তর্কসংগ্রহ (দীপিকা ছাড়া)

.. অন্নম্ভট্টলিখিত তর্কসংগ্রহ ..
নিধায হৃদি বিশ্বেশং বিধায গুরুবন্দনম্ |
বালানাং সুখবোধায ক্রিযতে তর্কসংগ্রহঃ ||

দ্রব্যগুণকর্মসামান্যবিশেষসমবাযাঽভাবাঃ
সপ্তপদার্থাঃ || ১||

তত্র দ্রব্যাণি
পৃথিব্যপ্তেজোবায্বাকাশাকালদিগাত্মমনাংসি নবৈব || ২||

রূপরসগন্ধস্পর্শসংখ্যাপরিমাণপৃথক্ত্বসংযোগবিভগ-
পরত্বাপরত্বগুরুত্ব-
দ্রবত্ব- স্নেহ- শব্দ- বুদ্ধি- সুখ- দুঃখেচ্ছা- দ্বেষ- প্রযত্ন-
ধর্মাধর্ম- সংস্কারাঃ চতুর্বিংশতির্গুণাঃ || ৩||

উত্ক্ষেপণাপক্ষেপণাকুঞ্চনপ্রসারণগমনানি
পঞ্চ কর্মাণি || ৪||

পরমপরং চেতি দ্বিবিধং সামান্যম্ || ৫||

নিত্যদ্রব্যবৃত্তযো বিশেষাস্ত্বনন্তা এব || ৬||

সমবাযস্ত্বেক এব || ৭||

অভাবশ্চতুর্বিধঃ প্রাগভাবঃ প্রধ্বংসাভাবঃ
অত্যন্তাভাবঃ অন্যোন্যাভাবশ্চেতি || ৮||

তত্র গন্ধবতী পৃথিবী |
সা দ্বিবিধানিত্যাঽনিত্যা চ |
নিত্যা পরমাণুরূপা |
অনিত্যা কার্যরূপা |
পুনস্ত্রিবিধা শরীরেন্দ্রিযবিষযভেদাত্ |
শরীরমস্মদাদীনাম্ |
ইন্দ্রিযং গন্দ্ধগ্রাহকং ঘ্রাণম্ |
তচ্চ নাসাগ্রবর্তি |
বিষযো মৃত্পাষাণাদিঃ || ৯||

শীতস্পর্শবত্যঃ আপঃ |
তা দ্বিবিধাঃ নিত্যা অনিত্যাশ্চ |
নিত্যঃ পরমাণুরূপাঃ |
অনিত্যাঃ কার্যরূপাঃ |
পুনস্ত্রিবিধা শরীরেন্দ্রিযবিষযভেদাত্ |
শরীরং বরুণলোকে |
ইন্দ্রিযং রসগ্রাহকং রসনং জিহ্বাগ্রবর্তি |
বিষযঃ সরিত্সমুদ্রাদিঃ || ১০||

উষ্ণস্পর্শবত্তেজঃ |
তচ্চ দ্বিবিধং নিত্যমনিত্যং চ |
নিত্যং পরমাণুরূপং |
অনিত্যং কার্যরূপং |
পুনস্ত্রিবিধং শরীরেন্দ্রিযবিষযভেদাত্ |
শরীরমাদিত্যলোকে প্রসিদ্ধম্ |
ইন্দ্রিযং রূপগ্রাহকং চক্ষুঃ কৃষ্ণতারাগ্রবর্তি |
বিষযশ্চতুর্বিধঃ ভৌমদিব্যৌদর্যাকরজ ভেদাত্ |
ভৌমং বহ্ন্যাদিকম্ |
অবিন্ধনং দিব্যং বিদ্যুদাদি |
ভুক্তস্য পরিণামহেতুরৌদর্যম্ |
আকরজং সুবর্ণাদি || ১১||

রূপরহীতঃ স্পর্শবান্বাযুঃ |
স দ্বিবিধঃ নিত্যোঽনিত্যশ্চ |
নিত্যঃ পরমাণুরূপঃ |
অনিত্যঃ কার্যরূপঃ |
পুনস্ত্রিবিধঃ শরীরেন্দ্রিযবিষযভেদাত্ |
শরীরং বাযুলোকে |
ইন্দ্রিযং স্পর্শগ্রাহকং ত্বক্সর্বশরীরবর্তি |
বিষযো বৃক্ষাদিকম্পনহেতুঃ || ১২||

শরীরান্তঃসংচারী বযুঃ প্রাণঃ |
স চ একোঽপ্যুপাধিভেদাত্প্রাণাপানাদিসংজ্ঞাং লভতে || ১৩||

শব্দগুণকমাকাশম্ |
তচ্চৈকং বিভু নিত্যঞ্চ || ১৪||

অতীতাদিব্যবহারহেতুঃ কালঃ |
স চৈকো বিভুর্নিত্য্শ্চ || ১৫||

প্রাচ্যাদিব্যবহারহেতুর্দিক্ |
সা চৈকা বিভ্বী নিত্যা চ || ১৬||

জ্ঞানাধিকরণমাত্মা |
স দ্বিবিধঃ পরমাত্মা জীবাত্মা চ |
তত্রেশ্বরঃ সর্বজ্ঞঃ পরমাত্মৈক এব |
জীবাত্মা প্রতিশরীরং ভিন্নো বিভুর্নিত্যশ্চ || ১৭||

সুখাদ্যুপলব্ধিসাধনমিন্দ্রিযং মনঃ |
তচ্চ প্রত্যাত্মনিযতত্বাদনন্তং পরমাণুরূপং নিত্যং
চ || ১৮||

চক্ষুর্মাত্রগ্রাহ্যো গুণো রূপম্ |
তচ্চ শুক্লনীলপীতরক্তহরিতকপিশচিন্ন
ভেদাত্সপ্তবিধম্ |
পৃথিবীজলতেজোবৃত্তি |
তত্র পৃথিব্যাং সপ্তবিধম্ |
অভাস্বরশুক্লং জলে |
ভাস্বরশুক্লং তেজসি || ১৯||

রসনগ্রাহ্যো গুণো রসঃ |
স চ মধুরাম্ললবণকটুকষাযতিক্তভেদাত্
ষড্বিধঃ |
পৃথিবীজলবৃত্তিঃ | তত্র পৃথিব্যাং ষড্বিধঃ|
জলে মধুর এব || ২০||

ঘ্রাণগ্রাহ্যো গুণো গন্ধঃ |
স দ্বিবিধঃ সুরভিরসুরভিশ্চ |
পৃথিবীমত্রবৃত্তিঃ || ২১||

ত্বগিন্দ্রিযমাত্রগ্রাহ্যো গুণঃ স্পর্শঃ |
স চ ত্রিবিধঃ শীতোষ্ণানুষ্ণাশীতভেদাত্ |
পৃথিব্যপ্তেজোবাযুবৃত্তিঃ |
তত্র শীতো জলে |
উষ্ণস্তেজসি |
অনুষ্ণাশীতঃ পৃথিবীবায্বোঃ || ২২||

রূপাদিচতুষ্টযং পৃথিব্যাং পাকজমনিত্যং চ |
অন্যত্র অপাকজং নিত্যমনিত্যং চ |
নিত্যগতং নিত্যম্ |
অনিত্যগতমনিত্যম্ || ২৩||

একত্বাদিব্যবহারহেতুঃ সংখ্যা |
সা নবদ্রব্যবৃত্তিঃ একত্বাদিপরার্ধপর্যন্তা |
একত্বং নিত্যমনিত্যং চ |
নিত্যগতং নিত্যম্ |
অনিত্যগতমনিত্যম্ |
দ্বিত্বাদিকং তু সর্বত্রাঽনিত্যমেব || ২৪||

মানব্যবহারাসাধারণকারণং পরিমাণম্ |
নবদ্রব্যবৃত্তিঃ |
তচ্চতুর্বিধম্ |
অনু মহদ্দীর্ঘং হৃস্বং চেতি || ২৫||

পৃথগ্ব্যবহারাসাধারণকারণং পৃথক্ত্বম্ |
সর্বদ্রব্যবৃত্তিঃ || ২৬||

সংযুক্তব্যবহারহেতুঃ সংযোগঃ |
সর্বদ্রব্যবৃত্তিঃ || ২৭||

সংযোগনাশকো গুণো বিভাগঃ |
সর্বদ্রব্যবৃত্তিঃ || ২৮||

পরাপরব্যবহারাসাধারণকারণে পরত্বাপরত্বে |
পৃথিব্যাদিচতুষ্টয মনোবৃত্তিনী |
তে দ্বিবিধে দিক্কৃতে কালকৃতে চ |
দূরস্তে দিক্কৃতং পরত্বম্ |
সমীপস্থে দিক্কৃতমপরত্বম্ |
জ্যেষ্ঠে কালকৃতং পরত্বম্ |
কনিষ্ঠে কালকৃতমপরত্বম্ || ২৯||

আদ্যপতনাসমবাযিকারণং গুরুত্বম্ |
পৃথিবীজলবৃত্তি || ৩০||

আদ্যস্যন্দনাসমবাযিকারণং দ্রবত্বম্ |
পৃথিব্যপ্তেজোবৃত্তি |
তদ্দ্বিবিধং সাংসিদ্ধিকং নৈমিত্তিকং চ |
সাংসিদ্ধিকং জলে |
নৈমিত্তিকং পৃথিবীতেজসোঃ |
পৃথিব্যাং ঘৃতাদাবগ্নি সংযোগজং দ্রবত্বম্ |
তেজসি সুবর্ণাদৌ || ৩১||

চূর্ণাদিপিণ্ডীভাবহেতুর্গুণঃ স্নেহঃ |
জলমাত্রবৃত্তিঃ || ৩২||

শ্রোত্রগ্রাহ্যো গুণঃ শব্দঃ আকাশমাত্রবৃত্তিঃ |
স দ্বিবিধঃ ধ্বন্যাত্মকঃ বর্ণাত্মকশ্চ |
তত্র ধ্বন্যাত্মকঃ ভের্যাদৌ |
বর্ণাত্মকঃ সংস্কৃতভাষাদিরূপঃ || ৩৩||

সর্বব্যবহারহেতুর্গুণো বুদ্ধির্জ্ঞানম্ |
সা দ্বিবিধা স্মৃতিরনুভবশ্চ |
সংস্কারমাত্রজন্যং জ্ঞানং স্মৃতিঃ |
তদ্ভিন্নং জ্ঞানমনুভবঃ |
স দ্বিবিধঃ যথার্থোঽযথার্থশ্চ |
তদ্বতি তত্প্রকারকোঽনুভবো যথার্থঃ |
যথা রজতে ইদং রজতমিতি জ্ঞানম্ |
সৈব প্রমেত্যুচ্যতে |
তদভাববতি তত্প্রকারকোঽনুভবোঽযথার্থঃ |
যথা শুক্তাবিদংরজতমিতি জ্ঞানম্ |
সৈব অপ্রমেত্যুচ্যতে || ৩৪||

যথার্থনুভবশ্চতুর্বিধঃ
প্রত্যক্ষানুমিত্যুপমিতিশাব্দভেদাত্ |
তত্করণমপি চতুর্বিধং
প্রত্যক্ষানুমানোপমানশাব্দভেদাত্ ||৩৫||

অসাধারণং কারণং করণম্ |
কার্যনিযতপূর্ববৃত্তি কারণং |
কার্যং প্রাগভাবপ্রতিযোগি || ৩৬||

কারণং ত্রিবিধং সমবায্যসমবাযিনিমিত্তভেদাত্ |
যত্সমবেতং কার্যমুত্পদ্যতে তত্সমবাযিকারণম্ |
যথা তংতবঃ পটস্য পটশ্চ স্বগতরূপাদেঃ |
কার্যেণ কারণেন বা সহৈকস্মিন্নর্থে সমবেতত্বে সতি
যত্কারণং
তদসমবাযিকারণম্ |
যথা তংতুসংযোগঃ পটস্য তন্তুরূপং পটরূপস্য |

তদুভযভিন্নং কারণং নিমিত্তকারণম্ |
যথা তুরীবেমাদিকং পটস্য |
তদেতত্ত্রিবিধকারণমধ্যে যদসাধারণং কারণং
তদেব করণম্ || ৩৭||

তত্র প্রত্যক্ষজ্ঞানকরণং প্রত্যক্ষম্ |
ইন্দ্রিযার্থসংনিকর্ষজন্যং জ্ঞানং প্রত্যক্ষম্ |
তদ্দ্বিবিধং নির্বিকল্পকং সবিকল্পকং চেতি |
তত্র নিষ্প্রকারণং জ্ঞানং নির্বিকল্পকং যথেদং
কিঞ্চিত্ |
সপ্রকারকং জ্ঞানং সবিকল্পকং যথা ডিত্থোঽযং
ব্রাহ্মণোঽযং শ্যামোঽযং
পাচকোঽযমিতি || ৩৮||

প্রত্যক্ষজ্ঞানহেতুরিন্দ্রিযার্থসংনিকর্ষঃ
ষড্বিধঃ |
সংযোগঃ সংযুক্তসমবাযঃ সংযুক্তসমবেতসমবাযঃ
সমবাযঃ
সমবেতসমবাযঃ বিশেষণবিশেষ্যভাবশ্চেতি |
চক্ষুষা ঘটপ্রত্যক্ষজননে সংযোগঃ সংনিকর্ষঃ |

ঘটরূপপ্রত্যক্ষজননে সংযুক্তসমবাযঃ
সংনিকর্ষঃ |
চক্ষুঃ সংযুক্তে ঘটে রূপস্য সমবাযাত্ |
রূপত্বসামান্যপ্রত্যক্ষে সংযুক্তসমবেতসমবাযঃ
সংনিকর্ষঃ |
চক্ষুঃ সংযুক্তে ঘটে রূপং সমবেতং তত্র
রূপত্বস্য সমবাযাত্ |
শ্রোত্রেণ শব্দসাক্ষাত্কারে সমবাযঃ সংনিকর্ষঃ
কর্ণবিবরবর্ত্যাকাশস্য
শ্রোত্রত্বাত্ শব্দস্যাকাশগুণত্বাদ্গুণগুণিনোশ্চ
সমবাযাত্ |
শব্দত্বসাক্ষাত্কারে সমবেতসমবাযঃ সংনিকর্ষঃ
শ্রোত্র্সমবেতে শব্দে
শব্দত্বস্য সমবাযাত্ |
অভাবপ্রত্যক্ষে বিশেষণবিশেষ্যভাবঃ সংনিকর্ষঃ
ঘটাভাববদ্ভূতলমিত্যত্র
চক্ষুঃ সংযুক্তে ভূতলে ঘটাভাবস্য বিশেষণত্বাত্ |

এবং সংনিকর্ষষট্কজন্যং জ্ঞানং প্রত্যক্ষং
তত্করণমিন্দ্রিযং
তস্মাতিন্দ্রিযং প্রত্যক্ষপ্রমাণমিতি সিদ্ধম্ || ৩৯||

অনুমিতিকরণমনুমানম্ |
পরামর্শজন্যং জ্ঞানমনুমিতিঃ |
ব্যাপ্তিবিশিষ্টপক্ষধর্মতাজ্ঞানং |
যথা বহ্নিব্যাপ্যধূমবানযং পর্বত ইতি জ্ঞানং
পরামর্শঃ |
তজ্জন্যং পর্বতো বহ্নিমানিতি জ্ঞানমনুমিতিঃ |
যত্র যত্র ধূমস্তত্র তত্রাগ্নিরিতি সাহচর্যনিযমো
ব্যাপ্তিঃ |
ব্যাপ্যস্য পর্বতাদিবৃত্তিত্বং পক্ষধর্মতা || ৪০||

অনুমানং দ্বিবিধং স্বার্থং পরার্থং চ |
তত্র স্বার্থং স্বানুমিতিহেতুঃ তথাহি স্বাযমেব
ভূযোদর্শনেন যত্র যত্র
ধূমস্তত্র তত্রাগ্নিরিতি মহানসাদৌ ব্যাপ্তিং গৃহীত্বা
পর্বতসমীপং গতঃ
তদ্গতে চাগ্নৌ সন্দিহানঃ পর্বতে ধূমং পশ্যন্ব্যাপ্তিং
স্মরতি যত্র যত্র
ধূমস্তত্র তত্রাগ্নিরিতি |
তদনন্তরং বহ্নিব্যাপ্যধুমবানযং পর্বত ইতি
জ্ঞানমুত্পদ্যতে অযমেব
লিশ্ণ্গপরামর্শ ইত্যুচ্যতে |
তস্মাত্পর্বতো বহ্নিমানিতি জ্ঞানমনুমিতিঃ উত্পদ্যতে |

তদেতত্স্বার্থানুমানম্ |
যত্তু স্বযং ধুমাগ্নিমনুমায পরংপ্রতিবোধযিতুং
পঞ্চাবযব বাক্যং প্রযুজ্যতে
তত্পরার্থানুমানম্ |
যথা পর্বতো বহ্নিমান্ধূমত্বাদ্যো যো ধূমবান্স
বহ্নিমান্যথা মহানসঃ তথা
চাযং তস্মাত্তথেতি |
অনেন প্রতিপাদিতাল্লিষ্ণ্গাত্পরোঽপ্যগ্নিং প্রতিপদ্যতে || ৪১||

প্রতিজ্ঞাহেতূদাহরণোপনযনিগমনানি পঞ্চাবযবাঃ |

পর্বতো বহ্নিমানিতি প্রতিজ্ঞা |
ধূমবত্বাদিতি হেতুঃ |
যো যো ধূমবান্স বহ্নিমান্যথা মহানস ইত্যুদাহরণম্ |

তথা চাযমিত্যুপনযঃ |
তস্মাত্তথেতি নিগমনম্ || ৪২||

স্বার্থানুমিতিপরার্থানুমিত্যোঃ লিশ্ণ্গপরামর্শ এব
করণম্ |
তস্মাল্লিশ্ণ্গপরামর্শোঽনুমানম্ || ৪৩||

লিশ্ণ্গং ত্রিবিধম্ |
অন্বযব্যতিরেকি কেবলান্বযি কেবলব্যতিরেকি চেতি |
অন্বযেন ব্যতিরেকেণ চ ব্যাপ্তিমদন্বযব্যতিরেকি |
যথা বহ্নৌ সাধ্যে ধূবত্ত্বম্ |
যত্র ধূমস্তত্রাগ্নির্যথা মহানস ইত্যন্বযব্যাপ্তিঃ |
যত্র বহ্নির্নাস্তি তত্র ধূমোঽপি নাস্তি যথা মহাহৃদ
ইতি ব্যপ্তিরেকব্যাপ্তিঃ |
অন্বযমাত্রব্যাপ্তিকং কেবলান্বযি |
যথা ঘটোঽভিধেযঃ প্রমেযত্বাত্পটবত্ |
অত্র প্রমেযত্বাভিধেযত্বযোঃ ব্যতিরেকব্যাপ্তির্নাস্তি
সর্বস্যাপি
প্রমেযত্বাদভিধেযত্বাচ্চ |
ব্যতিরেকমাত্রব্যাপ্তিকং কেবলব্যতিরেকি যথা
পৃথিবীতরেভ্যো ভিদ্যতে গন্ধবত্ত্বাত্ |
যদিতরেভ্যো ন ভিদ্যতে ন তদ্গন্ধবদ্যথা জলম্ |
ন চেযং তথা |
তস্মান্ন তথেতি |
অত্র যদ্গন্ধবত্তদিতরভিন্নমিত্যন্বযদৃষ্টান্তো
নাস্তি পৃথিবীমাত্রস্য
পক্ষত্বাত্ || ৪৪||

সন্দিগ্ধসাধ্যবান্পক্ষঃ |
যথা ধূমবত্ত্বে হেতৌ পর্বতঃ |
নিশ্চিতসাধ্যবান্সপক্ষঃ যথা তত্রৈব মহানসম্ |
নিশ্চিতসাধ্যাঽভাববান্বিপক্ষঃ যথা তত্রৈব
মহাহ্রদঃ || ৪৫||

সব্যভিচারবিরুদ্ধসত্প্রতিপক্ষাসিদ্ধবাধিতাঃ পঞ্চ
হেত্বাভাসাঃ |
সব্যভিচারোঽনৈকান্তিকঃ |
স ত্রিবিধঃ সাধারণাসাধারণানুপসংহারিভেদাত্ |
তত্র সাধ্যাভাববদ্বৃত্তিঃ সাধারণোঽনৈকান্তিকঃ যথা
পর্বতো বহ্নিমান্প্রমেযত্বাদিতি |
প্রমেযত্বস্য বহ্ন্যভাববতি হ্রদে বিদ্যমানত্বাত্ |
সর্বসপক্ষবিপক্ষব্যাবৃত্তঃ পক্ষমাত্রবৃত্তিঃ
অসাধারণঃ |
যথা শব্দো নিত্যঃ শব্দত্বাদিতি |
শব্দত্বং হি সর্বেভ্যো নিত্যেভ্যোঽনিত্যেভ্যশ্চ
ব্যাবৃত্তং শব্দমাত্রবৃত্তিঃ |
অন্বযব্যতিরেকদৃষ্টান্তরহিতোঽনুপসংহারী |
যথা সর্বমনিত্যং প্রমেযত্বাদিতি |
অত্র সর্বস্যাপি পক্ষত্বাদ্দৃষ্টান্তো নাস্তি |
সাধ্যাভাবব্যাপ্তো হেতুর্বিরুদ্ধঃ |
যথা শব্দো নিত্যঃ কৃতকত্বাদিতি |
কৃতকত্বং হি নিত্যত্বাভাবেনাঽনিত্যত্বেন ব্যাপ্তম্ |
যস্য সাধ্যাভাবসাধকং হেত্বন্তরং বিদ্যতে স
সত্প্রতিপক্ষঃ |
যথা শব্দো নিত্যঃ শ্রাবণত্বাচ্ছব্দত্ববত্ |
শব্দোঽনিত্যঃ কার্যত্বাদ্ঘটবত্ |
অসিদ্ধস্ত্রিবিধঃ আশ্রযাসিদ্ধঃ স্বরূপাসিদ্ধো
ব্যাপ্যত্বাসিদ্ধশ্চেতি |
আশ্রযাসিদ্ধো যথা গগনারবিন্দং সুরভি
অরবিন্দত্বাত্সরোজারবিন্দবত্ |
অত্র গগনারবিন্দমাশ্রযঃ স চ নাস্ত্যেব |
স্বরূপাসিদ্ধো যথা শব্দো গুণশ্চাক্ষুষত্বাত্ |
অত্র চাক্ষুষত্বং শব্দং নাস্তি শব্দস্য
শ্রাবণত্বাত্ |
সোপাধিকো হেতুঃ ব্যাপ্যত্বাসিদ্ধঃ |
সাধ্যব্যাপকত্বে সতি সাধনাব্যাপকত্বমুপাধিঃ |
সাধ্যসমানাধিকরণাত্যন্তাভাবাপ্রতিযোগিত্বং
সাধ্যব্যাপকত্বম্ |
সাধনবন্নিষ্ঠাত্যন্তাভাবপ্রতিযোগিত্বং
সাধনাব্যাপকত্বম্ |
পর্বতো ধূমবান্বহ্নিমত্বাদিত্যত্রার্দ্রেন্ধনসংযোগ
উপাধিঃ |
তথাহি |
যত্র ধূমস্তত্রার্দ্রেন্ধনসংযোগ ইতি সাধ্যব্যাপকতা |

যত্র বহ্নিস্তত্রার্দ্রেন্ধনসংযোগো নাস্ত্যযোগোলকে
আর্দ্রেন্ধনসংযোগাভাবাদিতি
সাধনাব্যাপকতা |
এবং সাধ্যব্যাপকত্বে অস্তি
সাধনাব্যাপকত্বার্দ্রেন্ধনসংযোগ উপাধিঃ |
সোপাধিকত্বাদ্বহ্নিমত্ত্বং ব্যাপ্যত্বাসিদ্ধম্ |
যস্য সাধ্যাভাবঃ প্রমাণান্তরেণ নিশ্চিতঃ স
বাধিতঃ |
যথা বহ্নিরনুষ্ণো দ্রব্যত্বাজ্জলবত্ |
অত্রানুষ্ণত্বং সাধ্যং তদভাব উষ্ণত্বং
স্পর্শনপ্রত্যক্ষেণ গুহ্যতে
ইতি বাধিতত্বম্ || ৪৬||

উপমিতিকরণমুপমানম্ |
সংজ্ঞাসংজ্ঞিসম্বন্ধজ্ঞানমুপমিতিঃ |
তত্করণং সাদৃশ্যজ্ঞানম্ |
অতিদেশবাক্যার্থস্মরণমবান্তর ব্যাপারঃ |
তথা হি
কশ্চিদ্গবযশব্দার্থমজানন্কুতশ্চিদারণ্যকপুরুষাদ্গোসদৃশো
গবয ইতি শ্রুত্বা বন গতো বাক্যার্থং
স্মরন্গোসদৃশং পিণ্ডং পশ্যতি |
তদনন্তরমসৌ গবযশব্দবাচ্য
ইত্যুপমিতিরুত্পদ্যতে || ৪৭||

আপ্তবাক্যং শদ্বঃ |
আপ্তস্তু যথার্থবক্তা |
বাক্যং পদসমূহঃ |
যথা গামানযেতি |
শক্তং পদম্ |
অস্মাত্পদাদযমর্থো বোদ্ধব্য ইতীশ্বরসংকেতঃ
শক্তিঃ || ৪৮||

আকাশ্ণ্ক্ষা যোগ্যতা সংনিধিশ্চ বাক্যার্থজ্ঞানহেতুঃ
পদস্য
পদান্তরব্যতিরেকপ্রযুক্তান্বযাননুভাবকত্বমাকাশ্ণ্ক্ষা |

অর্থাবাঘো যোগ্যতা |
পদানামবিলম্বেনোচ্চারারণং সংনিধিঃ || ৪৯||

আকাশ্ণ্ক্ষাদিরহিতং বাক্যমপ্রমাণম্ |
যথা গৌরশ্বঃ পুরুষো হস্তীতি ন
প্রমাণমাকাশ্ণ্ক্ষাবিরহাত্ |
অগ্নিনা সিঞ্চেদিতি ন প্রমাণং যোগ্যতাবিরহাত্ |
প্রহরে প্রহরেঽসহোচ্চারিতানি গামানযেত্যাদিপদানি ন
প্রমাণং সাম্নিধ্যাভাবাত্ || ৫০||

বাক্যং দ্বিবিধম্ |
বৈদিকং লৌকিকং চ |
বৈদিকমীশ্বরোক্তত্বাত্সর্বমেব প্রমাণম্ |
লৌকিকং ত্বাপ্তোক্তং প্রমাণম্ |
অন্যদপ্রমাণম্ || ৫১||

বাক্যার্থ্জ্ঞানং শব্দজ্ঞানম্ |
তত্করণং শব্দঃ || ৫২||

অযথার্থানুভবস্ত্রিবিধঃ সংশযবিপর্যযতর্কভেদাত্ |

একস্মিন্ধর্মিণি বিরুদ্ধনানাধ্র্ম্বৈশিষ্ট্যাবগাহি
জ্ঞানং সংশযঃ |
যথা স্থাণুর্বা পুরুষো বেতি |
মিথ্যাজ্ঞানং বিপর্যযঃ |
যথা শুক্তৌ ইদং রজতমিতি |
ব্যাপ্যারোপেণ ব্যাপকারোপস্তর্কঃ যথা যদি বহ্নির্ন
স্যাত্তর্হি ধূমোঽপি ন স্যাদিতি || ৫৩||

স্মৃতিরপি দ্বিবিধা |
যথার্থাযথার্থা চ |
প্রমাজন্যা যথার্থা |
অপ্রমাজন্যাঽযথার্থা || ৫৪||

সর্বেষামনুকূলতযা বেদনীযং সুখম্ || ৫৫||

সর্বেষাং প্রতিকূলতযা বেদনীযং দুঃখম্ || ৫৬||

ইচ্ছা কামঃ || ৫৭||

ক্রোধো দ্বেষঃ || ৫৮||

কৃতিঃ প্রযত্নঃ || ৫৯||

বিহিতকর্মজন্যো ধর্মঃ || ৬০||

নিষিদ্ধকর্মজন্যস্ত্বধর্মঃ || ৬১||

বুদ্ধ্যাদযোঽষ্টাবাত্মমাত্রবিশেষগুণাঃ || ৬২||

বুদ্ধীচ্ছা প্রযত্না দ্বিবিধাঃ |
নিত্যা অনিত্যাশ্চ |
নিত্যা ঈশ্বরস্যানিত্যা জীবস্য || ৬৩||

সংস্কারস্ত্রিবিধঃ |
বেগো ভাবনা স্থিতিস্থাপকশ্চেতি |
বেগঃ পৃথিব্যাদিচতুষ্টযমনোবৃত্তিঃ |
অনুভবজন্যা স্মৃতিহেতুর্ভাবনা |
আত্মমাত্রবৃত্তিঃ |
অন্যথাকৃতস্য পুনস্তদবস্থাপকঃ স্থিতিস্থাপকঃ
কটাদিপৃথিবীবৃত্তিঃ || ৬৪||

চলনাত্মকং কর্ম |
ঊর্ধ্বদেশসংযোগহেতুরুত্ক্ষেপণম্ |
অধোদেশসংযোগহেতুরপক্ষেপণম্ |
শরীরসংনিকৃষ্টসংযোগহেতুরাকুঞ্চনম্ |
বিপ্রকৃষ্টসংযোগহেতুঃ প্রসারণম্ |
অন্যত্সর্বং গমনম্ |
পৃথিব্যাদিচতুষ্টযমনোমাত্রব্ট্তি || ৬৫||

নিত্যমেকমনেকানুগতং সামান্যং
দ্রব্যগুণকর্মবৃত্তি |
তদ্দ্বিবিধং পরাঽপরভেদাত্ |
পরং সত্তা |
অপরং দ্রব্যত্বাদিঃ || ৬৬||

নিত্যদ্রব্যবৃত্তযো ব্যাবর্তকা বিশেষাঃ || ৬৭||

নিত্যসম্বন্ধঃ সমবাযঃ |
অযুতসিদ্ধবৃত্তিঃ |
যযোর্দ্বযোর্মধ্যে
একমবিনশ্যদপরাঽশ্রিতমেবাবতিষ্ঠতে
তাবযুতসিদ্ধৌ
যথা অবযবাঽবযবিনৌ ক্রিযাক্রিযাবন্তৌ জাতিব্যক্তী
বিশেষনিত্যদ্রব্যে চেতি || ৬৮||

অনাদিঃ সান্তঃ প্রাগভাবঃ |
উত্পত্তেঃ পূর্বং কার্যস্য |
সাদিরনন্তঃ প্রধ্বংসঃ |
উত্পত্যনন্তরং কার্যস্য |
ত্রৈকালিকসংসর্গাবচ্ছিন্নপ্রতিযোগিতাকোঽত্যন্তাভাবঃ |

যথা ভূতলে ঘটো নাস্তীতি |
তাদাত্ম্যসম্বন্ধাবচ্ছিন্নপ্রতিযোগিতাকোঽন্যোন্যাভাবঃ |
যথা ঘটঃ পটো নেতি || ৬৯||

সর্বেষাং পদার্থানাং যথাযথমুক্তেষ্বন্তর্ভাবাত্সপ্তৈব
পদার্থা ইতি সিদ্ধম্ || ৭০||

কণাদন্যাযমতযোর্বালব্যুত্পত্তিসিদ্ধযে |
অন্নংভট্টেন বিদুষা রচিতস্তর্কসংগ্রহঃ ||

ইতি শ্রীমহামহোপাধ্যায
অন্নংভট্টবিরচিততর্কসংগ্রহঃ সমাপ্তঃ ||