নাট্যশাস্ত্রম্ অধ্যায ৩৩

.. নাট্যশাস্ত্রম্ অধ্যায ৩৩ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ ত্রযস্ত্রিংশোঽধ্যাযঃ .
গুণাত্ প্রবর্ততে গানং দোষং চৈব নিরস্যতে .
তস্মাদ্যত্নেন বিজ্ঞেযৌ গুণদোষৌ সমাসতঃ .. ১ ..
গাতা প্রত্যগ্রবযাঃ স্নিগ্ধো মধুরস্বরোপচিতকণ্ঠঃ .
লযতালকলাপাতপ্রমাণযোগেষু তত্ত্বজ্ঞঃ .. ২ ..
রূপগুণকান্তিযুক্তা মাধুর্যোপেতসত্বসম্পন্নাঃ .
পেশলমধুরস্নিগ্ধানুনাদিসমরক্ত গুরু (শুভ)কণ্ঠাঃ .. ৩
সুবিহিতগমকবিধাযিন্যোঽক্ষোভ্যো(ভ্যাস্)তাললযকুশলাঃ .
আতোদ্যার্পিতকরণা বিজ্ঞেযা গাযিকাঃ শ্যামাঃ .. ৪ ..
প্রাযেণ তু স্বভাবাত্ স্ত্রীণাং গানং নৃণাং চ পাঠ্যবিধিঃ .
স্ত্রীণাং স্বভাবমধুরঃ কণ্ঠো নৃণাং বলিত্বং চ .. ৫ ..
যত্র স্ত্রীণাং পাঠ্যাত্(ঠ্যং)গুণৈর্নরাণাং চ গানমধুরত্বম্ .
জ্ঞেযোঽলঙ্কারোঽসৌ ন হি স্বভাবো হ্যযং তেষাম্ .. ৬ ..
সুনিবিষ্টপাণিলযযতিযোগজ্ঞৌসুমধুরলঘুহস্তৌ .
গাতৃগুণৈশ্চোপেতাববহিতমনসৌ সুসঙ্গীতৌ .. ৭ ..
স্ফুটরচিতচিত্রকরণৌ গীতশ্রবণাচলৌপ্রবীণৌ চ .
চিত্রাদিবাদ্যকুশলৌবীণাভ্যাং বাদকৌ ভবতঃ .. ৮ ..
বলবানবহিতবুদ্ধির্গীতলযজ্ঞস্তথাসুসঙ্গীতঃ .
শ্রাবকমধুরস্নিগ্ধো দৃঢপাণির্বংশবাদকো জ্ঞেযঃ .. ৯ ..
অবিচলিতমবিচ্ছন্নং বর্ণালঙ্কারবোধকংমধুরম্ .
স্নিগ্ধং দোষবিহীনং বেণোরেবং স্মৃতং বাদ্যম্ .. ১০ ..
জ্ঞানবিজ্ঞানকরণবচনপ্রযোগসিদ্ধিনিষ্পাদনানি
ষডাচার্যগুণা ইতি .
তত্র জ্ঞানং শাস্ত্রাববোধঃ . যথা চ
ক্রিযাসম্পাদনং বিজ্ঞানম্ . কণ্ঠহস্তগৌণ্যং করণম্ .
জিতগ্রন্থতা বচনম্ . দেশাদিসম্পদারাধনং প্রযোগসিদ্ধিঃ .
শিষ্যস্বভাবমবিশেষ্যোপাত্তয
উপদেশাচ্ছিষ্যনিষ্পাদনমিতি .. ১১ ..
শ্রাবণোঽথ ঘনঃ স্নিগ্ধো মধুরোহ্যবধানবান্ .
ত্রিস্থানশোভীত্যেবং তু ষট্ কণ্ঠস্য গুণা মতাঃ .. ১২ ..
উদাত্তং শ্রূযতে যস্মাত্তস্মাচ্ছ্রাবণ উচ্যতে .
শ্রাবণঃ সুস্বরো যস্মাদচ্ছিন্নঃ স ঘনো মতঃ .. ১৩ ..
অরূক্ষধ্বনিসংযুক্তঃ স্নিগ্ধস্তজ্জ্ঞৈঃ প্রকীর্তিতঃ .
মনঃপ্রহ্লাদনকরঃ স বৈ মধুর উচ্যতে .. ১৪ ..
স্বরেঽধিকে চ হীনে চ হ্যবিরক্তো বিধানবান্ .
শিরঃকণ্ঠেষ্বভিহিতংত্রিস্থানমধুরস্বরঃ .
ত্রিস্থানশোভীত্যেবং তু স হি তজ্জ্ঞৈরুদাহৃতঃ .. ১৫ ..
কপিলো হ্যবস্থিতশ্চৈব তথা সন্দষ্ট এব চ .
কাকী চ তুম্বকী চৈব পঞ্চ দোষা ভবন্তি হি .. ১৬ ..
বৈস্বর্যং চ ভবেদ্যত্র তথা স্যাদ্ ঘর্ঘরাযিতম্ .
কপিলঃ স তু বিজ্ঞেযঃ শ্লেষ্মকণ্ঠস্তথৈব চ .. ১৭ ..
ঊনতাঽধিকতা চাপি স্বরাণাং যত্র দৃশ্যতে .
রূক্ষদোষহতশ্চৈব জ্ঞেযঃ স ত্বব্যবস্থিতঃ .. ১৮ ..
দণ্ডপ্রযোগাত্ সন্দষ্টস্ত্বাচার্যৈঃ পরিকীর্তিতঃ .
যো ন বিস্তরতি স্থানে স্বরমুচ্চারণাগতম্ .. ১৯ ..
নাসাগ্রগ্রস্তশব্দস্তুতুম্বকী সোঽভিধীযতে .. ২০ ..
অন্যে তু
সমপ্রহরণে চৈব জবিনৌ বিশদৌ তথা .
জিতশ্রমৌ বিকৃষ্টৌ চ মধুরৌ স্বেদবর্জিতৌ .
তথা বৃযন্নখৌ চৈব জ্ঞেযৌ হস্তস্য বৈ গুণাঃ .. ২১ .. ইতি
এতে গুণাশ্চ দোষাশ্চ তত্ত্বতঃ কথিতো মযা .
অত ঊর্ধ্বং প্রবক্ষ্যামি হ্যবনদ্ধবিধিং পুনঃ .. ২২ ..
পূর্বং যদুক্তং প্রপিতামহেন .
কুর্যাত্ য এবং তু নরঃ প্রযোগে
সম্মানমগ্রযং লভতে স লোকে .. ২৩ ..
ইতি ভরতীযে নাট্যশাস্ত্রে গুণদোষবিচারো
নামাধ্যাযস্ত্রযস্ত্রিংশঃ .. ৩৩ ..