নাট্যশাস্ত্রম্ অধ্যায ০২

.. নাট্যশাস্ত্রম্ অধ্যায ২ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্

অথ ভারতীযে নাট্যশাস্ত্রে দ্বিতীযোঽধ্যাযঃ .

ভরতস্য বচঃ শ্রুত্বা পপ্রচ্ছুর্মুনযস্ততঃ .
ভগবন্ শ্রোতুমিচ্ছামো যজনং রঙ্গসংশ্রযম্ .. ১..
অথ বা যা ক্রিযাস্তত্র লক্ষণং যচ্চ পূজনম্ .
ভবিষ্যদ্ভির্নরৈঃ কার্যং কথং তন্নাট্যবেশ্মনি .. ২..
ইহাদির্নাট্যযোগস্য নাট্যমণ্ডপ এব হি .
তস্মাত্তস্যৈব তাবত্ত্বং লক্ষণং বক্তুমর্হসি .. ৩..
তেষাং তু বচনং শ্রুত্বা মুনীনাং ভরতোঽব্রবীত্ .
লক্ষণং পূজনং চৈব শ্রূযতাং নাট্যবেশ্মনঃ .. ৪..
দিব্যানাং মানসী সৃষ্টির্গৃহেষূপবনেষু চ .
( যথা ভাবাভিনির্বর্ত্যাঃ সর্বে ভাবাস্তু মানুষাঃ ..)
নরাণাং যত্নতঃ কার্যা লক্ষণাভিহিতা ক্রিযা .. ৫..
শ্রূযতাং তদ্যথা যত্র কর্তব্যো নাট্যমণ্ডপঃ .
তস্য বাস্তু চ পূজা চ যথা যোজ্যা প্রযত্নতঃ .. ৬..
ইহ প্রেক্ষ্যাগৃহং দৃষ্ট্বা ধীমতা বিশ্বকর্মণা .
ত্রিবিধঃ সন্নিবেশশ্চ শাস্ত্রতঃ পরিকল্পিতঃ .. ৭..
বিকৃষ্টশ্চতুরশ্রশ্চ ত্র্যশ্রশ্চৈব তু মণ্ডপঃ .
তেষাং ত্রীণি প্রমাণানি জ্যেষ্ঠং মধ্যং তথাঽবরম্ .. ৮..
প্রমাণমেষাং নির্দিষ্টং হস্তদণ্ডসমাশ্রযম্ .
শতং চাষ্টৌ চতুঃষষ্টির্হস্তা দ্বাত্রিংশদেব চ .. ৯..
অষ্টাধিকং শতং জ্যেষ্ঠং চতুঃষষ্টিস্তু মধ্যমম্ .
কনীযস্তু তথা বেশ্ম হস্তা দ্বাত্রিংশদিষ্যতে .. ১০..
দেবানাং তু ভবেজ্জ্যেষ্ঠং নৃপাণাং মধ্যমং ভবেত্ .
শেষাণাং প্রকৃতীনাং তু কনীযঃ সংবিধীযতে .. ১১..
(প্রেক্ষাগৃহাণাং সর্বেষাং প্রশস্তং মধ্যমং স্মৃতম্ .
তত্র পাঠ্যং চ গেযং চ সুখশ্রাব্যতরং ভবেত্ ..
প্রেক্ষাগৃহাণাং সর্বেষাং ত্রিপ্রকারো বিধিঃ স্মৃতঃ .
বিকৃষ্টশ্চতুরস্রশ্চ ত্র্যস্রশ্চৈব প্রযোক্তৃভিঃ ..
কনীযস্তু স্মৃতং ত্র্যস্রং চতুরস্রং তু মধ্যমম্ .
জ্যেষ্ঠং বিকৃষ্টং বিজ্ঞেযং নাট্যবেদপ্রযোক্তৃভিঃ ..)
প্রমাণং যচ্চ নির্দিষ্টং লক্ষণং বিশ্বকর্মণা .
প্রেক্ষাগৃহাণাং সর্বেষাং তচ্চৈব হি নিবোধত .. ১২..
অণূ রজশ্চ বালশ্চ লিক্ষা যূকা যবস্তথা .
অঙ্গুলং চ তথা হস্তো দণ্ডশ্চৈব প্রকীর্তিতঃ .. ১৩..
অণবোঽষ্টৌ রজঃ প্রোক্তং তান্যষ্টৌ বাল উচ্যতে .
বালাস্ত্বষ্টৌ ভবেল্লিক্ষা যূকা লিক্ষাষ্টকং ভবেত্ .. ১৪..
যূকাস্ত্বষ্টৌ যবো জ্ঞেযো যবাস্ত্বষ্টৌ তথাঙ্গুলম্ .
অঙ্গুলানি তথা হস্তশ্চতুর্বিংশতিরুচ্যতে .. ১৫..
চতুর্হস্তো ভবেদ্দণ্ডো নির্দিষ্টস্তু প্রমাণতঃ .
অনেনৈব প্রমাণেন বক্ষ্যাম্যেষাং বিনির্ণযম্ .. ১৬..
চতুঃষষ্টিকরান্কুর্যাদ্দীর্ঘত্বেন তু মণ্ডপম্ .
দ্বাত্রিংশতং চ বিস্তারন্মর্ত্যানাং যো ভবেদিহ .. ১৭..
অত ঊর্ধ্বং ন কর্তব্যঃ কর্তৃভির্নাট্যমণ্ডপঃ .
যস্মাদব্যক্তভাবং হি তত্র নাট্যং ব্রজেদিতি .. ১৮..
মণ্ডপে বিপ্রকৃষ্টে তু পাঠ্যমুচ্চারিতস্বরম্ .
অনিস্সরণধর্মত্বাদ্বিস্বরত্বং ভৃশং ব্রজেত্ .. ১৯..
যশ্চাপ্যাস্যগতো ভাবো নানাদৃষ্টিসমন্বিতঃ
স বেশ্মনঃ প্রকৃষ্টত্বাদ্ ব্রজেদব্যক্ততাং পরাম্ .. ২০..
প্রেক্ষাগৃহাণাং সর্বেষাং তস্মান্মধ্যমমিষ্যতে .
যাবত্পাঠ্যং চ গেযং চ তত্র শ্রব্যতরং ভবেত্ .. ২১..
[প্রেক্ষাগৃহাণাং সর্বেষাং ত্রিপ্রকারো বিধিঃ স্মৃতঃ .
বিকৃষ্টশ্চতুরস্রশ্চ ত্র্যস্রশ্চৈব প্রযোক্তৃভিঃ ..)
কনীযস্তু স্মৃতং ত্র্যস্রং চতুরস্রং তু মধ্যমম্ .
জ্যেষ্ঠং বিকৃষ্টং বিজ্ঞেযং নাট্যবেদপ্রযোক্তৃভিঃ ]..
দেবানাং মানসী সৃষ্টির্গৃহেষূপবনেষু চ .
যত্নভাবাভিনিষ্পন্নাঃ সর্বে ভাবা হি মানুষা .. ২২..
তস্মাদ্দেবকৃতৈর্ভাবৈর্ন বিস্পর্ধেত মানুষঃ .
মানুষস্য তু গেহস্য সম্প্রবক্ষ্যামি লক্ষণম্ .. ২৩..
ভূমের্বিভাগং পূর্বং তু পরীক্ষেত প্রযোজক .
ততো বাস্তু প্রমাণেন প্রারভেত শুভেচ্ছযা .. ২৪..
সমা স্থিরা তু কঠিনাঅ কৃষ্ণা গৌরী চ যা ভবেত্ .
ভূমিস্তত্রৈব কর্তব্যঃ কর্তৃভির্নাট্যমণ্ডপঃ .. ২৫..
প্রথমং শোধনং কৃত্বা লাঙ্গলেন সমুত্কৃষেত্ .
অস্থিকীলকপালানি তৃণগুল্মাংশ্চ শোধযেত্ .. ২৬..
শোধযিত্বা বসুমতীং প্রমাণং নির্দিশেত্ততঃ .
( ত্রীণ্যুত্তরাণি সৌম্যং চ বিশাখাপি চ রেবতী .,
হস্তিতিষ্যানুরাধাশ্চ প্রশস্তা নাট্যকর্মণি .)
পুষ্যনক্ষত্রযোগেন শুক্লং সূত্রং প্রসারযেত্ .. ২৭..
কার্পাসং বাল্বজং বাপি মৌঞ্জং বাল্কলমেব চ .
সূত্রং বুধৈস্তু কর্তব্যং যস্য চ্ছেদো ন বিদ্যতে .. ২৮..
অর্ধচ্ছিন্নে ভবেত্সূত্রে স্বামিনো মরণং ধ্রুবম্ .
ত্রিভাগচ্ছিন্নযা রজ্বা রাষ্ট্রকোপো বিধীযতে .. ২৯..
ছিন্নাযাং তু চতুর্ভাগে প্রযোক্তুর্নাশ উচ্যতে .
হস্তাত্প্রভ্রষ্টযা বাপি কশ্চিত্বপচযো ভবেত্ .. ৩০..
তস্মান্নিত্যং প্রযত্নেন রজ্জুগ্রহণমিষ্যতে .
কার্যং চৈব প্রযত্নেন মানং নাট্যগৃহস্য তু .. ৩১..
মুহূর্তেনানুকূলেন তিথ্যা সুকরণেন চ .
ব্রাহ্মণাংস্তর্পযিত্বা তু পুণ্যাহং বাচযেত্ততঃ .. ৩২..
শান্তিতোযং ততো দত্ত্বা ততঃ সূত্রং প্রসারযেত্ .
চতুষ্ষষ্টিকরান্কৃত্বা দ্বিধা কুর্যাত্পুনশ্চ তান্ .. ৩৩..
পৃষ্ঠতো যো ভবেদ্ভাগো দ্বিধাভূতস্য তস্য তু .
সমমর্ধবিভাগেন রঙ্গশীর্ষং প্রকল্পযেত্ .. ৩৪..
পশ্চিমে চ বিভাগেঽথ নেপথ্যগৃহমাদিশেত্ .
বিভজ্য ভাগান্বিধিবদ্যযথাবদনুপূর্বশঃ .. ৩৫..
শুভে নক্ষত্রযোগে চ মণ্ডপস্য নিবেশনম্ .
শঙ্খদুন্দুভিনির্ঘোষৈর্মৃদঙ্গপণবাদিভিঃ .. ৩৬..
সর্বাতোদ্যৈঃ প্রণুদিতৈঃ স্থাপনং কার্যমেব তু .
উত্সার্যাণি ত্বনিষ্টানি পাষণ্ড্যাশ্রমিণস্তথা .. ৩৭..
কাষাযবসনাশ্চৈব বিকলাশ্চৈঅব যে নরাঃ .
নিশাযাং চ বলিঃ কার্যা নানাভোজনসংযুতঃ .. ৩৮..
গন্ধপুষ্পফলোপেতা দিশো দশ সমাশ্রিতঃ .
পূর্বেণ শুক্লান্নযুতো নীলান্নো দক্ষিণেন চ .. ৩৯..
পশ্চিমেন বলিঃ পীতো রক্তশ্চৈবোত্তরেণ তু .
যাদৃশং দিশি যস্যাং তু দৈবতং পরিকল্পিতম্ .. ৪০..
তাদৃশস্তত্র দাতব্যো বলির্মন্ত্রপুরস্কৃতঃ .
স্থাপনে ব্রাহ্মণেভ্যশ্চ দাতব্যং ঘৃতপাযসম্ .. ৪১..
মধুপর্কস্তথা রাজ্ঞে কর্তৃভ্যশ্চ গুডৌদনম্ .
নক্ষত্রেণ তু কর্তব্যং মূলেন স্থাপনং বুধৈঃ .. ৪২..
মুহূর্তেনানুকূলেন তিথ্যা সুকরণেন চ .
এবং তু স্থাপনং কৃত্বা ভিত্তিকর্ম প্রযোজযেত্ .. ৪৩..
ভিত্তিকর্মণি নির্বৃত্তে স্তম্ভানাং স্থাপনং ততঃ .
তিথিনক্ষত্রযোগেন শুভেন করণেন চ .. ৪৪..
স্তম্ভানাং স্থাপনং কার্যং রোহিণ্যা শ্রবণেন বা .
আচার্যেণ সুযুক্তেন ত্রিরাত্রোপোষিতেন চ .. ৪৫..
স্তম্ভানাং স্থাপনং কার্যং প্রাপ্তে সূর্যোদযে শুভে .
প্রথমে ব্রাহ্মণস্তম্ভে সর্পিস্সর্ষপসংস্কৃতঃ .. ৪৬..
সর্বশুক্লো বিধিঃ কার্যো দদ্যাত্পাযসমেব চ .
ততশ্চ ক্ষত্রিযস্তম্ভে বস্ত্রমাল্যানুলেপনম্ .. ৪৭..
সর্ব রক্তং প্রদাতব্যং দ্বিজেভ্যশ্চ গুডৌদনম্ .
বৈশ্যস্তম্ভে বিধিঃ কার্যো দিগ্ভাগে পশ্চিমোত্তরে .. ৪৮..
সর্বং প্রীতং প্রদাতব্যং দ্বিজেভ্যশ্চ ঘৃতৌদনম্ .
শূদ্রস্তম্ভে বিধিঃ কার্যঃ সম্যক্পূর্বোত্তরাশ্রযে .. ৪৯..
নীলপ্রাযং প্রযত্নেন কূসরং চ দ্বিজাশনম্ .
পূর্বোক্তব্রাহ্মণস্তম্ভে শুক্লমাল্যানুলেপনে .. ৫০..
নিক্ষিপেত্কনকং মূলে কর্ণাভরণসংশ্রযম্ .
তাম্রং চাধঃ প্রদাতব্যং স্তম্ভে ক্ষত্রিযসংজ্ঞকে .. ৫১..
বৈশ্যস্তম্ভস্য মূলে তু রজতং সম্প্রদাপযেত্ .
শূদ্রস্তম্ভস্য মূলে তু দদ্যাদাযসমেব চ .. ৫২..
সর্বেষ্বেব তু নিক্ষেপ্যং স্তম্ভমূলেষু কাঞ্চনম্ .
স্বস্তিপুণ্যাহঘোষেণ জযশব্দেন চৈব হি .. ৫৩..
স্তম্ভানাং স্থাপনং কার্যং পুষ্পমালাপুরস্কৃতম্ .
রত্নদানৈঃ সগোদানৈর্বস্ত্রদানৈরনল্পকৈঃ .. ৫৪..
ব্রাহ্মণাংস্তর্পযিত্বা তু স্তম্ভানুত্থাপযেত্ততঃ .
অচলং চাপ্যকম্পঞ্চ তথৈবাবলিতং পুনঃ .. ৫৫..
স্তম্ভস্যোত্থাপনে সম্যগ্দোষা হ্যেতে প্রকীর্তিতাঃ .
অবৃষ্টিরুক্তা চলনে বলনে মৃত্যুতো ভযম্ .. ৫৬..
কম্পনে পরচক্রাত্তু ভযং ভবতি দারুণম্ .
দোষৈরেতৈর্বিহীনং তু স্তম্ভমুত্থাপযেচ্ছিবম্ .. ৫৭..
পবিত্রে ব্রাহ্মণস্তম্ভে দাতব্যা দক্ষিণা চ গৌঃ .
শেষাণাং ভোজনং কার্যং স্থাপনে কর্তৃসংশ্রযম্ .. ৫৮..
মন্ত্রপূতং চ তদ্দেযং নাট্যাচার্যেণ ধীমতা .
পুরোহিতং নৃপং চৈব ভোজযেন্মধুপাযসৈঃ .. ৫৯..
কর্তৄনাপি তথা সর্বান্কৃসরাং লবণোত্তরাম্ .
সর্বমেবং বিধিং কৃত্বা সর্বাতোদ্যৈঃ প্রবাদিতৈঃ .. ৬০..
অভিমন্ত্র্য যথান্যাযং স্তম্ভানুত্থাপযেচ্ছুচিঃ .
‘ যথাঽচলো গিরির্মেরুর্হিমবাংশ্চ মহাবলঃ .. ৬১..
জযাবহো নরেন্দ্রস্য তথা ত্বমচলো ভব .’
স্তম্ভদ্বারং চ ভিত্তিং চ নেপথ্যগৃহমেব চ .. ৬২..
এবমুত্থাপযেতজ্জ্ঞো বিধিদৃষ্টেন কর্মণা .
রঙ্গপীঠস্য পার্শ্বে তু কর্তব্যা মত্তবারণী .. ৬৩..
চতুস্তম্ভসমাযুক্তা রঙ্গপীঠপ্রমাণতঃ .
অধ্যর্ধহস্তোত্সেধেন কর্তব্যা মত্তবারণী .. ৬৪..
উত্সেধেন তযোস্তুল্যং কর্তব্যং রঙ্গমণ্ডপম্ .
তস্যাং মাল্যং চ ধূপং চ গন্ধং বস্ত্রং তথৈব চ .. ৬৫..
নানাবর্ণানি দেযানি তথা ভূতপ্রিযো বলিঃ .
আযসং তত্র দাতব্যং স্তম্ভানাং কুশৈলৈরধঃ .. ৬৬..
ভোজনে কৃসরাশ্চৈব দাতব্যং ব্রাহ্মণাশনম্ .
এবং বিধিপুরস্কারৈঃ কর্তব্যা মত্তবারণী .. ৬৭..
রঙ্গপীঠং ততঃ কার্যং বিধিদৃষ্টেণ কর্মণা .
রঙ্গশীর্ষস্তু কর্তব্যং ষড্দারুকসমন্বিতম্ .. ৬৮..
কার্যং দ্বারদ্বযং চাত্র নেপথ্যগৃহকস্য তু .
পূরণে মৃত্তিকা চাত্র কৃষ্ণা দেযা প্রযত্নতঃ .. ৬৯..
লাঙ্গলেন সমুত্কৃষ্য নির্লোষ্টতৃণশর্করম্ .
লাঙ্গলে শুদ্ধবর্ণো তু ধুর্যো যোজ্যৌ প্রযত্নতঃ .. ৭০..
কর্তারঃ পুরুষশ্চাত্র যেঽঙ্গদোষবিবির্জিতাঃ .
অহীনাঙ্গৈশ্চ বোঢব্যা মৃত্তিকা পিটকৈর্নবৈঃ .. ৭১..
এবংবিধৈঃ প্রকর্তব্যং রঙ্গশীর্ষং প্রযত্নতঃ .
কূর্মপৃষ্ঠং ন কর্তব্যং মত্স্যপৃষ্ঠং তথৈব চ .. ৭২..
শুদ্ধাদর্শতলাকারং রঙ্গশীর্ষং প্রশস্যতে .
রত্নানি চাত্র দেযানি পূর্বে বজ্রং বিচক্ষণৈঃ .. ৭৩..
বৈডূর্যং দক্ষিণে পার্শ্বে স্ফটিকং পশ্চিমে তথা .
প্রবালমুত্তরে চৈব মধ্যে তু কনকং ভবেত্ .. ৭৪..
এবং রঙ্গশিরঃ কৃত্বা দারুকর্ম প্রযোজযেত্ .
ঊহপ্রত্যূহসংযুক্তঃ নানাশিল্পপ্রযোজিতম্ .. ৭৫..
নানাসঞ্জবনোপেতং বহুব্যালোপশোভিতম্ .
সসালভঞ্জিকাভিশ্চ সমন্তাত্সমলঙ্কৃতম্ .. ৭৬..
নির্ব্যূহকুহরোপেতং নানাগ্রথিতবেদিকম্ .
নানাবিন্যাসসংযুক্তং চিত্রজালগবাক্ষকম্ .. ৭৭..
সুপীঠধারিণীযুক্তং কপোতালীসমাকুলম্ .
নানাকুট্টিমবিন্যস্তৈঃ স্তম্ভৈশ্চাপ্যুপশোভিতম্ .. ৭৮..
এবং কাষ্ঠবিধিং কৃত্বা ভিত্তিকর্ম প্রযোজযেত্ .
স্তম্ভং বা নাগদন্তং বা বাতাযনমথাপি বা .. ৭৯..
কোণং বা সপ্রতিদ্বারং দ্বারবিদ্ধং ন কারযেত্ .
কার্যঃ শৈলগুহাকারো দ্বিভূমির্নাট্যমণ্ডপঃ .. ৮০..
মন্দবাতাযনোপেতো নির্বাতো ধীরশব্দবান্ .
তস্মান্নিবাতঃ কর্তব্যঃ কর্তৃভির্নাট্যমণ্ডপঃ .. ৮১..
গম্ভীরস্বরতা যেন কুতপস্য ভবিষ্যতি .
ভিত্তিকর্মবিধিং কৃত্বা ভিত্তিলেপং প্রদাপযেত্ .. ৮২..
সুধাকর্ম বহিস্তস্য বিধাতব্যং প্রযত্নতঃ .
ভিত্তিষ্বথ বিলিপ্তাসু পরিমৃষ্টাসু সর্বতঃ .. ৮৩..
সমাসু জাতশোভাসু চিত্রকর্ম প্রযোজযেত্ .
চিত্রকর্মণি চালেখ্যাঃ পুরুষাঃ স্রীজনাস্তথা .. ৮৪..
লতাবন্ধাশ্চ কর্তব্যাশ্চরিতং চাত্ম্ভোগজম্ .
এবং বিকৃষ্টং কর্তব্যং নাট্যবেশ্ম প্রযোক্তৃভিঃ .. ৮৫..
পুনরেব হি বক্ষ্যামি চতুরশ্রস্য লক্ষণম্ .
সমন্ততশ্চ কর্তব্যা হস্তা দ্বাত্রিংশদেব তু .. ৮৬..
শুভভূমিবিভাগস্থো নাট্যজ্ঞৈর্নাট্যমণ্ডপঃ .
যো বিধিঃ পূর্বমুক্তস্তু লক্ষণং মঙ্গলানি চ .. ৮৭..
বিকৃষ্টে তান্যশেষাণি চতুরশ্রেঽপি কারযেত্ .
চতুরশ্রং সমং কৃত্বা সূত্রেণ প্রবিভজ্য চ .. ৮৮..
বাহ্যতঃ সর্বতঃ কার্যা ভিত্তিঃ শ্লিষ্টেষ্টকা দৃঢা .
তত্রাভ্যন্তরতঃ কার্যা রঙ্গপীঠোপরি স্থিতাঃ .. ৮৯..
দশ প্রযোক্তৃভিঃ স্তম্ভাঃ শক্তা মণ্ডপধারণে .
স্তম্ভানাং বাহ্যতশ্চাপি সোপানাকৃতি পীঠকম্ .. ৯০..
ইষ্টকাদারুভিঃ কার্যং প্রেক্ষকাণাং নিবেশনম্ .
হস্তপ্রমাণৈরুত্সেধৈর্ভূমিভাগসমুত্থিতৈঃ .. ৯১..
রঙ্গপীঠাবলোক্যং তু কুর্যাদাসনজং বিধিম্ .
ষডন্যানন্তরে চৈব পুনঃ স্তম্ভান্যথাদিশম্ .. ৯২..
বিধিনা স্থাপযেতজ্ঞো দৃঢান্মণ্ডপধারণে .
অষ্টৌ স্তম্ভান্পুনশ্চৈব তেষামুপরি কল্পযেত্ .. ৯৩..
স্থাপ্যং চৈব ততঃ পীঠমষ্টহস্তপ্রমাণতঃ .
বিদ্ধাস্যমষ্টহস্তং চ পীঠং তেষু ততো ন্যসেত্ .. ৯৪..
তত্র স্তম্ভাঃ প্রদাতব্যাস্তজ্ঞৈর্মণ্ডপধারণে .
ধারণীধারণাস্তে চ শালস্ত্রীভিরলঙ্কৃতাঃ .. ৯৫..
নেপথ্যগৃহকং চৈব ততঃ কার্যং প্রযত্নতঃ .
দ্বারং চৈকং ভবেত্তত্র রঙ্গপীঠপ্রবেশনম্ .. ৯৬..
জনপ্রবেশনং চান্যদাভিমুখ্যেন কারযেত্ .
রঙ্গস্যাভিমুখং কার্যং দ্বিতীযং দ্বারমেব তু .. ৯৭..
অষ্টহস্তং তু কর্তব্যং রঙ্গপীঠং প্রমাণতঃ .
চতুরশ্রং সমতলং বেদিকাসমলঙ্কৃতম্ .. ৯৮..
পূর্বপ্রমাণনির্দিষ্টা কর্তব্যা মত্তবারণী .
চতুঃস্তম্ভসমাযুক্তা বেদিকাযাস্তু পার্শ্বতঃ .. ৯৯..
সমুন্নতং সমং চৈব রঙ্গশীর্ষং তু কারযেত্ .
বিকৃষ্টে তূন্নতং কার্যং চতুরশ্রে সমং তথা .. ১০০..
এবমেতেন বিধিনা চতুরশ্রং গৃহং ভবেত্ .
অতঃ পরং প্রবক্ষ্যামি ত্র্যশ্রগেহস্য লক্ষণম্ .. ১০১..
ত্র্যশ্রং ত্রিকোণং কর্তব্যং নাট্যবেশ্মপ্রযোক্তৃভিঃ .
মধ্যে ত্রিকোণমেবাস্য রঙ্গপীঠং তু কারযেত্ .. ১০২..
দ্বারং তৈনৈব কোণেন কর্তব্যং তস্য বেশ্মনঃ .
দ্বিতীযং চৈব কর্তব্যং রঙ্গপীঠস্য পৃষ্ঠতঃ .. ১০৩..
বিধির্যশ্চতুরশ্রস্য ভিত্তিস্তম্ভসমাশ্রযঃ .
স তু সর্বঃ প্রযোক্তব্যস্ত্র্যশ্রস্যাপি প্রযোক্তৃভিঃ .. ১০৪..
এবমেতেন বিধিনা কার্যা নাট্যগৃহা বুধৈঃ .
পুনরেষাং প্রবক্ষ্যামি পূজামেবং যথাবিধিঃ .. ১০৫..

ইতি ভারতীযে নাট্যশাস্ত্রে মণ্ডপবিধানো নাম দ্বিতীযোঽধ্যাযঃ ..