নাট্যশাস্ত্রম্ অধ্যায ০৭

.. নাট্যশাস্ত্রম্ অধ্যায ৭ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ সপ্তমোঽধ্যাযঃ .
ভাবানিদানীং ব্যাখ্যাস্যামঃ . অত্রাহ- ভাবা ইতি কস্মাত্ .
কিং ভবন্তীতি ভাবাঃ কিং বা ভাবযন্তীতি ভাবাঃ . উচ্যতে –
বাগঙ্গসত্ত্বোপেতানান্কাব্যার্থান্ভাবযন্তীতি ভাবা ইতি .
ভূ ইতি করণে ধাতুস্তথা চ ভাবিতং বাসিতং
কৃতমিত্যনর্থান্তরম্ .
লোকেঽপি চ প্রসিদ্ধম্ . অহো হ্যনেন গন্ধেন রসেন বা সর্বমেব
ভাবিতমিতি .
তচ্চ ব্যাপ্ত্যর্থম্ .
শ্লোকাশ্চাত্র-
বিভাবেনাহৃতো যোঽর্থো হ্যনুভাবৈস্তু গম্যতে .
বাগঙ্গসত্ত্বাভিনযৈঃ স ভাব ইতি সংজ্ঞিতঃ .. ১..
বাগঙ্গমুখরাগেণ সত্ত্বেনাভিনযেন চ .
কবেরন্তর্গতং ভাবং ভাবযন্ভাব উচ্যতে .. ২..
নানাভিনযসম্বদ্ধান্ভাবযন্তি রসানিমান্ .
যস্মাতস্মাদমী ভাবা বিজ্ঞেযা নাট্যযোক্তৃভিঃ .. ৩..
অথ বিভাব ইতি কস্মাত্ . উচ্যতে- বিভবো বিজ্ঞানার্থঃ .
বিভাবঃ কারণং নিমিত্তং হেতুরিতি পর্যাযাঃ . বিভাব্যতেঽনেন
বাগঙ্গসত্ত্বাভিনযা ইত্যতো বিভাবঃ . যথা বিভাবিতং বিজ্ঞা-
তমিত্যনর্থান্তরম্ .
অত্র শ্লোকঃ –
বহবোঽর্থা বিভাব্যন্তে বাগঙ্গাভিনযাশ্রযাঃ .
অনেন যস্মাত্তেনাযং বিভাব ইতি সংজ্ঞিতঃ .. ৪..
অথানুভাব ইতি কস্মাত্ . উচ্যতে-
অনুভাব্যতেঽনেন বাগঙ্গসত্ত্বকৃতোঽভিনয ইতি .
অত্র শ্লোকঃ –
বাগঙ্গাভিনযেনেহ যতস্ত্বর্থোঽনুভাব্যতে .
শাখাঙ্গোপাঙ্গসংযুক্তস্ত্বনুভাবস্ততঃ স্মৃতঃ .. ৫ ..
এবং তে বিভাবানুভাবসংযুক্তা ভাবা ইতি ব্যাখ্যাতাঃ . অতো
হ্যেষাং ভাবানাং সিদ্ধির্ভবতি . তস্মাদেষাং ভাবানাং
বিভাবানুভাবসংযুক্তানাং লক্ষণনিদর্শনান্যভিব্যাখ্যাস্যামঃ .
তত্র বিভাবানুভাবৌ লোকপ্রসিদ্ধৌ .
লোকস্বভাবানুগতত্বাচ্চ তযোর্লক্ষণং
নোচ্যতেঽতিপ্রসঙ্গনিবৃত্যর্থম্ .
ভবতি চাত্র শ্লোকঃ –
লোকস্বভাবসংসিদ্ধা লোকযাত্রানুগামিনঃ .
অনুভাবা বিভাবাশ্চ জ্ঞেযাস্ত্বভিনযে বুধৈঃ .. ৬..
তত্রাষ্টৌ ভাবাঃ স্থাযিনঃ . ত্রযস্ত্রিংশদ্ব্যভিচারিণঃ .
অষ্টৌ
সাত্বিকা ইতি ভেদাঃ . এবমেতে কাব্যরসাভিব্যক্তিহেতব
একোনপঞ্চাশদ্ভাবাঃ
প্রত্যবগন্তব্যাঃ . এভ্যশ্চ সামান্যগুণযোগেন রসা নিষ্পদ্যন্তে .
অত্র শ্লোকঃ-
যোঽর্থো হৃদযসংবাদী তস্য ভাবো রসোদ্ভবঃ .
শরীরং ব্যাপ্যতে তেন শুষ্কং কাষ্ঠমিবাগ্নিনা .. ৭..
অত্রাহ- যদি
কাব্যার্থসংশ্রিতৈর্বিভাবানুভাবব্যঞ্জিতৈরেকোনপঞ্চাশদ্ভাবৈঃ
সামান্যগুণযোগেনাভিনিষ্পদ্যন্তে রসাস্তত্কথং স্থাযিন এব ভাবা
রসত্বমাপ্নুঅবন্তি . উচ্যতে- যথা হি
সমানলক্ষণাস্তুল্যপাণিপাদোদরশরীরাঃ
সমানাঙ্গপ্রত্যঙ্গা অপি পুরুষাঃ
কুলশীলবিদ্যাকর্মশিল্পবিচক্ষণত্বাদ্রাজ-
ত্বমাপ্নুবন্তি তত্রৈব চান্যেঽল্পবুদ্ধযস্তেষামেবানুচরা ভবন্তি
তথা
বিভাবানুভাবব্যভিচারিণঃ স্থাযিভাবানুপাশ্রিতা ভবন্তি .
বহ্বাশ্রযত্বাস্বামিভূতাঃ স্থাযিনো ভাবাঃ .
তদ্বত্স্থানীযপুরুষগুণভূতা অন্যে ভাবাস্তান্গুণতযা শ্রযন্তে .
স্থাযিভাবা রসত্বমাপ্নুবন্তি . পরিজনভূতা ব্যভিচারিণো
ভাবাঃ .
অত্রাহ- কো দৃষ্টান্ত ইতি . যথা নরেন্দ্রো বহুজনপরিবারোঽপি স
এব নাম
লভতে নান্যঃ সুমহানপি পুরুষঃ তথা
বিভাবানুভাবব্যভিচারিপরিবৃতঃ
স্থাযী ভাবো রসনাম লভতে .
ভবতি চাত্র শ্লোকঃ –
যথা নরাণাং নৃপতিঃ শিষ্যাণাং চ যথা গুরুঃ .
এবং হি সর্বভাবানাং ভাবঃ স্থাযি মহানিহ .. ৮..
লক্ষণং খলু পূর্বমভিহিতমেষাং রসসংজ্ঞকানাম্ . ইদানীং
ভাবসামান্যলক্ষণমভিধাস্যামঃ . তত্র স্থাযিভাবান্বক্ষ্যামঃ –

রতির্নাম প্রমোদাত্মিকা
ঋতুমাল্যানুলেপনাভরণভোজনবরভবনানুভবনা-
প্রাতিকূল্যাদিভির্বিভাবৈঃ সমুত্পদ্যতে .
তামভিনযেত্স্মিতবদনমধুরকথন-
ভ্রূক্ষেপকটাক্ষাদিভিরনুভাবৈঃ . অত্র শ্লোকঃ –
ইষ্টার্থবিষযপ্রাপ্ত্যা রতিরিত্যুপজাযতে .
সৌম্যত্বাদভিনেযা সা বাঙ্মাধুর্যাঙ্গচেষ্টিতৈঃ .. ৯..

হাসো নাম
পরচেষ্টানুকরণকুহকাসম্বদ্ধপ্রলাপপৌরোভাগ্যমৌর্খ্যাদিভির্বিভাবৈঃ
সমুত্পদ্যতে . তমভিনযেত্পূর্বোক্তৈর্হসিতাদিভিরনুভাবৈঃ .
ভবতি চাত্র শ্লোকঃ –
পরচেষ্টানুকরণাদ্ধাসঃ সমুপজাযতে .
স্মিতহাসাতিহসিতৈরভিনেযঃ স পণ্ডিতৈঃ .. ১০..

শোকো নাম
ইষ্টজনবিযোগবিভবনাশবধবন্ধদুঃখানুভনবনাদিভির্বিভাবৈঃ
সমুত্পদ্যতে.
তস্যাস্রপাতপরিদেবিতবিলপিতবৈবর্ণ্যস্বরভেদস্রস্তগাত্রতাভূমি-
পতনসস্বনরুদিতাক্রন্দিতদীর্ঘনিঃশ্বসিতজডতোন্মাদমোহমরণাদিভিরনুভা-
বৈরভিনযঃ প্রযোক্তব্যঃ .
রুদিতমত্র ত্রিবিধম্ – আনন্দজমার্তিজমীর্ষ্যাসমুদ্ভবং চেতি .
ভবন্তি চাত্রার্যাঃ –
[আনন্দেঽপ্যার্তিকৃতং ত্রিবিধং রুদিতং সদা বুধৈর্জ্ঞেযম্ .
তস্য ত্বভিনযযোগান্বিভাবগতিতঃ প্রবক্ষ্যামি ..]
হর্ষোত্ফুল্লকপোলং সানুস্মরণাদপাঙ্গবিসৃতাস্রম্ .
রোমাঞ্চগাত্রমনিভৃতমানন্দসমুদ্ভবং ভবতি .. ১১..
পর্যাপ্তবিমুক্তাস্রং সস্বনমস্বস্থগাত্রগতিচেষ্টম্ .
ভূমিনিপাতনিবর্তিতবিলপিতমিত্যার্তিজং ভবতি .. ১২..
প্রস্ফুরিতৌষ্ঠকপোলং সশিরঃকম্পং তথা সনিঃশ্বাসম্ .
ভ্রুকুটীকটাক্ষকুটিলং স্ত্রীণামীর্ষ্যাকৃতং ভবতি .. ১৩..
স্ত্রীনীচপ্রকৃতিষ্বেষ শোকো ব্যসনসম্ভবঃ .
ধৈর্যেণোত্তমমধ্যানাং নীচানাং রুদিতেন চ .. ১৪..
ক্রোধো নাম
আধর্ষণাক্রুষ্টকলহবিবাদপ্রতিকূলাদিভির্বিভাবৈঃ
সমুত্পদ্যতে . অস্য
বিকৃষ্টনাসাপুটোদ্বৃত্তনযনসংদষ্ঠোষ্ঠপুট-
গণ্ডস্ফুরণাদিভিরনুভাবৈরভিনযঃ প্রযোক্তব্যঃ .
রিপুজো গুরুজশ্চৈব প্রণযিপ্রভবস্তথা .
ভৃত্যজঃ কৃতকশ্চেতি ক্রোধঃ পঞ্চবিধঃ স্মৃতঃ.. ১৫..
অত্রার্যা ভবন্তি –
ভৃকুটীকুটিলোত্কটমুখঃ সন্দষ্ঠোষ্ঠঃ স্পৃশন্করেণ করম্ .
ক্রুদ্ধঃ স্বভুজাপ্রেক্ষী শত্রৌ নির্যন্ত্রণং রুষ্যেত্ .. ১৬..
কিঞ্চিদবাঙ্গ্মুখদৃষ্টিঃ সাস্রস্বেদাপমার্জনপরশ্চ .
অব্যক্তোল্বণচেষ্টো গুরৌ বিনযযন্ত্রিতো রুষ্যেত্ .. ১৭..
অল্পপ্রতরবিচারো বিকিরন্নশ্রূণ্যপাঙ্গবিক্ষেপৈঃ .
সভ্রুকুটিস্ফুরিতোষ্ঠঃ প্রণযোপগতাং প্রিযা রুষ্যেত্ .. ১৮..
অথ পরিজনে তু রোষস্তর্জননির্ভর্ত্সনাক্ষিবিস্তারৈঃ .
বিপ্রেক্ষণৈশ্চ বিবিধৈরভিনেযঃ ক্রূরতারহিতঃ .. ১৯..
কারণমবেক্ষমাণঃ প্রাযেণাযাসলিঙ্গসংযুক্তঃ .
বীররসান্তরচারী কার্যঃ কৃতকো ভবতি কোপঃ .. ২০..

উত্সাহো নাম উত্তমপ্রকৃতিঃ. স
চাবিষাদশক্তিধৈর্যশৌর্যাদিভির্বিভাবৈ-
রুত্পদ্যতে. তস্য ধৈর্যত্যাগবৈশারদ্যাদিভিরনুভাবৈরভিনযঃ
প্রযোক্তব্যঃ .
অত্র শ্লোকঃ –
অসম্মোহাদিভির্ব্যক্তো ব্যবসাযনযাত্মকঃ .
উত্সাহস্ত্বভিনেযঃ স্যাদপ্রমাদোত্থিতাদিভিঃ .. ২১..

ভযং নাম স্ত্রীনীচপ্রকৃতিকম্ .
গুরুরাজাপরাধশ্বাপদশূন্যাগারাটবীপর্বতগহনগজাহিদর্শননির্ভর্ত্সন- কান্তারদুর্দিননিশান্ধকরোলূকনক্তঞ্চরারাবশ্রবণাদিভির্বিভাবৈঃ
সমুত্পদ্যতে .
তস্য
প্রকম্পিতকরচরণহৃদযকম্পনস্তম্ভমুখশোষজিহ্বাপরিলেহন-
স্বেদবেপথুত্রাসসপরিত্রাণান্বেষণধাবনোত্কৃষ্টাদিভিরনুভবৈরভিনযঃ
প্রযোক্তব্যঃ .
অত্র শ্লোকাঃ –
গুরুরাজাপরাধেন রৌদ্রাণাং চাপি দর্শনাত্ .
শ্রবণাদপি ঘোরাণাং ভযং মোহেন জাযতে .. ২২..
গাত্রকম্পনবিত্রাসৈর্বক্ত্রশোষণসম্ভ্রমৈঃ
বিস্ফারিতৈক্ষণৈঃ কার্যমভিনেযক্রিযাগুণৈঃ .. ২৩..
সত্ত্ববিত্রাসনোদ্ভূতং ভযমুত্পদ্যতে নৃণাম্ .
স্রস্তাঙ্গাক্ষিনিমেষৈস্তদভিনেযং তু নর্তকৈঃ .. ২৪..
অত্রার্যা ভবতি –
করচরণহৃদযকম্পৈর্মুখশোষণবদনলেহনস্তম্ভৈঃ .
সম্ভ্রান্তবদনবেপথুসংত্রাসকৃতৈরভিনযোঽস্য .. ২৫..

জুগুপ্সা নাম স্ত্রীনীচপ্রকৃতিকা . সা
চাহৃদ্যদর্শনশ্রবণাদিভির্বিভাবৈঃ
সমুত্পদ্যতে . তস্যাঃ
সর্বাঙ্গসঙ্কোচনিষ্ঠীবনমুখবিকূণনহৃল্লেখাদি-
ভিরনুভাবৈরভিনযঃ প্রযোক্তব্যঃ .
ভবতি চাত্র শ্লোকঃ –
নাসাপ্রচ্ছাদনেনেহ গাত্রসঙ্কোচনেন চ .
উদ্বেজনৈঃ সহৃল্লেখৈর্জুগুপ্সামভিনির্দিশেত্ .. ২৬..

বিস্মযো নাম
মাযেন্দ্রজালমানুষকর্মাতিশযচিত্রপুস্তশিল্পবিদ্যাতিশযাদিভির্বিভাবৈঃ
সমুত্পদ্যতে . তস্য
নযনবিস্তারানিমেষপ্রেক্ষিতভ্রূক্ষেপরোমহর্ষণশিরঃকম্পসাধুবাদাদিভি-
রনুভাবৈরভিনযঃ প্রযোক্তব্যঃ .
ভবতি চাত্র শ্লোকঃ –
কর্মাতিশযনির্বৃত্তো বিস্মযো হর্ষসম্ভবঃ .
সিদ্ধিস্থানে ত্বসৌ সাধ্যঃ প্রহর্ষপুলকাদিভিঃ .. ২৭..

এবমেতে স্থাযিনো ভাবা রসসংজ্ঞাঃ প্রত্যবগন্তব্যাঃ .

ব্যভিচারিণ ইদানীং ব্যাখ্যাস্যামঃ . অত্রাহ – ব্যভিচারিণ ইতি
কস্মাত্ .
উচ্যতে – বি অভি ইত্যেতাবুপসর্গৌ . চর ইতি গত্যর্থো ধাতুঃ .
বিবিধমাভিমুখ্যেন
রসেষু চরন্তীতি ব্যভিচারিণঃ . বাগঙ্গসত্ত্বোপেতাঃ প্রযোগে
রসান্নযন্তীতি
ব্যভিচারিণঃ . অত্রাহ – কথং নযন্তীতি . উচ্যতে – লোকসিদ্ধান্ত
এষঃ –
যথা সূর্য ইদং দিনং নক্ষত্রং বা নযতীতি . ন চ তেন
বাহুভ্যাং স্কন্ধেন
বা নীযতে . কিং তু লোকপ্রসিদ্ধমেতত্ . যথেদং সূর্যো নক্ষত্রং দিন
বা নযতীতি .
এবমেতে ব্যভিচারিণ ইত্যবগন্তব্যাঃ . তানিহ সঙ্গ্রহাভিহিতাংস্ত্র-
যস্ত্রিংশদ্ব্যভিচারিণো ভাবান্ বর্ণযিষ্যামঃ .

তত্র নির্বেদো নাম
দারিদ্র্যব্যাধ্যবমানাধিক্ষেপাক্রুষ্টক্রোধতাডনেষ্টজন-
বিযোগতত্ত্বজ্ঞানাদিভির্বিভাবৈঃ সমুত্পদ্যতে স্ত্রীনীচকুসত্ত্বানাম্
.
রুদিতনিঃশ্বসিতোচ্ছ্বসিতসম্প্রধারণাদিভিরনুভাবৈস্তমভিনযেত্ .
অত্র শ্লোকঃ –
দারিদ্র্যেষ্টবিযোগাদ্যৈঃ নির্বেদো নাম জাযতে .
সম্প্রধারণনিঃশ্বাসৈস্তস্য ত্বভিনযো ভবেত্ .. ২৮..
অত্রানুবংশ্যে আর্যে ভবতঃ –
ইষ্টজনবিপ্রযোগাদ্দারিদ্র্যাদ্ব্যাধিতস্তথা দুঃখাত্ .
ঋদ্ধিং পরস্য দৃষ্ট্বা নির্বেদো নাম সম্ভবতি .. ২৯..
বাষ্পপরিপ্লুতনযনঃ পুনশ্চ নিঃশ্বাসনদীনমুখনেত্রঃ .
যোগীব ধ্যানপরো ভবতি হি নির্বেদবান্পুরুষঃ .. ৩০..

গ্লানির্নাম বান্তবিরিক্তব্যাধিতপোনিযমোপবাসমনস্তাপাতিশযমদন-
সেবনাতিব্যাযামাধ্বগমনক্ষুত্পিপাসানিদ্রাচ্ছেদাদিভির্বিভাবৈঃ
সমুত্পদ্যতে . তস্যাঃ ক্ষামবাক্যনযনকপোলোদরমন্দপদোত্ক্ষেপণবেপনা-
নুত্সাহতনুগাত্রবৈবর্ণ্যস্বরভেদাভিরনুভাবৈরভিনযঃ প্রযোক্তব্যঃ
.
অত্রার্যে ভবতঃ –
বান্তবিরিক্তব্যাধিষু তপসা জরসা চ জাযতে গ্লানিঃ .
কার্শ্যেন সাভিনেযা মন্দভ্রমণেন কম্পেন .. ৩১..
গদিতৈঃ ক্ষামক্ষামৈর্নেত্রবিকারৈশ্চ দীনসঞ্চারৈঃ .
শ্লথভাবেনাঙ্গানাং মুহুর্মুহুর্নির্দিশেদ্ গ্লানিম্ .. ৩২..

শঙ্কা নাম সন্দেহাত্মিকা স্ত্রীনীচপ্রভবা . চৌর্যাভিগ্রহণ-
নৃপাপরাধপাপকর্মকরণাদিভির্বিভাবৈঃ সমুত্পদ্যতে . তস্যা
মুহুর্মুহুরবলোকনাবকুণ্ঠনমুখশোষণজিহ্বালেহনমুখবৈবর্ণ্য-
স্বরভেদবেপথুশুষ্কোষ্ঠকণ্ঠাযাসসাধর্ম্যাদিভিরনুভাবৈরভিনযঃ
প্রযোক্তব্যঃ .
চৌর্যাদিজনিতা শঙ্কা প্রাযঃ কার্যা ভযানকে .
প্রিযব্যলীকজনিতা তথা শৃঙ্গারিণী মতা .. ৩৩..
অত্রাকারসংবরণমপি কেচিদিচ্ছন্তি . তচ্চ
কুশলৈরুপাধিভিরিঙ্গিতৈশ্চোপলক্ষ্যম্ .
অত্রার্যে ভবতঃ –
দ্বিবিধা শঙ্কা কার্যাহ্যাত্মসমুত্থা চ পরসমুত্থা চ .
যা তত্রাত্মসমুত্থা সা জ্ঞেযা দৃষ্টিচেষ্টাভিঃ .. ৩৪..
কিঞ্চিত্প্রবেপিতাঙ্গস্ত্বধোমুখো বীক্ষতে চ পার্শ্বানি .
গুরুসজ্জমানজিহ্বঃ শ্যামাস্যঃ শঙ্কিতঃ পুরুষঃ ..৩৫..

অসূযা নাম
নানাপরাধদ্বেষপরৈশ্বর্যসৌভাগ্যমেধাবিদ্যালীলাদিভির্বিভাবৈঃ
সমুত্পদ্যতে . তস্যাশ্চ পরিষদি
দোষপ্রখ্যাপনগুণোপঘাতের্ষ্যাচক্ষুঃপ্রদা-
নাধোমুখভ্রুকুটীক্রিযাবজ্ঞানকুত্সনাদিভিরনুভাবৈরভিনযঃ
প্রযোক্তব্যঃ .
অত্রার্যে ভবতঃ –
পরসৌভাগ্যেশ্বরতামেধালীলাসমুচ্ছ্রযান্দৃষ্ট্বা .
উত্পদ্যতে হ্যসূযা কৃতাপরাধো ভবেদ্যশ্চ .. ৩৬..
ভ্রুকুটিকুটিলোত্কটমুখৈঃ সের্ষ্যাক্রোধপরিবৃত্তনেত্রৈশ্চ .
গুণনাশনবিদ্বেষৈস্তত্রাভিনযঃ প্রযোক্তব্যঃ .. ৩৭..

মদো নাম মদ্যোপযোগাদুত্পদ্যতে . স চ ত্রিবিধঃ পঞ্চবিভাবশ্চ .
অত্রার্যা ভবন্তি –
জ্ঞেযস্তু মদস্ত্রিবিধস্তরুণো মধ্যস্তথাবকৃষ্টশ্চ .
করণং পঞ্চবিধং স্যাত্তস্যাভিনযঃ প্রযোক্তব্যঃ .. ৩৮..
কশ্চিন্মত্তো গাযতি রোদিতি কশ্চিত্তথা হসতি কশ্চিত্ .
পরুষবচনাভিধাযী কশ্চিত্কশ্চিত্তথা স্বপিতি .. ৩৯..
উত্তমসত্ত্বঃ শেতে হসতি চ গাযতি চ মধ্যমপ্রকৃতিঃ .
পরুষবচনাভিধাযী রোদত্যপি চাধমপ্রকৃতিঃ .. ৪০..
স্মিতবচনমধুররাগো হৃষ্টতনুঃ কিঞ্চিদাকুলিতবাক্যঃ .
সুকুমারাবিদ্ধগতিস্তরুণমদস্তূত্তমপ্রকৃতিঃ ..৪১..
স্খলিতাঘূর্ণিতনযনঃ স্রস্তব্যাকুলিতবাহুবিক্ষেপঃ .
কুটিলব্যাবিদ্ধগতির্মধ্যমদো মধ্যমপ্রকৃতিঃ .. ৪২..
নষ্টস্মৃতির্হতগতিশ্ছর্দিতহিক্কাকফৈঃ সুবীভত্সঃ .
গুরুসজ্জমানজিহ্বো নিষ্ঠীবতি চাধমপ্রকৃতিঃ .. ৪৩..
রঙ্গে পিবতঃ কার্যা মদবৃদ্ধির্নাট্যযোগমাসাদ্য .
কার্যো মদক্ষযো বৈ যঃ খলু পীত্বা প্রবিষ্টঃ স্যাত্ .. ৪৪..
সন্ত্রাসাচ্ছোকাদ্বা ভযাত্প্রহর্ষাচ্চ কারণোপগতাত্ .
উত্ক্রম্যাপি হি কার্যো মদপ্রণাশঃ ক্রমাত্তজ্জ্ঞৈঃ .. ৪৫..
এভির্ভাববিশেষৈর্মদো দ্রুতং সম্প্রণাশমুপযাতি .
অভ্যুদযসুখৈর্বাক্যৈর্যথৈব শোকঃ ক্ষযং যাতি .. ৪৬..

শ্রমো নাম অধ্বব্যাযামসেবনাদিভির্বিভাবৈঃ সমুত্পদ্যতে. তস্য
গাত্রপরিমর্দনসংবাহননিঃশ্বসিতবিজৃম্ভিতমন্দপদোত্ক্ষেপণনযন-
বদনবিকূণনসীত্করাদিভিরনুভাবৈরভিনযঃ প্রযোক্তব্যঃ .
অত্রার্যা –
নৃত্তাধ্বব্যাযামান্নরস্য সঞ্জাযতে শ্রমো নাম .
নিঃশ্বাসখেদগমনৈস্তস্যাভিনযঃ প্রযোক্তব্যঃ .. ৪৭..

আলস্যং নাম খেদব্যাধিগর্ভস্বভাবশ্রমসৌহিত্যাদিভির্বিভাবৈঃ
সমুত্পদ্যতে স্ত্রীনীচানাম্ .
তদভিনযেত্সর্বকর্মানভিলাষশযনা-
সননিদ্রাতন্দ্রীসেবনাদিভিরনুভাবৈঃ .
অত্রার্যা –
আলস্যং ত্বভিনেযং খেদাপগতং স্বভাবজং চাপি .
আহারবর্জিতানামারম্ভাণামনারম্ভাত্ .. ৪৮..

দৈন্যং নাম দৌর্গত্যমনস্তাপাদিভির্বিভাবৈঃ সমুত্পদ্যতে .
তস্যাধৃতিশিরোরোগগাত্রগৌরবান্যমনস্কতামৃজাপরিবর্জনা-
দিভিরনুভাবৈরভিনযঃ প্রযোক্তব্যঃ .
অত্রার্যা –
চিন্তৌত্সুক্যসমুত্থা দুঃখাদ্যা ভবতি দীনতাং পুংসাম্ .
সর্বমৃজাপরিহারৈর্বিবিধোঽভিনযো ভবেত্তস্য .. ৪৯..

চিন্তা নাম
ঐশ্বর্যভ্রংশেষ্টদ্রব্যাপহারদারিদ্র্যাদিভির্বিভাবৈরুত্পদ্যতে .
তামভিনযেন্নিঃশ্বসিতোচ্ছ্বসিতসন্তাপধ্যানাধোমুখচিন্তন-
তনুকার্শ্যাদিভিরনুভাবৈঃ .
অত্রার্যে ভবতঃ –
ঐশ্বর্যভ্রংশেষ্টদ্রব্যক্ষযজা বহুপ্রকারা তু .
হৃদযবিতর্কোপগতা নৄণাং চিন্তা সমুদ্ভবতি .. ৫০..
সোচ্ছ্বাসৈর্নিঃশ্বসিতৈঃ সন্তাপৈশ্চৈব হৃদযশূন্যতযা .
অভিনেতব্যা চিন্তা মৃজাবিহীনৈরধৃত্যা চ .. ৫১..

মোহো নাম দৈবোপঘাতব্যসনাভিঘাতব্যাধিভযাবেগপূর্ববৈরা-
নুস্মরণাদিভির্বিভাবৈঃ সমুত্পদ্যতে . তস্য নিশ্চৈতন্যভ্রমণ-
পতনাঘূর্ণনাদর্শনাদিভিরনুভাবৈরভিনযঃ প্রযোক্তব্যঃ .
অত্র শ্লোকস্তাবদার্যা চ –
অস্থানে তস্করান্দৃষ্ট্বা ত্রাসনৈর্বিবিধৈরপি .
তত্প্রতীকারশূন্যস্য মোহঃ সমুপজাযতে .. ৫২..
ব্যসনাভিঘাতভযপূর্ববৈরসংস্মরণরোগজো মোহঃ .
সর্বেন্দ্রিযসম্মোহাত্তস্যাভিনযঃ প্রযোক্তব্যঃ .. ৫৩..

স্মৃতির্নাম সুখদুঃখকৃতানাং ভাবানামনুস্মরণম্ .
সা চ স্বাস্থ্যজঘন্যরাত্রিনিদ্রাচ্ছেদসমানদর্শনোদাহরণ-
চিন্তাভ্যাসাদিভির্বিভাবৈঃ সমুত্পদ্যতে . তামভিনযে-
চ্ছিরঃকম্পনাবলোকনভ্রূসমুন্নমনাদিভিরনুভাবৈঃ .
অত্রার্যে ভবতঃ –
সুখদুঃখমতিক্রান্তং তথা মতিবিভাবিতং যথাবৃত্তম্ .
চিরবিস্মৃতং স্মরতি যঃ স্মৃতিমানিতি বেদিতব্যোঽসৌ .. ৫৪..
স্বাস্থ্যাভ্যাসসমুত্থা শ্রুতিদর্শনসম্ভবা স্মৃতির্নিপুণৈঃ .
শির উদ্বাহনকম্পৈর্ভূক্ষেপৈশ্চাভিনেতব্যা .. ৫৫..

ধৃতির্নাম শৌর্যবিজ্ঞানশ্রুতিবিভবশৌচাচারগুরুভক্ত্যধিক-
মনোরথার্থলাভক্রীডাদিভির্বিভাবৈঃ সমুত্পদ্যতে .
তামভিনযেত্প্রা-
প্তানাং বিষযাণামুপভোগাদপ্রাপ্তাতীতোপহৃতবিনষ্টানামনু-
শোচনাদিভিরনুভাবৈঃ .
অত্রার্যে ভবতঃ –
বিজ্ঞানশৌচবিভবশ্রুতিশক্তিসমুদ্ভবা ধৃতিঃ সদ্ভিঃ .
ভযশোকবিষদাদ্যৈ রহিতা তু সদা প্রযোক্তব্যা .. ৫৬..
প্রাপ্তানামুপভোগঃ শব্দরসস্পর্শরূপগন্ধানাম্ .
অপ্রাপ্তৈশ্চ ন শোকো যস্যাং হি ভবেদ্ ধৃতিঃ সা তু .. ৫৭..

ব্রীডা নাম অকার্যকরণাত্মিকা . সা চ
গুরুব্যতিক্রমণাবজ্ঞান- প্রতিজ্ঞাতানির্বহনপশ্চাত্তাপাদিভির্বিভাবৈঃ
সমুত্পদ্যতে .
তাং নিগূঢবদনাধোমুখবিচিন্তনোর্বীলেখনবস্ত্রাঙ্গুলীযকস্পর্শ-
নখনিকৃন্তনাদিভিরনুভাবৈরভিনযেত্ .
অত্রার্যে ভবতঃ –
কিঞ্চিদকার্যং কুর্বন্নেবং যো দৃশ্যতে শুচিভিরন্যৈঃ .
পশ্চাত্তাপেন যুতো ব্রীডিত ইতি বেদিতব্যোঽসৌ .. ৫৮..
লজ্জানিগূঢবদনো ভূমিং বিলিখন্নখাংশ্চ বিনিকৃন্তন্ .
বস্ত্রাঙ্গুলীযকানাং সংস্পর্শং ব্রীডিতঃ কুর্যাত্ .. ৫৯..

চপলতা নাম রাগদ্বেষমাত্সর্যামর্ষাপ্রতিকূল্যাদিভির্বিভাবৈঃ
সমুত্পদ্যতে . তস্যাশ্চ বাক্পারুষ্যনির্ভর্ত্সনবধবন্ধসম্প্রহার-
তাডনাদিভিরনুভাবৈরভিনযঃ প্রযোক্তব্যঃ .
অত্রার্যা ভবতি –
অবিমৃশ্য তু যঃ কার্যং পুরুষো বধতাডনং সমারভতে .
অবিনিশ্চিতকারিত্বাত্স তু খলু চপলো বুধৈর্জ্ঞেযঃ .. ৬০..

হর্ষো নাম মনোরথলাভেষ্টজনসমাগমনমনঃপরিতোষদেব-
গুরুরাজভর্তৃপ্রসাদভোজনাচ্ছাদনলাভোপভোগাদিভির্বিভাবৈঃ
সমুত্পদ্যতে . তমভিনযেন্নযনবদনপ্রসাদপ্রিযভাষণালিঙ্গন-
কণ্টকিতপুলকিতাস্রস্বেদাদিভিরনুভাবৈঃ .
অত্রার্যে ভবতঃ –
অপ্রাপ্যে প্রাপ্যে বা লব্ধেঽর্থে প্রিযসমাগমে বাঽপি .
হৃদযমনোরথলাভে হর্ষঃ সঞ্জাযতে পুংসাম্ .. ৬১..
নযনবদনপ্রিযভাষালিঙ্গনৈশ্চ রোমাঞ্চৈঃ .
ললিতৈশ্চাঙ্গবিহারৈঃ স্বেদাদ্যৈরভিনযস্তস্য .. ৬২..

আবেগো নাম উত্পাতবাতবর্ষাকুঞ্জরোদ্ভ্রমণপ্রিযাপ্রিযশ্রবণ-
ব্যসনাভিঘাতাদির্বিভাবৈঃ সমুত্পদ্যতে . তত্রোত্পাতকৃতো নাম
বিদ্যুদুল্কানির্ঘাতপ্রপতনচন্দ্রসূর্যোপরাগকেতুদর্শনকৃতঃ .
তমভিনযেত্সর্বাঙ্গস্রস্ততাবৈমনস্যমুখবৈবর্ণ্যবিষাদ-
বিস্মযাদিভিঃ . বাতকৃতং পুনরবকুণ্ঠনাক্ষিপরিমার্জনবস্ত্র-
সঙ্গূহনত্বরিতগমনাদিভিঃ . বর্ষকৃতং পুনঃ সর্বাঙ্গ-
সম্পিণ্ডনপ্রধাবনচ্ছন্নাশ্রযমার্গণাদিভিঃ . অগ্নিকৃতং তু
ধূমাকুলনেত্রতাঽঙ্গসঙ্কোচনবিধূননাতিক্রান্তাপক্রান্তাদিভিঃ .
কুঞ্জরোদ্ভ্রমণকৃতং নাম ত্বরিতাপসর্পণচঞ্চলগমন-
ভযস্তম্ভবেপথুপশ্চাদবলোকনবিস্মযাদিভিঃ . প্রিযশ্রবণ-
কৃতং
নামাভ্যুত্থানালিঙ্গনবস্ত্রাভরণপ্রদানাশ্রুপুলকিতাদিভিঃ .
অপ্রিযশ্রবণকৃতং নাম ভূমিপতনবিষমবিবর্তনপরিধাবন-
বিলাপনাক্রন্দনাদিভিঃ . ব্যসনাভিঘাতজং তু সহসাপসর্পণ-
শস্ত্রচর্মবর্মধারণগজতুরগরথারোহণসম্প্রধারণাদিভিঃ .
এবমষ্টবিকল্পোঽযমাবেগঃ সম্ভ্রমাত্মকঃ .
স্থের্যেণোত্তমমধ্যানাং নীচানাং চাপসর্পণৈঃ .. ৬৩..
অত্রার্যে ভবতঃ –
অপ্রিযনিবেদনাদ্বা সহসা হ্যবধারিতারিবচনস্য .
শস্ত্রক্ষেপাত্ ত্রাসাদাবেগো নাম সম্ভবতি .. ৬৪..
অপ্রিযনিবেদনাদ্যো বিষাদভাবাশ্রযোঽনুভাবস্য .
সহসারিদর্শনাচ্চেত্পহরণপরিঘট্টনৈঃ কার্যঃ .. ৬৫..

জডতানাম সর্বকার্যাপ্রতিপত্তিঃ . ইষ্টানিষ্টশ্রবণদর্শন-
ব্যাধ্যাদিভির্বিভাবৈঃ সমুত্পদ্যতে . তামভিনযেদকথনাবিভাষণ-
তূষ্ণীম্ভাবাপ্রতিভাঽনিমেষনিরীক্ষণপরবশত্বাদিভিরনুভাবৈঃ .
অত্রার্যা ভবতি –
ইষ্টং বাঽনিষ্টং বা সুখদুঃখে বা ন বেত্তি যো মোহাত্ .
তূষ্ণীকঃ পরবশগো ভবতি স জডসংজ্ঞিতঃ পুরুষঃ .. ৬৬..

গর্বো নাম ঐশ্বর্যকুলরূপযৌবনবিদ্যাবলধনলাভাদিভির্বিভাবৈঃ
সমুত্পদ্যতে . তস্যাসূযাবজ্ঞাঘর্ষণানুত্তরদানাসম্ভাষণা-
ঙ্গাবলোকন বিভ্রমাপহসনবাক্পারুষ্যগুরুব্যতিক্রমণাধি-
ক্ষেপবচনবিচ্ছেদাদিভিরনুভাবৈরভিনযঃ প্রযোক্তব্যঃ
অত্রার্যা ভবতি –
বিদ্যাবাপ্তে রূপাদৈশ্বর্যাদথ ধনাগমাদ্বাপি .
গর্বঃ খলু নীচানাং দৃষ্ট্যঙ্গবিচারণৈঃ কার্যঃ .. ৬৭..

বিষাদো নাম কার্যানিস্তরণদৈবব্যাপত্তিসমুত্থঃ .
তমভিনযেত্সহাযান্বেষণোপাযচিন্তনোত্সাহবিঘাতবৈমনস্য-
নিঃশ্বসিতাদিভিরনুভাবৈরুত্তমমধ্যমানাম্ . অধমানাং তু
বিপরিধাবনালোকনমুখশোষণসৃক্বপরিলেহননিদ্রা-
নিঃশ্বসিতধ্যানাদিভিরনুভাবৈঃ .
অত্রার্যা শ্লোকৌ –
কার্যানিস্তরণাদ্বা চৌর্যাভিগ্রহণরাজদোষাদ্বা .
দৈবাদর্থবিপত্তের্ভবতি বিষাদঃ সদা পুংসাম্ .. ৬৮..
বৈচিত্র্যোপাযচিন্তাভ্যাং কার্য উত্তমমধ্যযোঃ .
নিদ্রানিঃশ্বসিতধ্যানৈরধমানাং তু যোজযেত্ ..৬৯..

ঔত্সুক্যং নাম ইষ্টজনবিযোগানুস্মরণোদ্যানদর্শনা-
দিভির্বিভাবৈঃ সমুত্পদ্যতে . তস্য দীর্ঘনিঃশ্বসিতাধোমুখ-
বিচিন্তননিদ্রাতন্দ্রীশযনাভিলাষাদিভিরনুভবৈরভিনযঃ
প্রযোক্তব্যঃ .
অত্রার্যা ভবতি –
ইষ্টজনস্য বিযোগাদৌত্সুক্যং জাযতে হ্যনুস্মৃত্যা .
চিন্তানিদ্রাতন্দ্রীগাত্রগুরুত্বৈরভিনযোঽস্য .. ৭০..

নিদ্রা নাম দৌর্বল্যশ্রমক্লমমদালস্যচিন্তাঽত্যাহার-
স্বভাবাদিভির্বিভাবৈঃ সমুত্পদ্যতে . তামভিনযেদ্বদন-
গৌরবশরীরাবলোকননেত্রঘূরণনগাত্রবিজৃম্ভন-
মান্দ্যোচ্ছ্বসিতসন্নগাত্রতাঽক্ষিনিমীলনাদিভিরনুভাবৈঃ .
অত্রার্যে ভবতঃ –
আলস্যাদ্দৌর্বল্যাত্ক্লমাচ্ছ্রমাচ্চিন্তনাত্স্বভাবাচ্চ .
রাত্রৌ জাগরণাদপি নিদ্রা পুরুষস্য সম্ভবতি .. ৭১..
তাং মুখগৌরবগাত্রপ্রতিলোলননযনমীলনজডত্বৈঃ .
জৃম্ভণগাত্রবিমর্দৈরনুভাবৈরভিনযেত্প্রাজ্ঞঃ.. ৭২..

অপস্মারো নাম
দেবযক্ষনাগব্রহ্মরাক্ষসভূতপ্রেতপিশাচ- গ্রহণানুস্মরনোচ্ছিষ্টশূন্যাগারসেবনাশুচি-
কালান্তরাপরিপতনব্যাদ্যাদিভির্বিভাবৈঃ সমুত্পদ্যতে .
তস্য স্ফুরিতনিঃশ্বসিতোত্কম্পিতধাবনপতনস্বেদ-
স্তম্ভবদনফেনজিহ্বাপরিলেহনাদিভিরনুভাবৈরভিনযঃ
প্রযোক্তব্যঃ .
অত্রার্যে ভবতঃ –
ভূতপিশাচগ্রহণানুস্মরণোচ্ছিষ্টশূন্যগৃহগমনাঅত্ .
কালান্তরাতিপাতাদশুচেশ্চভবত্যপস্মারঃ .. ৭৩..
সহসা ভূমৌ পতনং প্রবেপনং বদনফেনমোক্ষশ্চ .
নিঃসংজ্ঞস্যোত্থানং রূপাণ্যেতান্যপস্মারে .. ৭৪..

সুপ্তং নাম নিদ্রাভিভববিষযোপগমনক্ষিতিতলশযন-
প্রসারণানুকর্ষণাদিভির্বিভাবৈঃ সমুত্পদ্যতে
নিদ্রাসমুত্থম্ . তদুচ্ছ্বসিতংসন্নগাত্রাক্ষিনিমীলন-
সর্বেন্দ্রিয সম্মোহনোত্স্বপ্নাযিতাদিভিরনুভাবৈরভিনযেত্ .
অত্রার্যে ভবতঃ –
নিদ্রাভিভবেন্দ্রিযোপরমণমোহাইর্হবেত্সুপ্তম্ .
অক্ষিনিমীলনোচ্ছ্বসনৈঃ স্বপ্নাযিতজল্পিতৈঃ কার্যঃ .. ৭৫..
সোচ্ছ্বাসৈর্নিঃশ্বাসৈর্মন্দাক্ষিনিমীলনেন নিশ্চেষ্টঃ .
সর্বেন্দ্রিযসম্মোহাত্সুপ্তং স্বপ্নৈশ্চ যুঞ্জীত .. ৭৬..

বিবোধো নাম আহারপরিণামনিদ্রাচ্ছেদস্বপ্নান্ত-
তীব্রশব্দশ্রবণাদিভির্বিভাবৈঃ সমুত্পদ্যতে .
তমভিনযেজ্জৃম্ভণাক্ষিপরিমর্দনশযনমোক্ষণাদিভিরনুভাবৈঃ .
অত্রার্যা ভবতি –
আহারবিপরিণামাচ্ছব্দস্পর্শাদিভিশ্চ সম্ভূতঃ .
প্রতিবোধস্ত্বভিনেযো জৃম্ভণবদনাক্ষিপরিমর্দৈঃ .. ৭৭..

অমর্ষো নাম বিদ্যৈশ্বর্যশৌর্যবলাধিকৈরধিক্ষিপ্তস্যাবমানিতস্য বা
সমুত্পদ্যতে . তমভিনযেচ্ছিরঃকম্পনপ্রস্বেদনাধোমুখচিন্তন-
ধ্যানাধ্যবসাযোপাযসহাযান্বেষণাদিভিরনুভাবৈঃ .
অত্র শ্লোকৌ –
আক্ষিপ্তানাং সভামধ্যে বিদ্যাশৌর্যবলাধিকৈঃ .
নৄণামুত্সাহসংযোগাদমর্ষো নাম জাযতে .. ৭৮..
উত্সাহাধ্যবসাযাভ্যামধোমুখবিচিন্তনৈঃ .
শিরঃপ্রকম্পস্বেদাদ্যৈস্তং প্রযুঞ্জীত পণ্ডিতঃ .. ৭৯..

অবহিত্থং নাম আকারপ্রচ্ছাদনাত্মকম্ . তচ্চ
লজাভযাপজয-
গৌরবজৈহ্মযাদিভির্বিভাবিঃ সমুত্পদ্যতে .
তস্যান্যথাকথনাবলোকিত-
কথাভঙ্গকৃতকধৈর্যাদিভিরনুভাবৈরভিনযঃ প্রযোক্তব্যঃ .
অত্র শ্লোকো ভবতি –
ধার্ষ্ট্যজৈহ্ম্যাদিসম্ভীতমবহিত্থং ভযত্মকম্ .
তচ্চাগণনযা কার্যং নাতীবোত্তরভাষণাত্ .. ৮০..

উগ্রতা আম চৌর্যাভিগ্রহাণনৃপাপরাধাসত্প্রলাপাদিভির্বিভাবৈঃ
সমুত্পদ্যতে .
তাং চ বধবন্ধনতাডননির্ভত্সনাদিভিরনুভাবৈরভিনযেত্ .
অত্রার্যা ভবতি –
চৌর্যাভিগ্রহনবশান্নৃপাপরাধাদথোগ্রতা ভব্তি .
বধবন্ধতাডনাদিভিরনুভাবৈরভিনযস্তস্যাঃ .. ৮১..
ভবতি চাত্র শ্লোকঃ –
নানাশাত্রার্থবোধেন মতিঃ সংজাযতে নৃণাম্ .
শিষ্যোপদেশার্থকৃতস্তস্যাস্ত্বভিনযো ভবেত্ ..৮২..

ব্যাধির্নাম বাতপিত্তকফসন্নিপাতপ্রভবঃ . তস্য জ্বরাদযো
বিশেষাঃ . জ্বরস্তু দ্বিবিধঃ সশীতঃ সদাহশ্চ .
তত্র সশীতো নাম প্রবেপিতসর্বাঙ্গোপ্কম্পননিকুঞ্চনা-
গ্ন্যভিলাষরোমাঞ্চহনুবলননাসাবিকূননমুখ-
শোষণপরিদেবিতাদিভিরনুভাবৈরভিনেযঃ . সদাহো নাম
বিক্ষিপ্তাঙ্গকরচরণভূম্যভিলাষানুলেপনশীতাভি-
লাষপরিদেবনমুখশোষোত্ক্রুষ্টাদিভিরনুভাবৈঃ .
যে চান্যে ব্যাধযস্তেঽপি খলু মুখবিকূণনগাত্র-
স্তম্ভস্রস্তাক্ষিনিঃশ্বসনস্তনিতোত্ক্রুষ্টবেপনা-
দিভিরনুভাবৈরভিনেযাঃ .
অত্র শ্লোকো ভবতি –
সমাসতস্তু ব্যাধীনাং কর্তব্যোঽভিনযো বুধৈঃ .
স্রস্তাঙ্গগাত্রবিক্ষেপৈস্তথা মুখবিকূণনৈঃ .. ৮৩..

উন্মাদো নাম ইষ্টজনবিযোগবিভবনাশাভিঘাত-
বাতপিত্তশ্লেষ্মপ্রকোপাদিভির্বিভাবৈরুত্পদ্যতে .
তমনিমিত্তহসিতরুদিতোত্ক্রুষ্টাসম্বদ্ধপ্রলাপশযিতোপবিষ্টোত্থিত-
প্রধাবিতনৃত্তগীতপঠিতভস্মপাংস্ববধূলনতৃণনির্মাল্যকুচেল-
চীরঘটককপালশরাবাভরণধারণোপভোগৈরনেকৈশ্চানবস্থিতৈশ্চেষ্টা-
নুকরণাদিভিরনুভাবৈরভিনযেত্ .
অত্রার্যে ভবতঃ –
ইষ্টজনবিভবনাশাদভিঘাতাদ্বাতপিত্তকফকোপাত্ .
বিবিধাচ্চিত্তবিকারাদুন্মাদো নাম সম্ভবতি .. ৮৪..
অনিমিত্তরুদিতহসিতোপবিষ্টগীতপ্রধাবিতোত্ক্রুষ্টৈঃ .
অন্যৈশ্চ বিকারৈরকৃতৈরুন্মাদং সম্প্রযুঞ্জীত .. ৮৫..

মরণং নাম ব্যাধিজমভিঘাতজঞ্চ . তত্র
যদান্ত্রযকৃচ্ছূলদোষবৈষম্য-
গণ্ডপিটকজ্বরবিষূচিকাদিভিরুত্পদ্যতে তদ্ব্যাধিপ্রভবম্ .
অভিঘাতজং তু
শস্ত্রাহিদংশবিষপানশ্বাপদগজতুরগরথপশুযানপাত-
বিনাশপ্রভবম্ . এতযোরভিনযবিশেষান্বক্ষ্যামঃ –
তত্র ব্যাধিজং বিষণ্ণগাঅত্রাব্যাযতাঙ্গবিচেষ্টিতনিমীলিতনযন-
হিক্কাশ্বাসোপেতানবেক্ষিতপরিজনাব্যক্তাক্ষরকথনাদিভিরনুভাবৈরভিনযেত্
.
অত্র শ্লোকো ভবতি –
ব্যাধীনামেকভাবো হি মরণাভিনযঃ স্মৃতঃ .
বিষণ্ণগাত্রৈর্নিশ্চেষ্টৈরিন্দ্রিঅযৈশ্চ বিবর্জিতঃ .. ৮৬..
অভিঘাতজে তু নানাপ্রকারাঅভিনযবিশেষাঃ.
শস্ত্রক্ষতাহিদষ্টবিষপীত-
গজাদিপতিতশ্বাপদহতাঃ . যথা তত্র শস্ত্রক্ষতে তাবত্সহসা
ভূমিপতনবেপন-
স্ফুরণাদিভিরভিনযঃ প্রযোক্তব্যঃ . অহিদষ্টবিষপীতযোর্বিষযোগো
যথা
কার্শ্যবেপথুবিদাহহিক্কাফেনস্কন্ধভঙ্গজডতামরণানীত্যষ্টৌ
বিষবেগাঃ .
অত্র শ্লোকৌ ভবতঃ –
কার্শ্যং তু প্রথমে বেগে দ্বিতীযে বেপথুর্ভবেত্ .
দাহং তৃতীযে হিক্কাং চ চতুর্থে সম্প্রযোজযেত্ .. ৮৭..
ফেনঞ্চ পঞ্চমে কুর্যাত্ষষ্ঠে স্কন্ধস্য ভঞ্জনম্ .
জডতাং সপ্তমে কুর্যাদষ্টমে মরণং ভবেত্ .. ৮৮..
অত্রার্যা ভবতি –
শ্বাপদগজতুরগরথোদ্ভবং তু পশুযানপতনজং বাঽপি .
শাস্ত্রক্ষতবত্কুর্যাদনবেক্ষিতগাত্রসঞ্চারম্ .. ৮৯..
ইত্যেব মরণং জ্ঞেযং নানাবস্থান্তরাত্মকম্ .
প্রযোক্তব্যং বুধৈঃ সম্যগ্যথা ভবাঙ্গচেষ্টিতৈঃ .. ৯০..

ত্রাসো নাম বিদ্যুদুল্কাশনিপাতনির্ঘাতাম্বুধরমহাসত্ত্বপশু-
রবাদিভির্বিভাবৈরুত্পদ্যতে . তমভিনযেত্সংক্ষিপ্তাঙ্গোত্কম্পনবেপথু-
স্তম্ভরোমাঞ্চগদ্গদপ্রলাপাদিভিরনুভাবৈঃ .
অত্র শ্লোকো ভবতি –
মহাভৈরবনাদদ্যৈস্ত্রাসঃ সমুপজাযতে .
স্রস্তাঙ্গাক্ষিনিমেষৈশ্চ তস্য ত্বভিনযো ভবেত্ .. ৯১..

বিতর্কো নাম সন্দেহবিমর্শবিপ্রতিপত্ত্যাদিভির্বিভাবৈরুত্পদ্যতে .
তমভিন-
যেদ্বিবিধবিচারিতপ্রশ্নসম্প্রধারণমন্ত্রসঙ্গূহনাদিভিরনুভাবৈঃ
.
অত্র শ্লোকো ভবতি –
বিচারণাদিসম্ভূতঃ সন্দেহাতিশযাত্মকঃ .
বিতর্কঃ সোঽভিনেযস্তু শিরোভ্রূক্ষেপকম্পনৈঃ .. ৯২..

এবমেতে ত্রযস্ত্রিংশদ্ব্যভিচারিণো ভাবা দেশকালাবস্থা-
নুরূপ্যেণামগতপরগতমধ্যস্থা উত্তমমধ্যমাধমৈঃ
স্ত্রীপুংসৈঃ স্বপ্রযোগবশাদুপপাদ্যা ইতি .
ত্রযস্ত্রিংশদিমে ভাবা বিজ্ঞেযা ব্যভিচারিণঃ .
সাত্ত্বিকাংস্তু পুনর্ভাবান্প্রবক্ষ্যাম্যনুপূর্বশঃ .. ৯৩..

অত্রাহ – কিমন্যে ভাবাঃ সত্ত্বেন বিনাঽভিনীযন্তে যস্মাদুচ্যতে
এতে সাত্ত্বিকা ইতি . অত্রোচ্যতে –
ইহ হি সত্ত্বং নাম মনঃপ্রভবম্ . তচ্চ সমাহিতমনস্ত্বাদুচ্যতে
.
মনসঃ সমাধৌ সত্ত্বনিষ্পত্তির্ভবতি . তস্য চ যোঽসৌ স্বভাবো
রোমাঞ্চাশ্রুবৈবর্ণ্যাদিলক্ষণো যথাভাবোপগতঃ স ন
শক্যোঽন্যমনসা
কর্তুমিতি . লোকস্বভাবানুকরণত্বাচ্চ নাট্যস্য সত্ত্বমীপ্সিতম্ .
কো দৃষ্টান্তঃ – ইহ হি নাট্যাধর্মিপ্রবৃত্তাঃ সুখদুঃখকৃতা
ভাবাস্তথা
সত্ত্ববিশুদ্ধাঃ কার্যা যথা সরূপা ভবন্তি . তত্র দুঃখং নাম
রোদনাত্মকং
তত্কথমদুঃখিতেন সুখং চ প্রহর্ষাত্মকমসুখিতেন বাভিনেযম্ .
এতদেবাস্য সত্ত্বং যত্ দুঃখিতেন সুখিতেন বাঽশ্রুরোমাঞ্চৌ
দর্শিযিতব্যৌ
ইতি কৃত্বা সাত্ত্বিকা ভাবা ইত্যভিব্যাখ্যাতাঃ . ত ইমে –
স্তম্ভঃ স্বেদোঽথ রোমাঅঞ্চঃ স্বরভেদোঽথ বেপথুঃ .
বৈবর্ণ্যমশ্রুপ্রলয ইত্যষ্টৌ সাত্ত্বিকা মতাঃ .. ৯৪..
অত্রার্যাঃ . তত্র –
ক্রোধভযহর্ষলজাদুঃখশ্রমরোগতাপঘাতেভ্যঃ .
ব্যাযামক্লমধর্মৈঃ স্বেদঃ সম্পীডনাচ্চৈব .. ৯৫..
হর্ষভযশোকবিস্মযবিষাদরোষাদিসম্ভবঃ স্তম্ভঃ .
শীতভযহর্ষরোষস্পর্শজরারোগজঃ কম্পঃ .. ৯৬..
আনন্দামর্ষাভ্যাং ধূমাঞ্জনজৃম্ভণাদ্ভযাচ্ছোকাত্ .
অনিমেষপ্রেক্ষণতঃ শীতাদ্রোগাদ্ভবেদশ্রু .. ৯৭..
শীতক্রোধভযশ্রমরোগক্লমতাপজং চ বৈবর্ণ্যম্ .
স্পর্শভযশীতহর্ষাত্ ক্রোধাদ্রোগাচ্চ রোমাঞ্চঃ .. ৯৮..
স্বরভেদো ভযহর্ষক্রোধজরারৌক্ষ্যরোগমদজনিতঃ .
শ্রমমূর্ছমদনিদ্রাভিঘাতমোহাদিভিঃ প্রলযঃ .. ৯৯..
এবমেতে বুধৈর্জ্ঞেযা ভাবা হ্যষ্টৌ তু সাত্ত্বিকাঃ .
কর্ম চৈষাং প্রবক্ষ্যামি রসভাবানুভাবকম্ .. ১০০..
নিঃসংজ্ঞো নিষ্প্রকম্পশ্চ স্থিতঃ শূন্যজডাকৃতিঃ .
স্কন্নগাত্রতযা চৈব স্তম্ভং ত্বভিনযেদ্বুধঃ .. ১০১..
ব্যজনগ্রহণাচ্চাপি স্বেদাপনযনেন চ .
স্বেদস্যাভিনযো যোজ্যস্তথা বাতাভিলাষতঃ .. ১০২..
মুহুঃ কণ্টিকিতত্বেন তথোল্লুকসনেন চ .
পুলকেন চ রোমাঞ্চং গাত্রস্পর্শেন দর্শযেত্ .. ১০৩..
স্বরভেদোঽভিনেতব্যো ভিন্নগদ্গদনিস্বনৈঃ .
বেপনাত্স্ফুরণাত্কম্পাদ্বেপথুং সম্প্রদর্শযেত্ .. ১০৪..
মুখবর্ণপরাবৃত্ত্যা নাডীপীডনযোগতঃ .
বৈবর্ণ্যমভিনেতব্যং প্রযত্নাত্তদ্ধি দুষ্করম্ .. ১০৫..
বাষ্পাম্বুপ্লুতনেত্রত্বান্নেত্রসংমার্জনেন চ .
মুহুরশ্রুকণাপাতৈরস্রং ত্বভিনযেদ্বুধঃ ..১০৬..
নিশ্চেষ্টো নিষ্প্রকম্পত্বাদব্যক্তশ্বসিতাদপি .
মহীনিপতনাচ্চাপি প্রলযাভিনযো ভবেত্ .. ১০৭..

একোনপঞ্চাশদিমে যথাবদ্ভাবাস্ত্র্যবস্থা গদিতা মযেহ .
ভূযশ্চ যে যত্র রসে নিযোজ্যাস্তান্ শ্রোতুমর্হন্তি চ বিপ্রমুখ্যাঃ
.. ১০৮..

[অত্র শ্লোকাঃ –
শঙ্কাব্যাধিস্তথাগ্লানিশ্চিন্তাসূযা ভযং তথা .
বিস্মযশ্চ বিতর্কশ্চ স্তম্ভশ্চপলতা তথা ..
রোমাঞ্চহর্ষৌ নিদ্রা চ তথোন্মাদমদাবপি .
স্বেদশ্চৈবাবহিত্থং চ প্রলযো বেপথুস্তথা ..
বিষাদশ্রমনির্বেদা গর্বাবেগৌ ধৃতিঃ স্মৃতিঃ .
মতির্মোহো বিবোধশ্চ সুপ্তমৌত্সুক্যবর্জিতে ..
ক্রোধামর্ষৌ চ হাসশ্চ শোকোঽপস্মার এব চ .
দৈন্যং চ মরণং চৈব রতিরুত্সাহসংযুতা ..
ত্রাসবৈবর্ণ্যরুদিতৈঃ স্বরভেদঃ শমোঽপি চ .
জডতা চ তথা ষট্ চ চত্বারিংশত্প্রকীর্তিতাঃ ..]
আলস্যৌগ্র্যজুগুপ্সাখ্যৈরেবং ভাবৈস্তু বর্জিতাঃ .
উদ্ভাবযন্তি শৃঙ্গারং সর্বে ভাবাঃ স্বসংজ্ঞযা .. ১০৯..
[যথাঽবসরমেতে হি স্থাযিসঞ্চারিসত্ত্বজাঃ .
উদ্দীপযন্তি শৃঙ্গারং রসমাসাদ্য সংজ্ঞিতম্ ..]
গ্লানিঃ শঙ্কা হ্যসূযা চ শ্রমশ্চপলতা তথা .
সুপ্তং নিদ্রাবহিত্থং চ হাস্যে ভাবাঃ প্রকীর্তিতাঃ .. ১১০..
নির্বেদশ্চৈব চিন্তা চ দৈন্যং গ্লান্যাস্রমেব চ
জডতা মরণং চৈব ব্যাধিশ্চ করুণে স্মৃতাঃ .. ১১১..
গর্বোঽসূযা মদোত্সাহাবাবেগোঽমর্ষ এব চ .
ক্রোধশ্চপলতৌগ্র্যং চ বিজ্ঞেযা রৌদ্রসম্ভবাঃ .. ১১২..
অসম্মোহস্তথোত্সাহ আবেগো হর্ষ এব চ .
মতিশ্চৈব তথোগ্রত্বমমর্ষো মদ এব চ .. ১১৩..
রোমাঞ্চঃ স্বরভেদশ্চ ক্রোধোঽসূযা ধৃতিস্তথা .
গর্বশ্চৈব বিতর্কশ্চ বীরে ভাবা ভবন্তি হি .. ১১৪..
স্বেদশ্চ বেপথুশ্চৈব রোমাঞ্চো গদ্গদস্তথা .
ত্রাসশ্চ মরণশ্চৈঅব বৈবর্ণ্যং চ ভযানকে .. ১১৫..
অপস্মারস্তথোন্মাদো বিষাদো মদ এব চ .
মৃত্যুর্ব্যাধির্ভযং চৈব ভাবা বীভত্সসংশ্রযাঃ .. ১১৬..
স্তম্ভঃ স্বেদশ্চ মোহশ্চ রোমাঞ্চো বিস্মযস্তথা .
আবেগো জডতা হর্ষো মূর্ছা চৈবাদ্ভুতাশ্রযাঃ .. ১১৭..
যে ত্বেতে সাত্ত্বিকা ভাবা নানাভিনযসংশ্রিতাঃ .
রসেষ্বেতেষু সর্বে তে জ্ঞেযা নাট্যপ্রযোক্তৃভিঃ .. ১১৮..
ন হ্যেকরসজং কাব্যং কিঞ্চিদস্তি প্রযোগতঃ .
ভাবো বাপি রসো বাপি প্রবৃত্তির্বৃত্তিরেব চ .. ১১৯..
[বহূনাং সমবেতানাং রূপং যস্য ভবেদ্বহু .
স মন্তব্যো রসঃ স্থাযী শেষাঃ সঞ্চারিণো মতাঃ ..
দীপযন্তঃ প্রবর্তন্তে যে পুনঃ স্থাযিনং রসম্ .
তে তু সঞ্চারিণো জ্ঞেযাস্তে হি স্থাযিত্বমাগতাঃ ..
বিভাবানুভাবযুতো হ্যঙ্গবস্তুসমাশ্রযঃ .
সংচারিভিস্তু সংযুক্তঃ স্থায্যেব তু রসো ভবেত্ ..
স্থাযী সত্ত্বাতিরেকেণ প্রযোক্তব্যঃ প্রযোক্তৃভিঃ .
সঞ্চার্যাকারমাত্রেণ স্থাযী যস্মাদবস্থিতঃ ..
যে ত্বেতে সাত্ত্বিকা ভাবা নানাভিনযযোজিতাঃ .
রসেষ্বেতেষু সর্বেষু তে জ্ঞেযা নাট্যকোবিদৈঃ ..
ন হ্যেকরসজং কাব্যং নৈকভাবৈকবৃত্তিকম্ .
বিমর্দে রাগমাযাতি প্রযুক্তং হি প্রযত্নতঃ ..
ভাবা বাঽপি রসা বাঽপি প্রবৃত্তির্বৃত্তিরেব বা .
বীভত্সাদ্ভুতশান্তানাং ত্রৈবিধ্যং নাত্র কথ্যতে ..
ষণ্ণাং রসানাং ত্রৈবিধ্যং নানাভাবারসান্বিতম্ .
সত্ত্বপ্রযোজিতো হ্যর্থঃ প্রযোগোঽত্র বিরাজতে ..
বিদিত্বা হি বিরাজন্তে লোকে চিত্রং হি দুর্লভম্ ..]
নানাভাবার্থসংপন্নাঃ স্থাযিসত্ত্বাভিচারিণঃ .
পুষ্পাবকীর্ণাঃ কর্তব্যাঃ কাব্যেষু হি রসা বুধৈঃ .. ১২০..
এবং রসাশ্চ ভাবাশ্চ ব্যবস্থা নাটকে স্মৃতাঃ .
য এবমেতাঞ্জানাতি স গচ্ছেত্সিদ্ধিমুত্তমাম্ .. ১২১..

ইতি শ্রীভারতীযে নাট্যশাস্ত্রে ভাবব্যঞ্জকো নাম সপ্তমোঽধ্যাযঃ ..