত্যে যথা সাক্ষী নিরাকুলঃ .
মাযা জৃম্ভণতঃ পূর্বং সত্ তথৈব নিরাকুলম্ .. ৪৬..
নিস্তত্ত্বা কার্যগম্যা ঽস্য শক্তির্ মাযাঽগ্নি শক্তিবত্ .
ন হি শক্তিঃ ক্বচিত্ কৈশ্চিদ্ বুদ্ধ্যতে কারযতঃ পুরা .. ৪৭..
ন সদ্বস্তু সতঃ শক্তির্ ন হি বহ্নেঃ স্বশক্তিতা .
সদ্বিলক্ষণতাযাং তু শক্তেঃ কিং তত্ত্বম্ উচ্যতাম্ .. ৪৮..
শূন্যত্বম্ ইতি চেচ্ ছূন্যং মাযাকার্যম্ ইতীরিতম্ .
ন শূন্যং নাপি সদ্ যাদৃক্ তাদৃক্ তত্ত্বম্ ইহেষ্যতাম্ .. ৪৯..
নাসদ্ আসীন্ নো সদ্ আসীত্ তদানীং কিন্ত্ব্ অভূত্ তমঃ .
সদ্যোগাত্ তমসঃ সত্ত্বং ন স্বতস্ তন্ নিষেধনাত্ .. ৫০..
অত এব দ্বিতীযত্বং শূন্যবন্ ন হি গণ্যতে .
ন লোকে চৈত্র তচ্ চক্ত্যোর্ জীবিতং লিখ্যতে পৃথক্ .. ৫১..
শক্ত্য্ আধিক্যে জীবিতং চেদ্ বর্ধতে তত্র বৃদ্ধি কৃত্ .
ন শক্তিঃ কিন্তু তত্ কার্যং যুদ্ধ কৃষ্যাদিকং তথা .. ৫২..
সর্বথা শক্তি মাত্রস্য ন পৃথগ্ গণনা ক্বচিত্ .
শক্তি কার্যং তু নৈবাস্তি দ্বিতীযং শংক্যতে কথম্ .. ৫৩..
ন কৃত্স্ন ব্রহ্ম বৃত্তিঃ সা শক্তিঃ কিন্ত্ব্ এক দেশ ভাক্ .
ঘট শক্তির্ যথা ভূমৌ স্নিগ্ধ মৃদ্য্ এব বর্ততে .. ৫৪..
পাদো ঽস্য সর্বা ভূতানি ত্রিপাদ্ অস্তি স্বযং প্রভঃ .
ইত্য্ এক দেশ বৃত্তিত্বং মাযাযা বদতি শ্রুতিঃ .. ৫৫..
বিষ্টভ্যাহম্ ইদং কৃত্স্নম্ একাংশেন স্থিতো জগত্ .
ইতি কৃষ্ণো ঽর্জুনাযাহ জগতস্ত্ব্ একদেশতাম্ .. ৫৬..
সা ভূমিং বিশ্বতো বৃত্বা হ্য্ অত্যতিষ্ঠদ্ দশাঙ্গুলম্ .
বিকারাবর্তি চাত্রাস্তি শ্রুতি সূত্র কৃতোর্ বচঃ .. ৫৭..
নিরংশে ঽপি অংশম্ আরোপ্য কৃত্স্নে ঽংশে বেতি পৃচ্ছতঃ .
তদ্ ভাষযোত্তরং ব্রূতে শ্রুতিঃ শ্রোতৃ হিতৈষিণী .. ৫৮..
সত্ তত্ত্বম্ আশ্রিতা শক্তিঃ কল্পযেত্ সতি বিক্রিযাঃ .
বর্ণ ভিত্তি গতা ভিত্তৌ চিত্রং নানাবিধং যথা .. ৫৯..
আদ্যো বিকার আকাশঃ সো ঽবকাশ স্বরূপবান্ .
আকাশো ঽস্তীতি সত্ তত্ত্বম্ আকাশে ঽপ্য্ অনুগচ্ছতি ..৬০..
এক স্বভাবং সত্ তত্ত্বম্ আকাশো দ্বি স্বভাবকঃ .
নাবকাশঃ সতি ব্যোম্নি স চৈষো ঽপি দ্বযং স্থিতম্ .. ৬১..
যদ্ বা প্রতিধ্বনির্ ব্যোম্নো গুণো নাসৌ সতীক্ষ্যতে .
ব্যোম্নি দ্বৌ সদ্ ধ্বনী তেন সদ্ একং দ্বি গুণং বিযত্ .. ৬২..
যা শক্তিঃ কল্পযেদ্ ব্যোমা সা সদ্ ব্যোম্নোর্ অভিন্নতাম্ .
আপাদ্য ধর্ম ধর্মিত্বং ব্যত্যযেনাবকল্পযেত্ .. ৬৩..
সতো ব্যোমত্বম্ আপন্নং ব্যোম্নঃ সত্তাং তু লৌকিকাঃ .
তার্কিকাশ্ চাবগচ্ছন্তি মাযাযা উচিতং হি তত্ .. ৬৪..
যদ্ যথা বর্ততে তস্য তথাত্বং ভাতি মানতঃ .
অন্যথাত্বং ভ্রমেণেতি ন্যাযো ঽযং সর্ব লৌকিকঃ .. ৬৫..
এবং শ্রুতি বিচারাত্ প্রাগ্ যথা যদ্ বস্তু ভাসতে .
বিচারেণ বিপর্যেতি ততস্ তচ্ চিন্ত্যতাং বিযত্ .. ৬৬..
ভিন্নে বিযত্ সতী শব্দ ভেদাদ্ বুদ্ধেশ্ চ ভেদতঃ .
বায্ব্ আদিষ্ব্ অনুবৃত্তং সন্ ন তু ব্যোমেতি ভেদ ধীঃ .. ৬৭..
সদ্ বস্ত্ব্ অধিক বৃত্তিত্বাদ্ ধর্মী ব্যোম্নস্ তু ধর্মতা .
ধিযা সতঃ পৃথক্কারে ব্রূহি ব্যোম কিম্ আত্মকম্ .. ৬৮..
অবকাশাত্মকং তচ্ চেদ্ অসত্ তদ্ ইতি চিন্ত্যতাম্ .
ভিন্নং সতো ঽসচ্ চ নেতি বক্ষি চেদ্ ব্যাহতিস্ তব .. ৬৯..
ভাতীতি চেদ্ ভাতু নাম ভূষণং মাযিকস্য তত্ .
যদ্ অসদ্ ভাসমানং তন্ মিথ্যা স্বপ্ন গজাদিবত্ .. ৭০..
জাতি ব্যক্তি দেহি দেহৌ গুণ দ্রব্যে যথা পৃথক্ .
বিযত্ সতোস্ তথৈবাস্তু পার্থক্যং কো ঽত্রবিস্মযঃ .. ৭১..
বুদ্ধো ঽপি ভেদো নো চিত্তে নিরুদ্ধিং যাতি চেত্ তদা .
অনৈকাগ্র্যাত্ সংশযাদ্ বা রূঢ্যভাবো ঽস্য তে বদ .. ৭২..
অপ্রমত্তো ভব ধ্যানাদ্ আদ্যে ঽন্যস্মিন্ বিবেচনম্ .
কুরু প্রমাণ যুক্তিভ্যাং ততো রূঢতমো ভবেত্ .. ৭৩..
ধ্যানান্ মানাদ্য্ উক্তিতো ঽপি রূঢে ভেদে বিযত্ সতোঃ .
ন কদাচিদ্ বিযত্ সত্যং সদ্ বস্তু চিদ্রবন্ ন চ .. ৭৪..
জ্ঞস্য ভাতি সদা ব্যোম নিস্তত্ত্বোল্লেখা পূর্বকম্ .
সদ্ বস্ত্ব্ অপি বিভাত্য্ অস্য নিশ্চিদ্রত্ব পুরঃসরম্ .. ৭৫..
বাসনাযাং প্রবৃদ্ধাযাং বিযত্ সত্যত্ব বাদিনম্ .
সন্ মাত্রাবোধ যুক্তং চ দৃষ্ট্বা বিস্মযতে বুধঃ .. ৭৬..
এবম্ আকাশ মিথ্যাত্বে সত্ সত্যত্বে চ বাসিতে .
ন্যাযেনানেন বায্বাদেঃ সদ্ বস্তু প্রবিবিচ্যতাম্ .. ৭৭..
সদ্ বস্তুন্য্ এক দেশস্থা মাযা তত্রৈক দেশগম্ .
বিযত্ তত্রাপ্য্ একদেশগতো বাযুঃ প্রকল্পিতঃ .. ৭৮..
শোষ স্পর্শৌ গতির্ বেগো বাযু ধর্মা ইমে মতাঃ .
ত্রযঃ স্বভাবাঃ সন্ মাযা ব্যোম্নাং যে তে ঽপি বাযুগাঃ .. ৭৯..
বাযুর্ অস্তীতি সদ্ ভাবঃ সতো বাযৌ পৃথক্ কৃতে .
নিস্তত্ত্ব রূপতা মাযা স্বভাবো ব্যোমগো ধ্বনিঃ .. ৮০..
সতো ঽনুবৃত্তিঃ সর্বত্র ব্যোম্নো নেতি পুরেরিতম্ .
ব্যোম্নানুবৃত্তির্ অধুনা কথং ন ব্যাহতং বচঃ .. ৮১..
চিদ্রানুবৃত্তির্ নেতীতি পূর্বোক্তির্ অধুনা ত্ব্ ইযম্ .
শব্দানুবৃত্তির্ এবোক্তা বচসো ব্যাহতিঃ কুতঃ .. ৮২..
ননু সদ্ বস্তু পার্থক্যাদ্ অসত্ত্বং চেদ্ তদা কথম্ .
অব্যক্ত মাযা বৈষম্যাদ্ অমাযামযতাপি নো .. ৮৩..
নিস্তত্ত্ব রূপতৈবাত্র মাযাত্বস্য প্রযোজিকা .
সা শক্তি কার্যযোস্ তুল্যা ব্যক্তাব্যক্তত্ব ভেদিনোঃ .. ৮৪..
সদ্ অসত্ত্ব বিবেকস্য প্রস্তুতত্ত্বাত্ স চিন্ত্যতাম্ .
অসতো ঽবান্তরো ভেদ আস্তাং তচ্ চিন্তযা ঽত্র কিম্ .. ৮৫..
সদ্ বস্তু ব্রহ্ম শিষ্টো ঽন্শো বাযুর্ মিথ্যা যথা বিযত্ .
বাসযিত্বা চিরং বাযোর্ মিথ্যাত্বং মরুতং ত্যজেত্ .. ৮৬..
চিন্তযেদ্ বহ্নিম্ অপ্য্ এবং মরুতো ন্যূন বর্তিনম্ .
ব্রহ্মাণ্ডাবরণেষ্ব্ এষা ন্যূনাধিক বিচারণা .. ৮৭..
বাযোর্ দশাংশতো ন্যূনো বহ্নির্ বাযৌ প্রকল্পিতঃ .
পুরাণোক্তং তারতম্যং দশাংশৈর্ ভূত পঞ্চকে .. ৮৮..
বহ্নির্ উষ্ণঃ প্রকাশাত্মা পূর্বানুগতির্ অত্র চ .
অস্তি বহ্নিঃ স নিস্তত্ত্বঃ শব্দবান্ স্পর্শবান্ অপি .. ৮৯..
সন্ মযা ব্যোম বায্বংশৈর্ যুক্তস্যাগ্নের্ নিজো গুণঃ .
রূপং তত্র সতঃ সর্বম্ অন্যদ্ বুদ্ধ্যা বিবিচ্যতাম্ .. ৯০..
সতো বিবেচিতে বহ্নৌ মিথ্যাত্বে সতি বাসিতে .
আপো দশাংশতো ন্যূনাঃ কল্পিতা ইতি চিন্তযেত্ .. ৯১..
শান্ত্য্ আপো ঽমূঃ শূন্য তত্ত্বাঃ সশবদ স্পর্শ সংযুতাঃ .
রূপবত্যো ঽন্যধর্মানুবৃত্যা স্বীযো রসো গুণঃ .. ৯২..
সতো বিবেচিতাস্ব্ অপ্সু তন্ মিথ্যাত্বে চ বাসিতে .
ভূমির্ দশাংশতো ন্যূনা কল্পিতা ঽপ্স্ব্ ইতি চিন্তযেত্ .. ৯৩..
অস্তি ভূস্ তত্ত্ব শূন্যাস্যাং শব্দ স্পর্শৌ সরূপকৌ .
রসশ্ চ পরতো গন্ধো নৈজঃ সত্তা বিবিচ্যতাম্ .. ৯৪..
পৃথক্ কৃতাযাং সত্তাযাং ভূমির্ মিথ্যা ঽবশিষ্যতে .
ভূমের্ দশাংশতো ন্যূনং ব্রহ্মাণ্ডং ভূমিমধ্যগম্ .. ৯৫..
ব্রহ্মাণ্ডমধ্যে তিষ্ঠন্তি ভুবনানি চতুর্দশ .
ভুবনেষু বসন্ত্য্ এষু প্রাণি দেহা যথা যথম্ .. ৯৬..
ব্রহ্মাণ্ড লোক দেহেষু সদ্ বস্তুনি পৃথক্ কৃতে .
অসন্তো ঽণ্ডাদযো ভান্তু তদ্ ভানে ঽপীহ কা ক্ষতিঃ .. ৯৭..
ভূত ভৌতিক মাযানাং সমত্বে ঽত্যন্ত বাসিতে .
সদ্ বস্ত্ব্ অদ্বৈতম্ ইত্য্ এষা ধীর্ বিপর্যেতি ন ক্বচিত্ .. ৯৮..
সদ্ অদ্বৈতাত্ পৃথগ্ ভূতে দ্বৈতে ভূম্য্ আদি রূপিণি .
তত্ তদ্ অর্থ ক্রিযা লোকে যথা দৃষ্টা তথৈব সা .. ৯৯..
সাংখ্য কাণাদ বৌদ্ধাদ্যৈর্ জগদ্ভেদো যথা যথা .
উত্প্রেক্ষ্যতে ঽনেক যুক্ত্যা ভবত্ব্ এষ তথা তথা .. ১০০..
অবজ্ঞাতং সদ্ অদ্বৈতং নিঃশংকৈর্ অন্য বাদিভিঃ .
এবং কা ক্ষতির্ তদ্ দ্বৈতম্ অবজানতাম্ .. ১০১..
দ্বৈতাবজ্ঞা সুস্থিতা চেদ্ অদ্বৈতে ধীঃ স্থিরা ভবেত্ .
স্থৈর্যে তস্যাঃ পুমান্ এষ জীবন্মুক্ত ইতীর্যতে .. ১০২..
এষা ব্রাহ্মী স্থিতিঃ পার্থ নৈনাং প্রাপ্য বিমুহ্যতি .
স্থিত্বা ঽস্যাম্ অন্তকালে ঽপি ব্রহ্ম নির্বাণং ঋচ্ছতি .. ১০৩..
সদ্ অদ্বৈতে ঽনৃত দ্বৈতে যদ্ অন্যোঽন্যৈক্য বীক্ষণম্ .
তস্যান্ত কালস্ তদ্ ভেদ বুদ্ধির্ এব ন চেতরঃ .. ১০৪..
যদ্বা ঽন্ত কালঃ প্রাণস্য বিযোগো ঽস্তু প্রসিদ্ধিতঃ .
তস্মিন্ কালে ঽপি ন ভ্রান্তের্ গতাযাঃ পুনরাগমঃ .. ১০৫..
নীরোগ উপবিষ্টো বা রুগ্ণো বা বিলুঠন্ ভুবি .
মূর্চ্ছিতো বা ত্যজত্ব্ এষ প্রাণান্ ভ্রান্তির্ ন সর্বথা .. ১০৬..
দিনে দিনে স্বপ্ন সুপ্ত্যোর্ অধীতে বিস্মৃতে ঽপ্য্ অযম্ .
পরেদ্যুর্ নানধীতঃ স্যাত্ তদ্বদ্ বিদ্যা ন নশ্যতি .. ১০৭..
প্রমাণোত্পাদিতা বিদ্যা প্রমাণং প্রবলং বিনা .
ন নশ্যতি ন বেদান্তাত্ প্রবলং মানম্ ঈক্ষ্যতে .. ১০৮..
তস্মাদ্ বেদান্ত সংসিদ্ধং সদ্ অদ্বৈতং ন বাধ্যতে .
অন্তকালে ঽপ্য্ অতো ভূত বিবেকান্ নির্বৃতিঃ স্থিতা .. ১০৯..
ইতি দ্বিতীযোঽধ্যাযঃ .. ২..