নাট্যশাস্ত্রম্ অধ্যায ২৫

.. নাট্যশাস্ত্রম্ অধ্যায ২৫ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
পঞ্চবিংশোঽধ্যাযঃ .
অঙ্গাভিনযস্যৈব যো বিশেষঃ ক্বচিত্ ক্বচিত্ .
অনুক্ত উচ্যতে চিত্রঃ চিত্রাভিনযস্স্মৃতঃ .. ১..
উত্তানৌ তু করৌ কৃত্বা স্বস্তিকৌ পার্শ্বসংস্থিতৌ .
উদ্বাহিতেন শিরসা তথা চোর্ধ্বনিরীক্ষণাত্ .. ২..
প্রভাতং গগনং রাত্রিঃ প্রদোষং দিবসং তথা .
ঋতূন্ ঘনান্ বনান্তাংশ্চ বিস্তীর্ণাংশ্চ জলাশযান্ .. ৩..
দিশো গ্রহান্ সনক্ষত্রান্ কিঞ্চিত্ স্বস্থং চ যদ্ভবেত্ .
তস্য ত্বভিনযঃ কার্যো নানাদৃষ্টিসমন্বিতঃ .. ৪..
এভিরেব করৈর্ভূযস্তেনৈব শিরসা পুনঃ .
অধো নিরীক্ষণেনাথ ভূমিস্থান্ সংপ্রদর্শযেত্ .. ৫..
স্পর্শস্য গ্রহণেনৈব তথোল্লুকসনেন চ .
চন্দ্রজ্যোস্ত্নাং সুখং বাযুং রসং গন্ধং চ নির্দিশেত্ .. ৬..
বস্ত্রাবকুণ্ঠনাত্সূর্যং রজোধূমানিলাংস্তথা .
ভূমিতাপমথোষ্ণং চ কুর্যাচ্ছাযাভিলাষতঃ .. ৭..
ঊর্ধ্বাকেকরদৃষ্টিস্তু মধ্যাহ্নে সূর্যমাদিশেত্ .
উদযাস্তগতং চৈব বিস্মযার্থৈঃ প্রদর্শযেত্ ..৮..
যানি সৌম্যার্থযুক্তানি সুস্বভাবকৃতানি চ .
গাত্রস্পর্শৈস্সরোমাঞ্চৈস্তেষামভিনযো ভবেত্ .. ৯..
যানি স্যুস্তীক্ষ্ণরূপাণি তানি চাভিনযেত্সুধীঃ .
অসংস্পর্শৈস্তথোদ্বেগৈস্তথা মুখবিকুণ্ঠনৈঃ .. ১০..
গম্ভীরোদাতসংযুক্তানর্থানভিনযেদ্বুধঃ .
সাটোপৈশ্চ সগর্বৈশ্চ গাত্রৈঃ সৌষ্ঠবসংযুতৈঃ .. ১১..
যজ্ঞোপবীতদেশস্থমরালং হাসমাদিশেত্ .
স্বস্তিকৌ বিচ্যুতৌ হারস্রগ্দামার্থান্ নিদর্শযেত্ .. ১২..
ভ্রমণেন প্রদর্শিন্যা দৃষ্টেঃ পরিগমেন চ .
অলপদ্মকপীডাযাঃ সর্বার্থগ্রহণং ভবেত্ .. ১৩..
শ্রব্যং শ্রবণযোগেন দৃশ্যং দৃষ্টিবিলোকনৈঃ .
আত্মস্থং পরসংস্থং বা মধ্যস্থং বা বিনির্দিশেত্ .. ১৪..
বিদ্যুদুল্কাঘনরবাবিষ্ফুলিংগার্চিষস্তথা .
ত্রস্তাংগাক্ষিনিমেষৈশ্চ তেঽভিনেযাঃ প্রযোক্তৃভিঃ .. ১৫..
উদ্বেষ্টিতকরাবৃত্তৌ করৌ কৃত্বা নতং শিরঃ .
অসংস্পর্শে তথানিষ্টে জিহ্মদৃষ্টেন কারযেত্ .. ১৬..
বাযুমুষ্ণং তমস্তেজো মুখপ্রচ্ছাদনেন চ .
রেণুতোযপতংগাংশ্চ ভ্রমরাংশ্চ নিবারযেত্ .. ১৭..
কৃত্বা স্বস্তিকসংস্থানৌ পদ্মকোশাবধোমুখৌ .
সিঅংহর্ক্ষবানরব্যাঘ্রশ্বাপদাংশ্চ নিরূপযেত্ ..১৮..
স্বস্তিকৌ ত্রিপতাকৌ তু গুরূণাং পাদবন্দনে .
খটকস্বস্থিকৌ চাপি প্রতোদগ্রহণে স্মৃতৌ .. ১৯..
একং দ্বি ত্রীণি চত্বারি পঞ্চ ষট্ সপ্ত চাষ্টধা .
নব বা দশ বাপি স্যুর্গণনাংগুলিভির্ভবেত্ .. ২০..
দশাখ্যাশ্চ শতাখ্যাশ্চ সহস্রাখ্যাস্তথৈব চ .
পতাকাভ্যাং তু হস্তাভ্যাং প্রযোজ্যাস্তাঃ প্রযোক্তৃভিঃ .. ২১..
দশাখ্যগণনাযাস্তু পরতো যা ভবেদিহ .
বাক্যার্থেনৈব সাধ্যাসৌ পরোক্ষাভিনযেন চ .. ২২..
ছত্রধ্বজপতাকাশ্চ নির্দেশ্যা দণ্ডধারণাত্ .
নানাপ্রহরণং চাথ নির্দেশ্যং ধারণাশ্রযম্ .. ২৩..
একচিত্তো হ্যধোদৃষ্টিঃ কিঞ্চিন্নতশিরাস্তথা .
সব্যহস্তশ্চ সংদংশঃ স্মৃতে ধ্যানে বিতর্কিতে .. ২৪..
উদ্বাহিতং শিরঃ কৃত্বা হংসপক্ষৌ প্রদক্ষিণৌ .
অপত্যরূপণে কার্যাবুছ্রযৌ চ প্রযোক্তৃভিঃ .. ২৫..
উদ্বাহিতং শিরঃ কৃত্বা হংসবক্ত্রং তথোর্ধ্বগম্ .
প্রসাদযচ্চ যং মানং দীর্ঘসত্বং চ নির্দিশেত্ .. ২৬..
অরালং চ শিরস্থানে সমুদ্বাহ্য তু বামকম্ .
গতে নির্বৃত্তে ধ্বস্তে চ শ্রান্তবাক্যে চ যোজযেত্ .. ২৭..
সর্বেন্দ্রিযস্বস্থতযা প্রসন্নবদনস্তথা .
বিচিত্রভূতলালোকৈঃ শরদন্তু বিনির্দিশেত্ .. ২৮..
গাত্রসংকোচনাচ্চাপি সূর্যাগ্নিপটুসেবনাত্ .
হেমন্তস্ত্বভিনেতব্যঃ পুরুষৈর্মধ্যমাধমৈঃ .. ২৯..
শিরোদন্তোষ্ঠকম্পেন গাত্রসংকোচনেন চ .
কূজিতৈশ্চ সশীত্কারৈরধমশ্শীতমাদিশেত্ .. ৩০..
অবস্থান্তরমাসাদ্য কদাচিত্তূত্তমরৈরপি .
শীতাভিনযনং কূর্যাদ্দেবাদ্ব্যসনসংভবম্ .. ৩১..
ঋতুজানাং তু পুষ্পাণাং গন্ধঘ্রাণৈস্তথৈব চ .
রূক্ষস্য বাযোঃ স্পর্শাচ্চ শিশিরং রূপযেদ্বুধঃ .. ৩২..
প্রমোদজননারংভৈরুপভোগৈঃ পৃথগ্বিধিঃ .
বসন্তস্ত্বভিনেতব্যো নানাপুষ্পপ্রদর্শনাত্ .. ৩৩..
স্বেদ প্রমার্জনৈশ্চৈব ভূমিতাপৈঃ সবীজনৈঃ .
উষ্ণস্য বাযোঃ স্পর্শেন গ্রীষ্মং ত্বভিনযেদ্বুধঃ .. ৩৪..
কদম্বনীপকুটপৈঃ শাদ্বলৈঃ সেন্দ্রগোপকৈঃ .
মেঘবাতৈঃ সুখস্পর্শৈঃ প্রাবৃট্কালং প্রদর্শযেত্ .. ৩৫..
মেঘৌঘনাদৈর্গম্ভীরৈর্ধারাপ্রপতনৈস্তদা .
বিদ্যুন্নির্ঘাতঘোষৈশ্চ বর্ষারাত্রং সমাদিশেত্ .. ৩৬..
যদ্যস্য চিহ্নং বেষো বা কর্ম বা রূপমেব বা .
নির্দেশ্যঃ স ঋতুস্তেন ইষ্টানিষ্টার্থদর্শনাত্ .. ৩৭..
এতানৃতূনর্থবশাদ্দর্শযেদ্ধি রসানুগান্ .
সুখিনস্তু সুখোপেতান্ সুঃখার্থান্ দুঃখসংযুতান্ .. ৩৮..
যো যেন ভাবেনাবিষ্টঃ সুখদেনেতরেঅন বা .
স তদাহিতসংকারঃ সর্বং পশ্যতি তন্মযম্ .. ৩৯..
ভাবাভিনযনং কুর্যাদ্বিভাবানাং নিদর্শনৈঃ .
তথৈব চানুভাবানাং ভাবসিদ্ধিঃ প্রবর্তিতা .. ৪০..
বিভাবেনাহৃতং কার্যমনুভাবেন নীযতে .
আত্মানুভবনং ভাবো বিভাবঃ পরদর্শনম্ .. ৪১..
গুরুর্মিত্রং সখা স্নিগ্ধঃ সংবন্ধী বন্ধুরেব বা .
আবেদ্যতে হি যঃ প্রাপ্তঃ স বিভাব ইতি স্মৃতঃ .. ৪২..
যত্ত্বস্য সংভ্রমোত্থানৈরর্ঘ্যপাদ্যাসনাদিভিঃ .
পূজনং ক্রিযতে ভক্ত্যা সোঽনুভাবঃ প্রকীর্তিতঃ .. ৪৩..
এবমন্যেষ্বপি জ্ঞেযো নানাকার্যপ্রদর্শনাত্ .
বিভাবো বাপি ভাবো বা বিজ্ঞেযোঽর্থবশাদ্বুধৈঃ .. ৪৪..
যস্ত্বপি প্রতিসংদেশো দূতস্যেহ প্রদীযতে .
সোঽনুভাব ইতি জ্ঞেযঃ প্রতিসন্দেশদর্শিতঃ .. ৪৫..
এবং ভাবো বিভাবো বাপ্যনুভাবশ্চ কীর্তিতঃ .
পুরুষৈরভিনেযঃ স্যাত্প্রমদাভিরথাপি বা .. ৪৬..
স্বভাবাভিনযে স্থানং পুংসাং কার্যং তু বৈষ্ণবম্ .
আযতং বাবহিত্থং বা স্ত্রীণাং কার্যং স্বভাবতঃ .. ৪৭..
প্রযোজনবশাচ্চৈব শেষাণ্যপি ভবন্তি হি .
নানাভবাভিনযনৈঃ প্রযোগৈশ্চ পৃথগ্বিধৈঃ .. ৪৮..
ধৈর্যলীলাঙ্গসংপন্নং পুরুষাণাং বিচেষ্টিতম্ .
মৃদুলীলাঙ্গহারৈশ্চ স্ত্রীণাং কার্যং তু চেষ্টিতম্ .. ৪৯..
করপাদাঙ্গসঞ্চারাস্স্ত্রীণাং তু ললিতাঃ স্মৃতাঃ .
সুধীরশ্চোদ্ধতশ্চৈব পুরুষাণাং প্রযোক্তৃভিঃ .. ৫০..
যথা রসং যথা ভাবং স্ত্রীণাং ভাবপ্রদর্শনম্ .
নরাণাং প্রমদানাং চ ভাবাভিনযনং পৃথক্ .. ৫১..
ভাবানুভাবনং যুক্তং ব্যাখ্যাস্যাম্যনুপূর্বশঃ .
আলিঙ্গনেন গাত্রাণাং সস্মিতেন চ চক্ষুষা .. ৫২..
তথোল্লুকসানচ্চাপি হর্ষং সংদর্শযেন্নরঃ .
ক্ষিপ্রস! ন্জাতরোমাঞ্চাত্ বাষ্পেণাবৃতলোচনা .. ৫৩..
কুর্বীত নর্তকী হর্ষং প্রীত্যা বাক্যৈশ্চ সস্মিতৈঃ .
উদ্বৃত্তরক্তনেত্রশ্চ সন্দষ্টাধর এব চ .. ৫৪..
নিশ্বাসকংপিতাংগশ্চ ক্রোধং চাভিনযেন্নরঃ .
নেত্রাভ্যাং বাষ্পপূর্ণাভ্যাং চিবুকৌষ্ঠপ্রকংপনাত্ .. ৫৫..
শিরসঃ কংপনাচ্চৈব ভ্রুকুটীকরণেন চ .
মৌনেনাঙ্গুলিভঙ্গেন মাল্যাভরণবর্জনাত্ .. ৫৬..
আযতকস্থানকক্ষাযা ঈর্ষ্যা ক্রোধে ভবেত্স্ত্রিযাঃ .
নিশ্বাসোচ্ছ্বাসবহুলৈরধোমুখবিচিন্তনৈঃ .. ৫৭..
আকাশবচনাচ্চাপি দুঃখং পুংসাং তু যোজযেত্ .
রুদিতৈঃ শ্বসিতৈশ্চৈব শিরোভিহননেন চ .. ৫৮..
ভূমিপাতাভিঘাতৈশ্চ দুঃখং স্ত্রীষু প্রযোজযেত্ .
আনন্দজং চার্তিজং বা ঈর্ষ্যাসংভূতমেব বা .. ৫৯ ..
যত্পূর্বমুক্তং রুদিতং তত্স্ত্রীনীচেষু যোজযেত্ .
সংভ্রমাবেগচেষ্টাভিশ্শস্ত্রসংপাতনেন চ .. ৬০ ..
পুরুষাণাং ভযং কার্যং ধৈর্যাবেগবলাদিভিঃ .
চলতারকনেত্রত্বাদ্গাত্রৈঃ স্ফুরিতকম্পিতৈঃ .. ৬১..
সন্ত্রস্তহৃদযত্বাচ্চ পার্শ্বাভ্যামবলোকনৈঃ .
ভর্তৃরন্বেষণাচ্চৈবমুচ্চৈরাক্রন্দনাদপি .. ৬২..
প্রিযস্যালিংগনাচ্চৈব ভযং কার্যং ভবেত্স্ত্রিযাঃ .
মদা যেঽভিহিতাঃ পূর্বং তে স্ত্রীনীচেষু যোজযেত্ .. ৬৩..
মৃদুভিঃ স্খলিতৈর্নিত্যমাকাশস্যাবলংবনাত্ .
নেত্রাবঘূর্ণনৈশ্চৈব সালস্যৈঃ কথিতৈস্তথা .. ৬৪..
গাত্রাণাং কংপনৈশ্চৈব মদঃ কার্যো ভবেত্স্ত্রিযাঃ .
অনেন বিধিনা কার্যঃ প্রযোগাঃ কারণোত্থিতাঃ .. ৬৫..
পৌরুষঃ স্ত্রীকৃতো বাপি ভাবা হ্যভিনযং প্রতি .
সর্বে সললিতা ভাবাস্স্ত্রীভিঃ কার্যাঃ প্রযত্নতঃ .. ৬৬..
ধৈর্যমাধুর্যসংপন্না ভাবাঃ কার্যাস্তু পৌরুষাঃ .
ত্রিপতাকাঙ্গুলীভ্যাং তু বলিতাভ্যাং প্রযোজযেত্ .. ৬৭..
শুকাশ্চ সারিকাশ্চৈব সূক্ষ্মা যে চাপি পক্ষিণঃ .
শিখিসারসহংসাদ্যাঃ স্থূলা যেঽপি স্বভাবতঃ .. ৬৮..
রেচকৈরঙ্গহারৈশ্চ তেষামভিনযো ভবেত্ .
খরোষ্ট্রাশ্বতরাসিংহব্যাঘ্রগোমহিষাদয .. ৬৯..
গতিপ্রচরৈরঙ্গৈশ্চ তেঽভিনেযাঃ প্রযোক্তৃভিঃ .
ভূতাঃ পিশাচা যক্ষাশ্চ দানবাঃ সহরাক্ষসৈঃ .. ৭০..
অঙ্গহারৈরবিনির্দেশ্যা নামসংকীর্তনাদপি .
অঙ্গহারৈর্বিনির্দেশ্যা অপ্রত্যক্ষা ভবন্তি যে .. ৭১..
প্রত্যক্ষাস্ত্বভিনেতব্যা ভযোদ্বেগৈঃ সবিস্মযৈঃ .
দেবাশ্চ চিহ্নৈশ্চ প্রণামকরণৈর্ভাবৈশ্চ বিচেষ্টিতৈঃ .. ৭২..
অভিনেযো হ্যর্থবশাদপ্রত্যক্ষাঃ প্রযোগজ্ঞৈঃ .
সব্যোত্থিতেন হস্তেন হ্যরালেন শিরঃ স্পৃশেত্ .. ৭৩..
নরেঽহ্যভিবাদনং হ্যেতদপ্রত্যক্ষে বিধীযতে .
খটকাবর্ধমানেন কপোতাখ্যেন বা পুনঃ .. ৭৪..
দৈবতানি গুরূংশ্চৈব প্রমদাশ্চাভিবাদযেত্ .
দিবৌকসশ্চ যে পূজ্যাঃ প্রত্যক্ষাশ্চ ভবন্তি যে .. ৭৫..
তান্ প্রমাণৈঃ প্রভাবৈশ্চ গংভীরার্থৈশ্চ যোজযেত্ .
মহাজনং সখীবর্গং বিটধূর্তজনং তথা .. ৭৬..
পরিমণ্ডলসংস্থেন হস্তেনাভিনযেনন্নরঃ .
পর্বতান্ প্রাংশুযোগেন বৃক্ষাংশ্চৈব সমুচ্ছ্রিতান্ .. ৭৭..
প্রসারিতাভ্যাং বাহুভ্যামুত্ক্ষিপ্তাভ্যাং প্রযোজযেত্ .
সমূহসাগরং সেনা বহুবিস্তীর্ণমেব চ .. ৭৮..
পতাকাভ্যাং তু হস্তাভ্যামুত্ক্ষিপ্তাভ্যাং প্রদর্শযেত্ .
শৌর্যং ধৈর্যং চ গর্বং চ দর্পমৌদার্যমুচ্ছ্রযম্ .. ৭৯..
ললাটদেশস্থানেন ত্বরালেনাভিদর্শযেত্ .
বক্ষোদেশাদপাবিদ্ধৌ করৌ তু মৃগশীর্ষকৌ .. ৮০..
বিস্তীর্ণপ্রদ্রুতোত্ক্ষেপৌ যোজ্যৌ যস্যাদপাবৃতম্ .
অধোমুখোত্তানতলৌ হস্তৌ কিঞ্চিত্প্রসারিতৌ .. ৮১..
কৃত্বা ত্বভিনযেদ্বেলাং বিলদ্বারং গৃহং গুহান্ .
কামং শাপগ্রহগ্রস্তান্ জ্বরোপহতচেতসঃ .. ৮২..
এতেষাং চেষ্টিতং কুর্যাদঙ্গাদ্যৈঃ সদৃশৈর্বুধৈঃ .
দোলাভিনযনং কুর্যাদ্দোলাযাস্তু বিলোকনৈঃ .. ৮৩..
সংভোক্ষেণ চ গাত্রাণাং রজ্বশ্বাগ্রহণেন চ .
যদা চাঙ্গবতী ডোলা প্রত্যক্ষা পুস্তজা ভবেত্ .. ৮৪..
আসনেষু প্রবিষ্টানাং কর্তব্যং তত্র ডোলনম্ .
আকাশবচনানীহ বক্ষ্যাম্যাত্মগতানি চ .. ৮৫..
অপবারিতকং চৈব জনান্তিকমথাপি চ .
দূরস্থাভাষণং যত্স্যাদশরীরনিবেদনম্ .. ৮৬..
পরোক্ষান্তরিতং বাক্যমাকাশবচনং তু তত্ .
তত্রোত্তরকৃতৈর্বাক্যৈঃ সংলাপং সংপ্রযোজযেত্ .. ৮৭..
নানাকারণসংযুক্তৈঃ কাব্যভাবসমুত্থিতৈঃ .
হৃদযস্য বচো যত্তূ তদাত্মগতমীষ্যতে .. ৮৮..
সবিতর্কং চ তদ্যোজ্যং প্রাযশো নাটকাদিষু .
নিগূঢভাবসংযুক্তমপবারিতকং স্মৃতম্ .. ৮৯..
কার্যবশাদশ্রবণং পার্শ্বগতৈর্যজ্জনান্তিকং তত্স্যাত্ .
হৃদযস্থং সবিকল্পং ভাবস্থং চাত্মগতমেব .. ৯০..
ইতি গূঢার্থযুক্তানি বচনানীহ নাটকে .
জনান্তিকানি কর্ণে তু তানি যোজ্যানি যোক্তৃভিঃ .. ৯১..
পূর্ববৃত্তং তু যত্কার্যং ভূযঃ কথ্যং তু কারণাত্ .
কর্ণপ্রদেশে তদ্বাচ্যং মাগাত্তত্পুনরুক্ততাম্ ..৮২..
অব্যভিচারেণ পঠেদাকাশজনান্তিকাত্মগতপাঠ্যম্ .
প্রত্যক্ষপরোক্ষকৃতানামাত্মসমুত্থান্ পরকৃতাংশ্চ .. ৯৩..
হস্তমন্তরিতং কৃত্বা ত্রিপতাকং প্রযোক্তৃভিঃ .
জনান্তিকং প্রযোক্তব্যমপবারিতকং তথা .. ৯৪..
স্বপ্নাযিতবাক্যার্থৈস্ত্বভিনেযো ন খলু হস্তসংচারৈঃ .
সুপ্তাভিহিতৈরেব তু বাক্যার্থৈঃ সোঽভিনেযঃ স্যাত্ .. ৯৫..
মন্দস্বরসঞ্চারৈর্ব্যক্তাব্যক্তং পুনরুক্তবচনার্থম্ .
পূর্বানুস্মরণকৃতং কার্যং স্বপ্নাঞ্চিতে পাঠ্যম্ .. ৯৬..
প্রশিথিলগুরুকরুণাক্ষরঘণ্টানুস্বরিতবাক্যগদ্গদজৈঃ .
হিক্কাশ্বসোপেতাং কাকুং কুর্যান্মরণকালে .. ৯৭..
হিক্কাশ্বাসোপেতাং মূর্চ্ছোপগমে মরণবত্কথযেত্ .
অতিমত্তেষ্বপি কার্যং তদ্বত্স্বপ্নাযিতে যথা পাঠ্যম্ .. ৯৮..
বৃদ্ধানাং যোজযেত্পাঠ্যং গদ্গদস্খলিতাক্ষরম্ .
অসমাপ্তাক্ষরং চৈব বালানাং তু কলস্বনম্ .. ৯৯..
নানাভাবোপগতং মরণাভিনযে বহুকীর্তিতং তু .
বিক্ষিপ্তহস্তপাদৈর্নিভৃতৈঃ সন্নৈস্তথা কার্যম্ .. ১০০..
ব্যাধিপ্লুতে চ মরণং নিষণ্ণগাত্রৈস্তু সংপ্রযোক্তব্যম্ .
হিক্কাশ্বাসোপেতং তথা পরাধীনগাত্রসংচারম্ .. ১০১..
বিষপীতেঽপি চ মরণং কার্যং বিক্ষিপ্তগাত্রকরচরণম্ .
বিষবেগসংপ্রযুক্তং বিস্ফুরিতাংগক্রিযোপেতম্ .. ১০২..
প্রথেমে বেগে কার্শ্যং ত্বভিনেযে বেপথুর্দ্বিতীযে তু .
দাহস্তথা তৃতীযে বিলল্লিকা স্যাচ্চতুর্থে তু .. ১০৩..
ফেনস্তু পঞ্চমস্থে তু গ্রীবা ষষ্ঠে তু ভজ্যতে .
জডতা সপ্তমে তু স্যান্মরণং ত্বষ্টমে ভবেত্ .. ১০৪..
তত্র প্রথমবেগে তু ক্ষামবক্রকপোলতা .
কৃশত্বেঽভিনযঃ কার্যো বাক্যানামল্পভাষণম্ .. ১০৫..
সর্বাঙ্গবেপথুং চ কণ্ডূযনং তথাঙ্গানাম্ .
বিক্ষিপ্তহস্তগাত্রং দাহং চৈবাপ্যভিনযেত্তু .. ১০৬..
উদ্বৃত্তনিমেষত্বাদুদ্গারচ্ছর্দনৈস্তথাক্ষেপৈঃ .
অব্যক্তাক্ষরকথনৈঃ বিলল্লিকামভিনযেদেবম্ .. ১০৭..
উদ্গারবমনযোগৈঃ শিরসশ্চ বিলোলনৈরনেকবিধৈঃ .
ফেনস্ত্বভিনেতব্যো নিঃসংজ্ঞতযা নিমেষৈশ্চ .. ১০৮..
অংসকপোলস্পর্শঃ শিরসোঽথ বিনামনং শিরোঽপাঙ্গঃ .
সর্বেন্দ্রিঅযসংমোহাজ্জডতামেবং ত্বভিনযেত্তু .. ১০৯..
সংমীলিতনেত্রত্বাত্ ব্যাধিবিবৃদ্ধৌ ভুজঙ্গদশনাদ্বা .
এবং হি নাট্যধর্মে মরণানি বুধৈঃ প্রযোজ্যানি .. ১১০..
সংভ্রমেষ্বথ রোষেষু শোকাবেশকৃতেষু চ .
যানি বাক্যানি যুজ্যন্তে পুনরুক্তং ন তেষ্বিহ .. ১১১..
সাধ্বহো মাং চ হেহেতি কিং ত্বং মামাবদেতি চ .
এবংবিধানি কার্যাণি দ্বিত্রিসংখ্যানি কারযেত্ .. ১১২..
প্রত্যঙ্গহীনং যত্কাব্যং বিকৃতং চ প্রযুজ্যতে .
ন লক্ষণকৃতস্তত্র কার্যস্ত্বভিনযো বুধৈঃ .. ১১৩..
ভাবো যত্রোত্তমানাং তু ন তং মধ্যেষু যোজযেত্ .
যো ভাবশ্চৈব মধ্যানাং ন তে নীচেষু যোজযেত্ .. ১১৪..
পৃথক্ পৃথগ্ভাবরসৈরাত্মচেষ্টাসমুত্থিতৈঃ .
জ্যেষ্ঠমধ্যমনীচেষু নাট্যং রাগং হি গচ্ছতি .. ১১৫..
এতেঽভিনযবিশেষাঃ কর্তব্যাঃ সত্ত্বভাবসংযুক্তাঃ .
অন্যে তু লৌকিকা যে তু তে সর্বে লোকবত্কার্যাঃ .. ১১৬..
নানাবিধৈর্যথা পুষ্পৈর্মালাং গ্রথ্নাতি মাল্যকৃত্ .
অংগোপাংগৈ রসৈর্ভাবৈস্তথা নাট্যং প্রযোজযেত্ .. ১১৭..
যা যস্য লীলা নিযতা গতিশ্চ
রঙ্গপ্রবিষ্টস্য নিধানযুক্তঃ .
তামেব কুর্যাদবিমুক্তসত্ত্বো
যাবন্নরঙ্গাত্প্রতিনির্বৃতঃ স্যাত্ .. ১১৮..
এবমেতে মযা প্রোক্তা নাট্যে চাভিনযাঃ ক্রমাত্ .
অন্যে তু লৌকিকা যে তে লোকাদ্গ্রাহ্যাঃ সদা বুধৈঃ .. ১১৯..
লোকো বেদস্তথাধ্যাত্মং প্রমাণং ত্রিবিধং স্মৃতম্ .
বেদাধ্যাত্মপদার্থেষু প্রাযো নাট্যং প্রতিষ্ঠিতম্ .. ১২০..
বেদাধ্যাত্মোপপন্নং তু শব্দচ্ছন্দস্সমন্বিতম্ .
লোকসিদ্ধং ভবেত্সিদ্ধং নাট্যং লোকাত্মকং তথা .. ১২১..
ন চ শক্যং হি লোকস্য স্থাবরস্য চরস্য চ .
শাস্ত্রেণ নির্ণযং কর্তুং ভাবচেষ্টাবিধিং প্রতি .. ১২২..
নানাশীলাঃ প্রকৃতযঃ শীলে নাট্যং প্রতিষ্ঠিঅতম্ .
তস্মাল্লোকপ্রমাণং হি বিজ্ঞেযং নাট্যযোক্তৃভিঃ .. ১২৩..
এতান্ বিধীংশ্চাভিনযস্য সম্যগ্বিজ্ঞায
রঙ্গে মনুজঃ প্রযুঙ্ক্তে .
স নাট্যতত্ত্বাভিনযপ্রযোক্তা
সংমানমগ্র্যং লভতে হি লোকে .. ১২৪..
এবমেতে হ্যভিনযা বাঙ্নেপথ্যাঙ্গসংভবাঃ
প্রযোগজ্ঞেন কর্তব্যা নাটকে সিদ্ধিমিচ্ছতা .. ১২৫..

ইতি ভারতীযে নাট্যশাস্ত্রে চিত্রাভিনযো নাম
পঞ্চবিংশোঽধ্যাযঃ ..