নাট্যশাস্ত্রম্ অধ্যায ২৭

.. নাট্যশাস্ত্রম্ অধ্যায ২৭ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ সপ্তবিংশোঽধ্যাঅযঃ
সিদ্ধীনাং তু প্রবক্ষ্যামি লক্ষণং নাটকাশ্রযম্ .
যস্মাত্প্রযোগঃ সর্বোঽযং সিদ্ধ্যর্থং সংপ্রদর্শিতঃ .. ১..
I will now tell the features of ‘achievements’ which are related to the
drama since every performance is presented for the ‘achievements’. 1.
সিদ্ধিস্তু দ্বিবিধা জ্ঞেযা বাঙ্মনোঙ্গসমুদ্ভবা .
দৈবী চ মানুষী চৈব নানাভাবসমুত্থিতা .. ২..
‘achievments’ are known to be two fold – arising out of speech and mind
and out of body. arising out of many emotions, it is also divine and human.
দশাঙ্গা মানুষী সিদ্ধীর্দৈবী তু দ্বিবিধা স্মৃতা .
নানাসত্ত্বাশ্রযকৃতা বাঙ্নৈপথ্যশরীরজা .. ৩..
The human achievements have ten types and divine is known to be two fold.
It is based on various characters and born out of speech, drapery and body
(of the actor).
স্মিতাপহাসিনী হাসা সাধ্বহো কষ্টমেব চ .
প্রবদ্ধনাদা চ তথা সিদ্ধির্জ্ঞেযাথ বাঙ্মযী .. ৪..
পুলকৈশ্চ সরোমাঞ্চৈরভ্যুত্থানৈস্তথৈব চ .
চেলদানাঙ্গুলিক্ষেপৈঃ শারীরী সিদ্ধিরিষ্যতে .. ৫..
কিঞ্চিচ্ছিষ্টো রসো হাস্যো নৃত্যদ্ভির্যত্র যুজ্যতে .
স্মিতেন স প্রতিগ্রাহ্যঃ প্রেক্ষকৈর্নিত্যমেব চ .. ৬..
কিঞ্চিদস্পষ্টহাস্যং যত্তথা বচনমেব চ .
অর্থহাস্যেন তদ্গ্রাহ্যং প্রেক্ষকৈর্নিত্যমেব হি .. ৭..
বিদূষকোচ্ছেদকৃতং ভবেচ্ছিল্পকৃতং চ যত্ .
অতিহাস্যেন তদ্গ্রাহ্যং প্রেক্ষকৈর্নিত্যমেব তু .. ৮..
অহোকারস্তথা কার্যো নৃণাং প্রকৃতিসংভবঃ .
যদ্ধর্মপদসংযুক্তং যথাতিশযসংভবম্ .. ৯..
তত্র সাধ্বিতি যদ্বাক্যং প্রযোক্তব্যং হি সাধকৈঃ .
বিস্মযাবিষ্টভাবেষু প্রহর্ষার্থেষু চৈব হি .. ১০..
করুণেঽপি প্রযোক্তব্যং কষ্টং শাস্ত্রকৃতেন তু .
প্রবদ্ধনাদা চ তথা বিস্মযার্থেষু নিত্যশঃ .. ১১..
সাধিক্ষেপেষু বাক্যেষু প্রস্পন্দিততনূরুহৈঃ .
কুতূহলোত্তরাবেধৈর্বহুমানেন সাধযেত্ .. ১২..
দীপ্তপ্রদেশং যত্কার্যং ছেদ্যভেদ্যাহবাত্মকম্ .
সবিদ্রবমথোত্ফুল্লং তথা যুদ্ধনিযুদ্ধজম্ .. ১৩..
প্রকম্পিতাংসশীর্ষঞ্চ সাশ্রং সোত্থানমেব চ .
তত্প্রেক্ষকৈস্তু কুশলৈস্সাধ্যমেবং বিধানতঃ .. ১৪..
এবং সাধযিতব্যৈষা তজ্জ্ঞৈঃ সিদ্ধিস্তু মানুষী .
দৈবিকীঞ্চ পুনঃ সিদ্ধিং সংপ্রবক্ষ্যামি তত্ত্বতঃ .. ১৫..
যা ভাবাতিশযোপেতা সত্ত্বযুক্তা তথৈব চ .
সা প্রেক্ষকৈস্তু কর্তব্যা দৈবী সিদ্ধিঃ প্রযোগতঃ .. ১৬..
ন শব্দো ন যত্র ন ক্ষোভো ন চোত্পাতনিদর্শনম্ .
সংপূর্ণতা চ রংগস্য দৈবী সিদ্ধিস্তু সা স্মৃতা .. ১৭..
দৈবী চ মানুষী চৈব সিদ্ধিরেষা মযোদিতা .
অত ঊর্ধ্বং প্রবক্ষ্যামি ঘাতান্দৈবসমুত্থিতন্ .. ১৮..
দৈবাত্মপরসমুত্থা ত্রিবিধা ঘাতা বুধৈস্তু বিজ্ঞেযা .
ঔত্পাতিকশ্চতুর্থঃ কদাচিদথ সংভবত্যেষু .. ১৯..
বাতাগ্নিবর্ষকুঞ্জরভুজঙ্গমণ্ডপনিপাতাঃ .
কীটব্যালপিপীলিকপশুপ্রবেশনাশ্চ দৈবককৃতা .. ২০..
ঘাতনতঃ পরমহং পরযুক্তান্ সংপ্রবক্ষ্যামি .
[বৈবর্ণ্যং চাচেষ্টং বিভ্রমিতত্বং স্মৃতিপ্রমোহশ্চ .. ২১..
অন্যবচনং চ কাব্যং তথাংগদোষো বিহস্তত্বম্ .
এতে ত্বাত্মসমুত্থা ঘাতা জ্ঞেযা প্রযোগজ্ঞৈঃ .. ২২..]
মাত্সর্যাদ্দ্বেষাদ্বা তত্পক্ষত্বাত্তথার্থভেদত্বাত্ .
এতে তু পরসমুত্থা জ্ঞেযা ঘাতা বুধৈর্নিত্যম্ .. ২৩..
অতিহসিতরুদিতবিস্ফোটিতান্যথোত্কৃষ্টনালিকাপাতাঃ .
গোমযলোষ্টপিপীলিকাবিক্ষেপাশ্চারিসংভূতাঃ .. ২৪..
ঔত্পতিকাশ্চ ঘাতা মত্তোন্মত্তপ্রবেশলিঙ্গকৃতঃ .
পুনরাত্মসমুত্থা যে ঘাতাংস্তাংস্তান্ প্রবক্ষ্যামি .. ২৫..
বৈলক্ষণ্যমচেষ্টিতবিভূমিকত্বং স্মৃতিপ্রমোষশ্চ .
অন্যবচনং চ কাব্যং তথার্তনাদো বিহস্তত্বম্ .. ২৬..
অতিহসিতরুদিতবিস্বরপিপীলিকাকীটপশুবিরাবাশ্চ .
মুকুটাভরণনিপাতা পুষ্করজাঃ কাব্যদোষাশ্চ .. ২৭..
অতিহসিতরুদিতহসিতানি সিদ্ধৈর্ভাবস্য দূষকাণি স্যুঃ .
কীটপিপীলিকপাতা সিদ্ধিং সর্বাত্মনা ঘ্নান্ত .. ২৮..
বিবস্বরমজাততালং বর্ণস্বরসংপদা চ পরিহীণম্ .
অজ্ঞাতস্থানলযং স্বরগতমেবংবিধং হন্যাত্ .. ২৯..
মুকুটাভরণনিপাতঃ প্রবদ্ধনাদশ্চ নাশনো ভবতি .
পশুবিশসনং তথ অ স্যাদ্বহুবচনঘ্নং প্রযোগেষু .. ৩০..
বিষমং মানবিহীনং বিমার্জনং চাকুলপ্রহারং চ .
অবিভক্তগ্রহমোক্ষং পুষ্করগতমীদৃশং হন্তি .. ৩১..
পুনরুক্তো হ্যসমাসো বিভক্তিভেদো বিসন্ধযোঽপার্থঃ .
ত্রৈলিঙ্গজশ্চ দোষঃ প্রত্যক্ষপরোক্ষসংমোহাঃ .. ৩২..
ছন্দোবৃত্তত্যাগো গুরুলাঘবসঙ্করো যতের্ভেদঃ .
এতানি যথা স্থূলং ঘাতস্থানাঅনি কাব্যস্য .. ৩৩..
জ্ঞেযৌ তু কাব্যজাতৌ দ্বৌ ঘাতাবপ্রতিক্রিযৌ নিত্যম্ .
প্রকৃতিব্যসনসমুত্থঃ শেষোদকনালিকত্বম্ .. ৩৪..
অপ্রতিভাগং স্খলনং বিস্বরমুচ্চারণং চ কাব্যস্য .
অস্থানভূষণত্বং পতনং মুকুটস্য বিভ্রংশঃ .. ৩৫..
বাজিস্যন্দনকুঞ্জরখরোষ্ট্রশিবিকাবিমানযানানাম্ .
আরোহণাবতরণেষ্বনভিজ্ঞত্বং বিহস্ত্বম্ .. ৩৬..
প্রহরণকবচানামপ্যযথাগ্রহণং বিধারণং চাপি .
অমুকুটভূষণযোগশ্চিরপ্রবেশোঽথবা রঙ্গে .. ৩৭..
এভিঃ স্থানবিশেষৈর্ঘাতা লক্ষ্যাস্তু সূরিভিঃ কুশলৈঃ .
যূপাগ্নিচযনদর্ভস্ত্রগ্ভাণ্ডপরিগ্রহান্মুক্ত্বা .. ৩৮..
সিদ্ধ্যা মিশ্রো ঘাতস্সর্বগতশ্চৈকদেশজো বাপি .
নাট্যকুশলৈঃ সলেখ্যা সিদ্ধির্বা স্যাদ্বিঘাতো বা .. ৩৯..
নালেখ্যো বহুদিনজঃ সর্বগতোঽব্যক্তলক্ষণবিশেষঃ .
যস্ত্বৈকদিবসজাতস্স প্রত্যবরোঽপি লেখ্যস্স্যাত্ .. ৪০..
জর্জরমোক্ষ্যস্যান্তে সিদ্ধের্মোক্ষস্তু নালিকাযাস্তু .
কর্তব্যস্ত্বিহ সততং নাট্যজ্ঞৈঃ প্রাশ্নিকৈর্বিধিনা .. ৪১..
দৈন্যে দীনত্বমাযান্তি তে নাট্যে প্রেক্ষকাঃ স্মৃতাঃ .
যে তুষ্টৌ তুষ্টিমাযান্তি শোকে শোকং ব্রজন্তি চ .. ৪২..
যোঽন্যস্য মহে মূর্ধো নাংদীশ্লোকং পঠেদ্ধি দেবস্য .
স্ববশেন পূর্বরঙ্গে সিদ্ধের্ঘাতঃ প্রযোগস্য ..৪৩..
যো দেশভাবরহিতং ভাষাকাব্যং প্রযোজযেদ্বুদ্ধ্যা .
তস্যাপ্যভিলেখ্যঃ স্যাদ্ঘাতো দেশঃ প্রযোগজ্ঞৈঃ .. ৪৪..
কঃ শক্তো নাট্যবিধৌ যথাবদুপপাদনং প্রযোগস্য .
কর্তুং ব্যগ্রমনা বা যথাবদুক্তং পরিজ্ঞাতম্ .. ৪৫..
তস্মাদ্গম্ভীরার্থাঃ শব্দা যে লোকবেদসংসিদ্ধাঃ .
সর্বজনেন গ্রাহ্যা যোজ্যা নাটকে বিধিবত্ .. ৪৬..
ন চ কিঞ্চিদ্গুণহীনং দোষৈঃ পরিবর্জিতং ন চাকিঞ্চিত্ .
তস্মান্নাট্যপ্রকৃতৌ দোষা নাট্যার্থতো গ্রাহ্যা .. ৪৭..
ন চ নাদরস্তু কার্যো নটেন বাগঙ্গসত্ত্বনেপথ্যে .
রসভাবযোশ্চ গীতেষ্বাতোদ্যে লোকযুক্ত্যাং চ .. ৪৮..
এবমেতত্তু বিজ্ঞেযং সিদ্ধীনাং লক্ষণং বুধৈঃ .
অত ঊর্ধ্বং প্রবক্ষ্যামি প্রাশ্নিকানাং তু লক্ষণম্ .. ৪৯..
চারিত্রাভিজনোপেতাঃ শান্তবৃত্তাঃ কৃতশ্রমাঃ .
যশোধর্মপরাশ্চৈব মধ্যস্থবযসান্বিতাঃ .. ৫০..
ষডঙ্গনাট্যকুশলাঃ প্রবুদ্ধাঃ শুচযঃ সমাঃ .
চতুরাতোদ্যকুশলাঃ বৃত্তজ্ঞাস্তত্ত্বদর্শিনঃ .. ৫১..
দেশভাষাবিধানজ্ঞাঃ কলাশিল্পপ্রযোজকাঃ ..
চতুর্থাভিনযোপেতা রসভাববিকল্পকাঃ .. ৫২..
শব্দচ্ছন্দোবিধানজ্ঞা নানাশাস্ত্রবিচক্ষণাঃ .
এবং বিধাস্তু কর্তব্যাঃ প্রাশ্নিকা দশরূপকে .. ৫৩..
অব্যগ্রৈরিন্দ্রিযৈঃ শুদ্ধ ঊহাপোহবিশারদঃ .
ত্যক্তদোষোনুঅরাগী চ স নাট্যে প্রেক্ষকঃ স্মৃতঃ .. ৫৪..
ন চৈবেতে গুণাঃ সম্যক্ সর্বস্মিন্ প্রেক্ষকে স্মৃতাঃ .
বিজ্ঞেযস্যাপ্রমেযত্বাত্সংকীর্ণানাং চ পার্ষদি .. ৫৫..
যদ্যস্য শিল্পং নেপথ্যং কর্মচেষ্টিতমেব বা .
তত্তথা তেন কার্যং তু স্বকর্মবিষযং প্রতি .. ৫৬..
নানাশীলাঃ প্রকৃতযঃ শীলে নাট্যং বিনির্মিতম্ .
উত্তমাধমমধ্যানাং বৃদ্ধবালিশযোষিতাম্ .. ৫৭..
তুষ্যন্তি তরুণাঃ কামে বিদগ্ধাঃ সমযাত্বিতে .
অর্থেষ্বর্থপরাশ্চৈব মোক্ষে চাথ বিরাগিণঃ .. ৫৮..
শূরাস্তু বীররৌদ্রেষু নিযুদ্ধেষ্বাহবেষু চ .
ধর্মাখ্যানে পুরাণেষু বৃদ্ধাস্তুষ্যন্তি নিত্যশঃ .. ৫৯..
ন শক্যমধমৈর্জ্ঞাতুমুত্তমানাং বিচেষ্টিতম্ .
তত্ত্বভাবেষু সর্বেষু তুষ্যন্তি সততং বুধাঃ .. ৬০..
বালা মূর্খাঃ স্ত্রিযশ্চৈব হাস্যনৈপথ্যযোঃ সদা .
যস্তুষ্টো তুষ্টিমাযাতি শোকে শোকমুপৈতি চ .. ৬১..
ক্রুদ্ধঃ ক্রোধে ভযে ভীতঃ স শ্রেষ্ঠঃ প্রেক্ষকঃ স্মৃতঃ .
এবং ভাবানুকরণে যো যস্মিন্ প্রবিশেন্নরঃ .. ৬২..
স তত্র প্রেক্ষকো জ্ঞেযো গুণৈরেভিরলঙ্কৃতঃ .
এবং হি প্রেক্ষকা জ্ঞেযাঃ প্রযোগে দশরূপতঃ .. ৬৩..
সংঘর্ষে তু সমুত্পন্নে প্রাশ্নিকান্ সংনিবোধত .
যজ্ঞবিন্নর্তকশ্চৈব ছন্দোবিচ্ছব্দবিত্তথা .. ৬৪..
অস্ত্রবিচ্চিত্রকৃদ্বেশ্যা গন্ধর্বো রজসেবকঃ .
যজ্ঞবিদ্যজ্ঞযোগে তু নর্তকোঽভিনযে স্মৃতঃ .. ৬৫..
ছন্দোবিদ্বৃত্তবন্ধেষু শব্দবিত্পাঠ্যবিস্তরে .
ইষ্বস্ত্রবিত্সৌষ্ঠবে তু নেপথ্যে চৈব চিত্রকৃত্ .. ৬৬..
কামোপচারে বেশ্যা চ গান্ধর্বঃ স্বরকর্মণি .
সেবকস্তূপচারে স্যাদেতে বৈ প্রাশ্নিকাঃ স্মৃতাঃ .. ৬৭..
এভির্দৃষ্টান্তসংযুক্তৈর্দোষা বাচ্যাস্তথা গুণাঃ .
অশাস্ত্রজ্ঞা বিবাদেষু যথা প্রকৃতিকর্মতঃ .. ৬৮..
অথৈতে প্রশ্নিকা জ্ঞেযাঃ কথিতা যে মযানঘাঃ .
শাস্ত্রজ্ঞানাদ্যদা তু স্যাত্সংঘর্ষঃ শাস্ত্রসংশ্রযঃ .. ৬৯..
শাস্ত্রপ্রামাণনির্মাণৈর্ব্যবহারো ভবেত্তদা .
ভর্তৃনিযোগাদন্যোঽন্যবিগ্রাত্স্পর্ধযাপি ভরতানাম্ .. ৭০..
অর্থপতাকা হেতোস্সংঘর্ষো নাম সংভবতি .
তেষাং কার্যং ব্যবহারদর্শনং পক্ষপাতবিরহেণ .. ৭১..
কৃত্বা পণং পতাকাং ব্যবহারঃ স ভবিতব্যস্তু .
সর্বৈরনন্যমতিভিঃ সুখোপবিষ্টৈশ্চ শুদ্ধভাবৈশ্চ .. ৭২..
যৈর্লেখকগমকসহাযাস্সহ সিদ্ধিভির্ঘাতাঃ .
নাত্যাসনৈর্নদূরসংস্থিতৈঃ প্রেক্ষকৈস্তু ভবিতব্যম্ .. ৭৩..
তেষামাসনযোগো দ্বাদশহস্তস্থিতঃ কার্যঃ .
যানি বিহিতানি পূর্বং সিদ্ধিস্থানানি তানি লক্ষ্যাণি .. ৭৪..
ঘাতাশ্চ লক্ষণীযাঃ প্রযোগতো নাট্যযোগে তু .
দৈবাদ্ঘাতসমুত্থাঃ পরোত্থিতা বা বুধৈর্নবৈর্লেখ্যাঃ .. ৭৫..
ঘাতা নাট্যসমুত্থা হ্যাত্মসমুত্থাস্তু লেখ্যাঃ স্যুঃ .
ঘাতা যস্য ত্বল্পাঃ সংখ্যাতাঃ সিদ্ধযশ্চ বহুলাঃ স্যুঃ .. ৭৬..
বিদিতং কৃত্বা রাজ্ঞস্তস্মৈ দেযা পতাকা হি .
সিধ্যতিশযাত্পতাকা সমসিদ্ধৌ পার্থিবাজ্ঞযা দেযা .. ৭৭..
অথ নরপতিঃ সমঃ স্যাদুভযোরপি সা তদা দেযা .
এবং বিধিজ্ঞৈর্যষ্টব্যো ব্যবহারঃ সমঞ্জসাম্ .. ৭৮..
স্বস্থচিত্তসুখাসিনৈঃ সুবিশিষ্টৈর্গুণার্থিভিঃ .
বিমৃশ্য প্রেক্ষকৈর্গ্রাহ্যং সর্বরাগপরাঙ্গমুখৈঃ .. ৭৯..
সাধন দূষণাভাসঃ প্রযোগসমযাশ্রিতৈঃ .
সমত্বমঙ্গমাধুর্যং পাঠ্যং প্রকৃতযো রসাঃ .. ৮০..
বাদ্যং গানং সনেপথ্যমেতজ্জ্ঞেযং প্রযত্নতঃ .
গীতবাদিত্রতালেন কলান্তরকলাসু চ .. ৮১..
উঅদঙ্গং ক্রিযতে নাট্যং সমন্তাত্ সমমুচ্যতে .
অঙ্গোপাঙ্গসমাযুক্তং গীততাললযান্বিতম্ .. ৮২..
গানবাদ্যসমত্বং চ তদ্বুধৈঃ সমমুচ্যতে .
সনির্ভুগ্নমুরঃ কৃত্বা চতুরশ্রক্রুতৌ করৌ .. ৮৩..
গ্রীবাঞ্চিতা তথা কর্যা ত্বঙ্গমাধুর্যমেব চ .
পূর্ব্রোক্তানীহ শেষাণি যানি দ্রব্যাণি সাধকৈ হ্.. ৮৪..
বদ্যাদীনাং পুনর্বুপ্রা লক্ষণং সন্নিবোধত .
বাদ্যপ্রভৃতযো গানং বাদ্যমাণানি নির্দিশেত্ .. ৮৫..
যানি স্থানানি সিদ্ধীনাং তৈঃ সিদ্ধিং তু প্রকাশযেত্ .
হর্ষাদঙ্গসমুদ্ভূতাং নানারসসমুত্থিতাম্ .. ৮৬..
বারকালাস্তু বিজ্ঞেযা নাট্যজ্ঞৈর্বিবিধাশ্রযাঃ .
দিবসৈশ্চৈব রাত্রিশ্চ তযোর্বারান্ নিবোধত .. ৮৭..
পূর্বাহ্ণস্ত্বথ মধ্যাহ্নস্ত্বপরাহ্ণস্তথৈব চ .
দিবা সমুত্থা বিজ্ঞেযা নাট্যবারাঃ প্রযোগতঃ .. ৮৮..
প্রাদোষিকার্ধরাত্রিশ্চ তথা প্রাভাতিকোঽপরঃ .
নাট্যবারা ভবন্ত্যেতে রাত্রাবিত্যনুপূর্বশঃ .. ৮৯..
এতেষাং অত্র যদ্যোজ্যং নাট্যকার্যং রসাশ্রযম্ .
তদহং সংপ্রবক্ষ্যামি বারকালসমাশ্রযম্ .. ৯০..
যচ্ছ্রোত্ররমণীযং স্যাদ্ধর্মোত্থনকৃতং চ যত্ .
পূর্বাহ্ণে তত্প্রযোক্তব্যং শুদ্ধং বা বিকৃতং তথা .. ৯১..
সত্ত্বোত্থানগুণৈর্যুক্তং বাদ্যভূযিষ্ঠমেব চ .
পুষ্কলং সত্ত্বযুক্তং চ অপরাহ্ণে প্রযোজযেত্ .. ৯২..
কৈশিকীবৃত্তিসংযুক্তং শৃঙ্গারসসংশ্রযম্ .
নৃত্যবাদিত্রগীতাঢ্যং প্রদোষে নাট্যমিষ্যতে .. ৯৩..
যন্নর্মহাস্যবহুলং করুণপ্রাযমেব চ .
প্রভাতকালে তত্কার্যং নাট্যং নিদ্রাবিনাশনম্ .. ৯৪..
অর্ধরাত্রে নিযুঞ্জীত সমধ্যাহ্নে তথৈব চ .
সন্ধ্যাভোজনকালে চ নাট্যং নৈব প্রযোজযেত্ .. ৯৫..
এবং কালং চ দেশং চ সমীক্ষ্য চ বলাবলম্ .
নিত্যং নাট্যং প্রযুঞ্জীত যথাভাবং যথারসম্ .. ৯৬..
অথব দেশকালৌ চ ন পরীক্ষ্যৌ প্রযোক্তৃভিঃ
যথৈবাজ্ঞাপযেদ্ভর্তা তদা যোজ্যমসংশযম্. . ৯৭..
তথা সমুদিআতাশ্চৈব বিজ্ঞেযা নাটকাশ্রিতাঃ .
পাত্রং প্রযোগমৃদ্ধিশ্চ বিজ্ঞেযাস্তু ত্রযো গুণাঃ .. ৯৮..
বুদ্ধিমত্বং সুরূপত্বং লযতালজ্ঞতা তথা .
রসভাবজ্ঞতা চৈব বযস্স্থত্বং কুতূহলম্ .. ৯৯..
গ্রহণং ধারণং চৈব গাত্রাবৈকল্যমেব চ .
নিজসাধ্বসতোত্সাহ ইতি পাত্রগতো বিধিঃ .. ১০০..
সুবাদ্যতা সুগানত্বং সুপাঠ্যত্বং তথৈব চ .
শাস্ত্রকর্মসমাযোগঃ প্রযোগ ইতি সংজ্ঞিতঃ .. ১০১..
শুচিভূষণতাযাং তু মাল্যাভরণবাসসাম্ .
বিচিত্ররচনা চৈব সমৃদ্ধিরিতি সংজ্ঞিতা .. ১০২..
যদা সমুদিতাঃ সর্বে একীভূতা ভবন্তি হি .
অলঙ্কারাঃ সকুতপা মন্তব্যো নাটকাশ্রযাঃ .. ১০৩..
এতদুক্তং দ্বিজশ্রেষ্ঠাঃ সিদ্ধীনাং লক্ষণং মযা .
অত ঊর্ধ্বং প্রবক্ষ্যাম্যাতোদ্যানাং বিকল্পনম্ .. ১০৪..
ইতি ভারতীযে নাট্যশাস্ত্রে সিদ্ধিব্যঞ্জকো
নাম সপ্তবিংশোঽধ্যাযঃ ..