নাট্যশাস্ত্রম্ অধ্যায ০৪ – ২

বিক্ষিপ্তং হস্তপাদং তু সমন্তাদ্যত্র দণ্ডবত্ .. ১০১..
রেচ্যতে তদ্ধি করণং জ্ঞেযং দণ্ডকরেচিতম্ .
বৃশ্চিকং চরণং কৃত্বা দ্বাবপ্যথ নিকুট্টিতৌ .. ১০২..
বিধাতব্যৌ করৌ তত্তু জ্ঞেযং বৃশ্চিককুট্টিতম্ .
সূচিং কৃত্বাপবিদ্ধং চ দক্ষিণং চরণং ন্যসেত্ .. ১০৩..
রেচিতা চ কটির্যত্র কটিভ্রান্তং তদুচ্যতে .
অঞ্চিতঃ পৃষ্ঠতঃ পাদঃ কুঞ্চিতোর্ধ্বতলাঙ্গুলিঃ .. ১০৪..
লতাখ্যশ্চ করো বামস্তল্লতাবৃশ্চিকং ভবেত্ .
অলপদ্মঃ কটীদেশে ছিন্না পর্যাযশঃ কটী .. ১০৫..
বৈশাখস্থানকেনেহ তচ্ছিন্নং করণং ভবেত্ .
বৃশ্চিকং চরণং কৃত্বা স্বস্তিকৌ চ করবুভৌ .. ১০৬..
রেচিতৌ বিপ্রকীর্ণৌ চ করৌ বৃশ্চিকরেচিতম্ .
বাহুশীর্ষাঞ্চিতৌ হস্তৌ পাদঃ পৃষ্ঠাঞ্চিতস্তথা .. ১০৭..
দূরসন্নতপৃষ্ঠং চ বৃশ্চিকং তত্প্রকীর্তিতম্ .
আলীঢং স্থানকং যত্র করৌ বক্ষসি রেচিতৌ .. ১০৮..
ঊর্ধ্বাধো বিপ্রকীর্ণৌ চ ব্যংসিতং করণং তু তত্ .
হস্তৌ তু স্বস্তিকৌ পার্শ্বে তথা পাদো নিকুট্টিতঃ .. ১০৯..
যত্র তত্করণং জ্ঞেযং বুধৈঃ পার্শ্বনিকুট্টিতম্ .
বৃশ্চিকং চরণং কৃত্বা পাদস্যাঙ্গুষ্ঠকেন তু .. ১১০..
ললাটে তিলকং কুর্যাল্ললাটতিলকং তু তত্ .
পৃষ্ঠতঃ কুঞ্চিতং কৃত্বা ব্যতিক্রান্তক্রমং ততঃ .. ১১১..
আক্ষিপ্তৌ চ করৌ কার্যৌ ক্রান্তকে করণে দ্বিজাঃ .
আদ্যঃ পাদো নতঃ কার্যঃ সব্যহস্তশ্চ কুঞ্চিতঃ .. ১১২..
উত্তানো বামপার্শ্বস্থস্তত্কুঞ্চিতমুদাহৃতম্ .
প্রলম্বিতাভ্যাং বাহুভ্যাং যদ্গাত্রেণানতেন চ .. ১১৩..
অভ্যন্তরাপবিদ্ধঃ স্যাত্তজ্জ্ঞেযং চক্রমণ্ডলম্ .
স্বস্তিকাপসৃতৌ পাদাবপবিদ্ধক্রমৌ যদা .. ১১৪..
উরোমণ্ডলকৌ হস্তাবুরোমণ্ডলিকস্তু তত্ .
আক্ষিপ্তং হস্তপাদং চ ক্রিযতে যত্র বেগতঃ .. ১১৫..
আক্ষিওতং নাম করণং বিজ্ঞেযং তত্দ্বিজোত্তমাঃ .
ঊর্ধ্বাঙ্গুলিতলঃ পাদঃ পার্শ্বেনোর্ধ্বং প্রসারিতঃ .. ১১৬..
প্রকুর্যাদঞ্চিততলৌ হস্তৌ তলবিলাসিতে .
পৃষ্ঠতঃ প্রসৃতঃ পাদৌ দ্বৌ তালাবর্ধমেব চ .. ১১৭..
তস্যেব চানুগো হস্তঃ পুরতস্ত্বর্গলং তু তত্ .
বিক্ষিপ্তং হস্তপাদং চ পৃষ্ঠতঃ পার্শ্বতোঽপি বা .. ১১৮..
একমার্গগতং যত্র তদ্বিক্ষিপ্তমুদাহৃতম্ .
প্রসার্য কুঞ্চিতং পাদং পুনরাবর্তযেত্ দ্রুতম্ .. ১১৯..
প্রযোগবশগৌ হস্তৌ তদাবর্তমুদাহৃতম্ .
কুঞ্চিতং পাদমুত্ক্ষিপ্য পার্শ্বাত্পার্শ্বং তু ডোলযেত্ .. ১২০..
প্রযোগবশগৌ হস্তৌ ডোলাপাদং তদুচ্যতে .
আক্ষিপ্তং হস্তপাদং চ ত্রিকং চৈব বিবর্তযেত্ .. ১২১..
রেচিতৌ চ তথা হস্তৌ বিবৃত্তে করণে দ্বিজাঃ .
সূচীবিদ্ধং বিধাযাথ ত্রিকং তু বিনিবর্তযেত্ .. ১২২..
করৌ চ রেচিতৌ কার্যৌ বিনিবৃত্তে দ্বিজোত্তমঃ .
পার্শ্বক্রান্তক্রমং কৃত্বা পুরস্তাদথ পাতযেত্ .. ১২৩..
প্রযোগবশগৌ হস্তৌ পার্শ্বক্রান্তং তদুচ্যতে .
পৃষ্ঠতঃ কুঞ্চিতঃ পাদৌ বক্ষশ্চৈব সমুন্নতম্ .. ১২৪..
তিলকে চ করঃ স্থাপ্যস্তন্নিস্তম্ভিতমুচ্যতে .
পৃষ্ঠতো বলিতং পাদং শিরোঘৃষ্টং প্রসারযেত্ .. ১২৫..
সর্বতো মণ্ডলাবিদ্ধং বিদ্যুদ্ভ্রান্তং তদুচ্যতে .
অতিক্রান্তক্রমং কৃত্বা পুরস্তাত্সংপ্রসারযেত্ .. ১২৬..
প্রযোগবশগৌ হস্তাবতিক্রান্তে প্রকীর্তিতৌ .
আক্ষিপ্তং হস্তপাদং চ ত্রিকং চৈব বিবর্তিতম্ .. ১২৭..
দ্বিতীযো রেচিতো হস্তো বিবর্তিতকমেব তত্ .
কর্ণেঽঞ্চিতঃ করো বামো লতাহস্তশ্চ দক্ষিণঃ .. ১২৮..
দোলাপাদস্তথা চৈব গজক্রীডিতকং ভবেত্ .
দ্রুতমুত্ক্ষিপ্য চরণং পুরস্তাদথ পাঅতযেত্ .. ১২৯..
তলসংস্ফোটিতৌ হস্তৌ তলসংস্ফোটিতে মতৌ .
পৃষ্ঠপ্রসারিতঃ পাদঃ লতারেচিতকৌ করৌ .. ১৩০..
সমুন্নতং শিরশ্চৈব গরুডপ্লুতকং ভবেত্ .
সূচিপাদো নতং পার্শ্বমেকো বক্ষঃস্থিতঃ করঃ .. ১৩১..
দ্বিতীযশ্চাঞ্চিতো গণ্ডে গণ্ডসূচী তদুচ্যতে ,
ঊর্ধ্বাপবেষ্টিতৌ হস্তৌ সূচীপাদো বিবর্তিতঃ .. ১৩২..
পরিবৃত্তত্রিকং চৈব পরিবৃত্তং তদুচ্যতে .
একঃ সমস্থিতঃ পাদ ঊরুপৃষ্ঠে স্থিতোঽপরঃ .. ১৩৩..
মুষ্টিহস্তশ্চ বক্ষঃস্থঃ পার্শ্বজানু তদুচ্যতে .
পৃষ্ঠপ্রসারিতঃ পাদঃ কিঞ্চিতঞ্চিত জানুকঃ .. ১৩৪..
যত্র প্রসারিতো বাহূ তত্স্যাত্ গৃধ্রাবলীনকম্ .
উত্প্লুত্য চরণৌ কার্যাবগ্রতঃ স্বস্তিকস্থিতৌ .. ১৩৫..
সন্নতৌ চ তথা হস্তৌ সন্নতং তদুদাহৃতম্ .
কুঞ্চিতং পাদমুত্ক্ষিপ্য কুর্যাদগ্রস্থিতং ভুবি .. ১৩৬..
প্রযোগবশগৌ হস্তৌ সা সূচী পরিকীর্তিতা .
অলপদ্মঃ শিরোহস্তঃ সূচীপাদশ্চ দক্ষিণঃ .. ১৩৭..
যত্র তত্করণং জ্ঞেঅযমর্ধসূচীতি নামতঃ .
পাদসূচ্যা যদা পাদো দ্বিতীযস্তু প্রবিধ্যতে .. ১৩৮..
কটিবক্ষঃস্থিতৌ হস্তৌ সূচীবিধং তদুচ্যতে .
কৃত্বোরুবলিতং পাদমপক্রান্তক্রমং ন্যসেত্ .. ১৩৯..
প্রযোগবশগৌ হস্তবপক্রান্তং তদুচ্যতে .
বৃশ্চিকং চরণং কৃত্বা রেচিতৌ চ তথা করৌ .. ১৪০..
তথা ত্রিকং বিবৃত্তং চ মযূরললিতং ভবেত্ .
অঞ্চিতাপসৃতৌ পাদৌ শিরশ্চ পরিবাহিতম্ .. ১৪১..
রেচিতৌ চ তথা হস্তৌ তত্সর্পিতমুদাহৃতম্ .
নূপুরং চরণং কৃত্বা দণ্ডপাদং প্রসারযেত্ .. ১৪২..
ক্ষিপ্রাবিদ্ধকরং চৈব দণ্ডপাদং তদুচ্যতে .
অতিক্রান্তক্রমং কৃত্বা সমুত্প্লুত্য নিপাতযেত্ .. ১৪৩..
জঙ্ঘাঞ্চিতোপরি ক্ষিপ্তা তদ্বিদ্যাদ্ধরিণপ্লুতম্ .(see the cluster ~Nghaa. A new ligature may be added to represent this cluster)
ডোলাপাদক্রমং কৃত্বা সমুত্প্লুত্য নিপাতযেত্ ..১৪৪..
পরিবৃত্তত্রিকং চৈব তত্প্রেঙ্খোলিতমুচ্যতে .
ভুজাবূর্ধ্ববিনিষ্ক্রান্তৌ হস্তৌ চাভি ( ধো )মুখাঙ্গুলী .. ১৪৫..
বদ্ধা চারী তথ চৈব নিতম্বে করণে ভবেত্ .
দোলাপাদক্রমং কৃত্বা হস্তৌ তদনুগাবুভৌঅ .. ১৪৬..
রেচিতৌ ঘূর্ণিতৌ বাপি স্খলিতং করণং ভবেত্ .
একো বক্ষঃস্থিতো হস্তঃ প্রোদ্বেষ্টিততলোঽপরঃ .. ১৪৭..
অঞ্চিতশ্চরণশ্চৈব প্রযোজ্যঃ করিহস্তকে .
একস্তু রেচিতো হস্তো লতাখ্যস্তু তথা পরঃ .. ১৪৮..
প্রসর্পিততলৌ পাদৌ প্রসর্পিতকমেব তত্ .
অলাতং চ পুরঃকৃত্বা দ্বিতীযং চ দ্রুতক্রমম্ .. ১৪৯..
হস্তৌ পাদানুগৌ চাপি সিংহবিক্রীডিতে স্মৃতৌ .
পৃষ্ঠপ্রসর্পিতঃ পাদস্তথা হস্তৌ নিকুঞ্চিতৌ .. ১৫০..
পুনস্তথৈব কর্তব্যৌ সিংহাকর্ষ্তকে দ্বিজাঃ .
আক্ষিপ্তহস্তমাক্ষিপ্তদেহমাক্ষিপ্তপাদকম্ .. ১৫১..
অদ্বৃত্তগাত্রমিত্যেতদুদ্বৃতাং করণং স্মৃতম্ .
আক্ষিপ্তচরণশ্চৈকো হস্তৌ তস্যৈব চানুগৌ .. ১৫২..
আনতং চ তথ গাত্রং তযোপসৃতকং ভবেত্
দোলাপাদক্রমং কৃত্বা তলসঙ্ঘট্টিতৌ করৌ .. ১৫৩..
রেচযেচ্চ করং বামং তলসঙ্ঘট্টিতে সদা .
একো বক্ষঃস্থিতো হস্তো দ্ব্তীযশ্চ প্রলম্বিতঃ .. ১৫৪..
তলাগ্রসংস্থিতঃ পাদো জনিতে করণে ভবেত্ .
জনিতং করণং কৃত্বা হস্তৌ চাভিমুখাঙ্গুলী .. ১৫৫..
শনৈর্নিপতিতো চৈব জ্ঞেযং তদবহিত্থকম্ .
করৌ বক্ষঃস্থিতৌ কার্যাবুরৌ নির্ভুগ্নমেব চ .. ১৫৬..
মণ্ডলস্থানকং চৈব নিবেশং করণং তু তত্ .
তলসঞ্চরপাদাভ্যামুত্প্লুত্য পতনং ভবেত্ ..১৫৭..
সংনতং বলিতং গাত্রমেলকাক্রীডিতং তু তত্ .
করমাবৃত্তকরণমূরুপৃষ্ঠেঽঞ্চিতং ন্যসেত্ .. ১৫৮..
জঙ্ঘাঞ্চিতা তথোদ্বৃত্তা হ্যূরূদ্বৃত্তং তু তদ্ভবেত্ .
করৌ প্রলম্বিতৌ কার্যো শিরশ্চ পরিবাহিতম্ .. ১৫৯..
পাদৌ চ বলিতাবিধ্দৌঅ মদস্খলিতকে দ্বিজাঃ .
পুরঃ প্রসারিতঃ পাদঃ কুঞ্চিতো গগনোন্মুখঃ .. ১৬০..
করৌ চ রেচিতৌ যত্র বিষ্ণুক্রান্তং তদুচ্যতে .
করমাবর্তিতং কৃত্বা হ্যূরুপৃষ্ঠে নিকুঞ্চযেত্ ..১৬১..
ঊরুশ্চৈব তথাবিদ্ধঃ সম্ভ্রান্তং করণং তু তত্ .
অপবিদ্ধঃ করঃ সূচ্যা পাদশ্চৈব নিকুট্টিতঃ .. ১৬২..
বক্ষঃস্থশ্চ করো বামো বিষ্কম্ভে করণে ভবেত্ .
পাদাবুদ্ধট্টিতৌ কার্যৌ তলসঙ্ঘট্টিতৌ করৌ .. ১৬৩..
নতশ্চ পার্শ্বং কর্তব্যং বুধৈরুদ্ধট্টিতে সদা .
প্রযুজ্যালাতকং পূর্বং হস্তৌ চাপি হি রেচযেত্ .. ১৬৪..
কুঞ্চিতাবঞ্চিতৌ চৈব বৃষভক্রীডিতে সদা .
রেচিতাবঞ্চিতৌ হস্তৌ লোলিতং বর্তিতং শিরঃ .. ১৬৫..
উভযোঃপার্শ্বযোর্যত্র তল্লোলিতমুদাহৃতম্ .
স্বস্তিকাপসৃতৌ পাদৌ শিরশ্চ পরিবাহিতম্.. ১৬৬..
রেচিতৌ চ তথা হস্তৌ স্যাতাং নাগাপসর্পিতে .
নিষণ্ণাঙ্গস্তু চরণং প্রসার্য তলসঞ্চরম্ .. ১৬৭..
উদ্বাহিতমুরঃ কৃত্বা শকটাস্যং প্রযোজযেত্ .
ঊর্ধ্বাঙ্গুলিতলৌ পাদৌ ত্রিপতাকাবধোমুখৌ .. ১৬৮..
হস্তৌ শিরস্সন্নতং চ গঙ্গাবতরণং ত্বিতি .
যানি স্থানানি যাশ্চার্যো ব্যাযামে কথিতানি তু .. ১৬৯..
পাদপ্রচারস্ত্বেষাং তু করণানামযং ভবেত্ .
যে চাপি নৃত্তহস্তাস্তু গদিতা নৃত্তকর্মণি .. ১৭০..
তেষাং সমাসতো যোগঃ করণেষু বিভাব্যতে .
প্রাযেণ করণে কার্যো বামো বক্ষঃস্থিতঃ করঃ .. ১৭১..
চরণশ্চানুগশ্চাপি দক্ষিণস্তু ভবেত্করঃ .
চার্যশ্চৈব তু যাঃ প্রোক্তা নৃত্তহস্তাস্তথৈব চ .. ১৭২..
সা মাতৃকেতি বিজ্ঞেযা তদ্ভেদাত্করণানি তু .
অষ্টোত্তরশতং হ্যেতত্করণানাং মযোদিতম্ .. ১৭৩..
অতঃ পরং প্রবক্ষ্যামি হ্যঙ্গহারবিকল্পনম্ .
প্রসার্যোত্ক্ষিপ্য চ করৌ সমপাদং প্রযোজযেত্ .. ১৭৪..
ব্যংসিতাপসৃতং সব্যং হস্তমূর্ধ্বং প্রসারযেত্ .
প্রত্যালীঢং ততঃ কুর্যাত্ তথৈব চ নিকুট্টকম্ .. ১৭৫..
ঊরূদ্বৃত্তং ততঃ কুর্যাদক্ষিপ্তং স্বস্তিকং ততঃ .
নিতম্বং করি হস্তং চ কটিচ্ছিন্নং চ যোগতঃ .. ১৭৬..
স্থিরহস্তো ভবেদেষ ত্বঙ্গহারো হরপ্রিযঃ .
তলপুষ্পাপবিদ্ধে দ্বে বর্তিতং সংনিকুট্টিকম্ .. ১৭৭..
ঊরূদ্বৃত্তং তথাক্ষিপ্তমুরোমণ্ডলমেব চ .
নিতম্বং করিহস্তং চ কটিচ্ছিন্নং তথৈব চ .. ১৭৮..
এষ পর্যস্তকো নাম হ্যঙ্গহারো হরোদ্ভবঃ .
অলপল্লবসূচীং চ কৃত্বা বিক্ষিপ্তমেব চ ..১৭৯..
আবর্তিতং ততঃ কুর্যাত্তথৈঅব চ নিকুট্টকম্ .
ঊরূদ্বৃত্তং তথাক্ষিপ্তমুরোমণ্ডলমেব চ .. ১৮৯..
করিহস্তং কটিচ্ছিন্নং সূচীবিদ্ধো ভবেদযম্ .
অপবিদ্ধং তু করণং সূচীবিদ্ধং তথৈব চ .. ১৮১..
উদ্বেষ্টিতেন হস্তেন ত্রিকং তু পরিবর্তযেত্ .
উরোমণ্ডলকৌ হস্তৌ কটিচ্ছিন্নং তথৈব চ .. ১৮২..
অপবিদ্ধোঽঙ্গহারাশ্চ বিজ্ঞেযোঽযং প্রযোক্তৃভিঃ .
করণং নূপুরং কৃত্বা বিক্ষিপ্তালাতকে পুনঃ .. ১৮৩..
পুনরাক্ষিপ্তকং কুর্যাদুরোমণ্ডলকং তথা .
নিতম্বং করিহস্তং চ কটিচ্ছিন্নং তথৈব চ .. ১৮৪..
আক্ষিপ্তকঃ স বিজ্ঞেযো হ্যঙ্গহারঃ প্রযোক্তৃভিঃ .
উদ্বেষ্টিতাপবিদ্ধস্তু করঃ পাদো নিকুট্টিতঃ .. ১৮৫..
পুনস্তৈনৈব যোগেন বামপার্শ্বে ভবেদথ .
উরোমণ্ডলকৌ হস্তৌ নিতম্বং করিহস্তকম্ .. ১৮৬
কর্তব্যং সকটিচ্ছিন্নং নৃত্যে তূদ্ধট্টিতে সদা .
পর্যাযোদ্বেষ্টিতৌ হস্তৌ পাদৌ চৈব নিকুট্টিতৌ .. ১৮৭..
কুঞ্চিতাবঞ্চিতৌঅ চৈব হ্যূরূদ্বৃত্তং তথৈব চ .
চতুরশ্রং করং কৃত্বা পাদেন চ নিকুট্টকম্ .. ১৮৮..
ভুজঙ্গত্রাসিতং চৈব করং চোদ্বিষ্টিতং পুনঃ .
পরিচ্ছিন্নং চ কর্তব্যং ত্রিকং ভ্রমরকেণ তু .. ১৮৯..
করিহস্তং কটিচ্ছিন্নং বিষ্কম্ভে পরিকীর্তিতম্ .
দণ্ডপাদং করং চৈব বিক্ষিপ্যাক্ষিপ্য চৈব হি .. ১৯০..
ব্যংসিতং বামহস্তং চ সহ পাদেন সর্পযেত্ .
নিকুট্টকদ্বযং কার্যমাক্ষিপ্তং মণ্ডলোরসি .. ১৯১..
করিহস্তং কটিচ্ছিন্নং কর্তব্যমপরাজিতে .
কুট্টিতং করণং কৃত্বা ভুজঙ্গত্রাসিতং তথা .. ১৯২..
রেচিতেন তু হস্তেন পতাকং হস্তমাদিশেত্ .
আক্ষিপ্তকং প্রযুঞ্জীত হ্যুরোমণ্ডলকং তথা .. ১৯৩..
লতাখ্যং সকটকচ্ছিন্নং বিষ্কম্ভাপসৃতে ভবেত্ .
ত্রিকং সুবলিতং কৃত্বা নূপুরং করণং তথা .. ১৯৪..
ভুজঙ্গত্রাসিতং সব্যং তথা বৈশাখরেচিতম্ .
আক্ষিপ্তকং ততঃ কৃত্বা পরিচ্ছিন্নং তথৈব চ .. ১৯৫..
বাহ্যভ্রমরকং কুর্যাদুরোমণ্ডলমেব চ .
নিতম্বং করিহস্তং চ কটিচ্ছিন্নং তথৈব চ .. ১৯৬..
মত্তাক্রীডো ভবেদেষ হ্যঙ্গহারো হরপ্রিযঃ .
রেচিতং হস্তপাদং চ কৃত্বা বৃশ্চিকমেব চ .. ১৯৭..
পুনস্তেনৈব যোগেন বৃশ্চিকং সম্প্রযোজযেত্ .
নিকুট্টকং তথা চৈব সব্যাসব্যকৃতং ক্রমাত্ ..১৯৮..
লতাখ্যঃ সকটিচ্ছেদো ভবেত্স্বস্তিকরেচিতে .
পার্শ্বে তু স্বস্তিকং বদ্ধ্বা কার্যং ত্বথ নিকুট্টকম্ .. ১৯৯..
দ্বিতীযস্য চ পার্শ্বস্য বিধিঃ স্যাদ্যমেব হি .
ততশ্চ করমাবর্ত্য হ্যূরূপৃষ্ঠে নিপাতযেত্ .. ২০০..