ধ্বন্যালোক উদ্যোত ৪

.. ধ্বন্যালোকঃ ৪ ..

এবং ধ্বনিং সপ্রপঞ্চং বিপ্রতিপত্তিনিরাসার্থং ব্যুত্পাদ্য তদ্ব্যুত্পাদনে
প্রযোজনান্তরমুচ্যতে – – –
ধ্বনের্যঃ সগুণীভূতব্যঙ্গ্যস্যাধ্বা প্রদর্শিতঃ .
অনেনানন্ত্যমাযাতি কবীনাং প্রতিভাগুণঃ .. ১..
য এষ ধ্বনের্গুণীভূতব্যঙ্গ্যস্য চ মার্গঃ প্রকাশিতস্তস্য ফলা-
ন্তরং কবিপ্রতিভানন্ত্যম্ .
কথমিতি চেত্ – – –
অতো হ্যন্যতমেনাপি প্রকারেণ বিভূষিতা .
বাণী নবত্বমাযাতি পূর্বার্থান্বযবত্যপি .. ২..
অতো ধ্বনেরুক্তপ্রভেদমধ্যাদন্যতমেনাপি প্রকারেণ বিভূষিতা সতী
বাণী পুরাতনকবিনিবদ্ধার্থসংস্পর্শবত্যপি নবত্বমাযাতি . তথাহ্যবিব-
ক্ষিতবাচ্যস্য ধ্বনেঃ প্রকারদ্বযসমাশ্রযেণ নবত্বং পূর্বার্থানুগমেঽপি
যথা – – –
স্মিতং কিঞ্চিন্মুগ্ধং তরলমধুরো দৃষ্টিবিভবঃ
পরিস্পন্দো বাচামভিনববিলাসোর্মিসরসঃ .
গতানামারম্ভঃ কিসলযিতলীলাপরিমলঃ
স্পৃশন্ত্যাস্তারুণ্যং কিমিব হি ন রম্যং মৃগদৃশঃ ..
ইত্যস্য,
সবিভ্রমস্মিতোদ্ভেদা লোলাক্ষ্যঃ প্রস্খলদ্গিরঃ .
নিতম্বালসগামিন্যঃ কামিন্যঃ কস্য ন প্রিযাঃ ..
ইত্যেবমাদিষু শ্লোকেষু সত্স্বপি তিরস্কৃতবাচ্যধ্বনিসমাশ্রযেণা-
পূর্বত্বমেব প্রতিভাসতে. তথা – – –
যঃ প্রথমঃ প্রথমঃ স তু তথাহি হতহস্তিবহলপললাশী .
শ্বাপদগণেষু সিংহঃ সিংহঃ কেনাধরীক্রিযতে ..
ইত্যস্য,
স্বতেজঃক্রীতমহিমা কেনান্যেনাতিশয্যতে .
মহদ্ভিরপি মাতঙ্গৈঃ সিংহঃ কিমভিভূযতে ..
ইত্যেবমাদিষু শ্লোকেষু সত্স্বপ্যর্থান্তরসঙ্ক্রমিতবাচ্যধ্বনিসমাশ্র-
যেণ নবত্বম্ . বিবক্ষিতান্যপরবাচ্যস্যাপ্যুক্তপ্রকারসমাশ্রযেণ নবত্বং
যথা – – –
নিদ্রাকৈতবিনঃ প্রিযস্য বদনে বিন্যস্য বক্ত্রং বধূ-
র্বোধত্রাসনিরুদ্ধচুম্বনরসাপ্যাভোগলোলং স্থিতা .
বৈলক্ষ্যাদ্বিমুখীভবেদিতি পুনস্তস্যাপ্যনারম্ভিণঃ
সাকাঙ্ক্ষপ্রতিপত্তি নাম হৃদযং যাতং তু পারং রতেঃ ..
ইত্যাদেঃ শ্লোকস্য,
শূন্যং বাসগৃহং বিলোক্য শযনাদুত্থায কিঞ্চিচ্ছনৈ-
র্নিদ্রাব্যাজমুপাগতস্য সুচিরং নির্বর্ণ্য পত্যুর্মুখম্ .
বিস্রব্ধং পরিচুম্ব্য জাতপুলকামালোক্য গণ্ডস্থলীং
লজ্জানম্রমুখী প্রিযেণ হসতা বালা চিরং চুম্বিতা ..
ইত্যাদিষু শ্লোকেষু সত্স্বপি নবত্বম্ . যথা বা – – – ‘ তরঙ্গভ্রূভঙ্গা’
ইত্যাদিশ্লোকস্য ‘ নানাভঙ্গিভ্রমদ্ভ্রূঃ’ ইত্যাদিশ্লোকাপেক্ষযান্যত্বম্ .. ২..
যুক্ত্যাঽনযানুসর্তব্যো রসাদির্বহুবিস্তরঃ .
মিথোঽপ্যনন্ততাং প্রাপ্তঃ কাব্যমার্গো যদাশ্রযাত্ .. ৩..
বহুবিস্তারোঽযং রসভাবতদাভাসতত্প্রশমলক্ষণো মার্গো যথাস্বং
বিভাবানুভাবপ্রভেদকলনযা যথোক্তং প্রাক্ . স সর্ব এবানযা যুক্ত্যানু-
সর্তব্যঃ . যস্য রসাদেরাশ্রযাদযং কাব্যমার্গঃ পুরাতনৈঃ কবিভিঃ সহস্র-
সংখ্যৈরসংখ্যৈর্বা বহুপ্রকারং ক্ষুণ্ণত্বান্মিতোঽপ্যনন্ততামেতি . রসভাবা-
দীনাং হি প্রত্যেকং বিভাবানুভাবব্যভিচারিসমাশ্রযাদপরিমিতত্বম্ .
তেষাং চৈকৈকপ্রভেদাপেক্ষযাপি তাবজ্জগদ্বৃত্তমুপনিবধ্যমানং সুকবিভিস্ত-
দিচ্ছাবশাদন্যথা স্থিতমপ্যন্যথৈব বিবর্ততে . প্রতিপাদিতং চৈতচ্চিত্র-
বিচারাবসরে . গাথা চাত্র কৃতৈব মহাকবিনা – – –
অতথাস্থিতানপি তথাসংস্থিতানিব হৃদযে যা নিবেশযতি .
অর্থবিশেষান্ সা জযতি বিকটকবিগোচরা বাণী ..
তদিত্থং রসভাবাদ্যাশ্রযেণ কাব্যার্থানামানন্ত্যং সুপ্রতিপাদিতম্ .
এতদেবোপপাদযিতুমুচ্যতে – – –
দৃষ্টপূর্বা অপি হ্যর্থাঃ কাব্যে রসপরিগ্রহাত্ .
সর্বে নবা ইবাভান্তি মধুমাস ইব দ্রুমাঃ .. ৪..

তথা হি বিবক্ষিতান্যপরবাচ্যস্যৈব শব্দশক্ত্যুদ্ভবানুরণন-
রূপব্যঙ্গ্যপ্রকারসমাশ্রযেণ নবত্বম্ . যথা – – – ‘ ধরণীধারণাযাধুনা
ত্বং শেষঃ’ ইত্যাদেঃ .
শেষো হিমগিরিস্ত্বং চ মহান্তো গুরবঃ স্থিরাঃ .
যদলঙ্ঘিতমর্যাদাশ্চলন্তীং বিভ্রতে ভুবম্ ..
ইত্যাদিষু সত্স্বপি . তস্যৈবার্থশক্ত্যুদ্ভবানুরণনরূপব্যঙ্গ্যসমাশ্র-
যেণ নবত্বম্ . যথা – – – ‘ এবংবাদিনি দেবর্ষৌ’ ইত্যাদি শ্লোকস্য .
কৃতে বরকথালাপে কুমার্যঃ পুলকোদ্গমৈঃ .
সূচযন্তি স্পৃহামন্তর্লজ্জযাবনতাননাঃ ..
ইত্যাদিষু সত্সু অর্থশক্ত্যুদ্ভবানুরণনরূপব্যঙ্গ্যস্য কবিপ্রৌঢো-
ক্তিনির্মিতশরীরত্বেন নবত্বম্ . যথা – – – ‘ সজ্জযতি সুরভিমাসো’ ইত্যাদেঃ .
সুরভিসমযে প্রবৃত্তে সহসা প্রাদুর্ভবন্তি রমণীযাঃ .
রাগবতামুত্কলিকাঃ সহৈব সহকারকলিকাভিঃ ..
ইত্যাদিষু সত্স্বপ্যপূর্বত্বমেব .

অর্থশক্ত্যুদ্ভবানুরণনরূপব্যঙ্গ্যস্য কবিনিবদ্ধবক্তৃপ্রৌঢোক্তিমাত্র-
নিষ্পন্নশরীরত্বেন নবত্বম্ . যথা ‘ ‘ বাণিজ্য হস্তিদন্তাঃ’ ইত্যাদিগা-
থার্থস্য .
করিণীবৈধব্যকরো মম পুত্র এককাণ্ডবিনিপাতী .
হতস্নুষযা তথা কৃতো যথা কাণ্ডকরণ্ডকং বহতি ..
এবমাদিষ্বর্থেষু সত্স্বপ্যনালীঢতৈব .
যথা ব্যঙ্গ্যভেদসমাশ্রযেণ ধ্বনেঃ কাব্যার্থানাং নবত্বমুত্পদ্যতে,
তথা ব্যঞ্জকভেদসমাশ্রযেণাপি . তত্তু গ্রন্থবিস্তরভযান্ন লিখ্যতে,
স্বযমেব সহৃদযৈরভ্যূহ্যম্ . অত্র চ পুনঃপুনরুক্তমপি সারতযেদমুচ্যতে – – –
ব্যঙ্গ্যব্যঞ্জকভাবেঽস্মিন্বিবিধে সম্ভবত্যপি .
রসাদিময একস্মিন্ কবিঃ স্যাদবধানবান্ .. ৫..

অস্মিন্নর্থানন্ত্যহেতৌ ব্যঙ্গ্যব্যঞ্জকভাবে বিচিত্রে শব্দানাং সম্ভব-
ত্যপি কবিরপূর্বার্থলাভার্থী রসাদিময একস্মিন্ ব্যঙ্গ্যব্যঞ্জকভাবে
যত্নাদবদধীত . রসভাবতদাভাসরূপে হি ব্যঙ্গ্যে তদ্ব্যঞ্জকেষু চ যথা-
নির্দিষ্টেষু বর্ণপদবাক্যরচনাপ্রবন্ধেষ্ববহিতমনসঃ কবেঃ সর্বমপূর্বং কাব্যং
সম্পদ্যতে . তথা চ রামাযণমহাভারতাদিষু সঙ্গ্রামাদযঃ পুনঃপুনর-
ভিহিতা অপি নবনবাঃ প্রকাশন্তে . প্রবন্ধে চাঙ্গী রস এক এবোপনি-
বধ্যমানোঽর্থবিশেষলাভং ছাযাতিশযং চ পুষ্ণাতি . কস্মিন্নিবেতি
চেত্ – – – যথা রামাযণে যথা বা মহাভারতে . রামাযণে হি করুণো রসঃ
স্বযমাদিকবিনা সূত্রিতঃ ‘ শোকঃ শ্লোকত্বমাগতঃ’ ইত্যেবংবাদিনা .
নির্ব্যূঢশ্চ স এব সীতাত্যন্তবিযোগপর্যন্তমেব স্বপ্রবন্ধমুপরচযতা .
মহাভারতেঽপি শাস্ত্রকাব্যরূপচ্ছাযান্বযিনি বৃষ্ণিপাণ্ডববিরসাবসা-
নবৈমনস্যদাযিনীং সমাপ্তিমুপনিবধ্নতা মহামুনিনা বৈরাগ্যজননতাত্পর্যং
প্রাধান্যেন স্বপ্রবন্ধস্য দর্শযতা মোক্ষলক্ষণঃ পুরুষার্থঃ শান্তো রসশ্চ
মুখ্যতযা বিবক্ষাবিষযত্বেন সূচিতঃ . এতচ্চাংশেন বিবৃতমেবান্যৈর্ব্যা-
খ্যাবিধাযিভিঃ . স্বযমেব চৈতদুদ্গীর্ণং তেনোদীর্ণমহামোহমগ্নমুজ্জিহীর্ষতা
লোকমতিবিমলজ্ঞানালোকদাযিনা লোকনাথেন – – –
যথা যথা বিপর্যেতি লোকতন্ত্রমসারবত্ .
তথা তথা বিরাগোঽত্র জাযতে নাত্র সংশযঃ ..
ইত্যাদি বহুশঃ কথযতা . ততশ্চ শান্তো রসো রসান্তরৈর্মোক্ষলক্ষণঃ
পুরুষার্থঃ পুরুষার্থান্তরৈস্তদুপসর্জনত্বেনানুগম্যমানোঽঙ্গিত্বেন বিবক্ষা-
বিষয ইতি মহাভারততাত্পর্যং সুব্যক্তমেবাবভাসতে . অঙ্গাঙ্গিভাবশ্চ
যথা রসানাং তথা প্রতিপাদিতমেব .

পারমার্থিকান্তস্তত্ত্বানপেক্ষযা শরীরস্যেবাঙ্গভূতস্য রসস্য পুরুষা-
র্থস্য চ স্বপ্রাধান্যেন চারুত্বমপ্যবিরুদ্ধম্ . ননু মহাভারতে যাবান্বি-
বক্ষাবিষযঃ সোঽনুক্রমণ্যাং সর্ব এবানুক্রান্তো ন চৈতত্তত্র দৃশ্যতে, প্রত্যুত
সর্বপুরুষার্থপ্রবোধহেতুত্বং সর্বরসগর্ভত্বং চ মহাভারতস্য তস্মিন্নুদ্দেশে
স্বশব্দনিবেদিতত্বেন প্রতীযতে . অত্রোচ্যতে – – – সত্যং শান্তস্যৈব রসস্যা-
ঙ্গিত্বং মহাভারতে মোক্ষস্য চ সর্বপুরুষার্থেভ্যঃ প্রাধান্যমিত্যেতন্ন স্ব-
শব্দাভিধেযত্বেনানুক্রমণ্যা দর্শিতম্, দর্শিতং তু ব্যঙ্গ্যত্বেন – – –
‘ ভগবান্বাসুদেবশ্চ কীর্ত্যতেঽত্র সনাতনঃ’
ইত্যস্মিন্ বাক্যে . অনেন হ্যযমর্থো ব্যঙ্গ্যত্বেন বিবক্ষিতো যদত্র
মহাভারতে পাণ্ডবাদিচরিতং যত্কীর্ত্যতে তত্সর্বমবসানবিরসমবিদ্যাপ্র-
পঞ্চরূপঞ্চ, পরমার্থসত্যস্বরূপস্তু ভগবান্বাসুদেবোঽত্র কীর্ত্যতে .
তস্মাত্তস্মিন্নেব পরমেশ্বরে ভগবতি ভবত ভাবিতচেতসো, মা ভূত বিভূ-
তিষু নিঃসারাসু রাগিণো গুণেষু বা নযবিনযপরাক্রমাদিষ্বমীষু কেবলেষু
কেষুচিত্সর্বাত্মনা প্রতিনিবিষ্টধিযঃ . তথা চাগ্রে – – পশ্যত নিঃসারতাং
সংসারস্যেত্যমুমেবার্থং দ্যোতযন্ স্ফুটমেবাবভাসতে ব্যঞ্জকশক্ত্যনুগৃহীতশ্চ
শব্দঃ . এবংবিধমেবার্থং গর্ভীকৃতং সন্দর্শযন্তোঽনন্তরশ্লোকা লক্ষ্যন্তে – –
‘ স হি সত্যম্’ ইত্যাদযঃ .

অযং চ নিগূঢরমণীযোঽর্থো মহাভারতাবসানে হরিবংশবর্ণনেন
সমাপ্তিং বিদধতা তেনৈব কবিবেধসা কৃষ্ণদ্বৈপাযনেন সম্যক্স্ফুটীকৃতঃ .
অনেন চার্থেন সংসারাতীতে তত্ত্বান্তরে ভক্ত্যতিশযং প্রবর্তযতা সকল
এব সাংসারিকো ব্যবহারঃ পূর্বপক্ষীকৃতো ন্যক্ষেণ প্রকাশতে . দেবতাতীর্থ-
তপঃপ্রভৃতীনাং চ প্রভাবাতিশযবর্ণনং তস্যৈব পরব্রহ্মণঃ প্রাপ্ত্যুপাযত্বেন
তদ্বিভূতিত্বেনৈব দেবতাবিশেষাণামন্যেষাং চ . পাণ্ডবাদিচরিতবর্ণন-
স্যাপি বৈরাগ্যজননতাত্পর্যাদ্বৈরাগ্যস্য চ মোক্ষমূলত্বান্মোক্ষস্য চ
ভগবত্প্রাপ্ত্যুপাযত্বেন মুখ্যতযা গীতাদিষু প্রদর্শিতত্বাত্পরব্রহ্মপ্রাপ্ত্যু-
পাযত্বমেব পরম্পরযা . বাসুদেবাদিসঞ্জ্ঞাভিধেযত্বেন চাপরিমিতশক্ত্যা-
স্পদং পরং ব্রহ্ম গীতাদিপ্রদেশান্তরেষু তদভিধানত্বেন লব্ধপ্রসিদ্ধি মাথু-
রপ্রাদুর্ভাবানুকৃতসকলস্বরূপং বিবক্ষিতং ন তু মাথুরপ্রাদুর্ভাবাংশ এব,
সনাতনশব্দবিশেষিতত্বাত্ . রামাযণাদিষু চানযা সঞ্জ্ঞযা ভগবন্মূ-
র্ত্যন্তরে ব্যবহারদর্শনাত্ . নির্ণীতশ্চাযমর্থঃ শব্দতত্ত্ববিদ্ভিরেব .

তদেবমনুক্রমণীনির্দিষ্টেন বাক্যেন ভগবদ্ব্যতিরেকিণঃ সর্বস্যান্য-
স্যানিত্যতাং প্রকাশযতা মোক্ষলক্ষণ এবৈকঃ পরঃ পুরুষার্থঃ শাস্ত্রনযে,
কাব্যনযে চ তৃষ্ণাক্ষযসুখপরিপোষলক্ষণঃ শান্তো রসো মহাভারতস্যা-
ঙ্গিত্বেন বিবক্ষিত ইতি সুপ্রতিপাদিতম্ . অত্যন্তসারভূতত্বাচ্চাযমর্থো
ব্যঙ্গ্যত্বেনৈব দর্শিতো ন তু বাচ্যত্বেন . সারভূতো হ্যর্থঃ স্বশব্দানভি-
ধেযত্বেন প্রকাশিতঃ সুতরামেব শোভামাবহতি . প্রসিদ্ধিশ্চেযমস্ত্যেব
বিদগ্ধবিদ্বত্পরিষত্সু যদভিমততরং বস্তু ব্যঙ্গ্যত্বেন প্রকাশ্যতে ন
সাক্ষাচ্ছব্দবাচ্যত্বেন . তস্মাত্স্থিতমেতত্ – – – অঙ্গিভূতরসাদ্যাশ্রযেণ
কাব্যে ক্রিযমাণে নবার্থলাভো ভবতি বন্ধচ্ছাযা চ মহতী সম্পদ্যত
ইতি . অত এব চ রসানুগুণার্থবিশেষোপনিবন্ধমলঙ্কারান্তরবিরহেঽপি
ছাযাতিশযযোগি লক্ষ্যে দৃশ্যতে . যথা – – –
মুনির্জযতি যোগীন্দ্রো মহাত্মা কুম্ভসম্ভবঃ .
যেনৈকচুলকে দৃষ্টৌ তৌ দিব্যৌ মত্স্যকচ্ছপৌ ..
ইত্যাদৌ . অত্র হ্যদ্ভুতরসানুগুণমেকচুলকে মত্স্যকচ্ছপদর্শনং
ছাযাতিশযং পুষ্ণাতি . তত্র হ্যেকচুলকে সকলজলধিসন্নিধানাদপি
দিব্যমত্স্যকচ্ছপদর্শনমক্ষুণ্ণত্বাদদ্ভুতরসানুগুণতরম্ . ক্ষুণ্ণং হি
বস্তু লোকপ্রসিদ্ধ্যাদ্ভুতমপি নাশ্চর্যকারি ভবতি . ন চাক্ষুণ্ণং বস্তূপ-
নিবধ্যমানমদ্ভুতরসস্যৈবানুগুণং যাবদ্রসান্তরস্যাপি . তদ্যথা – – –
স্বিদ্যতি রোমাঞ্চতে বেপতে রথ্যাযান্তুলাগ্রেণ .
স পার্শ্বোঽদ্যাপি সুভগ তস্যা যেনাস্যতিক্রান্তঃ ..

এতদ্গাথার্থাদ্ভাব্যমানাদ্যা রসপ্রতীতির্ভবতি, সা ত্বাং স্পৃষ্ট্বা স্বিদ্য-
তি রোমাঞ্চতে বেপতে ইত্যেবংবিধাদর্থাত্প্রতীযমানান্মনাগপি নো জাযতে .
তদেবং ধ্বনিপ্রভেদসমাশ্রযেণ যথা কাব্যার্থানাং নবত্বং জাযতে তথা
প্রতিপাদিতম্ . গুণীভূতব্যঙ্গ্যস্যাপি ত্রিভেদব্যঙ্গ্যাপেক্ষযা যে প্রকারা-
স্তত্সমাশ্রযেণাপি কাব্যবস্তূনাং নবত্বং ভবত্যেব . তত্ত্বতিবিস্তারকা-
রীতি নোদাহৃতং সহৃদযৈঃ স্বযমুত্প্রেক্ষণীযম্ .. ৫..

ধ্বনেরিত্থং গুণীভূতব্যঙ্গ্যস্য চ সমাশ্রযাত্ .
ন কাব্যার্থবিরামোঽস্তি যদি স্যাত্প্রতিভাগুণঃ .. ৬..

সত্স্বপি পুরাতনকবিপ্রবন্ধেষু যদি স্যাত্প্রতিভাগুণঃ, তস্মিংস্ত্ব-
সতি ন কিঞ্চিদেব কবের্বস্ত্বস্তি . বন্ধচ্ছাযাপ্যর্থদ্বযানুরূপশব্দ-
সন্নিবেশোঽর্থপ্রতিভানাভাবে কথমুপপদ্যতে . অনপেক্ষিতার্থবিশেষাক্ষররচনৈব
বন্ধচ্ছাযেতি নেদং নেদীযঃ সহৃদযানাম্ . এবং হি সত্যর্থানপেক্ষচতুর-
মধুরবচনরচনাযামপি কাব্যব্যপদেশঃ প্রবর্তেত . শব্দার্থযোঃ সাহিত্যেন
কাব্যত্বে কথং তথাবিধে বিষযে কাব্যব্যবস্থেতি চেত্ – – – পরোপনিবদ্ধার্থ-
বিরচনে যথা তত্কাব্যত্বব্যবহারস্তথা তথাবিধানাং কাব্যসন্দ-
র্ভাণাম্ .. ৬..

ন চার্থানন্ত্যং ব্যঙ্গ্যার্থাপেক্ষযৈব যাবদ্বাচ্যার্থাপেক্ষযাপীতি
প্রতিপাদযিতুমুচ্যতে – – –
অবস্থাদেশকালাদিবিশেষৈরপি জাযতে .
আনন্ত্যমেব বাচ্যস্য শুদ্ধস্যাপি স্বভাবতঃ .. ৭..
শুদ্ধস্যানপেক্ষিতব্যঙ্গ্যস্যাপি বাচ্যস্যানন্ত্যমেব জাযতে স্বভা-
বতঃ . স্বভাবো হ্যযং বাচ্যানাং চেতনানামচেতনানাং চ যদবস্থাভেদা-
দ্দেশভেদাত্কালভেদাত্স্বালক্ষণ্যভেদাচ্চানন্ততা ভবতি . তৈশ্চ তথাব্যব-
স্থিতৈঃ সদ্ভিঃ প্রসিদ্ধানেকস্বভাবানুসরণরূপযা স্বভাবোক্ত্যাপি তাব-
দুপনিবধ্যমানৈর্নিরবধিঃ কাব্যার্থঃ সম্পদ্যতে . তথা হ্যবস্থাভেদান্নবত্বং
যথা – – – ভগবতী পার্বতী কুমারসম্ভবে ‘ সর্বোপমাদ্রব্যসমুচ্চযেন’ ইত্যা-
দিভিরুক্তিভিঃ প্রথমমেব পরিসমাপিতরূপবর্ণনাপি পুনর্ভগবতঃ শম্ভো-
র্লোচনগোচরমাযান্তী ‘ বসন্তপুষ্পাভরণং বহন্তী’ মন্মথোপকরণভূতেন
ভঙ্গ্যন্তরেণোপবর্ণিতা . সৈব চ পুনর্নবোদ্বাহসমযে প্রসাধ্যমানা ‘ তাং
প্রাঙ্মুখীং তত্র নিবেশ্য তন্বীম্’ ইত্যাদ্যুক্তিভির্নবেনৈব প্রকারেণ নিরূপি-
তরূপসৌষ্ঠবা . ন চ তে তস্য কবেরেকত্রৈবাসকৃত্কৃতা বর্ণনপ্রকারা অপুন-
রুক্তত্বেন বা নবনবার্থনির্ভরত্বেন বা প্রতিভাসন্তে . দর্শিতমেব চৈতদ্বি-
ষমবাণলীলাযাম্ – – –
ন চ তেষাং ঘটতেঽবধিঃ, ন চ তে দৃশ্যন্তে কথমপি পুনরুক্তাঃ .
যে বিভ্রমাঃ প্রিযাণামর্থা বা সুকবিবাণীনাম্ ..
অযমপরশ্চাবস্থাভেদপ্রকারো যদচেতনানাং সর্বেষাং চেতনং দ্বিতীযং
রূপমভিমানিত্বপ্রসিদ্ধং হিমবদ্গঙ্গাদীনাম্ . তচ্চোচিতচেতনবিষযস্বরূপ-
যোজনযোপনিবধ্যমানমন্যদেব সম্পদ্যতে . যথা কুমারসম্ভব এব
পর্বতস্বরূপস্য হিমবতো বর্ণনং, পুনঃ সপ্তর্ষিপ্রিযোক্তিষু চেতনতত্স্বরূপা-
পেক্ষযা প্রদর্শিতং তদপূর্বমেব প্রতিভাতি . প্রসিদ্ধশ্চাযং সত্কবীনাং মার্গঃ .
ইদং চ প্রস্থানং কবিব্যুত্পত্তযে বিষমবাণলীলাযাং সপ্রপঞ্চং দর্শিতম্ .
চেতনানাং চ বাল্যাদ্যবস্থাভিরন্যত্বং সত্কবীনাং প্রসিদ্ধমেব . চেতনা-
নামবস্থাভেদেঽপ্যবান্তরাবস্থাভেদান্নানাত্বম্ . যথা কুমারীণাং কুসুম-
শরভিন্নহৃদযানামন্যাসাং চ . তত্রাপি বিনীতানামবিনীতানাং চ .
অচেতনানাং চ ভাবানামারম্ভাদ্যবস্থাভেদভিন্নানামেকৈকশঃ স্বরূপমুপ-
নিবধ্যমানমানন্ত্যমেবোপযাতি . যথা – – –
হংসানাং নিনদেষু যৈঃ কবলিতৈরাসজ্যতে কূজতা-
মন্যঃ কোঽপি কষাযকণ্ঠলুঠনাদাঘর্ঘরো বিভ্রমঃ .
তে সম্প্রত্যকঠোরবারণবধূদন্তাঙ্কুরস্পর্ধিনো
নির্যাতাঃ কমলাকরেষু বিসিনীকন্দাগ্রিমগ্রন্থযঃ ..
এবমন্যত্রাপি দিশানযানুসর্তব্যম্ .

দেশভেদান্নানাত্বমচেতনানাং তাবত্ . যথা বাযূনাং নানাদিগ্দেশ-
চারিণামন্যেষামপি সলিলকুসুমাদীনাং প্রসিদ্ধমেব . চেতনানামপি
মানুষপশুপক্ষিপ্রভৃতীনাং গ্রামারণ্যসলিলাদিসমেধিতানাং পরস্পরং মহা-
ন্বিশেষঃ সমুপলক্ষ্যত এব . স চ বিবিচ্য যথাযথমুপনিবধ্যমান-
স্তথৈবানন্ত্যমাযাতি . তথা হি – – – মানুষাণামেব তাবদ্দিগ্দেশাদি-
ভিন্নানাং যে ব্যবহারব্যাপারাদিষু বিচিত্রা বিশেষাস্তেষাং কেনান্তঃ
শক্যতে গন্তুম্, বিশেষতো যোষিতাম্ . উপনিবধ্যতে চ তত্সর্বমেব
সুকবিভির্যথাপ্রতিভম্ .
কালভেদাচ্চ নানাত্বম্ . যথর্তুভেদাদ্দিগ্ব্যোমসলিলাদীনামচেতনা-
নাম্ . চেতনানাং চৌত্সুক্যাদযঃ কালবিশেষাশ্রযিণঃ প্রসিদ্ধা এব .
স্বালক্ষণ্যপ্রভেদাচ্চ সকলজগদ্গতানাং বস্তূনাং বিনিবন্ধনং প্রসিদ্ধমেব .
তচ্চ যথাবস্থিতমপি তাবদুপনিবধ্যমানমনন্ততামেব কাব্যার্থ-
স্যাপাদযতি .
অত্র কেচিদাচক্ষীরন্ – – – যথা সামান্যাত্মনা বস্তূনি বাচ্যতাং
প্রতিপদ্যন্তে ন বিশেষাত্মনা ; তানি হি স্বযমনুভূতানাং সুখাদীনাং
তন্নিমিত্তানাং চ স্বরূপমন্যত্রারোপযদ্ভিঃ স্বপরানুভূতরূপসামান্য-
মাত্রাশ্রযেণোপনিবধ্যন্তে কবিভিঃ . ন হি তৈরতীতমনাগতং বর্তমানঞ্চ
পরিচিতাদিস্বলক্ষণং যোগিভিরিব প্রত্যক্ষীক্রিযতে ; তচ্চানুভাব্যানু-
ভবসামান্যং সর্বপ্রতিপত্তৃসাধারণং পরিমিতত্বাত্পুরাতনানামেব গোচরী-
ভূতম্, তস্যাবিষযত্বানুপপত্তেঃ . অত এব স প্রকারবিশেষো যৈরদ্যতনৈ-
রভিনবত্বেন প্রতীযতে তেষামভিমানমাত্রমেব ভণিতিকৃতং বৈচিত্র্যমাত্রম-
ত্রাস্তীতি .
তত্রোচ্যতে – – – যত্তূক্তং সামান্যমাত্রাশ্রযেণ কাব্যপ্রবৃত্তিস্তস্য চ
পরিমিতত্বেন প্রাগেব গোচরীকৃতত্বান্নাস্তি নবত্বং কাব্যবস্তূনামিতি,
তদযুক্তম্ ; যতো যদি সামান্যমাত্রমাশ্রিত্য কাব্যং প্রবর্ততে কিঙ্কৃত-
স্তর্হি মহাকবিনিবধ্যমানানাং কাব্যার্থানামতিশযঃ . বাল্মীকিব্য-
তিরিক্তস্যান্যস্য কবিব্যপদেশ এব বা সামান্যব্যতিরিক্তস্যা-
ন্যস্য কাব্যার্থস্যাভাবাত্, সামান্যস্য চাদিকবিনৈব প্রদর্শিত-
ত্বাত্ . উক্তিবৈচিত্র্যান্নৈষ দোষ ইতি চেত্ – – – কিমিদমুক্তিবৈচিত্র্যম্ ?
উক্তির্হি বাচ্যবিশেষপ্রতিপাদি বচনম্ . তদ্বৈচিত্র্যে কথং ন বাচ্যবৈ-
চিত্র্যম্ . বাচ্যবাচকযোরবিনাভাবেন প্রবৃত্তেঃ . বাচ্যানাং চ কাব্যে-
প্রতিভাসমানানাং যদ্রূপং তত্তু গ্রাহ্যবিশেষাভেদেনৈব প্রতীযতে . তেনো-
ক্তিবৈচিত্র্যবাদিনা বাচ্যবৈচিত্র্যমনিচ্ছতাপ্যবশ্যমেবাভ্যুপগন্তব্যম্ .
তদযমত্র সঙ্ক্ষেপঃ – – –
বাল্মীকিব্যতিরিক্তস্য যদ্যেকস্যাপি কস্যচিত্ .
ইষ্যতে প্রতিভার্থেষু তত্তদানন্ত্যমক্ষযম্ ..

কিঞ্চ, উক্তিবৈচিত্র্যং যত্কাব্যনবত্বে নিবন্ধনমুচ্যতে তদস্মত্পক্ষা-
নুগুণমেব . যতো যাবানযং কাব্যার্থানন্ত্যভেদহেতুঃ প্রকারঃ প্রাগ্দর্শিতঃ
স সর্ব এব পুনরুক্তিবৈচিত্র্যাদ্ দ্বিগুণতামাপদ্যতে . যশ্চাযমুপমাশ্লেষাদি-
রলঙ্কারবর্গঃ প্রসিদ্ধঃ স ভণিতিবৈচিত্র্যাদুপনিবধ্যমানঃ স্বযমেবানব-
ধির্ধত্তে পুনঃ শতশাখতাম্. ভণিতিশ্চ স্বভাষাভেদেন ব্যবস্থিতা সতী
প্রতিনিযতভাষাগোচরার্থবৈচিত্র্যনিবন্ধনং পুনরপরং কাব্যার্থানামান-
ন্ত্যমাপাদযতি . যথা মমৈব – – –
মম মম ইতি ভণতো ব্রজতি কালো জনস্য .
তথাপি ন দেবো জনার্দনো গোচরো ভবতি মনসঃ .. ৭..
ইত্থং যথা যথা নিরূপ্যতে তথা তথা ন লভ্যতেঽন্তঃ কাব্যার্থা-
নাম্ . ইদং তূচ্যতে – – –
অবস্থাদিবিভিন্নানাং বাচ্যানাং বিনিবন্ধনম্ .
যত্প্রদর্শিতং প্রাক্
ভূম্নৈব দৃশ্যতে লক্ষ্যে – –
ন তচ্ছক্যমপোহিতুম্ .
– – তত্তু ভাতি রসাশ্রযাত্ .. ৮..
তদিদমত্র সঙ্ক্ষেপেণাভিধীযতে সত্কবীনামুপদেশায – – –
রসভাবাদিসম্বদ্ধা যদ্যৌচিত্যানুসারিণী .
অন্বীযতে বস্তুগতির্দেশকালাদিভেদিনী .. ৯..
তত্কা গণনা কবীনামন্যেষাং পরিমিতশক্তীনাম্ .
বাচস্পতিসহস্রাণাং সহস্রৈরপি যত্নতঃ .
নিবদ্ধা সা ক্ষযং নৈতি প্রকৃতির্জগতামিব .. ১০..
যথা হি জগত্প্রকৃতিরতীতকল্পপরম্পরাবির্ভূতবিচিত্রবস্তুপ্রপঞ্চা
সতী পুনরিদানীং পরিক্ষীণা পরপদার্থনির্মাণশক্তিরিতি ন শক্যতেঽভি-
ধাতুম্ . তদ্বদেবেযং কাব্যস্থিতিরনন্তাভিঃ কবিমতিভিরুপভুক্তাপি নেদা-
নীং পরিহীযতে, প্রত্যুত নবনবাভির্ব্যুত্পত্তিভিঃ পরিবর্ধতে . ইত্থং
স্থিতেঽপি
সংবাদাস্তু ভবন্ত্যেব বাহুল্যেন সুমেধসাম্ .
স্থিতং হ্যেতত্ সংবাদিন্য এব মেধাবিনাং বুদ্ধযঃ . কিন্তু – – –
নৈকরূপতযা সর্বে তে মন্তব্যা বিপশ্চিতা .. ১১..
কথমিতি চেত্ – – –
সংবাদো হ্যন্যসাদৃশ্যং তত্পুনঃ প্রতিবিম্ববত্ .
আলেখ্যাকারবত্তুল্যদেহিবচ্চ শরীরিণাম্ .. ১২..
সংবাদো হি কাব্যার্থস্যোচ্যতে যদন্যেন কাব্যবস্তুনা
সাদৃশ্যম্ . তত্পুনঃ শরীরিণাং প্রতিবিম্ববদালেখ্যাকারবত্তুল্যদেহিবচ্চ
ত্রিধা ব্যবস্থিতম্ . কিঞ্চিদ্ধি কাব্যবস্তু বস্ত্বন্তরস্য শরীরিণঃ
প্রতিবিম্বকল্পম্, অন্যদালেখ্যপ্রখ্যম্, অন্যত্তুল্যেন শরীরিণা
সদৃশম্ .
তত্র পূর্বমনন্যাত্ম তুচ্ছাত্ম তদনন্তরম্ .
তৃতীযং তু প্রসিদ্ধাত্ম নান্যসাম্যং ত্যজেত্কবিঃ .. ১৩..
তত্র পূর্বং প্রতিবিম্বকল্পং কাব্যবস্তু পরিহর্তব্যং সুমতিনা . যত-
স্তদনন্যাত্ম তাত্ত্বিকশরীরশূন্যম্ . তদনন্তরমালেখ্যপ্রখ্যমন্যসাম্যং
শরীরান্তরযুক্তমপি তুচ্ছাত্মত্বেন ত্যক্তব্যম্ . তৃতীযং তু বিভিন্নকম-
নীযশরীরসদ্ভাবে সতি সসংবাদমপি কাব্যবস্তু ন ত্যক্তব্যং কবিনা .
ন হি শরীরী শরীরিণান্যেন সদৃশোঽপ্যেক এবেতি শক্যতে বক্তুম্ .. ১৩..
এতদেবোপপাদযিতুমুচ্যতে – – –
আত্মনোঽন্যস্য সদ্ভাবে পূর্বস্থিত্যনুযায্যপি .
বস্তু ভাতিতরাং তন্ব্যাঃ শশিচ্ছাযমিবাননম্ .. ১৪..
তত্ত্বস্য সারভূতস্যাত্মনঃ সদ্ভাবেঽন্যস্য পূর্বস্থিত্যনুযায্যপি
বস্তু ভাতিতরাম্ . পুরাণরমণীযচ্ছাযানুগৃহীতং হি বস্তু শরীরবত্পরাং
শোভাং পুষ্যতি . ন তু পুনরুক্তত্বেনাবভাসতে . তন্ব্যাঃ শশিচ্ছাযমি-
বাননম্ .
এবং তাবত্সসংবাদানাং সমুদাযরূপাণাং বাক্যার্থানাং বিভক্তাঃ সী-
মানঃ . পদার্থরূপাণাং চ বস্ত্বন্তরসদৃশানাং কাব্যবস্তূনাং নাস্ত্যেব
দোষ ইতি প্রতিপাদযিতুমুচ্যতে – – –
অক্ষরাদিরচনেব যোজ্যতে যত্র বস্তুরচনা পুরাতনী .
নূতনে স্ফুরতি কাব্যবস্তুনি ব্যক্তমেব খলু সা ন দুষ্যতি .. ১৫..
ন হি বাচস্পতিনাপ্যক্ষরাণি পদানি বা কানিচিদপূর্বাণি ঘট-
যিতুং শক্যন্তে . তানি তু তান্যেবোপনিবদ্ধানি ন কাব্যাদিষু নবতাং
বিরুধ্যন্তি . তথৈব পদার্থরূপাণি শ্লেষাদিমযান্যর্থতত্ত্বানি .

তস্মাত্ – –
যদপি তদপি রম্যং যত্র লোকস্য কিঞ্চিত্-
স্ফুরিতমিদমিতীযং বুদ্ধিরভ্যুজ্জিহীতে .
স্ফুরণেযং কাচিদিতি সহৃদযানাং চমত্কৃতিরুত্পদ্যতে .
অনুগতমপি পূর্বচ্ছাযযা বস্তু তাদৃক্
সুকবিরুপনিবধ্নন্নিন্দ্যতাং নোপযাতি .. ১৬..
তদনুগতমপি পূর্বচ্ছাযযা বস্তু তাদৃক্ তাদৃক্ষং সুকবির্বিবক্ষিতব্য-
ঙ্গ্যবাচ্যার্থসমর্পণসমর্থশব্দরচনারূপযা বন্ধচ্ছাযযোপনিবধ্নন্নিন্দ্যতাং
নৈব যাতি . তদিত্থং স্থিতম্ – – –
প্রতীযন্তাং বাচো নিমিতবিবিধার্থামৃতরসা
ন সাদঃ কর্তব্যঃ কবিভিরনবদ্যে স্ববিষযে .
সন্তি নবাঃ কাব্যার্থাঃ পরোপনিবদ্ধার্থবিরচনে ন কশ্চিত্কবের্গুণ
ইতি ভাবযিত্বা .
পরস্বাদানেচ্ছাবিরতমনসো বস্তু সুকবেঃ
সরস্বত্যেবৈষা ঘটযতি যথেষ্টং ভগবতী .. ১৭..
পরস্বাদানেচ্ছাবিরতমনসঃ সুকবেঃ সরস্বত্যেষা ভগবতী যথেষ্টং
ঘটযতি বস্তু . যেষাং সুকবীনাং প্রাক্তনপুণ্যাভ্যাসপরিপাকবশেন
প্রবৃত্তিস্তেষাং পরোপরচিতার্থপরিগ্রহনিঃস্পৃহাণাং স্বব্যাপারো ন ক্বচিদু-
পযুজ্যতে . সৈব ভগবতী সরস্বতী স্বযমভিমতমর্থমাবির্ভাবযতি .
এতদেব হি মহাকবিত্বং মহাকবীনামিত্যোম্ .

ইত্যক্লিষ্টরসাশ্রযোচিতগুণালঙ্কারশোভাভৃতো
যস্মাদ্বস্তু সমীহিতং সুকৃতিভিঃ সর্বং সমাসাদ্যতে .
কাব্যাখ্যেঽখিলসৌখ্যধাম্নি বিবুধোদ্যানে ধ্বনির্দর্শিতঃ
সোঽযং কল্পতরূপমানমহিমা ভোগ্যোঽস্তু ভব্যাত্মনাম্ ..

সত্কাব্যতত্ত্বনযবর্ত্মচিরপ্রসুপ্ত
কল্পং মনস্সু পরিপক্বধিযাং যদাসীত্ .
তদ্ব্যাকরোত্সহৃদযোদযলাভহেতো-
রানন্দবর্ধন ইতি প্রথিতাভিধানঃ ..

ইতি শ্রীরাজানকানন্দবর্ধনাচার্যবিরচিতে ধ্বন্যালোকে চতুর্থ উদ্দ্যোতঃ .