নাট্যশাস্ত্রম্ অধ্যায ২০

.. নাট্যশাস্ত্রম্ অধ্যায ২০ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ বিংশোঽধ্যাযঃ .
সমুত্থানং তু বৃত্তীনাং ব্যাখ্যাম্যনুপূর্বশঃ .
যথা বস্তূদ্ভবং চৈব কাব্যানাং চ বিকল্পনম্ .. ১..
একার্ণবং জগত্ কৃত্বা ভগবানচ্যুতো যদা .
শেতে স্ম নাগপর্যঙ্কে লোকান্ সংক্ষিপ্য মাযযা .. ২..
অথ বীর্যবলোন্মতাবসুরৌ মধুকৈঅটভৌ .
তর্জযামাসতুর্দেবং তরসা যুদ্ধকাঙ্ক্ষযা .. ৩..
নিজবাহূ বিমৃদনন্তৌ ভূতভাবনমক্ষযম্ .
জানুভির্মুষ্টিভিশ্চৈব যোধযামাসতুঃ প্রভুম্ .. ৪..
বহুভিঃ পরুষৈর্বাক্যৈরন্যোন্যসমভিদ্রবম্ .
নানাধিক্ষেপবচনৈঃ কম্পযন্তাবিবোদধিম্ .. ৫..
তযোর্নানাপ্রকারাণি বচাংসি বদতোস্তদা .
শ্রুত্বা ত্বভিহতমনা দ্রুহিণো বাক্যমব্রবীত্ .. ৬..
কিমিদং ভরতীবৃত্তির্বাগ্ভিরেব প্রবর্ততে .
উত্তরোত্তরসংবদ্ধা নন্বিমৌ নিধনং নযঃ .. ৭..
পিতামহবচঃ শ্রুত্বা প্রোবাচ মধুসূদনঃ .
কার্যহেতোর্মযা ব্রহ্মন্ ভারতীযং বিনির্মিতা .. ৮..
বদতাং বাক্যভূযিষ্ঠা ভারতীযং ভবিষ্যতি .
তস্মাদেতৌ নিহন্ম্যদ্যেত্যুবাচ বচনং হরিঃ .. ৯..
শুদ্ধৈরবিকৃতৈরঙ্গৈঃ সাঙ্গহারৈস্তথা ভৃশম্ .
যোধযামাসতুর্দৈত্যৌ যুদ্ধমার্গবিশারদৌ .. ১০..
ভূমিসংযোগসংস্থানৈঃ পদন্যাসৈর্হরেস্তদা .
অতিভারোঽভবদ্ ভূমের্ভারতী তত্র নির্মিতা .. ১১..
বল্গিতৈঃ শার্ঙ্গধনুষস্তীব্রৈর্দীপ্ততথৈরথ .
সত্বাধিকৈরসংভ্রান্তৈঃ সাত্ত্বতী তত্র নির্মিতা .. ১২..
বিচিত্রৈরঙ্গহারৈস্তু দেবো লীলাসমন্বিতৈঃ .
ববন্ধ যচ্ছিখাপাশং কৈশিকী তত্র নির্মিতা .. ১৩..
সংরম্ভাবেগবহুলৈর্নানাচারী সমুত্থিতৈঃ .
নিযুদ্ধকরণৈশ্চিত্রৈরুত্পন্নারভটী ততঃ .. ১৪..
যাং যাং দেবঃ সমাচষ্টে ক্রিযাং বৃত্তিষু সংস্থিতাম্ .
তাং তদর্থানুগৈর্জপ্যেঐর্দ্রুহিণঃ প্রত্যপূজযত্ ..১৫..
যদা হতৌ তাবসুরৌ হরিণা মধুকৈটভৌ .
ততোঽব্রবীত্ পদ্মযোনির্নারাযণমরিন্দমম্ .. ১৬..
অহো বিচিত্রৈর্বিষমৈঃ স্ফুটৈঃ সললিতৈরপি .
অঙ্গহারৈঃ কৃতং দেব ত্বযা দানবনাশনম্ .. ১৭..
তস্মাদযং হি লোকস্য নিযুদ্ধসমযক্রমঃ .
সর্বশস্ত্রবিমোক্ষেষু ন্যাযসংজ্ঞো ভবিষ্যতি .. ১৮..
ন্যাযাশ্রিতৈরঙ্গহারৈর্ন্যাযাচ্চৈব সমুত্থিতৈঃ .
যস্মাদ্যুদ্ধানি বর্তন্তে তস্মান্যাযাঃ প্রকীর্তিতাঃ .. ১৯..
[চারীষু চ সমুত্পন্নো নানাচারীসমাশ্রযঃ .
ন্যাযসংজ্ঞঃ কৃতো হ্যেষ দ্রুহিণেন মহাত্মনা.. ২০..
ততো বেদেষু নিক্ষিপ্তা দ্রুহিণেন মহাত্মনা .
পুনরিষ্বস্ত্রজাতে চ নানাচারীসমাকুলে .. ২১..
পুনর্নাট্যপ্রযোগেষু নানাভাবসম্ন্বিতাঃ .
বৃত্তিসংজ্ঞাঃ কৃতা হ্যেতাঃ কাব্যবন্ধসমাশ্রযাঃ].. ২২..
চরিতৈর্যস্য দেবস্য জপ্যং যদ্যাদৃশং কৃতম্ .
ঋষিভিস্তাদৃশী বৃত্তিঅঃ কৃতা পাঠ্যাদিসংযুতা .. ২৩..
নাট্যবেদসমুত্পনা বাগঙ্গাভিনযাত্মিকা .
মযা কাব্যক্রিঅযাহেতোঃ প্রক্ষিপ্তা দ্রুহিণাজ্ঞযা .. ২৪..
ঋগ্বেদাদ্ভারতী ক্ষিপ্তা যজুর্বেদাচ্চ সাত্ত্বতী .
কৈশিকী সামবেদাচ্চ শেষা চাথর্বণাদপি .. ২৫..
যা বাক্প্রধানা পুরুষপ্রযোজ্যা
স্ত্রীবর্জিতা সংকৃতপাঠ্যযুক্তা .
স্বনামধেযৈর্ভরতৈঃ প্রযুক্তা
সা ভারতী নাম ভবেত্তু বৃত্তিঃ .. ২৬..
ভেদাস্তস্যাস্তু বিজ্ঞেযাশ্চত্বারোঽঙ্গত্বমাগতাঃ .
প্ররোচনামুখং চৈব বীথী প্রহসনং তথা .. ২৭..
জযাভ্যুদযিনী চৈব মঙ্গল্যা বিজযাবহা .
সর্বপাপপ্রশমনী পূর্বরঙ্গে প্ররোচনা .. ২৮..
[উপক্ষেপেণ কাব্যস্য হেতুযুক্তিসমাশ্রযা .
সিদ্ধেনামন্ত্রণা যা তু বিজ্ঞেযা সা প্ররোচনা].. ২৯..
নটী বিদূষকো বাপি পারিপার্শ্বিক এব বা .
সূত্রধারেণ সহিতাঃ সংলাপং যত্তু কুর্বতে .. ৩০..
চিত্রৈর্বাক্যৈঃ স্বকার্যারোত্থৈর্বীত্থ্যঙ্গেরন্যথাপি বা .
আমুখং তত্তু বিজ্ঞেযং বুধৈঃ প্রস্তাবনাপি বা .. ৩১..
[লক্ষণং পূর্বমুক্তং তু বীত্থ্যাঃ প্রহসনস্য চ .
আমুখাঙ্গান্যতো বক্ষ্যে যথাবদনুপূর্বশঃ].. ৩২..
উদ্ধাত্যকঃ কথোদ্ধাতঃ প্রযোগাতিশযস্তথা .
প্রবৃত্তকাবলগিতে পঞ্চাঙ্গান্যামুখস্য তু .. ৩৩..
উদ্ধাত্যকাবলগিতলক্ষণং কথিতং মযা .
শেষাণাং লক্ষণং বিপ্রা ব্যাখ্যাস্যাম্যানুপূর্বশঃ .. ৩৪..
সুত্রধারস্য বাক্যং বা যত্র বাক্যার্থমেব বা .
গৃহীতাং প্রবিশেত্পাত্রং কথোদ্ধাতঃ স কীর্তিতঃ .. ৩৫..
প্রযোগে তু প্রযোগং তু সূত্রধারঃ প্রযোজযেত্ .
ততশ্চ প্রবিশেত্পাত্রং প্রযোগাতিশযো হি সঃ .. ৩৬..
কালপ্রবৃত্তিমাশ্রিত্য বর্ণনা যা প্রযুজ্যতে .
তদাশ্রযাচ্চ পাত্রস্য প্রবেশস্তত্প্রবৃত্তকম্ .. ৩৭..
এষামন্যতমং শ্লিষ্টং যোজযিত্বার্থযুক্তিভিঃ .
[তস্মাদঙ্গদ্বযস্যাপি সম্ভবো ন নিবার্যতে .. ৩৮..
পাত্রগ্রন্থৈরসংবাধ প্রকুর্যাদামুখং ততঃ .
এবমেতদ্বুধৈর্জ্ঞেযমামুখং বিবিধাশ্রযম্ .. ৩৯..
লক্ষণং পূর্বমুক্তং তু বীথ্যাঃ প্রহসনস্য চ .
[ইত্যষ্টার্ধবিকল্পা বৃত্তিরিযং ভারতী মযাভিহিতা .
সাত্ত্বত্যাস্তু বিধানং লক্ষণযুক্ত্যা প্রবক্ষ্যামি ].. ৪০..
যা সাত্ত্বতেনেহ গুণেন যুক্তা ন্যাযেন বৃত্তেন সমন্বিতা চ .
হর্ষোত্কটা সংহৃতশোকভাবা সা সাত্ত্বতী নাম ভবেত্তু বৃত্তিঃ
.. ৪১..
বাগঙ্গাভিনযবতী সত্ত্বোত্থানবচনপ্রকরণেষু .
সত্ত্বাধিকারযুক্তা বিজ্ঞেযা সাত্ত্বতী বৃত্তিঃ .. ৪২..
বীরাদ্ভুতরৌদ্ররসা নিরস্তশৃঙ্গারকরুণনির্বেদা .
উদ্ধতপুরুষপ্রাযা পরস্পরাধর্ষণকৃতা চ .. ৪৩..
উত্থাপকশ্চ পরিবর্তকশ্চ সল্লাপকশ্চ সংঘাত্যঃ .
চত্বারোঽস্যা ভেদা বিজ্ঞেযা নাট্যকোবিদৈঅঃ .. ৪৪..
অহমপ্যুত্থাস্যামি ত্বং তাবদ্দর্শযাত্মনঃ শক্তিম্ .
ইতি সংঘর্ষসমুত্থস্তজ্জ্ঞৈরুত্থাপকো জ্ঞেযঃ .. ৪৫..
উত্থানসমারব্ধানর্থানুত্সৃজ্য যোঽর্থযোগবশাত্ .
অন্যানর্থান্ ভজতে স চাপি পরিবর্তকো জ্ঞেযঃ .. ৪৬..
[নির্দিষ্টবস্তুবিষযঃ প্রপঞ্চবদ্ধস্ত্রিহাস্যসংযুক্তঃ .
সংঘর্ষবিশেষকৃতস্ত্রিবিধঃ পরিবর্তকো জ্ঞেযঃ].. ৪৭..
সাধর্ষজো নিরাধর্ষজোঽপি বা রাগবচসংযুক্তঃ .
সাধিক্ষেপালাপো জ্ঞেযঃ সল্লাপকঃ সোঽপি .. ৪৮..
[ধর্মাধর্মসমুত্থং যত্র ভবেদ্রাগদোষসংযুক্তম্ .
সাধিক্ষেপং চ বচো জ্ঞেযঃ সংলাপকো নাম].. ৪৯..
মন্ত্রর্থবাক্যশক্ত্যা দৈববশাদাত্মদোষযোগাদ্বা .
সংঘাতভেদজননস্তজ্জ্ঞৈঃ সংঘাত্যকো জ্ঞেযঃ .. ৫০..
[বহুকপটসংশ্রযাণাং পরোপঘাতাশযপ্রযুক্তানাম্ .
কূটানাং সংঘাতো বিজ্ঞেযঃ কূটসংঘাত্যঃ ].. ৫১..
ইত্যষ্টার্ধবিকল্পা বৃত্তিরিযং সাত্ত্বতী মযাভিহিতা .
কৈশিক্যাস্ত্বথ লক্ষণমতঃপরং সংপ্রবক্ষ্যামি .. ৫২..
যা শ্লক্ষ্ণনৈপথ্যবিশেষচিত্রা স্ত্রীসংযুতা যা বহুনৃত্তগীতা .
কামোপভোগপ্রভবোপচারা তাং কৈশিকীং বৃত্তিমুদাহরন্তি .. ৫৩..
[বহুবদ্যনৃত্তগীতা শৃঙ্গারাভিনযচিত্রনৈপথ্যা .
মাল্যালঙ্কারযুক্তা প্রশস্তবেষা চ কান্তা চ .. ৫৪..
চিত্রপদবাক্যবন্ধৈরলঙ্কৃতা হসিতরুদিতরোষাদৈঃ .
স্ত্রীপুরুষকামযুক্তা বিজ্ঞেযা কৈশিকীবৃত্তিঃ].. ৫৫..
নর্ম চ নর্মস্ফুঞ্জো নর্মস্ফোটোঽথ নর্মগর্ভশ্চ .
কৈশিক্যাশ্চত্বারো ভেদা হ্যেতে সমাখ্যাতাঃ .. ৫৬..
আস্থাপিতশৃঙ্গারং বিশুদ্ধকরণং নিবৃত্তবীররসম্ .
হাস্যপ্রবচনবহুলং নর্ম ত্রিবিধং বিজানীযাত্ .. ৫৭..
ঈর্ষ্যাক্রোধপ্রাযং সোপালম্ভকরণানুবিদ্ধং চ .
আত্মোপক্ষেপকৃতং সবিপ্রলম্ভং স্মৃতং নর্ম .. ৫৮..
নবসঙ্গমসম্ভোগো রতিসমুদযবেষবাক্যসংযুক্তঃ .
জ্ঞেযো নর্মস্ফুঞ্জো হ্যবসানভযাত্মকশ্চৈব .. ৫৯..
বিবিধানাং ভবানাং লবৈর্লবৈর্ভূষিতো বহুবিশেষৈঃ .
অসমগ্রাক্ষিপ্তরসো নর্মস্ফোটস্তু বিজ্ঞেযঃ .. ৬০..
বিজ্ঞানরূপশোভা ধনাদিভির্নাযকো গণৈর্যত্র .
প্রচ্ছনাং ব্যবহর্তে কর্যবষান্নর্মগর্ভোঽসৌ .. ৬১..
[পূর্বস্থিতৌ বিপদ্যেত নাযকো যত্র চাপরস্তিষ্ঠেত্ .
তমপীহ নর্মগর্ভং বিদ্যান্নাট্যপ্রযোগেষু ].. ৬২..
ইত্যষ্টার্শবিকল্পা বৃত্তিরিযং কৈশিকী মযাভিহিতা .
অত ঊর্ধ্বমুদ্ধতরসামরভটিং সম্প্রবক্ষ্য্যমি .. ৬৩..
আরভটপ্রাযগুণা তথৈব বহুকপটবঞ্চনোপেতা .
দম্ভানৃতবচনবতী ত্বারভটী নাম বিজ্ঞেযা .. ৬৪..
[আবপাতাপ্লুলঙ্গিতানি চ্ছেদ্যানি মাযাকৃতমিন্দ্রজালম্ .
চিত্রাণী যুদ্ধানি চ যত্র নিত্যং তাং তাদৃশীমারভটীং বদন্তি
.. ৬৫..
শাড্গুণ্যসমার্ব্ধা হঠাতিসন্ধানবিদ্রবোপেতা .
লাভালাভার্থকৃতা বিজ্ঞেযা বৃত্তিরারভটী .. ৬৬..
সংক্ষিপ্তকাবপতৌ বস্তূত্থাপনমথাপি সংফেটঃ .
এতে হ্যস্যা ভেদা লক্ষণমেষং প্রবক্ষ্যামি .. ৬৭..
অন্বর্থশিল্পযুক্তো বহুপুস্তোত্থানচিত্রনেপথ্যঃ .
সংক্ষিপ্তবস্তু বিষযো জ্ঞেযঃ সংক্ষিপ্তকও নাম .. ৬৮..
ভযহর্ষসমুত্থানং বিদ্রববিনিপাতসম্ভ্রমাচরণম্ .
ক্ষিপ্রপ্রবেশনির্গমমবপাতমিমং বিজানীযাত্ .. ৬৯..
সর্বরসসমাসকৃতং সবিদ্রব্ব্বিদ্রবাশ্রযং ব্বপি .
নাট্যং বিভাব্যতে যত্তদ্বস্তূত্থাপনং জ্ঞেযম্ .. ৭০..
সংরম্ভসংপ্রযুক্তো বহুযুদ্ধকপটনির্ভেদঃ .
শস্ত্রপ্রহরবহুলঃ সম্ফেটো নাম বিজ্ঞেযঃ .. ৭১..
এবমেতা বুধৈর্জ্ঞেযা বৃত্তযো নাট্যসংশ্রযা .
রসপ্রযোগমাসাং চ কীর্ত্যমানং নিবোধত .. ৭২..
হাস্যশৃঙ্গরবহুলা কৈশিকী পরিচক্ষিতা .
সত্ত্বতী চাপি বিজ্ঞেযা বীরাদ্ভুতশমাশ্রযাঃ .. ৭৩..
রৌদ্রে ভযানকে চৈব বিজ্ঞেযারভটী বুধৈঃ .
বীভত্সে করুণে চৈব ভারতী সংপ্রকীর্তিতা .. ৭৪..
[ন হ্যেকরসজং কব্যং কিঞ্চিদস্তি প্রযোগতঃ .
ভাবো বাপি রসো বাপি প্রবৃত্তির্বৃত্তিরেব বা .. ৭৫..
সর্বেষাং সমবেতানাং যস্য রূপং ভবেদ্বহু .
স মন্তব্যো রস স্থাযি শেষাঃ সঞ্চারিণঃ স্মৃতাঃ].. ৭৬..
বৃত্যন্ত এশোঽভিনযো মযোক্তো বাগঙ্গসত্ত্বপ্রভবো যথাবদ্ .
আহার্যমেবাভিনযং প্রযোগে বক্ষ্যামি নেপথ্যকৃতং তু ভূযঃ .. ৭৭..
ইতি ভারতীযে নাট্যশাস্ত্রে বৃত্তিবিকল্পনং নাম বিংশোঽধ্যাযঃ