নাট্যশাস্ত্রম্ অধ্যায ৩০

.. নাট্যশাস্ত্রম্ অধ্যায ৩০ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
ত্রিংশোঽধ্যাযঃ
অতোদ্যং সুষিরং নাম জ্ঞেযং বংশগতং বুধৈঃ .
বৈণ এব বিধিস্তত্র স্বরগ্রামসমাশ্রযঃ .. ১ ..
দ্বিকত্রিকচতুষ্কাস্তু জ্ঞেযা বংশগতাঃ স্বরাঃ .
কম্প্যমানার্থমুক্তাশ্চ ব্যক্তমুক্তাস্তথৈব চ .. ২ ..
তত্রোপরি যথা হ্যেকঃ স্বরো বৈণস্বরান্তরে .
প্রাপ্নোত্যন্যত্বমেবেহ তথা বংশগতোঽপি হি .. ৩ ..
দ্বিকস্ত্রিকশ্চতুষ্কো বা শ্রুতিসঙ্খ্যো ভবেত্ স্বরঃ .
অনীরণাত্তু শেষাণাং স্বরাণামপি সম্ভবঃ .
অঙ্গুলীবাদনকৃতং তচ্চ মে সন্নিবোধত .. ৪ ..
ব্যক্তমুক্তাঙ্গুলিস্তত্র স্বরো জ্ঞেযশ্চতুঃশ্রুতিঃ .
কম্প্যমানাঙ্গুলিশ্চৈব ত্রিশ্রুতিঃ পরিকীর্তিতঃ .
দ্বিকোঽর্ধাঙ্গুলিমুক্তঃ স্যাদিতি শ্রুত্যাশ্রিতাঃ স্বরাঃ .. ৫ ..
এতে স্যুর্মধ্যমগ্রামে ভূযঃ ষড্জাশ্রিতাঃ পুনঃ .
ব্যক্তমুক্তাঙ্গুলিকৃতাঃ ষড্জমধ্যমপঞ্চমাঃ .. ৬ ..
ঋষভো ধৈবতশ্চাপি কম্প্যমানাঙ্গুলীকৃতৌ .
অর্ধমুক্তাঙ্গুলিশ্চৈব গান্ধারোঽথ নিষাদবান্ .. ৭ ..
স্বরসাধারণশ্চাপি কাকল্যন্তরসংজ্ঞযা .
নিষাদগান্ধারকৃতৌ ষড্জমধ্যমযোরপি .. ৮ ..
বিপর্যযা সন্নিকর্ষে শ্রুতিলক্ষণসিদ্ধিতঃ .
বৈণকণ্ঠপ্রবেশেন সিদ্ধা একাশ্রিতাঃ স্বরাঃ .. ৯ ..
যং যং গাতা স্বরং গচ্ছেত্ তং তং বংশেন বাদযেত্ .
শারীরবৈণবংশ্যানামেকীভাবঃ প্রশস্যতে .. ১০ ..
অবিচলিতমবিচ্ছিন্নং বর্ণালঙ্কারসংযুতং বিধিবত্ .
ললিতং মধুরং স্নিগ্ধং বেণোরেবং স্মৃতং বাদ্যম্ .. ১১ ..
এবমেতত্ স্বরগতং বিজ্ঞেযংগানযোক্তৃভিঃ .
অতঃ পরং প্রবক্ষ্যামি ধনাতোদ্যবিকল্পনম্ .. ১২ ..
ইতি ভরতীযে নাট্যশাস্ত্রে সুষিরাতোদ্যলক্ষণং
নামাধ্যাযস্ত্রিংশঃ ..