নাট্যশাস্ত্রম্ অধ্যায ২৩

.. নাট্যশাস্ত্রম্ অধ্যায ২৩ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ ত্রযোবিংশোঽধ্যাযঃ .
বিশেষযেত্কলাঃ সর্বা যস্মাত্তস্মাত্তু বৈশিকঃ .
বেশোপচারে সাধুর্বা বৈশিকঃ পরিকীর্তিতঃ .. ১..
যো হি সর্বকলোপেতঃ সর্বশিল্পবিচক্ষণঃ .
স্ত্রীচিত্তগ্রহণাভিজ্ঞো বৈশিকঃ স ভবেত্পুমান্ .. ২..
গুণস্তস্য তু বিজ্ঞেযাঃ স্বশরীরসমুত্থিতাঃ .
আহার্যাঃ সহজাশ্চৈব ত্রযস্ত্রিংশত্সমাসতঃ .. ৩..
শাস্ত্রবিচ্ছিল্পসংপন্নো রূপবান্ প্রিযদর্শনঃ
বিক্রান্তো ধৃতিমাংশ্চৈব বযোবেষকুলান্বিতঃ .. ৪..
সুরভির্মধুরস্ত্যাগি সহিষ্ণুরবিকত্থনঃ
অশঙ্কিতঃ প্রিযাভাষী চতুরঃ শুভদঃ শুচিঃ .. ৫..
কামোপচারকুশলো দক্ষিণো দেশকালবিত্ .
অদীনবাক্যঃ স্মিতবান্ বাগ্মী দক্ষঃ প্রিযংবদঃ .. ৬..
স্ত্রীলুব্ধাঃ সংবিভাগী চ শ্রদ্ধধানো দৃঢস্মৃতিঃ .
গম্যাসু চাপ্যবিস্রম্ভী মানী চেতি হি বৈশিকঃ .. ৭..
অনুযুক্তঃ শুচির্দক্ষো দক্ষিণঃ প্রতিপত্তিমান্ .
ভবেচ্চিত্রাভিধাযী চ বযস্যস্তস্য তদ্গুণঃ .. ৮..
বিজ্ঞানগুণসংপনা কথিনী লিঙ্গিনী তথা .
প্রাতিবেশ্যা সখী দাসী কুমারী কারুশিল্পিনী .. ৯..
ধাত্রী পাষণ্ডিনী চৈব তথা রঙ্গোপজীবিনী .
প্রোত্সাহনেঽথকুশলা মধুরকথা দক্ষিণাথকালজ্ঞা .. ১০..
লডহা সংবৃতমন্ত্রা দূতী ত্বেভির্গুণৈঃ কার্যা .
তযাপ্যুত্সাহনং কার্যং নানাদর্শিতকারণম্ .. ১১..
যথোক্তকথনং চৈব তথা ভাবপ্রদর্শনম্ .
ন জডং রূপসম্পন্নং নার্থবন্তং ন চাতুরম্ .. ১২..
দূতং বাঽপ্যথবা দূতীং বুধঃ কুর্যাত্কদাচন .
কুলভোগধনাধিক্যৈঃ কৃত্বাধিকবিকত্থনম্ .. ১৩..
দূতী নিবেদযেত্কামমর্থাংশ্চৈবানুবর্ণযেত্ .
ন চাকামপ্রবৃত্তাযাঃ কৃদ্ধাযা বাপি সঙ্গমঃ .. ১৪..
নানুপাযঃ প্রকর্তব্যো দূত্যা হি পুরুষাশ্রযঃ .
উত্সবে রত্রিসঞ্চার উদ্দ্যানে মিত্রবেশ্মনি .. ১৫..
ধাত্রিগৃহেষু সখ্যা বা তথা চৈব নিমন্ত্রণে .
ব্যাধিতব্যপদেশেন শুন্যাগারনিবেশনে .. ১৬..
কার্যঃ সমাগমো নৄণাং স্ত্রীভিঃ প্রথমসঙ্গমে .
এবং সমাগমং কৃত্বা সোপাযং বিধিপূর্বকম্ .. ১৭..
অনুরক্তা বিরক্তা বা লিঙ্গাকারৈস্তু লক্ষযেত্ .
স্বভাবভাবাতিশযৈর্নারী যা মদনাশ্রযা .. ১৮..
করোতি নিভৃতাং লীলাং নিত্যং সা মদনাতুরা .
সখীমধ্যে গুণান্ ব্রূতে স্বধনং চ প্রযচ্ছতি .. ১৯..
পূজযত্যস্য মিত্রাণি দ্বেষ্টি শত্রুজনং সদা .
গমাগমে সখীনাং যা হৃষ্টা ভবতি চাধিকম্ .. ২০..
তুষ্যত্যস্য কথাভিস্তু সস্নেহং চ নিরীক্ষতে .
সুপ্তে তু পশ্চাত্ স্বপিতি চুম্বিতা প্রতিচুম্বতি .. ২১..
উত্তিষ্ঠত্যপি পূর্বং চ তথা ক্লেশসহাপি চ .
উত্সবে মুদিতা যা চ ব্যসনে যা চ দুঃখিতা .. ২২..
এবংবিধৈর্গুণৈর্যুক্তা ত্বনুরক্তা তু সা স্মৃতা .
বিরক্তাযাস্তু চিন্হানি চুম্বিতা নাভিচুম্বতি .. ২৩..
ইতি ভারতীযে নাট্যশাস্ত্রে ত্রযোবিংশঃ ..