নাট্যশাস্ত্রম্ অধ্যায ০৫ – ১

.. নাট্যশাস্ত্রম্ অধ্যায ৫ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ পূর্বরঙ্গবিধানো নাম পঞ্চমোঽধ্যাযঃ .

ভরতস্য বচঃ শ্রুত্বা নাট্যসন্তানকারণম্ .
পুনরেবাব্রুবন্বাক্যমৃষযো হৃষ্টমানসাঃ .. ১..
যথা নাট্যস্য জন্মেদং জর্জরস্য চ সম্ভবঃ .
বিঘ্নানাং শমনং চৈব দৈবতানাং চ পূজনম্ .. ২..
তদস্মাভিঃ শ্রুতং সর্বং গৃহীত্বা চাবধারিতম্ .
নিখিলেন যথাতত্ত্বমিচ্ছামো বেদিতুং পুনঃ .. ৩..
পূর্বরঙ্গং মহাতেজঃ সর্বলক্ষণসংযুতম্ .
যথা বুদ্ধ্যামহে ব্রহ্মংস্তথা ব্যাখ্যাতুমর্হসি .. ৪..
তেষাং তু বচনং শ্রুত্বা মুনীনাং ভরতো মুনিঃ .
প্রত্যুবাচ পুনর্বাক্যং পূর্বরঙ্গবিধিং প্রতি .. ৫..
পূর্বরঙ্গং মহাভাগা গদতো মে নিবোধত .
পাদভাগাঃ কলাশ্চৈব পরিবর্তাস্তথৈব চ .. ৬..
যস্মাদ্রঙ্গে প্রযোগোঽযং পূর্বমেব প্রযুজ্যতে .
তস্মাদযং পূর্বরঙ্গো বিজ্ঞেযো দ্বিজসত্তমাঃ .. ৭..
অস্যাঙ্গানি তু কার্যাণি যথাবদনুপূর্বশঃ .
তন্ত্রীভাণ্ডসমাযোঅগৈঃ পাঠ্যযোগকৃতৈস্তথা .. ৮..
প্রত্যাহারোঽবতরণং তথা হ্যারম্ভ এব চ .
আশ্রাবণা বক্ত্রপাণিস্তথা চ পরিঘট্টনা .. ৯..
সঙ্ঘোটনা ততঃ কার্যা মার্গাসারিতমেব চ .
জ্যেষ্ঠমধ্যকনিষ্ঠানি তথৈবাসারতানি চ .. ১০..
এতাঅনি তু বহির্গীতান্যন্তর্যবনিকাগতৈঃ .
প্রযোক্তৃভিঃ প্রযোজ্যানি তন্ত্রীভাণ্ডকৃতানি চ ..১১..
ততঃ সর্বৈস্তু কুতপৈঃ সংযুক্তানীহ কারযেত্ .
বিঘট্য বৈ যবনিকাং নৃত্তপাঠ্যকৃতানি তু .. ১২..
গীতানাং মদ্রকাদীনাং যোজ্যমেকং তু গীতকম্ .
বর্ধমানমথাপীহ তাণ্ডবং যত্র যুজ্যতে .. ১৩..
ততশ্চোত্থাপনং কার্যং পরিবর্তনমেব চ .
নান্দী শুষ্কাবকৃষ্টা চ রঙ্গদ্বারং তথৈব চ .. ১৪..
চারি চৈব ততঃ কার্যা মহাচারী তথৈব চ .
ত্রিকং প্ররোচনাং চাপি পূর্বরঙ্গে ভবন্তি হি .. ১৫..
এতান্যঙ্গানি কার্যাণি পূর্বরঙ্গবিধৌ দ্বিজাঃ .
এতেষাং লক্ষণমহং ব্যাখ্যাস্যাম্যনুপূর্বশঃ .. ১৬..
কুতপস্য তু বিন্যাসঃ প্রত্যাহার ইতি স্মৃতঃ .
তথাবতরণং প্রোক্তং গাযিকানাং নিবেশনম্ .. ১৭..
পরিগীতক্রিযারম্ভ আরম্ভ ইতি কীর্তিতঃ .
আতোদ্যরঞ্জনার্থং তু ভবেদাশ্রাবণাবিধিঃ .. ১৮..
বাদ্যবৃত্তিবিভাগার্থং বক্ত্রপাণির্বিধীযতে .
তন্ত্র্যোজঃকরণার্থং তু ভবেচ্চ পরিঘট্টনা .. ১৯..
তথা পাণিবিভাগার্থং ভবেত্সংঘোটনাবিধিঃ .
তন্ত্রীভাণ্ডসমাযোগান্মার্গাসারিতমিষ্যতে .. ২০..
কলাপাতবিভাগার্থং ভবেদাসারিতক্রিযা .
কীর্তনাদ্দেবতানাং চ জ্ঞেযো গীতবিধিস্তথা .. ২১..
[অতঃ পরং প্রবক্ষ্যমি হ্যুত্থাপনবিধিক্রিযাম্ .]
যস্মাদুত্থাপযন্ত্যত্র প্রযোগং নান্দিপাঠকাঃ .
পূর্বমেব তু রঙ্গেঽস্মিংস্তস্মাদুত্থাপনং স্মৃতম্ .. ২২..
যস্মাচ্চ লোকপালানাং পরিবৃত্য চতুর্দিশম্ .
বন্দনানি প্রকুর্বন্তি তস্মাচ্চ পরিবর্তনম্ .. ২৩..
আশীর্বচনসংযুক্তা নিত্যং যস্মাত্প্রযুজ্যতে .
দেবদ্বিজনৃপাদীনাং তস্মান্নান্দীতি সংজ্ঞিতা .. ২৪..
অত্র শুষ্কাক্ষরৈরেব হ্যবকৃষ্টা ধ্রুবা যতঃ .
তস্মাচ্ছুষ্কাবকৃষ্টেযং জর্জরশ্লোকদর্শিতা .. ২৫..
যস্মাদভিনযস্ত্বত্র প্রথমং হ্যবতার্যতে .
রঙ্গদ্বারমতো জ্ঞেযং বাগঙ্গাভিনযাত্মকম্ .. ২৬..
শৃঙ্গারস্য প্রচরণাচ্চারী সম্পরিকীর্তিতা .
রৌদ্রপ্রচরণাচ্চাপি মহাচারীতি কীর্তিতা .. ২৭..
বিদূষকঃ সূত্রধারস্তথা বৈ পারিপার্শ্বকঃ .
যত্র কুর্বন্তি সঞ্জল্পং তচ্চাপি ত্রিগতং মতম্ .. ২৮..
উপক্ষেপেণ কাব্যস্য হেতুযুক্তিসমাশ্রযা .
সিদ্ধেনামন্ত্রণা যা তু বিজ্ঞেযা স প্ররোচনা .. ২৯..
অতঃ পরং প্রবক্ষ্যামি হ্যাশ্রাবণবিধিক্রিযাম্ .
বহির্গীতবিধৌ সম্যগুত্পত্তিং কারণং তথা .. ৩০..
চিত্রদক্ষিণবৃতৌ তু সপ্তরূপে প্রবর্তিতে .
সোপোহনে সনির্গীতে দেবস্তুত্যভিনন্দিতে .. ৩১..
নারদাদ্যৈস্তু গন্ধর্বৈঃ সভাযাং দেবদানবাঃ .
নির্গীতং শ্রাবিতাঃ সম্যগ্লযতালসমন্বিতম্ .. ৩২..
তচ্ছ্রুত্বা তু সুখং গানং দেবস্তুত্যভিনন্দিতম্
অভবন্ক্ষুভিতাঃ সর্বে মাত্সর্যাদ্দৈত্যরাক্ষসাঃ .. ৩৩..
সম্প্রধার্য চ তেঽন্যোন্যমিত্যবোচন্নবস্থিতাঃ .
নির্গীতং তু সবাদিত্রমিদং গৃহ্ণীমহে বযম্ ..৩৪..
সপ্তরূপেণ সন্তুষ্টা দেবাঃ কর্মানুকীর্তনাত্ .
বযং গৃহ্ণীম নির্গীতং তুষ্যামোঽত্রৈব সর্বদা .. ৩৫..
তে তত্র তুষ্টা দৈত্যাস্তু সাধযন্তি পুনঃ পুনঃ .
রুষ্টাশ্চাপি ততো দেবাঃ প্রত্যভাষন্ত নারদম্ .. ৩৬..
এতে তুষ্যন্তি নির্গীতে দানবা সহ রাক্ষসৈঃ .
প্রণশ্যতু প্রযোগোঽযং কথং বা মন্যতে ভবান্ .. ৩৭..
দেবানাং বচনং শ্রুত্বা নারদো বাক্যমব্রবীত্ .
ধাতুবাদ্যাশ্রযকৃতং নির্গীতং মা প্রণশ্যতু .. ৩৮..
কিন্তূপোহনসংযুক্তং ধাতুবাদ্যবিভূষিতম্ .
ভবিষ্যতীদং নির্গীতং সপ্তরূপবিধানতঃ .. ৩৯..
নির্গীতেনাববদ্ধাশ্চ দৈত্যদানবরাক্ষসাঃ .
ন ক্ষোভং ন বিঘাতং চ করিষ্যন্তীহ তোষিতাঃ .. ৪০..
এবং নির্গীতমেতত্তু দৈত্যানাং স্পর্ধযা দ্বিজাঃ .
দেবানাং বহুমানেন বহির্গীতমিতি স্মৃতম্ .. ৪১..
ধাতুভিশ্চিত্রবীণাযাং গুরুলঘ্বক্ষরান্বিতম্ .
বর্ণালঙ্কারসংযুক্তং প্রযোক্তব্যং বুধৈরথ.. ৪২..
নির্গীতং গেযতে যস্মাদপদং বর্ণযোজনাত্ .
অসূযযা চ দেবানাং বহির্গীতমিদং স্মৃতম্ ..৪৩..
নির্গীতং যন্মযা প্রোক্তং সপ্তরূপসমন্বিতম্ .
উত্থাপনাদিকং যচ্চ তস্য কারণমুচ্যতে .. ৪৪..
আশ্রাবণাযাং যুক্তাযাং দৈত্যাস্তুষ্যন্তি নিত্যশঃ .
বক্ত্রপাণৌ কৃতে চৈব নিত্যং তুষ্যন্তি দানবাঃ .. ৪৫..
পরিঘট্টনযা তুষ্টা যুক্তাযাং রাক্ষসাং গণাঃ .
সঙ্ঘোটনক্রিযাযাং চ তুষ্যন্ত্যপি চ গুহ্যকাঃ .. ৪৬..
মার্গাসারিতমাসাদ্য তুষ্টা যক্ষা ভবন্তি হি .
গীতকেষু প্রযুক্তেষু দেবাস্তুষ্যন্তি নিত্যশঃ ..৪৭..
বর্ধমানে প্রযুক্তে তু রুদ্রস্তুষ্যতি সানুগঃ .
তথা চোত্থাপনে যুক্তে ব্রহ্মা তুষ্টো ভবেদিহ .. ৪৮..
তুষ্যন্তি লোকপালাশ্চ প্রযুক্তে পরিবর্তনে .
নান্দীপ্রযোগেঽথ কৃতে প্রীতো ভবতি চন্দ্রমাঃ .. ৪৯..
যুক্তাযামবকৃষ্টাযাং প্রীতা নাগা ভবন্তি হি .
তথা শুষ্কাবকৃষ্টাযাং প্রীতঃ পিতৃগণো ভবেত্ ..৫০..
রঙ্গদ্বারে প্রযুক্তে তু বিষ্ণুঃ প্রীতো ভবেদিহ .
জর্জরস্য প্রযোগে তু তুষ্টা বিঘ্নবিনাযকাঃ .. ৫১..
তথা চার্যা প্রযুক্তাযামুমা তুষ্টা ভবেদিহ .
মহাচার্যা প্রযুক্তাযাং তুষ্টো ভূতগণো ভবেত্ .. ৫২..
আশ্রাবণাদিচার্যন্তমেতদ্দৈবতপূজনম্ .
পূর্বরঙ্গে মযা খ্যাতং তথা চাঙ্গবিকল্পনম্ .. ৫৩..
দেবস্তুষ্যন্তি যো যেন যস্য যন্মনসঃ প্রিযম্ .
তত্তথা পূর্বরঙ্গে তু মযা প্রোকং দ্বিজোত্তমাঃ .. ৫৪..
সর্বদৈবতপূজার্হং সর্বদৈবতপূজনম্ .
ধন্যং যশস্যমাযুষ্যং পূর্বরঙ্গপ্রবর্তনম্ ..৫৫..
দৈত্যদানবতুষ্ট্যর্থং সর্বেষাং চ দিবৌকসাম্ .
নির্গীতানি সগীতানি পূর্বরঙ্গকৃতানি তু .. ৫৬..
[যা বিদ্যা যানি শিল্পানি যা গতির্যশ্চ চেষ্টিতম্ .
লোকালোকস্য জগতস্তদস্মিন্নাটকাশ্রযে .. ]
নির্গীতানাং সগীতানাং বর্ধমানস্য চৈব হি .
ধ্রুবাবিধানে বক্ষ্যামি লক্ষণং কর্ম চৈব হি .. ৫৭..
প্রযুজ্য গীতকবিধিং বর্ধমানমথাপি চ .
গীতকান্তে ততশ্চাপি কার্যা হ্যুত্থাপনী ধ্রুবা .. ৫৮..
অদৌ দ্বে চ চতুর্থং চাপ্যষ্টমৈকাদশে তথা .
গুর্বক্ষরাণি জানীযত্পাদে হ্যেকাদশে তথা .. ৫৯..
চতুষ্পদা ভবেত্সা তু চতুরশ্রা তথৈব চ .
চতুর্ভিস্সন্নিপাতৈশ্চ ত্রিলযা ত্রিযতিস্তথা .. ৬০..
পরিবর্তাশ্চ চত্বারঃ পাণযস্ত্রয এব চ .
জাত্যা চৈব হি বিশ্লোকা তাং চ তালেন যোজযেত্ .. ৬১..
শম্যা তু দ্বিকলা কার্যা তলো দ্বিকল এব চ .
পুনশ্চৈককলা শম্যা সন্নিপাতঃ কলাত্রযম্ .. ৬২..
এবমষ্টকলঃ কার্যঃ সন্নিপাতো বিঅচক্ষণৈঃ .
চত্বারঃ সন্নিপাতাশ্চ পরিবর্তঃ স উচ্যতে .. ৬৩..
পূর্বং স্থিতলযঃ কার্যঃ পরিবর্তো বিচক্ষণৈঃ .
তৃতীযে সন্নিপাতে তু তস্যা ভাণ্ডগ্রহো ভবেত্ .. ৬৪..
একস্মিন্পরিবর্তে তু গতে প্রাপ্তে দ্বিতীযকে .
কার্যং মধ্যলযে তজ্জ্ঞৈঃ সূত্রধারপ্রবেশনম্ .. ৬৫..
পুষ্পাঞ্জলিং সমাদায রক্ষামঙ্গলসংস্কৃতাঃ .
শুদ্ধবস্ত্রাঃ সুমনসস্তথা চাদ্ভুতদৃষ্টযঃ .. ৬৬..
স্থানন্তু বৈষ্ণবং কৃত্বা সৌষ্ঠবাঙ্গপুরস্কৃতম্ .
দীক্ষিতাঃ শুচযশ্চৈব প্রবিশেযুঃ সমং ত্রযঃ .. ৬৭..
ভৃঙ্গারজর্জরধরৌ ভবেতাং পারিপার্শ্বিকৌ .
মধ্যে তু সূত্রভৃত্তাভ্যাং বৃত্তঃ পঞ্চপদীং ব্রজেত্ .. ৬৮..
পদানি পঞ্চ গচ্ছেযুর্ব্রহ্মণো যজনেচ্ছযা .
পদানাঞ্চাপি বিক্ষেপং ব্যাখ্যাস্যাম্যনুপূর্বশঃ .. ৬৯..
ত্রিতালান্তরবিষ্কম্ভমুত্ক্ষিপেচ্চরণং শনৈঃ
পার্শ্বোত্থানোত্থিতং চৈব তন্মধ্যে পাতযেত্পুনঃ .. ৭০..
এবং পঞ্চপদীং গত্বা সূত্রধারঃ সহেতরঃ .
সূচীং বামপদে দদ্যাদ্বিক্ষেপং দক্ষিণেন চ .. ৭১..
পুষ্পাঞ্জল্যপবর্গশ্চ কার্যো ব্রাহ্মেঽথ মণ্ডলে .
রঙ্গপীঠস্য মধ্যে তু স্বযং ব্রহ্মা প্রতিষ্ঠিতঃ .. ৭২..
ততঃ সললিতৈর্হস্তৈরভিবন্দ্য পিতামহম্ .
অভিবাদানি কার্যাণি ত্রীণি হস্তেন ভূতলে .. ৭৩..
কালপ্রকর্ষহেতোশ্চ পাদানাং প্রবিভাগতঃ .
সূত্রধারপ্রবেশাদ্যো বন্দনাভিনযান্তকঃ .. ৭৪..
দ্বিতীযঃ পরিবর্তস্তু কার্যো মধ্যলযাশ্রিতঃ .
ততঃ পরং তৃতীযে তু মণ্ডলস্য প্রদক্ষিণম্ ..৭৫..
ভবেদাচমনং চৈব জর্জরগ্রহণং তথা .
উত্থায মণ্ডলাত্তূর্ণং দক্ষিণং পাদমুদ্ধরেত্ ..৭৬..
বেধং তেনৈব কুর্বীত বিক্ষেপং বামকেন চ .
পুনশ্চ দক্ষিণং পাদং পার্শ্বসংস্থং সমুদ্ধরেত্ .. ৭৭..
ততশ্চ বামবেধস্তু বিক্ষেপো দক্ষিণস্য চ .
ইত্যনেন বিধানেন সম্যক্কৃত্বা প্রদিক্ষণম্ .. ৭৮..
ভৃঙ্গারভৃতমাহূয শৌচং চাপি সমাচরেত্ .
যথান্যাযং তু কর্তব্যা তেন হ্যাচমনক্রিযা .. ৭৯..
আত্মপ্রোক্ষণমেবাদ্ভিঃ কর্তব্যং তু যথাক্রমম্ .
প্রযত্নকৃতশৌচেন সূত্রধারেণ যত্নতঃ .. ৮০..
সন্নিপাতসমং গ্রাহ্যো জর্জরো বিঘ্নজর্জরঃ .
প্রদক্ষিণাদ্যো বিজ্ঞেযো জর্জরগ্রহণান্তকঃ ..৮১..
তৃতীযঃ পরিবর্তস্তু বিজ্ঞেযো বৈ দ্রুতে লযে .
গৃহীত্বা জর্জরং ত্বষ্টৌ কলা জপ্যং প্রযোজযেত্ .. ৮২..
বামবেধং ততঃ কুর্যাদ্বিক্ষেপং দক্ষিণস্য চ .
ততঃ পঞ্চপদীং চৈব গচ্ছেত্তু কুতপোন্মুখঃ .. ৮৩..
বামবেধস্তু তত্রাপি বিক্ষেপো দক্ষিণস্য তু .
জর্জরগ্রহণাদ্যোঽযং কুতপাভিমুখান্তকঃ .. ৮৪..
চতুর্থঃ পরিবর্তস্তু কার্যো দ্রুতলযে পুনঃ .
করপাদনিপাতাস্তু ভব্ন্ত্যত্র তু ষোডশ .. ৮৫..
ত্র্যশ্রে দ্বাদশ পাতাস্তু ভবন্তি করপাদযোঃ .
বন্দনান্যথ কার্যাণি ত্রীণি হস্তেন ভূতলে .. ৮৬..
আত্মপ্রোক্ষণমদ্ভিশ্চ ত্র্যশ্রে নৈব বিধীযতে .
এবমুত্থাপনং কার্যং ততস্তু পরিবর্তনম্ .. ৮৭..
চতুরশ্রং লযে মধ্যে সন্নিপাতৈরথাষ্টভিঃ .
যস্যা লঘূনি সর্বাণি কেবলং নৈধনং গুরু .. ৮৮..
ভবেদতিজগত্যান্তু সা ধ্রুবা পরিবর্তনী .
বার্তিকেন তু মার্গেণ বাদ্যেনানুগতেন চ .. ৮৯..
ললিতৈঃ পাদবিন্যাসৈর্বন্দ্যা দেবা যথাদিশম্ .
দ্বিকলং পাঅদপতনং পাদচার্যা গতং ভবেত্ . ৯০..
বামপাদেন বেধস্তু কর্তব্যো নৃত্তযোক্তৃভিঃ .
দ্বিতালান্তরবিষ্কম্ভো বিক্ষেপো দক্ষিণস্য চ .. ৯১..
ততঃ পঞ্চপদীং গচ্ছেদতিক্রান্তৈঃ পদরথ .
ততোঽভিবাদনং কুর্যাদ্দেবতানাং যথাদিশম্ ..৯২..
বন্দেত প্রথমং পূর্বাং দিশং শক্রাধিদৈবতাম্ .
দ্বিতীযাং দক্ষিণামাশাং বন্দেত যমদেবতাম্ .. ৯৩..
বন্দেত পশ্চিমামাশাং ততো বরুণদৈবতাম্ .
চতুর্থীমুত্তরামাশাং বন্দেত ধনদাশ্রযাম্ .. ৯৪..
দিশাং তু বন্দনং কৃত্বা বামবেধং প্রযোজযেত্ .
দক্ষিণেন চ কর্তব্যং বিক্ষেপপরিবর্তনম্ ..৯৫..
প্রাঙ্গ্মুখস্তু ততঃ কুর্যাত্পুরুষস্ত্রীনপুংসকৈঃ .
ত্রিপদ্যা সূত্রভৃদ্রুদ্রব্রহ্মোপেন্দ্রাভিবাদনম্ .. ৯৬..
দক্ষিণং তু পদং পুংসো বামং স্ত্রীণাং প্রকীর্তিতম্ .
পুনর্দক্ষিণমেব স্যান্নাত্যুত্ক্ষিপ্তং নপুংসকম্ .. ৯৭..
বন্দেত পৌরুষেণেশং স্ত্রীপদেন জনার্দনম্ .
নপুংসক্পদেনাপি তথৈবাম্বুজসম্ভবম্ .. ৯৮..
পরিবর্তনমেবং স্যাত্তস্যান্তে প্রবিশেত্ততঃ .
চতুর্থকারঃ পুষ্পাণি প্রগৃহ্য বিধিপূর্বকম্ .. ৯৯..
যথাবত্তেন কর্তব্যং পূজনং জর্জরস্য তু .
কুতপস্য চ সর্বস্য সূত্রধারস্য চৈব হি .. ১০০..