নাট্যশাস্ত্রম্ অধ্যায ০৯ – ২

মধ্যমাঙ্গুষ্ঠসন্দংশো বক্রা চৈব প্রদেশিনী .
ঊর্ধ্বমন্যে প্রকীর্ণে চ দ্ব্যঙ্গুল্যৌ ভ্রমরে করে .. ১০১..
পদ্মোত্পলকুমুদানামন্যেষাং চৈব দীর্ঘবৃন্তানাম্ .
পুষ্পাণাং গ্রহণবিধিঃ কর্তব্যঃ কর্ণপুরশ্চ .. ১০২..
বিচ্যুতশ্চ সশব্দশ্চ কার্যো নির্ভত্সনাদিষু .
বালালাপে চ শীঘ্রে চ তালে বিশ্বাসনে তথা .. ১০৩..
তর্জনীমধ্যমাঙ্গুষ্ঠাস্ত্রেতাগ্নিস্থা নিরন্তরাঃ .
ভবেযুর্হংসবক্ত্রস্য শেষে দ্বে সম্প্রসারিতে .. ১০৪..
শ্লক্ষ্ণাল্পশিথিললাঘবনিস্সারার্থে মৃদুত্বযোগেষু .
কার্যোঽভিনযবিশেষঃ কিঞ্চিত্প্রস্যন্দিতাগ্রেণ .. ১০৫..
সমাঃ প্রসারিতাস্তিস্রস্তথা চোর্ধ্বা কনীযসী .
অঙ্গুষ্ঠঃ কুঞ্চিতশ্চৈব হংসপক্ষ ইতি স্মৃতঃ .. ১০৬..
এষ চ নিবাপসলিলে দাতব্যে গণ্ডসংশ্রযে চৈব .
কার্যঃ প্রতিগ্রহাচমনভোজনার্থেষু বিপ্রাণাম্ .. ১০৭..
আলিঙ্গনে মহাস্তম্ভদর্শনে রোমহর্ষণে চৈব .
স্পর্শেঽনুলেপনার্থে যোজ্যঃ সংবাহনে চৈব .. ১০৮..
পুনরেব চ নারীণাং স্তনান্তরস্থেন বিভ্রমবিশেষাঃ .
কার্যা যথারসং স্যুর্দুঃখে হনুধারণে চৈব .. ১০৯..
তর্জন্যঙ্গুষ্ঠসন্দংশস্ত্ব হ্যরালস্য যথা ভবেত্ .
আভুগ্নতলমধ্যস্থঃ স সন্দংশ ইতি স্মৃতঃ .. ১১০..
সন্দংশস্ত্রিবিধো জ্ঞেয হ্যগ্রজো মুখজস্তথা .
তথা পার্শ্বগতশ্চৈব রসভাবোপবৃংহিতঃ .. ১১১..
পুষ্পাপচযগ্রথনে গ্রহণে তৃণপর্ণকেশসূত্রাণাম্ .
শল্যাবযবগ্রহণাপকর্ষণে চাগ্রসন্দংশঃ .. ১১২..
বৃন্তাত্ পুষ্পোদ্ধরণং বর্তিশলাকাদিপূরণং চৈঅব .
ধিগিতি চ বচনং রোষে মুখসন্দংশস্য কর্মাণি .. ১১৩..
যজ্ঞোপবীতধারণবেধনগুণসূক্ষ্মবাণলক্ষ্যেষু .
যোগে ধ্যানে স্তোকে সংযুক্তকরণস্তু কর্তব্যঃ .. ১১৪..
পেশলকুত্সাসূযাদোষবচনে চ বামহস্তেন .
কিঞ্চিদ্ বিবর্তিতকরাগ্রঃ প্রযুজ্যতে পার্শ্বসন্দংশঃ .. ১১৫..
আলেখ্যনেত্ররঞ্জনবিতর্কবন্তপ্রবালরচনে চ .
নিষ্পীডনং তথালক্তকস্য কার্য চ নারীভিঃ .. ১১৬..
সমাগতাগ্রাঃ সহিতা যস্যাঙ্গুল্যো ভবন্তি হি .
ঊর্ধ্বা হংসমুখস্যেব স ভবেন্মুকুলঃ করঃ .. ১১৭..
দেবার্চ্চনবলিকরণে পদ্মোত্পলকুমুদরূপণে চৈব .
বিটচুম্বনে চ কার্যো বিকুত্সিতে বিপ্রকীর্ণশ্চ .. ১১৮..
ভোজনহিরণ্যগণনামুখসংকোচপ্রদানশীঘ্রেষু .
মুকুলিতকুসুমেষু চ তথা তজ্জ্ঞৈরেষ প্রযোক্তব্যঃ .. ১১৯..
পদ্মকোশস্য হস্তস্য হ্যঙ্গুল্যঃ কুঞ্চিতা যদা .
ঊর্ণনাভঃ স বিজ্ঞেযঃ কেশচৌর্যগ্রহাদিষু .. ১২০..
শিরঃ কণ্ডূযনে চৈব কুষ্ঠব্যাধিনিরূপণে .
সংহব্যাঘ্রেষ্বভিনযঃ প্রস্তরগ্রহণে তথা .. ১২১..
মধ্যমাঙ্গুষ্ঠসন্দংশো বক্রা চৈব প্রদেশিনী .
শেষে তলস্থে কর্তব্যে তাম্রচূলকরেঽঙ্গুলী .. ১২২..
বিচ্যুতশ্চ সশব্দশ্চ কার্যো নির্ভত্সনাদিষু .
তালে বিশ্বসনে চৈব শীঘ্রার্থে সংজ্ঞিতেষু চ .. ১২৩..
তথা কলাসু কাষ্ঠাসু নিমেষে তু ক্ষণে তথা .
এশ এব করঃ কার্যো বালালাপনিমন্ত্রণে .. ১২৪..
অথবা অঙ্গুল্যঃ সংহিতা বক্রা উপর্যুঙ্গুষ্ঠপীডিতাঃ .
প্রসারিতা কনীষ্ঠাচ তাম্রচূডঃ করঃ স্মৃতঃ .. ১২৫..
শতং সহস্রং লক্ষং চ করেণৈকেন যোজযেত্ .
ক্ষিপ্রমুক্তাঙ্গুলীভিস্তু স্ফুলিঙ্গান্ বিপ্রুষস্তথা .. ১২৬..
অসংযুতাঃ করা হ্যেতে মযা প্রোক্তা দ্বিজোত্তমাঃ .
অতশ্চ সংযুতান্ হস্তান্ গদতো মে নিবোধত .. ১২৭..
পতাকাভ্যাং তু হস্তাভ্যাং সংশ্লেষাদঞ্জলিঃ স্মৃতঃ .
দেবতানাং গুরূণাং চ মিত্রাণাং চাভিবাদনে .. ১২৮..
স্থানান্যস্য পুনস্ত্রীণি বক্ষো বক্ত্রং শিরস্তথা .
দেবতানাং শিরঃস্থস্তু গুরূণামাস্যসংস্থিতঃ .
বক্ষস্থশ্চৈব মিত্রাণাং স্ত্রীণাং ত্বনিযতো ভবেত্ .. ১২৯..
উভাভ্যামপি হস্তাভ্যামন্যোঽন্যং পার্শ্বসংগ্রহাত্ .
হস্তঃ কপোতকো নাম কর্ম চাস্য নিবোধত .. ১৩০..
এষ বিনযাভ্যুপগমে প্রণামকরণে গুরোশ্চ সম্ভাষে .
শীতে ভযে চ কার্যো বক্ষঃস্থঃ কম্পিতঃ স্ত্রীভিঃ .. ১৩১..
অযমেবাঙ্গুলিপরিঘৃষ্যমাণমুক্তস্তু খিন্নবাক্যেষু .
এতাবদিতি চ কার্যো নেদানীং কৃত্যমিতি চার্থে .. ১৩২..
অঙ্গুল্যো যস্য হস্তস্য হ্যন্যোন্যান্তরনিস্সৃতাঃ .
স কর্কট ইতি জ্ঞেযঃ করঃ কর্ম চ বক্ষ্যতে .. ১৩৩..
এষ মদনাঙ্গমর্দে সুপ্তোত্থিতবিজৃম্ভণে বৃহদ্দেহে .
হনুধারণে চ যোজ্যঃ শঙ্খগ্রহণেঽর্থতত্ত্বজ্ঞৈঃ .. ১৩৪..
মণিবন্ধবিন্যস্তাবরালৌ স্ত্রীপ্রযোজিতৌ .
উত্তানৌ বামপার্শ্বস্থৌ স্বস্তিকঃ পরিকীর্তিতঃ .. ১৩৫..
স্বস্তিকবিচ্যুইতিকরণাদ্ দিশো ঘনাঃ খং বনং সমুদ্রাশ্চ .
ঋতবো মহী তথৌঘং বিস্তীর্ণং চাভিনেযং স্যাত্ .. ১৩৬..
খটকঃ খটকে ন্যস্তঃ খটকাবর্ধমানকঃ .
শৃঙ্গারার্থেষু যোক্তব্যঃ প্রণামকরণে তথা .. ১৩৭..
অন্যে – কুমুদীতালবৃন্তেষু কর্তব্যশ্ছত্রধরণে . ইতি .. ১৩৮..
অরালৌ তু বিপর্যস্তাবুত্তানৌ বর্ধমানকৌ .
উত্সঙ্গ ইতি বিজ্ঞেযঃ স্পর্শস্য গ্রহণে করঃ .. ১৩৯..
সনিষ্পেষকৃতে চৈব রোমামর্ষকৃতেঽপি চ .
নিষ্পীডিতঃ পুনশ্চৈব স্ত্রীণামীর্ষ্যাকৃতে ভবেত্ .. ১৪০..
মুকুলং তু যদা হস্তং কপিত্থঃ পরিচেষ্টযেত্ .
স মন্তব্যস্তদা হস্তো নিষধৌ নাম নামতঃ .. ১৪১..
সংগ্রহপরিগ্রহৌ ধারণং চ সমযশ্চ সত্যবচনং চ .
সঙ্ক্ষেপঃ সংক্ষিপ্তং নিপীডিতেনাভিনেতব্যম্ .. ১৪২..
শিখরস্তু যদা হস্তো মৃগশীর্ষেণ পীডিতঃ .
নিষধো নাম বিজ্ঞেযঃ স ভযার্তে বিধীযতে .. ১৪৩..
গৃহীত্বাঅ বামহস্তেন কর্পুরাভ্যন্তরে ভুজম্ .
দক্ষিণং চাপি বামস্য কর্পুরাভ্যন্তরে ন্যসেত্ .. ১৪৪..
স চাপি দক্ষিণো হস্তঃ সম্যঙ্ মুষ্টীকৃতো ভবেত্ .
ইত্যেষ নিষধো হস্তঃ কর্ম চাস্য নিবোধত .. ১৪৫..
এতেন ধৈর্যমদগর্বসৌষ্ঠবৌত্সুক্যবিক্রমাটোপাঃ .
অভিমানাবষ্টম্ভঃ স্তম্ভস্থৈর্যাদয কার্যাঃ .. ১৪৬..
জ্ঞেযো বৈ নিষধো নাম হংসপক্ষৌ পরাঙ্গমুখৌ .
জালবাতাযনাদীনাং প্রযোক্তব্যোঽভিঘট্টনে .. ১৪৭..
অংসৌ প্রশিথিলৌ মুক্তৌ পতাকৌ তু প্রলম্বিতৌ .
যদা ভবেতাং করণে স দোল ইতি সংজ্ঞিতঃ .. ১৪৮..
সংভ্রমবিষাদমূর্চ্ছিতমদাভিঘাতে তথৈব চাঽবেগে .
ব্যাধিপ্লুতে চ শস্ত্রক্ষতে চ কার্যোঽভিনযোগঃ .. ১৪৯..
যস্তু সর্পশিরাঃ প্রোক্তস্তস্যাঙ্গুলিনিরন্তরঃ .
দ্বিতীযঃ পার্শ্বসংশ্লিষ্টঃ স তু পুষ্পপুটঃ স্মৃতঃ .. ১৫০..
ধান্যফলপুষ্পসদৃশান্যনেন নানাবিধানি যুক্তানি .
গ্রাহ্যাণ্যুপনেযানি চ তোযানযনাপনযনে চ .. ১৫১..
পতাকৌ তু যদা হস্তাবূর্র্ধাঙ্গুষ্ঠাবধোমুখৌ .
উপর্যুপরি বিন্যস্তৌ তদা স মকরঃ করঃ .. ১৫২..
সিংহব্যালদ্বিপিপ্রদর্শনং নক্রমকরমত্স্যানাম্ .
যে চান্যে ক্রব্যাদা হ্যভিনেযাস্তেঽর্থযোগেন .. ১৫৩..
কূর্পরাংসোচিতৌ হস্তৌ যদাস্তাং সর্পশীর্ষকৌ .
গজদন্তঃ স বিজ্ঞেযঃ কর্ম চাস্য নিবোধত.. ১৫৪..
এব চ বধুবরাণমুদ্বাহে চাতিভারযোগে চ .
স্তংভগ্রহণে চ তথা শৈলশিলোত্পাটনে চৈব .. ১৫৫..
শুকতুণ্ডৌ করৌ কৃত্বা বক্ষস্যভিমুখাঞ্চিতৌ .
শনৈরধোমুখাবিদ্ধৌ সোঽবহিত্থ ইতি স্মৃতঃ .. ১৫৬..
দৌর্বল্যে নিঃশ্বসিতে গাত্রাণাং দর্শনে তনুত্বে চ .
উত্কণ্ঠিতে চ তজ্জ্ঞৈরভিনযযোগস্তু কর্তব্যঃ .. ১৫৭..
মুকুলস্তু যদা হস্তঃ কপিত্থপরিবেষ্টিতঃ .
বর্ধমানঃ স বিজ্ঞেযঃ কর্ম চাস্য নিবোধত .. ১৫৮..
সংগ্রহপরিগ্রহৌ ধারণং চ সমযশ্চ সত্যবচং চ .
সংক্ষেপতস্তু সংক্ষিপ্তং নিপীডিতেনাভিনেতব্যম্ .. ১৫৯..
জ্ঞেযো বৈ বর্ধমানস্তু হংসপক্ষো পরাঙ্গমুখৌ .
জালবাতাযনাদীনাং প্রযোক্তব্যো বিঘাটনে .. ১৬০..
উক্তা হ্যেতে দ্বিবিধা হ্যসংযুতাঃ সংযুতাশ্চ সংক্ষেপাত্ .
অভিনযকরাস্তু যে ত্বিহ তেঽন্যত্রাপ্যর্থতঃ সাধ্যাঃ .. ১৬১..
আকৃত্যা চেষ্টযা চিহ্নৈর্জাত্যা বিজ্ঞায তত্পুনঃ .
স্বযং বিতর্ক্য কর্তব্যং হস্তাভিনযনং বুধৈঃ .. ১৬২..
নাস্তি কশ্চিদহস্তস্তু নাট্যেঽর্থোঽভিনযং প্রতি .
যস্য যদ্ দৃশ্যতে রূপং বহুশস্তন্মযোষিতম্ ..১৬৩..
অন্যে চাপ্যর্থসংযুক্তা লৌকিকা যে করাস্ত্বিহ .
ছন্দতস্তে নিযোক্তব্যা রসভাববিচেষ্টিতৈঃ .. ১৬৪..
দেশং কালং প্রযোগং চাপ্যর্থযুক্তিমবেক্ষ্য চ .
হস্তা হ্যেতে প্রযোক্তব্যাঃ নৃণাং স্ত্রীণাং বিশেষতঃ .. ১৬৫..
সর্বেষামেব হস্তানাং যানি কর্মাণি সন্তি হি .
তান্যহং সংপ্রবক্ষ্যামি রসভাবকৃতানি তু .. ১৬৬..
উত্কর্ষণং বিকর্ষণং তথা চৈবাপকর্ষণম্ .
পরিগ্রহো নিগ্রহশ্চাহ্বানং নোদনমেব চ .. ১৬৭..
সংশ্লেষশ্চ বিযোগশ্চ রক্ষণং মোক্ষণং তথা .
বিক্ষেপধূননে চৈব বিসর্গস্তর্জনং তথা .. ১৬৮..
ছেদনং ভেদনং চৈব স্ফোটনং মোটনং তথা .
তাডনং চেতি বিজ্ঞেযং তজ্জ্ঞৈঃ কর্ম করান্ প্রতি .. ১৬৯..
উত্তানঃ পার্শ্বগশ্চৈব তথাঽধোমুখ এব চ .
হস্তপ্রচারস্ত্রিবিধো নাট্যতত্ত্বসমাশ্রযঃ .. ১৭০..
সর্বে হস্তপ্রচারাশ্চ প্রযোগেষু যথাবিধিঃ
নেত্রভ্রূমুখরাগৈশ্চ কর্তব্যা ব্যঞ্জিঅতা বুধৈঃ .. ১৭১..
করণং কর্ম স্থানং প্রচাযুক্তিং ক্রিযাং চ সংপ্রেক্ষ্য .
হস্তাভিনযতজ্জ্ঞৈঃ কার্যো লোকোপচারেণ .. ১৭২..
উত্তামানাং করাঃ কার্যা ললাটক্ষেত্রচারিণঃ .
বক্ষঃস্থাশ্চৈব মধ্যানামধমামধোগতা .. ১৭৩..
জ্যেষ্ঠে স্বল্পপ্রচারাঃ স্যুর্মধ্যে মধ্যবিচারিণঃ .
অধমেষু প্রকীর্ণাশ্চ হস্তাঃ কার্যা প্রযোক্তৃভিঃ .. ১৭৪..
লক্ষণব্যঞ্জিতা হস্তাঃ কার্যাস্তূত্তমমধ্যমৈঃ .
লোকক্রিযাস্বভাবেন নীচৈরপ্যর্থসংশ্রযাঃ .. ১৭৫..
অথবান্যাদৃশং প্রাপ্য প্রযোগং কালমেব চ .
বিপরীতাশ্রযা হস্তাঃ প্রযোক্তব্যা বুধৈর্ন বা .. ১৭৬..
বিষণ্ণে মূর্চ্ছিতে ভীতে জুগুপ্সাশোকপীডিতে .
গ্লানে স্বপ্নে বিহস্তে চ নিশ্চেষ্টে তন্দ্রিতে জডে .. ১৭৭..
ব্যাধিগ্রস্তে জরার্তে চ ভযার্তে শীতবিপ্লুতে .
মত্তে প্রমত্তে চোন্মত্তে চিন্তাযাং তপসি স্থিতে .. ১৭৮..
হিমবর্ষহতে বদ্ধে বরিণাপ্লবসংশ্রিতে .
স্বপ্নাযিতে চ সংভ্রান্তে নতসংস্ফোটনে তথা .. ১৭৯..
ন হস্তাভিনযঃ কার্যঃ কার্যঃ সত্ত্বস্য সংগ্রহঃ .
তথা কাকুবিশেষশ্চ নানাভবরসান্বিতঃ .. ১৮০..
যত্র ব্যগ্রাঅবুভৌ হস্তৌ তত্তদ্ দৃষ্টিবিলোকনৈঃ .
বাচকাভিনযং কুর্যাদ্বিরামৈর্থদর্শকৈঃ .. ১৮১..
উত্তানঃ পার্শ্বগশ্চৈব তথাঽধোমুখ এব চ .
প্রচারস্ত্রিবিধোঽঙ্গানাং নাট্যনৃত্তসমাশ্রযঃ .. ১৮২..
উত্তানো বর্তুলস্ত্র্যশ্রঃ স্থিতোঽধোমুখ এব চ .
পঞ্চ প্রকারা হস্তস্য নাট্যনৃত্তসমাশ্রযাঃ .. ১৮৩..
এবং জ্ঞেযাঃ করা হ্যেতে নাভিনযসংশ্রিতাঃ .
অত ঊর্ধ্বং প্রবক্ষ্যামি হস্তান্ নৃত্তসমাশ্রযান্ .. ১৮৪..
বক্ষসোঽষ্টাঙ্গুলস্থৌ তু প্রাঙ্মুখৌ খটকামুখৌ .
সমানকূর্পরাংসৌ তু চতুরস্রৌ প্রকীর্তিতৌ .. ১৮৫..
হংসপক্ষকৃতৌ হস্তৌ ব্যাবৃতৌ তালবৃন্তবত্ .
উদ্বৃত্তাবিতি বিজ্ঞেযাবথবা তালবৃন্তকৌ .. ১৮৬..
চতুরস্ত্রস্থিতৌ হস্তৌ হংসপক্ষকৃতৌ তথা .
তির্যক্স্থিতৌ চাভিমুখৌ জ্ঞেযৌ তালমুখাবিতি .. ১৮৭..
তাবেব মণিবন্ধান্তে স্বস্তিকাকৃতিসংস্থিতৌ .
স্বস্তিকাবিতি বিখ্যাতৌ বিচ্যুতৌ বিপ্রকীর্ণকৌ .. ১৮৮..
অলপল্লবসংস্থানাবুর্ধ্বাস্যৌ পদ্মকোশকৌ .
অরালখটকাখ্যৌ চাপ্যরালখটকামুখৌ .. ১৮৯..
তথৈ মণিবন্ধান্তে হ্যরালৌ বিচ্যুতাবুভৌ .
জ্ঞেযৌ প্রযোক্তৃভির্নিত্যমরাল খটকাবিতি .. ১৯০..
ভুজাংসকূর্পরাগ্রৈস্তু কুটিলাবর্তিতৌ করৌ .
পরাঙ্গমুখতলাবিদ্ধৌ জ্ঞেযাবাবিদ্ধবক্রকৌ .. ১৯১..
হস্তৌ তু সর্পশিরসৌ মধ্যমাঙ্গুষ্ঠকৌ যদা .
তির্যক্প্রসারিতাস্যৌ চ তদা সূচীমুখৌ স্মৃতৌ .. ১৯২..
সর্পশীর্ষৌ যদা হস্তৌ ভবেতাং স্বস্তিকস্থিতৌ .
মধ্যপ্রসারিতাঙ্গুষ্ঠৌ জ্ঞেযৌ সূচীমুখৌ তদা .. ১৯৩..
রেচিতৌ চাপি বিজ্ঞেযৌ হংসপক্ষৌ দ্রুতভ্রমৌ .
প্রসারিতোত্তানতলৌ রেচিতাবিতি সংজ্ঞিতৌ .. ১৯৪..
চতুরস্রো ভবেদ্বামঃ সব্যহস্তশ্চ রেচিতঃ .
বিজ্ঞেযৌ নৃত্ততত্ত্বজ্ঞৈর্ধরেচিতসংজ্ঞকৌ .. ১৯৫..
অঞ্চিতৌ কূর্পরাংসৌ তু ত্রিপতাকৌ করৌ কৃতৌ .
কিঞ্চিত্তির্যগ্গতাবেতৌ স্মৃতাবুত্তনবঞ্চিতৌ .. ১৯৬..
মণিবন্ধমুক্তৌ তু পতাকৌ পল্লবৌ স্মৃতৌ .
বাহুশীর্ষাদ্বিনিষ্ক্রান্তৌ নিতম্বাবিতি কীর্তিতৌ .. ১৯৭..
কেশদেশাদ্বিনিষ্ক্রান্তৌ পরিপার্শ্বোত্থিতৌ যদা .
বিজ্ঞেযো কেশবন্ধৌ তু করবাচার্যসম্মতৌ .. ১৯৮..
তির্যক্প্রসারিতৌ চৈব পার্শ্বসংস্থৌ তথৈব চ .
লতাখ্যৌ চ করৌ জ্ঞেযৌ নৃত্তাভিনযনং প্রতি .. ১৯৯..
সমুন্নতো লতাহস্তঃ পার্শ্বাত্পার্শ্ব বিলোলিতঃ .
ত্রিপতাকোঽপরঃ কর্ণে করিহস্তঃ প্রকীর্তিতঃ .. ২০০..