নাট্যশাস্ত্রম্ অধ্যায ২১

.. নাট্যশাস্ত্রম্ অধ্যায ২১ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ একবিংশোঽধ্যাযঃ .
আহার্যাভিনযং বিপ্রা ব্যাখ্যাস্যাম্যনুপূর্বশঃ .
য্স্মাত্ প্রযোগঃ সর্বোঽযমাহার্যাভিনযে স্থিতঃ .. ১..
নানাবস্থা প্রকৃতয পূর্বং নৈপথ্যসাধিতাঃ .
অঙ্গাদিভিরভিব্যক্তিমুপগচ্ছন্ত্যযত্নতঃ .. ২..
আহার্যাভিনযো নাম জ্ঞেযো নেপথ্যজো বিধিঃ .
তত্র কার্যঃ প্রযত্নস্তু নাট্যস্য শুভমিচ্ছতা .. ৩..
[তস্মিন্যত্নস্তু কর্তব্যো নৈপথ্যে সিদ্ধিমিচ্ছতা .
নাট্যস্যেহ ত্বলঙ্কারো নৈপথ্যং যত্প্রকীর্তিতম্ ..].. ৪..
চতুর্বিধং তু নেপথ্যং পুস্তোঽলঙ্কার এব চ .
তথাঙ্করচনা চৈব জ্ঞেযং সজ্জীবমেব চ .. ৫..
পুস্তস্তু ত্রিবিধো জ্ঞেযো নানারূপপ্রমাণতঃ .
সন্ধিমো ব্যাজিমশ্চৈব বেষ্টিমশ্চ প্রকীর্তিতঃ .. ৬..
কিলিঞ্জচর্মবস্ত্রাদ্যৈর্যদ্রূপং ক্রিযতে বুধৈঃ .
সন্ধিমো নাম বিজ্ঞেযঃ পুস্তো নাটকসংস্শ্রযঃ .. ৭..
ব্যাজিমো নাম বিজ্ঞেঅযো যন্ত্রেণ ক্রিযতে তু যঃ .
বেষ্ট্যতে চৈব যদ্রুপং বেষ্টিমঃ স তু সংজ্ঞিতঃ .. ৮..
শৈলযানবিমানানি চর্মবর্মধ্বজা নগাঃ .
যে ক্রিযন্তে হি নাট্যে তু স পুস্ত ইতি সংজ্ঞিতঃ .. ৯..
অলঙ্কারস্তু বিজ্ঞেযো মাল্যাভরণবাসসাম্ .
নানাবিধঃ সমাযোগোঽপ্যঙ্গোপাঙ্গবিধিঃ স্মৃতঃ .. ১০..
বেষ্টিমং বিততং চৈব সংঘাত্যং গ্রন্থিমং তথা .
প্রালম্বিতং তথা চৈব মাল্যং পঞ্চবিধং স্মৃতম্ ..১১..
চতুর্বিধং তু বিজ্ঞেযং নাট্যে হ্যাভরণং বুধৈঃ .
আবেধ্যং বন্ধনীযং চ ক্ষেপ্যমারোপ্যমেব চ .. ১২..
আবেধ্যং কুণ্ডলাদীহ যত্স্যাচ্ছ্রবণভূষণম্ .
আরোপ্যং হেমসূত্রাদি হারাশ্চ বিবিধাশ্রযাঃ .. ১৩..
শ্রোণীসূত্রাঙ্গদে মুক্তাবন্ধনীযানি সর্বদা .
প্রক্ষেপ্য নূপুরং বিদ্যাদ্বস্ত্রাভরণমেব চ .. ১৪..
ভূষণানাং বিকল্পং হি পুরুষস্ত্রীসমাশ্রযম্ .
নাবিধং প্রবক্ষ্যামি দেশজাতিসমুদ্ভবম্ ..১৫..
চূডামণিঃ সমুকুটঃ শিরসো ভূষণং স্মৃতম্ .
কুণ্ডলং মোচকং কীলা কর্ণাভরণমিষ্যতে .. ১৬..
মুক্তাবলী হর্ষকং চ সূত্রকং কণ্ঠভূষণম্ .
বেতিকাঙ্গুলিমুদ্রা চ স্যাদঙ্গুলিবিভূষণম্ ..১৭..
হস্তলী বলযং চৈব বাহুনালীবিভূষণম্ .
রুচকশ্চূলিকা কার্যা মণিবন্ধবিভূষণম্ .. ১৮..
কেযূরে অঙ্গদে চৈব কূর্পরোপরিভূষণে .
ত্রিসরশ্চৈব হারশ্চ তথা বক্ষোবিভূষণম্ .. ১৯..
ব্যালম্বমৌক্তিকো হারো মালা চৈবাঙ্গভূষণম্ .
তলকং সূত্রকং চৈব ভবেত্কটিবিভূষণম্ .. ২০..
অযং পুরুষনির্যোগঃ কার্যস্ত্বাভরণাশ্রযঃ .
দেবানাং পার্থিবানাং চ পুনর্বক্ষ্যামি যোষিতাম্ .. ২১..
শিখাপাশং শিখাব্যালং পিণ্ডীপত্রং তথৈব চ .
চূডামণির্মকরিকা মুক্তাজালগবাক্ষিকম্ ..২২..
শিরসো ভূষণং চৈব বিচিত্রং শীর্ষজোলকম্ .
কণ্ডকং শিখিপত্রং চ বেণীপুচ্ছঃ সদোরকঃ .. ২৩..
ললাটতিলকং চৈব নানাশিল্পপ্রযোজিতম্ .
ভ্রূগুচ্ছোপরিগুচ্ছশ্চ কুসুমানুকৃতিস্তথা .. ২৪..
কর্ণিকা কর্ণবলযং তথা স্যাত্পত্রকর্ণিকা .
কুণ্ডলং কর্ণমুদ্রা চ কর্ণোত্কীলকমেব চ .. ২৫..
নানারত্নবিচিত্রাণি দন্তপত্রাণি চৈব হি .
কর্ণযোর্ভূষণং হ্যেতত্কর্ণপূরস্তথৈব চ .. ২৬..
তিলকাঃ পত্রলেখাশ্চ ভবেদ্গণ্ডবিভূষণম্ .
ত্রিবণী চৈব বিজ্ঞেযং ভবেদ্বক্ষোবিভূষণম্ .. ২৭..
নেত্রযোরঞ্জনং জ্ঞেযমধরস্য চ রঞ্জনম্ .
দন্তানাং বিবিধো রাগশ্চতুর্ণাং শুক্লতাপি বা .. ২৮..
রাগান্তরবিকল্পোঽথ শোভনেনাধিকোজ্বলঃ .
মুগ্ধানাং সুন্দরীণাং চ মুক্তাভাসিতশোভনাঃ .. ২৯..
সুরক্তা বাপি দন্তা স্যুঃঃ পদ্মপল্লবরঞ্জনাঃ .
অশ্মরাগোদ্দ্যোতিতঃ স্যাদধরঃ পল্লবপ্রভঃ .. ৩০..
বিলাসশ্চ ভবেত্তাসাং সবিভ্রান্তনিরীক্ষিতম্ .
মুক্তাবলী ব্যালপঙ্ক্তির্মঞ্জরী রত্নমালিকা .. ৩১..
রত্নাবলী সূত্রকং চ জ্ঞেযং কণ্ঠবিভূষণম্ .
দ্বিসরস্ত্রিসরশ্চৈব চতুস্সরকমেব চ ..৩২..
তথা শৃঙ্খলিকা চৈব ভবেত্কণ্ঠবিভূষণম্ .
অঙ্গদং বলযং চৈব বাহুমূলবিভূষণম্ .. ৩৩..
নানাশিল্পকৃতাশ্চৈব হারা বক্ষোবিভূষণম্ .
মণিজালাবনদ্ধং চ ভবেত্ স্তনবিভূষণম্ .. ৩৪..
খর্জূরকং সোচ্ছিতিকং বাহুনালীবিভূষণম্ .
কলাপী কটকং শঙ্খো হস্তপত্রং সপূরকম্ .. ৩৫..
মুদ্রাঙ্গুলীযকং চৈব হ্যঙ্গুলীনাং বিভূষণম্ .
মুক্তাজালাঢ্যতলকং মেখলা কাঞ্চিকাপি বা .. ৩৬..
রশনা চ কলাপশ্চ ভবেচ্ছ্রোণীবিভূষণম্ .
একযষ্টির্ভবেত্কাঞ্চী মেখলা ত্বষ্টযষ্টিকা .. ৩৭..
দ্বিরষ্টযষ্টি রশনা কলাপঃ পঞ্চবিংশকঃ .
দ্বাত্রিংশচ্চ চতুঃষষ্টিঃ শতমষ্টোত্তরং তথা .. ৩৮..
মুক্তাহারা ভবন্ত্যেতে দেবপার্থিবযোষিতাম্ .
নূপুরঃ কিঙ্কিণীকাশ্চ ঘণ্টিকা রত্নজালকম্ ..৩৯..
সঘোষে কটকে চৈব গুল্ফোপরিবিভূষাণম্ .
জঙ্ঘযোঃ পাদপত্রং স্যাদঙ্গুলীষ্বঙ্গুলীযকম্ .. ৪০..
অঙ্গুষ্ঠতিলকাশ্চৈব পাদযোশ্চ বিভূষণম্ .
তথালক্তকরাগশ্চ নানাভক্তিনিবেশিতঃ .. ৪১..
অশোকপলাবচ্ছাযঃ স্যাত্ স্বাভাবিক এব চ .
এতদ্বিভূষণং নার্যা আকেশাদানখাদপি .. ৪২..
যথাভবরসাবস্থং বিজ্ঞেযং দ্বিজসত্তমাঃ .
আগমশ্চ প্রমাণং চ রূপনির্বর্ণনং তথা .. ৪৩..
বিশ্বকর্মমতাত্কার্যং সুবুদ্ধ্যাপি প্রযোক্তৃভিঃ .
ন হি শক্যং সুবর্ণেন মুক্তাভির্মণিভিস্তথা .. ৪৪..
স্বাধীনমিতি রুচ্যৈব কর্তুমঙ্গস্য ভূষণম্ .
বিভাগতোঽভিপ্রযুক্তমঙ্গশোভাকরং ভবেত্ .. ৪৫..
যথা স্থানান্তরগতং ভূষণং রত্নসংযুতম্ .
ন তু নাট্যপ্রযোগেষু কর্তব্যং ভূষণং গুরু .. ৪৬..
খেদং জনযতে তদ্ধি সব্যাযতবিচেষ্টনাত্ .
গুরুভাবাবসন্নস্য স্বেদো মূর্ছা চ জাযতে .. ৪৭..
গুর্বাভরণসন্নো হি চেষ্টাং ন কুরুতে পুনঃ .
তস্মাত্তনুত্বচকৃতং সৌবর্ণং ভূষণং ভবেত্ .. ৪৮..
রত্নবজ্জতুবদ্ধং বা ন খেদজননং ভবেত্ .
স্বেচ্ছযা ভূষণবিধির্দিব্যানামুপদিশ্যতে .. ৪৯..
যত্নভাববিনিষ্পন্নং মানুষাণাং বিভূষণম্ .
[বেষ্টিতং বিততং চৈব সংঘাত্যং গ্রথিমং তথ .. ৫০..
লম্বশোভি তথা চৈব মাল্যং পঞ্চবিধং স্মৃতম্ .
আচ্ছাদনং বহুবিধং নানাপত্তনসংভবম্ .. ৫১..
তজ্জ্ঞেযং ত্রিপ্রকারং তু শুদ্ধং রক্তং বিচিত্রিতম্].
দিব্যানাং ভূষণবিধির্য এষ পরিকীর্তিতঃ .. ৫২..
মানুষাণাং তু কর্তব্যো নানাদেশসমাশ্রযঃ .
ভূষণৈশ্চাপি বেষৈশ্চ নানাবস্থাসমাশ্রযৈঃ .. ৫৩..
দিব্যাঙ্গনানাং কর্তব্যা বিভক্তিঃ স্বস্বভূমিজা .
বিদ্যাধরীণাং যক্ষীণামপ্সরোনাগযোষিতাম্ .. ৫৪..
ঋষিদৈবতকন্যানাং বেষৈর্নানাত্বমিষ্যতে .
তথা চ সিদ্ধগন্ধর্বরাক্ষসাসুরযোষিতাম্ .. ৫৫..
দিব্যানাং নরনারীণাং তথৈব চ শিখণ্ডকম্ .
শিখাপুটশিখণ্ডং তু মুক্তাভূযিষ্ঠভূষণম্ .. ৫৬..
বিদ্যাধরীণাং কর্তব্যঃ শুদ্ধো বেষপরিচ্ছদঃ .
যক্ষিণ্যোঽপ্সরশ্চৈব কর্যা রত্নবিভূষণাঃ .. ৫৭..
সমস্তানাং ভবেদ্বেষো যক্ষীণা কেবলং শিখা .
দিব্যনামিব কর্তব্যং নাগস্ত্রীণাং বিভূষণম্ .. ৫৮..
মুক্তামণিলতাপ্রাযাঃ ফণাস্তাসাং তু কেবলাঃ .
কার্যং তু মুনিকন্যানামেকবেণীধরং শিরঃ .. ৫৯..
ন চাপি বিভূষণবিধিস্তাসাং বেষো বনোচিতঃ .
মুক্তামরকতপ্রাযং মণ্ডনং সিদ্ধযোষিতাম্ .. ৬০..
তাসাং তু চৈব কর্তব্যং পীতবস্ত্রপরিচ্ছদম্ .
পদ্মরাগমণিপ্রাযং গন্ধর্বীণাং বিভূষণম্ .. ৬১..
বীণাহস্তশ্চ কর্তব্যঃ কৌসুম্ভবসনস্তথা .
ইন্দ্রনীলৈস্তু কর্তব্যং রাক্ষসীণাং বিভূষণম্ .. ৬২..
সিতদংষ্ট্রা চ কর্তব্যা কৃষ্ণবস্ত্রপরিচ্ছদম্ .
বৈডূর্যমুক্তাভরণাঃ কর্তব্যা সুরযোষিতাম্ .. ৬৩..
শুকপিঞ্ছনিভৈঅর্বস্ত্রৈঃ কার্যস্তাসাং পরিচ্ছদঃ .
পুষ্যরাগৈস্তু মণিভিঃ ক্বচিদ্বৈডূর্যভূষিতৈঃ .. ৬৪..
দিব্যবানরনারীণাং কার্যো নীলপরিচ্ছদঃ .
এবং শৃঙ্গারিণঃ কার্যা বেষা দিব্যাঙ্গনাশ্রযাঃ .. ৬৫..
অবস্থান্তমাসাদ্য শুদ্ধাঃ কার্যাঃ পুনস্তথা .
মানুষীণাং তু কর্তব্যা নানাদেশসমুদ্ভবাঃ .. ৬৬..
বেষাভরণসংযোগান্ গদতস্তান্নিবোধত .
আবন্ত্যযুবতীনাং তু শিরস্সালককুন্তলম্ .. ৬৭..
গৌডীযানামলকপ্রাযং সশিখাপাশবেণিকম্ .
আভীরযুবতীনাং তু দ্বিবেণীধর এব তু .. ৬৮..
শিরঃ পরিগমঃ কার্যো নীলপ্রাযমথাম্বরম্ .
তথা পূর্বোতরস্ত্রীণাং সমুন্নদ্ধশিখণ্ডকম্ .. ৬৯..
আকেশাচ্ছাদনং তাসাং দেশকর্মণি কীর্তিতম্ .
তথৈব দক্ষিণস্ত্রীণাং কার্যমুল্লেখ্যসংশ্রযম্ .. ৭০..
কুম্ভীবন্ধকসংযুক্তং তথাবর্তললাটিকম্ .
[গণিকানাং তু কর্তব্যমিচ্ছাবিচ্ছিত্তি মণ্ডনম্].. ৭১..
দেশজাতিবিধানেন শেষাণামপি কারযেত্ .
বেষং তথা চাভরণং ক্ষুরকর্ম পরিচ্ছদম্ .. ৭২..
[আগমং চাপি নৈপথ্যে নাট্যস্যৈবং প্রযোজযেত্].
অদেশযুক্তো বেষো হি ন শোভাং জনযিষ্যতি .. ৭৩..
মেখলোরসি বদ্ধা তু হাস্যং সমুপপাদযেত্ .
তথা প্রোষিতকান্তাসু ব্যসনাভিহতাসু চ .. ৭৪..
বেষো বৈ মলিনঃ কার্য একবেণীধরং শিরঃ .
বিপ্রলম্ভে তু নার্যাস্তু শুদ্ধো বেষো ভবেদিহ .. ৭৫..
নাত্যাভরণসংযুক্তো ন চাপি মৃজযান্বিতঃ .
এবং স্ত্রীণাং ভবেদ্বেষো দেশাবস্থাসমুদ্ভবঃ .. ৭৬..
পুরুষাণাং পুনশ্চৈব বেষান্বক্ষ্যামি তত্ত্বতঃ .
তত্রাঙ্করচনা পূর্বং কর্তব্যা নাট্যযোক্তৃভিঃ .. ৭৭..
ততঃ পরং প্রযোক্তব্যা বেষা দেশসমুদ্ভবাঃ .
সিতো নীলশ্চ পীতশ্চ চতুর্থো রক্ত এব চ .. ৭৮..
এতে স্বভাবজা বর্ণা যৈঃ কার্যং ত্বঙ্গবর্তনম্ .
সংযোগজাঃ পুনশ্চান্যে উপবর্ণা ভবন্তি হি ..৭৯..
তানহং সম্প্রবক্ষ্যামি যথাকার্যং প্রযোক্তৃভিঃ .
সিতনীলসমাযোগে কারণ্ডব ইতি স্মৃতঃ .. ৮০..
সিতপীতসামাযোগাত্পাণ্ডুবর্ণঃ প্রকীর্তিতঃ .
সিতিঅরক্তসমাযোগে পদ্মবর্ণঃ প্রকীর্তিতঃ .. ৮১..
পীতনীলসমাযোগাদ্ধরিতো নাম জাযতে .
নীলরক্তসমাযোগাত্কষাযো নাম জাযতে .. ৮২..
রক্তপীতসমাযোগাদ্গৌরবর্ণ ইতি স্মৃতঃ .
এতে সংযোগজা বর্ণা হ্যুপবর্ণাস্তথাপরে .. ৮৩..
ত্রিচতুর্বর্ণসংযুক্তা বহবঃ সংপ্রকীর্তিতাঃ .
বলস্থো যো ভবেদ্বর্ণস্তস্য ভাগো ভবেত্ততঃ .. ৮৪..
দুর্বলস্য চ ভাগৌ দ্বৌ নীলং মুক্ত্বা প্রদাপযেত্ .
নীলস্যৈকো ভবেদ্ভাঅগশ্চত্বারোঽন্যে তু বর্ণকে .. ৮৫..
বলবান্সর্ববর্ণানাং নীল এব প্রকীর্তিতঃ .
এবং বর্ণবিধিং জ্ঞাত্বা নানাসংযোগসংশ্রযম্ .. ৮৬..
ততঃ কুর্যাদ্যথাযোগমঙ্গানাং বর্তনং বুধঃ .
বর্তনচ্ছাদনং রূপং স্ববেষপরিবর্জিতম্ .. ৮৭..
নাট্যধর্মপ্রবৃত্তং তু জ্ঞেযং তত্প্রকৃতিস্থিতম্ .
স্ববর্ণমাত্মনশ্ছাদ্যং বর্ণকৈর্বেষসংশ্রযৈঃ .. ৮৮..
আকৃতিস্তস্য কর্তব্যা যস্য প্রকৃতিরাস্থিতা .
যথা জন্তুঃ স্বভাবং স্বং পরিত্যজ্যান্যদৈহিকম্ ..৮৯..
তত্স্বভাবং হি ভজতে দেহান্তরমুপাশ্রিতঃ .
বেষেণ বর্ণকৈশ্চৈব চ্ছাদিতঃ পুরুষস্তথা .. ৯০..
পরভাবং প্রকুরুতে যস্য বেষং সমাশ্রিতঃ .
দেবদানবগন্ধর্বযক্ষরাক্ষসপন্নগাঃ .. ৯১..
প্রাণিসংজ্ঞাঃ স্মৃতা হ্যেতে জীববন্ধাশ্চ যেঽপরে .
[স্ত্রীভাবাঃ পর্বতাঃ নদ্যঃ সমুদ্রা বাহনানি চ .. ৯২..
নানাশস্ত্রাণ্যপি তথা বিজ্ঞেযাঃ প্রাণিসংজ্ঞযা].
শৈলপ্রাসাদযন্ত্রাণি চর্মবর্মধ্বজাস্তথা .. ৯৩..
নানাপ্রহরণাদ্যাশ্চ তেঽপ্রাণিন ইতি স্মৃতাঃ .
অথবা কারণোপেতা ভবন্ত্যেতে শরীরিণঃ .. ৯৪..
বেষভাষাশ্রযোপেতা নাট্যধর্মমবেক্ষ্য তু .
বর্ণানাং তু বিধিং জ্ঞাত্বা বযঃ প্রকৃতিমেব চ .. ৯৫..
কুর্যাদঙ্গস্য রচনাং দেশজাতিবযঃশ্রিততাম্ .
দেবা গৌরাস্তু বিজ্ঞেযা যক্ষাশ্চাপ্সরস্তথা .. ৯৬..
রুদ্রার্কদ্রুহিণস্কন্দাস্তপনীযপ্রভাঃ স্মৃতাঃ .
সোমো বৃহস্পতিঃ শুক্রো বরুণস্তারকাগণাঃ .. ৯৭..
সমুদ্রহিমবদ্গঙ্গাঃ শ্বেতা হি স্যুর্বলস্তথা .
রক্তমঙ্গারকং বিদ্যাত্ পীতৌ বুধহুতাশনৌ .. ৯৮..
নারাযণো নরশ্চৈব শ্যামো নাগশ্চ বাসুকিঃ .
দৈত্যাশ্চ দানবাশ্চৈব রাক্ষসা গুহ্যকা নগাঃ .. ৯৯..
পিশাচা জলমাকাশমসিতানি তু বর্ণতঃ .
ভবন্তি ষট্সু দ্বীপেষু পুরুষশ্চৈব বর্ণতঃ .. ১০০..
কর্তব্যা নাট্যযোগেন নিষ্টপ্তকনকপ্রভাঃ .
জাম্বূদ্বীপস্য বর্ষে তু নানাবর্ণাশ্রযা নরাঃ .. ১০১..
উত্তরাংস্তু কুরুস্ত্যক্ত্বা তে চাপি কনকপ্রভাঃ .
ভদ্রাশ্বপুরুষাঃ শ্বেতাঃ কর্তব্যা বর্ণতস্তথা .. ১০২..
কেতুমালে নরা নীলা গৌরাঃ শেষেষু কীর্তিতাঃ .
নানাবর্ণাঃ স্মৃতা ভূতা গন্ধর্বা যক্ষপন্নগাঃ .. ১০৩..
বিদ্যাধরাস্তথা চৈব পিতরস্তু সমা নরাঃ .
পুনশ্চ ভারতে বর্ষে তাংস্তান্বর্ণান্নিবোধত .. ১০৪..
রাজানঃ পদ্মবর্ণাস্তু গৌরাঃ শ্যামাস্তথৈব চ .
যে চাপি সুখিনো মর্ত্যা গৌরা কার্যাস্তু বৈঃ বুধৈঃ .. ১০৫..
কুকর্মিণো গ্রহগ্রস্তাঃ ব্যাধিতাস্তপসি স্থিতাঃ .
আযস্তকর্মিণশ্চৈব হ্যসিতাশ্চ কুজাতযঃ .. ১০৬..
ঋষ্যযশ্চৈব কর্তব্যা নিত্যং তু বদরপ্রভাঃ .
তপঃস্থিতাশ্চ ঋষযো নিত্যামেবাসিতা বুধৈঃ .. ১০৭..
কারণব্যপদেশেন তথা চাত্মেচ্ছযা পুনঃ .
বর্ণস্তত্র প্রকর্তব্যো দেশজতিবশানুগঃ .. ১০৮..
দেশং কর্ম চ জাতিং চ পৃথিব্যুদ্দেশসংশ্রযম্ .
বিজ্ঞায বর্তনা কার্যা পুরুষাণাং প্রযোগতঃ .. ১০৯..
কিরাতবর্বরান্ধ্রাশ্চ দ্রবিডাঃ কাশিকোসলাঃ .
পুলিন্দা দাক্ষিণাত্যাশ্চ প্রাযেণ ত্বসিতাঃ স্মৃতাঃ .. ১১০..
শকাশ্চ যবনাশ্চৈব পহ্লবা বাহ্লিকাশ্চ যে .
প্রাযেণ গৌরাঃ কর্তব্যা উত্তরা যে শ্রিতা দিশম্ .. ১১১..
পাঞ্চালাঃ শৌরসেনাশ্চ মাহিষাশ্চৌড্রমাগধাঃ .
অঙ্গা বঙ্গাঃ কলিঙ্গাশ্চ শ্যামাঃ কার্যাস্তু বর্ণতঃ .. ১১২..
ব্রাহ্মণাঃ ক্ষত্রিযাশ্চৈব গৌরাঃ কার্যাস্তথৈব হি .
বৈশ্যাঃ শূদ্রাস্তথা চৈব শ্যামাঃ কার্যাস্তু বর্ণতঃ .. ১১৩..
এবং কৃত্বা যথান্যাযং মুখাঙ্গোপাঙ্গবর্তনাম্ .
শ্মশ্রুকর্ম প্রযুঞ্জীত দেশকালবযোঽনুগম্ ..১১৪..
শুদ্ধং বিচিত্রং শ্যামং চ তথা রোমশমেব চ .
ভবেচ্চতুর্বিধং শ্মশ্রু নানাবস্থান্তরাত্মকম্ .. ১১৫..
শুদ্ধং তু লিঙ্গিনাং কার্যং তথামাত্যপুরোধসাম্ .
মধ্যস্থা যে চ পুরুষা যে চ দীক্ষাং সমাশ্রিতাঃ .. ১১৬..
দিব্যা যে পুরুষাঃ কেচিত্সিদ্ধবিদ্যাধরাদযঃ .
পার্থিবাশ্চ কুমারাশ্চ যে চ রাজোপজীবিনঃ .. ১১৭..
শৃঙ্গারিণশ্চ যে মর্ত্যা যৌবনোন্মাদিনশ্চ যে .
তেষাং বিচিত্রং কর্তব্যং শ্মশ্রু নাট্যপ্রযোক্তৃভিঃ .. ১১৮..
অনিস্তীর্ণপ্রতিজ্ঞানাং দুঃখিতানাং তপস্বিনাম্ .
ব্যসনাভিহতানাং চ শ্যামং শ্মশ্রু প্রযোজযেত্ .. ১১৯..
ঋষীণাং তাপসানাং চ যে চ দীর্ঘব্রতা নরাঃ .
তথা চ চীরবদ্ধানাং রোমশং শ্মশ্রু কীর্তিতম্ .. ১২০..
এবং নানাপ্রকারং তু শ্মশ্রু কার্যং প্রযোক্তৃভিঃ .
অত ঊর্ধ্বং প্রবক্ষ্যামি বেষান্নানাপ্রযোগজান্ .. ১২১..
শুদ্ধো বিচিত্রো মলিনস্ত্রিবিধো বেষ উচ্যতে .
তেষাং নিযোগং বক্ষ্যামি যথাবদনুপূর্বশঃ .. ১২২..
দেবাভিগমনে চৈব মঙ্গলে নিযমস্থিতে .
তিথিনক্ষত্রযোগে চ বিবাহকরণে তথা .. ১২৩..
ধর্মপ্রবৃত্তং যত্কর্ম স্ত্রিযো বা পুরুষস্য বা .
বেষস্তেষাং ভবেচ্ছুদ্ধো যে চ প্রাযত্নিকা নরাঃ .. ১২৪..
দেবদানবযক্ষাণাং গন্ধর্বোরগরক্ষসাম্ .
নৃপাণাং কর্কশানাং চ চিত্রো বেষ উদাহৃতঃ .. ১২৫..
বৃদ্ধানাং ব্রাহ্মণানাং চ শ্রেষ্ঠ্যমাত্যপুরোধসাম্ .
বণিজাং কাঞ্চুকীযানাং তথা চৈব তপস্বিনাম্ .. ১২৬..
বিপ্রক্ষেত্রিযবৈশ্যানাং স্থানীযা যে চ মানবাঃ .
শুদ্ধো বস্ত্রবিধিস্তেষাং কর্তব্যো নাটকাশ্রযঃ .. ১২৭..
উন্মত্তানাং প্রমত্তানামধ্বগানাং তথৈব চ .
ব্যসনোপহতানাং চ মলিনো বেষ উচ্যতে .. ১২৮..
শুদ্ধরক্তবিচিত্রাণি বাসাংস্যূর্ধ্বাম্বরাণি চ .
যোজযেন্নাট্যতত্ত্বজ্ঞো বেষযোঃ শুদ্ধচিত্রযোঃ .. ১২৯..
কুর্যাদ্বেষে তু মলিনে মলিনং তু বিচক্ষণঃ .
মুনিনির্গ্রন্থশাক্যেষু যতিপাশুপতেষু চ .. ১৩০..
ব্রতানুগস্তু কর্তব্যো বেষো লোকস্বভাবতঃ .
চীরবল্কলচর্মাণি তাপসানাং তু যোজযেত্ .. ১৩১..
পরিবাণ্মুনিষ্ক্যানাং বাসঃ কাষাযমিষ্যতে .
নানাচিত্রাণি বাসাংসি কুর্যাত্পাশুপতেষ্বথ .. ১৩২..
কুজাতযশ্চ যে প্রোক্তাস্তেষাং চৈব যথার্হতঃ .
অন্তঃপুরপ্রবেশে চ বিনিযুক্তা হি যে নরাঃ .. ১৩৩..
কাষাযকঞ্চুকপটাঃ কার্যাস্তেঽপি যথাবিধি .
অবস্থানতরতশ্চৈব নৃণাং বেষো ভবেদথ .. ১৩৪..
বেষঃ সাংগ্রামিকশ্চৈব শূরাণাং সংপ্রকীর্তিতঃ .
বিচিত্রশস্ত্রকবচো বদ্ধতূণো ধনুর্ধরঃ .. ১৩৫..
চিত্রো বেষস্তু কর্তব্যো নৃপাণাং নিত্যমেব চ .
কেবলস্তু ভবেচ্ছুদ্ধো নক্ষত্রোত্পাতমঙ্গলে .. ১৩৬..
এবমেষ ভবেদ্বেষো দেশজাতিবযোঽনুগঃ .
উত্তমাধমমধ্যানাং স্ত্রীণাং নৃণামথাপি চ .. ১৩৭..
এবং বস্ত্রবিধিঃ কার্যঃ প্রযোগে নাটকাশ্রযে .
নানাবস্থাং সমাসাদ্য শুভাশুভকৃতস্তথা .. ১৩৮..
তথা প্রতিশিরশ্চাপি কর্তব্যং নাটকাশ্রযম্ .
দিব্যানাং মানুষাণাং চ দেশজাতিবযঃশ্রিতম্ .. ১৩৯..
পার্শ্বাগতা মস্তকিনস্তথা চৈব কিরীটিনঃ .
ত্রিবিধো মুকুটো জ্ঞেযো দিব্যপার্থিবসংশ্রিতঃ .. ১৪০..
দেবগন্ধর্বযক্ষাণাং পন্নগানাং সরক্ষসাম্ .
কর্তব্যা নৈকবিহিঅত মুকুটাঃ পার্শ্বমৌলযঃ .. ১৪১..
উত্তমা যে চ দিব্যানাং তে চ কার্যাঃ কিরীটিনঃ .
মধ্যমা মৌলিনশ্চৈব কনিষ্ঠাঃ ষির্ষমৌলিনঃ .. ১৪২..
নরাধিপানাং কর্তব্যা মস্তকে মুকুটা বুধৈঃ .
বিদ্যাধরাণাং চ সিদ্ধানাং চারণানাং তথৈব চ .. ১৪৩..
গ্রন্থিমত্কেশমুকুটাঃ কর্তব্যাস্তু প্রযোক্তৃভিঃ .
রাক্ষোদানবদৈত্যানাং পিঙ্গকেশেক্ষণানি হি .. ১৪৪..
হরিচ্ছ্শ্মশ্রূণি চ তথা মুকুটাস্যানি কারযেত্ .
উত্তমশ্চাপি যে তত্র তে কার্যাঃ পার্শ্বমৌলিনঃ .. ১৪৫..
কস্মাত্তু মুকুটাঃ সৃষ্টাঃ প্রযোগে দিব্য্পার্থিবে .
কেশানাং ছেদনং দৃষ্টং বেদবাদে যথাশ্রুতি .. ১৪৬..
ভদ্রীকৃতস্য বা যজ্ঞে শিরসশ্ছাদনেচ্ছযা .
কেশানামপ্যদীর্ঘত্বাত্স্মৃতং মুকুটধারণম্ .. ১৪৭..
সেনাপতেঃ পুনশ্চাপি যুবরাজস্য চৈব হি .
যোজযেদর্ধমুকুটং মহামাত্রাশ্চ যে নরাঃ .. ১৪৮..
অমাত্যানাং কঞ্চুকিনাং তথা শ্রেষ্ঠিপুরোধসাম্ .
বেষ্টনাবদ্ধপট্টানি প্রতিশীর্ষাণি কারযেত্ .. ১৪৯..
পিশাচোন্মত্তভূতানাং সাধকানাং তপস্বিনাম্ .
অনিস্তীর্ণপ্রতিজ্ঞানাং লম্বকেশং ভবেচ্ছিরঃ .. ১৫০..
শাক্যশ্রোত্রিযনির্গ্রন্থপরিব্রাড্দীক্ষিতেষু চ .
শিরোমুণ্ডং তু কর্তব্যং যজ্ঞদীক্ষান্বিতেষু চ .. ১৫১..
তথা ব্রতানুগং চৈব শেষানাং লিঙ্গিনাং শিরঃ .
মুণ্ডং বা কুঞ্চিতং বাপি লম্বকেশমথাপি বা .. ১৫২..
ধূর্তানাং চৈব কর্তব্যং যে চ রাত্র্যুপজীবিনঃ .
শৃঙ্গারচিত্তাঃ পুরুষাস্তেষাং কুঞ্চিতমূর্ধজাঃ .. ১৫৩..
বালানামপি কর্তব্যং ত্রিশিখণ্ডবিভূষিতম্ .
জটামকুটবদ্ধং চ মুনীনাং তু ভবেচ্ছিরঃ .. ১৫৪..
চেটানামপি কর্তব্যং ত্রিশিখং মুণ্ডমেব বা .
বিদূষকস্য খলতিঃ স্যাত্কাকপদমেব বা .. ১৫৫..
শেএষাণামর্থযোগেন দেশজাতিসমাশ্রযম্ .
শিরঃ প্রযোক্তৃভিঃ কার্যং নানাবস্থান্তরাশ্রযম্ .. ১৫৬..
ভূষণৈর্বর্ণকৈর্বস্ত্রৈর্মাল্যৈশ্চৈব যথাবিধি .
এবং নানাপ্রকারৈস্তু বুদ্ধ্যা বেষান্প্রকল্পযেত্ .. ১৫৭..
পূর্বং তু প্রকৃতিং স্থাপ্য প্রযোগগুণসংভবাম্ .
স্ত্রীণাং বা পুরুষাণাং বাপ্যবস্থাং প্রাপ্য তাদৃশীম্ ..
১৫৮..
সর্বে ভাবাশ্চ দিব্যানাং কার্যা মানুষসংশ্রযাঃ .
তেষাং চানিমিষত্বাদি নৈব কার্যং প্রযোক্তৃভিঃ .. ১৫৯..
ইহ ভাবরসাশ্চৈব দৃষ্টিভিঃ সংপ্রতিষ্ঠিতাঃ .
দৃষ্ট্যৈব স্থাপিতো হ্যর্থঃ পশ্চাদঙ্গৈর্বিভাব্যতে .. ১৬০..
এবং জ্ঞেএযাঙ্গরচনা নানাপ্রকৃতিসংভবা .
সজীব ইতি যঃ প্রোক্তস্তস্য বক্ষ্যামি লক্ষণম্ .. ১৬১..
যঃ প্রাণিনাং প্রবেশো বৈ সজীব ইতি সংজ্ঞিতঃ .
চতুষ্পদোঽথ দ্বিপদস্তথা চৈবাপদঃ স্মৃতঃ .. ১৬২..
উরগানপদান্ বিদ্যাদ্ দ্বিপদান্খগমানুষান্ .
গ্রাম্যা আরণ্যাঃ পশবো বিজ্ঞেযাঃ স্যুশ্চতুষ্পদাঃ .. ১৬৩..
যে তে তু যদ্ধসংফেটৈরুপরোধৈস্তথৈব চ .
নানাপ্রহরণোপেতাঃ প্রযোজ্যা নাটকে বুধৈঃ .. ১৬৪..
আযুধানি চ কার্যাণি পুরুষাণাং প্রমাণতঃ .
তান্যহং বর্তযিষ্যামি যথাপুস্তপ্রমাণতঃ .. ১৬৫..
ভিণ্ডির্দ্বাদশতালঃ স্যাদ্দশ কুন্তো ভবেদথ .
অষ্টৌ শতঘ্নী শূলং চ তোমরঃ শক্তিরেব বা .. ১৬৬..
অষ্টৌ তালা ধনুর্জ্ঞেযমাযামোঽস্য দ্বিহস্তকঃ .
শরো গদা চ বজ্রা চ চতুস্তালং বিধীযতে .. ১৬৭..
অঙ্গুলানি ত্বসিঃ কার্যশ্চত্বারিংশত্প্রমাণতঃ .
দ্বাদশাঙ্গুলকং চক্রং ততোঽর্ধং প্রাস ইষ্যতে .. ১৬৮..
প্রাসবত্পট্টসং বিদ্যাদ্দণ্ডশ্চৈব তু বিংশতিঃ .
বিংশতিঃ কণযশ্চৈব হ্যঙ্গুলানি প্রমাণতঃ .. ১৬৯..
শোডষাঙ্গুলবিস্তীর্ণং সবলং সংপ্রঘণ্টিকম্ .
ত্রিংশদঙ্গুলিমানেন কর্তব্যং খেটকং বুধৈঃ .. ১৭০..
জর্জরো দণ্ডকাষ্ঠং চ তথৈব প্রতিশীর্ষকম্ .
ছত্রং চামরং চৈব ধ্বজো শৃঙ্গার এব চ .. ১৭১..
যত্কিঞ্চিন্মানুষে লোকে দ্রব্যং পুংসাং প্রযোজকম্ .
যচ্চোপকরণং সর্বে নাট্যে তত্সংপ্রকীর্তিতম্ .. ১৭২..
যদ্যস্য বিষযপ্রাপ্তং তেনোহ্যং তস্য লক্ষণম্ .
জর্জরে দণ্ডকাষ্ঠে চ সংপ্রবক্ষ্যামি লক্ষণম্ .. ১৭৩..
মাহেন্দ্রা বৈ ধ্বজাজ্ প্রোক্তা লক্ষণৈর্বিশ্বকর্মণা .
এষান্যতমং কুর্যাজ্জর্জরং দারুকর্মতঃ .. ১৭৪..
অথবা বৃক্ষযোনিঃ স্যাত্প্ররোহো বাপি জর্জরঃ .
বেণুরেব ভবেচ্ছ্রেষ্ঠস্তস্য বক্ষ্যামি লক্ষণম্ ..১৭৫..
শ্বেতভূম্যাআঅং তু যো জাতঃ পুষ্যনক্ষত্রজস্তথা .
সংগ্রাহ্যো বৈ ভবেদ্বেণুর্জর্জরার্থে প্রযত্নতঃ .. ১৭৬..
প্রমাণমঙ্গুলানাং তু শতমষ্টোত্তর<ং ভবেত্ .
পঞ্চপর্বা চতুর্গ্রন্থিস্তালমাত্রস্তথৈব চ .. ১৭৭..
স্থূলগ্রন্থির্ন কর্তব্যো ন শাখী ন চ কীটবান্ .
ন কৃমিক্ষতপর্বা চ ন হীনশ্চান্যবেণুভিঃ .. ১৭৮..
মধুসর্পিস্সর্ষপাক্তং মাল্যধূপপুরস্কৃতম্ .
উপাস্য বিধিবদ্বেণুং গৃহ্ণিযাজ্জর্জরং প্রতি .. ১৭৯..
যো বিধির্যঃ ক্রমশ্চৈব মাহেব্দ্রে তু ধ্বজে স্মৃতঃ .
স জর্জরস্য কর্তব্যঃ পুষ্যবেণুসমাশ্রযঃ .. ১৮০..
ভবেদ্যো দীর্ঘপর্বা তু তনুপত্রস্তথৈব চ .
পর্বাগ্রতণ্ডুলশ্চৈব পুষ্যবেণুঃ স কীর্তিতঃ .. ১৮১..
বিধিরেষ মযা প্রোক্তো জর্জরস্য প্রমাণতজঃ .
অত ঊর্ধ্বং প্রবক্ষ্যামি দণ্ডকাষ্ঠস্য লক্ষণম্ .. ১৮২..
কপিত্থবিল্ববংশেভ্যো দণ্ডকাষ্ঠং ভবেদথ .
বক্রং চৈব হি কর্তব্যং ত্রিভাগে লক্ষণান্বিতম্ .. ১৮৩..
কীটৈর্নোপহতং যচ্চ ব্যাধিনা ন চ পীডিতম্ .
মন্দশাখং ভবেদ্যচ্চ দণ্ডকাষ্ঠং তু তদ্ভবেত্ ..১৮৪..
যস্ত্বেভির্লক্ষণৈর্হীনং দণ্ডকাষ্ঠং সজর্জরম্ .
কারযেত্স ত্বপচযং মহান্তং প্রাপ্নুযাদ্ধ্রুবম্ .. ১৮৫..
অথ শীর্ষবিভাগার্থং ঘটী কার্যা প্রযত্নতঃ .
স্বপ্রমাণবিনির্দিষ্টা দ্বাত্রিংশত্যঙ্গুলানি বৈ .. ১৮৬..
বিল্বমধ্যেন কর্তব্যা ঘটী সিরসমাশ্রযা .
স্বিন্নেন বিল্বকল্কেন দ্রবেণ চ সমন্বিতা .. ১৮৭..
ভস্মনা বা তুষৈর্বাপি কারযেত্প্রতিশীর্ষকম্ .
সংছাদ্য তু ততো বস্ত্রৈর্বিল্বদুগ্ধৈর্ঘটাশ্রযৈঃ .. ১৮৮..
বিল্বকল্কেন চীরং তু দিগ্ধ্বা সংযোজযেদ্ঘটীম্ .
ন স্থূলাং নানতাং তন্বীং দীর্ঘাং নৈব চ কারযেত্. .. ১৮৯..
তস্যামাতপশুষ্কাযাং সুশুষ্কাযামথাপি বা .
ছেদ্যং বুধাঃ প্রকুর্বন্তি বিধিদৃষ্টেন কর্মণা .. ১৯০..
সুতীক্ষ্ণেন তু শস্ত্রেণ অর্ধার্ধং প্রবিভজ্য চ .
স্বপ্রমাণবিনির্দিষ্টং ললাটকৃতকোণকম্ .. ১৯১..
অর্ধাঙ্গুলং ললাটং তু কার্যং ছেদ্যং ষডঙ্গুলম্ .
অর্ধার্ধমঙ্গুলং ছেদ্যং কটযোর্দ্ব্যঙ্গুলং ভবেত্ .. ১৯২..
কটান্তে কর্ণনালস্য ছেদ্যং দ্ব্যধিকমঙ্গুলম্ .
ত্র্যঙ্গুল.ম্ কর্ণবিবরং তথা স্যাচ্ছেদ্যমেব হি .. ১৯৩..
ততশ্চৈবাবটুঃ কার্যা সুসমা দ্বাদশাঙ্গুলা .
ঘট্যাং হ্যেতত্সদা চ্ছেদ্যে বিধানং বিহিতং মযা .. ১৯৪..
তস্যোপরিগতা কার্যা মুকুটা বহুশিল্পজাঃ .
নানারত্নপ্রতিচ্ছন্না বহুরূপোপশোভিতাঃ .. ১৯৪..
তথোপকরণানীহ নাট্যযোগকৃতানি বৈ .
বহুপ্রকারযুক্তানি কুর্বীত প্রকৃতিং প্রতি .. ১৯৬..
যত্কিঞ্চিদস্মিন্ লোকে তু চরাচরসমন্বিতে .
বিহিতং কর্ম শিল্পং বা তত্তূপকরণং স্মৃতম্ ..১৯৭..
যদ্যস্য বিষযং প্রাপ্তং তত্তদেবাভিগচ্ছতি .
নাস্তন্তঃ পুরুষাণাং হি নাট্যোপকরণাশ্রযে .. ১৯৮..
যদ্যেনোত্পাদিতং কর্ম শিল্পযোগক্রিযাপি বা .
তস্য তেন কৃতা সৃষ্টিঃ প্রমাণং লক্ষণং তথা .. ১৯৯..
যা কাষ্ঠযন্ত্রভূযিষ্ঠা কৃতা সৃষ্টির্মহাত্মনা .
ন সাস্মাকং নাট্যযোগে কস্মাত্খেদাবহা হি সা .. ২০০..
যদ্দ্রব্যং জীবলোকে তু নানালক্ষণলক্ষিতম্ .
তস্যানুকৃতিসংস্থানং নাট্যোওপকরণং ভবেত্ .. ২০১..
প্রাসাদগৃহযানানি নানাপ্রহরণানি চ .
ন শক্যং তানি বৈ কর্তুং যথোক্তানীহ লক্ষণৈঃ .. ২০২..
লোকধর্মী ভবেত্ত্বন্যা নাট্যধর্মী তথাপরা .
স্বভাবো লোকধর্মী তু বিভাবো নাট্যমেব হি .. ২০৩..
আযসং ন তু কর্তব্যং ন চ সারমযং তথা .
নাট্যোপকরণং তজ্জ্ঞৈর্গুরুখেদকর< ভবেত্ .. ২০৪..
কাষ্ঠচর্মসু বস্ত্র্ষু জতুবেণুদলেষু চ .
নাট্যোপকরণানীহ লঘুকর্মাণি কারযেত্ .. ২০৫..
চর্মবর্মধ্বজাঃ শৈলাঃ প্রাসাদা দেবতাগৃহাঃ .
হযবারণযানানি বিমানানি গৃহাণি চ .. ২০৬..
পূর্বং বেণুদলৈঃ কৃত্বা কৃতীর্ভাবসমাশ্রযাঃ .
ততঃ সুরঙ্গৈরচ্ছাদ্য বস্ত্রৈঃ সারূপ্যমানযেত্ .. ২০৭..
অথবা যদি বস্ত্রাণামসান্নিধ্যং ভবেদিহ .
তালীযৈর্বা কিলিঞ্জৈর্বা শ্লক্ষ্ণৈর্বস্ত্রক্রিযা ভবেত্ .. ২০৮..
তথা প্রহরণানি স্যুস্তৃণবেণুদলাদিভিঃ .
জন্তুভাণ্ডক্রিযাভিশ্চ নানারূপাণি নাটকে .. ২০৯..
প্রতিপাদং প্রতিশিরঃ প্রতিহস্তং প্রতিত্বচম্ .
তৃণৈঃ কিলিঞ্জৈর্ভাণ্ডৈর্বা সারূপ্যাণি তু কারযেত্ .. ২১০..
যদ্যস্য সদৃশং রূপং সারূপ্যগুণসংভবম্ .
মৃণ্মযং তত্তু কৃত্স্নং তু নানারূপং তু কারযেত্ ..২১১..
ভাণ্ডবস্ত্রমধূচ্ছিষ্টৈর্লাক্ষযাভ্রদলেন চ .
নাগাস্তে বিবিধাঃ কার্যা হ্যতসীশণবিল্বজৈঃ .. ২১২..
নানাকুসুমজাতীশ্চ ফলানি বিবিধানি চ .
ভাণ্ডবস্ত্রমধূচ্ছিষ্টৈর্লাক্ষযা বাপি কারযেত্ ..২১৩..
ভাণ্ডবস্ত্রমধূচ্ছিষ্টৈস্তাম্রপত্রৈস্তথৈব চ .
সম্যক্চ নীলীরাগেণাপ্যভ্রপত্রেণ চৈব হি .. ২১৪..
রঞ্জিতেনাভ্রপত্রেণ মণীশ্চৈব প্রকারযেত্ .
উপাশ্রযমথাপ্যেষং শুল্ববঙ্গেন কারযেত্ .. ২১৫..
বিবিধা মুকুটা দিবা পূর্বং যে গদিতা মযা .
তেঽভ্রপত্রোজ্বলাঃ কার্যা মণীব্যালোপশোভিতাঃ .. ২১৬..
ন শাস্ত্রপ্রভবং কর্ম তেষা.ম্ হি সমুদাহৃতম্ .
আচার্যবুদ্ধ্যা কর্তব্যমূহাপোহপ্রযোজিতম্ .. ২১৭..
এষ মর্ত্যক্রিযাযোগো ভবিষ্যত্কল্পিতো মযা .
কস্মাদল্পবলত্বং হি মনুষ্যেষু ভবিষ্যতি .. ২১৮..
মর্ত্যানামপি নো শক্যা বিভাবাঃ সর্বকাঞ্চনাঃ .
নেষ্টাঃ সুবর্ণরত্নৈস্তু মুকুটা ভূষণানি বা .. ২১৯..
যুদ্ধে নিযুদ্ধে নৃত্তে বা বৃষ্টিব্যাপারকর্মণি .
গুরুভাবাবসন্নস্য স্বেদো মূর্ছা চ জাযতে .. ২২০..
স্বেদমূর্ছাক্লমার্তস্য প্রযোগস্তু বিনশ্যতি .
প্রাণাত্যযঃ কদাচিচ্চ ভবেদ্ব্যাযতচেষ্টযা .. ২২১..
তস্মাত্তাম্রমযৈঃ পত্রৈরভ্রকৈ রঞ্জিতৈরপি .
ভেণ্ডৈরপি মধূচ্ছিষ্টৈঃ কার্যাণ্যাভরণানি তু .. ২২২..
এবং লোকোপচারেণ স্ববুদ্ধিবিভবেন চ .
নাট্যোপকরণানীহ বুধঃ সম্যক্ প্রযোজযেত্ .. ২২৩..
ন ভেদ্যং নৈব চ চ্ছেদ্যং ন প্রহর্তব্যমেব চ .
রঙ্গে প্রহরণৈঃ কার্যং সংজ্ঞামাত্রং তু কারযেত্ ..২২৪..
অথবা যোগশিক্ষাভির্বিদ্যামাযাকৃতেন বা .
শস্ত্রমোক্ষঃ প্রকর্তব্যো রঙ্গমধ্যে প্রযোক্তৃভিঃ .. ২২৫..
এবং নানাপ্রকারৈস্তু আযুধাভরণানি চ .
নোক্তানি যানি চ মযা লোকাদ্ গ্রাহ্যাণি তান্যপি .. ২২৬..
আহার্যাভিনযো হ্যেষ মযা প্রোক্তঃ সমাসতঃ .
অত ঊর্ধ্বং প্রবক্ষ্যামি সামান্যাভিনযং প্রতি .. ২২৭..
ইতি ভারতীযে নাট্যশাস্ত্রে আহার্যাভিনযো নামৈকবিংশোঽধ্যাযঃ .