ধ্বন্যালোক উদ্যোত ১

.. ধ্বন্যালোকঃ ..
.. প্রথম উদ্যোতঃ ..

স্বেচ্ছাকেসরিণঃ স্বচ্ছস্বচ্ছাযাযাসিতেন্দবঃ .
ত্রাযন্তাং বো মধুরিপোঃ প্রপন্নার্তিচ্ছিদো নখাঃ ..

কাব্যস্যাত্মা ধ্বনিরিতি বুধৈর্যঃ সমাম্নাতপূর্ব-
স্তস্যাভাবং জগদুরপরে ভাক্তমাহুস্তমন্যে .
কেচিদ্বাচাম্ স্থিতমবিষযে তত্ত্বমূচুস্তদীযম্
তেন ব্রূমঃ সহৃদযমনঃপ্রীতযে তত্স্বরূপম্ .. ১..

বুধৈঃ কাব্যতত্ত্ববিদ্ভিঃ কাব্যস্যাত্মা ধ্বনিরিতি সংজ্ঞিতঃ ,
পরম্পরযা যঃ সমাম্নাতপূর্বঃ সম্যক্ আসমন্তাত্ ম্নাতঃ প্রকটিতঃ ,
তস্য সহৃদযজনমনঃপ্রকাশমানস্যাপ্যভাবমন্যে জগদুঃ .
তদভাববাদিনাং চামী বিকল্পাঃ সম্ভবন্তি .

তত্র কেচিদাচক্ষীরন্ – – – শব্দার্থশরীরন্তাবত্কাব্যম্ .
তত্র চ শব্দগতাশ্চারুত্বহেতবোঽনুপ্রাসাদযঃ প্রসিদ্ধা
এব . অর্থগতাশ্চোপমাদযঃ . বর্ণসংঘটনাধর্মাশ্চ যে
মাধুর্যাদযস্তেঽপি প্রতীযন্তে . তদনতিরিক্তবৃত্তযো
বৃত্তযোঽপি যাঃ কৈশ্চিদুপনাগরিকাদ্যাঃ প্রকাশিতাঃ , তা
অপি গতাঃ শ্রবণগোচরম্ . রীতযশ্চ বৈদর্ভীপ্রভৃতযঃ .
তদ্ব্যতিরিক্তঃ কোঽযম্ ধ্বনির্নামেতি .

অন্যে ব্রূযুঃ – – নাস্ত্যেব ধ্বনিঃ . প্রসিদ্ধপ্রস্থানব্যতিরেকিণঃ
কাব্যপ্রকারস্য কাব্যত্বহানেঃ সহৃদযহৃদযাহ্লাদিশব্দার্থ-
মযত্বমেব কাব্যলক্ষণম্ . ন চোক্তপ্রস্থানাতিরেকিণো মার্গস্য
তত্সম্ভবতি . ন চ তত্সমতান্তঃপাতিনঃ সহৃদযান্
কাংশ্চিত্পরিকল্প্য তত্প্রসিদ্ধ্যা ধ্বনৌ কাব্যব্যপদেশঃ
প্রবর্তিতোঽপি সকলবিদ্বন্মনোগ্রাহিতামবলম্বতে .

পুনরপরে তস্যাভাবমন্যথা কথযেযুঃ – – ন সম্ভবত্যেব
ধ্বনির্নামাপূর্বঃ কশ্চিত্ . কামনীযকমনতিবর্তমানস্য তস্যোক্তেষ্বেব
চারুত্বহেতুষ্বন্তর্ভাবাত্ . তেষামন্যতমস্যৈব বা অপূর্বসমাখ্যা-
মাত্রকরণে যত্কিংচন কথনং স্যাত্ .

কিঞ্চ বাগ্বিকল্পানামানন্ত্যাত্ সম্ভবত্যপি বা কস্মিংশ্চিত্ কাব্য-
লক্ষণবিধাযিভিঃ প্রসিদ্ধৈরপ্রদর্শিতে প্রকারলেশে ধ্বনির্ধ্বনিরিতি
যদেতদলীকসহৃদযত্বভাবনামুকুলিতলোচনৈর্নৃত্যতে , তত্র
হেতুং ন বিদ্মঃ . সহস্রশো হি মহাত্মভিরন্যৈরলংকারপ্রকারাঃ
প্রকাশিতাঃ প্রকাশ্যন্তে চ . ন চ তেষামেষা দশা শ্রূযতে .
তস্মাত্ প্রবাদমাত্রং ধ্বনিঃ . ন ত্বস্য ক্ষোদক্ষমম্ তত্ত্বম্ কিংচিদপি
প্রকাশযিতুং শক্যম্ . তথা চান্যেন কৃত এবাত্র শ্লোকঃ – – –

যস্মিন্নস্তি ন বস্তু কিংচন মনঃপ্রহ্লাদি সালংকৃতি
ব্যুত্পন্নৈ রচিতং চ নৈব বচনৈর্বক্রোক্তিশূন্যং চ যত্ .
কাব্যং তদ্ধ্বনিনা সমন্বিতমিতি প্রীত্যা প্রশংসঞ্জডো
নো বিদ্মোঽভিদধাতি কিং সুমতিনা পৃষ্টঃ স্বরূপং ধ্বনেঃ ..

ভাক্তমাহুস্তমন্যে . অন্যে তং ধ্বনিসংজ্ঞিতম্ কাব্যত্মানং
গুণবৃত্তিরিত্যাহুঃ .

যদ্যপি চ ধ্বনিশব্দসংকীর্তনেন কাব্যলক্ষণবিধাযিভির্গুণবৃত্তি-
রন্যো বা ন কশ্চিত্প্রকারঃ প্রকাশিতঃ , তথাপি অমুখ্যবৃত্ত্যা
কাব্যেষু ব্যবহারং দর্শযতা ধ্বনিমার্গো মনাক্স্পৃষ্টোঽপি ন
লক্ষিত ইতি পরিকল্প্যৈবমুক্তম্ – – – ‘ ভাক্তমাহুস্তমন্যে’ ইতি .

কেচিত্পুনর্লক্ষণকরণশালীনবুদ্ধযো ধ্বনেস্তত্ত্বং গিরামগোচরম্
সহৃদযহৃদযসংবেদ্যমেব সমাখ্যাতবন্তঃ . তেনৈবংবিধাসু
বিমতিষু স্থিতাসু সহৃদযমনঃপ্রীতযে তত্স্বরূপং ব্রূমঃ .

তস্য হি ধ্বনেঃ স্বরূপং সকলসত্কবিকাব্যোপনিষদ্ভূতমতিরমণীয-
মণীযসীভিরপি চিরন্তনকাব্যলক্ষণবিধাযিনাং বুদ্ধিভিরনুন্মীলিত-
পূর্বম্ , অথ চ রামাযণমহাভারতপ্রভৃতিনি লক্ষ্যে সর্বত্র
প্রসিদ্ধব্যবহারং লক্ষযতাং সহৃদযানামানন্দো মনসি লভতাং
প্রতিষ্ঠামিতি প্রকাশ্যতে .. ১..

তত্র ধ্বনেরেব লক্ষযিতুমারব্ধস্য ভূমিকাং রচযিতুমিদমুচ্যতে – – –

যোঽর্থঃ সহৃদযশ্লাঘ্যঃ কাব্যাত্মেতি ব্যবস্থিতঃ .
বাচ্যপ্রতীযমানাখ্যৌ তস্য ভেদাবুভৌ স্মৃতৌ .. ২..

কাব্যস্য হি ললিতোচিতসন্নিবেশচারুণঃ শরীরস্যেবাত্মা সাররূপতযা
স্থিতঃ সহৃদযশ্লাঘ্যো যোঽর্থস্তস্য বাচ্যঃ প্রতীযমানশ্চেতি দ্বৌ
ভেদৌ .

তত্র বাচ্যঃ প্রসিদ্ধো যঃ প্রকারৈরুপমাদিভিঃ .
বহুধা ব্যাকৃতঃ সোঽন্যৈঃ – – –
কাব্যলক্ষ্মবিধাযিভিঃ .
– – – ততো নেহ প্রতন্যতে .. ৩..
কেবলমনূদ্যতে পুনর্যথোপযোগমিতি .. ৩..

প্রতীযমানং পুনরন্যদেব বস্ত্বস্তি বাণীষু মহাকবীনাম্ .
যত্তত্প্রসিদ্ধাবযবাতিরিক্তং বিভাতি লাবণ্যমিবাংগনাসু .. ৪..

প্রতীযমানং পুনরন্যদেব বাচ্যাদ্বস্ত্বস্তি বাণীষু মহাকবীনাম্ .
যত্তত্সহৃদযসুপ্রসিদ্ধং প্রসিদ্ধেভ্যোঽলংকৃতেভ্যঃ প্রতীতেভ্যো
বাঽবযবেভ্যো ব্যতিরিক্তত্বেন প্রকাশতে লাবণ্যমিবাংগনাসু . যথা
হ্যংগনাসু লাবণ্যং পৃথঙ্নির্বর্ণ্যমানং নিখিলাবযবব্যতিরেকি
কিমপ্যন্যদেব সহৃদযলোচনামৃতং তত্ত্বান্তরং তদ্বদেব সোঽর্থঃ .

স হ্যর্থো বাচ্যসামর্থ্যাক্ষিপ্তম্ বস্তুমাত্রমলংকাররসাদযশ্চেত্যনেক
প্রভেদপ্রভিন্নৌ দর্শযিষ্যতে . সর্বেষু চ তেষু প্রকারেষু তস্য
বাচ্যাদন্যত্বম্ . তথা হ্যাদ্যস্তাবত্প্রভেদো বাচ্যাদ্ দূরম্ বিভেদবান্ .
স হি কদাচিদ্বাচ্যে বিধিরূপে প্রতিষেধরূপঃ . যথা – – –

ভ্রম ধার্মিক বিস্রব্ধঃ স শুনকোঽদ্য মারিতস্তেন .
গোদাবরীনদীকূললতাগহনবাসিনা দৃপ্তসিংহেন ..

ক্বচিদ্বাচ্যে প্রতিষেধরূপে বিধিরূপো যথা – – –

শ্বশ্রূরত্র শেতে অথবা নিমজ্জতি অত্রাহং দিবসকং প্রলোকয .
মা পথিক রাত্র্যন্ধঃ শয্যাযামাবযোঃ শযিষ্ঠাঃ ..

ক্বচিদ্বাচ্যে বিধিরূপেঽনুভযরূপো যথা – – –

ব্রজ মমৈবৈকস্যা ভবন্তু নিঃশ্বাসরোদিতব্যানি .
মা তবাপি তযা বিনা দাক্ষিণ্যহতস্য জনিষত ..

ক্বচিদ্বাচ্যে প্রতিষেধরূপেঽনুভযরূপো যথা – – –

প্রার্থযে তাবত্প্রসীদ নিবর্তস্ব মুখশশিজ্যোত্স্নাবিলুপ্ততমোনিবহে .
অভিসারিকাণাং বিঘ্নং করোষ্যন্যাসামপি হতাশে ..

ক্বচিদ্বাচ্যাদ্বিভিন্নবিষযত্বেন ব্যবস্থাপিতো যথা – – –

কস্য বা ন ভবতি রোষো দৃষ্ট্বা প্রিযাযাঃ সব্রণমধরম্ .
সভ্রমরপদ্মাঘ্রাণশীলে বারিতবামে সহস্বেদানীম্ ..

অন্যে চৈবংপ্রকারা বাচ্যাদ্বিভেদিনঃ প্রতীযমানভেদাঃ সংভবন্তি .
তেষাং দিঙ্মাত্রমেতত্প্রদর্শিতম্ . দ্বিতীযোঽপি প্রভেদো বাচ্যাদ্বিভিন্নঃ
সপ্রপঞ্চমগ্রে দর্শযিষ্যতে .

তৃতীযস্তু রসাদিলক্ষণঃ প্রভেদো বাচ্যসামর্থ্যাক্ষিপ্তঃ প্রকাশতে ,
ন তু সাক্ষাচ্ছব্দব্যাপারবিষয ইতি বাচ্যাদ্বিভিন্ন এব . তথা হি
বাচ্যত্বং তস্য স্বশব্দনিবেদিতত্বেন বা স্যাত্ . বিভাবাদিপ্রতিপাদনমুখেন
বা . পুর্বস্মিন্ পক্ষে স্বশব্দনিবেদিতত্বাভাবে রসাদীনামপ্রতীতিপ্রসংগঃ .

ন চ সর্বত্র তেষাং স্বশব্দনিবেদিতত্বম্ . যত্রাপ্যস্তি তত্ , তত্রাপি
বিশিশ্টবিভাবাদিপ্রতিপাদনমুখেনৈবৈষাং প্রতীতিঃ .

স্বশব্দেন সা কেবলমনূদ্যতে , ন তু তত্কৃতা বিষযান্তরে তথা
তস্যা অদর্শনাত্ .

ন হি কেবলশৃংগারাদিশব্দমাত্রভাজি বিভাবাদিপ্রতিপাদনরহিতে
কাব্যে মনাগপি রসবত্ত্বপ্রতীতিরস্তি . যতশ্চ স্বাভিধানমন্তরেণ
কেবলেভ্যোঽপি বিভাবাদিভ্যো বিশিশ্টেভ্যো রসাদীনাং প্রতীতিঃ . কেবলাচ্চ
স্বাভিধানাদপ্রতীতিঃ . তস্মাদন্বযব্যতিরেকাভ্যামভিধেযসামর্থ্যা-
ক্ষিপ্তত্বমেব রসাদীনাম্ . ন ত্বভিধেযত্বং কথংচিত্ , ইতি তৃতীযোঽপি
প্রভেদো বাচ্যাদ্বিভিন্ন এবেতি স্থিতম্ . বাচ্যেন ত্বস্য সহেব প্রতীতিরিত্যগ্রে
দর্শযিষ্যতে .

কাব্যস্যাত্মা স এবার্থস্তথা চাদিকবেঃ পুরা .
ক্রৌঞ্চদ্বন্দ্ববিযোগোত্থঃ শোকঃ শ্লোকত্বমাগতঃ .. ৫..

বিবিধবাচ্যবাচকরচনাপ্রপঞ্চচারুণঃ কাব্যস্য স
এবার্থঃ সারভূতঃ . চাদিকবের্বাল্মীকেঃ নিহতসহচরীবিরহকাতর-
ক্রৌঞ্চাক্রন্দজনিতঃ শোক এব শ্লোকতযা পরিণতঃ .

শোকো হি করুণস্থাযিভাবঃ . প্রতীযমানস্য চান্যভেদদর্শনেঽপি
রসভাবমুখেনৈবোপলক্ষণং প্রাধান্যাত্ .

সরস্বতী স্বাদু তদর্থবস্তু নিঃষ্যন্দমানা মহতাং কবীনাম্ .
অলোকসামান্যমভিব্যনক্তি পরিস্ফুরন্তম্ প্রতিভাবিশেষম্ .. ৬..

তত্ বস্তুতত্ত্বং নিঃষ্যন্দমানা মহতাং কবীনাং ভারতী অলোকসামান্যং
প্রতিভাবিশেষং পরিস্ফুরন্তমভিব্যনক্তি . যেনাস্মিন্নতিবিচিত্রকবি-
পরম্পরাবাহিনি সংসারে কালিদাসপ্রভৃতযো দ্বিত্রাঃ পঞ্চষা বা
মহাকবয ইতি গণ্যন্তে .

ইদং চাপরং প্রতীযমানস্যার্থস্য সদ্ভাবসাধনং প্রমাণম্ – – –
শব্দার্থশাসনজ্ঞানমাত্রেণৈব ন বেদ্যতে .
বেদ্যতে স তু কাব্যার্থতত্ত্বজ্ঞৈরেব কেবলম্ .. ৭..

সোঽর্থো যস্মাত্কেবলং কাব্যার্থতত্ত্বজ্ঞৈরেব জ্ঞাযতে . যদি চ
বাচ্যরূপ এবাসাবর্থঃ স্যাত্তদ্বাচ্যবাচকরূপপরিজ্ঞানাদেব
তত্প্রতীতিঃ স্যাত্ . অথ চ বাচ্যবাচকলক্ষণমাত্রকৃতশ্রমাণাং
কাব্যতত্ত্বার্থভাবনাবিমুখানাং স্বরশ্রুত্যাদিলক্ষণমিবাঽপ্র-
গীতানাং গান্ধর্বলক্ষণবিদামগোচর এবাসাবর্থঃ .

এবং বাচ্যব্যতিরেকিণো ব্যঙ্গ্যস্য সদ্ভাবং প্রতিপাদ্য প্রাধান্যং
তস্যৈবেতি দর্শযতি – – –

সোঽর্থস্তদ্ব্যক্তিসামর্থ্যযোগী শব্দশ্চ কশ্চন .
যত্নতঃ প্রত্যভিজ্ঞেযৌ তৌ শব্দার্থৌ মহাকবেঃ .. ৮..

ব্যঙ্গ্যোঽর্থস্তদ্ব্যক্তিসামর্থ্যযোগী শব্দশ্চ কশ্চন , ন শব্দ-
মাত্রম্ . তাবেব শব্দার্থৌ মহাকবেঃ প্রত্যভিজ্ঞেযৌ .ব্যঙ্গ্যব্যঞ্জ-
কাভ্যামেব সুপ্রযুক্তাভ্যাং মহাকবিত্বলাভো মহাকবীনাং , ন
বাচ্যবাচকরচনামাত্রেণ .

ইদানীং ব্যঙ্গ্যব্যঞ্জকযোঃ প্রাধান্যেঽপি যদ্বাচ্যবাচকাবেব
প্রথমমুপাদদতে কবযস্তদপি যুক্তমেবেত্যাহ – – –

আলোকার্থী যথা দীপশিখাযাং যত্নবাঞ্জনঃ .
তদুপাযতযা তদ্বদর্থে বাচ্যে তদাদৃতঃ .. ৯..

যথা হ্যালোকার্থী সন্নপি দীপশিখাযাং যত্নবাঞ্জনো ভবতি তদু-
পাযতযা . ন হি দীপশিখামন্তরেণালোকঃ সম্ভবতি . তদ্ব্যঙ্গ্যমর্থং
প্রত্যাদৃতো জনো বাচ্যেঽর্থে যত্নবান্ ভবতি . অনেন প্রতিপাদকস্য
কবের্ব্যঙ্গ্যমর্থং প্রতি ব্যাপারো দর্শিতঃ .. ৯..

প্রতিপাদ্যস্যাপি তং দর্শযিতুমাহ – – –
যথা পদার্থদ্বারেণ বাক্যার্থঃ সম্প্রতীযতে .
বাচ্যার্থপূর্বিকা তদ্বত্প্রতিপত্তস্য বস্তুনঃ .. ১০..

যথা হি পদার্থদ্বারেণ বাক্যার্থাবগমস্তথা বাচ্যার্থপ্রতীতি-
পূর্বিকা ব্যঙ্গ্যস্যার্থস্য প্রতিপত্তিঃ .. ১০..

ইদানীং বাচ্যার্থপ্রতীতিপূর্বকত্বেঽপি তত্প্রতীতের্ব্যঙ্গ্যস্যার্থস্য
প্রাধান্যং যথা ন ব্যালুপ্যতে তথা দর্শযতি – – –

স্বসামর্থ্যবশেনৈব বাক্যার্থং প্রতিপাদযন্ .
যথা ব্যাপারনিষ্পত্তৌ পদার্থো ন বিভাব্যতে .. ১১..

যথা স্বসামর্থ্যবশেনৈব বাক্যার্থং প্রকাশযন্নপি পদার্থো
ব্যাপারনিষ্পত্তৌ ন ভাব্যতে বিভক্ততযা .. ১১..

তদ্বত্সচেতসাং সোঽর্থো বাচ্যার্থবিমুখাত্মনাম্ .
বুদ্ধৌ তত্ত্বার্থদর্শিন্যাং ঝটিত্যেবাবভাসতে .. ১২..

এবং বাচ্যব্যতিরেকিণো ব্যঙ্গ্যস্যার্থস্য সদ্ভাবং প্রতিপাদ্য প্রকৃত
উপযোজযন্নাহ – – –

যত্রার্থঃ শব্দো বা তমর্থমুপসর্জনীকৃতস্বার্থৌ .
ব্যঙ্ক্তঃ কাব্যবিশেষঃ স ধ্বনিরিতি সূরিভিঃ কথিতঃ .. ১৩..

যত্রার্থো বাচ্যবিশেষঃ বাচকবিশেষঃ শব্দো বা তমর্থং ব্যঙ্ক্তঃ ,
স কাব্যবিশেষো ধ্বনিরিতি .

অনেন বাচ্যবাচকচারুত্বহেতুভ্য উপমাদিভ্যোঽনুপ্রাসাদিভ্যশ্চ
বিভক্ত এব ধ্বনের্বিষয ইতি দর্শিতম্ . যদপ্যুক্তম্ – – –
‘ প্রসিদ্ধপ্রস্থানাতিক্রমিণো মার্গস্য কাব্যহানের্ধ্বনির্নাস্তি’ ইতি ,
তদপ্যযুক্তম্ . যতো লক্ষণকৃতামেব স কেবলং ন প্রসিদ্ধঃ , লক্ষ্যে
তু পরীক্ষ্যমাণে স এব সহৃদযহৃদযাহ্লাদকারি কাব্যতত্ত্বম্ .
ততোঽন্যচ্চিত্রমেবেত্যগ্রে দর্শযিষ্যামঃ .

যদপ্যুক্তম্ – – – ‘ কামনীযকমনতিবর্তমানস্য তস্যোক্তালংকারাদি-
প্রকারেষ্বন্তর্ভাবঃ ‘ ইতি , তদপ্যসমীচীনম্ ; বাচ্যবাচকমাত্রা-
শ্রযিণি প্রস্থানে ব্যঙ্গ্যব্যঞ্জকসমাশ্রযেণ ব্যবস্থিতস্য ধ্বনেঃ
কথমন্তর্ভাবঃ , বাচ্যবাচকচারুত্বহেতবো হি তস্যাংগভূতাঃ ,
স ত্বংগিরূপ এবেতি প্রতিপাদযিষ্যমাণত্বাত্ .

পরিকরশ্লোকাশ্চাত্র – – –

ব্যঙ্গ্যব্যঞ্জকসম্বন্ধনিবন্ধনতযা ধ্বনেঃ .
বাচ্যবাচকচারুত্বহেত্বন্তঃপাতিতা কুতঃ ..

ননু যত্র প্রতীযমানস্যার্থস্য বৈশদ্যেনাপ্রতীতিঃ স নাম মা ভূদ্
ধ্বনের্বিষযঃ . যত্র তু প্রতীতিরস্তি , যথা – – –

সমাসোক্ত্যাক্ষেপানুক্তনিমিত্তবিশেষোক্তিপর্যাযোক্তাপহ্নুতিদীপকসংকরা-
লংকারাদৌ , তত্র ধ্বনেরন্তর্ভাবো ভবিষ্যতীত্যাদি নিরাকর্তুমভিহিতম্
– – – ‘ উপসর্জনীকৃতস্বার্থৌ ‘ ইতি .

অর্থো গুণীকৃতাত্মা , গুণীকৃতাভিধেযঃ শব্দো বা যত্রার্থান্তর-
মভিব্যনক্তি স ধ্বনিরিতি . তেষু কথং তস্যান্তর্ভাবঃ . ব্যঙ্গ্যপ্রাধান্যে
হি ধ্বনিঃ . ন চৈতত্সমাসোক্ত্যাদিষ্বস্তি .

সমাসোক্তৌ তাবত্ – – –
উপোঢরাগেণ বিলোলতারকং তথা গৃহীতং শশিনা নিশামুখম্ .
যথা সমস্তং তিমিরাংশুকং তযা পুরোঽপি রাগাদ্গলিতং ন লক্ষিতম্ ..

ইত্যাদৌ ব্যঙ্গ্যেনানুগতং বাচ্যমেব প্রাধান্যেন প্রতীযতে সমারোপিত-
নাযিকানাযকব্যবহারযোর্নিশাশশিনোরেব বাক্যার্থত্বাত্ .

আক্ষেপেঽপি ব্যঙ্গ্যবিশেষাক্ষেপিণোঽপি বাচ্যস্যৈব চারুত্বং প্রাধান্যেন
বাক্যার্থ আক্ষেপোক্তিসামর্থ্যাদেব জ্ঞাযতে . তথাহি – – তত্র শব্দোপারূঢো
বিশেষাভিধানেচ্ছযা প্রতিষেধরূপো য আক্ষেপঃ স এব ব্যঙ্গ্যবিশেষ-
মাক্ষিপন্মুখ্যং কাব্যশরীরম্ .

চারুত্বোত্কর্ষনিবন্ধনা হি বাচ্যব্যঙ্গ্যযোঃ প্রাধান্যবিবক্ষা .
যথা – – –
অনুরাগবতী সন্ধ্যা দিবসস্তত্পুরস্সরঃ .
অহো দৈবগতিঃ কীদৃক্তথাপি ন সমাগমঃ ..

অত্র সত্যামপি ব্যঙ্গ্যপ্রতীতৌ বাচ্যস্যৈব চারুত্বমুত্কর্ষবদিতি তস্যৈব
প্রাধান্যবিবক্ষা .

যথা চ দীপকাপহ্নুত্যাদৌ ব্যঙ্গ্যত্বেনোপমাযাঃ প্রতীতাবপি প্রাধান্যেনা-
বিবক্ষিতত্বান্ন তযা ব্যপদেশস্তদ্বদত্রাপি দ্রষ্টব্যম্ .

অনুক্তনিমিত্তাযামপি বিশেষোক্তৌ – – –
আহূতোঽপি সহাযৈরোমিত্যুক্ত্বা বিমুক্তনিদ্রোঽপি .
গন্তুমনা অপি পথিকঃ সঙ্কোচং নৈব শিথিলযতি ..

ইত্যাদৌ ব্যঙ্গ্যস্য প্রকরণসামর্থ্যাত্প্রতীতিমাত্রং ন তু তত্প্রতীতিনিমিত্তা
কাচিচ্চারুত্বনিষ্পত্তিরিতি ন প্রাধান্যম্ . পর্যাযোক্তেঽপি যদি প্রাধান্যেন
ব্যঙ্গ্যত্বং তদ্ভবতু নাম তস্য ধ্বনাবন্তর্ভাবঃ . ন তু ধ্বনেস্তত্রান্ত-
র্ভাবঃ . তস্য মহাবিষযত্বেনাঙ্গিত্বেন চ প্রতিপাদযিষ্যমাণত্বাত্ . ন
পুনঃ পর্যাযো ভামহোদাহৃতসদৃশে ব্যঙ্গ্যস্যৈব প্রাধান্যম্ . বাচ্যস্য
তত্রোপসর্জনাভাবেনাবিবক্ষিতত্বাত্ .

অপহ্নুতিদীপকযোঃ পুনর্বাচ্যস্য প্রাধান্যং ব্যঙ্গ্যস্য চানুযাযিত্বং
প্রসিদ্ধমেব .

সংকরালংকারেঽপি যদলংকারোঽলংকারান্তরচ্ছাযামনুগৃহ্ণাতি ,
তদা ব্যঙ্গ্যস্য প্রাধান্যেনাবিবক্ষিতত্বান্ন ধ্বনিবিষযত্বম্ .

অলংকারদ্বযসম্ভাবনাযাং তু বাচ্যব্যঙ্গ্যযোঃ সমং প্রাধান্যম্ .
অথ বাচ্যোপসর্জনীভাবেন ব্যঙ্গ্যস্য তত্রাবস্থানং তদা সোঽপি
ধ্বনিবিষযোঽস্তু , ন তু স এব ধ্বনিরিতি বক্তুং শক্যম্ . পর্যাযোক্ত-
নির্দিষ্টন্যাযাত্ .

অপি চ সংকরালংকারেঽপি চ ক্বচিত্ সংকরোক্তিরেব ধ্বনিসম্ভাবনাং
নিরাকরোতি .

অপ্রস্তুতপ্রশংসাযামপি যদা সামান্যবিশেষভাবান্নিমিত্তনিমিত্তি-
ভাবাদ্বা অভিধীযমানস্যাপ্রস্তুতস্য প্রতীযমানেন প্রস্তুতেনাভি-
সম্বন্ধস্তদাভিধীযমানপ্রতীযমানযোঃ সমমেব প্রাধান্যম্ .

যদা তাবত্সামান্যস্যাপ্রস্তুতস্যাভিধীযমানস্য প্রাকরণিকেন
বিশেষেণ প্রতীযমানেন সম্বন্ধস্তদা বিশেষপ্রতীতৌ সত্যামপি
প্রাধান্যেন তত্সামান্যেনাবিনাভাবাত্সামান্যস্যাপি প্রাধান্যম্ .
যদাপি বিশেষস্য সামান্যনিষ্ঠত্বং তদাপি সামান্যস্য প্রাধান্যে
সামান্যে সর্ববিশেষাণামন্তর্ভাবাদ্বিশেষস্যাপি প্রাধান্যম্ .

নিমিত্তনিমিত্তিভাবে চাযমেব ন্যাযঃ .

যদা তু সারূপ্যমাত্রবশেনাপ্রস্তুতপ্রশংসাযামপ্রকৃতপ্রকৃতযোঃ
সম্বন্ধস্তদাপ্যপ্রস্তুতস্য সরূপস্যাভিধীযমানস্য প্রাধান্যেনা-
বিবক্ষাযাং ধ্বনাবেবান্তঃপাতঃ . ইতরথা ত্বলংকারান্তরমেব .
তদযমত্র সঙ্ক্ষেপঃ – – –

ব্যঙ্গ্যস্য যত্রাপ্রাধান্যং বাচ্যমাত্রানুযাযিনঃ .
সমাসোক্ত্যাদযস্তত্র বাচ্যালঙ্কৃতযঃ স্ফুটাঃ ..
ব্যঙ্গ্যস্য প্রতিভামাত্রে বাচ্যার্থানুগমেঽপি বা .
ন ধ্বনির্যত্র বা তস্য প্রাধান্যং ন প্রতীযতে ..

তত্পরাবেব শব্দার্থৌ যত্র ব্যঙ্গ্যং প্রতি স্থিতৌ .
ধ্বনেঃ স এব বিষযো মন্তব্যঃ সংকরোজ্ঝিতঃ ..

তস্মান্ন ধ্বনেরন্যত্রান্তর্ভাবঃ . ইতশ্চ নান্তর্ভাবঃ ; যতঃ
কাব্যবিশেষোঽংগী ধ্বনিরিতি কথিতঃ . তস্য পুনরংগানি – – –
অলংকারা গুণা বৃত্তযশ্চেতি প্রতিপাদযিষ্যন্তে . ন চাবযব এব
পৃথগ্ভূতোঽবযবীতি প্রসিদ্ধঃ . অপৃথগ্ভাবে তু তদংগত্বং
তস্য . ন তু তত্ত্বমেব . যত্রাপি বা তত্ত্বং তত্রাপি ধ্বনের্মহাবিষয-
ত্বান্ন তন্নিষ্ঠত্বমেব . ‘ সূরিভিঃ কথিত ‘ ইতি বিদ্বদুপজ্ঞেযমুক্তিঃ ,
ন তু যথাকথঞ্চিত্প্রবৃত্তেতি প্রতিপাদ্যতে . প্রথমে হি বিদ্বাংসো
বৈযাকরণাঃ , ব্যাকরণমূলত্বাত্সর্ববিদ্যানাম্ . তে চ শ্রূযমাণেষু
বর্ণেষু ধ্বনিরিতি ব্যবহরন্তি .

তথৈবান্যৈস্তন্মতানুসারিভিঃ সূরিভিঃ কাব্যতত্ত্বার্থদর্শিভি-
র্বাচ্যবাচকসম্মিশ্রঃ শব্দাত্মা কাব্যমিতি ব্যপদেশ্যো ব্যঞ্জক-
ত্বসাম্যাদ্ধ্বনিরিত্যুক্তঃ . ন চৈবংবিধস্য ধ্বনের্বক্ষ্যমাণপ্রভেদ-
তদ্ভেদসংকলনযা মহাবিষযস্য যত্প্রকাশনং তদপ্রসিদ্ধালংকার-
বিশেষমাত্রপ্রতিপাদনেন তুল্যমিতি তদ্ভাবিতচেতসাং যুক্ত এব
সংরম্ভঃ . ন চ তেষু কথঞ্চিদীর্ষ্যযা কলুষিতশেমুষীকত্ব-
মাবিষ্করণীযম্ . তদেবং ধ্বনেস্তাবদভাববাদিনঃ প্রত্যুক্তাঃ .

অস্তি ধ্বনিঃ . স চাসাববিবক্ষিতবাচ্যো বিবক্ষিতান্যপরবাচ্যশ্চেতি
দ্বিবিধঃ সামান্যেন .

তত্রাদ্যস্যোদাহরণম্ – – –
সুবর্ণপুষ্পাং পৃথিবীং চিন্বন্তি পুরুষাস্ত্রযঃ .
শূরশ্চ কৃতবিদ্যশ্চ যশ্চ জানাতি সেবিতুম্ ..

দ্বিতীযস্যাপি – – –
শিখরিণি ক্ব নু নাম কিযচ্চিরং কিমভিধানমসাবকরোত্তপঃ .
তরুণি যেন তবাধরপাটলং দশতি বিম্বফলং শুকশাবকঃ .. ১৩..

যদপ্যুক্তং ভক্তির্ধ্বনিরিতি , তত্প্রতিসমাধীযতে – – –
ভক্ত্যা বিভর্তি নৈকত্বম্ রূপভেদাদযং ধ্বনিঃ

অযমুক্তপ্রকারো ধ্বনির্ভক্ত্যা নৈকত্বং বিভর্তি ভিন্নরূপত্বাত্ .
বাচ্যব্যতিরিক্তস্যার্থস্য বাচ্যবাচকাভ্যাং তাত্পর্যেণ প্রকাশনং
যত্র ব্যঙ্গ্যপ্রাধান্যে স ধ্বনিঃ . উপচারমাত্রং তু ভক্তিঃ .

মা চৈতত্স্যাদ্ভক্তির্লক্ষণং ধ্বনেরিত্যাহ – – –
অতিব্যাপ্তেরথাব্যাপ্তের্ন চাসৌ লক্ষ্যতে তযা .. ১৪..

নৈব ভক্ত্যা ধ্বনির্লক্ষ্যতে . কথম্ ? অতিব্যাপ্তেরব্যাপ্তেশ্চ .
তত্রাতিব্যাপ্তির্ধ্বনিব্যতিরিক্তেঽপি বিষযে ভক্তেঃ সম্ভবাত্ . যত্র হি
ব্যঙ্গ্যকৃতং মহত্সৌষ্ঠবং নাস্তি তত্রাপ্যুপচরিতশব্দবৃত্ত্যা
প্রসিদ্ধ্যনুরোধপ্রবর্তিতব্যবহারাঃ কবযো দৃশ্যন্তে . যথা – – –

পরিম্লানং পীনস্তনজঘনসঙ্গাদুভযত-
স্তনোর্মধ্যস্যান্তঃ পরিমিলনমপ্রাপ্য হরিতম্ .
ইদং ব্যস্তন্যাসং শ্লথভুজলতাক্ষেপবলনৈঃ
কৃশাঙ্গ্যাঃ সন্তাপং বদতি বিসিনীপত্রশযনম্ ..

তথা – – –
শতকৃত্বোঽবরুধ্যতে সহস্রকৃত্বশ্চুম্ব্যতে .
বিরম্য পুনা রম্যতে প্রিযো জনো নাস্তি পুনরুক্তম্ ..

তথা – – –
কুপিতাঃ প্রসন্না অবরুদিতবদনা বিহসন্ত্যঃ .
যথা গৃহীতাস্তথা হৃদযং হরন্তি স্বৈরিণ্যো মহিলাঃ ..

তথা – – –
ভার্যাযাঃ প্রহারো নবলতযা দত্তঃ প্রিযেণ স্তনপৃষ্ঠে .
মৃদুকোঽপি দুঃসহ ইব জাতো হৃদযে সপত্নীনাম্ ..

তথা – – –
পরার্থে যঃ পীডামনুভবতি ভঙ্গেঽপি মধুরো
যদীযঃ সর্বেষামিহ খলু বিকারোঽপ্যভিমতঃ .
ন সম্প্রাপ্তো বৃদ্ধিং যদি স ভৃশমক্ষেত্রপতিতঃ
কিমিক্ষোর্দোষোঽসৌ ন পুনরগুণাযা মরুভুবঃ ..

ইত্যত্রেক্ষুপক্ষেঽনুভবতিশব্দঃ . ন চৈবংবিধঃ কদাচিদপি
ধ্বনের্বিষযঃ .

যতঃ – – –
উক্ত্যন্তরেণাশক্যং যত্তচ্চারুত্বং প্রকাশযন্ .
শব্দো ব্যঞ্জকতাং বিভ্রদ্ ধ্বন্যুক্তের্বিষযীভবেত্ .. ১৫..
অত্র চোদাহৃতে বিষযে নোক্ত্যন্তরাশক্যচারুত্বব্যক্তিহেতুঃ
শব্দঃ . কিঞ্চ – – –

রূঢা যে বিষযেঽন্যত্র শব্দাঃ স্ববিষযাদপি .
লাবণ্যাদ্যাঃ প্রযুক্তাস্তে ন ভবন্তি পদং ধ্বনেঃ .. ১৬..

তেষু চোপচরিতশব্দবৃত্তিরস্তীতি . তথাবিধে চ বিষযে
ক্বচিত্সম্ভবন্নপি ধ্বনিব্যবহারঃ প্রকারান্তরেণ প্রবর্ততে .
ন তথাবিধশব্দমুখেন .

অপি চ – – –
মুখ্যাং বৃত্তিং পরিত্যজ্য গুণবৃত্ত্যাঽর্থদর্শনম্ .
যদুদ্দিশ্য ফলং তত্র শব্দো নৈব স্খলদ্গতিঃ .. ১৭..

তত্র হি চারুত্বাতিশযবিশিষ্টার্থপ্রকাশনলক্ষণে প্রযোজনে
কর্তব্যে যদি শব্দস্যামুখ্যতা তদা তস্য প্রযোগে দুষ্টতৈব স্যাত্ .
ন চৈবম্ ; তস্মাত্ – – –

বাচকত্বাশ্রযেণৈব গুণবৃত্তির্ব্যবস্থিতা .
ব্যঞ্জকত্বৈকমূলস্য ধ্বনেঃ স্যাল্লক্ষণং কথম্ .. ১৮..

তস্মাদন্যো ধ্বনিরন্যা চ গুণবৃত্তিঃ . অব্যাপ্তিরপ্যস্য লক্ষণস্য .
ন হি ধ্বনিপ্রভেদো বিবক্ষিতান্যপরবাচ্যলক্ষণঃ . অন্যে চ
বহবঃ প্রকারা ভক্ত্যা ব্যাপ্যন্তঃ ; তস্মাদ্ভক্তিরলক্ষণম্ .. ১৮..

কস্যচিদ্ ধ্বনিভেদস্য সা তু স্যাদুপলক্ষণম্ .

সা পুনর্ভক্তির্বক্ষ্যমাণপ্রভেদমধ্যাদন্যতমস্য ভেদস্য যদি
নামোপলক্ষণতযা সম্ভাব্যেত ; যদি চ গুণবৃত্ত্যৈব ধ্বনি-
র্লক্ষ্যত ইত্যুচ্যতে তদভিধাব্যাপারেণ তদিতরোঽলংকারবর্গঃ
সমগ্র এব লক্ষ্যত ইতি প্রত্যেকমলংকারাণাং লক্ষণকরণ-
বৈযর্থ্যপ্রসঙ্গঃ . কিং চ

লক্ষণেঽন্যৈঃ কৃতে চাস্য পক্ষসংসিদ্ধিরেব নঃ .. ১৯..

কৃতেঽপি বা পূর্বমেবান্যৈর্ধ্বনিলক্ষণে পক্ষসংসিদ্ধিরেব নঃ ;
যস্মাদ্ধ্বনিরস্তীতি নঃ পক্ষঃ . স চ প্রাগেব সংসিদ্ধ ইত্যযত্ন-
সম্পন্নসমীহিতার্থাঃ সংবৃত্তাঃ স্মঃ . যেঽপি সহৃদযহৃদয-
সংবেদ্যমনাখ্যেযমেব ধ্বনেরাত্মানমাম্নাসিষুস্তেঽপি ন পরীক্ষ্য
বাদিনঃ . যত উক্তযা নীত্যা বক্ষ্যমাণযা চ ধ্বনেঃ সামান্যবিশে-
ষলক্ষণে প্রতিপাদিতেঽপি যদ্যনাখ্যেযত্বং তত্সর্বেষামেব বস্তূনাং
তত্প্রসক্তম্ . যদি পুনর্ধ্বনেরতিশযোক্ত্যানযা কাব্যান্তরাতিশাযি
তৈঃ স্বরূপমাখ্যাযতে তত্তেঽপি যুক্তাভিধাযিন এব ..

ইতি শ্রীরাজানকানন্দবর্ধনাচার্যবিরচিতে ধ্বন্যালোকে প্রথম উদ্দ্যোতঃ ..