ধ্বন্যালোক উদ্যোত ২

.. ধ্বন্যলোক ২ ..
এবমবিবক্ষিতবাচ্যবিবক্ষিতান্যপরবাচ্যত্বেন
ধ্বনির্দ্বিপ্রকারঃ প্রকাশিতঃ.
তত্রাবিবক্ষিতবাচ্যস্য প্রভেদপ্রতিপাদনাযেদমুচ্যতে – – –

অর্থান্তরে সঙ্ক্রমিতমত্যন্তং বা তিরস্কৃতম্ .
অবিবক্ষিতবাচ্যস্য ধ্বনের্বাচ্যং দ্বিধা মতম্ .. ১..
তথাবিধাভ্যাং চ তাভ্যাং ব্যঞ্গ্যস্যৈব বিশেষঃ .

তত্রার্থান্তরসঙ্ক্রমিতবাচ্যো যথা – – –
স্নিগ্ধশ্যামলকান্তিলিপ্তবিযতো বেল্লদ্বলাকা ঘনা
বাতাঃ শীকরিণঃ পযোদসুহৃদামানন্দকেকাঃ কলাঃ .
কামং সন্তু দৃঢং কঠোরহৃদযো রামোঽস্মি সর্বং সহে
বৈদেহী তু কথম্ ভবিশ্যতি হহা হা দেবি ধীরা ভব ..

ইত্যত্র রামশব্দঃ . অনেন হি ব্যঙ্গ্যধর্মান্তরপরিণতঃ সঞ্জ্ঞী
প্রত্যায্যতে , ন সংজ্ঞিমাত্রম্ .

যথা চ মমৈব বিষমবাণলীলাযাম্ – – –
তদা জাযন্তে গুণা যদা তে সহৃদযৈর্গৃহ্যন্তে .
রবিকিরণানুগৃহীতানি ভবন্তি কমলানি কমলানি ..
ইত্যত্র দ্বিতীযঃ কমলশব্দঃ .

অত্যন্ততিরস্কৃতবাচ্যো যথাদিকবের্বাল্মীকেঃ – – –
রবিসঙ্ক্রান্তসৌভাগ্যস্তুষারাবৃতমণ্ডলঃ .
নিঃশ্বাসান্ধ ইবাদর্শশ্চন্দ্রমা ন প্রকাশতে .. ইতি .
অত্রান্ধশব্দঃ .
গগনং চ মত্তমেঘং ধারালুলিতার্জুনানি চ বনানি .
নিরহঙ্কারমৃগাঙ্কা হরন্তি নীলা অপি নিশাঃ ..
অত্র মত্তনিরহঙ্কারশব্দৌ .. ১..

অসংলক্ষ্যক্রমোদ্দ্যোতঃ ক্রমেণ দ্যোতিতঃ পরঃ .
বিবক্ষিতাভিধেযস্য ধ্বনেরাত্মা দ্বিধা মতঃ .. ২..
মুখ্যতযা প্রকাশমানো ব্যঙ্গ্যোঽর্থো ধ্বনেরাত্মা . স চ বাচ্যার্থাপেক্ষযা
কশ্চিদলক্ষ্যক্রমতযা প্রকাশতে , কশ্চিদ্ক্রমেণেতি দ্বিধা মতঃ .. ২..

তত্র
রসভাবতদাভাসতত্প্রশান্ত্যাদিরক্রমঃ .
ধ্বনেরাত্মাঙ্গিভাবেন ভাসমানো ব্যবস্থিতঃ .. ৩..

রসাদিরর্থো হি সহেব বাচ্যেনাবভাসতে . স চাঙ্গিত্বেনাবভাসমানো
ধ্বনেরাত্মা .

ইদানীং রসবদলংকারাদলক্ষ্যক্রমদ্যোতনাত্মনো ধ্বনের্বিভক্তো
বিষয ইতি প্রদর্শ্যতে – – –
বাচ্যবাচকচারুত্বহেতূনাং বিবিধাত্মনাম্ .
রসাদিপরতা যত্র স ধ্বনের্বিষযো মতঃ .. ৪..

রসভাবতদাভাসতত্প্রশমলক্ষণং মুখ্যমর্থমনুবর্তমানা
শব্দার্থালঙ্কারা গুণাশ্চ পরস্পরং ধ্বন্যপেক্ষযা
বিভিন্নরূপা ব্যবস্থিতাস্তত্র কাব্যে ধ্বনিরিতি ব্যপদেশঃ .. ৪..

প্রধান্যেঽন্যত্র বাক্যার্থে যত্রাঙ্গং তু রসাদযঃ .
কাব্যে তস্মিন্নলঙ্কারো রসাদিরিতি মে মতিঃ .. ৫..

যদ্যপি রসবদলঙ্কারস্যান্যৈর্দর্শিতো বিষযস্তথাপি যস্মিন্ কাব্যে
প্রধানতযাঽন্যোঽর্থো বাক্যার্থীভূতস্তস্য চাঙ্গভূতা যে
রসাদযস্তে রসাদেরলঙ্কারস্য বিষযা ইতি মামকীনঃ পক্ষঃ .
তদ্যথা চাটুষু প্রেযোঽলঙ্কারস্য বাক্যার্থত্বেঽপি
রসাদযোঽঙ্গভূতা দৃশ্যন্তে .

স চ রসাদিরলঙ্কারঃ শুদ্ধঃ সঙ্কীর্ণো বা . তত্রাদ্যো যথা – – –

কিং হাস্যেন ন মে প্রযাস্যসি পুনঃ প্রাপ্তশ্চিরাদ্দর্শনং
কেযম্ নিষ্করুণ প্রবাসরুচিতা কেনাসি দূরিকৃতঃ .
স্বপ্নান্তেষ্বিতি তে বদন্ প্রিযতমব্যাসক্তকণ্ঠগ্রহো
বুদ্ধা রোদিতি রিক্তবাহুবলযস্তারং রিপুস্ত্রীজনঃ ..

ইত্যত্র করুণরসস্য শুদ্ধস্যাঙ্গভাঅবাত্স্পষ্টমেব
রসবদলঙ্কারত্বম্ . এবমেবংবিধে বিষযে রসান্তরাণাং স্পষ্ট
এবাঙ্গভাবঃ .

সঙ্কীর্ণো রসাদিরঙ্গভূতো যথ – – –
ক্ষিপ্তো হস্তাবলগ্নঃ প্রসভমভিহতোঽপ্যাদদানোঽংশুকান্তং
গৃহ্ণন্ কেশেষ্বপাস্তশ্চরণনিপতিতো নেক্ষিতঃ সম্ভ্রমেণ .
আলিঙ্গন্ যোঽবধূতস্ত্রিপুরযুবতিভিঃ সাশ্রুনেত্রোত্পলাভিঃ
কামীবার্দ্রাপরাধঃ স দহতু দুরিতং শাম্ভবো বঃ শরাগ্নিঃ ..

ইত্যত্র ত্রিপুররিপুপ্রভাবাতিশযস্য বাক্যার্থত্বে ঈর্ষ্যাবিপ্রলম্ভস্য
শ্লেষসহিতস্যাঙ্গভাব ইতি , এবংবিধ এব রসবদাদ্যলঙ্কারস্য
ন্যায্যো বিষযঃ . অত এব চের্ষ্যাবিপ্রলম্ভকরুণযোরঙ্গত্বেন
ব্যবস্থানাত্সমাবেশো ন দোষঃ . যত্র হি রসস্য বাক্যার্থীভাবস্তত্র
কথমলঙ্কারত্বম্ ? অলঙ্কারো হি চারুত্বহেতুঃ প্রসিদ্ধঃ ; ন
ত্বসাবাত্মৈবাত্মনশ্চারুত্বহেতুঃ .
তথা চাযমত্র সংক্ষেপঃ – – –

রসভাবাদিতাত্পর্যমাশ্রিত্য বিনিবেশনম্ .
অলঙ্কৃতীনাং সর্বাসামলঙ্কারত্বসাধনম্ ..

তস্মাদ্যত্র রসাদযো বাক্যার্থীভূতাঃ স সর্বো ন
রসাদেরলঙ্কারস্য বিষযঃ ; স ধ্বনেঃ প্রভেদঃ ,
তস্যোপমাদযোঽলঙ্কারাঃ . যত্র তু প্রাধান্যেনার্থান্তরস্য
বাক্যার্থীভাবে রসাদিভিশ্চারুত্বনিষ্পত্তিঃ ক্রিযতে ,
স রসাদেরলঙ্কারতাযা বিষযঃ .

এবং ধ্বনেরুপমাদীনাং রসবদলঙ্কারস্য চ বিভক্তবিষযতা
ভবতি .

যদি তু চেতনানাং বাক্যার্থীভাবো রসাদ্যলঙ্কারস্য বিষয
ইত্যুচ্যতে তর্হ্যুপমাদীনাং প্রবিরলবিষযতা নির্বিষযতা বাভিহিতা
স্যাত্ . যস্মাদচেতনবস্তুবৃত্তে বাক্যার্থীভূতে পুনশ্চেতন-
বস্তুবৃত্তান্তযোজনযা যথাকথঞ্চিদ্ভবিতব্যম্ . অথ সত্যামপি
তস্যাং যত্রাচেতনানাং বাক্যার্থীভাবো নাসৌ রসবদলঙ্কারস্য
বিষয ইত্যুচ্যতে . তত্ মহতঃ কাব্যপ্রবন্ধস্য রসনিধানভূতস্য
নীরসত্বমভিহিতং স্যাত্ . যথা – – –

তরঙ্গভ্রূভঙ্গা ক্ষুভিতবিহগশ্রেণিরশনা
বিকর্ষন্তী ফেনং বসনমিব সংরম্ভশিথিলম্ .
যথাবিদ্ধং যাতি স্খলিতমভিসন্ধায বহুশো
নদীরূপেণেযং ধ্রুবমসহনা সা পরিণতা ..

যথা বা – – –
তন্বী মেঘজলার্দ্রপল্লবতযা ধৌতাধরেবাশ্রুভিঃ
শূন্যেবাভরণৈঃ স্বকালবিরহাদ্বিশ্রান্তপুষ্পোদ্গমা .
চিন্তা মৌনমিবাশ্রিতা মধুকৃতাং শব্দৈর্বিনা লক্ষ্যতে
চণ্ডী মামবধূয পাদপতিতং জাতানুতাপেব সা ..

যথা বা – – –
তেষাং গোপবধূবিলাসসুহৃদাং রাধারহঃসাক্ষিণাং
ক্ষেমং ভদ্র কলিন্দশৈলতনযাতীরে লতাবেশ্মনাং .
বিচ্ছিন্নে স্মরতল্পকল্পনমৃদুচ্ছেদোপযোগেঽধুনা
তে জানে জরঠীভবন্তি বিগলন্নীলত্বিষঃ পল্লবাঃ ..

ইত্যেবমাদৌ বিষযেঽচেতনানাং বাক্যার্থীভাবেঽপি
চেতনবস্তুবৃত্তান্তযোজনাস্ত্যেব .
অথ যত্র চেতনবস্তুবৃত্তান্তযোজনাস্তি
তত্র রসাদিরলঙ্কারঃ . তদেবং সত্যুপমাদযো নির্বিষযাঃ
প্রবিরলবিষযা বা স্যুঃ . যস্মান্নাস্ত্যেবাসাবচেতনবস্তুবৃত্তান্তো
যত্র চেতনবস্তুবৃত্তান্তযোজনা নাস্ত্যন্ততো বিভাবত্বেন .
তস্মাদঙ্গত্বেন চ রসাদীনামলঙ্কারতা . যঃ পুনরঙ্গী রসো ভাবো
বা সর্বাকারমলঙ্কার্যঃ স ধ্বনেরাত্মেতি .. ৫..

কিঞ্চ – – –
তমর্থমবলম্বন্তে যেঽঙ্গিনং তে গুণাঃ স্মৃতাঃ .
অঙ্গাশ্রিতাস্ত্বল’ ঙ্কারা মন্তব্যাঃ কটকাদিবত্ .. ৬..

যে তমর্থং রসাদিলক্ষণমঙ্গিনং সন্তমবলম্বতে তে গুণাঃ
শৌর্যাদিবত্ . বাচ্যবাচকলক্ষণান্যঙ্গানি যে পুনস্তদাশ্রিতাস্-
তেঽলঙ্কারা মন্তব্যাঃ কটকাদিবত্ .. ৬..

তথা চ – – –
শৃঙ্গার এব মধুরঃ পরঃ প্রহ্লাদনো রসঃ .
তন্মযং কাব্যমাশ্রিত্য মাধুর্যং প্রতিতিষ্ঠতি .. ৭..

শৃঙ্গার এব রসান্তরাপেক্ষযা মধুরঃ প্রহ্লাদহেতুত্বাত্ .
তত্প্রকাশনপরশব্দার্থতযা কাব্যস্য স মাধুর্যলক্ষণো গুণঃ .
শ্রব্যত্বং পুনরোজসোঽপি সাধারণমিতি .. ৭..

শৃঙ্গারে বিপ্রলম্ভাখ্যে করুণে চ প্রকর্ষবত্ .
মাধুর্যমার্দ্রতাং যাতি যতস্তত্রাধিকং মনঃ .. ৮..

বিপ্রলম্ভশৃঙ্গারকরুণযোস্তু মাধুর্যমেব প্রকর্ষবত্ .
সহৃদযহৃদযাবর্জনাতিশযনিমিত্তত্বাদিতি .. ৮..

রৌদ্রাদযো রসা দীপ্ত্যা লক্ষ্যন্তে কাব্যবর্তিনঃ .
তদ্ব্যক্তিহেতূ শব্দার্থাবাশ্রিত্যৌজো ব্যবস্থিতম্ .. ৯..

রৌদ্রাদযো হি রসাঃ পরাং দীপ্তিমুজ্জ্বলতাং জনযন্তীতি লক্ষণযা
ত এব দীপ্তিরিত্যুচ্যতে . তত্প্রকাশনপরঃ শব্দো দীর্ঘসমাস-
রচনালঙ্কৃতং বাক্যম্ . যথা – – –

চঞ্চদ্ভুজভ্রমিতচণ্ডগদাভিঘাত-
সঞ্চূর্ণিতোরুযুগলস্য সুযোধনস্য .
স্ত্যানাববদ্ধঘনশোণিতশোণপাণি-
রুত্তংসযিষ্যতি কচাংস্তব দেবি ভীমঃ ..

তত্প্রকাশনপরশ্চার্থোঽনপেক্ষিতদীর্ঘসমাসরচনঃ
প্রসন্নবাচকাভিধেযঃ . যথা – – –
যো যঃ শস্ত্রং বিভর্তি স্বভুজগুরুমদঃ পাণ্ডবীনাং চমূনাং
যো যঃ পাঞ্চালগোত্রে শিশুরধিকবযা গর্ভশয্যাং গতো বা .
যো যস্তত্কর্মসাক্ষী চরতি মযি রণে যশ্চ যশ্চ প্রতীপঃ
ক্রোধান্ধস্তস্য তস্য স্বযমপি জগতামন্তকস্যান্তকোঽহম্ ..

ইত্যাদৌ দ্বযোরোজস্তব্ম্ .. ৯..
সমর্পকত্বং কাব্যস্য যত্তু সর্বরসান্ প্রতি .
স প্রসাদো গুণো জ্ঞেযঃ সর্বসাধারণক্রিযঃ .. ১০..

প্রসাদস্তু স্বচ্ছতা শব্দার্থযোঃ . স চ সর্বরসসাধারণো
গুণঃ সর্বরচনাসাধারণশ্চ ব্যঙ্গ্যার্থাপেক্ষযৈব
মুখ্যতযা ব্যবস্থিতো মন্তব্যঃ .
শ্রুতিদুষ্টাদযো দোষা অনিত্যা যে চ দর্শিতাঃ .
ধ্বন্যাত্মন্যেব শৃঙ্গারে তে হেযা ইত্যুদাহৃতাঃ .. ১১..

অনিত্যা দোষাশ্চ যে শ্রুতিদুষ্টাদযঃ সূচিতাস্তেঽপি ন
বাচ্যে অর্থমাত্রে , ন চ ব্যঙ্গ্যে শৃঙ্গারে বা ধ্বনেরনাত্মভূতে .
কিং তর্হি ? ধ্বন্যাত্মন্যেব শৃঙ্গারেঽঙ্গিতযা ব্যঙ্গ্যে
তে হেযা ইত্যুদাহৃতাঃ . অন্যথা হি তেষামনিত্যদোষতৈব ন
স্যাত্ . এবমযমসংলক্ষ্যক্রমদ্যোতো ধ্বনেরাত্মা প্রদর্শিতঃ
সামান্যেন .. ১১..

তস্যাঙ্গানাং প্রভেদা যে প্রভেদাঃ স্বগতাশ্চ যে .
তেষামানন্ত্যমন্যোন্যসম্বন্ধপরিকল্পনে .. ১২..

অঙ্গিতযা ব্যঙ্গ্যো রসাদির্বিবক্ষিতান্যপরবাচ্যস্য
ধ্বনেরেক আত্মা য উক্তস্তস্যাঙ্গানাং
বাচ্য বাচকানুপাতিনামলঙ্কারাণাং যে প্রভেদা
নিরবধযো যে চ স্বগতাস্তস্যাঙ্গিনোঽর্থস্য
রসভাবতদাভাসতত্প্রশমলক্ষণা
বিভাবানুভাবব্যভিচারিপ্রতিপাদনসহিতা অনন্তাঃ
স্বাশ্রযাপেক্ষযা নিঃসীমানো বিশেষাস্তেষা-
মন্যোন্যসম্বন্ধপরিকল্পনে ক্রিযমাণে কস্যচি-
দন্যতমস্যাপি রসস্য প্রকারাঃ পরিসঙ্খ্যাতুং ন শক্যন্তে
কিমুত সর্বেষাম্ . তথা হি শৃঙ্গারস্যাঙ্গিনস্তাব-
দাদ্যৌ দ্বৌ ভেদৌ – সম্ভোগো বিপ্রলম্ভশ্চ .
সম্ভোগস্য চ পরস্পরপ্রেমদর্শনসুরতবিহরণাদি-
লক্ষণাঃ প্রকারাঃ . বিপ্রলম্ভস্যাপ্যভিলাষের্ষ্যা-
বিরহপ্রবাসবিপ্রলম্ভাদযঃ . তেষাং চ প্রত্যেকং
বিভাবানুভাবব্যভিচারিভেদঃ . তেষাং চ
দেশকালাদ্যাশ্রযাবস্থাভেদ ইতি স্বগতভেদাপেক্ষ-
যৈকস্য তস্যাপরিমেযত্বং , কিং পুনরঙ্গপ্রভেদ-
কল্পনাযাম্ . তে হ্যঙ্গপ্রভেদাঃ প্রত্যেকমঙ্গি-
প্রভেদসম্বন্ধপরিকল্পনে ক্রিযমাণে সত্যানন্ত্য-
মেবোপযান্তি .. ১২..

দিঙ্মাত্রং তূচ্যতে যেন ব্যুত্পন্নানাং সচেতসাম্ .
বুদ্ধিরাসাদিতালোকা সর্বত্রৈব ভবিষ্যতি .. ১৩..

দিঙ্মাত্রকথনেন হি ব্যুত্পন্নানাং সহৃদযানামেকত্রাপি
রসভেদে সহালঙ্কারৈরঙ্গাঙ্গিভাবপরিজ্ঞানাদাসাদিতালোকা
বুদ্ধিঃ সর্বত্রৈব ভবিষ্যতি . তত্র – – –
শৃঙ্গারস্যাঙ্গিনো যত্নাদেকরূপানুবন্ধবান্ .
সর্বেষ্বেব প্রভেদেষু নানুপ্রাসঃ প্রকাশকঃ .. ১৪..

অঙ্গিনো হি শৃঙ্গারস্য যে উক্তাঃ প্রভেদাস্তেষু
সর্বেষ্বেকপ্রকারানুবন্ধিতযা প্রবন্ধেন
প্রবৃত্তোঽনুপ্রাসো ন ব্যঞ্জকঃ . অঙ্গিন ইত্যনেনাঙ্গভূতস্য
শৃঙ্গারস্যৈকরূপানুবন্ধ্যনুপ্রাসনিবন্ধনে
কামচারমাহ .. ১৪..
ধ্বন্যাত্মভূতে শৃঙ্গারে যমকাদিনিবন্ধনম্ .
শক্তাবপি প্রমাদিত্বং বিপ্রলম্ভে বিশেষতঃ .. ১৫..

ধ্বনেরাত্মভূতঃ শৃঙ্গারস্তাত্পর্যেণ বাচ্যবাচকাভ্যাং
প্রকাশ্যমানস্তস্মিন্যমকাদীনাং যমকপ্রকারাণাং
নিবন্ধনং দুষ্করশব্দভঙ্গশ্লেষাদীনাং শক্তাবপি
প্রমাদিত্বং . ‘ প্রমাদিত্ব’ মিত্যনেনৈতদ্দর্শ্যতে – – – কাকতালীযেন
কদাচিত্কস্যচিদেকস্য যমকাদের্নিষ্পত্তাবপি ভূম্নালঙ্কারান্তর-
বদ্রসাঙ্গত্বেন নিবন্ধো ন কর্তব্য ইতি . ‘ বিপ্রলম্ভে বিশেষত’ ইত্যনেন
বিপ্রলম্ভে সৌকুমার্যাতিশযঃ খ্যাপ্যতে . তস্মিন্দ্যোত্যে যমকাদেরঙ্গস্য
নিবন্ধো নিযমান্ন কর্তব্য ইতি .. ১৫..
অত্র যুক্তিরভিধীযতে – – –
রসাক্ষিপ্ততযা যস্য বন্ধঃ শক্যক্রিযো ভবেত্ .
অপৃথগ্যত্ননির্বত্যঃ সোঽলঙ্কারো ধ্বনৌ মতঃ .. ১৬..

নিষ্পত্তাবাশ্চর্যভূতোঽপি যস্যালঙ্কারস্য রসাক্ষিপ্ততযৈব
বন্ধঃ শক্যক্রিযো ভবেত্সোঽস্মিন্নলক্ষ্যক্রমব্যঙ্গ্যে
ধ্বনাবলঙ্কারো মতঃ . তস্যৈব রসাঙ্গত্বং মুখ্যমিত্যর্থঃ.
যথা – – –
কপোলে পত্ত্রালী করতলনিরোধেন মৃদিতা
নিপীতো নিঃশ্বাসৈরযমমৃতহৃদ্যোঽধররসঃ .
মুহুঃ কণ্ঠে লগ্নস্তরলযতি বাষ্পস্তনতটীং
প্রিযো মন্যুর্জাতস্তব নিরনুরোধে ন তু বযম্ ..

রসাঙ্গত্বে চ তস্য লক্ষণমপৃথগ্যত্ননির্বর্ত্যত্বমিতি
যো রসং বন্ধুমধ্যবসিতস্য কবেরলঙ্কারস্তাং
বাসনামত্যূহ্য যত্নান্তরমাস্থিতস্য নিষ্পদ্যতে স ন
রসাঙ্গমিতি . যমকে চ প্রবন্ধেন বুদ্ধিপূর্বকং ক্রিযমাণে
নিযমেনৈব যত্নান্তরপরিগ্রহ আপততি শব্দবিশেষান্বেষণরূপঃ .
অলঙ্কারান্তরেষ্বপি তত্তুল্যমিতি চেত্ – – – নৈবম্ ; অলঙ্কারান্তরাণি
হি নিরূপ্যমাণদুর্ঘটনান্যপি রসসমাহিতচেতসঃ
প্রতিভানবতঃ কবেরহম্পূর্বিকযা পরাপতন্তি . যথা কাদম্বর্যাং
কাদম্বরীদর্শনাবসরে . যথা চ মাযারামশিরোদর্শনেন
বিহ্বলাযাং সীতদেব্যাং সেতৌ . যুক্তং চৈতত্ , যতো রসা
বাচ্যবিশেষৈরেবাক্ষেপ্তব্যাঃ . তত্প্রতিপাদকৈশ্চ শব্দৈস্তত্-
প্রকাশিনো বাচ্যবিশেষা এব রূপকাদযোঽলঙ্কারাঃ . তস্মান্ন
তেষাং বহিরঙ্গত্বং রসাভিব্যক্তৌ . যমকদুষ্করমার্গেষু তু
তত্স্থিতমেব . যত্তু রসবন্তি কানিচিদ্যমকাদীনি দৃশ্যন্তে , তত্র
রসাদীনামঙ্গতা . যমকাদীনাং ত্বঙ্গিতৈব . রসাভাসে
চাঙ্গত্বমপ্যবিরুদ্ধম্ . অঙ্গিতযা তু ব্যঙ্গ্যে রসে নাঙ্গত্বং
পৃথক্প্রযত্ননির্বর্ত্যত্বাদ্যমকাদেঃ .

অস্যৈবার্থস্য সঙ্গ্রহশ্লোকাঃ – – –
রসবন্তি হি বস্তূনি সালঙ্কারাণি কানিচিত্ .
একেনৈব প্রযত্নেন নির্বর্ত্যন্তে মহাকবেঃ ..
যমকাদিনিবন্ধে তু পৃথগ্যত্নোঽস্য জাযতে .
শক্তস্যাপি রসেঽঙ্গত্বং তস্মাদেষাং ন বিদ্যতে ..
রসাভাসাঙ্গভাবস্তু যমকাদের্ন বার্যতে .
ধ্বন্যাত্মভূতে শৃঙ্গারে ত্বঙ্গতা নোপপদ্যতে .. ১৬..

ইদানীং ধ্বন্যাত্মভূতস্য শৃঙ্গারস্য ব্যঞ্জকোঽল-
ঙ্কারবর্গ আখ্যাযতে – – –

ধ্বন্যাত্মভূতে শৃঙ্গারে সমীক্ষ্য বিনিবেশিতঃ .
রূপকাদিরলঙ্কারবর্গ এতি যথার্থতাম্ .. ১৭..

অলঙ্কারো হি বাহ্যালঙ্কারসাম্যাদঙ্গিনশ্চাঅরুত্ব-
হেতুরুচ্যতে . বাচ্যালঙ্কারবর্গশ্চ রূপকাদির্যাবানুক্তো
বক্ষ্যতে চ কৈশ্চিত্ , অলঙ্কারাণামনন্তত্বাত্ …

স সর্বোঽপি যদি সমীক্ষ্য বিনিবেশ্যতে তদলক্ষ্যক্রমব্যঙ্গ্যস্য
ধ্বনেরঙ্গিনঃ সর্বস্যৈব চারুত্বহেতুর্নিষ্পদ্যতে .. ১৭..

এষা চাস্য বিনিবেশনে সমীক্ষা – – –
বিবক্ষা তত্পরত্বেন নাঙ্গিত্বেন কদাচন .
কালে চ গ্রহণত্যাগৌ নাতিনির্বহণৈষিতা .. ১৮..
নির্ব্যূঢাবপি চাঙ্গত্বে যত্নেন প্রত্যবেক্ষণম্ .

রূপকাদিরলঙ্কারবর্গস্যাঙ্গত্বসাধনম্ .. ১৯..

রসবন্ধেষ্বত্যাদৃতমনাঃ কবির্যমলঙ্কারং তদঙ্গতযা
বিবক্ষতি . যথা – – –

চলাপাঙ্গাং দৃষ্টিং স্পৃশসি বহুশো বেপথুমতীং
রহস্যাখ্যাযীব স্বনসি মৃদু কর্ণান্তিকচরঃ .
করৌ ব্যাধুন্বত্যাঃ পিবসি রতিসর্বস্বমধরং
বযং তত্ত্বান্বেষান্মধুকর হতাস্ত্বং খলু কৃতী ..

অত্র হি ভ্রমরস্বভাবোক্তিরলঙ্কারো রসানুগুণঃ .
‘ নাঙ্গিত্বেনে’ তি ন প্রাধান্যেন . কদাচিদ্রসাদিতাত্পর্যেণ
বিবক্ষিতোঽপি হ্যলঙ্কারঃ কশ্চিদঙ্গিত্বেন বিবক্ষিতো
দৃশ্যতে . যথা – – –
চক্রাভিঘাতপ্রসভাজ্ঞযৈব চকার যো রাহুবধূজনস্য .
আলিঙ্গনোদ্দামবিলাসবন্ধ্যং রতোত্সবং চুম্বনমাত্রশেষম্ ..

অত্র হি পর্যাযোক্তস্যাঙ্গিত্বেন বিবক্ষা রসাদিতাত্পর্যে সত্যপীতি .
অঙ্গত্বেন বিবক্ষিতমপি যমবসরে গৃহ্ণাতি নানবসরে .
অবসরে গৃহীতির্যথা – – –

উদ্দামোত্কলিকাং বিপাণ্ডুররুচং প্রারব্ধজৃম্ভাং ক্ষণা-
দাযাসং শ্বসনোদ্গমৈরবিরলৈরাতন্বতীমাত্মনঃ .
অদ্যোদ্যানলতামিমাং সমদনাং নারীমিবান্যাং ধ্রুবং
পশ্যন্ কোপবিপাটলদ্যুতি মুখং দেব্যাঃ করিষ্যাম্যহম্ ..

ইত্যত্র উপমা শ্লেষস্য .
গৃহীতমপি চ যমবসরে ত্যজতি তদ্রসানুগুণতযালঙ্কা-
রান্তরাপেক্ষযা . যথা – – –

রক্তস্ত্বং নবপল্লবৈরহমপি শ্লাঘ্যৈঃ প্রিযাযা গুণৈ-
স্ত্বামাযান্তি শিলীমুখাঃ স্মরধনুর্মুক্তাস্তথা মামপি .
কান্তাপাদতলাহতিস্তব মুদে তদ্বন্মমাপ্যাবযোঃ
সর্বং তুল্যমশোক কেবলমহং ধাত্রা সশোকঃ কৃতঃ ..

অত্র হি প্রবন্ধপ্রবৃত্তোঽপি শ্লেষো ব্যতিরেকবিবক্ষযা
ত্যজ্যমানো রসবিশেষম্ পুষ্ণাতি . নাত্রালঙ্কার-
দ্বযসন্নিপাতঃ , কিং তর্হি ? অলঙ্কারান্তরমেব
শ্লেষব্যতিরেকলক্ষণং নরসিংহবদিতি চেত্ – – – ন , তস্য
প্রকারান্তরেণ ব্যবস্থাপনাত্ . যত্র হি শ্লেষবিষয এব
শব্দে প্রকারান্তরেণ ব্যতিরেকপ্রতীতির্জাযতে স তস্য
বিষযঃ . যথা — ‘ স হরির্নাম্না দেবঃ সহরির্বরতুরগ-
নিবহেন ‘ ইত্যাদৌ . অত্র হ্যন্য এব শব্দঃ শ্লেষস্য
বিষযোঽন্যশ্চ ব্যতিরেকস্য . যদি চৈবংবিধে
বিষযেঽলঙ্কারান্তরত্বকল্পনা ক্রিযতে তত্সংসৃষ্টের্বিষ-
যাপহার এব স্যাত্ . শ্লেষমুখেনৈবাত্র ব্যতিরেকস্যাত্ম-
লাভ ইতি নাযং সংসৃষ্টের্বিষয ইতি চেত্ – – – ন ; ব্যতিরেকস্য
প্রকারান্তরেণাপি দর্শনাত্ . যথা – – –
নো কল্পাপাযবাযোরদযরযদলত্ক্ষ্মাধরস্যাপি শম্যা
গাঢোদ্গীর্ণোজ্জ্বলশ্রীরহনি ন রহিতা নো তমঃকজ্জলেন .
প্রাপ্তোত্পত্তিঃ পতঙ্গান্ন পুনরুপগতা মোষমুষ্ণত্বিষো বো
বর্তিঃ সৈবান্যরূপা সুখযতু নিখিলদ্বীপদীপস্য দীপ্তিঃ ..

অত্র হি সাম্যপ্রপঞ্চপ্রতিপাদনং বিনৈব ব্যতিরেকো দর্শিতঃ .
নাত্র শ্লেষমাত্রাচ্চারুত্বপ্রতীতিরস্তীতি শ্লেষস্য
ব্যতিরেকাঙ্গত্বেনৈব বিবক্ষিতত্বাত্ ন স্বতোঽলঙ্কারতেত্যপি
ন বাচ্যম্ . যত এবংবিধে বিষযে সাম্যমাত্রাদপি
সুপ্রতিপাদিতাচ্চারুত্বং দৃশ্যত এব . যথা – – –

আক্রন্দাঃ স্তনিতৈর্বিলোচনজলান্যশ্রান্তধারাম্বুভি-
স্তদ্বিচ্ছেদভুবশ্চ শোকশিখিনস্তুল্যাস্তডিদ্বিভ্রমৈঃ .
অন্তর্মে দযিতামুখং তব শশী বৃত্তিঃ সমৈবাবযো-
স্তত্কিং মামনিশং সখে জলধর ত্বং দগ্ধমেবোদ্যতঃ ..
ইত্যাদৌ .
রসনির্বহণৈকতানহৃদযো যং চ নাত্যন্তং নির্বোঢুমিচ্ছতি .
যথা – – –
কোপাত্কোমললোলবাহুলতিকাপাশেন বদ্ধা দৃঢং
নীত্বা বাসনিকেতনং দযিতযা সাযং সখীনাং পুরঃ .
ভূযো নৈবমিতি স্খলত্কলগিরা সংসূচ্য দুশ্চেষ্টিতং
ধন্যো হন্যত এব নিহ্নুতিপরঃ প্রেযান্রুদত্যা হসন্ ..

অত্র হি রূপকমাক্ষিপ্তমনির্ব্যূঢং চ পরং রসপুষ্টযে .
নির্বোঢুমিষ্টমপি যং যত্নাদঙ্গত্বেন প্রত্যবেক্ষতে যথা – – –

শ্যামাস্বঙ্গং চকিতহরিণীপ্রেক্ষণে দৃষ্টিপাতং
গণ্ডচ্ছাযাং শশিনি শিখিনাং বর্হভারেষু কেশান্ .
উত্পশ্যামি প্রতনুষু নদীবীচিষু ভ্রূবিলাসান্
হন্তৈকস্থং ক্বচিদপি ন তে ভীরু সাদৃশ্যমস্তি ..
ইত্যাদৌ .
স এবমুপনিবধ্যমানোঽলঙ্কারো রসাভিব্যক্তিহেতুঃ
কবের্ভবতি . উক্তপ্রকারাতিক্রমে তু নিযমেনৈব রসভঙ্গহেতুঃ
সংপদ্যতে . লক্ষ্যং চ তথাবিধং মহাকবিপ্রবন্ধেষ্বপি
দৃশ্যতে বহুশঃ . তত্তু সূক্তিসহস্রদ্যোতিতাত্মনাং মহাত্মনাং
দোষোদ্ঘোষণমাত্মন এব দূষণং ভবতীতি ন বিভজ্য দর্শিতম্ .
কিং তু রূপকাদেরলঙ্কারবর্গস্য যেযং ব্যঞ্জকত্বে রসাদিবিষযে
লক্ষণদিগ্দর্শিতা তামনুসরন্ স্বযং চান্যল্লক্ষণমুত্প্রেক্ষমাণো
যদ্যলক্ষ্যক্রমপ্রতিভমনন্তরোক্তমেনং ধ্বনেরাত্মানমুপ-
নিবধ্নাতি সুকবিঃ সমাহিতচেতাস্তদা তস্যাত্মলাভো ভবতি
মহীযানিতি .. ১৮-১৯..

ক্রমেণ প্রতিভাত্যাত্মা যোঽস্যানুস্বানসন্নিভঃ .
শব্দার্থশক্তিমূলত্বাত্সোঽপি দ্বেধা ব্যবস্থিতঃ .. ২০..

অস্য বিবক্ষিতান্যপরবাচ্যস্য ধ্বনেঃ সংলক্ষ্যক্রম-
ব্যঙ্গ্যত্বাদনুরণনপ্রখ্যো য আত্মা সোঽপি শব্দশক্তি-
মূলোঽর্থশক্তিমূলশ্চেতি দ্বিপ্রকারঃ ..
ননু শব্দশক্ত্যা যত্রার্থান্তরং প্রকাশতে স যদি
ধ্বনেঃ প্রকার উচ্যতে তদিদানীং শ্লেষস্য বিষয
এবাপহৃতঃ স্যাত্ , নাপহৃত ইত্যাহ – – –

আক্ষিপ্ত এবালঙ্কারঃ শব্দশক্ত্যা প্রকাশতে .
যস্মিন্ননুক্তঃ শব্দেন শব্দশক্ত্যুদ্ভবো হি সঃ .. ২১..

যস্মাদলঙ্কারো ন বস্তুমাত্রং যস্মিন্ কাব্যে শব্দশক্ত্যা প্রকাশতে
স শব্দশক্ত্যুদ্ভবো ধ্বনিরিত্যস্মাকং বিবক্ষিতম্ . বস্তুদ্বযে চ
শব্দশক্ত্যা প্রকাশমানে শ্লেষঃ . যথা – – –

যেন ধ্বস্তমনোভবেন বলিজিত্কাযঃ পুরাস্ত্রীকৃতো
যশ্চোদ্বৃত্তভুজঙ্গহারবলযো গঙ্গাং চ যোঽধারযত্ .
যস্যাহুঃ শশিমচ্ছিরো হর ইতি স্তুত্যং চ নামামরাঃ
পাযাত্স স্বযমন্ধকক্ষযকরস্ত্বাং সর্বদোমাধবঃ ..

নন্বলঙ্কারান্তরপ্রতিভাযামপি শ্লেষব্যপদেশো ভবতীতি
দর্শিতং ভট্টোদ্ভটেন , তত্পুনরপি শব্দশক্তিমূলো ধ্বনির্নিরব-
কাশ ইত্যাশঙ্ক্যেদমুক্তম্ ‘ আক্ষিপ্ত’ ইতি. তদযমর্থঃ – – –
যত্র শব্দশক্ত্যা সাক্ষাদলঙ্কারান্তরং বাচ্যং
সত্প্রতিভাসতে স সর্বঃ শ্লেষবিষযঃ . যত্র তু শব্দশক্ত্যা
সামর্থ্যাক্ষিপ্তং বাচ্যব্যতিরিক্তং ব্যঙ্গ্যমেবালঙ্কারান্তরং
প্রকাশতে স ধ্বনের্বিষযঃ . শব্দশক্ত্যা সাক্ষাদলঙ্কারান্তর-
প্রতিভা যথা – – –
তস্যা বিনাপি হারেণ নিসর্গাদেব হারিণৌ .
জনযামাসতুঃ কস্য বিস্মযং ন পযোধরৌ ..

অত্র শৃঙ্গারব্যভিচারী বিস্মযাখ্যো ভাবঃ সাক্ষাদ্বিরো-
ধালঙ্কারশ্চ প্রতিভাসত ইতি বিরোধচ্ছাযানুগ্রাহিণঃ শ্লেষস্যাযং
বিষযঃ , ন ত্বনুস্বানোপমব্যঙ্গ্যস্য ধ্বনেঃ . অলক্ষ্যক্রমব্যঙ্গ্যস্য
তু ধ্বনের্বাচ্যেন শ্লেষেণ বিরোধেন বা ব্যঞ্জিতস্য বিষয এব .
যথা মমৈব – – –

শ্লাঘ্যাশেষতনুং সুদর্শনকরঃ সর্বাঙ্গলীলাজিত-
ত্রৈলোক্যাং চরণারবিন্দললিতেনাক্রান্তলোকো হরিঃ .
বিভ্রাণাং মুখমিন্দুরূপমখিলং চন্দ্রাত্মচক্ষুর্দধ-
ত্স্থানে যাং স্বতনোরপশ্যদধিকাং সা রুক্মিণী বোঽবতাত্ ..

অত্র বাচ্যতযৈব ব্যতিরেকচ্ছাযানুগ্রাহী শ্লেষঃ প্রতীযতে .
যথা চ – – –
ভ্রমিমরতিমলসহৃদযতাং প্রলযং মূর্চ্ছাং তমঃ শরীরসাদম্ .
মরণং চ জলদভুজগজং প্রসহ্য কুরুতে বিষং বিযোগিনীনাম্ ..

যথা বা – – –

খণ্ডিতমানসকাঞ্চনপঙ্কজনির্মথিতপরিমলা যস্য .
অখণ্ডিতদানপ্রসরা বাহুপরিঘা ইব গজেন্দ্রাঃ ..

অত্র রূপকচ্ছাযানুগ্রাহী শ্লেষো বাচ্যতযৈবাবভাসতে .
স চাক্ষিপ্তোঽলঙ্কারো যত্র পুনঃ শব্দান্তরেণাভিহিত-
স্বরূপস্তত্র ন শব্দশক্ত্যুদ্ভবানুরণনরূপব্যঙ্গ্য-
ধ্বনিব্যবহারঃ . তত্র বক্রোক্ত্যাদিবাচ্যালঙ্কারব্যবহার
এব . যথা – – –
দৃষ্ট্যা কেশব গোপরাগহৃতযা কিঞ্চিন্ন দৃষ্টং মযা
তেনৈব স্খলিতাস্মি নাথ পতিতাং কিং নাম নালম্বসে .
একস্ত্বং বিষমেষু খিন্নমনসাং সর্বাবলানাং গতি-
র্গোপ্যৈবং গদিতঃ সলেশমবতাদ্গোষ্ঠে হরির্বশ্চিরম্ ..

এবঞ্জাতীযকঃ সর্ব এব ভবতু কামং বাচ্যশ্লেষস্য বিষযঃ .
যত্র তু সামর্থ্যাক্ষিপ্তং সদলঙ্কারান্তরং শব্দশক্ত্যা
প্রকাশতে স সর্ব এব ধ্বনের্বিষযঃ . যথা – – –
‘ অত্রান্তরে কুসুমসমযযুগমুপসংহরন্নজৃম্ভত গ্রীষ্মা-
ভিধানঃ ফুল্লমল্লিকাধবলাট্টহাসো মহাকালঃ ‘ .

যথা চ – – –
উন্নতঃ প্রোল্লসদ্ধারঃ কালাগরুমলীমসঃ .
পযোধরভরস্তন্ব্যাঃ কং ন চক্রেঽভিলাষিণম্ ..

যথা বা – – –
দত্তানন্দাঃ প্রজানাং সমুচিতসমযাকৃষ্টসৃষ্টৈঃ পযোভিঃ
পূর্বাহ্ণে বিপ্রকীর্ণা দিশি দিশি বিরমত্যহ্নি সংহারভাজঃ .
দীপ্তাংশোর্দীর্ঘদুঃখপ্রভবভবভযোদন্বদুত্তারনাবো
গাবো বঃ পাবনানাং পরমপরিমিতাং প্রীতিমুত্পাদযন্তু ..

এষূদাহরণেষু শব্দশক্ত্যা প্রকাশমানে সত্যপ্রাকরণি-
কেঽর্থান্তরে বাক্যস্যাসম্বদ্ধার্থাভিধাযিত্বং মা প্রসাঙ্ক্ষীদিত্য-
প্রাকরণিকপ্রাকরণিকার্থযোরুপমানোপমেযভাবঃ কল্পযিতব্যঃ
সামর্থ্যাদিত্যর্থাক্ষিপ্তোঽযং শ্লেষো ন শব্দোপারূঢ ইতি
বিভিন্ন এব শ্লেষাদনুস্বানোপমব্যঙ্গ্যস্য ধ্বনের্বিষযঃ .
অন্যেঽপি চালঙ্কারাঃ শব্দশক্তিমূলানুস্বানরূপব্যঙ্গ্যে ধ্বনৌ
সম্ভবন্ত্যেব . তথা হি বিরোধোঽপি শব্দশক্তিমূলানুস্বানরূপো
দৃশ্যতে . যথা স্থাণ্বীশ্বরাখ্যজনপদবর্ণনে ভট্টবাণস্য – – –
‘ যত্র চ মাতঙ্গগামিন্যঃ শীলবত্যশ্চ গৌর্যো বিভবরতাশ্চ
শ্যামাঃ পদ্মরাগিণ্যশ্চ ধবলদ্বিজশুচিবদনা মদিরামোদি-
শ্বসনাশ্চ প্রমদাঃ ‘ .

অত্র হি বাচ্যো বিরোধস্তচ্ছাযানুগ্রাহী বা শ্লেষোঽযমিতি ন শক্যং
বক্তুম্ . সাক্ষাচ্ছব্দেন বিরোধালঙ্কারস্যাপ্রকাশিতত্বাত্ . যত্র
হি সাক্ষাচ্ছব্দাবেদিতো বিরোধালঙ্কারস্তত্র হি শ্লিষ্টোক্তৌ
বাচ্যালঙ্কারস্য বিরোধস্য শ্লেষস্য বা বিষযত্বম্ . যথা তত্রৈব – – –

‘ সমবায ইব বিরোধিনাং পদার্থানাম্ . তথা হি – – – সন্নিহিতবালান্ধ-
কারাপি ভাস্বন্মূর্তিঃ ‘ ইত্যাদৌ .

যথা বা মমৈব – – –
সর্বৈকশরণমক্ষযমধীশমীশং ধিযাং হরিং কৄষ্ণম্ .
চতুরাত্মানং নিষ্ক্রিযমরিমথনং নমত চক্রধরম্ ..

অত্র হি শব্দশক্তিমূলানুস্বানরূপো বিরোধঃ স্ফুটমেব প্রতীযতে .
এবংবিধো ব্যতিরেকোঽপি দৃশ্যতে . যথা মমৈব – – –

খং যেঽত্যুজ্জ্বলযন্তি লূনতমসো যে বা নখোদ্ভাসিনো
যে পুষ্ণন্তি সরোরুহশ্রিযমপি ক্ষিপ্তাব্জভাসশ্চ যে
যে মূর্ধস্ববভাসিনঃ ক্ষিতিভৃতাং যে চামরাণাং শিরাং-
স্যাক্রামন্ত্যুভযেঽপি তে দিনপতেঃ পাদাঃ শ্রিযে সন্তু বঃ ..

এবমন্যেঽপি শব্দশক্তিমূলানুস্বানরূপব্যঙ্গ্যধ্বনিপ্রকারাঃ
সন্তি তে সহৃদযৈঃ স্বযমনুসর্তব্যাঃ . ইহ তু গ্রন্থবিস্তরভযান্ন
তত্প্রপঞ্চঃ কৃতঃ .

অর্থশক্ত্যুদ্ভবস্ত্বন্যো যত্রার্থঃ স প্রকাশতে .
যস্তাত্পর্যেণ বস্ত্বন্যদ্ব্যনক্ত্যুক্তিং বিনা স্বতঃ .. ২২..

যত্রার্থঃ স্বসামর্থ্যাদর্থান্তরমভিব্যনক্তি শব্দব্যাপারং
বিনৈব সোঽর্থশক্ত্যুদ্ভবো নামানুস্বানোপমব্যঙ্গ্যো ধ্বনিঃ .

যথা – – –
এবংবাদিনি দেবর্ষৌ পার্শ্বে পিতুরধোমুখী .
লীলাকমলপত্রাণি গণযামাস কেবলম্ ..

অত্র হি লীলাকমলপত্রগণনমুপসর্জনীকৃতস্বরূপং শব্দব্যাপারং
বিনৈবার্থান্তরং ব্যভিচারিভাবলক্ষণং প্রকাশযতি. ন
চাযমলক্ষ্যক্রমব্যঙ্গ্যস্যৈব ধ্বনের্বিষযঃ . যতো যত্র
সাক্ষচ্ছব্দনিবেদিতেভ্যো বিভাবানুভাবব্যভিচারিভ্যো
রসাদীনাং প্রতীতিঃ , স তস্য কেবলস্য মার্গঃ . যথা
কুমারসম্ভবে মধুপ্রসঙ্গে বসন্তপুষ্পাভরণং বহন্ত্যা
দেব্যা আগমনাদিবর্ণনং মনোভবশরসন্ধানপর্যন্তং
শম্ভোশ্চ পরিবৃত্তধৈর্যস্য চেষ্টাবিশেষবর্ণনাদি
সাক্ষচ্ছব্দনিবেদিতম্ . তস্মাদযমন্যো ধ্বনেঃ প্রকারঃ .

যত্র চ শব্দব্যাপারসহাযোঽর্থোঽর্থান্তরস্য ব্যঞ্জকত্বেনো-
পাদীযতে স নাস্য ধ্বনের্বিষযঃ . যথা – – –
সঙ্কেতকালমনসং বিটং জ্ঞাত্বা বিদগ্ধযা .
হসন্নেত্রার্পিতাকূতং লীলাপদ্মং নিমীলিতম্ ..

অত্র লীলাকমলনিমীলনস্য ব্যঞ্জকত্বমুক্ত্যৈব নিবেদিতম্ .

তথা চ – – –
শব্দার্থশক্ত্যা ক্ষিপ্তোঽপি ব্যঙ্গ্যোঽর্থঃ কবিনা পুনঃ .
যত্রাবিষ্ক্রিযতে স্বোক্ত্যা সান্যৈবালঙ্কৃতির্ধ্বনেঃ .. ২৩..

শব্দশক্ত্যার্থশক্ত্যা শব্দার্থশক্ত্যা বাক্ষিপ্তোঽপি ব্যঙ্গ্যোঽর্থঃ
কবিনা পুনর্যত্র স্বোক্ত্যা প্রকাশীক্রিযতে সোঽস্মাদনুস্বানোপমব্যঙ্গ্যাদ্-
ধ্বনেরন্য এবালঙ্কারঃ . অলক্ষ্যক্রমব্যঙ্গ্যস্য বা ধ্বনেঃ
সতি সম্ভবে স তাদৃগন্যোঽলঙ্কারঃ .

তত্র শব্দশক্ত্যা যথা – – –
বত্সে মা গা বিষাদং শ্বসনমুরুজবং সন্ত্যজোর্ধ্বপ্রবৃত্তং
কম্পঃ কো বা গুরুস্তে ভবতু বলভিদা জৃম্ভিতেনাত্র যাহি .
প্রত্যাখ্যানং সুরাণামিতি ভযশমনচ্ছদ্মনা কারযিত্বা
যস্মৈ লক্ষ্মীমদাদ্বঃ স দহতু দুরিতং মন্থমূঢাং পযোধিঃ ..

অর্থশক্ত্যা যথা – – –
অম্বা শেতেঽত্র বৃদ্ধা পরিণতবযসামগ্রণীরত্র তাতো
নিঃশেষাগারকর্মশ্রমশিথিলতনুঃ কুম্ভদাসী তথাত্র .
অস্মিন্ পাপাহমেকা কতিপযদিবসপ্রোষিতপ্রাণনাথা
পান্থাযেত্থং তরুণ্যা কথিতমবসরব্যাহৃতিব্যাজপূর্বম্ ..

উভযশক্ত্যা যথা – – – ‘ দৃষ্ট্যা কেশবগোপরাগহৃতযা ‘
ইত্যাদৌ .. ২৩..

প্রৌঢোক্তিমাত্রনিষ্পন্নশরীরঃ সম্ভবী স্বতঃ .
অর্থোঽপি দ্বিবিধো জ্ঞেযো বস্তুনোঽন্যস্য দীপকঃ .. ২৪..

অর্থশক্ত্যুদ্ভবানুরণনরূপব্যঙ্গ্যে ধ্বনৌ যো ব্যঞ্জকোঽর্থ
উক্তস্তস্যাপি দ্বৌ প্রকারৌ – – – কবেঃ কবিনিবদ্ধস্য বা বক্তুঃ
প্রৌঢোক্তিমাত্রনিষ্পন্নশরীর একঃ , স্বতস্সম্ভবী চ দ্বিতীযঃ .

কবিপ্রৌঢোক্তিমাত্রনিষ্পন্নশরীরো যথা – – –
সজ্জযতি সুরভিমাসো ন তাবদর্পযতি যুবতিজনলক্ষ্যমুখান্ .
অভিনবসহকারমুখান্নবপল্লবপত্রলাননঙ্গস্য শরান্ ..

কবিনিবদ্ধবক্তৃপ্রৌঢোক্তিমাত্রনিষ্পন্নশরীরো যথোদাহৃতমেব – – –
‘ শিখরিণি ‘ ইত্যাদি .

যথা বা – – –
সাদরবিতীর্ণযৌবনহস্তালম্বং সমুন্নমদ্ভ্যাম্ .
অভ্যুত্থানমিব মন্মথস্য দত্তং তব স্তনাভ্যাম্ ..
স্বতঃ সম্ভবী য ঔচিত্যেন বহিরপি সম্ভাব্যমানসদ্ভাবো ন কেবলং
ভণিতিবশেনৈবাভিনিষ্পন্নশরীরঃ . যথোদাহৃতম্
‘ এবংবাদিনি ‘ ইত্যাদি . যথা বা – – –

শিখিপিচ্ছকর্ণপূরা জাযা ব্যাধস্য গর্বিণী ভ্রমতি .
মুক্তাফলরচিতপ্রসাধনানাং মধ্যে সপত্নীনাম্ .. ২৪..

অর্থশক্তেরলঙ্কারো যত্রাপ্যন্যঃ প্রতীযতে .
অনুস্বানোপমব্যঙ্গ্যঃ স প্রকারোঽপরো ধ্বনেঃ .. ২৫..

বাচ্যালঙ্কারব্যতিরিক্তো যত্রান্যোঽলঙ্কারোঽর্থসামর্থ্যাত্-
প্রতীযমানোঽবভাসতে সোঽর্থশক্ত্যুদ্ভবো নামানুস্বানরূপ-
ব্যঙ্গ্যোঽন্যো ধ্বনিঃ .. ২৫..

তস্য প্রবিরলবিষযত্বমাশঙ্ক্যেদমুচ্যতে – – –
রূপকাদিরলঙ্কারবর্গো যো বাচ্যতাং শ্রিতঃ .
স সর্বো গম্যমানত্বং বিভ্রদ্ ভূম্না প্রদর্শিতঃ .. ২৬..

অন্যত্র বাচ্যত্বেন প্রসিদ্ধো যো রূপকাদিরলঙ্কারঃ
সোঽন্যত্র প্রতীযমানতযা বাহুল্যেন প্রদর্শিতস্তত্র-
ভবদ্ভির্ভট্টোদ্ভটাদিভিঃ . তথা চ সসন্দেহাদিষূপমা-
রূপকাতিশযোক্তীনাং প্রকাশমানত্বং প্রদর্শিতমিত্যলঙ্কারা-
ন্তরস্যালঙ্কারান্তরে ব্যঙ্গ্যত্বং ন যত্নপ্রতিপাদ্যম্ .. ২৬..

ইযত্পুনরুচ্যত এব
অলঙ্কারান্তরস্যাপি প্রতীতৌ যত্র ভাসতে .
তত্পরত্বং ন বাচ্যস্য নাসৌ মার্গো ধ্বনের্মতঃ .. ২৭..

অলঙ্কারান্তরেষু ত্বনুরণনরূপালঙ্কারপ্রতীতৌ সত্যামপি
যত্র বাচ্যস্য ব্যঙ্গ্যপ্রতিপাদনৌন্মুখ্যেন চারুত্বং ন
প্রকাশতে নাসৌ ধ্বনের্মার্গঃ . তথা চ দীপকাদাবলঙ্কারে
উপমাযা গম্যমানত্বেঽপি তত্পরত্বেন চারুত্বস্যাব্যবস্থানান্ন
ধ্বনিব্যপদেশঃ .
যথা – – –
চন্দ্রমযূখৈর্নিশা নলিনী কমলৈঃ কুসুমগুচ্ছৈর্লতা .
হংসৈশ্শারদশোভা কাব্যকথা সজ্জনৈঃ ক্রিযতে গুর্বী ..

ইত্যাদিষূপমাগর্ভত্বেঽপি সতি বাচ্যালঙ্কারমুখেনৈব চারুত্বং
ব্যবতিষ্ঠতে ন ব্যঙ্গ্যালঙ্কারতাত্পর্যেণ . তস্মাত্তত্র
বাচ্যালঙ্কারমুখেনৈব কাব্যব্যপদেশো ন্যায্যঃ . যত্র তু ব্যঙ্গ্য-
পরত্বেনৈব বাচ্যস্য ব্যবস্থানং তত্র ব্যঙ্গ্যমুখেনৈব ব্যপদেশো
যুক্তঃ .

যথা —
প্রাপ্তশ্রীরেষ কস্মাত্পুনরপি মযি তং মন্থখেদং বিদধ্যা-
ন্নিদ্রামপ্যস্য পূর্বামনলমনসো নৈব সম্ভাবযামি .
সেতুং বধ্নাতি ভূযঃ কিমিতি চ সকলদ্বীপনাথানুযাত-
স্ত্বয্যাযাতে বিতর্কানিতি দধত ইবাভাতি কম্পঃ পযোধেঃ ..

যথা বা মমৈব – – –
লাবণ্যকান্তিপরিপূরিতদিঙ্মুখেঽস্মিন্
স্মেরেঽধুনা তব মুখে তরলাযতাক্ষি .
ক্ষোভং যদেতি ন মনাগপি তেন মন্যে
সুব্যক্তমেব জলরাশিরযং পযোধিঃ ..

ইত্যেবংবিধে বিষযেঽনুরণনরূপরূপকাশ্রযেণ কাব্যচারুত্ব-
ব্যবস্থানাদ্রূপকধ্বনিরিতি ব্যপদেশো ন্যায্যঃ .

উপমাধ্বনির্যথা – – –
বীরাণাং রমতে ঘুসৃণারুণে ন তথা প্রিযাস্তনোত্সঙ্গে .
দৃষ্টী রিপুগজকুম্ভস্থলে যথা বহলসিন্দূরে ..

যথা বা মমৈব বিষমবাণলীলাযামসুরপরাক্রমণে কামদেবস্য – – –
তত্তেষাং শ্রীসহোদররত্নাহরণে হৃদযমেকরসম্ .
বিম্বাধরে প্রিযাণাং নিবেশিতং কুসুমবাণেন ..

আক্ষেপধ্বনির্যথা – – –
স বক্তুমখিলাঞ্শক্তো হযগ্রীবাশ্রিতান্ গুণান্ .
যোঽম্বুকুম্ভৈঃ পরিচ্ছেদং জ্ঞাতুং শক্তো মহোদধেঃ ..

অত্রাতিশযোক্ত্যা হযগ্রীবগুণানামবর্ণনীযতাপ্রতিপাদন-
রূপস্যাসাধারণতদ্বিশেষপ্রকাশনপরাআস্যাক্ষেপস্য
প্রকাশনম্ .

অর্থান্তরন্যাসধ্বনিঃ শব্দশক্তিমূলানুরণনরূপব্যঙ্গ্যোঽর্থ-
শক্তিমূলানুরণনরূপব্যঙ্গ্যশ্চ সম্ভবতি . তত্রাদ্যস্যোদাহরণম্ – – –

দৈবাযত্তে ফলে কিং ক্রিযতামেতাবত্পুনর্ভণামঃ .
রক্তাশোকপল্লবাঃ পল্লবানামন্যেষাং ন সদৃশাঃ ..

পদপ্রকাশশ্চাযং ধ্বনিরিতি বাক্যস্যার্থান্তরতাত্পর্যেঽপি
সতি ন বিরোধঃ . দ্বিতীযস্যোদাহরণং যথা – – –

হৃদযস্থাপিতমন্যুমপরোষমুখীমপি মাং প্রসাদযন্ .
অপরাদ্ধস্যাপি ন খলু তে বহুজ্ঞ রোষিতুম্ শক্যম্ ..

অত্র হি বাচ্যবিশেষেণ সাপরাধস্যাপি বহুজ্ঞস্য কোপঃ
কর্তুমশক্য ইতি সমর্থকং সামান্যমন্বিতমন্যত্তাত্পর্যেণ
প্রকাশতে .

ব্যতিরেকধ্বনিরপ্যুভযরূপঃ সম্ভবতি. তত্রাদ্যস্যোদাহরণং
প্রাক্প্রদর্শিতমেব.
দ্বিতীযস্যোদাহরণং যথা – – –
জাযেয বনোদ্দেশে কুব্জ এব পাদপো গলিতপত্রঃ .
মা মানুষে লোকে ত্যাগৈকরসো দরিদ্রশ্চ ..

অত্র হি ত্যাগৈকরসস্য দরিদ্রস্য জন্মানভিনন্দনং ত্রুটিতপত্র-
কুব্জপাদপজন্মাভিনন্দনং চ সাক্ষাচ্ছব্দবাচ্যম্ .
তথাবিধাদপি পাদপাত্তাদৃশস্য পুংস উপমানোপমেযত্ব-
প্রতীপূর্বকং শোচ্যতাযামাধিক্যং তাত্পর্যেণ প্রকাশযতি .
উত্প্রেক্ষাধ্বনির্যথা – – –
চন্দনাসক্তভুজগনিঃশ্বাসানিলমূর্চ্ছিতঃ .
মূর্চ্ছযত্যেষ পথিকান্মধৌ মলযমারুতঃ ..

অত্র হি মধৌ মলযমারুতস্য পথিকমূর্চ্ছাকারিত্বং
মন্মথোন্মাথদাযিত্বেনৈব . তত্তু চন্দনাসক্তভুজগ-
নিঃশ্বাসানিলমূর্চ্ছিতত্বেনোত্প্রেক্ষিতমিত্যুত্প্রেক্ষা
সাক্ষাদনুক্তাপি বাক্যার্থসামর্থ্যাদনুরণনরূপা
লক্ষ্যতে . ন চৈবংবিধে বিষযে ইবাদিশব্দপ্রযোগমন্তরেণা-
সংবদ্ধতৈবেতি শক্যতে বক্তুম্ . গমকত্বাদন্যত্রাপি তদপ্রযোগে
তদর্থাবগতিদর্শনাত্ . যথা – – –

ঈর্ষ্যাকলুষস্যাপি তব মুখস্য নন্বেষ পূর্ণিমাচন্দ্রঃ .
অদ্য সদৃশত্বং প্রাপ্যাঙ্গ এব ন মাতি ..

যথা বা – – –
ত্রাসাকুলঃ পরিপতন্ পরিতো নিকেতান্
পুংভির্ন কৈশ্চিদপি ধন্বিভিরন্ববন্ধি .
তস্থৌ তথাপি ন মৃগঃ ক্বচিদঙ্গনাভি
রাকর্ণপূর্ণনযনেষুহতেক্ষণশ্রীঃ ..

শব্দার্থব্যবহারে চ প্রসিদ্ধিরেব প্রমাণম্ .

শ্লেষধ্বনির্যথা – – –
রম্যা ইতি প্রাপ্তবতীঃ পতাকাঃ রাগং বিবিক্তা ইতি বর্ধযন্তীঃ .
যস্যামসেবন্ত নমদ্বলীকাঃ সমং বধূভির্বলভীর্যুবানঃ ..

অত্র বধূভিঃ সহ বলভীরসেবন্তেতি বাক্যার্থপ্রতীতেরনন্তরং বধ্ব
ইব বলভ্য ইতি শ্লেষপ্রতীতিরশব্দাপ্যর্থসামর্থ্যান্মুখ্যত্বেন
বর্ততে .
যথাসঙ্খ্যধ্বনির্যথা – – –
অঙ্কুরিতঃ পল্লবিতঃ কোরকিতঃ পুষ্পিতশ্চ সহকারঃ .
অঙ্কুরিতঃ পল্লবিতঃ কোরকিতঃ পুষ্পিতশ্চ হৃদি মদনঃ ..

অত্র হি যথোদ্দেশমনূদ্দেশে যচ্চারুত্বমনুরণনরূপং
মদনবিশেষণভূতাঙুরিতাদিশব্দগতং তন্মদনসহ-
কারযোস্তুল্যযোগিতাসমুচ্চযলক্ষণাদ্বাচ্যাদতিরিচ্যমান-
মালক্ষ্যতে . এবমন্যেঽপ্যলঙ্কারা যথাযোগং যোজনীযাঃ .

এবমলঙ্কারধ্বনিমার্গং ব্যুত্পাদ্য তস্য প্রযোজনবত্তাং
খ্যাপযিতুমিদমুচ্যতে – – –

শরীরীকরণং যেষাং বাচ্যত্বে ন ব্যবস্থিতম্ .
তেঽলঙ্কারাঃ পরাং ছাযাং যান্তি ধ্বন্যঙ্গতাং গতঃ .. ২৮..

ধ্বন্যঙ্গতা চোভাভ্যাং প্রকারাভ্যাং ব্যঞ্জকত্বেন
ব্যঙ্গ্যত্বেন চ . তত্রেহ প্রকরণাদ্ব্যঙ্গ্যত্বেনেত্যবগন্তব্যম্ .
ব্যঙ্গ্যত্বেঽপ্যলঙ্কারাণাং প্রাধান্যবিবক্ষাযামেব
সত্যাং ধ্বনাবন্তঃপাতঃ . ইতরথা তু গুণীভূতব্যঙ্গ্যত্বং
প্রতিপাদযিষ্যতে .. ২৮..

অঙ্গিত্বেন ব্যঙ্গ্যতাযামপি , অলঙ্কারাণাং দ্বযী গতিঃ – – – কদাচি-
দ্বস্তুমাত্রেণ ব্যজ্যন্তে , কদাচিদলঙ্কারেণ .

তত্র —
ব্যজ্যন্তে বস্তুমাত্রেণ যদালঙ্কৃতযস্তযা .
ধ্রুবং ধ্বন্যঙ্গতা তাসাং
অত্র হেতু : – – –
কাব্যবৃত্তিস্তদাশ্রযা .. ২৯..

যস্মাত্তত্র তথাবিধব্যঙ্গ্যালঙ্কারপরত্বেনৈব কাব্যং প্রবৃত্তম্ .
অন্যথা তু তদ্বাক্যমাত্রমেব স্যাত্ .. ২৯..

তাসামেবালঙ্কৃতীনাম্ – – –
অলঙ্কারান্তরব্যঙ্গ্যভাবে
পুন: ,
ধ্বন্যঙ্গতা ভবেত্ .
চারুত্বোত্কর্ষতো ব্যঙ্গ্যপ্রাধান্যং যদি লক্ষ্যতে .. ৩০..

উক্তং হ্যেতত্ – – – ‘ চারুত্বোত্কর্ষনিবন্ধনা বাচ্যব্যঙ্গ্যযোঃ
প্রাধান্যবিবক্ষা ‘ ইতি . বস্তু মাত্রব্যঙ্গ্যত্বে চালঙ্কারাণা-
মনন্তরোপদর্শিতেভ্য এবোদাহরণেভ্যো বিষয উন্নেযঃ . তদেব-
মর্থমাত্রেণালঙ্কারবিশেষরূপেণ বার্থেনার্থান্তরস্যালঙ্কারস্য
বা প্রকাশনে চারুত্বোত্কর্ষনিবন্ধনে সতি প্রাধান্যেঽর্থশক্ত্যুদ্ভবানু-
রণনরূপব্যঙ্গ্যো নিরবগন্তব্যঃ .. ৩০..

এবং ধ্বনেঃ প্রভেদান্ প্রতিপাদ্য তদাভাসবিবেকং কর্তুমুচ্যতে – – –
যত্র প্রতীযমানোঽর্থঃ প্রম্লিষ্টত্বেন ভাসতে .
বাচ্যস্যাঙ্গতযা বাপি নাস্যাসৌ গোচরো ধ্বনেঃ .. ৩১..

দ্বিবিধোঽপি প্রতীযমানঃ স্ফুটোঽস্ফুটশ্চ . তত্র য এব স্ফুটঃ
শব্দশক্ত্যার্থশক্ত্যা বা প্রকাশতে স এব ধ্বনের্মার্গো নেতরঃ .
স্ফুটোঽপি যোঽভিধেযস্যাঙ্গত্বেন প্রতীযমানোঽবভাসতে সোঽস্যানুরণন-
রূপব্যঙ্গ্যস্য ধ্বনেরগোচরঃ .
যথা – – –
কমলাকরা ন মলিতা হংসা উড্ডাযিতা ন চ সহসা .
কেনাপি গ্রামতডাগেঽভ্রমুত্তানিতং ক্ষিপ্তম্ ..

অত্র হি প্রতীযমানস্য মুগ্ধবধ্বা জলধরপ্রতিবিম্বদর্শনস্য
বাচ্যাঙ্গত্বমেব . এবংবিধে বিষযেঽন্যত্রাপি যত্র ব্যঙ্গ্যাপেক্ষযা
বাচ্যস্য চারুত্বোত্কর্ষপ্রতীত্যা প্রাধান্যমবসীযতে , তত্র
ব্যঙ্গ্যস্যাঙ্গত্বেন প্রতীতের্ধ্বনেরবিষযত্বম্ . যথা – – –

বেতসলতাগহনোড্ডীনশকুনিকোলাহলং শৃণ্বত্যাঃ .
গৃহকর্মব্যাপৃতাযা বধ্বাঃ সীদন্ত্যঙ্গানি ..

এবংবিধো হি বিষযঃ প্রাযেণ গুণীভূতব্যঙ্গ্যস্যোদাহরণত্বেন
নির্দেক্ষ্যতে . যত্র তু প্রকরণাদিপ্রতিপত্ত্যা নির্ধারিতবিশেষো
বাচ্যোঽর্থঃ পুনঃ প্রতীযমানাঙ্গত্বেনৈবাবভাসতে
সোঽস্যৈবানুরণনরূপব্যঙ্গ্যস্য ধ্বনের্মার্গঃ . যথা – – –

উচ্চিনু পতিতং কুসুমং মা ধুনীহি শেফালিকাং হালিকস্নুষে .
এষ তে বিষমবিপাকঃ শ্বসুরেণ শ্রুতো বলযশব্দঃ ..
অত্র হ্যবিনযপতিনা সহ রমমাণা সখী বহিঃশ্রুতবলযকলকলযা
সখ্যা প্রতিবোধ্যতে . এতদপেক্ষণীযং বাচ্যার্থপ্রতিপত্তযে .
প্রতিপন্নে চ বাচ্যেঽর্থে তস্যাবিনযপ্রচ্ছাদনতাত্পর্যেণাভি-
ধীযমানত্বাত্পুনর্ব্যঙ্গ্যাঙ্গত্বমেবেত্যস্মিন্ননুরণনরূপব্যঙ্গ্য-
ধ্বনাবন্তর্ভাবঃ .. ৩১..

এবং বিবক্ষিতবাচ্যস্য ধ্বনেস্তদাভাসবিবেকে প্রস্তুতে সত্যবিবক্ষিত-
বাচ্যস্যাপি তং কর্তুমাহ – – –
অব্যুত্পত্তেরশক্তের্বা নিবন্ধো যঃ স্খলদ্গতেঃ .
শব্দস্য স চ ন জ্ঞেযঃ সূরিভির্বিষযো ধ্বনেঃ .. ৩২..

স্খলদ্গতেরুপচরিতস্য শব্দস্যাব্যুত্পত্তেরশক্তের্বা নিবন্ধো যঃ
স চ ন ধ্বনের্বিষযঃ .

যতঃ – – –
সর্বেষ্বেব প্রভেদেষু স্ফুটত্বেনাবভাসনম্ .
যদ্ব্যঙ্গ্যস্যাঙ্গিভূতস্য তত্পূর্ণং ধ্বনিলক্ষণম্ .. ৩৩..

তচ্চোদাহৃতবিষযমেব .. ৩৩..

ইতি শ্রীরাজানকানন্দবর্ধনাচার্যবিরচিতে ধ্বন্যালোকে দ্বিতীয উদ্দ্যোতঃ ..