নাট্যশাস্ত্রম্ অধ্যায ৩৫

.. নাট্যশাস্ত্রম্ অধ্যায ৩৫ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ পঞ্চত্রিংশোঽধ্যাযঃ .
বিন্যাসং ভূমিকানাং চ সম্প্রবক্ষ্যামি নাটকে .
যাদৃশো যস্য কর্তব্যো বিন্যাসো ভূমিকাস্বথ .. ১ ..
গতিবাগঙ্গচেষ্টাভিঃ সত্ত্বশীলস্বভাবতঃ .
পরীক্ষ্য পাত্রং তজ্জ্ঞস্তু যুঞ্জ্যাদ্ ভূমিনিবেশনে .. ২ ..
তস্মিন্নন্বিষ্য হি গুণবান্ কার্যা পাত্রসমাশ্রযা .
ন খেদজননং বুদ্ধেরাচার্যস্য ভবিষ্যতি .. ৩ ..
আচার্যঃ পাত্রজাংশ্চৈব গুণাঞ্জ্ঞাত্বা স্বভাবজান্ .
ততঃ কুর্যাদ্ যথাযোগং নৃণাং ভূমিনিবেশনম্ .. ৪ ..
অঙ্গপ্রত্যঙ্গসংযুক্তমহীনাঙ্গং বযোন্বিতম্ .
ন স্থূলং ন কৃশং চৈব ন দীর্ঘং ন চ মন্থরম্ .. ৫ ..
শ্লিষ্টাঙ্গং দ্যুতিমন্তং চ সুস্বরং প্রিযদর্শনম্ .
এতৈর্গুণৈশ্চ সংযুক্তং দেবভূমিষু যোজযেত্ .. ৬ ..
স্থূলং প্রাংশুং বৃহদ্দেহং মেঘগম্ভীরনিস্বনম্ .
রৌদ্রস্বভাবনেত্রং চ স্বভাবভ্রুকুটীমুখম্ .. ৭ ..
রক্ষোদানবদৈত্যানাং ভূমিকাসু প্রযোজযেত্ .
পুরুষাণাং প্রযোগস্তু তথাঙ্গক্রিযযান্বিতঃ .. ৮ ..
সুনেত্রসুভ্রুবঃ স্বঙ্গাঃ সুললাটাঃ সুনাসিকাঃ .
স্বোষ্ঠাঃ সুগণ্ডাঃ সুমুখাঃ সুকণ্ঠাঃ সুশিরোধরাঃ .. ৯ ..
স্বঙ্গপ্রত্যঙ্গসংযুক্তা ন দীর্ঘা ন চ মন্থরাঃ .
ন স্থূলা ন কৃশাশ্চৈব স্বভাবেন ব্যবস্থিতাঃ .. ১০ ..
সুশীলা জ্ঞানবন্তশ্চ তথা চ প্রিযদর্শনাঅঃ .
কুমাররাজভূমৌ তু সংযোজ্যাশ্চ নরোত্তমাঃ .. ১১ ..
অঙ্গৈরবিকলৈর্ধীরং স্ফুটং বসনকর্মণি .
ন দীর্ঘং নৈব চ স্থূলমূহাপোহবিচক্ষণম্ .. ১২ ..
অদীনং চ প্রগল্ভং চ প্রত্যুত্পন্নবিনিশ্চযম্ .
সেনাপতেরমাত্যানাং ভূমিকাসু প্রযোজযেত্ .. ১৩ ..
পিঙ্গাক্ষং ঘোণনাসং চ নেত্রমুচ্চমথাপি বা .
কঞ্চুকিশ্রোত্রিযাদীনাং ভূমিকাসু নিযোজযেত্ .. ১৪ ..
এবমন্যেষ্বপি তথা নাট্যধর্মবিভাগতঃ .
দেশবেষানুরূপেণ পাত্রং যোজ্যং স্বভূমিষু .. ১৫ ..
মন্থরং বামনং কুব্জং বিকৃতং বিকৃতাননম্ .
বিষ্টব্ধনেত্রং কাণাক্ষং স্থূলং চিপিটনাসিকম্ .. ১৬ ..
দুর্জনং দুস্বভাবং চ বিকৃতাচারমেব চ .
দাসভূমৌ প্রযুঞ্জীত বুধো দাসাঙ্গসম্ভবম্ .. ১৭ ..
প্রকৃত্যাঽতিকৃশং ক্ষামং তপঃশ্রান্তেষু যোজযেত্ .
তথা চ পুরুষং স্থূলমুপরোধেষু যোজযেত্ .. ১৮ ..
যদি বা নেদৃশাঃ সন্তি প্রকৃত্যা পুরুষা দ্বিজাঃ .
আচার্যবুদ্ধ্যা যোজ্যাস্তু ভাবচেষ্টাস্বভাবতঃ .. ১৯ ..
যা যস্য সদৃশী চেষ্টা হ্যুত্তমাধমমধ্যমা .
স তথাঽঽচার্যযোগেন নিযম্যা ভাবভাবিনী .. ২০ ..
অতঃ পরং প্রবক্ষ্যামি ভরতানাং বিকল্পনম্ .
ভরতাশ্রযাশ্চ ভরতো বিদূষকঃ সৌরিকস্তথা নান্দী .
নন্দী সসূত্রধারো নাট্যরসো নাযকশ্চৈব .. ২১ ..
মুকুটাভরণবিকল্পৌ বিজ্ঞেযো মাল্যবস্তুবিবিধৈশ্চ .
কারককুশীলবাদ্যা বিজ্ঞেযা নামতশ্চৈব .. ২২ ..
ধুর্যবদেকো যস্মাদুদ্ধারোঽনেকভূমিকাযুক্তঃ .
ভাণ্ডগ্রহোপকরণৈনাট্যং ভরতো ভবেত্ তস্মাত্ .. ২৩ ..
লোকাহৃদাশ্রযকৃতা সর্বপ্রকৃতিপ্রচারসংযুক্তা .
নানাশ্রযাং প্রকুরুতে তথা চ নারী তু সর্বত্র .. ২৪ ..
প্রত্যুত্পন্নপ্রতিভো নর্মকৃতো নর্মগর্ভনির্ভেদঃ .
ছেদবিদূষিতবচনো বিদূষকো নাম বিজ্ঞেযঃ .. ২৫ ..
তূর্যতিস্তু নরঃ সর্বাতোদ্যপ্রবাদনে কুশলঃ .
তূরপরিগ্রহযুক্তো বিজ্ঞেযস্তৌরিকো নাম .. ২৬ ..
নটনৃতি ধাত্বর্থোঽযং ভূতং নাটযতি লোকবৃত্তান্তম্ .
রসভাবসত্বযুক্তং যস্মাত্ তস্মান্নটো ভবতি .. ২৭ ..
স্তুত্যভিবাদনকৃতৈর্মধুরৈর্বাক্যৈঃ সুমঙ্গলাচারৈঃ .
সর্ব স্তৌতি হি লোকং যস্মাত্ তস্মাদ্ভবেদ্বাদী .. ২৮ ..
ভাবেভ্যো বহুধাঽস্মিন্ রসা বদতি নাট্যযোগেষু .
প্রাকৃতসংস্কৃতপাঠ্যো নন্দী নামেতি স জ্ঞেযঃ .. ২৯ ..
গীতস্য চ বাদ্যস্য চ পাঠ্যস্য চ নৈকভাববিহিতস্য .
শিষ্টোপদেশযোগাত্ সূত্রজ্ঞঃ সূত্রধারস্তু .. ৩০ ..
যস্মাত্ যথোপদিষ্টান্ রসাংশ্চ ভাবাংশ্চ
সত্বসংযুক্তান্ .
ভূমিবিকল্পৈর্নযতি চ নাট্যকরঃ কীর্তিতস্তস্মাত্ .. ৩১ ..
চতুরাতোদ্যবিধানং সর্বস্য তু শাস্ত্রখে দবিহিতস্য .
নাট্যস্যান্তং গচ্ছতি তস্মাদ্বৈ নাযকোঽভিহিতঃ .. ৩২ ..
নানাপ্রকৃতিসমুত্থং করোতি যঃ শীর্ষকং মুকুটযোগে .
বিবিধৈর্বেষবিশেষৈঃ স চ কুটকারস্তু বিজ্ঞেযঃ .. ৩৩ ..
ভাণ্ডকবাদ্যজ্ঞা যা লযতালজ্ঞা রসানুবিদ্ধা চ .
সর্বাঙ্গসুন্দরী বৈ কর্তব্যা নাটকীযা তু .. ৩৪ ..
যস্ত্বাভরণং কুর্যাদ্ বহুবিধবিহিতং স চাভরণঃ .
যশ্চোপকরণযোগাত্ স তেন নাম্নাঽভিধাতব্যঃ .. ৩৫ ..
যো বৈ মাল্যং কুরুতে পঙ্চবিধং মাল্যাকৃত্ স বিজ্ঞেযঃ .
যশ্চাপি বেষযোগং কুরুতে স চ বেষকারী তু .. ৩৬ ..
চিত্রজ্ঞশ্চিত্রকরো বস্ত্রস্য রঞ্জানাত্তথা রজকঃ .
জত্বশ্মলোহকাষ্ঠৈর্দ্রব্যকরৈঃ কারুকশ্চৈব .. ৩৭ ..
নানাতোদ্যবিধানে প্রযোগযুক্তঃ প্রবাদনে কুশলঃ .
অতোদ্যেঽপ্যতিকুশলো যস্মাত্ স কুশলবো জ্ঞেযঃ .. ৩৮ ..
যদ্যত্ সমাশ্রযন্তে শিল্পং বা কর্ম বা প্রযোগং বা .
তনৈবোপগতগুণা বিজ্ঞেযা নামতঃ পুরুষাঃ .. ৩৯ ..
এবং তু নাটকবিধৌ জাতির্নটসংশ্রযা বুধৈর্জ্ঞেযা .
নাট্যোপকরণযুক্তা নানাশিল্পপ্রসক্তা চ .. ৪০ ..
উক্তোঽত্র ভূমিকান্যাসঃ প্রযোক্তারশ্চ যোগতঃ .
আদিষ্টং নাট্যশাস্ত্রং চ মুনযঃ কিমিহোচ্যতাম্ ..৪১ ..
ইতি ভরতীযে নাট্যশাস্ত্রে ভূমিকাবিকল্পাধ্যাযঃ পঞ্চত্রিংশঃ .. ৩৫ ..