নাট্যশাস্ত্রম্ অধ্যায ০৮

.. নাট্যশাস্ত্রম্ অধ্যায ৮ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অষ্টমোঽধ্যাযঃ

ঋষযঃ ঊচুঃ .
ভাবানাং চ রসাআং চ সমুত্থানং যথাক্রমম্ .
ত্বত্প্রসাদাচ্ছ্রুতং সর্বমিচ্ছামো বেদিতুং পুনঃ ..১..
নাট্যে কতিবিধঃ কার্যঃ তজ্জ্ঞৈরভিনযক্রমঃ .
কতং বাভিনযো হ্যেষ কতিভেদস্তু কীর্তিতঃ .. ২..
সর্বমেতদ্যথাতত্ত্বং কথযস্ব মহামুনে .
যো যথাভিনযো যস্মিন্ যোক্তব্যঃ সিদ্ধিমিচ্ছতা .. ৩..
তেষাং তু বচনং শ্রুত্বা মুনীনাং ভরতো মুনিঃ .
প্রত্যুবাচ পুনর্বাক্যং চতুরোঽভিনযান্ প্রতি .. ৪..
অহং বঃ কথযিষ্যামি নিখিলেন তপোধনাঃ .
যস্মাদভিনযো হ্যেষ বিধিবত্ সমুদাহৃতম্ .. ৫..
যদুক্তং চত্বারোঽভিনয ইতি তান্ বর্ণযিষ্যামঃ . অত্রাহ –অভিনয ইতি কস্মাত্ . অত্রোচ্যতে –অভীত্যুপসর্গঃ ণীঞ্ ইতি প্রাপণার্থকো ধাতুঃ . অস্যাভিনীত্যেবং ব্যবস্থিতস্য এরজিত্যচ্প্রত্যত্যযান্তস্যাভিনয ইত্যেবং রূপং সিদ্ধম্ . এতচ্চ ধাত্বর্থানুবচনেনাবধার্যং ভবতি .
অত্র শ্লোকৌ —
অভিপূর্বস্তু ণীঞ্ ধাতুরাভিমুখ্যার্থনির্ণযে .
যস্মাত্পদার্থান্নযতি তস্মাদভিনযঃ স্মৃতঃ .. ৬..
বিভাবযতি যস্মাচ্চ নানার্থান্ হি প্রযোগতঃ .
শাখাঙ্গোপাঙ্গসংযুক্তস্তস্মাদভিনযঃ স্মৃতঃ .. ৭..
চতুর্বিধশ্চৈব ভবেন্নাট্যস্যাভিনযো দ্বিজাঃ .
অনেকভেদবাহূযং নাট্যং হ্যস্মিন্ প্রতিষ্ঠিতম্ .. ৮..
আঙ্গিকো বাঅচিকশ্চৈব হ্যাহার্যঃ সাত্ত্বিকস্তথা .
জ্ঞেযস্ত্বভিনযো বিপ্রাঃ চতুর্ধা পরিকল্পিতঃ .. ৯..
সাত্ত্বিকঃ পূর্বমুক্তস্তু ভাবৈশ্চ সহিতো মযা .
অঙ্গাভিনযমেবাদৌ গদতো মে নিবোধত .. ১০..
ত্রিবিধস্ত্বাঙ্গিকো দ্য্নেযঃ শারীরো মুখজস্তথা .
তথা চেষ্টাকৃতশ্চৈব শাখাঙ্গোপাঙ্গসংযুতঃ .. ১১..
শিরোহস্তকটীদক্ষঃ পার্শ্বপাদসমন্বিতঃ .
অঙ্গপ্রত্যঙ্গসংযুক্তঃ ষডঙ্গো নাট্যসংগ্রহঃ .. ১২..
তস্য শিরোহস্তোরঃপার্শ্বকটীপাদতঃ ষডঙ্গানি .
নেত্রভ্রূনাসাধরকপোলচিবুকান্যুপাঙ্গানি .. ১৩..
অস্য শাখা চ নৃত্তং চ তথৈবাঙ্কুর এব চ .
বস্তূন্যভিনযস্যেহ বিজ্ঞেযানি প্রযোক্তৃভিঃ .. ১৪..
আঙ্গিকস্তু ভবেচ্ছাখা হ্যঙ্কুরঃ সূচনা ভবেত্ .
অঙ্গহারবিনিষ্পন্নং নৃত্তং তু করণাশ্রযম্ .. ১৫..
মুখজেঽভিনযে বিপ্রা!নানাভাবরসাশ্রযে .
শিরসঃ প্রথমং কর্ম গদতো মে নিবোধত .. ১৬..
আকম্পিতং কম্পিতং চ ধূতং বিধুতমেব চ .
পরিবাহিতমাধূতমবধূতং তথাঞ্চিতম্ .. ১৭..
নিহঞ্চিতং পরাবৃত্তমুত্ক্ষিপ্তং চাপ্যধোগতম্ .
লোলিতং চৈব বিজ্ঞেযং ত্রযোদশবিধং শিরঃ .. ১৮..
শনৈরাকম্পনাদূর্ধ্বমধশ্চাকম্পিতং ভবেত্ .
দ্রুতং তদেব বহুশঃ কম্পিতং কম্পিতং শিরঃ .. ১৯..
ঋজুস্থিতস্য চোর্ধ্বাধঃ ক্ষেপাদাকম্পিতং ভবেত্ .
বহুশশ্চলিতং যচ্চ তত্কম্পিতমিহোচ্যতে .. ২০..
সংজ্ঞোপদেশপৃচ্ছাসু স্বভাবাভাষণে তথা .
নির্দেশাবাহনে চৈব ভবেদাকম্পিতং শিরঃ .. ২১..
রোষে বিতর্কে বিজ্ঞানে প্রতিজ্ঞানেঽথ তর্জনে .
প্রশ্নাতিশযবাক্যেষু শিরঃ কম্পিতমিষ্যতে .. ২২..
শিরসো রেচনং যত্তু শনৈস্তদ্ ধুতমিষ্যতে .
দ্রুতমারেচনাদেতদ্বিধুতং তু ভবেচ্ছিরঃ..২৩..
অনীপ্সিতে বিষাদে চ বিস্মযে প্রত্যযং তথা .
পার্শ্বাবলোকনে শূন্যে প্রতিষেধে ধুতং শিরঃ .. ২৪..
শীতগ্রস্তে ভযার্তে চ ত্রাসিতে জ্বরিতে তথা .
পীতমাত্রে তথা মদ্যে বিধুতং তু ভবেচ্ছিরঃ .. ২৫..
পর্যাযশঃ পার্শ্বগতং শিরঃ স্যাত্ পরিবাহিতম্ .
আধূতমুচ্যতে তির্যক্ সকৃদুদ্বাহিতং তু যত্ .. ২৬..
সাধনে বিস্মযে হর্ষে স্মিতে চামর্ষিতে তথা .
বিচারে বিহৃতে চৈব লীলাযাং পরিবাহিতম্ .. ২৭..
গর্বেচ্ছাদর্শনে চৈব পার্শ্বস্থোর্ধ্বনিরীক্ষণে
আধুতং তু শিরো জ্ঞেযমাত্মসম্ভাবনাদিষু .. ২৮..
যদধঃ সকৃদাক্ষিপ্তমবধূতং তু তচ্ছিরঃ .
সন্দেশাবাহনালাপসংজ্ঞাদিষু নদিষ্যতে .. ২৯..
কিঞ্চিত্ পার্শ্বনতগ্রীবং শিরো বিজ্ঞেযমঞ্চিতম্ .
ব্যাধিতে মূর্ছিতে মত্তে চিন্তাযাং হনুধারণম্ .. ৩০..
উত্ক্ষিপাংসাবসক্তং যত্কুঞ্চিতভ্রূলতং শিরঃ .
নিহঞ্চিতং তু বিজ্ঞেযং স্ত্রীণামেতত্ প্রযোজযেত্ .. ৩১..
গর্বে মানে বিলাসে চ বিব্বোকে কিলকিঞ্চিতে .
মোট্টাযিতে কুট্টমিতে স্তম্ভমানে নিহঞ্চিতম্ .. ৩২..
পরাবৃত্তানুকরণাত্ পরাবৃত্তমিহোচ্যতে .
তত্ স্যান্মুখাপহরণে পৃষ্ঠতঃ প্রেক্ষণাদিষু .. ৩৩..
উত্ক্ষিপ্তং চাপি বিজ্ঞেযমুন্মুখাবস্থিতং শিরঃ .
প্রাংশুদিব্যাস্ত্রযোগেষু স্যাদুত্ক্ষিপ্তং প্রযোগতঃ .. ৩৪..
অধোমুখং স্থিতং চাপি বুধাঃ প্রাহুরধোগতম্ .
লজ্জাযাং চ প্রণামে চ দুঃখে চাধোগতং শিরঃ .. ৩৫..
সর্বতো ভ্রমণাচ্চৈব শিরঃ স্যাত্ পরিলোলিতম্ .
মূর্চ্ছাব্যাধিমদাবেশগ্রহনিদ্রাদিষু স্মৃতম্ ..৩৬..
ঋজুস্বভাবসংস্থানং প্রাকৃতং তু স্বভাবজম্ .
মংগল্যাধ্যযনধ্যানস্বভাবজযকর্মসু .. ৩৭..
এভ্যোঽন্যে বহবো ভেদা লোকাভিনযসংশ্রিতাঃ .
তে চ লোকস্বভাবেন প্রযোক্তব্যা প্রযোক্তৃভিঃ .. ৩৮..
ত্রযোদশবিধং হ্যেতচ্ছিরঃকর্ম মযোদিতম্ .
অতঃ পরং প্রবক্ষ্যামি দৃষ্টীনামিহ লক্ষণম্ .. ৩৯..
কান্তা ভযানকা হাস্যা করুণা চাদ্ভুতা তথা .
রৌদ্রো বীরা চ বীভত্সা বিজ্ঞেযা রসদৃষ্টযঃ .. ৪০..
স্নিগ্ধা হৃষ্টা চ দীনা চ ক্রুদ্ধা দৃপ্তা ভযান্বিতা .
জুগুপ্সিতা বিস্মিতা চ স্থাযিভাবেষু দৃষ্টযঃ .. ৪১..
শূন্যা চ মলিনা চৈব শ্রান্তা লজ্জান্বিতা তথা .
গ্লানা চ শঙ্কিতা চৈব বিষণ্ণা মুকুলা তথা .. ৪২..
কুঞ্চিতা চাভিতপ্তা চ জিহ্মা সললিতা তথা .
বিতর্কিতার্ধমুকুলা বিভ্রান্তা বিলুপ্তা তথা .. ৪৩..
আকেকরা বিকোশা চ ত্রস্তা চ মদিরা তথা .
ষট্ত্রিংশদ্ দৃষ্টযো হ্যেতা তাসু নাট্যং প্রতিষ্ঠিতম্ .. ৪৪..
অস্য দৃষ্টিবিধানস্য নানাভাবরসাশ্রযম্ .
লক্ষণং সম্প্রবক্ষ্যমি যথাকর্ম প্রযোগতঃ .. ৪৫..
হর্ষপ্রসাদজনিতা কান্তাত্যর্থং সমন্যথা .
সভ্রূক্ষেপকটাক্ষা চ শৃঙ্গারে দৃষ্টিরিক্ষ্যতে .. ৪৬..
প্রোদ্বৃত্তনিষ্টব্ধপুটা স্ফুরদুদ্বৃত্ততারকা .
দৃষ্টির্ভযানাকাত্যর্থং ভীতা জ্ঞেযা ভযানকে .. ৪৭..
ক্রমাদাকুঞ্চিতপুটা বিভ্রান্তাকুলতারকা .
হাস্যা দৃষ্টিস্তু কর্তব্যা কুহকাভিনযং প্রতি .. ৪৮..
পতিতোর্ধ্বপুটা সাস্রা মন্যুমন্থরতারকা .
নাসাগ্রানুগতা দৃষ্টিঃ করুণা করুণে রসে .. ৪৯..
যা ত্বাকুঞ্চিতপক্ষ্মাগ্রা সাশ্চর্যোদ্ধত্ততারকা .
সৌম্যা বিকসিতান্তা চ সাদ্ভুতা দৃষ্টিরদ্ভুতে.. ৫০
ক্রূরা রূক্ষারুণোদ্বৃতনিষ্টব্ধপুটতারকা .
ভ্রুকুটীকুটিলা দৃষ্টিঃ রৌদ্রে রৌদ্রী রসা স্মৃতা .. ৫১..
দীপ্তা বিকসিতা ক্ষুব্ধা গম্ভীরা সমতারকা .
উত্ফুল্লমধ্যা দৃষ্টিস্তু বীরা বীররসাশ্রযা .. ৫২..
নিকুঞ্চিতপুটাপাঙ্গা ঘূর্ণোপপ্লুততারকা .
সংশ্লিষ্টস্থিরপক্ষ্মা চ বীভত্সা দৃষ্টিরিষ্যতে .. ৫৩..
নাসাগ্রসক্তা নিমিষা তথাধোভাগচারিণী .
আকেকরপুটা শান্তে শান্তা দৃষ্টির্ভবেদসৌ .. ৫৪..
রসজা দৃষ্টযো হ্যেতা বিজ্ঞেযা লক্ষণান্বিতা .
অতঃ পরং প্রবক্ষ্যামি স্থাযিভাবসমাশ্রযাঃ .. ৫৫..
ব্যাকোশমধ্যা মধুরা স্থিততারাভিলাষিণী .
সানন্দাশ্রুপ্লুতা দৃষ্টিঃ স্নিগ্ধেযং রতিভাবজা .. ৫৬..
চলা হসিতগর্ভা চ বিশত্তারানিমেষিণী .
কিঞ্চিদাকুঞ্চিতা দৃষ্টিঃ হৃষ্টা হাসে প্রকীর্তিতা .. ৫৭..
অবস্রস্তোত্তরপুটা কিঞ্চিত্সরংব্ধতারকা .
মন্দসঞ্চারিণী দীনা সা শোকে দৃষ্টিরিষ্যতে .. ৫৮..
রূক্ষা স্থিরোদ্ধতপুটা নিষ্টব্ধোদ্ধৃত্ততারকা .
কুটিলা ভ্রুকুটির্দৃষ্টিঃ ক্রুদ্ধা ক্রোধে বিধীযতে .. ৫৯..
সংস্থিতে তার্কে যস্যাঃ স্থিতা বিকসিতা তথা .
সত্ত্বমুদ্গিরতী দৃপ্তা দৃষ্টিরুত্সাহসংভবা .. ৬০..
বিস্ফারিতোভযপুটা ভযকম্পিততারকা .
নিষ্ক্রান্তমধ্যা দৃষ্টিস্তু ভযভাবে ভযান্বিতা .. ৬১..
সংকোচিতপুটাধ্যামা দৃষ্টির্মীলিততারকা .
পক্ষ্মোদ্দেশাত্ সমুদ্বিগ্না জুগুপ্সাযাং জুগুপ্সিতা .. ৬২..
ভৃশমুদ্বৃত্ততারা চ নষ্টোভযপুটান্বিতা .
সমা বিকসিতা দৃষ্টির্বিস্মিতা বিস্মযে স্মৃতা .. ৬৩..
স্থাযিভাবাশ্রযা হ্যেতা বিজ্ঞেযাঃ দৃষ্টযো বুধৈঃ .
সংচারিণীনাং দৃষ্টীনাং সম্প্রবক্ষ্যামি লক্ষণম্ .. ৬৪..
সমতারা সমপুটা নিষ্কম্পা শূন্যদর্শনা .
বাহ্যার্থাগ্রাহিণী ধ্যামা শূন্যা দৃষ্টিঃ প্রকীর্তিতা .. ৬৫..
প্রস্পন্দমানপক্ষ্মাগ্রা নাত্যর্থমুকুলৈঃ পুটৈঃ .
মলিনান্তা চ মলিনা দৃষ্টির্বিস্মিততারকা .. ৬৬..
শ্রমপ্রম্লাপিতপুটা ক্ষামা কুঞ্চিতলোচনা .
সন্না পতিততারা চ শ্রান্তা দৃষ্টিঃ প্রকীর্তিতা .. ৬৭..
কিঞ্চিদঞ্চিতপক্ষ্মাগ্রা পতিতোর্ধ্বপুটা হ্রিযা .
ত্রপাধোগততারা চ দৃষ্টির্লজ্জান্বিতা তু সা .. ৬৮..
ম্লানভ্রুপুটপক্ষ্মা যা শিথিলা মন্দচারিণী .
ক্রমপ্রবৃষ্টতারা চ গ্লানা দৃষ্টিস্তু সা স্মৃতা..৬৯..
কিঞ্চিচ্চলা স্থিরা কিঞ্চিদুদ্গতা তির্যগাযতা .
গূঢা চকিততারা চ শঙ্কিতা দৃষ্টিরিষ্যতে..৭০..
বিষাদবিস্তীর্ণপুটা পর্যস্তান্তা নিমেষিণী .
কিঞ্চিন্নিষ্টব্ধতারা চ কার্যা দৃষ্টীর্বিষাদিনী .. ৭১..
স্ফুরদাশ্লিষ্টপক্ষ্মাগ্রা মুকুলোর্ধ্বপুটাঞ্চিতা .
সুখোন্মীলিততারা চ মুকুলা দৃষ্টিরিষ্যতে..৭২..
আনিকুঞ্চিতপক্ষ্মাগ্রা পুটৈরাকুঞ্চিতৈস্তথা .
সংনিকুঞ্চিততারা চ কুঞ্চিতা দৃষ্টিরিষ্যতে .. ৭৩..
মন্দাযমানতারা যা পুটৈঃ প্রচলিতৈস্তথা .
সন্তাপোপপ্লুতা দৃষ্টিরভিতপ্তা তু সব্যথা .. ৭৪..
লম্বিতাকুঞ্চিতপুটা শনৈস্তির্যঙ্ নিরীক্ষিণী .
নিগূঢা গূঢতারা চ জিহ্মা দৃষ্টিরুদাহৃতা .. ৭৫..
মধুরাকুঞ্চিতান্তা চ সভ্রূক্ষেপা চ সস্মিতা .
সমমন্যবিকারা চ দৃষ্টিঃ সা ললিতা স্মৃতা .. ৭৬..
বিতর্কোদ্বর্তিতপুটা তথৈবোত্ফুল্লতারকা .
অধোগতবিচারা চ দৃষ্টিরেষা বিতর্কিতা..৭৭..
অর্ধব্যাকোশপক্ষ্মা চ হ্লাদার্ধমুকুলৈঃ পুটৈঃ .
স্মিতার্শমুকুলা দৃষ্টিঃ কিঞ্চিল্লুলিততারকা .. ৭৮..
অনবস্থিততারা চ বিভ্রান্তাকুলদর্শনা .
বিস্তীর্ণোত্ফুল্লমধ্যা চ বিভ্রান্তা দৃষ্টিরুচ্যতে .. ৭৯..
পুটৌ প্রস্ফুরিতৌ যস্য নিষ্টব্ধৌ পতিতৌ পুনঃ .
বিলুপ্তোদ্বৃত্ততারা চ দৃষ্টিরেষা তু বিপ্লুতা .. ৮০..
আকুঞ্চিতপুটাপাঙ্গা সঙ্গতার্ধনিমেষিণী .
মুহুর্ব্যাবৃত্ততারা চ দৃষ্টিরাকেকরা স্মৃতা .. ৮১..
বিকোশিতোভযপুটা প্রোত্ফুল্লা চানিমেষিণী .
অনবস্থিতসঞ্চারা বিকোশা দৃষ্টিরুচ্যতে .. ৮২..
ত্রাসোদ্বৃত্তপুটা যা তু তথোত্কম্পিততারকা .
সন্ত্রাসোত্ফুল্লমধ্যা চ ত্রস্তা দৃষ্টিরুদাহৃতা .. ৮৩..
আঘুর্ণমানমধ্যা যা ক্ষামান্তাঞ্চিতলোচনা .
দৃষ্টির্বিকসিতাপাঙ্গা মদিরা তরুণে মদে .. ৮৪..
কিঞ্চিদাকু~চিতপুটা হ্যনবস্থিততারকা .
তথা চলিতপক্ষ্মা চ দৃষ্টির্মধ্যমদে ভবেত্ .. ৮৫..
সনিমেষানিমেষা চ কিঞ্চিদ্ দর্শিততারকা .
অধোভাগচরী দৃষ্টিরধমে তু মদে স্মৃতা .. ৮৬..
ইত্যেবং লক্ষিতা হ্যেতা ষটত্রিংশদ্ দৃষ্টযো মযা .
রসজা সহজাশ্চাসাং বিনিযোগং নিবোধত .. ৮৭..
রসজাস্স্তু রসেষ্বেব স্থাযিষু স্থাযিদৃষ্টযঃ .
শৃণুত ব্যভিচারিণ্যঃ সঞ্চারিষু যথাস্থিতাঃ .. ৮৮..
শূন্যা দৃষ্টিস্তু চিন্তাযাং স্তম্ভে চাপি প্রকীর্তিতা .
নির্বেদে চাপি মলিনা বৈবর্ণ্যে চ বিধীযতে .. ৮৯..
শ্রান্তা শ্রমার্তে স্বেদে চ লজাযাং ললিতা তথা .
অপস্মারে তথা ব্যাধৌ গ্লান্যাং গ্লানা বিধীযতে .. ৯০..
শঙ্কাযাং শঙ্কিতা জ্ঞেযা বিষাদার্থে বিষাদিনী .
নিদ্রাস্বপ্নসুখার্থেষু মুকুলা দৃষ্টিরিষ্যতে .. ৯১..
কুঞ্চিতাসূযিতানিষ্টদুষ্প্রেক্ষাক্ষিব্যথাষু চ .
অভিতপ্তা চ নির্বেদে হ্যভিঘাতাভিতাপযোঃ .. ৯২..
জিহ্মা দৃষ্টিরসূযাযাং জডতালস্যযোস্তথা .
ধৃতৌ হর্ষে সললিতা স্মৃতৌ তর্কে চ তর্কিতা .. ৯৩..
আল্হাদিষ্বর্ধমুকুলা গন্ধস্পর্শসুখাদিষু .
বিভ্রান্তা দৃষ্টিরাবেগে সম্ভ্রমে বিভ্রমে তথা .. ৯৪..
বিলুপ্তা চপলোন্মাদদুঃখার্তিমরণাদিষু .
আকেকরা দুরালোকে বিচ্ছেদপ্রেঅক্ষিতেষু চ .. ৯৫..
বিবোধগর্বামর্শৌগ্র্যমতিষু স্যাদ্বিকোশিতা .
ত্রস্তা ত্রাসে ভবেদ্ দৃষ্টির্মদিরা চ মদেষ্বিতি .. ৯৬..
ষটত্রিংশদ্ দৃষ্টযো হ্যেতা যথাবত্ সমুদাহৃতাঃ .
রসজানাং তু দৃষ্টীনাং ভাবজানাং তথৈঅব চ .. ৯৭..
তারাপুটভ্রুবাং কর্ম গদতো মে নিবোধত .
ভ্রমণং বলনং পাতশ্চলনং সম্প্রবেশনম্ .. ৯৮..
বিবর্তনং সমুদ্বৃত্তং নিষ্ক্রামঃ প্রাকৃতং তথা .
পুটান্তর্মণ্ডলাবৃত্তিস্তারযোর্ভ্রমণং স্মৃতম্ .. ৯৯..
বলনং গমনং ত্র্যস্রং পাতনং স্রস্ততা তথা .
চলনং কম্পনং জ্ঞেযং প্রবেশোঽন্তঃপ্রবেশনম্ .. ১০০..
বিবর্তনং কটাক্ষস্তু সমুদ্বৃত্তং সমুন্নতিঃ .
নিষ্ক্রামো নির্গমঃ প্রোক্তঃ প্রাকৃতং তু স্বভাবজম্ .. ১০১..
অথৈষাং রসভাবেষু বিনিযোগং নিবোধত .
ভ্রমণং চলনোদ্বৃত্তে নিষ্ক্রামো বীররৌদ্রযোঃ .. ১০২..
নিষ্ক্রামণং সংবলনং কর্তব্যং তু ভযানকে .
হাস্যবীভত্সযোশ্চাপি প্রবেশনমিহেষ্যতে .. ১০৩..
পাতনং করুণে কার্যং নিষ্ক্রামণমথাদ্ভুতে .
প্রাকৃতং শেষভাবেষু শৃঙ্গারে চ বিবর্তিতম্ .. ১০৪..
স্বভাবসিদ্ধমেবৈতত্ কর্মং লোকক্রিযাশ্রযম্ .
এবং রসেষু ভাবেষু তারাকর্মাণি যোজযেত্ .. ১০৫..
অথাঽত্রৈব প্রবক্ষ্যামি প্রকারন্ দর্শনস্য তু .
সমং সাচয্নুবৃত্তে চ হ্যালোকিতবিলোকিতে .. ১০৬..
প্রলোকিতোল্লোকিতে চাপ্যবলোকিতমেব চ .
সমতারং চ সৌম্যং চ যদ্দৃষ্টং তত্ সমং স্মৃতম্ .. ১০৭..
পক্ষ্মান্তরগততারং চ ত্র্যস্রং সাচীকৃতং তু তত্ .
রূপনির্বর্ণনা যুক্তমনুবৃত্তমিতি স্মৃতম্ .. ১০৮..
সহসা দর্শনং যত্ স্যাত্তদালোকিতমুচ্যতে .
বিলোকিতং পৃষ্টতস্তু পার্শ্বাভ্যাং তু প্রলোকিতম্ .. ১০৯..
ঊর্ধ্বমুল্লোকিতং জ্ঞেযমবলোকিতমপ্যধঃ .
ইত্যেষু দর্শনবিধিঃ সর্বভাবরসাশ্রযঃ .. ১১০..
তারাকৃতোঽস্যানুগতং পুটকর্ম নিবোধত .
উন্মেষশ্চ নিমেষশ্চ প্রসৃতং কুঞ্চিতং সমম্ .. ১১১..
বিবর্তিতং স স্ফুরিতং পিহিতং সবিতাডিতম্ .
বিশ্লেষঃ পুটযোর্যস্তু স তূন্মেষঃ প্রকীর্তিতঃ .. ১১২..
সমাগমো নিমেষঃ স্যাদাযামঃ প্রসৃতং ভবেত্ .
আকু~চিতং কুঞ্চিতং স্যাত্ সমং স্বাভাবিকং স্মৃতম্ .. ১১৩..
বিবর্তিতং সমুদ্বৃত্তং স্ফুরিতং স্পন্দিতং তথা .
স্থগিতং পিহিতং প্রোক্তমাহতং তু বিতাডিতম্ .. ১১৪..
অথৈষং রসভাবেষু বিনিযোগং নিবোধত .
ক্রোধে বিবর্তিতং কার্যো নিমেষোন্মেষণৈঃ সহ .. ১১৫..
বিস্মযার্থেষু হর্ষে চ বীরে চ প্রসৃতং স্মৃতম্ .
অনিষ্টদর্শনে গন্ধে রসে স্পর্শে চ কুঞ্চিতম্ .. ১১৬..
শৃঙ্গারে চ সমং কার্যমীর্ষ্যাসু স্ফুরিতং তথা .
সুপ্তমূর্চ্ছিতবাতোষ্ণধূমবর্ষাঞ্জনার্তিষু .. ১১৭..
নেত্ররোগে চ পিহিতমভিঘাতে বিতাডিতম্ .
ইত্যেবং রসভাবেষু তারকাপুটযোর্বিধিঃ .. ১১৮..
কার্যানুগতমস্যৈব ভ্রুবোঃ কর্ম নিবোধত .
উত্ক্ষেপঃ পাতনশ্চৈব ভ্রুকুটী চতুরং ভ্রুবোঃ ..১১৯..
কুঞ্চিতং রেচিতং চৈব সহজং চেতি সপ্তধা .
ভ্রুবোরুন্নতিরুত্ক্ষেপঃ সমমেকৈকশোঽপি বা..১২০..
অনেনৈব ক্রমেণৈব পাতনং স্যাদধোমুখম্ .
ভ্রুবোর্মূলসমুত্ক্ষেপাত্ ভ্রুকুটী পরিকীর্তিতা .. ১২১..
চতুরং কি~চিদুচ্ছ্বাসান্মধুরাযতযা ভ্রুবোঃ .
একস্যা উভযোর্বাপি মৃদুভঙ্গস্তু কুঞ্চিতম্ .. ১২২..
একস্যা এব ললিতাদুত্ক্ষেপাদ্রেচিতং ভ্রুবঃ .
সহজাতং তু সহজং কর্ম স্বাভাবিকং স্মৃতম্ .. ১২৩..
অথৈষাং সম্প্রবক্ষ্যামি রসভাবপ্রযোজনম্ .
কোপে বিতর্কে হেলাযাং লীলাদৌ সহজে তথা .. ১২৪..
শ্রবণে দর্শনে চৈব ভ্রুবমেকাং সমুত্ক্ষিপেত্ .
উত্ক্ষেপো বিস্মযে হর্ষে রোষে চৈঅব দ্বযোরপি .. ১২৫..
আসূযিতজুগুপ্সাযাং হাস্যে ঘ্রাণে চ পাতনম্ .
ক্রোধস্থানেষু দীপ্তেষু যোজযেত্ ভ্রুকুটিং বুধঃ .. ১২৬..
শৃঙ্গারে ললিতে সৌম্যে সুখে স্পর্শে প্রবোধনে .
এবং বিধেষু ভাবেষু চতুরং তু প্রযোজযেত্ .. ১২৭..
স্ত্রীপুরুষযোশ্চ সংলাপে নানাবস্থান্তরাত্মকে .
মোট্টাযিতে কুট্টমিতে বিলাসে কিলকিঞ্চিতে .. ১২৮..
নিকুঞ্চিতং তু কর্তব্যং নৃত্তে যোজ্যং তু রেচিতম্ .
অনাবিদ্ধেষু ভাবেষু বিদ্যাত্ স্বাভাবিকং বুধঃ..১২৯..
ইত্যেবং তু ভ্রুবঃ প্রোক্তং নাসাকর্ম নিবোধত .
নতা মন্দা বিকৃষ্টা চ সোচ্ছ্বাসা চ বিকূণিতা .. ১৩০..
স্বাভাবিকা চেতি বুধৈঃ ষড্বিধা নাসিকা স্মৃতা .
নতা মুহুঃশ্লিষ্টপুটা মন্দা তু নিভৃতা স্মৃতা .. ১৩১..
বিকৃষ্টোত্ফুল্লিতপুটা সোচ্ছ্বাসা কৃষ্টমারুতা .
বিকূণিতা সংকুচিতা সমা স্বাভাবিকা স্মৃতা .. ১৩২..
নাসিকালক্ষণং হ্যেতত্ বিনিযোগং নিবোধত .
মদোত্কম্পসমাযুক্তে নারীণামনুরোধনে .. ১৩৩..
নিঃশ্বাসে চ নতা কার্যা নাসিকা নাট্যযোক্তৃভিঃ .
বিচ্ছিন্নমন্দরুদিতে সোচ্ছ্বাসে চ নতা স্মৃতা .. ১৩৪..
নির্বেগৌত্সুক্যচিন্তাসু মন্দা শোকে চ যোজযেত্ .
তীব্রগন্ধে বিকৃষ্টাং তৌ রৌদ্রে বীরে তথৈব চ .. ১৩৫..
ইষ্টঘ্রাণে তথোচ্ছ্বাসে দীর্ঘোচ্ছ্বাসাং প্রযোজযেত্ .
বিকূণিতা চ কর্তব্যা জুগুপ্সাযামসূযাদিষু .. ১৩৬..
কার্যা শেষু ভাবেষু তজ্ঞৈঃ স্বাভাবিকা তথা .
ক্ষামং ফুল্লং চ ঘূর্ণং চ কম্পিতং কুঞ্চিতং সমম্ .. ১৩৭..
ষড্বিধং গণ্ডমুদ্দিষ্টং তস্য লক্ষণমুচ্যতে .
ক্ষামং চাবনতং জ্ঞেযং ফুল্লং বিকসিতং ভবেত্ .. ১৩৮..
বিততং ঘূর্ণমত্রোক্তং কম্পিতং স্ফুরিতং ভবেত্ .
স্যাত্ কুঞ্চিতং সংকুঞ্চিতং সমং প্রাকৃতমুচ্যতে .. ১৩৯..
গণ্ডযোর্লক্ষণং প্রোক্তং বিনিযোগং নিবোধত .
ক্ষামং দুঃখেষু কর্তব্যং প্রহর্ষে ফুল্লমেব চ .. ১৪০..
পূর্ণমুত্সাহগর্বেষু রোমহর্ষেষু কম্পিতম্ .
কুঞ্চিতং চ সরোমাঞ্চং স্পর্শে শীতে ভযে জ্বরে.. ১৪১..
প্রাকৃতং শেষভাবেষু গণ্ডকর্ম ভবেদিতি .
বিবর্তনং কম্পনং চ বিসর্গো বিনিগূহনম্..১৪২..
সন্দষ্টকং সমুদ্গং চ ষট্ কর্মাণ্যধরস্য তু .
বিকূণিতং বিবর্তস্তু বেপনং কম্পনং স্মৃতম্ .. ১৪৩..
বিনিষ্ক্রামো বিসর্গস্তু প্রবেশো বিনিগূহনম্ .
সন্দষ্টকং দ্বিজৈঅর্দষ্টং সমুদ্গঃ সহজোন্নতি .. ১৪৪..
ইত্যোষ্ঠলক্ষণং প্রোক্তং বিনিযোগং নিবোধত .
অসূযাবেদনাবজ্ঞাভযাদিষু বিবর্তনম্ .. ১৪৫..
কম্পনং বেপনং শীতভযরোষজবাদিষু .
স্ত্রীঅণাং বিলাসে বিব্বোকে বিসর্গো রঞ্জনে তথা .. ১৪৬..
বিনিগূহনমাযাসে সন্দষ্টং ক্রোধকর্মসু .
সমুদ্গস্ত্বনুকম্পাযাং চুম্বনে চাভিনন্দনে ..১৪৭..
ইত্যোষ্ঠকর্মাণ্যুক্তানি চিবুকস্য নিবোধত .
কুট্টনং খণ্ডনং ছিন্নং চুক্কিতং লেহনং সমম্ .. ১৪৮..
দষ্টং চ দন্তক্রিযযা চিবুকং ত্বিহ লক্ষ্যতে .
কুট্টনং দন্তসংঘর্ষঃ সংস্ফোটঃ খণ্ডনং মুহুঃ .. ১৪৯..
ছিন্নং তু গাঢসংশ্লেষশ্চুক্কিতং দূরবিচ্যুতিঃ .
লেহনং জিহ্বযা লেহঃ কিঞ্চিত্ শ্লেষঃ সমং ভবেত্ ..১৫০..
দন্তৈর্দষ্টেঽধরে দষ্টমিত্যেষাং বিনিযোজনম্ .
ভযশীতজ্বরক্রোধগ্রস্তানাং কুট্টনং ভবেত্ .. ১৫১.. জপাধ্যযনসংলাপভক্ষ্যযোগে চ খণ্ডনম্ .
ছিন্নং ব্যাধৌ ভযে শীতে ব্যাযামে রুদিতে মৃতে .. ১৫২..
জৃম্ভণে চুক্কিতং কার্যং তথা লেহ্যে চ লেহনম্ .
সমং স্বভাবভাবেষু সন্দষ্টং ক্রোধকর্মসু .. ১৫৩..
ইতি দন্তোষ্ঠজিহ্বানাং করণাচ্চিবুকক্রিযা .
বিধুতং বিনিবৃত্তং চ নির্ভুগ্নং ভুগ্নমেব চ .. ১৫৪..
বিবৃতং চ তথোদ্বাহি কর্মাণ্যত্রাস্যজানি তু .
ব্যাবৃত্তং বিনিবৃত্তং স্যাদ্বিধুতং তির্যগাযতম্.. ১৫৫..
অবাঙ্মুখত্বং নির্ভুগ্নং ব্যাভুগ্নং কিঞ্চিদাযতম্ .
বিশ্লিষ্টোষ্ঠং চ বিবৃতমুদ্বাহ্যুত্ক্ষিপ্তমেব চ .. ১৫৬..
বিনিবৃত্তমসূযাযামীর্ষ্যাক্রোধকৃতেন চ .
অবজ্ঞাবিবৃতাদৌ চ স্ত্রীণা কার্যা প্রযোক্তৃভিঃ .. ১৫৭..
বিধুতং বারণে চৈব নৈবমিত্যেবমাদিষু .
নির্ভুগ্নং চাপি বিজ্ঞেযং গম্ভীরালোকনাদিষু .. ১৫৮..
ভুগ্নং লজান্বিতে যোজ্যং যতীনাং তু স্বভাবজম্ .
নির্বেদৌত্সুক্যচিন্তাসু নযে চ বিনিমন্ত্রণে .. ১৫৯..
বিবৃত্তং চাপি বিজ্ঞেযং হাস্যশোকভযাদিষু .
স্ত্রীণামুদ্বাহি লীলাযাং গর্বে গচ্ছত্যনাদরে ..১৬০..
এব নামেতি কার্যং চ কোপবাক্যে বিচক্ষণৈঃ .
সমং সাচ্যনুবৃত্তাদি যচ্চ দৃষ্টিবিকল্পিতম্ .. ১৬১..
তজ্জ্ঞৈস্তেনানুসারেণ কার্যং তদনুগং মুখম্ .
অথাতো মুখরাগস্তু চতুর্ধা পরিকীর্তিতঃ .. ১৬২..
স্বাভাবিকঃ প্রসন্নশ্চ রক্তঃ শ্যামোঽর্থসংশ্রযঃ .
স্বাভাবিকস্তু কর্তব্যঃ স্বভাবাভিনযাশ্রযঃ .. ১৬৩..
মধ্যস্থাদিষু ভাবেষু মুখরাগঃ প্রযোক্তৃভিঃ .
প্রসন্নস্ত্বদ্ভুতে কার্যো হাস্যশৃঙ্গারযোস্তথা .. ১৬৪..
বীররৌদ্রমদাদ্যেষু রক্তঃ স্যাত্ করুণে তথা .
ভযানকে সবীভত্সে শ্যামং সঞ্জাযতে মুখম্ .. ১৬৫৫..
এবং ভাবরসার্থেষু মুখরাগং প্রযোজযেত্ .
শাখাঙ্গোপাঙ্গসংযুক্তঃ কৃতোঽপ্যভিনযঃ শুভঃ .. ১৬৬..
মুখরাগবিহীনস্তু নৈব শোভান্বিতো ভবেত্ .
শরীরাভিনযোঽল্পোঽপি মুখরাগসম্ন্বিতঃ .. ১৬৭..
দ্বিগুণাং লভতে শোভাং রাত্রাবিব নিশাকরঃ .
নযনাভিনযোঽপি স্যান্নানাভাবরসাস্ফুটঃ .. ১৬৮..
মুখরাগান্বিতো যস্মান্নাট্যমত্র প্রতিষ্ঠিতম্ .
যথা নেত্রং প্রসর্পেত মুখভূদৃষ্টিসংযুতম্ .. ১৬৯..
তথা ভাবরসোপেতং মুখরাগং প্রযোজযেত্ .
ইত্যেবং মুখরাগস্তু প্রোক্তো ভাবরসাশ্রযঃ .. ১৭০..
অতঃ পরং প্রবক্ষ্যামি গ্রীবাকর্মাণি বৈ দ্বিজাঃ !.
সমা নতোন্নতা ত্র্যস্রা রেচিতা কুঞ্চিতাঞ্চিতা .. ১৭১..
বলিতা চ নিবৃত্তা চ গ্রীবা নববিধার্থতঃ .
সমা স্বাভাবিকী ধ্যানস্বভাজপকর্মসু .. ১৭২..
নতা নতাস্যালঙ্কারবন্ধে কণ্ঠাবলম্বনে ,
উন্নতাভ্যুন্নতমুখী গ্রীবা চোর্ধ্বনিবেশনে .. ১৭৩..
ত্র্যস্রা পার্শ্বগতা জ্ঞেযা স্কন্ধভারেঽতি দুঃখিতে .
রেচিতা বিধুতভ্রান্তা হাবে মথনৃত্তযোঃ .. ১৭৪..
কুঞ্চিতাকুঞ্চিতে মূর্ধ্নি ধারিতে গলরক্ষণে .
অঞ্চিতাপসৃতোদ্বন্ধকেশকর্ষোর্ধ্বদর্শনে .. ১৭৫..
পার্শ্বোন্মুখী স্যাদ্বলিতা গ্রীবাভেদৈশ্চ বীক্ষণে .
নিবৃতাভিমুখীভূতা স্বস্থানাভিমুখাদিষু .. ১৭৬..
ইত্যাদি লোকভাবার্থা গ্রীবাভঙ্গৈরনেকধা .
গ্রীবাকর্মাণি সর্বাণি শিরঃ কর্মানুগানি হি ..১৭৭..
শিরসঃ কর্মণঃ কর্ম গ্রীবাযাঃ সম্প্রবর্ততে .
ইত্যেতল্লক্ষণং প্রোক্তং শীর্ষোপাঙ্গসমাশ্রযম্ .
অঙ্গকর্মাণি শেষাণি গদতো মে নিবোধত .. ১৭৯..

ইতি ভারতীযে নাট্যশাশ্ত্রে উপাঙ্গবিধানং নাম অষ্টমোঽধ্যাযঃ .