নাট্যশাস্ত্রম্ অধ্যায ২৬

.. নাট্যশাস্ত্রম্ অধ্যায ২৬ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
ষড্বিংশোঽধ্যাযঃ
অনুরূপা বিরূপা চ তথা রূপানুরূপিণী .
ত্রিপ্রকারেহ পাত্রাণাং প্রকৃতিশ্চ বিভাবিতা .. ১..
নানাবস্থাক্রিযোপেতা ভূমিকা প্রকৃতিস্তথা .
ভৃশমুদ্যোতযেন্নাট্যং স্বভাবকরণাশ্রযম্ .. ২..
বহুবাহূবহুমুখাস্তথা চ বিকৃতাননাঃ .
পশুশ্বাপদবক্ত্রাশ্চ খরোষ্ট্রাশ্চ গজাননাঃ .. ৩..
এতে চান্যে চ বহবো নানারূপা ভবন্তি যে .
আচার্যেণ তু তে কার্যা মৃত্কাষ্ঠজতুচর্মভিঃ .. ৪..
স্বাভাবিকেন রূপেন প্রবিশেদ্রঙ্গমণ্ডলম্ .
আত্মরূপমবচ্ছাদ্য বর্ণকৈর্ভূষণৈরপি .. ৫..
যাদৃশং যস্য যদ্রূপং প্রকৃত্যা তত্র তাদৃশম্ ..
বযোবেষানুরূপেণ প্রযোজ্যং নাট্যকর্মণি .. ৬..
যথা জীবত্স্বভাবং হি পরিত্যজ্যান্যদেহিকম্ .
পরভাবং প্রকুরুতে পরভাবং সমাশ্রিতঃ .. ৭..
এবং বুধঃ পরংভাবং সোঽস্মীতি মনসা স্মরন্ .
যেষাং বাগঙ্গলীলাভিশ্চেষ্টাভিস্তু সমাচরেত্ .. ৮..
সুকুমারপ্রযোগো যো রাজ্ঞামামোদসংভবঃ .
শৃঙ্গাররসমাসাদ্য তন্নারীষু প্রযোজযেত্ .. ৯..
যুদ্ধোদ্ধতাবিদ্ধকৃতা সংরংভারভটাশ্চ যে .
ন তে স্ত্রীভিঃ প্রযোক্তব্যাঃ যোক্তব্যাঃ পুরুষেষু তে .. ১০..
অনুদ্ভটমসংভ্রান্তমনাবিদ্ধাঙ্গচেষ্টিতম্ .
লযতালকলাপাতপ্রমাণনিযতাক্ষরম্ .. ১১..
সুবিভক্তপদালাপমনিষ্ঠুরমকাহলম্ .
ঈদৃশং যদ্ভবেন্নাট্যং নারীভিশ্চ প্রযোজযেত্ .. ১২..
এবং কার্যং প্রযোগজ্ঞৈর্ভূমিকাবিনিবেশনম্ .
স্ত্রিযো হি স্ত্রীগতো ভাবঃ পৌরুষঃ পুরুষস্যচ .. ১৩..
যথা বযো যথাবস্থমনুরূপেতি সা স্মৃতা .
পুরুষঃ স্ত্রীকৃতং ভাবং রূপাত্প্রকুরুতে তু যঃ .. ১৪..
রূপানুরূপা সা জ্ঞেযা প্রযোগে প্রকৃতির্বুধঃ .
ছন্দতঃ পৌরুষীং ভূমিং স্ত্রী কুর্যাদনুরূপতঃ .. ১৫..
ন পরস্পরচেষ্টাসু কার্যৌ স্থবিরবালিশৌ .
পাঠ্যপ্রযোগে পুরুষাঃ প্রযোক্তব্যা হি সংস্কৃতে .. ১৬..
স্ত্রীণাং স্বভাবমধুরাঃ কণ্ঠাঃ পুংসাং তু বলবন্তঃ .
যদ্যপি পুরুষো বিদ্যাত্ গীতবিধানং চ লক্ষণোপেতম্ .. ১৭..
মাধুর্যগুণবিহীনং শোভাং জনযেন্ন তদ্গীতম্ .
যত্র স্ত্রীণাং পাঠ্যাদ্গুণৈর্নরাণাং চ কণ্ঠমাধুর্যম্ .. ১৮..
প্রকৃতিবিপর্যযজনিতৌ বিজ্ঞেযৌ তাবলঙ্কারৌ .
প্রাযেণ দেবপার্থিবসেনাপতিমুখ্যপুরুষভবনেষু .. ১৯..
স্ত্রীজনকৃতাঃ প্রযোগা ভবন্তি পুরুষস্বভাবেন .
রম্ভোর্বশীপ্রভৃতিষু স্বর্গে নাট্যং প্রতিষ্ঠিতম্ .. ২০..
তথৈব মানুষে লোকে রাজ্ঞামন্তঃপুরেষ্বিহ .
উপদেষ্টব্যমাচার্যৈঃ প্রযত্নেনাঙ্গনাজনে .. ২১..
ন স্বযং ভূমিকাভ্যাসো বুধৈঃ কার্যস্তু নাটকে .
স্ত্রীষু যোজ্যঃ প্রযত্নেন প্রযোগঃ পুরুষাশ্রযঃ .. ২২..
যস্মাত্স্বভাবোপগতো বিলাসঃ স্ত্রীষু বিদ্যতে .
তস্মাত্স্বভাবমধুরমঙ্গং সুলভসৌষ্ঠবম্ .. ২৩..
ললিতং সৌষ্ঠবং যচ্চ সোঽলঙ্কারঃ পরো মতঃ .
প্রযোগো দ্বিবিধশ্চৈব বিজ্ঞেযো নাটকাশ্রযঃ .. ২৪..
সুকুমারস্তথাবিদ্ধো নানাভাবরসাশ্রযঃ .
নাটকং সপ্রকরণং ভাণো বীথ্যঙ্ক এব চ .. ২৫..
জ্ঞেযানি সুকুমারাণি মানুষৈরাশ্রিতানি তু .
সুকুমারপ্রযোগোঽযং রাজ্ঞামামোদকারকঃ .. ২৬..
শৃঙ্গারসমাসাদ্য স্ত্রীণাং তত্তু প্রযোজযেত্ .
যুদ্ধোদ্ধতাবিদ্ধকৃতাসংরংভারভটাশ্চ যে .. ২৭..
ন তে স্ত্রীণাং প্রকর্তব্যাঃ কর্তব্যাঃ পুরুষৈর্হি তে .
যথাবিদ্ধাঙ্গহারং তু ভেদ্যভেদ্যাহবাত্মকম্ .. ২৮..
মাযেন্দ্রজালবহুলং পুস্তনৈপথ্যদীপিতম্ .
পুরুষপ্রাযসংচারমল্পস্ত্রীকমথোদ্ধতম্ .. ২৯..
সাত্বত্যারভটীইযুক্তং নাট্যমাবিদ্ধসংজ্ঞিতম্ .
ডিমঃ সমবকারশ্চ ব্যাযোগেহামৃগৌ তথা .. ৩০..
এতান্যাবিদ্ধসংজ্ঞানি বিজ্ঞেযানি প্রযোক্তৃভিঃ .
এষাং প্রযোগঃ কর্তব্যো দেবদানবরাক্ষসৈঃ .. ৩১..
উদ্ধতা যে চ পুরুষাঃ শৌর্যবীর্যসমন্বিতাঃ .
যোগ্যঃ স চ প্রযত্নঃ কর্তব্যঃ সততপ্রমাদেন .. ৩২..
ন হি যোগ্যযা বিনা ভবতি চ ভাবরসসৌষ্ঠবং কিংচিত্ .
সংগীতপরিক্লেশো নিত্যং প্রমদাজনস্য গুণ এব .. ৩৩..
যন্মধুরকর্কশত্বং লভতে নাট্যপ্রযোগেণ .
প্রমদাঃ নাট্যবিলাসৈর্লভতে যত্ কুসুমৈর্বিচিত্রলাবণ্যম্ .
কামোপচারকুশলা ভবন্তি চ কাম্যা বিশেষেণ ..৩৪..
গীতং বৃত্তং তথা বাদ্যং প্রস্তারগমনক্রিযা .
শিষ্যনিষ্পাদনং চৈব ষডাচার্যগুণাঃ স্মৃতাঃ .. ৩৫..
এতানি পঞ্চ যো বেত্তি স আচার্যঃ প্রকীর্তিতঃ .
ঊহাপোহৌ মতিশ্চৈব স্মৃতির্মেধা তথৈব চ .. ৩৬..
মেধাস্মৃতির্গুণশ্লাঘারাগঃ সংঘর্ষ এব চ .
উত্সাহশ্চ ষডেবৈতান্ শিষ্যস্যাপি গুণান্ বিদুঃ .. ৩৭..
এবং কার্যং প্রযোগজ্ঞৈর্নানাভূমিবিকল্পনম্ .
অত ঊর্ধ্বং প্রবক্ষ্যামি সিদ্ধীনামপি লক্ষণম্ .. ৩৮..
ইতি ভারতীযে নাট্যশাস্ত্রে বিকৃতিবিকল্পো
নাম ষড্বিংশোঽধ্যাযঃ ..